ВИВАЙРА таблетки 50 мг

Шайнайтын бір таблетканың құрамында белсенді зат - 70.24 және 140.48 мг силденафил цитраты (50 мг және 100 мг силденафилге баламалы) қосымша заттар: калий полакрилині, тазартылған су, калий гидроксиді немесе хлорсутек қышқылы, магний стеараты, сусыз коллоидты кремнийдің қостотығы, аспартам, натрий кроскармеллозасы, жалбыз хош иістендіргіші, лактоза моногидраты, повидон K-30. Сыртқы түрінің, иісінің, дәмінің сипаттамасы Ақ түсті, үш бұрыш пішінді, екі жақ беті дөңес және бір жағында «50» таңбасы бар таблеткалар (50 мг доза үшін). Ақ түсті, үш бұрыш пішінді, екі жақ беті дөңес және бір жағында «100» таңбасы бар таблеткалар (100 мг доза үшін).

ВИВАЙРА, шайнайтын таблеткалар, 50 мг және 100 мг, қанағаттанарлық сексуалдық белсенділік үшін жыныс мүшесінің жеткілікті эрекциясына жетуге немесе оны сақтауға қабілетсіздікпен сипатталатын эректильді дисфункциясы бар ересек ерлерде қолданылады. Препарат тек сексуалдық стимуляция болғанда ғана тиімді.

ATХ коды G04BE03 Әсер ету механизмі Силденафил эректильді дисфункцияны емдеуге арналған пероральді дәрі түрінде болады. Табиғи жағдайларда, яғни сексуальді стимуляцияда, ол жыныс мүшесіне келетін қан ағынын арттыру есебінен бұзылған эректильді функцияны қалпына келтіреді. Жыныс мүшесінің эрекциясына жауап беретін физиологиялық механизм өзінде сексуалдық стимуляция кезінде қуысты денеде азот тотығының (NO) босап шығуын қамтиды. Азот тотығы артынан қуысты дененің тегіс бұлшықеттерінің босап шығуын туғызатын және қанның ағып келуін қамтамасыз ететін циклдық гуанозинмонофосфат деңгейін арттыратын гуанилатциклаза ферментін белсендіреді. Силденафил қуысты денедегі цГМФ – 5 типті спецификалық фосфодиэстеразаның. (ФДЭ-5) қуатты және селективті тежегіші болып табылады, онда ФДЭ-5 цГМФ ыдырауына жауап береді. Силденафил эрекцияға шеткері жергілікті әсерін көрсетеді. Силденафил адамның оқшауланған қуысты денесіне тікелей босаңсыту әсерін көрсетпейді, бірақ осы тінге NO азот тотығының босаңсыту әсерін белсенді күшейтеді. Сексуалдық стимуляция кезінде жүретін кездегідей, NO/цГМФ жолын белсендіргенде силденафилмен ФДЭ-5 тежелісі қуысты денеде цГМФ деңгейінің жоғарылауына әкеледі. Осылайша, силденафил күтілетін фармакологиялық әсерін көрсету үшін сексуалдық стимуляция қажет болады. Фармакодинамикалық әсерлері Іn vitro зерттеулері силденафилдің эрекция үдерісіне қатысатын ФДЭ-5 қатысты селективтілік иеленетінін көрсетті. Оның ФДЭ-5 әсер ету тиімділігі, басқа белгілі фосфодиэстеразаларға қарағанда, күштірек. Торқабықтағы жарық тасымалдау жолына қатысатын ФДЭ-6-мен салыстырғанда, 10 есе селективтілік байқалады. Ең жоғары ұсынылатын дозасында ол ФДЭ-1-мен салыстырғанда, 80 есе селективтілік және ФДЭ-2, 3, 4, 7, 8, 9, 10 және 11-мен салыстырғанда, 700 еседен артық селективтілік иеленеді. Атап айтқанда, силденафил жүрек жиырылуын бақылауға қатысатын цАМФ-спецификалық фосфодиэстеразаның изотүрі - ФДЭ-3-пен салыстырғанда, ФДЭ-5 қатысты 4000 еседен артық селективтілік иеленеді. Клиникалық тиімділігі және қауіпсіздігі Екі клиникалық зерттеу силденафил сексуалдық стимуляцияға жауап ретінде эрекция туғызуы мүмкін препарат қабылдаудан кейінгі уақыт терезесін бағалау үшін арнайы әзірленді. Силденафилді аш қарынға қабылдаған пациенттерде мүше плетизмографиясының (RigiScan) зерттеуінде 60% қаттылыққа жетумен эрекцияның орташа бастау