БЦЖ-медак лиофилизат

Бір құты препарат ішінде белсенді зат – БЦЖ бактериялары (Mycobacterium bovis, 1173-P2 штаммынан алынған RIVM штаммы), 2 x 108-нен 3 x 109-не дейін тіршілікке қабілетті бірліктері бар. қосымша заттар - полигелин, глюкоза, полисорбат 80. Еріткіштің бір контейнерінде натрий хлориді, инъекцияға арналған су бар. Сыртқы түрінің, иісінің, дәмінің сипаттамасы Ақ немесе ақ дерлік ұнтақ немесе сарғыш және/немесе сұр реңкі бар кеуекті тығыздалған масса. Еріткіште қалпына келтірілген препарат ақ түсті суспензия болып табылады. Еріткіш: мөлдір түссіз сұйықтық.

Қуықтың бұлшықеттік емес инвазиялық обырын емдеу: • in situ карциноманы емдеу • қуықтың бұлшықеттік емес инвазиялық обыры қайталануының профилактикасында: • қуықтың шырышты қабығы шегіндегі уротелиальді карцинома: • мультифокальді және/немесе қайталанатын ісік үшін Ta G1-G2 • Та G3 • шырышасты қабықтағы, бірақ бұлшықет қабатына таралмаған уротелиальді карцинома (T1) • in situ (CIS) карциномасы

БЦЖ-медак Mycobacterium bovis бактериялары, RIVM штамынан алынған инфекциялық әлеуеті төмен Кальметт және Герен тірі бациллалары суспензиясының лиофилизаты болып табылады. Әсер ету механизмі және фармакодинамикалық әсерлер БЦЖ иммундық жүйені стимуляциялайды және ісікке қарсы белсенділігі бар. Зерттеу деректері БЦЖ иммундық жүйенің жасушаларын қамтитын бірнеше әсер ету механизмдері бар бейспецификалы иммуностимулятор ретінде әсер ететінін көрсетеді. БЦЖ көкбауырға стимуляциялайтын әсер етеді, көкбауыр макрофагтарының белсенділігін арттырып, табиғи жендет жасушаларды белсендіреді. БЦЖ-ны қуық ішіне енгізу гранулоциттер, моноциттер/макрофагтар және Т-лимфоциттер санының көбеюіне ықпал етеді, бұл иммундық жүйенің жергілікті белсенуінің индикаторы болып табылады. Сондай-ақ, ИЛ1 (интерлейкин 1), ИЛ2, ИЛ6 және ІНФα (альфа ісік некрозының факторы) цитокиндерінің саны артады.

Дозалау режимі Ересектер және егде жастағы пациенттер Суспензияны дайындау жөніндегі нұсқаулыққа сәйкес еріткіште қалпына келтірілген бір құтының ішіндегісі бір қуықішілік енгізу үшін қажет. Индукциялық ем Трансуретралық резекциядан (ТУР) немесе қуық биопсиясынан кейін 2-3 аптадан соң жарақаттық катетеризация белгілері болмаған жағдайда қуықішілік БЦЖ емін бастау қажет және 6 апта бойы бір апталық аралықпен жүргізу керек. Егер аралық және қайталану қаупі жоғары ісіктер болса, БЦЖ емін демеуші режимде жалғастыру қажет. Демеуші ем сызбасы төменде берілген. Демеуші ем Индукциялық ем жүргізілгеннен кейін клиникалық зерттеулердің нәтижелері негізінде міндетті түрде демеуші ем жүргізу ұсынылады. Демеуші емнің ұсынылатын сызбасы 3 апта сайынғы қуықішілік енгізуден кем дегенде 1 жыл ішінде және ең көбі 3 жылға дейін 3-, 6-, 12-, 18-, 24-, 30- және 36-айларда жүргізіледі. Барлығы осы сызба бойынша үш жыл ішінде препараттың 27 қуықішілік енгізілуі жүргізіледі. Демеуші ем қайталану жиілігін төмендетіп, үдеуді азайтуы мүмкін болса да, емдеуге байланысты жағымсыз реакциялар мен жайсыздық кейбір пациенттер үшін пайдасынан басым болуы мүмкін. Сондықтан демеуші ем басталғанға немесе жалғастырылғанға дейін «пайда-қауіп» арақатынасына бағалау жүргізілуі тиіс, пациенттердің қалауы ескерілуі қажет. Емдеудің бірінші жылынан кейін әр 6 ай сайын демеуші емді жалғастыруға деген қажеттілік ісіктің сипаты мен емге клиникалық жауап негізінде бағалануы керек. Пациенттердің ерекше топтары Балалар Балалардағы қуықішілік БЦЖ емінің қауіпсіздігі мен тиімділігі анықталмаған. Деректер жоқ. Қолдану тәсілі Пациенттер БЦЖ-медакты қуық ішіне енгізерден кем дегенде 4 сағат бұрын және енгізгеннен кейін 2 сағатқа дейін сұйықтық ішпеуі керек. Уретралық катетер қуыққа асептикалық жағдайларда енгізілуі керек. Уретраның шырышты қабығының жарақаттануын және онымен байланысты күрделі асқынулар қаупін азайту үшін, сондай-ақ емшарамен байланысты жайсыздықты азайту үшін лубриканттың жеткілікті мөлшерін пайдалану керек. Қуықішілік енгізу жүргізілгенге дейін қуықты босату керек. Катетеризациядан кейін қуықтың толық босауы катетерді енгізген кезде қуыққа түсуі мүмкін қалдық лубриканттың мөлшерін азайтады. БЦЖ-медак қуыққа катетердің көмегімен төмен қысымда енгізіледі. Мүмкіндігінше БЦЖ-медак суспензиясы қуықта 2 сағат бойы қалуы керек. Осы уақыт ішінде БЦЖ-медак суспензиясы қуықтың шырышты қабығының бүкіл бетіне таралуы керек. Ол үшін пациенттерге мүмкіндігінше дене қалпын жиі өзгерту ұсынылады. Жатқан пациенттерді шалқасынан екпетіне және керісінше әр 15 минут сайын ауыстырып тұру керек. 