Аспан таблетки 40 мг

Бір таблетканың құрамында: белсенді зат - пантопразол натрий сесквигидраты 45,10 мг (40.00 мг пантопразолға баламалы) қосымша заттар: сусыз натрий карбонаты, маннитол, кросповидон, повидон К90, хинолинді сары (Е104), сусыз коллоидты кремнийдің қостотығы, кальций стеараты, тальк, тазартылған су, Опадрай OY-D-7233 ақ, тазартылған су, Acryl-Eze 93O32417 сары, тазартылған су. қабық құрамы Опадрай OY-D-7233 ақ : гидроксипропилметилцеллюлоза, титанның қостотығы (Е171),тальк, полиэтиленгликоль 400, натрий лаурилсульфаты ішекте еритін қабық құрамы Acryl-Eze 93O32417 сары: эудрагит L-100/55, тальк, титанның қостотығы (Е171), триэтилцитрат, хинолинді сары алюминий лагы 18-25% (Е104), сусыз коллоидты кремнийдің қостотығы, натрий бикарбонаты, натрий лаурилсульфаты. Сыртқы түрінің, иісінің, дәмінің сипаттамасы Сары түсті қабықпен қапталған, дөңгелек пішінді таблеткалар.

Ересектерде: - гастроэзофагеальді рефлюкс ауруы (рефлюкс-эзофагит) - асқазан мен он екі елі ішектің ойық жара ауруы - Золлингер-Эллисон синдромы және басқа да патологиялық гиперсекреторлық жағдайлар - Helicobacter pylori (H. pylori) эрадикациясында, Н.pylori-мен астасқан он екі елі ішек пен асқазанның ойық жарасы кезінде, бактерияларға қарсы тиісті еммен біріктірілімде

Әсер ету механизмі Пантопразол-бұл париетальді жасушалардың протонды помпасына спецификалық блокада жолымен асқазанда тұз қышқылының секрециясын басатын, алмастырылған бензимидазол болып табылады. Пантопразол париетальді жасушалардың қоршаған қышқыл ортасында өзінің белсенді түріне қайта айналады, онда H+/K+АТФаза ферментін, яғни асқазандағы тұз қышқылы синтезінің қорытынды сатысын бөгейді. Тежелуі дозаға тәуелді және қышқылдың базальді, сонымен қатар стимуляцияланған секрециясына да ықпалын тигізеді. Көптеген пациенттерде 2 апта ішінде симптомдар басылады. Протон помпасының басқа тежегіштері мен Н2-рецепторлардың тежегіштері сияқты, пантопразол асқазандағы қышқылдықты төмендетеді және осылайша, қышқылдықтың төмендеуіне пропорционалды гастрин деңгейін арттырады. Гастриннің жоғарылауы кері сипатқа ие. Пантопразол жасушалық рецепторлардың деңгейіне қатысты ферментпен байланысты болғандықтан, ол басқа заттармен (ацетилхолин, гистамин, гастрин) стимуляциясына қарамастан тұз қышқылының секрециясын тежей алады. Өнімнің вена ішіне ме немесе пероральді енгізіледі ме, соған қарамастан, әсері бірдей. Фармакодинамикалық әсерлері Пантопразол қолданған кезде аш қарынға гастриннің әсері артады. Көп жағдайда қысқа мерзімді пайдалану кезінде олар норманың жоғарғы шегінен аспайды. Ұзақ емдеу кезінде гастриннің деңгейі көп жағдайда екі есе артады. Шамадан тыс өсу, алайда, тек жекелеген жағдайларда орын алады. Нәтижесінде, асқазандағы спецификалық эндокриндік (ECL) жасушалар санының шамалыдан орташа ұлғаюына дейін ұзақ емдеу кезінде (қарапайым аденоматозды гиперплазияға дейін) аз жағдайда байқалады. Алайда, қазіргі уақытқа дейін жүргізілген зерттеулерге сәйкес, жануарларға жүргізілген эксперименттерде табылған, карциноидты ізашарлардың (атипиялық гиперплазия) немесе асқазан карциноидтарының пайда болуы (5.3-бөлімді қараңыз) адамдарда байқалмады. Протонды помпа тежегіштерімен емдеу сальмонелла және кампилобактер сияқты асқазан-ішек инфекцияларының даму қаупін арттыруы мүмкін, сондай-ақ стационарлық науқастарда Clostridium difficile болуы мүмкін. Бір жылдан асатын ұзақ уақыт пантопразолмен емдеу кезінде жануарларға жүргізілген зерттеу нәтижелеріне сәйкес қалқанша безінің эндокриндік параметрлеріне әсер етуі мүмкін емес.