уақыты (жыныстық қатынас жасауға жеткілікті) 25 минут құрады (12-ден 37 минутқа дейін). Жекелеген RigiScan зерттеуінде силденафил қабылдаудан кейін 4-5 сағат өткен соң сексуалдық стимуляцияға жауап ретінде эрекция туғызу қабілетін сақтады. Силденафил көпшілік жағдайларда клиникалық әсерлерде көрініс бермейтін артериялық қысымның жеңіл немесе орташа төмендеуін туғызбайды. Ішке 100 мг силденафил қабылдаудан кейін жатқан қалыпта систолалық артериялық қысымның орташа ең жоғары төмендеуі 8.4 мм сын. бағ. құрады. Диастолалық артериялық қысым жатқан қалыпта 5.5 мм сын. бағ. құрады. Артериялық қысымның осы төмендеуі тамырлардың тегіс бұлшықеттерінде цГМФ деңгейінің жоғарылау ықтималдығы салдарынан силденафилдің тамыр кеңейту әсеріне сәйкес келеді. Дені сау еріктілерде силденафилдің 100 мг дейінгі бір реттік пероральді дозалары ЭКГ клиникалық мәнді өзгерістерін туғызбады. Жүректің ауыр коронарлық ауруы (CAD) (бір коронарлық артерияның, кем дегенде, > 70 % стенозы) бар 14 пациентте силденафилдің бір реттік пероральді 100 мг дозасының гемодинамикалық әсерлерінің зерттеуі шеңберінде тыныштық күйдегі орташа систолалық және диастолалық артериялық қысым, базалық деңгеймен салыстырғанда, тиісінше, 7% және 6% төмендеді. Өкпенің орташа систолалық артериялық қысымы 9% төмендеді. Силденафил жүректің минуттық көлеміне ықпалын тигізбеді және тарылған коронарлық артериялар арқылы қан ағымын нашарлатпады. Салыстырмалы жасырын плацебо-бақыланатын стресс сынағында стенокардияға қарсы дәрілік заттарды жүйелі қабылдаған (нитраттардан басқа) эректильді дисфункциясы және созылмалы тұрақты стенокардиясы бар 144 пациент бағаланды. Нәтижелер стенокардияға қатысты силденафил мен плацебо арасындағы уақытта клиникалық мәнді айырмашылықтар көрсетпеді. Түстерді ажыратудың жеңіл немесе орташа (көк/жасыл) өзгерісі, қабылдаудан кейін 2 сағаттан соң қандай да бір елеулі әсерлерін жоғалтумен 100 мг дозасын қабылдаудан кейін 1 сағаттан соң Фарнсфорд-Мунселл 100 түсті тестісін пайдалану кезінде кейбір сынақтан өтушілерде анықталды. Түстерді ажыратудың осы өзгерісінің постулатталған механизмі торқабықтың жарық тасымалдау каскадына қатысатын ФДЭ-6 тежелісіне байланысты. Силденафил көру өткірлігіне немесе контрастылы сезімталдыққа ықпалын тигізбейді. Сары дақтың ерте жастағы дегенерациясы расталған пациенттердің шағын плацебо-бақыланатын зерттеуінде (n = 9), силденафил (бір реттік доза, 100 мг) өткізілген тестілер (көру өткірлігі, Амслер торы, бағдаршам түстерін ажырату, Хамфри периметрі және фотостресс) нәтижелерінің елеулі өзгерістеріне әкелмеді. Бір рет 100 мг дозасын қабылдаудан кейін силденафил дені сау еріктілерде шәуhет қозғалғыштығына немесе морфологиясына ықпалын тигізбеді. Клиникалық зерттеулер бойынша қосымша ақпарат Клиникалық сынақтар шеңберінде силденафилді 19-дан 87 жасқа дейінгі 8 000-нан астам пациент қабылдады. Пациенттердің келесі топтары: егде жастағы пациенттер (19.9%), келесі: гипертония (30.9%), қант диабеті (20.3%), жүректің ишемиялық ауруы (5.8%), гиперлипидемия (19.8%), жұлын-ми зақымдануы (0.6%), депрессия (5.2 %), простататаның трансуретральді резекциясы (3.7%), радикальді простатэктомия (3.3%) ауруларынан зардап шегетін пациенттер назарға алынды. Келесі топтар: жамбас аумағына хирургиялық араласу жасалатын пациенттер, радиоем курсынан өтетін пациенттер және бүйрегі немесе бауырының