2 сағаттан кейін пациенттерге енгізілген БЦЖ-медак суспензиясынан қуықты отырған қалпында босату қажет. БЦЖ-медак суспензиясын әрбір енгізгеннен кейін қарсы көрсетілімдер болмаған жағдайда келесі 48 сағат ішінде гипергидратация ұсынылады. БЦЖ-медак емін алатын пациенттерге танысу үшін қосымша парақты беру қажет. Суспензияны дайындау және препаратты қуық ішіне енгізу үшін дайындау жөніндегі нұсқаулық БЦЖ-медак препаратын тері астына, тері ішіне, бұлшықет ішіне, вена ішіне немесе туберкулезге қарсы вакцинация үшін енгізуге болмайды. Еріткіші бар контейнерді кейіннен қуық ішіне енгізу мақсатында БЦЖ-медак препаратын сұйылту үшін ғана пайдалануға болады! БЦЖ-медак препаратымен жұмыс істеу кезіндегі негізгі қағидаттар мен сақтық шаралары БЦЖ-медак препараты құтысының ішіндегісімен тікелей байланыста болудан аулақ болу керек. БЦЖ-медак - бұл инфекцияны тудыруы мүмкін және медициналық қызметкерлерге қауіп төндіретін тірі бактериялары бар дәрілік препарат. Егер дәрілік препарат органимзге зақымданған тері арқылы, аэрозольді ішке тартқан кезде, көзге немесе шырышты қабаттарға тамшы түрінде немесе жұту арқылы түссе, инфекциялануы мүмкін. Препаратты дайындайтын және оны қуық ішіне енгізетін жерде тамақ жеуге, ішуге және шылым шегуге, сондай-ақ ол жерде азық-түліктерді, сусындарды немесе темекі өнімдерін сақтауға болмайды. Вена ішіне енгізуге арналған цитоуытты дәрілік препараттар дайындалатын бөлмеде қуық ішіне енгізуге арналған БЦЖ-медак препаратын дайындауға, сондай-ақ вена ішіне енгізуге арналған цитоуытты препараттарды дайындайтын медициналық қызметкерлер БЦЖ-медак препаратымен жұмыс істемеуі керек. Иммундық тапшылық көріністері бар медициналық қызметкерлер БЦЖ-медак дәрілік препаратын ұстамауы керек. Бұл препаратпен жұмыс істеу кезінде жеке қорғаныс құралы ретінде жабық, шашыраудан қорғайтын халат, бір рет қолданылатын қолғап, FFP2 респираторлық маскасын және бүйірлік қалқандары бар қорғаныс көзілдірігін кию ұсынылады. БЦЖ-медак препаратын тек жабық контейнерлерде тасымалдау керек. Жұмыс аяқталғаннан кейін жұмыс беткейлерін тиісті дезинфекциялайтын ерітіндімен өңдеу керек. Жұмыстан кейін және теріге тиген жағдайда қолыңызды қолға арналған зарарсыздандырғыш құралмен зарарсыздандырыңыз, құрғатыңыз, жуыңыз және тері күтіміне арналған құралдарды қолданыңыз. Қуық ішіне енгізу үшін дәрілік препараттың суспензиясын дайындау Асептикалық жағдайларда енгізер алдында препаратты 9 мг/мл (0.9%) натрий хлоридінің стерильді ерітіндісі болып табылатын еріткіште қалпына келтіру қажет (төменде берілген суреттерде көрсетілгендей). Жүйелі БЦЖ-инфекциясының дамуына әкелуі мүмкін эпителийдің жарақаттануын болдырмау үшін катетерді абайлап енгізу керек. Жарақат алу қаупін азайту және катетерді енгізу емшарасын ыңғайлы ету үшін лубрикантты қолдану мүмкіндігін қарастырған жөн. Әйелдерге еркектерге қарағанда лубриканттың азырақ мөлшері қажет болуы мүмкін. Катетеризациядан кейін қуықтан қалдық несепті шығару БЦЖ-медак препаратын енгізер алдында қуықта қалған лубриканттың мөлшерін азайтады. Дайындалған суспензияны мұқият айналдыру қозғалыстарымен жақсылап араластыру керек. Көрінетін макроскопиялық бөлшектер препараттың тиімділігі мен қауіпсіздігіне әсер етпейді. БЦЖ-медак препаратын төгіп алған кездегі сақтық шаралары Жеке қорғаныс құралдарын қолдану керек және шаң болмауы керек. БЦЖ-медак препаратының төгілген суспензиясын қағаз сүлгімен жауып және оны микобактерияларға