АкваДетрим® Форте капсулы 2000 МЕ

АкваДетрим® Форте, 2000 ХБ 1 капсула (2000 ХБ) құрамында белсенді зат– 0,05 мг колекальциферол; қосымша заттар: тазартылған мақсары майы; капсула: желатин, глицерол, тазартылған су. АкваДетрим® Форте, 4000 ХБ 1 капсула (4000 ХБ) құрамында белсенді зат– 0,10 мг колекальциферол; қосымша заттар: тазартылған мақсары майы; капсула: желатин, глицерол, тазартылған су. Сыртқы түрінің, иісінің, дәмінің сипаттамасы Ашық сары сұйықтықпен толтырылған, тігісі бар ашық сары түсті сопақша пішінді жұмсақ желантинді капсулалар.

Сіңірілуі бұзылмаған ересектерде D дәруменінің тапшылығы мен жеткіліксіздігін және D дәруменінің тапшылығы тудырған жағдайларды емдеу және оның профилактикасы. Мальабсорбция синдромы, артық салмағы немесе семіздігі бар ересектердегі D дәруменінің тапшылығын және жеткіліксіздігін және D дәруменінің тапшылығынан туындаған жағдайларды емдеу және оның профилактикасы.

Фармакодинамикалық әсерлері Колекальциферол теріде ультракүлгін сәулеленудің, соның ішінде күн сәулесінің әсерінен пайда болады. Дені сау адамдар эндогендік синтез процесінде, күн сәулесінің қажетті мөлшерінде D дәруменіне деген қажеттілікті қамтамасыз ете алады. D дәруменінің жоғары дозаларын қажет ететін D дәрумені тапшылығының қауіп факторларына мыналар ұшыраған: • жоғары географиялық ендіктерде орналасқан жерлерде тұратын адамдар (>35°); • уақыттың көп бөлігін жабық орындарда өткізетін адамдар, түнде жұмыс істейтін адамдар және қара нәсілді адамдар; • тамақтану рационы мардымсыз адамдар (құрамында балық майы бар өнімдердің аз мөлшерімен); • семіздікке шалдыққан адамдар. Сондай-ақ, D дәрумені тапшылығының себептері мальабсорбция синдромдары және ас қорыту жүйесінің бұзылуы, бауыр циррозы және бүйрек жеткіліксіздігі болуы мүмкін. D3 дәрумені адамда күн сәулесінің әсерінен теріде пайда болатын D дәруменінің табиғи түрі болып табылады. D2 дәруменімен салыстырғанда белсенділіктің 25% жоғары болуымен сипатталады. D дәрумені көптеген гендердің, оған қоса организмдегі кальций мен фосфордың гомеостазын, сүйек пен жүйке тіндерінің түзілуін, артериялық қысымды реттеуді, көмірсулар мен май алмасуын реттейтін ақуыз гендерінің экспрессиясын реттейтін D дәруменінің спецификалық рецепторымен (VDR) байланысады. D3 дәрумені белсенді антирахиттік фактор болып табылады. D3 дәруменінің ең маңызды функциясы кальций мен фосфат алмасуын реттеу болып табылады, бұл қаңқаның дұрыс минералдануы мен өсуіне ықпал етеді. Колекальциферол ішекте кальций мен фосфаттардың абсорбциясында, минералды тұздардың тасымалдануында және сүйектерді кальцийлеу процесінде маңызды рөл атқарады, бүйректе кальций мен фосфаттардың шығарылуын реттейді. Қандағы кальций иондарының қанығуы қаңқа бұлшықеттерінің тонусын, миокард функциясын демейді, жүйке қозуы жүруіне ықпал етеді, қан ұю үдерісін реттейді. Тағамдағы D дәруменінің жеткіліксіздігі, оның сіңуінің бұзылуы, кальций тапшылығы, сондай-ақ баланың тез өсу кезеңінде күн сәулесінің жеткіліксіз болуы рахитке, ересектерде остеомаляцияға, жүкті әйелдерде тетания симптомдары пайда болуы мүмкін, нәрестелердің сүйектерін кальцийлеу процестерінің бұзылуы. D дәруменіне қажеттіліктің жоғарылауы менопауза кезеңіндегі әйелдерде кездеседі, өйткені олар гормональді бұзылуларға байланысты остеопорозды жиі дамытады. D дәрумені қаңқадан тыс әсерлер д.а. бірқатар әсерлерге ие. D дәрумені цитокин деңгейін модуляциялау арқылы иммундық жүйенің жұмысына қатысады және Т-хелпер лимфоциттердің бөлінуін және В лимфоциттерінің дифференциациясын реттейді. Бірқатар зерттеулер иммундық жүйеге әсер ету арқылы D дәрумені ересектерде де, балаларда да жоғарғы тыныс жолдарының инфекцияларының жиілігін және даму қаупін төмендететінін көрсетті. D дәрумені иммундық жүйенің гомеостазының маңызды буыны болып табылады: аутоиммунды аурулардың алдын алады (1 типті қант диабеті, жайылған склероз, ревматоидты артрит, ішектің қабыну аурулары және т.