ауыр зақымдануы бар пациенттер және кейбір жүрек-қантамыр аурулары бар пациенттер жеткілікті шамада ұсынылмады немесе клиникалық сынақтардан шығарылды (4.3 бөлімін қараңыз). Бекітілген дозамен жүргізілген зерттеулерде емдеу нәтижесінде эрекцияның жақсаруы туралы хабарлаған пациенттер үлесі, плацебо жағдайындағы 25%-бен салыстырғанда, 62% (25 мг), 74 % (50 мг) және 82% (100 мг) құрады. Бақыланатын клиникалық сынақтарда силденафил емін үзген пациенттер пайызы төмен болды және плацебо үшін осындаймен салыстырмалы болды. Барлық зерттеулерде силденафил қабылдаудан кейін жақсару туралы хабарлаған пациенттер үлесі келесі патологияларда мынадай мәндер құрады: психогендік эректильді дисфункция (84%), аралас эректильді дисфункция (77%), органикалық эректильді дисфункция (68%), егде жастағы пациенттер (67%), қант диабеті (59%), жүректің ишемиялық ауруы (69%), гипертония (68%), TURP (61%), радикальді простатэктомия (43%), жұлын-ми зақымдануы (83%), депрессия (75%). Силденафил қауіпсіздігі мен тиімділігі ұзақ мерзімді зерттеулер барысында расталды.. Балалар Еуропалық дәрілік заттар жөніндегі агенттік эректильді дисфункцияны емдеу үшін педиатриялық қауымның барлық қосалқы топтарында силденафилді зерттеу нәтижелерін ұсыну міндеттемесінен бас тартты (педиатрияда пайдалану туралы ақпаратты 4.2 бөлімнен қараңыз).

Дозалау режимі Ұсынылатын доза 50 мг құрайды және, қажет болса, сексуалдық белсенділікке дейін шамамен бір сағат бұрын қабылданады. Тиімділігі мен жағымдылығына қарай, қажет болса, дозаны 100 мг дейін арттыруға немесе 25 мг дейін төмендетуге болады. Ең жоғары ұсынылатын доза 100 мг құрайды. Пациенттердің арнайы топтары Балалар Силденафил 18 жасқа толмаған адамдарда қолдануға арналмаған. Егде жастағы пациенттер Егде жастағы (≥ 65 жас) пациенттер үшін дозаны түзету қажет емес. Бауыр жеткіліксіздігі бар пациенттер Силденафил клиренсі бауыр функциясының бұзылуы бар пациенттерде (мысалы, циррозда) төмен болғандықтан, 25 мг дозаны қарастыру ұсынылады. Тиімділігі мен жағымдылығына байланысты, қажет болса, дозаны 50 мг және 100 мг дейін біртіндеп арттыруға болады. Бүйрек жеткіліксіздігі бар пациенттер Бүйрек жеткіліксіздігінің жеңіл және орташа дәрежесінде (креатинин клиренсі 30-80 мл/мин) ұсынылған дозаны түзету қажет емес. Бүйрек функциясының ауыр бұзылуы бар пациенттерде (креатинин клиренсі < 30 мл/мин) силденафил клиренсінің төмендеуіне орай, 25 мг дозаны қарау ұсынылады. Тиімділігі мен жағымдылығына байланысты, қажет болса, дозаны 50 мг және 100 мг дейін біртіндеп арттыруға болады. Басқа препараттар қабылдайтын пациенттерде пайдалану Силденафилмен бір мезгілде қабылдау қарсы көрсетілімді болатын ритонавирді қоспағанда, силденафилдің бастапқы дозасын CYP3A4 тежегіштерімен қатарлас ем қабылдайтын пациенттер үшін 25 мг дейін азайту ұсынылады. Постуральді гипотензияның даму мүмкіндігін азайту үшін альфа-адреноблокаторлар қабылдайтын пациенттерде силденафилді гемодинамиканың тұрақтануына жетуден кейін ғана қабылдауды бастау керек. Бұдан бөлек, силденафилдің бастапқы дозасын 25 мг дейін азайту ұсынылады. Енгізу әдісі және жолы Ішке қабылдау үшін. Қабылдау уақытының көрсетілуімен қолдану жиілігі Ең жоғары ұсынылатын қолдану жиілігі тәулігіне бір рет құрайды. Силденафилді ас ішумен бірге қабылдағанда препарат әсері, аш қарынға қабылдаумен салыстырғанда, кешігіп басталуы мүмкін.

