Адуцил таблетки 50 мг

Бір таблетка құрамында белсенді зат - 50.00 мг және 100.00 мг цилостазол, қосымша заттар: жүгері крахмалы, микрокристалды целлюлоза 101, гипромеллоза Е5, кальций кармеллозасы, микрокристалды целлюлоза 12, магний стеараты, тазартылған су. Сыртқы түрінің, иісінің, дәмінің сипаттамасы Таблетканың бір жағында «50» өрнегі бар ақ немесе ақ дерлік түсті жалпақ дөңгелек таблеткалар (50 мг доза үшін). Таблетканың бір жағында «100» өрнегі бар ақ немесе ақ дерлік түсті жалпақ дөңгелек таблеткалар (100 мг доза үшін).

- тыныштық күйінде ауыруды сезінбейтін және шеткері тіндер некрозының белгілері (Фонтейн бойынша ІІ сатыдағы шеткері артериялар ауруы) жоқ мезгіл-мезгіл ақсаңдауы бар пациенттерде ауырсынусыз жүру ұзақтығын және ең ұзақ жүріп өтетін қашықтықты арттыру - өмір салтын өзгерту (шылым шегуден бас тарту және [бақыланатын] дене жаттығулар бағдарламасы) және басқа тиісті араласулар мезгіл-мезгіл ақсаңдау симптомдарының жеткілікті жақсаруына әкелмеген пациенттерде екінші желідегі ем ретінде Қолданудың басталуына қажетті мәліметтер тізбесі

• Әсер ету механизмі Цилостазол – тромбоциттер агрегациясының тежегіші. Цилостазол тегіс бұлшықеттер жасушаларының пролиферациясын да бәсеңдетеді және тромбоциттік өсу факторының және тромбоциттердегі PF-4 фактордың тромбоциттермен босап шығу реакциясын тежейді. Фармакодинамикалық әсерлері Цилостазол жүгіріс жолында тест өткізілгенде мезгіл-мезгіл ақсаңдау кезіндегі абсолютті арақашықтық (немесе ең ұзақ жүріп өту арақашықтығы - ЕЖА) және мезгіл-мезгіл ақсаңдау кезіндегі бастапқы арақашықтық (немесе ауырсынусыз жүріп өту арақашықтығы - АЖА) бойынша бағаланатын дене жүктемелеріне төзімділік қабілетін жақсартады. Цилостазол in vitro егеуқұйрықтар мен адамда тегіс бұлшықеттер жасушаларының пролиферациясын да бәсеңдетеді және тромбоциттік өсу және адам тромбоциттеріндегі PF-4 факторының тромбоциттермен босап шығу реакциясын тежейді. Жануарларда және адамдардың қатысуымен жүргізілген зерттеулер (in vivo және ex vivo) цилостазолдың тромбоциттер агрегациясын қайтымсыз тежеуін көрсетті. Тежеу әсері агреганттар қатарына қатысты танылады (жылжу ширығысын, арахидон қышқылын, коллаген, АДФ және адреналинді қоса); осы әсері 12 сағатқа дейін сақталады, ал цилостазол қабылдауды тоқтатудан кейін агрегацияның қалыпқа келуі 48-96 сағат ішінде күрт гиперагрегацияға жауап әсерінсіз жүзеге асты. Цилостазол қабылдап жүрген пациенттерде препараттың плазма айналымындағы липидтерге әсеріне баға берілді. 