Дозалау режимі Ересектерде: - Рефлюкс-эзофагит: күніне 1 рет 1 таблеткадан (40 мг) қабылдау ұсынылады. Кейбір жағдайда доза күніне 2 таблеткаға дейін арттырылуы мүмкін. Емдеу курсы 4 аптаны құрайды, қажет болған жағдайда, емдеуді тағы 4 апта жалғастырады. - Бактерияға қарсы тиісті екі препаратпен біріктірілімде H. pylori эрадикациясында: H. pylori-мен байланысты асқазан мен он екі елі ішектің ойық жарасы бар пациенттерде бактериялардың эрадикациясын біріктірілген ем арқылы жүргізу қажет. Тағайындаған кезде бактериялардың резистенттілігіне және бактерияларға қарсы дәрілерді тиісінше пайдалану және тағайындауға қатысты жергілікті ресми қағидаттарды (мысалы, ұлттық нұсқаулар) ескерген жөн. H. pylori эрадикациясы үшін резистенттілігіне байланысты келесі біріктірілімдер ұсынылуы мүмкін: • Аспан 40 мг-ден тәулігіне 2 рет + амоксициллин 1000 мг-ден тәулігіне 2 рет + кларитромицин 500 мг-ден тәулігіне 2 рет • Аспан 40 мг-ден тәулігіне 2 рет +метронидазол 400 - 500 мг-ден тәулігіне 2 рет (немесе 500 мг тинидазол) + кларитромицин 250– 500 мг тәулігіне 2 рет • Аспан 40 мг-ден тәулігіне 2 рет + амоксициллин 1000 мг-ден тәулігіне 2 рет + метронидазол 400–500 мг-ден тәулігіне 2 рет (немесе 500 мг тинидазол). H. рylori эрадикациясына арналған біріктірілген емде Аспанның екінші таблеткасын кешкі асқа дейін 1 сағат бұрын қабылдаған жөн. Біріктірілген ем 7 күн бойына жүргізіледі және тағы да 7 күнге созылуы мүмкін (жалпы ұзақтығы – 2 аптаға дейін). Пантопразолды одан әрі тағайындағанда асқазан мен он екі елі ішектің ойық жарасы кезінде дозалау бойынша ұсынымдарды қарастыру қажет. H. рylori-ге теріс нәтиже алынған пациенттерде Аспанмен монотерапия жүргізгенде дозалаудың келесі қағидаттарын басшылыққа алуға болады: - Асқазанның ойық жара ауруының емі күніне 1 рет 1 таблеткадан (40 мг). Жекелеген жағдайда дозаны күніне 2 таблеткаға (80 мг) дейін, әсіресе басқа препараттармен емдеуден әсер болмаған жағдайда ұлғайтуға болады. Емдеу курсы 4 апта. Егер бұл жеткіліксіз болса, курс келесі 4 аптаға ұзартылады. - Он екі елі ішектің ойық жара ауруын емдеу: ұсынылатын доза күніне 1 таблеткадан (40 мг). Кейбір жағдайда дозаны күніне 2 таблеткаға (80 мг) дейін, әсіресе басқа препараттармен емдеу тиімсіз болғанда, арттыруға болады. Он екі елі ішектің ойық жара ауруының жазылуы әдетте 2 апта ішінде басталады. Егер бұл жеткіліксіз болса, курс келесі 2 аптаға ұзартылады. - Золлингер-Эллисон синдромы және асқазанның жоғары секрециясына байланысты басқа да патологиялық жағдайлар: Золлингер-Эллисон синдромын және басқа да патологиялық гиперсекреторлық жағдайларды ұзақ емдеген кезде емдеуді 80 мг тәуліктік дозадан (40 мг-нан 2 таблетка) бастаған жөн. Осыдан кейін доза тұз қышқылының секреция деңгейіне байланысты, қажеттілігіне қарай арттырылуы немесе төмендеуі мүмкін. Күніне 80 мг-нан жоғары дозаны күніне екі қабылдауға бөлу керек. Тәуліктік доза 160 мг-нан жоғарыға уақытша арттырылуы мүмкін, бірақ оны асқазан секрециясын адекватты бақылау кезеңіне қарағанда ұзағырақ қолдануға болмайды. Золлингер-Эллисон синдромын және жоғары асқазан секрециясымен байланысты басқа да патологиялық жағдайларды емдеу ұзақтығы шектелмейді және клиникалық қажеттілікке байланысты бейімделуі тиіс. Пациенттердің ерекше санаты Егде жастағы пациенттерге дозаны түзету қажет емес. Бүйрек функциясының бұзылуы Бүйрек функциясы бұзылған кезде дозаны түзету қажет емес. H. pylori эрадикациясы үшін бактерияға қарсы препараттармен біріктірілген емде бүйрек функциясы бұзылған пациенттерде Аспанды қолдануға болмайды, себебі осы пациенттерде біріктірілген емдеу кезінде препараттың тиімділігі мен қауіпсіздігі туралы деректер жоқ. Бауыр жеткіліксіздігі Бауыр жеткіліксіздігі ауыр пациенттерде тәуліктік доза 20 мг пантопразолдан (20 мг пантопразол 1 таблеткасы) аспауы тиіс. Емдеу кезінде, әсіресе ұзақ уақыт қолданғанда бауыр ферменттерінің деңгейін үнемі бақылау керек. Бауыр ферменттерінің деңгейі ұлғайған жағдайда препараттың қолданылуын тоқтату керек. Орташа немесе ауыр бауыр дисфункциясы бар пациенттерде H.pylori эрадикациясы үшін біріктірілген емде препаратты қолдануға болмайды, өйткені қазіргі уақытта осы пациенттерде біріктірілген емдеу кезінде оның тиімділігі мен қауіпсіздігі туралы деректер жоқ. Енгізу әдісі мен жолы Аспан, ішекте еритін таблеткаларын шайнауға немесе ұсақтауға болмайды. Суды аз мөлшерде ішіп, бүтіндей жұтып қою керек. Қабылдау уақыты көрсетілген қолдану жиілігі Аспанды тамақ ішкенге дейін 1 сағат бұрын қабылдау қажет. Қабылдау жиілігі мен ретін «Қолдану жөніндегі ұсынымдар» бөлімінен қараңыз. Дәрілік препараттың бір немесе бірнеше дозасын жіберіп алғанда қажетті шаралар Егер препарат уақытында қабылданбаса, өткізіп алған дозаның орнын толтыру үшін қосарлы дозаны қабылдамаңыз. Емдеуді тағайындалған дозалауға сәйкес келесі жоспарлы қабылдаудан бастап жалғастыру керек. Тоқтату симптомдарының болу қаупіне нұсқау Емдеуді ерте тоқтату немесе препаратты қабылдауды тоқтату үшін дәрігердің кеңесі қажет. Дәрілік препаратты қолдану тәсілін түсіндіру үшін медицина қызметкерінің кеңесіне жүгіну жөніндегі ұсынымдар Препаратты қолдану бойынша сұрақтар бар болса, емдеуші дәрігерге немесе дәріхана қызметкеріне жүгініңіз.