б.). D дәрумені антипролиферативті және дифференциалды әсерлерге ие, олар D дәруменінің онкопротекторлық әсерін анықтайды. Кейбір ісіктердің (сүт безі обыры, жуан ішек обыры) жиілігі қандағы D дәруменінің төмен деңгейіне байланысты жоғарылайтыны байқалды. D дәрумені IRS1 (инсулин рецепторларының субстраты 1; инсулин рецепторларының сигналын өткізудің жасушаішілік жолдарына қатысады), IGF (инсулин тәрізді өсу факторы; май мен бұлшықет тінінің тепе-теңдігін реттейді), PPAR-δ (пероксисомамен пролифераторлардың белсендірілген рецепторы, δ типі; артық холестеринді өңдеуге ықпал етеді) синтезіне әсер ету арқылы көмірсулар мен май метаболизмін реттеуге қатысады. Эпидемиологиялық зерттеу деректеріне сәйкес, D дәруменінің тапшылығы метаболизмдік бұзылулар қаупімен байланысты (метаболизмдік синдром және 2 типті қант диабеті). D дәруменінің рецепторлары мен метаболизденетін ферменттері артериялық тамырларда, жүректе және жүрек-қантамыр ауруларының патогенезіне қатысты барлық дерлік жасушалар мен тіндерде көрінеді. Жануарлар модельдерінде антиатеросклеротикалық әсер, ренин супрессиясы және миокард зақымдануының алдын алу және т. б. көрсетілген. Адамдардағы D дәруменінің төмен деңгейі қант диабеті, дислипидемия, артериялық гипертензия сияқты жүрек-қантамыр патологиясының қолайсыз қауіп факторларымен байланысты және жүрек-қантамыр катастрофларының, соның ішінде инсульт қаупімен байланысты. D дәруменінің төмен деңгейінде когнитивті функцияның нашарлауы, депрессияның жоғарылауы және Альцгеймер ауруы байқалды. Бірқатар зерттеулерде созылмалы шаршау синдромы мен D дәрумені тапшылығының байланысын көрсетеді. Альцгеймер ауруының эксперименттік модельдеріндегі зерттеулерде D3 дәрумені мидағы амилоидтың жиналуын төмендетіп, когнитивті функцияны жақсартқаны көрсетілген. Интервенциялық емес зерттеулерде адамда деменция мен Альцгеймер ауруының даму жиілігі D дәрумені деңгейінің төмендігі және D дәруменін төмен диеталық тұтыну аясында жоғарылайтыны көрсетілген. Бұлшықет әлсіздігінде немесе бұлшықет массасының төмендеуінде D дәруменін қабылдау құлау санын азайтады және бұлшықет массасына пайдалы әсер етеді. D дәруменінің аздаған тапшылығы да қаңқа бұлшықеттерінің күшін төмендетеді, ал D дәруменінің деңгейін қалыпты деңгейге дейін қалпына келтіру физикалық форманың жақсаруына әкеледі, құлау қаупін азайтады және оңалту кезінде сынықтардан кейін қалпына келуді тездетеді. D3 дәрумені әйелдердің репродуктивті процестеріне әсер етеді, өйткені бұл дәруменнің рецепторлары әйелдердің репродуктивті жүйесінде болады. Қандағы D3 дәруменінің жеткілікті деңгейі бар әйелдерде (30 нг/мл немесе одан да көп) аналық жасушаны ұрықтандыру жиі кездеседі. D3 дәруменін қабылдау поликистозды аналық без синдромы бар әйелдерде эндометрияның қалыңдығын арттыруға мүмкіндік береді. Бұдан басқа, поликистозды аналық без синдромы бар әйелдерде D3 дәрумені семіздікті түзетуде және метаболизмдік синдромның ағымында маңызды рөл атқарады. D3 дәруменінің жеткілікті деңгейі экстракорпоральді ұрықтандыру нәтижелерін жақсартуға мүмкіндік береді, бұл D дәруменінің эндометрияға әсеріне байланысты болуы мүмкін. D3 дәруменін қабылдау етеккір оралымының бұзылуына оң әсер етеді. Кеш репродуктивті жаста қандағы D3 дәрумені деңгейі жоғары әйелдерде жүктілік ықтималдығы жоғары. D дәруменінің тапшылығы келесі аурулардың даму қаупінің факторы болуы мүмкін: обыр, жүрек-қантамыр аурулары, екі типті қант диабеті, артериялық гипертензия, аутоиммунды аурулар, зат алмасу аурулары, иммун тапшылығына байланысты инфекциялар және кейбір неврологиялық және психиатриялық аурулар.