12 апта емделуден кейін цилостазол тәулігіне екі рет 100 мг дозада триглицеридтер деңгейінің (ТГ) 0,33 ммоль/л (15%) төмендеуіне және ТЖЛП холестерині (ТЖЛП-Хс) деңгейінің 0,10 ммоль/л (10%) артуына алып келді. Клиникалық тиімділігі және қауіпсіздігі Плацебо-бақыланатын тоғыз зерттеу (1 634 пациент цилостазолмен ем қабылдаған) барысында алынған деректер цилостазолдың жүгіріс жолындағы тест шеңберінде абсолютті жүру ұзақтығының (ACD немесе ең ұзақ жүріп өтетін қашықтық) және ақсаңдаусыз жүру ұзақтығының (ICD, немесе ауыру белгілерінсіз жүріп өтетін қашықтық) өзгерістерімен бағаланатын дене жүктемесіне төзімділік қабілетін жақсартатынын көрсетті. Цилостазолды тәулігіне екі рет 100 мг дозада қабылдаумен 24 апта емделуден кейін ЕЖА қашықтығының орташа ұзаруы, орта есеппен, 60,4-тен 129,1 метрге дейін құрады, ал АЖА қашықтығының орташа ұзаруы 47,3-тен 93,6 метрге дейін құрады. Сараланған орташа өзгерістерді есептеуге негізделген тоғыз зерттеу деректеріне жасалған мета-талдау тәулігіне екі рет 100 мг цилостазол қабылдау кезінде, бастапқы сәтпен салыстырғанда, осындай емдеудің ең ұзақ жүріп өтетін қашықтықтың (ACD) 42 м ұзаруымен айқындалатын плацебодан елеулі абсолютті артықшылығы байқалды. Бұл, плацебомен сылыстырғанда, 100% салыстырмалы жақсаруына сәйкес келеді. Осы әсерінің айқындылығы диабетпен науқастарда, диабеттен зардап шекпеген тұлғаларға қарағанда, аз білінді. Цилостазолмен емдеудің ұзақ мерзімді әсерлерін бағалау мақсатында өлімге ұшырау мен қауіпсіздігін бағалауға екпін берілетін IV фазаның рандомизацияланған, салыстырмалы жасырын, плацебо-бақыланатын зерттеуі жүргізілді. Мезгіл-мезгіл ақсаңдауы бар және жүрек жеткіліксіздігінен зардап шекпейтін, жалпы жиынтығы, 1439 пациент, көп дегенде, үш жыл бойы цилостазолмен немесе плацебомен ем қабылдады. Зерттелетін препаратпен емдеу кезінде (зерттелетін препаратпен емдеудің 18 ай орташа ұзақтығында) өлім жағдайларының жиілігі ретінде Каплан-Мейер шкаласы бойынша бағаланатын 36 ай өткен соң өлімге ұшырау көрсеткіштері цилостазол тобында 5,6% (95%-дық СА 2,8-ден 8,4% дейін) және плацебо тобында 6,8% (95%-дық СА 1,9-дан 11,5% дейін) құрады. Цилостазолмен ұзақ уақыт емдеу қауіпсіздік мәселелеріне әкелген жоқ.

Дозалау режимі Цилостазолдың ұсынылатын дозасы тәулігіне 2 рет 100 мг құрайды. Адуцил препаратымен емді мезгіл-мезгіл ақсаңдауды емдеу тәжірибесі бар дәрігерлер тағайындауы тиіс. Дәрігер қажетті әсері немесе симптомдар жақсаруы болмаған жағдайда Адуцил препаратын тоқтату мақсатында 3 ай емдеуден кейін пациентті қайта тексеруден өткізуі тиіс. Адуцил препаратын қабылдап жүрген пациенттер өмір салтының өзгерістерін ұстануы (шылым шегуден бас тарту және дене жаттығулары) және жүрек-қантамыр құбылыстарының даму қаупін азайту үшін фармакологиялық араласуларды (мысалы, липид төмендететін антитромбоциттік дәрілер қабылдауды) жалғастыру керек. Цилостазол аталған емдеу түрлерін алмастырмайды. CYP3A4 қуатты тежегіштері болып табылатын дәрілік заттар, мысалы, кейбір макролидті препараттар, азолдар тобының зеңге қарсы дәрілерін, протеаза тежегіштерін немесе CYP2C19 қуатты тежегіштері болып табылатын дәрілік заттар, мысалы, омепразол қабылдап