қатысты тиімділігі дәлелденген дезинфекциялайтын құралмен сулаңыз. Төгілген БЦЖ-медак суспензиясын дезинфекциялайтын ерітінді сіңірілген қағаз сүлгімен сүрткеннен кейін, сол жерді қайтадан сол дезинфекциялайтын ерітіндісімен сүртіңіз және оны құрғатыңыз. Дәрілік зат түскен жерлердегі теріні де тиісті дезинфекциялайтын құралмен өңдеу керек. Алғашқы көмек • БЦЖ-медак препаратымен байланыста болған жағдайда міндетті түрде дәрігерге жүгіну керек. • Препарат теріге түскен жағдайда: ластанған киімді шешу, теріні дезинфекциялау және тазарту, сондай-ақ препараттың бар жарақаттарға түспегенін тексеру қажет. • Көзге түскен жағдайда: көзді жууға арналған ерітіндінің жеткілікті мөлшерімен немесе балама ретінде сумен көзді шаю керек, сондай-ақ жанаспалы линзалар болса, шешу керек. • Препаратты жұтып қойған жағдайда: ауызды көп мөлшердегі сумен шаю керек. • Препаратты ішке тартқан жағдайда: бөлмеге таза ауаның жеткілікті кіруін қамтамасыз ету қажет. БЦЖ-медак препаратымен жұмыс істеу жөніндегі нұсқаулық Инстилляцияға арналған жинақтың негізгі құрамдас бөліктері A – дәрілік препарат бар құты; B – қорғаныс қаптамасы; C – 0.9% (9 мг/мл) натрий хлориді ерітіндісі бар контейнер (еріткіш). Контейнерге келесі бөлшектер бекітілген: C1 – құтыға жалғауға арналған коннектор (қорғаныс қақпағы және құлыптау механизмі бар); C2 – Луер-Лок катетеріне жалғауға арналған коннектор (қорғаныс қақпағы және құлыптау механизмі бар); C3 – қысқыш; C4 – толтыруға арналған порт (пайдаланылмайды) D – лубриканты бар Луер-Лок катетері (D1); E – утилизацияға арналған пакет. Құтыны еріткішке жалғау Бактериялық ластануды болдырмау үшін, қуық ішіне енгізгеннен кейін барлық шығын материалдарын утилизациялауға арналған пакетті (E) дайындау. — Құтыдан (А) алюминий қалпақшаны алыңыз және резеңке тығынның беткейін дезинфекциялаңыз. Еріткіш бар контейнердің (С) қорғаныш қаптамасын (В) жыртып, оны толығымен алып тастаңыз. — Құтыға (С1) жалғау үшін коннектордан қорғаныс қалпақшасын алыңыз. Контейнер коннекторын (C1) құтыға кигізіңіз және тірелгенше басыңыз. — Жалғағышты орнату үшін қайта-қайта ию арқылы коннектордағы құлыптау механизмін (C1) сындырыңыз. Ұнтақ пен еріткішті араластыру Еріткіш бар контейнерді құты оның астында болатындай етіп ұстаңыз. Еріткіштің жеткілікті мөлшерін құтыға ауыстыру үшін еріткіш бар пакетті бірнеше рет қысыңыз. Суспензияның еріткіш бар контейнерге кейінгі тасымалдануын қамтамасыз ету үшін құтының толық толтырылмағанына көз жеткізіңіз. Еріткіштің кейбір мөлшері контейнердің ішінде қалуы мүмкін. Дәрілік затты еріткішпен араластырған кезде қатты көбіктенуді мейлінше азайту үшін құтыны баяу айналдырыңыз. Егер көбік көп болса, құтыны біраз уақытқа қалдырыңыз (бірнеше минут). Құтының ішіндегісі біртекті суспензия түзуі керек. Бұл бірнеше минутқа созылуы мүмкін. Еріткіш бар контейнерді төңкеріп, құты оның үстінде болатындай етіп ұстаңыз. Бір қолыңызбен құтыны ұстау қажет. Екінші қолыңызбен құты босағанша еріткіш бар пакетті бірнеше рет қысыңыз. Егер құтының ішінде ұнтақ қалса, 7 және 8-қадамдарды қайталаңыз. Сонымен қатар, «Сақтау мерзімі» бөліміндегі ақпаратпен танысу керек. Пациенттің несеп шығаруға қысылуын туындатпау үшін қуыққа салқындатылған суспензияны (тоңазытқыштан шығарғаннан кейін бірден) енгізуге болмайды, бұл препараттың қуықта болу уақытының қысқаруына және емдік әсерінің төмендеуіне әкелуі мүмкін. Катетерлеу • Қоса берілген Луер-Лок (D) катетерін немесе кез келген басқа қолайлы катетерді ашу және лубрикантты пайдаланып (D1) уретраға енгізу керек. Енгізілген катетер арқылы қуықты босату керек. Катетерді ішінде препарат суспензиясы бар контейнерге жалғау Катетерге жалғамас бұрын, тұнба түзілген жағдайда препараттың суспензиясын біркелкі тарату үшін контейнердің ішіндегісін айналмалы қозғалыстар арқылы шайқау керек. Қуықтың ішіне салқындатылған суспензияны енгізуге болмайды. Катетерге (С2) жалғау үшін коннектордан қорғаныс қалпақшасын алу керек. Пациенттің уретрасына