- әсер етуші затқа немесе қосымша заттардың кез келгеніне аса жоғары сезімталдық - азот тотығының донаторларымен (амилнитрит сияқты) немесе кез келген түрдегі нитраттармен бір мезгілде қабылдау - ритонавирмен бір мезгілде қабылдау - сексуалдық белсенділіктен бас тарту ұсынылған ерлерге (мысалы, тұрақсыз стенокардия немесе ауыр жүрек жеткіліксіздігі сияқты ауыр жүрек-қантамыр аурулары бар пациенттерге) - осы көрініс алдыңғы ФДЭ-5 тежегішін қабылдаумен байланысты ма әлде жоқ па, оған қарамастан, генезі артериялық емес көру жүйкесінің алдыңғы ишемиялық нейропатиясы (NAION) салдарынан бір көзі көрмей қалған ерлерге - ауыр дәрежедегі бауыр жеткіліксіздігі - артериялық гипотензия (АҚ < 90/50 мм сын. бағ.) - таяудағы инсульт немесе миокард инфарктісінің тарихы - пигментті ретинит (retinitis pigmentosa) сияқты торқабықтың тұқым қуалайтын дегенерациялық зақымдануларының болуы (осы пациенттердің шағын бөлігінде торқабық фосфодиэстеразасының генетикалық бұзылулары болады) - гуанилатциклаза стимуляторларымен (риоцигуат) бір мезгілде қолдану - сирек тұқым қуалайтын галактоза жақпаушылығы кінәраттары, Лапп лактаза тапшылығы немесе глюкоза-галактоза мальабсорбциясы бар ерлерге - балалар мен 18 жасқа дейінгі жасөспірімдерге - әйелдер

Нұсқаулықта көрсетілмеген.

Симптомдары: жағымсыз реакциялар жиілігі артады (бас ауыру, гиперемия, бас айналу, диспепсия, мұрын бітелісі, көру қабілетінің бұзылуы). Емі: симптоматикалық. Гемодиализ силденафил клиренсін жеделдетпейді, өйткені соңғысы плазма ақуыздарымен белсенді байланысады және несеппен шығарылмайды. Дәрілік заттың қолдану тәсілін түсініп алу үшін медициналық қызметкермен кеңесу жөніндегі нұсқаулар Препаратты қолдану тәсіліне қатысты күдіктер білінгенде, емдеуші дәрігермен кеңесіңіз. ДП стандартты пайдалану кезінде көрініс беретін жағымсыз реакциялар сипаттамасы және осы жағдайда қабылдау керек болатын шаралар Өт жиі (≥ 1/10): - бас ауыру Жиі (≥ 1/100 және < 1/10): - бас айналу - түс тану қабілетінің бұрмалануы**, көру бұзылысы, анық көрмеу - гиперемия, қан кернеулер - мұрын бітелісі - жүрек айну, диспепсия Жиі емес (≥ 1/1000 және < 1/100): - ринит - аса жоғары сезімталдық - ұйқышылдық, гипестезия - көзден жас ағумен байланысты бұзылулар***, көздің ауыруы, көздің қарығуы, фотопсия, көз тамырларының гиперемиясы, көру арқылы қабылдау айқындылығының өзгеруі, конъюнктивит - вертиго, құлақтың шуылдауы - тахикардия, жүректің соғуын сезіну - артериялық гипертензия, артериялық гипотензия - мұрыннан қан кету, мұрын маңы қойнауларының бітелісі - гастроэзофагеальді рефлюкс ауруы, құсу, іштің жоғарғы бөлімінің ауыруы, ауыз кеберсуі - тері бөртпесі - миалгия, аяқ-қолдың ауыруы - гематурия - кеуденің ауыруы, қатты қажу, ысыну сезімі - жүректің жиырылу жиілігінің артуы Сирек (≥ 1/10000 және < 1/1000): - ми қан айналымының бұзылуы, транзиторлы ишемиялық шабуыл, құрысулар*, қайталанған құрысулар*, естен тану - көру жүйкесінің алдыңғы артерииттік емес ишемиялық невропатиясы (NAION)*, торқабық тамырларының окклюзиясы*, торқабыққа қан құйылу, артериосклерозды ретинопатия, торқабық аурулары, глаукома, көру өрісінің ақауы, диплопия, көру өткірлігінің төмендеуі, миопия, астенопия, шыны тәрізді дененің жүзінділі бұлыңғырлануы, нұрлы қабық бұзылысы, мидриаз, гало-әсер, көздің ісінуі, көздің ісіп кетуі, көру бұзылысы, конъюнктива