жүрген пациенттер үшін дозаны тәулігіне екі рет 50 мг дейін азайту ұсынылады. Балалар және жасөспірімдер Препаратты қолдану қауіпсіздігі мен тиімділігіне қатысты деректер болмауына орай балаларға тағайындау ұсынылмайды. Егде жастағы пациенттер Пациенттердің осы санатында дозаны түзету қажет емес. Бүйрек функциясының бұзылуы Креатинин клиренсі > 25 мл/мин пациенттерде дозаны түзету қажет емес. Препарат креатинин клиренсі < 25 мл/мин болатын пациенттерге қарсы көрсетілімді. Бауыр функциясының бұзылуы Бауыр ауруларының жеңіл түрлері бар пациенттерде дозаны түзету қажет емес. Бауыр функциясының орташа және ауыр бұзылуы бар пациенттер жөнінде деректер жоқ. Цилостазол бауыр ферменттерімен белсенді метаболизденетіндіктен, ол бауыр функциясының орташа немесе ауыр бұзылуы бар пациенттерге қарсы көрсетілімді. Енгізу әдісі және жолы Ішке қолданылады. Адуцил препаратын таңертең және кешке ас ішуден 30 минут бұрын қабылдау керек. Ас ішу кезінде цилостазол қабылдау қан плазмасында цилостазолдың ең жоғары концентрациясын (Cmax) жоғарылата алады, бұл жағымсыз әсерлер қаупін арттыруы мүмкін. Дәрілік препараттың бір немесе бірнеше дозасын өткізіп алу кезіндегі қажетті шаралар Егер Сіз дозаны қабылдау уақытын өткізіп алсаңыз, келесі дозаны қабылдау уақыты басталғанша күте тұрыңыз, ал Өзіңіздің келесі таблеткаңызды әдеттегі режимде қабылдаңыз. Өткізіп алған дозаны қабылдауды толықтыру үшін ҚОСАРЛЫ ДОЗАСЫН ҚАБЫЛДАМАҢЫЗ. Дәрілік препаратты қолдану тәсілін түсіндіру үшін медициналық қызметкер кеңесіне жүгіну жөніндегі нұсқаулар Дәрілік препаратты қолдану жөнінде қандай да бір қосымша сауалдар туындаған жағдайда өз дәрігеріңізбен хабарласыңыз.

- цилостазолға немесе қосымша заттардың кез келгеніне аса жоғары сезімталдық - бүйрек функциясының ауыр бұзылуы (креатинин клиренсі ≤ 25 мл/мин) - бауыр функциясының орташа немесе ауыр жеткіліксіздігі - созылмалы жүрек жеткіліксіздігі - кез келген белгілі қан кетулерге бейімділік (мысалы, асқазан немесе он екі елі ішектің ойық жаралы ауруының белсенді түрі, таяуда (6 ай ішінде) өткерілген геморрагиялық инсульт, пролиферациялық диабеттік ретинопатия, нашар бақыланатын гипертензия) - анамнезінде қарыншалық тахикардия, қарыншалар фибрилляциясы немесе мультифокальді эктопия болған, тиімді немесе тиімсіз бақыланатын, сонымен қатар QT аралығының ұзаруы бар пациенттерге - анамнездегі ауыр тахиаритмия - екі немесе одан көп қосымша антитромбоциттік дәрілерді немесе антикоагулянтты (мысалы, ацетилсалицил қышқылы, клопидогрел, гепарин, варфарин, аценокумарол, дабигатран, ривароксабан немесе апиксабан) бір мезгілде қабылдау - анамнездегі (соңғы 6 ай ішіндегі) тұрақсыз стенокардия, миокард инфарктісі немесе коронарлық араласу - жүктілік және лактация кезеңі - тиімділігі мен қауіпсіздігі зерттелмегендіктен балалар және 18 жасқа дейінгі жасөспірімдер.