енгізілген Луер-Лок катетерін (D) тиісті коннектор (C2) арқылы контейнерге жалғау керек. Қуық ішіне енгізу Жалғағышты орнату үшін алға және артқа қайта-қайта ию арқылы коннектордағы құлыптау механизмін (C2) сындырыңыз. Бұл жағдайда пациенттің катетерін қозғалмайтындай етіп ұстау керек. — Бір қолыңызбен контейнерге жалғанған құтыны контейнердің үстінде төңкеріліп тұратындай етіп ұстаңыз. Екінші қолыңызбен препараттың суспензиясы бар контейнерді суспензияның пациенттің қуығына баяу ағып кетуі үшін абайлап қысыңыз. Препарат бар контейнер мен құты босамағанша, қысуды жалғастырыңыз. Катетерді барынша босату үшін препарат бар контейнерден қалған ауаны шығарыңыз. Қуық ішіне енгізгеннен кейін Қысқышты (C3) жабу сұйықтықтың катетерге кері ағуына жол бермейді және ластану қаупін мейлінше азайтады. Балама ретінде, 13 және 14-қадамдарды орындау арқылы препарат бар контейнерді қысып ұстауға болады. — Катетерді қуықтан контейнер мен құтыны ажыратпай абайлап суырып алыңыз. Ластану қаупін азайту үшін препараттың қалған суспензиясының тамшыларын шашыратпау керек. Қалған шығын материалдарын утилизациялауға арналған пакетті пайдаланып, бекітілген ережелерге сәйкес утилизациялау керек. Құтының ішіндегісі тек бір рет қолдануға арналған. Препарат суспензиясының кез келген қалдығын утилизациялау керек. Дәрілік препаратты қолдану тәсілін түсіндіру үшін медициналық қызметкерінен кеңес алуға ұсынымдар БЦЖ-медак препаратын қуыққа қуықішілік емді жүргізу тәжірибесі бар медициналық қызметкерлер енгізуі керек. БЦЖ-медак препаратты еріткіште қалпына келтіргеннен кейін қуық ішіне енгізуге арналған.

• әсер етуші затқа немесе қосымша заттардың кез келгеніне аса жоғары сезімталдық; • қатарлас аурулар (мысалы, адамның иммун тапшылығы вирусы, лейкоз, лимфома), онкологиялық аурулар емі (цитостатикалық дәрілер, сәулелік ем) немесе иммуносупрессиялық ем (кортикостероидтар) себебінен жүре пайда болған немесе туа біткен иммунитет тапшылығы немесе әлсіреген иммундық жүйе; • белсенді туберкулез. Белсенді туберкулездің жоқтығына тиісті анамнез негізінде және қажет болған жағдайда диагностикалық зерттеулер арқылы көз жеткізу керек; • қуыққа жүргізілген алдыңғы сәулелік ем; • трансуретралық резекциядан (ТУР) немесе қуық биопсиясынан немесе жарақаттық катетерлеуден кейін 2-3 апталық уақыт кезеңі; • несеп шығару жолдарының жедел инфекциялары («Қолдану кезіндегі қажетті сақтық шаралары» бөлімін қараңыз). Симптомсыз оқшауланған лейкоцитурия және симптомсыз бактериурия БЦЖ-медак препаратымен қуықішілік емге қарсы көрсетілімдер болып табылмайды және антибиотикпен профилактика жүргізудің қажеті жоқ; • ауыр жүйелі инфекциялар қаупінің жоғарылауына әкелуі мүмкін қуықтың тесілуі; • лактация кезеңі.

Жағымсыз реакциялар кездесу жиілігі бойынша топтастырылған және ауырлық дәрежесінің кему ретімен келтірілген. Жағымсыз реакциялардың жиілігін анықтау келесі критерийлерге сәйкес жүргізіледі: өте жиі (≥ 1/10), жиі (≥1/100-ден < 1/10-ға дейін), жиі емес (≥1/1000-ден < 1/100-ге дейін), сирек (≥1/10000-нан < 1/1000-ға дейін), өте сирек (< 1/10000), белгісіз (қолда бар деректер негізінде бағалау мүмкін емес). Өте жиі • цистит және қуықтың қабыну реакциялары (гранулемалар), симптомсыз гранулематозды простатит • өтпелі жүйелі БЦЖ-реакциялары (қызба <38.5°C, тұмауға ұқсас симптомдар, оның ішінде дімкәстік, қызба, қалтырау, жалпы жайсыздық, миалгия) • жүрек айнуы • кіші дәретке шыққан кездегі жайсыздық және ауырсындырып жиі шығу • шаршау Жиі • диарея, іштің ауруы • миалгия • несепті ұстай алмау • қызба >38.5°C Жиі емес • несеп шығару жолдарының инфекциялары, орхит, эпидидимит, симптоматикалық гранулематозды простатит, ауыр жүйелі БЦЖ-реакциясы/инфекциясы, БЦЖ-сепсис, милиарлы пневмонит, тері абсцесі, Рейтер синдромы (конъюнктивит, асимметриялық олигоартрит және цистит) • цитопения, анемия • гипотензия • өкпе гранулемасы • гепатит • тері бөртпесі • артрит, буындардың ауыруы • макроскопиялық гематурия, несеп шығудың