Аторвастатин-ЛФ таблетки 10 мг

Бір таблетканың құрамында әсер етуші зат - аторвастатин 10.0 мг (кальций тригидрат аторвастатині түрінде 10.85 мг); аторвастатин 20.0 мг (кальций тригидрат аторвастатині түрінде 21.70 мг); аторвастатин 40.0 мг (кальций тригидрат аторвастатині түрінде 43.40 мг); қосымша заттар: кальций карбонаты, кросповидон, натрий лаурилсульфаты, сусыз коллоидты кремнийдің қостотығы, тальк, микрокристалды целлюлоза; қызғылт қабықтың құрамы: тальк, полиэтиленгликоль, титанның қостотығы (Е171), поливинил спирті, темірдің (III) сары тотығы (Е172), темірдің (III) қызыл тотығы (Е172), темірдің (III) қара тотығы (Е172). Сыртқы түрінің, иісінің, дәмінің сипаттамасы Екі беті дөңес, қызғылт түсті қабықпен қапталған таблеткалар.

• Қауіпті азайту үшін: • Жүректің ишемиялық ауруы (ЖИА) дамуының көптеген қауіп факторлары бар, бірақ клиникалық айқын ЖИА жоқ ересек пациенттерде миокард инфарктісі (МИ), инсульт, реваскуляризация процедуралары және стенокардияда. • ЖИА дамуының көптеген қауіп факторлары бар, бірақ клиникалық айқын ЖИА жоқ 2 типті қант диабетімен ересек пациенттерде миокард инфарктісі және инсультте. • Өлімге әкелмейтін миокард инфарктісі, өлімге әкелетін және өлімге әкелмейтін инсульт, реваскуляризация процедуралары, клиникалық айқын ЖИА бар ересек пациенттерде жүректің іркілісті жеткіліксіздігі мен стенокардияға байланысты ауруханаға жатқызуда. • Пациенттердің келесі санаттарында тығыздығы төмен липопротеиндер холестеринін (ТТЛП ХС) төмендетуге арналған диетаға қосымша ретінде: • Бастапқы гиперлипидемиясы бар ересек пациенттер. • Гетерозиготалы отбасылық гиперхолестеринемиямен (ГеОГХС) ересек пациенттер және 10 жас және одан үлкен балалар. • Гомозиготалы отбасылық гиперхолестеринемиямен (ГоОГХС) ересек пациенттерде және 10 және одан жоғары жастағы балаларда ТТЛП ХС деңгейін төмендету үшін, ТТЛП ХС деңгейін төмендететін басқа емдеу әдістеріне қосымша ретінде немесе егер мұндай емдеу әдісі мүмкін болмаса, бөлек. • Келесі патологиясы бар ересек пациенттерді емдеуге арналған диетаға қосымша ретінде: • Бастапқы дисбеталипопротеинемия. • Гипертриглицеридемия.

ATХ коды С10АА05 Фармакодинамикалық әсерлері Аторвастатин - ГМГ-КоА-ның стеролдардың ізашары (соның ішінде холестерин (ХС)) мевалонатқа айналуының жылдамдығын реттейтін ГМГ-КоА-редуктазы-энзимнің селективті бәсекелес тежегіші болып табылады. Гомозиготалы және гетерозиготты отбасылық гиперхолестеринемиясы бар, гиперхолестеринемияның тұқым қуаламайтын түрімен және аралас дислипидемиясы бар пациенттерде аторвастатин жалпы ХС, тығыздығы төмен липопротеидтердің (ТТЛП) және аполипопротеиннің В (Апо В) концентрациясын төмендетеді. Аторвастатин сондай-ақ тығыздығы өте төмен липопротеидтердің (ТӨТЛП) және триглицеридтердің (ТГ) концентрациясын төмендетеді, сондай-ақ тығыздығы жоғары липопротеидтердің (ТЖЛП) ХС мөлшерін біршама арттырады. Аторвастатин ХС және қан плазмасындағы липопротеидтер деңгейін ГМГ-КоА-редуктазаны, бауырдағы ХС синтезін бәсеңдету және гепатоциттер беткейінде ТТЛП рецептор мөлшерін арттыру жолымен төмендетеді, бұл ТТЛП қармалуының және катаболизмінің күшеюімен қатар жүреді. Аторвастатин ТТЛП өндірілуін азайтады, ТТЛП рецепторлар белсенділігінің айқынырақ және ұзағырақ артуын туындатады. Аторвастатин гиполипидемиялық дәрілермен стандартты емге бағынбайтын гомозиготалы отбасылық гиперхолестеринемиясы бар пациенттерде ТТЛП ХС деңгейін тиімді түрде төмендетеді. Аторвастатиннің алғашқы әсер ету орны бауыр болып табылады,ол ХС синтезінде және ТТЛП клиренсінде басты рөл атқарады. ТТЛП ХС деңгейінің төмендеуі препараттың дозасымен және оның организмдегі концентрациясымен өзара байланысты. Аторвастатиннің 10–80 мг дозасында ХС (30-46%-ға), ТТЛП ХС (41-61%-ға), Апо В (34-50%-ға) және ТГ (14-33%-ға) жалпы деңгейлері төмендеді. Гетерозиготалы отбасылық гиперхолестеринемиясы, гиперхолестеринемияның жүре пайда болған түрі және гиперлипидемияның аралас түрі бар пациенттерде, соның ішінде инсулинге тәуелді қант диабеті бар пациенттерде бұл нәтиже тұрақты. Оқшауланған гипертриглицеридемиясы бар пациенттерде аторвастатин жалпы ХС, ТТЛП ХС, ТӨТЛП ХС, Апо В, ТГ деңгейін төмендетеді және ТЖЛП ХС деңгейін біршама