Дозалау режимі • Сіңірілуі бұзылмаған ересектерде D дәрумені тапшылығын емдеу (25(ОН)D ≤ 20 нг/мл деңгейі) – 8 апта ішінде тәулігіне 8000 ХБ (4 капсула 2000 ХБ немесе 2 капсула 4000 ХБ). • Сіңірілуі бұзылмаған ересектерде D дәрумені жеткіліксіздігін емдеу (25(ОН)D деңгейі – 20-29 нг/мл) – 4 апта ішінде тәулігіне 8000 ХБ (4 капсула 2000 ХБ немесе 2 капсула 4000 ХБ). • Сіңірілуі бұзылмаған ересектерде D3 дәруменінің қалыпты деңгейін (25(ОН)D деңгейі ≥30 нг/мл) ұстап тұру – тәулігіне 2000 ХБ (1 капсула 2000 ХБ). • Мальабсорбция синдромы, артық дене салмағы немесе семіздігі бар ересектерде D дәрумені тапшылығы мен жеткіліксіздігін және D дәрумені тапшылығынан туындаған жағдайларды емдеу 4-8 апта ішінде тәулігіне 6000-нан 10000 ХБ дейін (3-5 капсула 2000 ХБ). Емдеу D дәруменінің қолдау дозасына ауысумен жалғасатын нақты емдік әсер алынғанға дейін жүргізіледі. Ұзақ мерзімді емдеу кезінде қандағы және несептегі кальций деңгейін үнемі анықтап, сондай-ақ креатининнің сарысулық деңгейін өлшеу арқылы бүйрек функциясын анықтап отыру керек. Қажет болса, дозаны қан сарысуындағы кальций деңгейін ескере отырып түзету керек. Пациенттердің ерекше топтары Бауыр жеткіліксіздігі бар пациенттер Дозаны түзету қажет емес. Бүйрек жеткіліксіздігі бар пациенттер Препаратты бүйректің ауыр жеткіліксіздігі бар пациенттерге тағайындалмауы керек. Енгізу әдісі мен жолы Капсуланы дұрысы негізгі тамақтану кезінде тұтастай жұтып және сумен ішіп ішке қабылдау керек. Дәрілік препараттың бір немесе бірнеше дозасын өткізіп алған кезде қажетті шаралар Препараттың келесі дозасын өткізіп алған кезде оны мүмкіндігінше тезірек қабылдау керек. Егер келесі дозаны қабылдауға аз уақыт қалса, оны жоспарланған уақытта қабылдау керек. Өткізіп алған препараттың орнын толтыру үшін препараттың қос дозасын қабылдауға болмайды.