кідіруі, несеп шығару жолдарының бітелуі, қуықтың контрактурасы • бауыр ферменттері деңгейінің жоғарылауы Сирек • тамыр инфекциялары (мысалы, инфекцияланған аневризма), бүйрек абсцесі Өте сирек • имплантаттардың және оның айналасындағы тіндердің БЦЖ-инфекциялануы (мысалы, қолқа трансплантатының, жүрек дефибрилляторының, жамбас немесе тізе эндопротездерінің инфекциясы), лимфа түйіндердің аймақтық инфекциясы, остеомиелит, перитонит, бел абсцесі, жыныс мүшесі басының инфекциясы, туберкулезге қарсы емге төзімді орхит немесе эпидидимит • мойын лимфадениті • жоғары сезімталдық реакциясы (мысалы, қабақтың ісінуі, жөтел) • хориоретинит, конъюнктивит, увеит • тамыр жыланкөзі • құсу, ішек жыланкөзі • шеткері ісіну Белгісіз • гемофагоциттік синдром • васкулит (оның ішінде орталық жүйке жүйесінің васкулиті) • бүйрек функциясының жеткіліксіздігі, пиелонефрит, нефриттер (оның ішінде тубулоинтерстициальді нефрит, интерстициальді нефрит және гломерулонефрит) • гениталийлік бұзылыстар (мысалы, қынаптың ауыруы, диспареуния), олигоспермия, азооспермия • простат-спецификалы антиген (ПСA) деңгейінің жоғарылауы БЦЖ-медак препаратымен емдеу кезіндегі жағымсыз реакциялар жиі кездеседі, бірақ жалпы ауыр сипатта болмайды. Жағымсыз реакциялардың жиілігі, әдетте, БЦЖ-медак препаратын қуық ішіне енгізу саны артқан сайын жоғарылайды. Әдеттегі жағдайларда миалгия пайда болуы мүмкін және артрит, артралгия және тері бөртпелері сирек дамуы мүмкін. Көптеген жағдайларда артрит, артралгия және тері бөртпелерін БЦЖ-ға аса жоғары сезімталдық реакцияларына жатқызу керек. Кейбір жағдайларда қуықішілік БЦЖ-емін тоқтата тұру қажет болады. Жергілікті жағымсыз реакциялар Несеп шығару кезінде жайсыздық пен ауырсыну және кіші дәретке жиі шығу пациенттердің шамамен 90%-ында пайда болады. Цистит және қабыну реакциясы (гранулемалар) БЦЖ-иммунотерапиясының ісікке қарсы белсенділігінің маңызды бөлігі болуы мүмкін. Сирек кездесетін басқа жергілікті реакциялар: макроскопиялық гематурия, несеп шығару жолының инфекциялары, несеп шығудың кідіруі, несеп шығару жолдарының обструкциясы, қуықтың контрактурасы, симптоматикалық гранулематозды простатит, орхит және эпидидимит. Бүйрек абсцесі сирек кездеседі. Гениталийлік бұзылыстардың жиілігі (мысалы, қынаптың ауыруы, диспареуния) белгісіз. Өтпелі жүйелі БЦЖ-реакциялар Субфебрильді температура, тұмауға ұқсас симптомдар мен жалпы жайсыздық байқалуы мүмкін. Бұл симптоматика әдетте 24-48 сағат ішінде азаяды және әдеттегі симптоматикалық еммен басылуы мүмкін. Бұл реакциялар иммундық реакцияның басталуының белгісі. БЦЖ-медак препаратымен ем алатын барлық пациенттер мұқият бақылауда болуы тиіс, оларға температураның көтерілуінің барлық жағдайлары мен несеп шығару жолынан тыс басқа да симптомдар туралы хабарлау ұсынылады. Ауыр жүйелі жағымсыз реакциялар/инфекциялар БЦЖ-инфекциясын БЦЖ-иммундық реакциясынан ажырату қиын, өйткені басында симптомдары өте ұқсас болып келеді. Бұған қарағанда, БЦЖ-ға өтпелі жүйелі реакция нақтылауды қажет ететін өте кең таралған жағымсыз реакция болып табылады. Басында БЦЖ-инфекциясының/реакциясының клиникалық белгілері мен симптомдары: кем дегенде 12 сағат бойы қызба >39.5°С, 48 сағат бойы қызба > 38.5°С және жалпы жағдайдың нашарлауы. Инфекцияның әдеттегі белгілері милиарлы пневмонияның, гранулематозды гепатиттің дамуы, бауырдың функционалдық тестілерінің өзгеруі (әсіресе сілтілі фосфатаза деңгейінің жоғарылауы), биопсия кезінде уақыт өте келе гранулематозды қабынуымен байқалатын ағзалық дисфункция (урогениталийлік жолдан тыс) болып табылады. Жүйелі инфекцияға күдік туындаған жағдайда дәрігер-инфекционистпен кеңесу керек. БЦЖ-инфекциясы өлімге әкелуі мүмкін. Жүйелі БЦЖ-инфекциясының симптомдары туберкулез көрінісінен ерекшеленбесе де, пациенттерді оқшаулаудың қажеті жоқ, өйткені M. tuberculosis қарағанда M. bovis адам үшін патогенділігі аз. Жасырын инфекция өршіген жағдайда пациенттерде әдетте қызба симптомдары және шығу тегі белгісіз салмақ жоғалту туындайды. Клиникалық жағдайлар туралы бірнеше есептер диагностиканың күрделі екенін көрсетеді, өйткені симптомдары ерекшеленеді, ал дәрігерлер БЦЖ қуық ішіне енгізумен себеп-салдарлық байланыс бар деп ойламайды. Дұрыс және ерте диагностикалау және соның салдарынан тиісті емдеу аурудың нәтижесі үшін, әсіресе егде жастағы немесе әлсіреген пациенттерде өлімге әкеліп соқтырмас үшін үлкен маңызға ие. Жасырын БЦЖ-инфекциясының өршуіне күдік туындаған жағдайда дәрігер-инфекционистпен кеңесу керек. Сепсис, гранулематозды реакциялар (өкпе немесе бауыр) және конъюнктивит, артрит немесе Рейтер синдромы сияқты иммунитетке байланысты реакциялар жағдайында кортикостероидтарды қосымша тағайындау қажет болуы мүмкін. Емдеу бойынша ұсынымдарды төмендегі кестеден қараңыз. Симптомдарды, белгілерді және синдромдарды емдеу Симптомдары, белгілері немесе синдромдары — Емі 1) Қуықтың 48 сағаттан аз уақытқа созылатын тітіркену симптомдары. — Симптоматикалық ем 2) Қуықтың 48 сағат немесе одан да көп уақытқа созылатын тітіркену симптомдары. — БЦЖ-медак енгізуді тоқтату және фторхинолондармен емдеуді бастау. Егер 10 күндік емдеуден кейін симптомдар толығымен жойылмаса, изониазид* препаратын 3 ай бойы тағайындау керек. Туберкулезге қарсы ем жүргізілген жағдайда БЦЖ-медак препаратымен емдеу міндетті түрде тоқтатылуы тиіс. 3) Несеп шығару жолының бактериялық инфекциялары — БЦЖ-медак енгізуді несеп талдауы қалыпқа келгенше және антибиотикпен ем аяқталғанға дейін тоқтата тұру. 4) Несеп-жыныстық жүйе тарапынан басқа жағымсыз реакциялар: симптоматикамен гранулематозды простатит, эпидидимит және орхит, уретралық обструкция және бүйрек абсцесі. — БЦЖ-медак препаратымен емдеуді тоқтату. Ауырлығына байланысты 3 айдан 6 айға дейінгі кезеңге изониазид* және рифампицин тағайындау. Туберкулезге қарсы ем жүргізілген жағдайда БЦЖ-медак препаратын енгізу міндетті түрде тоқтатылуы тиіс. 5) 38.5 °С-ден төмен, 48 сағаттан аз уақытқа созылған қызба. — Парацетамолмен симптоматикалық емдеу 6) Тері бөртпелері, артралгия немесе артрит, Рейтер синдромы. — БЦЖ-медак препаратымен емдеуді тоқтату. Дәрігер-инфекционистпен кеңесу қажет. Антигистаминдік немесе қабынуға қарсы стероидты емес препараттарды тағайындау. Иммунитетке байланысты реакция туындаған жағдайда глюкокортикоидтармен ем жүргізу мүмкіндігін қарастырған жөн. Әсері болмаған жағдайда изониазидті* 3 айға тағайындау керек. Туберкулезге қарсы ем жүргізілген жағдайда БЦЖ-медакпен емдеу міндетті түрде тоқтатылуы тиіс. 7) Сепсистік шок белгілерінсіз жүйелі БЦЖ-реакциялар / инфекциялар**. — БЦЖ-медакпен емдеуді міндетті түрде тоқтату керек. Дәрігер-инфекционистпен кеңесу қажеттілігін қарастыру. Туберкулезге қарсы үш препараттың* біріктірілімін 6 айға және кортикостероидтармен төмендозалы ем тағайындау. 8) Сепсистік шок белгілерімен жүйелі БЦЖ реакциялар/инфекциялар. — БЦЖ-медакты енгізуді міндетті түрде тоқтату керек. Тез әсер ететін кортикостероидтардың жоғары дозаларымен біріктірілімде туберкулезге қарсы үш препараттың* біріктілімін тағайындау. Дәрігер-инфекционисттің кеңесі. * Назар аударыңыз: БЦЖ бактериялары пиразинамидті қоспағанда, қазіргі уақытта қолданылатын туберкулезге қарсы барлық препараттарға сезімтал. Егер туберкулезге қарсы үш препараттың біріктірілімі қажет болса, изониазидті, рифампицинді және этамбутолды тағайындау ұсынылады. ** анықтамасын жоғарыдан қараңыз Жағымсыз дәрілік реакциялар туындағанда медициналық қызметкерге, фармацевтикалық қызметкерге немесе, дәрілік препараттардың тиімсіздігі туралы хабарламаларды қоса, дәрілік препараттарға болатын жағымсыз реакциялар (әсерлер) жөніндегі ақпараттық деректер базасына тікелей хабарласу керек Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

Артық дозалануы екіталай, өйткені БЦЖ-медактың бір құтысы препараттың бір реттік дозасына сәйкес келеді. Артық дозаланудың сипатталған жағымсыз реакциялардан бөлек кез келген басқа симптомдарға әкелуі мүмкін екенін көрсететін деректер жоқ.