Жағымсыз құбылыстар жиілігін белгілеу келесі критерийлерге сәйкес жүргізіледі: өте жиі (≥1/10), жиі (≥1/100-ден <1/10 дейін), жиі емес (≥1/1,000-нан <1/100 дейін), сирек (≥1/10,000-нан <1/1,000 дейін), өте сирек (<1/10,000), жиілігі белгісіз (қолда бар деректер негізінде бағалау мүмкін емес). Өте жиі - бас ауыру - диарея, әдеттен тыс нәжіс Жиі - экхимоз - ісінулер (шеткері, бетте болатын), анорексия - бас айналу - жүректің қатты соғуы, тахикардия, стенокардия, аритмия, қарыншалық экстрасистолия - ринит, фарингит - жүрек айну және құсу, диспепсия, метеоризм, іштің ауыруы - бөртпе, қышыну - кеуде қуысының ауыруы, астения Жиі емес - анемия - аллергиялық реакциялар - гипергликемия, қант диабеті - үрейлі күй - ұйқысыздық, әдеттен тыс түстер көру - миокард инфарктісі, жүрекшелер фибрилляциясы, іркілісті жүрек жеткіліксіздігі, қарыншаүстілік тахикардия, қарыншалық тахикардия, синкопе - көзге қан құйылу, мұрыннан қан кету, асқазан-ішектен қан кету, этиологиясы нақты анықталмаған қан кету, ортостаздық гипотензия - ентігу, пневмония, жөтел - гастрит - миалгия - бүйрек жеткіліксіздігі, бүйрек функциясының бұзылуы - қалтырау, дімкәстану Сирек - қан кету уақытының ұзарып кетуі, тромбоцитемия Белгісіз - қан кетулерге бейімділік, тромбоцитопения, гранулоцитопения, агранулоцитоз, лейкопения, панцитопения, аплазиялық анемия - парез, гипестезия - конъюнктивит - құлақтағы шыңыл - ысынулар, гипертензия, гипотензия, миға қан құйылу, өкпеден қан кету, бұлшықетішілік қан кетулер, тыныс жолдарынан қан кету, тері астына қан құйылу - интерстициальді пневмония - гепатит, бауыр функциясының бұзылуы, сарғаю - экзема, тері бөртпесі, Стивенс-Джонсон синдромы, уытты эпидермалық некролиз, есекжем - гематурия, поллакиурия - қызба, ауырсыну - несеп қышқылының жоғары деңгейі, қандағы мочевинаның жоғары деңгейі, қандағы креатининнің жоғары деңгейі Цилостазол рефлекторлы тахикардияны туындататын басқа вазодилататорлармен, мысалы, кальций өзекшелерінің дигидропиридинді блокаторларымен біріктірілгенде жүректің соғу жиілігінің артуы және шеткері ісінулер байқалды. Цилостазол қабылдаған пациенттердің ≥ 3%-да емдеуді тоқтатуды талап еткен бірден бір жағымсыз әсері бас ауыру болды. Емдеуді тоқтатудың басқа кең тараған себептері жүректің қатты соғуын және диареяны қамтыды (екі құбылыс та 1,1% жиілікте кездесті). Цилостазол өз алдына жоғары қан кету қаупімен байланысты болуы мүмкін, ал осы қауіп препаратты дәл осындай әсерін көрсететін кез келген басқа дәрілік затпен бір мезгілде қабылдағанда артуы мүмкін. Көзішілік қан кетулер қаупі қант диабеті бар пациенттерде жоғары болуы мүмкін. 70 жастан асқан пациенттерде диарея және жүректің қатты соғу жағдайларының жоғары жиілігі байқалды. Жағымсыз дәрілік реакциялар туындағанда медициналық қызметкерге, фармацевтикалық қызметкерге немесе, дәрілік препараттардың тиімсіздігі туралы хабарламаларды қоса, дәрілік препараттарға болатын жағымсыз реакциялар (әсерлер) жөніндегі ақпараттық деректер базасына тікелей хабарласу керек Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

Симптомдары: қатты бас ауыру, диарея, тахикардия, жүрек аритмиялары. Адамдарда жедел артық дозалану туралы деректер жеткіліксіз. Емдеу: пациенттер қадағалауда болуы және демеуші ем қабылдауы тиіс. Препаратты нақты жағдайға қарай асқазаннан шығару үшін асқазанды шаю немесе құстыру қажет.