• Колекальциферолға немесе препараттың қосымша заттарының кез келгеніне жоғары сезімталдық. • Гиперкальциемия және (немесе) гиперкальциурия. • Бүйрек-тас ауруы және (немесе) нефрокальциноз. • D гипервитаминозы. • Псевдогипопаратиреоз. • Бүйректің ауыр жеткіліксіздігі. • 18 жасқа дейінгі балалар мен жасөспірімдер.

Жиі емес • Гиперкальциемия, гиперкальциурия. Сирек • Қышыну, бөртпе, есекжем. Белгісіз (қолда бар деректер негізінде бағалау мүмкін емес) • Ангионевроздық ісіну немесе көмейдің ісінуі сияқты аса жоғары сезімталдық реакциялары. • Іштің қатуы, іштің кебуі, жүрек айнуы, абдоминальді ауыру, диарея Жағымсыз дәрілік реакциялар туындаған кезде медицина қызметкеріне, фармацевтика қызметкеріне немесе дәрілік препараттардың тиімсіздігі туралы хабарламаны қоса, дәрілік препараттарға жағымсыз реакциялар (әсерлер) бойынша ақпараттық деректер базасына тікелей жүгіну қажет Қазақстан Республикасы Денсаулық сақтау министрлігі Медициналық және фармацевтикалық бақылау комитетінің «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

Симптомдар Қалқанша маңы безінің функциясы қалыпты ересектерде 1-2 ай ішінде колекальциферолдың (D3 дәрумені) уыттану шегі тәулігіне 40000 және 100000 ХБ арасында ауытқиды. Нәрестелер мен кішкентай балаларда әлдеқайда төмен концентрацияға сезімталдық болуы мүмкін Жедел және созылмалы артық дозалану қан сарысуындағы және несептегі фосфор деңгейінің жоғарылауына және тұрақты сипатқа ие және өмірге қауіп төндіретін гиперкальциемияға әкелуі мүмкін. Биохимиялық көрсеткіштердің типтік өзгерістеріне гиперкальциемия, гиперкальциурия, сондай-ақ қан сарысуындағы 25-гидроксикальциферол (25 (OH) D3, кальцидиол) деңгейінің жоғарылауы жатады. D3 дәруменінің созылмалы дозалануы кальцийдің тіндерде және паренхиматоздық ағзаларда, ең алдымен бүйректе (уролития, нефрокальциноз) және тамырларда жиналуына әкелуі мүмкін. Симптомдар жалпы сипатта болады және жүрек айнуы, құсу түрінде, сондай-ақ бастапқыда диарея түрінде, кейінірек іш қату, тәбеттің төмендеуі, әлсіздік, бас ауыруы, бұлшықет және буын ауыруы, бұлшықет әлсіздігі, азотемия, тұрақты ұйқышылдық, полидипсия және полиурия түрінде және соңғы кезеңде организмнің сусыздануы түрінде көрініс табады. D3 дәруменімен артық дозалану ЭКГ өзгерістерін, жүрек ырғағының бұзылуын, панкреатитті, бүйрек жеткіліксіздігін тудыруы мүмкін. Артық дозалануды емдеу Ең алдымен, D3 дәруменін қабылдауды тоқтату қажет. D3 дәруменімен артық дозаланудан туындаған гиперкальциемияны жою үшін бірнеше апта қажет. Гиперкальциемия дәрежесіне байланысты емдеу шаралары ретінде кальцийі төмен немесе кальцийі жоқ диета, сұйықтықтың көп мөлшерін тұтыну, фуросемидпен қарқынды диурез, сондай-ақ глюкокортикостероидтар мен кальцитонин тағайындалады. Бүйрек функциясы сақталғанда кальций деңгейін натрий хлоридінің изотониялық ерітіндісін (24 сағат ішінде 3-6 литр) фуросемидпен және кейбір жағдайларда кальций деңгейін және ЭКГ деректерін бір мезгілде бақылай отырып, 15 мг/кг/сағ дозада натрий эдетатымен инфузиялау арқылы айтарлықтай төмендетуге болады. Метастаздық кальцификацияның даму қаупіне байланысты D3 дәруменінің артық дозалануынан туындаған гиперкальциемияны азайту үшін фосфат инфузиясын қолдануға болмайды. Олигоанурия кезінде гемодиализ (кальцийсіз диализат) жасалуы керек. Спецификалық антидоты жоқ. Пациенттерге препараттың жоғары дозаларын ұзақ қабылдаған кезде мүмкін болатын артық дозалану симптомдарын назар аудару ұсынылады (жүрек айнуы, құсу, бастапқыда – диарея, кейінірек – іш қату, тәбеттің төмендеуі, әлсіздік, бас ауыруы, бұлшықет пен буын ауыруы, бұлшықет әлсіздігі, тұрақты ұйқышылдық, полидипсия және полиурия).