БЦЖ-медакты тері астына, тері ішіне, бұлшықет ішіне немесе вена ішіне енгізу үшін немесе вакцинация үшін қолдануға болмайды! Симптомдарды, белгілерді немесе синдромды емдеу «Жағымсыз реакциялардың сипаттамасы» бөлімін қараңыз. Қолдану кезіндегі сақтық шаралары БЦЖ-медак суспензиясын дайындауды сол бөлмеде немесе вена ішіне енгізуге арналған цитоуытты препараттарды дайындайтын сол бір қызметкер жүргізбеуі тиіс. БЦЖ-медак суспензиясын дайындауды және оны енгізуді иммундық тапшылығы бар медициналық қызметкерлер жүргізбеуі тиіс. Препараттың тері жамылғыларына және шырышты қабықтарға тиіп кетуінен аулақ болу керек. Препараттың тиюі аса жоғары сезімталдық реакцияларының дамуына немесе жанасқан беткейлердің инфекциялануына әкелуі мүмкін. БЦЖ-медактың төгілуі БЦЖ-медактың төгілген ерітіндісі микобактерияларға қатысты тиімділігі дәлелденген дезинфекциялайтын құралмен өңделуі тиіс. Дәрілік зат түскен жерлердегі теріні де тиісті дезинфекциялайтын құралмен өңдеу керек. Пациенттерге арналған жалпы гигиеналық талаптар Әр кіші дәретке отырғаннан кейін қолды және жыныстық аймақты жуу ұсынылады. Бұл БЦЖ-медак енгізгеннен кейін кіші дәретке алғаш шыққанда өте маңызды. Егер препарат теріге тисе, ластанған жерді тиісті дезинфекциялайтын құралды қолдану арқылы өңдеу керек. Терінің туберкулиндік сынамалары БЦЖ-медакты қуық ішіне енгізу туберкулинге сезімталдықтың пайда болуына әкелуі мүмкін және микобактериялық инфекцияны диагностикалау үшін жүргізілетін терінің туберкулиндік сынамаларының кейінгі интерпретациясын қиындатуы мүмкін. Осыған байланысты туберкулинге реактивтілікті тексеру БЦЖ-медакпен емдеуді бастағанға дейін жүргізілуі тиіс. Кальметт-Герен бацилласын анықтау Дәрігерлер бактериялық сынаманың теріс нәтижесі және талдаулардың теріс нәтижелері жүйелі БЦЖ-инфекциясын жоққа шығармайтынын білуі керек. Тіпті пациенттерде жүйелі БЦЖ-инфекциясы болса да, кейбір жағдайларда бактериялар анықталмады. Қолжетімді әдістер (микроскопия, ПТР және/немесе туберкулез процесіне тартылуы мүмкін тіндердің сеппесі және/немесе гистологиясы) сенімсіз болып табылады. БЦЖ-мен ауыр жүйелі инфекциялану/реакция Катетерді жарақаттап енгізу пациенттердің өміріне қауіп төндіретін ықтимал сепсистік шокпен байқалатын БЦЖ-сепсистің дамуына ықпал етуі мүмкін. Емдеу нұсқалары «Жағымсыз реакциялардың сипаттамасы» бөлімінде берілген. Несеп шығару жолдары инфекцияларының жоқтығына БЦЖ-медакты қуық ішіне әрбір келесі енгізу басталғанға дейін көз жеткізу керек (қуықтың шырышты қабығының қабынуы БЦЖ-инфекциясының қантамырлар арқылы таралу қаупін арттыруы мүмкін). Егер БЦЖ-иммунотерапиясы кезінде несеп шығару жолдарының инфекциясы диагнозы қойылса, несеп талдауы қалыпқа келгенше және антибиотикпен ем аяқталғанға дейін емдеу тоқтатылуы керек. Туберкулезге қарсы емді қажет ететін ауыр жүйелі БЦЖ-инфекцияларының ықтималдығы БЦЖ емі басталғанға дейін, әсіресе егде жастағы пациенттерде («Егде жастағы пациенттер» бөлімін қараңыз) және бауыр функциясының жеткіліксіздігі бар пациенттерде қарастырылуы керек. 5%-дан аз жағдайда БЦЖ туындатқан ауыр жүйелі инфекциялар/реакциялар туралы хабарланды. Белгілері мен симптомдары туралы ақпарат «Жағымсыз реакциялардың сипаттамасы» бөлімінде берілген. Жүйелі инфекцияға күдік туындаған жағдайда дәрігер-инфекционистпен кеңесу керек. БЦЖ инфекциясы өлімге әкелуі мүмкін. Қосымша ақпарат «Жағымсыз реакциялардың сипаттамасы» бөлімінде берілген. Рейтер синдромының жүйелі инфекциялардан айырмашылығы негізінен иммундық жанамаласқан реакция болып табылады, ол міндетті түрде диссеминацияланған БЦЖ инфекциясынан туындамайды, сонымен қатар тек несеп шығару жолдарында орналасқан БЦЖ бактерияларынан туындауы мүмкін. Қызба немесе макрогематурия Емдеу қызба немесе гематурия басылғанға дейін кейінге қалдырылуы керек. Қуық сыйымдылығының азаюы Қуық контрактурасының қаупі қуық сыйымдылығы аз пациенттерде жоғарылауы мүмкін. HLA-B27 Оң HLA-B27 бар пациенттерде реактивті артрит немесе Рейтер синдромы жағдайларының жоғарылауы байқалуы мүмкін. Жасырын БЦЖ-инфекциясының өршуі (диагностиканы уақтылы жасамауды қоса) БЦЖ бактериялары организмде бірнеше жыл бойы сақталған бірлі-жарым жағдайлар белгілі. Бұл жасырын БЦЖ-инфекциясы бастапқы инфекцияланудан кейін