жоғарылатады. Дисбеталипопротеинемиясы бар пациенттерде аторвастатин ТОЛП ХС деңгейін төмендетеді. IIа және IIb типті (Фредриксон жіктемесі бойынша) гиперлипопротеинемиясы бар пациенттерде аторвастатинді 10-80 мг дозада қолданғанда ТЖЛП ХC жоғарылауының орташа деңгейі, дозасына қарамай, 5,1–8,7% құрайды. Бұдан басқа, жалпы ХС/ ТЖЛП ХС және ТТЛП ХС /ТЖЛП ХС арақатынасының дозаға тәуелді маңызды азаюы байқалды. Аторвастатинді қолдану Q тісшесі жоқ миокард инфарктісі және ТТЛП ХС деңгейіне тура пропорционалды тұрақсыз стенокардиясы (жынысына және жасына қарамай) бар пациенттерде ишемияның даму және өлім қаупін төмендетеді. Педиатриядағы гетерозиготалы тектес гиперхолестеринемия. Гетерозиготалы отбасылық гиперхолестеринемиясы немесе ауыр гиперхолестеринемиясы бар 10-17 жастағы ер балалар мен қыздарда аторвастатин тәулігіне 1 рет 10-20 мг дозада қан плазмасындағы жалпы ХС, ТТЛП ХС, ТГ және Апо В деңгейін едәуір төмендеткен. Мұндайда ер балаларда бойының өсуіне және жыныстық жетілуіне немесе қыздардағы етеккір оралымының ұзақтығына айтарлықтай әсері байқалған жоқ. Балаларды емдеу үшін 20 мг астам дозада қолданудың қауіпсіздігі мен тиімділігі зерттелмеді. Балалық кезде аторвастатинмен емделу ұзақтығының ересек жаста аурушаңдықтың және өлім жағдайының азаюына әсері анықталған жоқ.

Дозалау режимі Дозалау туралы маңызды ақпарат • Аторвастатин-ЛФ препаратын тамаққа қарамастан тәуліктің кез келген уақытында күніне бір рет пероральді қабылдау керек. • Егер бұл клиникалық тұрғыдан қажет болса, Аторвастатин-ЛФ препаратын қабылдағаннан кейін 4 аптадан кейін ТТЛП ХС деңгейін бағалау керек және қажет болған жағдайда дозаны түзету керек. Ересек пациенттерге ұсынылатын доза Аторвастатин-ЛФ препаратының ұсынылатын бастапқы дозасы күніне бір рет 10-нан 20 мг-ге дейінді құрайды. Доза диапазоны күніне бір рет 10-нан 80 мг-ге дейінді құрайды. ТТЛП ХС деңгейін 45%-дан астам төмендетуді қажет ететін пациенттерге күніне бір рет 40 мг дозадан бастауға болады. ГеОГХС бар 10 жас және одан үлкен балаларға ұсынылатын доза Аторвастатин-ЛФ препаратының ұсынылатын бастапқы дозасы күніне бір рет 10 мг құрайды. Доза диапазоны күніне бір рет 10-нан 20 мг-ге дейін құрайды. ГоОГХС бар 10 жас және одан үлкен балаларға ұсынылатын доза Аторвастатин-ЛФ препаратының ұсынылатын бастапқы дозасы күніне бір рет 10-нан 20 мг-ге дейінді құрайды. Доза диапазоны күніне бір рет 10-нан 80 мг-ге дейін құрайды. Дәрілік өзара әрекеттесуге байланысты дозаның өзгеруі Аторвастатин-ЛФ препаратын келесі дәрілік заттармен бір мезгілде қолдану Аторвастатин-ЛФ препаратының дозасын түзетуді талап етеді ("Басқа дәрілік препараттармен өзара әрекеттесу" бөлімін қараңыз). Вирусқа қарсы препараттар • Саквинавир плюс ритонавир, дарунавир плюс ритонавир, фосампренавир, фосампренавир плюс ритонавир, элбасвир плюс гразопревир немесе летермовир қабылдайтын пациенттерде Аторвастатин-ЛФ препаратының дозасы күніне бір рет 20 мг-ден аспауы тиіс. • Нелфинавир қабылдаған пациенттерде Аторвастатин-ЛФ препаратының дозасы күніне бір рет 40 мг-ден аспауы тиіс. Жеке азолды зеңге қарсы препараттар немесе макролидті антибиотиктер • Кларитромицин немесе итраконазол қабылдайтын пациенттерде Аторвастатин-ЛФ препаратының дозасы күніне бір рет 20 мг-ден аспауы тиіс. Аторвастатин-ЛФ препаратын басқа вирусқа қарсы препараттармен, азолды зеңге қарсы препараттармен немесе макролидті антибиотиктермен бір мезгілде қолдануға қатысты қосымша ұсыныстар "Басқа дәрілік препараттармен өзара әрекеттесу" бөлімінде келтірілген. Дәрілік препараттың бір немесе бірнеше дозасын өткізіп алған жағдайда қажетті шаралар Егер сіз Аторвастатин-ЛФ препаратының дозасын қабылдауды ұмытып кетсеңіз, оны есіңізге түскеннен кейін бірден қабылдаңыз. Егер алдыңғы дозаны өткізіп алған сәттен бастап 12 сағаттан астам уақыт өтсе, Аторвастатин-ЛФ қабылдауға тыйым салынады. Күте тұрыңыз және келесі дозаны әдеттегі уақытта қабылдаңыз. Аторвастатин-ЛФ препаратының 2 дозасын бір уақытта қабылдауға тыйым салынады. Дәрілік препараттың қолдану тәсілін түсіндіру үшін медициналық қызметкерге кеңес алуға жүгіну жөніндегі ұсынымдар Егер Аторвастатин-ЛФ препаратына қатысты сұрақтар туындаса, емдеуші дәрігерге немесе фармацевтке жүгініңіз.