гиперемиясы, көздің тітіркенуі, көзде жайсыздық сезіну, қабақ ісінуі, ақ қабық түсінің өзгерісі - кереңдік - жүректен болатын кенет өлім*, миокард инфарктісі, қарыншалық аритмия*, жүрекшелер фибрилляциясы, тұрақсыз стенокардия - тамақтың қысылуын сезіну, мұрын ісінуі, мұрын шырышты қабығының құрғауы - оральді гипестезия - Стивенс-Джонсон синдромы (SJS)*, уытты эпидермалық некролиз (TEN)* - жыныс мүшесінен қан кету, приапизм*, гематоспермия, эрекцияның артуы - ашушаңдық * Маркетингтен кейінгі қадағалау кезінде ғана хабарланды ** Түс тану қабілетінің бұрмалануы: хлоропсия, хроматопсия, цианопсия, эритропсия және ксантопсия *** Көз жасы ағуымен байланысты бұзылулар: құрғақ көз синдромы, көз жасы безі функциясының бұзылулары және көз жасының көп ағуы Жағымсыз дәрілік реакциялар туындағанда медициналық қызметкерге, фармацевтикалық қызметкерге немесе, дәрілік препараттардың тиімсіздігі туралы хабарламаларды қоса, дәрілік препараттарға болатын жағымсыз реакциялар (әсерлер) жөніндегі ақпараттық деректер базасына тікелей хабарласу керек Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

Препаратты тағайындау алдында эректильді дисфункцияны диагностикалау және оның ықтималды пайда болу себептерін анықтау үшін анамнез жинау және медициналық тексеру өткізуге кеңес беріледі. Арнайы сақтандырулар Жүрек-қантамыр ауруларының қауіп факторлары Сексуалдық белсенділікпен байланысты жүрек бұзылуларының қаупі болатындықтан, эректильді дисфункцияның кез келген емін бастар алдында дәрігер пациенттің жүрек-қантамыр жүйесінің жай-күйін бағалауы тиіс. Силденафилдің тамырларды кеңейтетін қасиеттері бар, бұл артериялық қысымның жеңіл және орташа төмендеуіне әкеледі. Осындай жай-күйлері бар пациенттерге силденафил тағайындау алдында дәрігер, әсіресе, сексуалдық белсенділікпен біріктірілімде тамыр кеңейтетін әсерлері сияқты теріс әсер ету мүмкіндігін мұқият тексеруі тиіс. Тамырларды кеңейтетін дәрілерге жоғары сезімталдығы бар пациенттерге сол жақ қарынша өткізгіштігінің қиындап кетуінен зардап шегетін (мысалы, қолқа стенозы, гипертрофиялық обструкциялық кардиомиопатия) немесе қан қысымының автономды реттелісінің күрделі бұзылуы түрінде көрініс беретін көптеген жүйелік атрофияның сирек синдромы бар пациенттер де жатады. Силденафил нитраттардың гипотензиялық әсерін күшейтеді. Миокард инфарктісін, тұрақсыз стенокардия, жүректің кенет тоқтап қалуын, қарыншалық экстрасистолия, миға қан құйылу, уақытша ишемиялық шабуыл, гипертония мен гипотонияны қоса, күрделі жүрек-қантамырлық бұзылулар қатарына тән сиденафил қабылдаумен уақыттық байланыс білінді. Осы пациенттердің көпшілігінде, бірақ бәрінде емес бұрын жүрек-қантамыр ауруларының қауіп факторлары болды. Көптеген көріністер жыныстық қатынас кезінде немесе одан кейін көп ұзамай және жыныстық қатынастарсыз силденафил қабылдаудан кейін қысқа уақыт өткен соң бірнеше жағдайда орын алды. Бұл оқиғалардың осы немесе өзге факторлармен тікелей байланысты екендігін-еместігін анықтау мүмкін емес. Приапизм Силденафилді қоса, эректильді дисфункцияны емдеуге арналған препараттарды жыныс мүшесінің анатомиялық деформациясы (ангуляция, кавернозды фиброз немесе Пейрони ауруы) бар пациенттерге немесе приапизмге әкелуі мүмкін жай-күйлері бар пациенттерге (мысалы, орақ-жасушалы анемия, көптеген миелома немесе лейкемия) сақтықпен қолдану керек. Силденафилге