бірнеше жыл өткен соң, әсіресе гранулематозды пневмониттің, абсцесстердің, инфекцияланған аневризмалардың, имплантаттың, трансплантаттың немесе оның айналасындағы тіндердің инфекциялануының даму нәтижесінде өршуі мүмкін. Пациенттер жасырын БЦЖ-инфекциясының кешеуілдеген өршу ықтималдылығы туралы хабардар болуы керек және қызба және шығу тегі белгісіз салмақ жоғалту сияқты симптомдар пайда болған кезде жасалатын әрекеттер туралы хабардар болуы керек. Егер жасырын БЦЖ-инфекциясының өршуіне күдік болса, дәрігер-инфекционистке қаралу керек. Иммунитеті әлсіреген адамдармен байланыста болған пациенттер БЦЖ-медак препаратымен ем алатын пациенттер иммунитеті әлсіреген пациенттермен байланыста болса немесе байланыста болуы мүмкін болса талапқа сай гигиеналық шараларды сақтауы тиіс. M. tuberculosis қарағанда M. bovis патогенділігі азырақ. БЦЖ-ның бір адамнан екінші адамға берілу жағдайларының болмауына қарамастан, оны, әсіресе иммунитеті әлсіреген пациенттерде жоққа шығаруға болмайды. Жыныстық жолмен берілу БЦЖ-инфекциясының жыныстық жолмен берілу жағдайлары жоқ, дегенмен БЦЖ-медакты қуық ішіне енгізгеннен кейін бір апта бойы инфекцияның жыныстық жолмен берілуінен қорғану әдістерін қолдану керек. Қадағалануы Биологиялық дәрілік препараттардың қадағалануын жақсарту үшін енгізілетін дәрілік препараттың атауы мен сериясының нөмірін дұрыс жазу керек. Арнайы ескертулер Егде жастағы пациенттер Егде жастағы пациенттерде БЦЖ-медакты қолдануға қарсы көрсетілім жоқ. Дегенмен, бірінші рет енгізер алдында БЦЖ жүйелі инфекциясы/реакциясы қаупін қарастыру қажет. Егде жастағы пациенттер бүйрек немесе бауыр функциясының жеткіліксіздігіне шалдығуы мүмкін, бұл ауыр жүйелі БЦЖ-инфекциясы/реакциясы дамыған жағдайда туберкулезге қарсы препараттармен емдеуге әсер етуі мүмкін. Организмнің жалпы жағдайы әлсіреген егде жастағы пациенттерге ерекше сақтық таныту керек. Жүктілік немесе бала емізу кезінде қолдану Жүктілік Жүкті әйелдерде БЦЖ қолдану туралы деректер жоқ немесе шектеулі деректер бар. БЦЖ-медакты жүктілік кезінде қолдануға болмайды. Бала емізу БЦЖ/метаболиттерінің емшек сүтімен бірге шығатыны туралы ақпарат жеткіліксіз. БЦЖ-медак препаратын бала емізу кезінде қолдануға болмайды. Фертильділік Қуықішілік БЦЖ-ем сперматогенезге жағымсыз әсер етуі және олигоспермияға немесе азооспермияға әкелуі мүмкін. Жануарларға жүргізілген зерттеулер әсерлер қысқа мерзімді және қайтымды болуы мүмкін екенін көрсетті. БЦЖ-медакпен емді бастамас бұрын еркектер шәуетті консервациялау мүмкіндігіне қатысты дәрігермен кеңесуі керек. Препараттың көлік құралын және қауіптілігі зор механизмдерді басқару қабілетіне әсер ету ерекшеліктері БЦЖ-медак препаратымен ем жүргізу кезіндегі жергілікті немесе жүйелі көріністер көлік құралдарын басқару немесе механизмдермен жұмыс істеу қабілетіне әсер етуі мүмкін.

Нұсқаулықта көрсетілмеген.

БЦЖ бактериялары туберкулезге қарсы препараттарға (мысалы, этамбутолға, стрептомицинге, п-аминосалицил қышқылына (ПАСҚ), изониазидке және рифампицинге), антибиотиктер мен антисептиктерге сезімтал. Пиразинамид пен циклосеринге төзімділік туралы хабарламалар бар. БЦЖ-медак қуыққа енгізу кезінде бір мезгілде осы дәрілік заттарға БЦЖ-медак сезімталдығының салдарынан фторхинолондар, доксициклин немесе гентамицин сияқты туберкулезге қарсы препараттармен және антибиотиктермен емдеу жүргізілмеуі керек.

Сақтау мерзімі 2 жыл Жарамдылық мерзімі өткеннен кейін қолдануға болмайды. Қолдануға дайын суспензия түріндегі дәрілік препараттың химиялық және физикалық тұрақтылығы бөлме температурасында (20 °C – 25 °C) және тоңазытқышта (2 °C – 8 °C) жарықтан қорғалған жерде сақтаған кезде 24 сағат бойы расталады. Микробиологиялық тұрғыдан суспензия түрінде дайындалған препаратты дереу қолдану керек. Егер препарат дереу енгізілмесе, қолдануға дайын препаратты сақтау және енгізілгенге дейінгі жағдайларды қамтамасыз ету пайдаланушының міндеті болып табылады, егер қалпына келтіру (сұйылту) тексерілген және валидацияланған асептикалық жағдайларда жүзеге асырылмаса, жалпы алғанда 2-8 °С температурада 24 сағаттан аспауы тиіс. Сақтау шарттары Жарықтан қорғалған жерде 2°С – 8°С температурада. Мұздатып қатыруға болмайды. Балалардың қолы жетпейтін жерде сақтау керек!