- әсер етуші затқа немесе қосымша заттардың кез келгеніне аса жоғары сезімталдық - бауырдың белсенді аурулары немесе генезі айқын емес сарысу трансаминазалары белсенділігінің жоғарылауы (қалыптың жоғары шегімен салыстырғанда 3 еседен көбірек) - жүктілік және лактация кезеңі, сондай-ақ контрацепцияның адекватты әдістерін пайдаланбайтын ұрпақ өрбіту жасындағы әйелдерге қолдану - С гепатитіне қарсы (глекапревир/либрентасвир) вирусқа қарсы препараттермен бірге қолдану.

шаралар Жағымсыз құбылыстардың жиілігін анықтау мынадай критерийлерге сәйкес жүргізіледі: өте жиі (≥ 1/10), жиі (≥ 1/100-ден < 1/10-ға дейін), жиі емес (≥ 1/1000-нан < 1/100-ге дейін), сирек (≥ 1/10000-нан < 1/1000-ға дейін), өте сирек (< 1/10000), белгісіз (қолда бар деректер негізінде бағалау мүмкін емес). Жиі - назофарингит - аллергиялық реакциялар - гипергликемия - бас ауыруы - фаринголарингеальді ауырсыну, мұрыннан қан кету - іш қату, метеоризм, диспепсия, жүрек айну, диарея - миалгия, артралгия, аяқ-қолдың ауыруы, бұлшықет спазмы, буындардың ісінуі, арқаның ауыруы - бауыр функциясын көрсететін көрсеткіштердің бұзылуы, креатинфосфокиназа деңгейінің жоғарылауы Жиі емес - гипогликемия, дене салмағының жоғарылауы, анорексия - түнгі қорқыныш түстер, ұйқысыздық - бас айналу, парестезия, гипестезия, дисгевзия, амнезия - көрудің бұлаңғырлануы - құлақтың шуылдауы, құсу, іштің жоғарғы және төменгі бөлігінің ауыруы, кекіру, панкреатит - гепатит - есекжем, тері бөртпесі, қышыну, алопеция - мойынның ауыруы, бұлшық еттің талуы - дімкәстік, астения, кеуде қуысының ауыруы, шеткері ісіну, қатты қажу, қызба - несептегі лейкоциттер мөлшерін талдауының оң нәтижесі Сирек - тромбоцитопения - шеткері нейропатия - көру қабілетінің бұзылуы - холестаз - ангионевроздық ісіну, буллезді дерматит, мультиформалы эритеманы қоса, Стивенс-Джонсон синдромы және уытты эпидермалық некролиз - миопатия, миозит, рабдомиолиз, тендинопатия, кейде сіңірлердің үзілуімен асқынған - теріде пайда болуы мүмкін бөртпе немесе ауыз қуысында жаралар (лихеноидты дәрілік реакция) - терінің күрең қызыл түсті зақымдануы (қан тамырларының қабыну белгілері, васкулит) Өте сирек - анафилаксия - есту қабілетінің жоғалуы - бауыр жеткіліксіздігі - гинекомастия Белгісіз - иммунитетпен байланысты болатын некроздық миопатия - миастения грависі (жалпы бұлшықет әлсіздігін, кейбір жағдайларда тыныс алу бұлшықеттерінің әлсіздігін тудыратын ауру) - миастенияның көздегі түрі (көз бұлшықеттерінің әлсіздігін тудыратын ауру). Егер сіз белсенділік кезеңінен кейін қолдарыңызда немесе аяқтарыңызда күшейетін әлсіздік, көзге қос көріну, немесе қабақтың түсіп кетуі, жұтынудың қиындауы немесе ентігу болса, дәрігерге қаралуыңыз керек. ГМГ-КоА-редуктазаның басқа тежегіштеріндегі жағдай сияқты, аторвастатинмен емдеген кезде пациенттерде сарысуда трансаминазаның жоғары деңгейлері байқалды. Осы өзгерулер, әдеттегідей, әлсіз, өткінші сипатта болды және емдеуді тоқтатуды қажет еткен жоқ. Статиндер тобының препараты сияқты, Аторвастатинді қабылдаған кезде келесі әсерлер де байқалды: - сексуальды дисфункция - депрессия - әсіресе ұзақ емдеген кезде өкпенің интерстициялық ауруларының дамуының сирек жағдайлары - қант диабеті: даму жиілігі қауіп факторларының болуына немесе болмауына байланысты болады (ашқарында глюкоза ≥5.6; дене салмағының индексі >30 кг/м2; триглицеридтер деңгейінің жоғарылауы; анамнездегі гипертензия). Бала жасындағы пациенттер Жиі - бас ауыруы, іштің ауыруы, аланинаминтрансфераза деңгейлерінің жоғарылауы, қандағы креатинфосфокиназа деңгейлерінің жоғарылауы. Жағымсыз дәрілік реакциялар туындаған кезде медицина қызметкеріне, фармацевтика қызметкеріне немесе дәрілік препараттардың тиімсіздігі туралы хабарламаны қоса, дәрілік препараттарға жағымсыз реакциялар (әсерлер) бойынша ақпараттық деректер базасына тікелей жүгіну қажет Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

Аторвастатин-ЛФ препаратының артық дозалануын емдеуге арналған спецификалық антидот жоқ. Артық дозаланған жағдайда симптоматикалық емдеу жүргізіліп, қажет болған жағдайда қолдау шараларын қабылдау керек. Препарат қан плазмасы ақуыздарымен белсенді байланысатындықтан, гемодиализ кезінде Аторвастатин-ЛФ препаратының клиренсінің айтарлықтай артуы екіталай.