Реваскуляризация сияқты басқа емдеу нұсқаларымен қатар цилостазолмен емдеу қолайлылығын мұқият бағалау керек. Өзінің әсер ету механизміне орай, цилостазол тахикардия, жүрек қағу, тахиаритмия және/немесе гипотензияны туындатуы мүмкін. Цилостазолмен астасқан жүректің жиырылу жиілігі шамамен минутына 5-тен 7 рет соғуға дейін артады, сондықтан бұл құбылыс қаупі бар науқастарда препарат стенокардияны тудыруы мүмкін. Жүректің жиырылу жиілігінің артуы нәтижесінде жүрек тарапынан күрделі жағымсыз әсерлердің жоғары қаупіне ұшырауы мүмкін пациенттерді, мысалы, жүректің тұрақты ишемиялық ауруы бар пациенттерді цилостазолмен емдеу кезінде мұқият қадағалау керек; соңғы 6 ай ішінде тұрақсыз стенокардияны немесе миокард инфарктісін/ коронарлық араласуды өткерген немесе анамнезінде ауыр тахиаритмиясы бар пациенттерде цилостазол қарсы көрсетілімді екенін ескеру керек. Цилостазол жүрекшелік немесе қарыншалық эктопиясы бар пациенттерге және жүрекшелер фибрилляциясы мен дірілдеуі бар пациенттерге тағайындалғанда сақ болу керек. Пациенттерге емдеу кезінде байқалатын кез келген қан кетудің немесе қанталау, көгерудің жиі түзілуі туралы мәлімдеу қажеттілігі ескертілу керек. Торқабыққа қан құйылу жағдайында цилостазол қабылдауды тоқтату қажет. Цилостазолдың антиагреганттық әсер етуіне байланысты, хирургиялық араласумен (тісті жұлу сияқты елеусіз инвазиялық араласуларды қоса) препаратпен емдеу кезінде қан кетулер қаупі артуы мүмкін. Егер пациентке жоспарлы операция жасалатын болса және антиагреганттық әсер қажет болмаса, цилостазол қабылдау операциядан 5 күн бұрын тоқтатылуы тиіс. Гематологиялық бұзылулардың, оның ішінде тромбоцитопения, лейкопения, агранулоцитоз, панцитопения немесе аплазиялық анемияның сирек немесе өте сирек жағдайлары мәлімделді. Көптеген пациенттердің жай-күйі цилостазолмен емдеуді тоқтатудан кейін қалыпқа түсті. Дегенмен де, кейбір жағдайларда панцитопения және аплазиялық анемия өліммен аяқталуға әкелді. Қан кету көріністері және қанталаулардың жиі түзілуі туралы хабарламалардан тыс, пациенттерге қандағы, мысалы, гипертермия және тамақтың ауыруы сияқты патологиялық өзгерістердің кез келген басқа ерте белгілері туралы шұғыл мәлімдеу керектігі ескертілу керек. Инфекция күмән тудырған немесе қандағы патологиялық өзгерістердің басқа клиникалық белгілері болған жағдайда жалпы қан талдауы жасалуы тиіс. Гематологиялық бұзылулардың клиникалық немесе зертханалық белгілері болса, цилостазолмен емдеу дереу тоқтатылуы тиіс. CYP3A4 және CYP2C19 қуатты тежегіштерін қабылдап жүрген пациенттерде плазмада цилостазол деңгейлерінің жоғарылауы байқалды. Осындай жағдайларда ұсынылатын цилостазол дозасы тәулігіне екі рет 50 мг құрайды. Рефлекторлы тахикардиямен қатар жүретін аддитивті гипотензиялық әсерінің даму мүмкіндігіне орай, цилостазол артериялық қысымды төмендетуге қабілетті кез келген басқа дәрімен бір мезгілде қолданылғанда сақ болу керек. Цилостазол тромбоциттер агрегациясын тежейтін кез келген басқа дәрімен бір мезгілде қолданылғанда сақтық шарасын қадағалау керек. Арнайы сақтандырулар Педиатрияда қолдану Препаратты, қолдану қауіпсіздігі мен тиімділігіне қатысты деректер болмауына орай, балаларға тағайындау ұсынылмайды. Препараттың көлік құралын немесе қауіптілігі зор механизмдерді басқару кезіндегі әсер ету ерекшеліктері Цилостазол бас айналуды тудыруы мүмкін, сондықтан пациенттерге көлік құралын немесе аса қауіпті механизмдерді басқару кезінде сақтық таныту қажеттілігін ескерту керек.

Жүкті әйелдерге цилостазол қолдану жөнінде тиісті деректер жоқ. Препараттың ұрпақ өрбіту қабілетіне уыттылығы туралы деректер бар. Ықтималды қаупі белгісіз. Цилостазолды жүктілік кезінде қолдануға болмайды. Тәжірибелік деректер цилостазолдың емшек сүтіне бөлінетінін көрсетті. Цилостазолмен ем алып жүрген ана емізген жаңа туған нәресте үшін зиянды қаупіне байланысты, осы препарат бала емізу кезінде қолдануға ұсынылмайды.

Тромбоциттер агрегациясының тежегіштері Цилостазол антитромбоциттік белсенділігі бар ФДЭ III тежегіші түрінде болады. Оны дені сау тұлғаларда тәулігіне екі рет 150 мг дозада 5 күн бойы қолдану қан кету уақытының ұзаруына әкелмеді. Ацетилсалицил қышқылы (АСҚ) Қысқа уақыт ішінде (4 күнге дейін) цилостазолмен бір мезгілде АСҚ қолдану, монотерапия ретінде қолданылатын АСҚ-мен салыстырғанда, АДФ-индукцияланған тромбоциттер агрегациясын тежелуінің 23-25% артуына алып келді. Цилостазол және АСҚ қабылдап жүрген пациенттерде, плацебо мен АСҚ баламалы дозаларын қабылдаған пациенттермен салыстырғанда, геморрагиялық жағымсыз құбылыстар жиілігінің ешқандай айқын арту белгілері байқалмады. Клопидогрел және антиагреганттық басқа дәрілер Цилостазолды клопидогрелмен бір мезгілде қолдану тромбоциттер санына, протромбин уақытына (ПУ) және ішінара белсендірілген тромбопластин уақытына (ІБТУ) ықпал етпеді. Барлық дені сау қатысушыға жүргізілген зерттеулерде клопидогрелді монотерапия ретінде қабылдау кезінде қан кету уақытының ұзаруы байқалды, ал оны цилостазолмен бір мезгілде қабылдау қан кету уақытына елеулі қосымша ықпалын тигізбеді. Цилостазолды тромбоциттер агрегациясын тежейтін кез келген препаратпен бір мезгілде қолданғанда сақтық шарасын қадағалауға кеңес беріледі. Қан кету уақытын мезгіл-мезгіл мониторингтеу мүмкіндігін қарастыру керек. Цилостазолмен емдеу екі немесе одан көп қосымша антитромбоциттік/антикоагулянттық дәрілер қабылдап жүрген пациенттерге қарсы көрсетілімді. CASTLE зерттеуі барысында клопидогрел, АСҚ және цилостазол бір мезгілде қолданылғанда қан кету жағдайларының жоғары жиілігі байқалды. Варфарин типті пероральді антикоагулянттар Клиникалық зерттеуде цилостазол бір рет қабылдау кезінде варфарин метаболизмін бәсеңдетпеді және қан ұю параметрлеріне (ПУ, IБТУ, қан кету ұзақтығы) ықпал етпеді. Дегенмен де, цилостазолды кез келген антикоагуляциялық препаратпен қабылдап жүрген пациенттерде сақ болу, ал қан кетудің туындау мүмкіндігін барынша азайту үшін мезгіл-мезгіл мониторинг өткізу ұсынылады. Цилостазолмен емдеу екі немесе одан көп қосымша антитромбоциттік/антикоагулянттық дәрілер қабылдап жүрген пациенттерге қарсы көрсетілімді. Р-450 цитохромы (CYP) ферменттерінің тежегіштері Цилостазол СҮР цитохромы жүйесінің ферментттерімен, әсіресе, CYP3А4 және CYP2С19, ал аз дәрежеде CYP1A2 арқылы қарқынды метаболизденеді. Тромбоциттер агрегациясын тежейтін дигидро-метаболит цилостазолдан 4-7 есе белсенді, ықтималды түрде, CYP3А4 қатысуымен түзіледі. Цилостазолдан 4`-транс-гидроксиметаболит белсенділігі 5 есе аз, ықтималды түрде, CYP2С19 қатысуымен түзіледі. Сондықтан, CYP3А4 (мысалы, кейбір макролидтер, азолдар тобына жататын зеңге қарсы дәрілер, протеаза тежегіштері) және CYP2С19 (мысалы, протонды помпа тежегіштері (ППТ) белсенділігін тежейтін препараттар цилостазолдың жалпы фармакологиялық белсенділігін арттырады және оның жағымсыз әсерлерін ықтималды күшейтуі мүмкін. Осылайша, CYP3А4 немесе CYP2С19 қуатты тежегіштерін бір мезгілде қабылдап жүрген пациенттерге ұсынылатын доза тәулігіне екі рет 50 мг құрайды. Цилостазолды эритромицинмен (CYP3А4 тежегіші) қабылдау цилостазол AUC мәнінің 72% артуына алып келді, ол дигидро-метаболит AUC 6% және 4`-транс-гидроксиметаболит AUC 119% артуымен қатар жүрді. AUC мәндерінің есебімен цилостазолдың жалпы фармакологиялық