қатысты ұзаққа созылатын эрекция және приапизм туралы хабарланды. Эрекция 4 сағаттан көп сақталған жағдайда пациент дереу медициналық жәрдемге жүгінуі тиіс. Егер приапизм дер мезгілінде жүргізілмесе, бұл жыныс мүшесі тіндерінің зақымдануына және потенцияны қайтымсыз жоғалтуға әкелуі мүмкін. ФДЭ-5 басқа тежегіштерімен немесе эректильді дисфункцияны емдеудің басқа әдістерімен бір мезгілде қолдану Силденафилдің ФДЭ-5 басқа тежегіштерімен немесе құрамында силденафил бар өкпенің артериялық гипертензиясын емдеудің басқа әдістерімен (REVATIO) біріктірілімінің қауіпсіздігі мен тиімділігі немесе эректильді дисфункцияны емдеудің басқа әдістерімен біріктірілімінің қауіпсіздігі мен тиімділігі зерттелмеген. Сондықтан осындай біріктірілімдерді қолдану ұсынылмайды. Көруге әсері Силденафил мен ФДЭ-5 басқа тежегіштерін қабылдаумен байланысты көрудің бұзылу жағдайлары хабарланды. Силденафил мен ФДЭ-5 басқа тежегіштерін қабылдаумен байланысты бақылау зерттеулерінде артериялық емес генездегі көру жүйкесінің алдыңғы ишемиялық нейропатиясының жағдайлары сирек аталды. Пациентті көру қабілетінің кенеттен бұзылуы жағдайында силденафил қабылдауды бірден тоқтату және дәрігерге дереу қаралу керектігін ескерткен жөн. Ритонавирді бір мезгілде қолдану Силденафилді ритонавирмен бір мезгілде қабылдау қарсы көрсетілімді. Альфа-адреноблокаторларды бір мезгілде қолдану Силденафилді альфа-адреноблокаторлармен бірге қабылдайтын пациенттерге сақтық шарасын қадағалау ұсынылады, өйткені бірге қабылдау кейбір сезімтал пациенттерде симптоматикалық артериялық гипотензияға әкелуі мүмкін. Бұл зор ықтималдықпен силденафил қабылдаудан кейін 4 сағат ішінде орын алуы мүмкін. Ортостаздық гипотензияның даму қаупін төмендету үшін силденафилмен емдеуді бастар алдында альфа-адреноблокаторлармен ем кезінде пациенттер гемодинамикалық тұрақтылыққа алдын ала жеткен жөн. Силденафилдің бастапқы дозасын 25 мг дейін азайту ұсынылады. Бұдан бөлек, дәрігер пациентке постуральді гипотензия симптомдары туындаған жағдайда жасалатын әрекеттер туралы нұсқау беруі тиіс. Қан ұюына әсері Адам тромбоциттерін пайдаланумен жүргізілген in vitro зерттеулері силденафилдің натрий нитропруссидінің агрегацияға қарсы әсерін күшейтетінін айғақтайды. Қан ұюының бұзылулары немесе белсенді пептидтік ойық жарасы бар пациенттерде силденафил қолдану қауіпсіздігі жөнінде мәліметтер жоқ. Осылайша, силденафил осындай пациенттерге пайдасы мен қаупін мұқият бағалаудан кейін ғана тағайындалу керек. Әйелдер Силденафил әйелдерде қолдануға арналмаған. Қосымша заттар Препарат құрамында лактоза бар. Препаратты сирек тұқым қуалайтын галактоза жақпаушылық кінәраттары, Лапп лактаза тапшылығы немесе глюкоза-галактозалық мальабсорбциясы бар пациенттерге тағайындауға болмайды. Педиатрияда қолдану Препарат 18 жасқа толмаған пациенттерде қолдануға көрсетілмеген. Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері Силденафил автокөлік және механизмдерді басқару қабілетіне мардымсыз әсерін көрсетуі мүмкін. Препарат бас айналуын және көру қабілетінің бұзылуын туғызуы мүмкін. Дәрілік заттың жағымсыз әсерлерін ескеріп, пациенттер автокөлік рөліне отырмас бұрын немесе оны қабылдаудан кейін механизмдерді басқаруға кірісу алдында олар силденафилге қандай реакция беретінін алдын ала ойлауы тиіс.

Силденафил әйелдерге қолдану үшін көрсетілмеген.

Силденафилге басқа дәрілік заттардың әсері Силденафил метаболизмі, ең алдымен, 3A4 (негізгі жол) және 2C9 (қосымша жол) изотүрлеріндегі P450 (CYP) цитохромы арқылы жүзеге асады. Осылайша, осы изоферменттердің тежегіштері силденафил клиренсін төмендетуі мүмкін, ал осы изоферменттердің индукторлары силденафил клиренсін арттыруы мүмкін. Силденафил CYP3A4 тежегіштерімен (кетоконазол, эритромицин, циметидин сияқты) бірге қолданылғанда силденафил клиренсінің төмендеуі білінеді. Осы пациенттерде ешқандай теріс әсерлер жиілігінің артуы байқалмаса да, силденафилді CYP3A4 тежегіштерімен бір мезгілде қолданғанда силденафилдің бастапқы дозасын 25 мг дейін азайту ұсынылады. P450 қуатты тежегіші болып табылатын АИТВ протеазасының тежегіші - ритонавирдің тепе-тең күйде (күніне екі рет 500 мг) силденафилмен (бір реттік 100 мг доза) бір мезгілде қабылдау қан плазмасында силденафил Cmax 300% (4 есе) артуына және силденафил AUC 1000% (11 есе) артуына әкелді. 24 сағаттан соң плазмадағы силденафил деңгейлері, тек бір силденафилді қабылдау кезіндегі шамамен 5 нг/мл-мен салыстырғанда, бұрынғыша 200 нг/мл құрады. Осы деректер P450 субстраттарының кең диапазонында ритонавирге тән білінген әсерлермен сәйкес келеді. Силденафил ритонавир фармакокинетикасына ықпалын тигізбеді. Осы фармакокинетикалық нәтижелер негізінде силденафилді ритонавирмен бірге қабылдау қарсы көрсетілімді. CYP3A4 тежегіші - саквинавирдің АИТВ протеазасы тежегішін тепе-тең күйде (күніне үш рет 1200 мг) силденафилмен (100 мг бір реттік доза) бір мезгілде қабылдау силденафил Cmax 140% артуына және силденафил AUC 210% артуына әкелді. Силденафил саквинавирдің фармакокинетикасына ықпалын тигізбеді. Кетоконазол және итраконазол сияқты өте күшті CYP3A4 тежегіштері болжамды түрде өте айқын әсерлер көрсетеді. Силденафилдің бір реттік 100 мг дозасын CYP3A4 спецификалық тежегіші - эритромицинмен қабылдағанда тепе-тең күйде (бес күн ішінде күніне екі рет 500 мг) силденафилдің жүйелік деңгейінің (AUC) 182% артуы болды. Азитромициннің (3 күн бойы күніне бір рет 500 мг) силденафил немесе оның басты метаболитінің AUC, Cmax, Tmax мәндеріне, шығарылу жылдамдығы константасына немесе кейінгі жартылай шығарылу кезеңіне ешқандай ықпал ету белгілері білінбеді. P450 цитохромының тежегіші және CYP3A4 спецификалық емес тежегіші - циметидин (800 мг) силденафилмен (50 мг) бір мезгілде қолданғанда дені сау еріктілерде қан плазмасында силденафил концентрациясының 56% артуын туғызады. Грейпфрут шырыны жіңішке ішек қабырғалары деңгейіндегі метаболизмге қосылған CYP3A4 изоферментінің әлсіз тежегіші болып табылады және қан плазмасында силденафил концентрациясының орташа жоғарылауына әкелуі мүмкін. Бір реттік антацид дозалары (магний гидроксиді/алюминий гидроксиді) силденафил биожетімділігіне ықпал етпейді. CYP2C9 тежегіштері (толбутамид, варфарин, фенитоин сияқты), CYP2D6 тежегіштері (серотонинді кері қармайтын селективті тежегіштер, трициклды антидепрессанттар сияқты), тиазид және тиазид тәрізді диуретиктер, ілмектік және калий жинақтайтын диуретиктер, ангиотензин өзгертуші фермент тежегіштері, кальций өзекшелері блокаторлары, бета-адренорецепторлар антагонистері немесе CYP450 индукторлары (рифамицин, барбитураттар сияқты) сияқты силденафил фармакокинетикасына ықпалы анықталмады. Эндотелин антагонисі - бозентан (CYP3A4 [орташа], CYP2C9 әрі, мүмкін, CYP2C19 индукторы) белгіленген режимде (күніне екі рет 125 мг) силденафилмен тепе-тең күйде (күніне үш рет 80 мг) бір мезгілде қолданғанда силденафил AUC және Cmax, тиісінше, 62,6% және 55,4% төмендеуі білінді. Демек, рифампин сияқты CYP3A4 күшті индукторларын бір мезгілде қабылдау қан плазмасында силденафил концентрациясының көбірек төмендеуіне әкелетіні күтіледі. Никорандил кальций өзекшелері белсендіргішінің гибриді және нитрат түрінде болады. Нитратты құрамдас бөлігінің болуына орай, оның силденафилмен елеулі өзара әрекеттесу қуаты бар. Силденафилдің басқа