Миопатия және рабдомиолиз Аторвастатин-ЛФ препараты миопатияны (бұлшықет ауыруы, қалыптың жоғарғы шегінен он есе жоғары креатинкиназа (КК) деңгейімен ауырсынушылық немесе әлсіздік) және рабдомиолизді (бүйректің жедел жеткіліксіздігімен, миоглобинурияға қатысты салдарлы немесе онсыз) тудыруы мүмкін. Статиндерді, соның ішінде Аторвастатин-ЛФ препаратын қабылдау аясында рабдомиолиздің дамуы нәтижесінде өліммен аяқталатын сирек жағдайлар туралы хабарланды. Миопатияның қауіп факторлары Миопатияның қауіп факторларына 65 жас және одан үлкен жас, бақыланбайтын гипотиреоз, бүйрек жеткіліксіздігі, кейбір басқа дәрілік препараттармен бір мезгілде қабылдау және Аторвастатин-ЛФ препаратының жоғары дозаларын қолдану жатады. Миопатия мен рабдомиолиз қаупінің алдын алу немесе азайту қадамдары Аторвастатин-ЛФ препаратының экспозициясы P450 цитохромының (CYP3A4) 3A4 изоферментінің және/немесе тасымалдаушылардың (мысалы, сүт безі обырына төзімділік ақуызы (BCRP), полипептидтің, органикалық аниондарды тасымалдаушының (OATP1B1/OATP1B3) және гликопротеин P (P-gp) тежелуіне байланысты дәрілік өзара әрекеттесу арқылы артуы мүмкін, бұл миопатия мен рабдомиолиз қаупінің жоғарылауына әкеледі. Циклоспорин, гемфиброзил, типранавир плюс ритонавир немесе глекапревир плюс пибрентасвирді Аторвастатин-ЛФ препаратымен бір мезгілде қабылдау ұсынылмайды. Аторвастатин-ЛФ препаратының дозасын түзетуді белгілі бір вирусқа қарсы, азолды зеңге қарсы немесе макролидті антибиотиктерді қабылдайтын пациенттерде жүргізу ұсынылады. Миопатия/рабдомиолиз жағдайлары туралы аторвастатинді ниацинмен, фибраттармен, колхицинмен және ледипасвирмен плюс софосбувирмен липидтердің деңгейін өзгертетін дозаларда (> 1 г/тәулігіне) бір мезгілде тағайындау кезінде хабарланды. Осы препараттарды қолданудың ықтимал пайдасы миопатия мен рабдомиолиздің даму қаупінің жоғарылауынан асып түсетінін мұқият бағалау қажет. Миопатияның және/немесе рабдомиолиздің даму қаупі ГМГ-КоА редуктаза тежегіштерін (мысалы, аторвастатин) және даптомицинді бір мезгілде қолданғанда артуы мүмкін («Жағымсыз реакциялар» бөлімін қараңыз). Бір мезгілде қолданудың пайдасы қауіптен асатын жағдайларды қоспағанда, даптомицин қабылдайтын пациенттерде Аторвастатин-ЛФ препаратын қабылдауды уақытша тоқтата тұру мүмкіндігін қарастыру қажет. Егер препаратты бір мезгілде қолданудан аулақ болу мүмкін болмаса, КФК деңгейін аптасына 2-3 рет өлшеп және миопатияны көрсетуі мүмкін кез келген белгілер мен симптомдар үшін пациенттерді мұқият бақылау керек. Аторвастатин-ЛФ препаратын қабылдайтын пациенттерге күніне 1,2 литрден астам грейпфрут шырынын бір мезгілде шамадан тыс тұтыну ұсынылмайды. КФК деңгейлері едәуір жоғарылағанда, миопатия диагнозы анықталған немесе миопатияға күдік болған кезде Аторвастатин-ЛФ препаратымен емдеуді тоқтату керек. Бұлшықет көріністері және КФК деңгейінің жоғарылауы Аторвастатин-ЛФ препаратын тоқтатқаннан кейін жоғалып кетуі мүмкін. Аторвастатин-ЛФ препаратымен емдеуді рабдомиолизден туындаған бүйрек жеткіліксіздігінің дамуына бейім қауіп факторлары бар жедел ауыр жағдайы бар пациенттерде (мысалы, сепсис, шок, ауыр гиповолемиясы бар, ауқымды хирургиялық араласудан өткен, жарақат алған, метаболизмнің ауыр бұзылуы, эндокриндік бұзылысы немесе су-электролит теңгерімінің бұзылуы, сондай-ақ бақыланбайтын эпилепсиясы бар пациенттерде) уақытша тоқтату керек. Пациенттерге емнің басында немесе Аторвастатин-ЛФ препаратының дозасын ұлғайту кезінде миопатия мен рабдомиолиздің даму қаупі туралы хабарлау