белсенділігі оны эритромицинмен бір мезгілде қабылдағанда 34% жоғарылады. Осы деректер негізінде ұсынылатын цилостазол дозасы эритромицинмен және сол сияқты дәрілермен (мысалы, кларитромицин) бір мезгілде қабылдағанда тәулігіне 2 рет 50 мг құрайды. Кетоконазолды (CYP3А4 тежегіші) цилостазолмен бір мезгілде қолдану цилостазол AUC 117% артуына алып келді, ол дигидро-метаболит AUC 15% төмендеуімен, ал 4`-транс-гидроксиметаболит 87% артуымен қатар жүрді. Цилостазолдың жалпы фармакологиялық белсенділігі AUC мәндері есебімен кетоконазолмен бір мезгілде қолданғанда 35% артады. Осы деректер негізінде ұсынылатын цилостазол дозасы кетоконазолмен және сол сияқты дәрілермен (мысалы, итраконазол) бір мезгілде қабылдағанда тәулігіне 2 рет 50 мг құрайды. Цилостазолды дилтиаземмен (CYP3А4 әлсіз тежегіші) қолдану цилостазол AUC 44% артуына алып келді, ол дигидро-метаболит AUC 4% артуымен, ал 4`-транс-гидроксиметаболит AUC 43% артуымен қатар жүрді. Цилостазолдың жалпы фармакологиялық белсенділігі AUC мәндері есебімен дилтиаземмен бір мезгілде қабылдағанда 19% артады. Осы деректерді негізге алып, дозаны түзету қажет емес. 100 мг цилостазолды 240 мл грейпфрут шырынымен (ішектік CYP3А4 тежегіші) бір мезгілде қабылдау цилостазол фармакокинетикасына айқын ықпалын тигізбеді. Осыған байланысты, цилостазол дозасын түзету қажет емес. Дегенмен де, грейпфрут шырынын көп мөлшерде ішу цилостазол фармакокинетикасына клиникалық мәнді ықпалын тигізуі мүмкін. Цилостазолды омепразолмен (CYP2С19 тежегіші) қолдану цилостазол AUC 22% артуына алып келді, ол дигидро-метаболит AUC 68% артуымен және 4`транс-гидроксиметаболит AUC 36% төмендеуімен қатар жүрді. Цилостазолдың жалпы фармакологиялық белсенділігі AUC мәндері есебімен омепразолмен бір мезгілде қабылдағанда 47% артады. Осы деректер негізінде ұсынылатын цилостазол дозасы омепразолмен бір мезгілде қабылдағанда тәулігіне екі рет 50 мг құрайды. Р-450 цитохромы ферменттерінің субстраттары Цилостазол ловастатин (CYP3A4 cезімтал субстраты) және оның β-гидроксиқышқылының AUC мәнін 70% арттырды. Цилостазолды емдік индексі тар CYP3A4 субстраттарымен (мысалы, цисаприд, галофантрин, пимозид, қастауыш туындылары) бір мезгілде қабылдағанда сақтықпен қолдану ұсынылады. Цилостазолды CYP3A4 цитохромы ферменттерімен, мысалы, симвастатин, аторвастатин және ловастатинмен метаболизденетін статиндермен бір мезгілде қолданған жағдайда сақ болу керек. Р-450 цитохромы изоферменттерінің индукторлары CYP3A4 және CYP2C19 индукторларының (карбамазепин, фенитоин, рифампицин және шайқурай сияқты) цилостазол фармакокинетикасына ықпалы зерттелмеді. Цилостазолды CYP3A4 және CYP2C19 индукторларымен бір мезгілде қабылдағанда мұқият бақылап отыру керек болатын антиагреганттық әсерін өзгертудің теориялық мүмкіндігі бар. Шылым шегу (CYP1A2 белсенділігін индукциялайтын) плазмада цилостазол концентрациясының 18% төмендеуіне алып келді. Басқа ықтималды өзара әрекеттесулер Рефлекторлы тахикардиямен қатар жүретін аддитивті гипотензиялық әсерінің даму мүмкіндігіне орай, цилостазолды артериялық қысымды төмендетуге қабілетті кез келген басқа дәрімен бір мезгілде қолданғанда сақ болу керек.

Сақтау мерзімі 3 жыл. Жарамдылық мерзімі өткеннен кейін қолдануға болмайды! Сақтау шарттары 25°С-ден аспайтын температурада сақтау керек. Балалардың қолы жетпейтін жерде сақтау керек!