- пантопразолға, орнын басатын бензимидазолдарға немесе қосымша заттардың кез келгеніне аса жоғары сезімталдық - атазанавирмен бірге қабылдау - бауырдың ауыр жеткіліксіздігі - 18 жасқа дейінгі балалар

Пациенттердің 5% - ға жуығы қолайсыз жағымсыз реакцияларды (ҚЖР) сезінеді деп күтілуде. Диарея және бас ауыруы (пациенттердің 1% - да кездеседі) анағұрлым жиі кездесетін ҚЖР болып табылады. Жиі - асқазан түбінің безді полиптері (қатерсіз) Жиі емес • ұйқының бұзылуы • бас ауыруы, бас айналуы • ауыздың құрғауы, диарея, жүрек айнуы, құсу, іштің кебуі және іштегі жайсыздық, іш қату • бауыр ферменттері (трансаминаза, γ-GT) белсенділігінің артуы • терінің бөртуі, қышыну • омыртқа, ортан жілік және білезік сүйектерінің сынуы • астения, шаршауды сезіну және дімкәстану Сирек • агранулоцитоз • жоғары сезімталдық реакциялары (анафилаксиялық реакциялар мен анафилаксиялық шокты қоса алғанда) • гиперлипидемия, триглицеридтер, холестерин деңгейінің артуы, дене салмағының өзгеруі, дәм сезудің бұзылуы • депрессия және психика тарапынан бұрыннан бар аурулардың өршуі • көрудің бұзылуы, көрудің бұлыңғырлануы • билирубин деңгейінің жоғарылауы • есекжем, Квинке ісінуі • артралгия, миалгия, бұлшықет түйілуі** • гинекомастия • дене температурасының жоғарылауы, шеткері ісіну Өте сирек - тромбоцитопения, лейкопения, панцитопения • бағдардан адасу (және басқа да қатар жүретін бұзылулар) Белгісіз (қолда бар деректер негізінде бағалануы мүмкін емес): • гипонатриемия, гипомагниемия, гипокальциемия* және гипокалиемия* • елестеулер, сананың шатасуы (әсіресе генетикалық тұрғыдан бейім пациенттерде, сондай-ақ осы симптомдардың өршуі, егер олар ем басталғанға дейін бар болса) • гепатоцеллюлярлы зақымданулар, сарғаю, гепатоцеллюлярлы функция жеткіліксіздігі • микроскопиялық колит • парестезиялар • Стивенс-Джонсон сидромы, Лайелл синдромы, көп пішінді эритема, жарыққа сезімталдық, жеделге жуық қызыл жегі, эозинофилиямен және жүйелік симптомдармен дәрілік реакция (DRESS) • тубулоинтерстициальді нефрит(TIN) (бүйрек жеткіліксіздігіне үдеуі мүмкін) * Гипокальциемия және/немесе гипокалиемия гипомагнемияның туындауымен байланысты болуы мүмкін. ** Бұлшықет түйілуі электролиттік теңгерімнің бұзылуына байланысты пайда болады. Жағымсыз дәрілік реакциялар туындаған кезде медицина қызметкеріне, фармацевтика қызметкеріне немесе дәрілік препараттардың тиімсіздігі туралы хабарламаларды қоса алғанда, дәрілік препараттарға жағымсыз реакциялар (әсерлер) бойынша тікелей ақпараттық деректер базасына хабарласу керек Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

Артық дозалану симптомдары: пантопразолды қолдану нәтижесінде белгілі артық дозалану симптомдары байқалған жоқ. Жағымсыз әсерлердің мүмкін күшеюі болжанады. Шұғыл емшаралар: артық дозалану кезінде - симптоматикалық ем, қарапайым детоксикациялық іс-шараларды жүргізу (асқазанды тазарту, адсорбенттерді қабылдау).