керек. Пациенттерге анықталмаған себеппен пайда болған бұлшықет ауыруы, ауырсынушылық немесе әлсіздік туралы дереу хабарлауға кеңес беру керек, әсіресе олар дімкәстікпен немесе қызбамен бірге жүрсе. Иммунитетпен байланысты болатын некроздық миопатия Статиндерді қолдануға байланысты иммунитетпен байланысты болатын некроздық миопатия (ИБНМ), аутоиммунды миопатия жағдайлары туралы сирек хабарламалар келіп түсті. ИБНМ проксимальді бұлшық еттердің әлсіздігімен және статиндермен емдеуді тоқтатқанына қарамастан сақталатын қан сарысуындағы креатинкиназа деңгейінің жоғарылауымен; HMG-CoA-редуктазаға қарсы оң антиденелердің түзілуімен; некроздық миопатияны көрсететін бұлшықет биопсиясының нәтижелерімен; иммунодепрессанттарды қолдану кезінде жағдайдың жақсаруымен сипатталады. Қосымша жүйке-бұлшықет және серологиялық зерттеулер және иммунодепрессанттармен емдеуді тағайындау қажет болуы мүмкін. Басқа статиндерді тағайындамас бұрын ИБНМ даму қаупін мұқият бағалау қажет. Егер ем басқа статиндерді қолдану арқылы басталса, пациенттерді ИБНМ белгілері мен симптомдарының пайда болуына бақылау қажет. Статиндерді қолдану немесе бұрыннан бар миастения гравистің немесе миастенияның көздегі түрінің өршуінен туындаған миастения гравистің дебютінің бірнеше жағдайлары туралы хабарланды (Жағымсыз реакциялардың сипаттамасын қараңыз). Симптомдар нашарлаған жағдайда Аторвастатин-ЛФ препаратын қолдануды тоқтату керек. Сол немесе басқа статинді қайта қолданғанда миастенияның қайталануы туралы хабарланды. Бауыр функциясының бұзылуы Статиндер, кейбір басқа гиполипидемиялық терапия дәрілері сияқты, бауыр функциясының биохимиялық көрсеткіштерінің ауытқуын тудырды. Бір пациентте сарғаю дамыды. Басқа пациенттерде бауыр функциясының биохимиялық көрсеткіштерінің (БФБК) жоғарылауы сарғаюмен немесе басқа клиникалық көріністермен немесе симптомдарымен бірге жүрмеді. Дозаны төмендеткеннен, препаратты қолданудан үзілістен немесе терапияны тоқтатқаннан кейін трансаминазалар деңгейі емдеу басталғанға дейінгі деңгейге оралды немесе қалдық әсерсіз соған жақындады. Аторвастатин-ЛФ препаратымен терапияны бастамас бұрын, содан кейін клиникалық көрсетілімдер болған жағдайда бауыр ферменттерінің талдауларын жүргізу ұсынылады. Статиндерді, соның ішінде аторвастатинді қабылдаған пациенттерде тіркеуден кейінгі кезеңде өлімге әкелетін және өлімге әкелмейтін бауыр жеткіліксіздігінің сирек жағдайлары тіркелген. Егер Аторвастатин-ЛФ препаратымен емдеу кезінде клиникалық симптомдармен және/немесе гипербилирубинемиямен немесе сарғаюмен бауырдың ауыр зақымдануы пайда болса, терапияны дереу тоқтатыңыз. Егер баламалы этиологияны анықтау мүмкін болмаса, Аторвастатин-ЛФ препаратымен терапияны жалғастырмаңыз. Алкогольдің едәуір мөлшерін тұтынатын және/немесе бауыр ауруы бар пациенттерде Аторвастатин-ЛФ сақтықпен қолданылуы керек. Бауырдың белсенді ауруы немесе трансаминазалар деңгейінің түсініксіз тұрақты жоғарылауы Аторвастатин-ЛФ препаратын қолдануға қарсы көрсетілім болып табылады. Эндокриндік жүйенің қызметі Аторвастатин-ЛФ қоса алғанда, ГМГ-КоА-редуктаза тежегіштерін қолдану HbA1c деңгейі және аш қарынға сарысудағы глюкоза деңгейінің жоғарылауымен байланысты. Статиндер холестерин синтезіне кедергі келтіреді және теориялық тұрғыдан бүйрек үсті безінің және/немесе жыныстық стероидтардың өндірілуін тежеуі мүмкін. Аторвастатин-ЛФ плазмадағы кортизол концентрациясын бастапқы деңгейде төмендетпейді және бүйрек үсті безінің резервін төмендетпейді. Статиндердің ерлердің ұрпақ өрбіту функциясына