дәрілік заттарға әсері Силденафил P450 цитохромы жүйесінің 1A2, 2C9, 2C19, 2D6, 2E1 және 3A4 изоферменттерінің әлсіз тежегіші (IC50 > 150 мкМ) болып табылады. Ұсынылатын дозасын қабылдаудан кейін плазмада силденафилдің шамамен 1 мкмоль жоғары шекті концентрациясында силденафилдің осы изоферменттер субстраттарының клиренсіне ықпал ету қабілетінің ықтималдығы аз. Силденафилдің және фосфодиэстеразаның теофиллин немесе дипиридамол сияқты спецификалық емес тежегіштерінің өзара әрекеттесу деректері жоқ. Азот тотығының/циклдық гуанозинмонофосфаттың (цГМФ) метаболизмдік жолына көрсететін белгілі әсерлерге сәйкес, силденафил нитраттардың гипотензиялық әсерлерін күшейтуге қабілетті. Сондықтан оны азот тотығының донаторларымен немесе кез келген түрдегі нитраттармен бір мезгілде қабылдау қарсы көрсетілімді. Риоцигуат: ФДЭ-5 тежегіштерін риоцигуатпен біріктірілімде пайдаланғанда артериялық қысымның төмендеуіне қосымша әсері білінді. Риоцигуат ФДЭ-5 тежегіштерінің гипотензиялық әсерін күшейтеді. Силденафилді қоса, риоцигуатты ФДЭ-5О тежегіштерімен бір мезгілде қолдану қарсы көрсетілімді. Силденафилді альфа-адреноблокаторлармен бір мезгілде қолдану кейбір сезімтал пациенттерде симптоматикалық артериялық гипотензияға әкелуі мүмкін. Осы әсердің силденафил қабылдаудан кейін 4 сағат ішінде басталуы бәрінен ықтимал. Доксазозинмен ем көмегімен тұрақтанған қуық асты безінің қатерсіз гиперплазиясы бар пациенттерге доксазозин (4 мг және 8 мг) және силденафил (25 мг, 50 мг немесе 100 мг) альфаадреноблокаторы бір мезгілде тағайындалғанда жатқан қалыпта артериялық қысымның 7/7 мм сын. бағ., 9/5 мм сын. бағ. және 8/4 мм сын. бағ. қосымша төмендеуі, және тиісінше, түрегеліп тұрғанда артериялық қысымның 6/6 мм сын. бағ., 11/4 мм сын. бағ. және 4/5 мм сын. бағ. орташа қосымша төмендеуі байқалды. Доксазозинді тұрақты қабылдайтын пациенттер силденафил мен доксазозинді бір мезгілде қолданғанда ара-тұра симптоматикалық ортостаздық гипотензия жағдайлары білінді. Осы орайда пациенттерде сондай-ақ бас айналу мен естен тану алдындағы, бірақ естен тануларсыз күй байқалды. Силденафилді (50 мг) толбутамидпен (250 мг) немесе варфаринмен (40 мг) бірге қолданғанда екеуі де CYP2C9 арқылы метаболизденетін ешқандай елеулі өзара әрекеттесулер анықталмады. Силденафил (50 мг) ацетилсалицил қышқылының (150 мг) әсер етуімен қан кету уақытының қосымша ұзаруын туғызбайды. Силденафил (50 мг) дені сау ерлерде қандағы орташа ең жоғары 80 мг/дл алкоголь деңгейінде алкогольдің гипотензиялық әсерлерін күшейтпейді. Гипертонияға қарсы препараттардың келесі кластарын: диуретиктер, бета-блокаторлар, АӨФ тежегіштерін, ангиотензин II антагонистерін, гипертензияға қарсы препараттарды (тамыр кеңейтетін және орталық әсер ететін), адренергиялық нейрон блокаторларын, кальций өзекшелерінің блокаторларын және альфа-адренорецепторлар блокаторларын қабылдау кезінде, плацебо қабылдаған пациенттермен салыстырғанда, силденафил қабылдаған пациенттерде жағымсыз әсерлер бейінінде айырмашылықтар анықталмады. Артериалды гипертензиясы бар пациенттерде силденафилді (100 мг) амлодипинмен бірге қабылдаған кезде шалқадан жатқан қалыпта систолалық қысымның 8 мм сын. бағ. төмендегені байқалды. Шалқадан жатқан қалыпта диастолалық қысымның, тиісінше, қосымша төмендеуі 7 мм сын. бағ. құрады. Бұл артериялық қысымның қосымша төмендеуі дені сау еріктілердің монотерапия ретінде силденафил қабылдау кезіндегідей шамада болды. Силденафил (100 мг) екеуі де CYP3A4 субстраттары болып табылатын АИТВ протеазасының тежегіштері - саквинавир мен ритонавирдің анықталған фармакокинетикасына ықпал етпеді. Дені сау ерлерде силденафил тепе-тең күйде (күніне үш рет 80 мг) бозентан AUC 49,8% және бозентан Cmax 42% (күніне екі рет 125 мг) артуына алып келеді.

Сақтау мерзімі 3 жыл. Жарамдылық мерзімі өткеннен кейін қолдануға болмайды! Сақтау шарттары 25С-ден аспайтын температурада сақтау керек. Балалардың қолы жетпейтін жерде сақтау керек!