- Бауыр жеткіліксіздігі Бауыр функциясы бұзылған пациенттерде, пантопразолмен емдеу кезінде, әсіресе ұзақ уақыт қолданғанда, бауыр ферменттерінің деңгейін тұрақты бақылау керек. Олар ұлғайған жағдайда Аспанмен емдеуді тоқтату керек. Біріктірілген ем H. рylori эрадикациясы үшін біріктірілген ем кезінде тиісті дәрілік заттардың қысқаша сипаттамасын ескеру қажет. Арнайы ескертулер Ұзаққа созылған ем Ұзақ уақыт емдегенде, әсіресе 1 жылдан астам емдегенде пациенттер үнемі дәрігердің бақылауында болуы тиіс. Бактериялар әсерінен болған асқазан-ішек инфекциялары Пантопразол, протонды помпасының барлық тежегіштері сияқты, әдетте асқазан-ішек жолдарының жоғарғы бөліктерінде болатын бактериялардың санын арттырады. Аспанмен емдеу Salmonella және Campilobacter бактериялары туындаған асқазан-ішек инфекцияларының даму қаупін арттыруы мүмкін. B12 дәрумені Пантопразол, тұз қышқылын өндіруді бөгейтін барлық препараттар сияқты гипо- және ахлоргидрияның салдарынан В12 дәруменінің (цианокобаламин) сіңуін төмендетуі мүмкін. Мұны дене салмағы төмен немесе В12 дәруменінің сіңірілу қаупі жоғары немесе тиісті клиникалық симптомдар байқалса, пациенттерде ұзақ емдеу кезінде ескеру керек. Гипомагниемия Симптоматикалық және симптомсыз гипомагниемия көп жағдайда, бір жыл емделгеннен кейін және кемінде 3 ай бойы ППТ алған пациенттерде байқалады. Ауыр жағымсыз құбылыстарға шаршау, тетания, сандырақтау, құрысулар, бас айналу және қарыншалық аритмиялар жатады, бірақ олар жылдам дамиды және уақтылы анықталмайды. Гипомагнемия гипокальциемияға және/немесе гипокалиемияға әкелуі мүмкін. Пациенттердің көпшілігінде гипомагниемия (гипомагниемиямен және/немесе гипокалиемиямен байланысты гиперкальциемиямен) магний жетіспеушілігін қалпына келтіргеннен және ППТ емдеуді тоқтатқаннан кейін басылады. Ұзақ емделуі тиіс пациенттерде немесе дигоксинмен немесе гипомагнемияны туындатуы мүмкін басқа препараттармен (мысалы, диуретиктер) бірге ППТ қабылдайтын пациенттерде ППТ емі басталғанға дейін және одан кейін магний деңгейін өлшеу қажет. Ортан жілік, білезік және омыртқа сүйектерінің сынуы ППТ қолдану, әсіресе жоғары дозаларда және ұзақ уақыт (> 1 жыл) қолдану көбіне егде жаста немесе басқа да көпшілік мойындаған қауіп факторлары бар болғанда, ортан жілік, білезік және омыртқа жотасы сүйектерінің сыну қаупін 10-40 % арттыруы мүмкін. Ішінара бұл ұлғаю басқа қауіп факторларымен байланысты болуы мүмкін. Остеопороздың даму қаупі бар пациенттер қолданыстағы клиникалық ұсынымдарға сәйкес көмек алуы және жеткілікті мөлшерде D дәрумені мен кальций қабылдауы тиіс. Асқазанның қатерлі жаңа түзілімдері Кез-келген үрейлену симптомдары бар (мысалы, кездейсоқ айтарлықтай салмақ жоғалту, қайталама құсу ұстамалары, дисфагия, қан құсу, анемия немесе мелена), сондай-ақ асқазан