әсері пациенттердің жеткілікті санында зерттелмеген. Егер бар болса, менопауза алдындағы кезеңде әйелдердегі гипофиз-гонадтық жүйеге әсері зерттелмеген. Егер статин кетоконазол, спиронолактон және циметидин сияқты эндогендік стероидты гормондардың белсенділік деңгейін төмендетуге қабілетті препараттармен бір мезгілде қабылданса, сақ болу керек. Жақында инсультті немесе ТИШ бастан кешкен пациенттерде қолдану Холестеринді агрессивті төмендету арқылы инсульттің алдын алу зерттеуінің нәтижелерін ретроспективті талдау кезінде, алдыңғы 6 айда инсультті немесе ТИШ бастан кешкен ЖКА жоқ пациенттер 80 мг немесе плацебо дозасында аторвастатин қабылдаған кезде, 80 мг аторвастатин тобында геморрагиялық инсульттің пайда болу жиілігі плацебо тобына қарағанда жоғары болды. Өліммен аяқталатын геморрагиялық инсульттің жиілігі емдеудің екі тобында да ұқсас болды. Өлімге әкелмейтін геморрагиялық инсульт жағдайларының жиілігі плацебо тобына қарағанда аторвастатин тобында айтарлықтай жоғары болды. Зерттеуге енгізілген кезде геморрагиялық және лакунарлық инсультті қоса, бастапқы деңгейдің кейбір сипаттамалары аторвастатин тобында геморрагиялық инсульттің жоғары жиілігімен байланысты болды. Егде жастағы пациенттерде қолданылуы Жалпы алғанда, осы пациенттер мен жас пациенттер арасында қауіпсіздік пен тиімділікте ешқандай айырмашылықтар байқалмады, егде жастағы және жас пациенттер арасында емдеуге жауап беруде ешқандай айырмашылықтар байқалмады; дегенмен, кейбір егде жастағы пациенттерде жағымсыз құбылыстарға бейімділіктің жоғарылауы әрқашан ескерілуі керек. Егде жас (≥ 65 жас) миопатияның дамуының бейімділік факторы болғандықтан, Аторвастатин-ЛФ егде жастағы адамдарға сақтықпен тағайындалуы керек. Миастения гравис Аторвастатин-ЛФ қабылдамас бұрын дәрігеріңізбен сөйлесіңіз. Егер сізде миастения немесе анамнездегі миастения жағдайлары болса (жалпы бұлшықет әлсіздігі бар аурулар, соның ішінде кейбір жағдайларда тыныс алу бұлшықеттері) немесе көз миастениясы (көз бұлшықеттерінің әлсіздігі) болса, статиндерді қабылдау кейде жағдайды нашарлатуы немесе миастенияның пайда болуына әкелуі мүмкін (Жағымсыз реакциялардың сипаттамасы бөлімін қараңыз). Дәрілік заттың құрамында натрий лаурилсульфаты бар. Бұл ақпаратты натрий шектелген диетадағы пациенттер ескеруі керек. Арнайы ескертулер Педиатрияда қолдану Препаратты 6-10 жастағы балаларда қолдану тәжірибесі шектеулі. Аторвастатин-ЛФ 10 жасқа толмаған пациенттерді емдеу үшін қолданылмайды. Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері Аторвастатин-ЛФ көлік құралын басқаруына немесе күрделі механизмдермен жұмыс істеу қабілетіне ықпалын тигізбейді. Алайда зейінді жұмылдыруды және қимыл үйлесімін төмендетуге әкелуі мүмкін жағымсыз реакциялар пайда болған кезде автомобиль жүргізуді тоқтата тұрған жөн.

Аторвастатин жүктілік кезінде қолдануға болмайды. Ұрпақ өрбіту жасындағы әйелдер емделу кезінде контрацепцияның сенімді әдістерін пайдалануы тиіс. Аторвастатинді ұрпақ өрбіту жасындағы әйелдерге, егер жүкті болу ықтималдығы оларда өте төмен болған жағдайда ғана, тағайындауға болады, ал пациент емделу кезінде ұрпақ үшін ықтимал қаупі жөнінде хабардар болуы керек. Аторвастатин қабылдауды тоқтатқаннан кейін 1 ай өткен соң жүктілікті жоспарлауға болады. Бала емізу кезінде аторвастатин қолдануға болмайды. Препараттың емшек сүтімен бөлініп шығатын-шықпайтыны белгісіз. Емшек еметін балаларда жағымсыз реакциялар болуы мүмкін екендігін ескеріп, осы препаратты қабылдаушы әйелдер бала емізуді тоқтатуы тиіс.