Келесі жағдайларда сақтық таныту керек: • саркоидоз және басқа грануломатоздар; • D3 дәрумені мен кальцийдің қосымша мөлшерін қабылдау (мысалы, басқа препараттардың құрамында); • кальций мен фосфаттардың несеппен шығарылуының бұзылуы, иммобилизацияланған пациенттерді емдеу, тиазидтерді, жүрек гликозидтерін (әсіресе оймақгүл гликозидтерін) бір мезгілде қабылдау кезінде. Арнайы ескертулер Егер құрамында D3 дәрумені бар басқа препараттар бір мезгілде тағайындалса, АкваДетрим® Форте препаратының құрамындағы D3 дәруменінің дозасын ескеру қажет. D3 дәруменін немесе кальцийді қосымша қолдану тек дәрігердің бақылауымен жүргізілуі керек. Бұл жағдайда қан сарысуындағы және несептегі кальций деңгейін бақылау қажет. АкваДетрим® Форте препаратымен емделетін бүйрек жеткіліксіздігі бар пациенттерде кальций мен фосфат метаболизмінің көрсеткіштерін бақылау керек. Препаратты кальций нефроуролитиазына бейімділігі бар пациенттерде қолдануға болмайды. Препаратты кальций мен фосфаттардың несеппен шығарылуы бұзылған пациенттерде, бензотиазидин туындыларымен емдеуде және иммобилизацияланған пациенттерде (гиперкальциемия мен гиперкальциурияның даму қаупі) сақтықпен қолдану керек. Мұндай пациенттерде қан плазмасындағы және несептегі кальций деңгейін бақылау керек. D3 дәруменінің белсенді метаболитіне тез айналу қаупіне байланысты саркоидозы бар пациенттерде АкваДетрим® Форте препаратын қолданғанда сақ болу ұсынылады. Мұндай пациенттерде қан плазмасындағы және несептегі кальций деңгейін бақылау керек. Препаратты псевдогипопаратиреоз кезінде қабылдауға болмайды, өйткені D3 дәруменіне қалыпты сезімталдық фазасында D3 дәруменіне деген қажеттілік төмендеуі мүмкін, бұл кешеуілдетілген артық дозаланудың даму қаупіне әкеледі. Мұндай жағдайларда дозаны дәлірек реттеуге мүмкіндік беретін D3 дәруменінің белсенді метаболиттерін қолданған дұрыс. АкваДетрим® Форте препаратымен ұзақ уақыт емдегенде қан плазмасындағы және несептегі кальций деңгейін бақылап, сондай-ақ сарысулық креатинин деңгейін өлшеу арқылы бүйрек функциясын бағалап отыру керек. Бұл әсіресе егде жастағы пациенттер үшін және жүрек гликозидтерімен немесе диуретиктермен қатар емдеу кезінде өте маңызды. Гиперкальциурия жағдайында (несептегі кальций деңгейі 7,5 ммоль/24 сағ. (300 мг/24 сағ) асады немесе бүйрек функциясының бұзылу белгілері болған жағдайда препараттың дозасын төмендету немесе емдеуді тоқтата тұру қажет. Семіздікке шалдыққан пациенттерге (ересектер – ДСИ ≥ 30 кг/м2, балалар, жасөспірімдер – дене салмағы осы жастағы 90 перцентильден жоғары) дене салмағы қалыпты құрдастарына ұсынылатын дозамен салыстырғанда АкваДетрим® Форте препаратының дозасын ұлғайту қажет. Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері Көлік құралын басқару қабілетіне және механизмдермен жұмыс істеуге әсер ету бойынша зерттеулер жүргізілген жоқ.