жарасы бар немесе оған күдік болған кезде, қатерлі түзілімді жоққа шығару қажет, себебі пантопразол қабылдау симптомдарды жеңілдетеді және диагноз қоюды кейінге қалдыруы мүмкін. Емдеуді бастамас бұрын қатерлі түзілімнің болуы мүмкіндігін жоққа шығару керек. Нейроэндокринді ісіктермен өзара әрекеттесуі Аспан қабылдағаннан кейін тұз қышқылы деңгейінің төмендеуі аясында А (CgA) хромогранин деңгейінің жоғарылауы нейроэндокринді ісіктерді диагностикалауда жалған оң нәтижелерге әкелуі мүмкін. Бұған жол бермеу үшін, Аспан препаратымен емдеуді CgA зерттеулерінен кем дегенде 5 күн бұрын тоқтату керек. Егер CgA деңгейі мен гастриннің деңгейі бастапқы зерттеуден кейін қалыпты болмаса, протонды помпа тежегішімен емдеуді тоқтатқаннан кейін 14 күннен кейін талдауларды қайталау керек. Жеделге жуық терінің қызыл жегісі (ЖТҚЖ): Протонды сорғының тежегіштерін қолдану жеделге жуық терінің қызыл жегісінің (ЖТҚЖ) өте сирек пайда болу жағдайларына байланысты. Патологиялық өзгерістер пайда болған жағдайда, әсіресе күн әсеріне ұшыраған тері учаскелерінде, және артралгия қосылған жағдайда, пациент Аспан препаратын тоқтатудың орындылығын анықтау үшін дереу дәрігерге қаралуға тиіс. Протонды сорғы тежегішімен алдыңғы емдеуден кейін ЖТҚЖ дамуы протонды сорғының басқа тежегіштерін қолданған кезде ЖТҚЖ қаупін арттыруы мүмкін. Қабынуға қарсы стероидты емес препараттармен қолдану (ҚҚСП): Селективті емес ҚҚСП туындатқан асқазан мен он екі елі ішектің ойық жара ауруының алдын алу үшін Аспанды қолдану ҚҚСП үздіксіз емін қажет ететін және асқазан-ішек асқынуларының даму қаупі жоғары пациенттерге шектелуі тиіс. Егде жастағы (65 жастан асқан), асқазанның немесе он екі елі ішектің ойық жара ауруы немесе асқазан-ішек жолының жоғарғы бөлігіндегі қан кету көрінісі сияқты жеке қауіп факторларына сәйкес жоғары қауіпті бағалау керек. Педиатрияда қолданылуы Қауіпсіздігі және тиімділігі жөнінде деректердің жеткіліксіз болуына байланысты, пантопразолды 12 жасқа толмаған балаларда рефлюкс-эзофагитте, симптоматикалық гастроэзофагеальді рефлюкс ауруында қолдану ұсынылмайды. Пантопразол препаратын асқазан мен он екі елі ішектің ойық жара ауруында, Helicobacter pylori эрадикациясында, Золлингер-Эллисон синдромында, селективті емес ҚҚСП әсерінен туындаған асқазан мен он екі елі ішектің эрозиялық-ойық жаралы зақымдануының алдын алу үшін 18 жасқа дейінгі балалар мен жасөспірімдерде қолдану жөнінде деректер жоқ. Аспанда хинолинді сары (Е 104) бояғыштың болуы препаратты 18 жасқа дейінгі балаларда қолдануды шектейді. Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері Емдеу кезінде бас айналу, көру бұзылыстары сияқты қолайсыз жағымсыз реакциялар болуы мүмкін. Мұндай жағдайларда пациенттерге көлік құралдарын басқаруға немесе механизмдермен жұмыс істеуге болмайды.