Миопатия мен рабдомиолиз қаупін арттыруы мүмкін Аторвастатин-ЛФ препаратының дәрілік өзара әрекеттесуі Аторвастатин-ЛФ препараты CYP3A4 және тасымалдаушылардың (мысалы, OATP1B1/1B3, P-gp немесе BCRP) субстраты болып табылады. Қан плазмасындағы Аторвастатин-ЛФ препаратының деңгейі CYP3A4 тежегіштері мен тасымалдаушыларды бір мезгілде қолданғанда айтарлықтай артуы мүмкін. 1-кестеде бір мезгілде қолданғанда Аторвастатин-ЛФ препаратының әсерін және миопатия мен рабдомиолиздің даму қаупін арттыруы мүмкін дәрілік препараттардың тізбесі, сондай-ақ олардың алдын алу немесе емдеу жөніндегі нұсқаулықтар қамтылады. 1-кесте: Миопатия мен рабдомиолиз қаупін арттыруы мүмкін Аторвастатин-ЛФ препаратының дәрілік өзара әрекеттесуі Циклоспорин немесе гемфиброзил Клиникалық әсері: — Қан плазмасындағы аторвастатин концентрациясы Аторвастатин-ЛФ препараты мен циклоспоринді, CYP3A4 және OATP1B1 тежегішін бір мезгілде қолданғанда айтарлықтай жоғарылаған. Гемфиброзил монотерапия түрінде қолданғанда миопатияны тудыруы мүмкін. Циклоспоринді немесе гемфиброзилді Аторвастатин-ЛФ препаратымен бір мезгілде қолданғанда миопатия және рабдомиолиз қаупі артады. Интервенция: — Циклоспоринді немесе гемфиброзилді Аторвастатин-ЛФ препаратымен бір мезгілде қабылдау ұсынылмайды. Вирусқа қарсы препараттар Клиникалық әсері: — Аторвастатиннің қан плазмасындағы концентрациясы Аторвастатин-ЛФ препаратын CYP3A4 тежегіштері және/немесе тасымалдаушылар болып табылатын көптеген вирусқа қарсы препараттармен (мысалы, BCRP, OATP1B1/1B3, P-gp, MRP2 және/немесе OAT2) бір мезгілде қолданғанда айтарлықтай жоғарлады. Ледипасвир плюс софосбувирді Аторвастатин-ЛФ препаратымен бір мезгілде қолданғанда миопатия және рабдомиолиз жағдайлары туралы хабарланды. Интервенция: — • Аторвастатин-ЛФ препаратымен типранавир плюс ритонавир немесе глекапревир плюс пибрентасвирді бір мезгілде қабылдау ұсынылмайды. • Лопинавир плюс ритонавир немесе симепревир қабылдаған пациенттерде аторвастатинмен бір мезгілде қолданғанда қауіп/пайда арақатынасын ескеру қажет. • Саквинавир плюс ритонавир, дарунавир плюс ритонавир, фосампренавир, фосампренавир плюс ритонавир, элбасвир плюс гразопревир немесе летермовир қабылдайтын пациенттерде Аторвастатин-ЛФ препаратының дозасы 20 мг аспауға тиіс. • Нелфинавир қабылдайтын пациенттерде Аторвастатин-ЛФ препаратының дозасы 40 мг аспауы тиіс. • Ледипасвир мен софосбувирді Аторвастатин-ЛФ препаратымен бір мезгілде қолданғанда қауіп/пайда арақатынасын қарастыру керек. • Барлық пациенттерді миопатияның белгілері мен симптомдарына, әсіресе терапияның басында және кез келген препараттың дозасын титрлеу кезінде бақылау керек. Мысалдар: — Типранавир плюс ритонавир, глекапревир плюс пибрентасвир, лопинавир плюс ритонавир, симепревир, саквинавир плюс ритонавир, дарунавир плюс ритонавир, фосампренавир, фосампренавир плюс ритонавир, элбасвир плюс гразопревир, летермовир, нелфинавир және ледипасвир плюс софосбувир. Селективті азолды зеңге қарсы немесе макролидті антибиотиктер Клиникалық әсері: — Аторвастатиннің қан плазмасындағы концентрациясы CYP3A4 және/немесе тасымалдаушылардың тежелуіне байланысты кейбір азолды зеңге қарсы немесе макролидті антибиотиктермен Аторвастатин-ЛФ препаратын бір мезгілде қолданғанда айтарлықтай жоғарылаған. Интервенция: — Кларитромицин ннемесе итраконазол қабылдайтын пациенттерде Аторвастатин-ЛФ препаратының дозасын 20 мг асырмау керек. Аторвастатин-ЛФ препаратымен басқа азолды зеңге қарсы препараттарды немесе макролидті антибиотиктерді бір мезгілде қолданудың қауіп-пайда арақатынасын қарастыру қажет. Барлық пациенттерді миопатияның белгілері мен симптомдарына, әсіресе терапияның басында және кез келген препараттың дозасын титрлеу кезінде бақылау керек. Мысалдар: — Эритромицин, кларитромицин, итраконазол, кетоконазол, позаконазол және вориконазол. Ниацин Клиникалық әсері: — Миопатия және рабдомиолиз жағдайлары Аторвастатин-ЛФ препаратымен ниациннің липид модификациялайтын дозаларын (> тәулігіне 1 грамм ниацин) бір мезгілде қолданғанда байқалды. Интервенция: — Ниацинді липидтердің деңгейін модификациялайтын дозаларда қолданудың пайдасы Аторвастатин-ЛФ препаратымен бір мезгілде миопатия мен рабдомиолиздің жоғары қаупінен асып түсетін-түспейтінін ескеру қажет. Егер бір мезгілде қолдану туралы шешім қабылданса, пациенттерді миопатияның белгілері мен симптомдарының пайда болуына, әсіресе терапияны бастау кезінде және кез келген препараттың дозасын титрлеу кезінде бақылау керек. Фибраттар (гемфиброзилден басқа) Клиникалық әсері: — Фибраттар монотерапия түрінде қолданылса, миопатияны тудыруы мүмкін. Фибраттарды Аторвастатин-ЛФ препаратымен бір мезгілде қолданғанда миопатия және рабдомиолиз қаупі артады. Интервенция: — Фибраттарды Аторвастатин-ЛФ препаратымен бір мезгілде қабылдаудың пайдасы миопатия мен рабдомиолиздің даму қаупінен асып түсетін-түспейтінін ескеру қажет. Егер бір мезгілде қолдану туралы шешім қабылданса, пациенттерді миопатияның белгілері мен симптомдарының пайда болуына, әсіресе терапияны бастау кезінде және кез келген препараттың дозасын титрлеу кезінде бақылау керек. Колхицин Клиникалық әсері: — Колхицинді Аторвастатин-ЛФ препаратымен бір мезгілде қолданғанда миопатия және рабдомиолиз жағдайлары туралы хабарланды. Интервенция: — Колхицинді Аторвастатин-ЛФ препаратымен бір мезгілде қолданғанда қауіп/пайда арақатынасын қарастыру керек. Егер бір мезгілде қолдану туралы шешім қабылданса, пациенттерді миопатияның белгілері мен симптомдарының пайда болуына, әсіресе терапияны бастау кезінде және кез келген препараттың дозасын титрлеу кезінде бақылау керек. Даптомицин Клиникалық әсері: — Даптомицинді ГМГ-КоА-редуктаза тежегіштерімен (мысалы, аторвастатинмен) бір мезгілде қолданғанда миопатия және/немесе рабдомиолиз жағдайлары туралы хабарланды. Егер бір мезгілде қолданудан аулақ болу мүмкін болмаса, тиісті клиникалық бақылау ұсынылады («Қолданған кездегі қажетті сақтандыру шаралары» бөлімін қараңыз). Грейпфрут шырыны Клиникалық әсері: — Грейпфрут шырынын тұтыну, әсіресе шамадан тыс тұтыну, күніне 1,2 литрден астам, қан плазмасындағы аторвастатин концентрациясын және миопатия мен рабдомиолиздің даму қаупін арттыруы мүмкін. Интервенция: — Аторвастатин-ЛФ препаратын қолданған кезде күніне 1,2 литрден астам грейпфрут шырынын шамадан тыс тұтынудан аулақ болу керек. Аторвастатин-ЛФ препаратының әсерін төмендететін дәрілік өзара әрекеттесулер 2-кестеде Аторвастатин-ЛФ препаратының әсерін төмендетуі мүмкін дәрілік өзара әрекеттесулер және олардың алдын алу немесе бақылау жөніндегі нұсқаулар берілген. 2-кесте: Аторвастатин-ЛФ препаратының әсерін төмендетуі мүмкін дәрілік өзара әрекеттесулер Рифампицин Клиникалық әсері: — Аторвастатин-ЛФ препаратын рифампицинмен, P450 3A4 цитохром индукторымен және OATP1B1 тежегішімен бір мезгілде қолдану қан плазмасындағы аторвастатин концентрациясының өзгермелі төмендеуіне әкелуі мүмкін. Рифампициннің өзара әрекеттесуінің қосарлы механизміне байланысты рифампицинді енгізгеннен кейін Аторвастатин-ЛФ препаратын кешіктіріп енгізу қан плазмасындағы аторвастатин концентрациясының айтарлықтай төмендеуімен байланысты болды. Интервенция: — Аторвастатин-ЛФ және рифампицин препаратын бір мезгілде енгізу керек. Аторвастатин-ЛФ препаратының басқа дәрілік препараттарға әсері 3-кестеде Аторвастатин-ЛФ препаратының басқа дәрілік препараттарға әсері және олардың алдын алу немесе бақылау жөніндегі нұсқаулықтар көрсетілген. 3-кесте: Аторвастатин-ЛФ препаратының басқа дәрілік препараттарға әсері Оральді контрацептивтер Клиникалық әсері: — Аторвастатин-ЛФ препаратын және оральді контрацептивтерді бірлесіп қолдану норетиндрон мен этинилэстрадиолдың плазмалық концентрациясын арттырды. Интервенция: — Мұны Аторвастатин-ЛФ препаратын қабылдайтын пациенттерге пероральді контрацептивті таңдау кезінде ескеру қажет. Дигоксин Клиникалық әсері: — Аторвастатин-ЛФ және дигоксин препаратының бірнеше дозасын бір мезгілде қолданғанда қан плазмасындағы дигоксиннің тұрақты концентрациясы жоғарылайды. Интервенция: — Дигоксин қабылдаған пациенттердің жағдайын бақылау керек.

Сақтау мерзімі 2 жыл. Жарамдылық мерзімі өткеннен кейін қолдануға болмайды! Сақтау шарттары Құрғақ, жарықтан қорғалған жерде 25°C-ден аспайтын температурада сақтау керек. Балалардың қолы жетпейтін жерде сақтау керек!