Жүктілік кезінде және емшек емізу кезінде D3 дәруменін жеткілікті мөлшерде қабылдау қажет; бұл ретте әйелдер емдеуші дәрігердің нұсқауларын ұстануы тиіс, өйткені D дәруменіне деген қажеттілік тапшылық дәрежесіне және емдеуге реакцияға байланысты өзгеруі мүмкін. Жүктілік кезінде D3 дәруменінің ұсынылған дозаларынан асып кетуден аулақ болу керек, өйткені гиперкальциемия физикалық және ақылдың дамуының кешеуілдеуіне, балада аорта стенозының және ретинопатияның ерекше түріне әкелуі мүмкін. Колекальциферол және оның метаболиттері емшек сүтіне енеді. Мұны емшек сүтімен қоректенетін балаларға D дәрумені тағайындау кезінде ескеру керек. Бала емізу кезінде жаңа туған нәрестелерде артық дозалану байқалмады.

Құрысуға қарсы дәрілік препараттарды (мысалы, фенитоин) немесе барбитураттарды (және бауыр ферменттерін индукциялайтын басқа дәрілік препараттарды) бір мезгілде қабылдау колекальциферолдың белсенді емес метаболиттерге биотрансформация жылдамдығын арттыру арқылы D3 дәруменінің тиімділігін төмендетуі мүмкін. Глюкокортикостероид препараттарымен қатар емдеу D3 дәруменінің тиімділігін төмендетуі мүмкін. D3 дәруменін пероральді қабылдау гиперкальциемияның дамуы арқылы оймақгүл мен басқа жүрек гликозидтерінің емдік әсері мен уытты потенциалын (аритмияның даму қаупі) арттыруы мүмкін. Мұқият медициналық бақылау, ЭКГ көрсеткіштерін және қан плазмасы мен несептегі кальций деңгейін бақылау және қажет жағдайда жүрек гликозидтерінің дозасын түзету қажет. Кальцийдің несеппен шығарылуын төмендететін тиазидтік диуретиктермен қатар жүретін терапия жағдайында қан сарысуындағы және несептегі кальцийді бақылау ұсынылады. Ион алмастырғыш шайырлармен (колестирамин сияқты), орлистат препаратымен немесе іш жүргізетін дәрілермен (парафин майы сияқты) бір мезгілде емдеу ас қорыту жолында D дәруменінің сіңуін төмендетуі мүмкін. Рифампицин мен изониазидті бір мезгілде қабылдау D3 дәруменінің биотрансформация жылдамдығының ұлғаюына байланысты препараттың тиімділігін төмендетуі мүмкін. Құрамында магний және D3 дәрумені бар антацидтерді бір мезгілде қабылдау кезінде қандағы магний концентрациясы жоғарылауы мүмкін. Құрамында алюминий және D3 дәрумені бар антацидтерді бір мезгілде қабылдау кезінде қандағы алюминий концентрациясы жоғарылауы мүмкін, бұл алюминийдің уытты әсер ету қаупін арттырады.

Сақтау мерзімі 2 жыл. Жарамдылық мерзімі өткеннен кейін қолдануға болмайды! Сақтау шарттары Түпнұсқалық қаптамасында, 25 °С-ден аспайтын температурада сақтау керек. Балалардың қолы жетпейтін жерде сақтау керек!