Жануарларға жүргізілген зерттеулер пантопразолдың репродуктивті уыттылығын айғақтайды. Аспанды жүктілік кезінде, егер қажеттілік жоқ болса, қолданбаған жөн. Пантопразол емшек сүтіне бөлініп шығады. Аспанмен емделу кезінде бала емізуді тоқтатқан жөн.

Асқазан сөлі секрециясының терең және ұзақ тежелуіне байланысты, пантопразол биожетімділігі асқазанның рН ортасына тәуелді препараттардың (мысалы, кетоконазол, итраконазол, позаконазол сияқты азолдар тобының зеңге қарсы дәрілері және эрлотиниб сияқты басқа да препараттар) сіңуін төмендетуі мүмкін. Атазанавирді және сіңуі рН мәніне байланысты АИТВ-ны емдеуге арналған басқа да препараттарды протонды помпа тежегіштерімен бір мезгілде қолдану препараттардың биожетімділігі мен тиімділігінің айтарлықтай төмендеуіне әкелуі мүмкін. Протонды помпа тежегіштерінің атазанавирмен біріктірілген емін қолдануға болмайды. Кумаринді антикоагулянттарды (мысалы, фенпрокумон немесе варфарин) қабылдайтын пациенттерде емдеудің басында, пантопразолды аяқтағаннан кейін немесе тұрақты емес пайдалану кезеңінде протромбиндік уақытты/ХҚҚ (халықаралық қалыптасқан қатынас) бақылау жүргізу ұсынылады. Карбамазепин, диазепам, глибенкламид, нифедипин және ұрықтануға қарсы құрамында левоноргестрел мен этинил эстрадиол бар пероральді дәрілердің метаболизм жолы пантопразолдағыдай болады, бір мезгілде қолданған кезде клиникалық тұрғыдан маңызды өзара әрекеттесулер болған жоқ. Пантопразол CYP1A2 (кофеин, теофиллин сияқты), CYP2C9 (пироксикам, диклофенак, напроксен сияқты), CYP2D6 (метопрололол сияқты), CYP2E1 (этанол сияқты) көмегімен метаболизденетін белсенді заттарға әсер етпейді және p-гликопротеинмен байланысты дигоксиннің абсорбциясына қатыспайды. Метотрексат Протонды сорғы тежегіштерімен жоғары дозаларда (мысалы, 300 мг) бірге қолданғанда қандағы метотрексат деңгейінің жоғарылауы орын алуы мүмкін. Сондықтан, метотрексаттың жоғары дозаларын пайдаланған кезде, мысалы, обыр немесе псориаз кезінде, пантопразолды уақытша тоқтату мәселесін қарастыру қажет болуы мүмкін. Пантопразол бір мезгілде қолданған кезде антацидтермен өзара әрекеттеспейді. Кларитромицин, метронидазол, амоксициллин сияқты антибактериалды препараттармен бірге пантопразол қабылдау клиникалық елеулі өзара әрекеттесуді туындатпайды.

Сақтау мерзімі 3 жыл Жарамдылық мерзімі өткеннен кейін қолдануға болмайды! Сақтау шарттары 25°С-ден аспайтын температурада сақтау керек. Балалардың қолы жетпейтін жерде сақтау керек!