Гликлазид МВ таблетки 30 мг

Бір таблетканың құрамында белсенді зат - 30.0 мг немесе 60.0 мг гликлазид, қосымша заттар: сусыз коллоидты кремнийдің қостотығы, гипромеллоза (2208), натрий стеарил фумараты, тальк, лактоза моногидраты. Сыртқы түрінің, иісінің, дәмінің сипаттамасы Ақ немесе ақ дерлік түсті, беткейі жалпақ цилиндрлі дөңгелек пішінді және ойығы бар таблеткалар (30 мг доза үшін). Ақ немесе ақ дерлік түсті, беткейі жалпақ цилиндрлі дөңгелек пішінді, ойығы және сызығы бар таблеткалар (60 мг доза үшін).

• инсулинге тәуелді емес қант диабеті (2-тип) ересектерде қан глюкозасының деңгейін тиісті түрде бақылау үшін диетаны, дене жүктемесін сақтау және салмақты азайту жеткіліксіз болған жағдайларда.

ATX коды: А10ВВ09 Әсер ету механизмі Гликлазид - бұл эндоциклді байланысы бар N-гетероциклді сақинаның болуымен ұқсас қосылыстардан ерекшеленетін сульфонилмочевина тобының диабетке қарсы пероральді гипогликемиялық препараты. Гликлазид қандағы глюкоза деңгейін төмендетеді, Лангерганс аралшықтарының бета-жасушалары арқылы инсулин секрециясын стимуляциялайды. 2 жыл емдегеннен кейін постпрандиальді инсулин деңгейінің жоғарылауы және С-пептид секрециясы сақталады. Метаболизмдік қасиеттерінен басқа, гликлазидтің гемоваскулярлық белсенділігі бар. Фармакодинамикалық әсері Инсулин секрециясына әсері 2-типті қант диабетінде гликлазид глюкозаның түсуіне жауап ретінде инсулин секрециясының бірінші шыңын қалпына келтіреді және инсулин секрециясының екінші фазасын күшейтеді. Инсулин секрециясының едәуір артуы глюкозаны енгізуге немесе тамақ ішуге байланысты стимуляцияға жауап ретінде байқалады. Гемоваскулярлық қасиеттері: Гликлазид қант диабетіндегі асқынулардың дамуына әсер ететін екі механизмге әсер ете отырып, ұсақ тамырлар тромбозының даму қаупін азайтады: - Тромбоциттердің агрегациясы мен адгезиясын ішінара тежеу және тромбоциттердің маркерлер белсенділігінің төмендеуі (бета-тромбоглобулин, тромбоксан В2). - Тамырлы эндотелийдің фибринолитикалық белсенділігінің қалпына келуі және плазминоген тіндік активаторы белсенділігінің артуы.

Дозалау режимі Гликлазид МВ препаратының тәуліктік дозасы 30 мг-ден 120 мг-ге дейін ауытқуы мүмкін. Кез келген басқа гипогликемиялық дәрілік затты пайдаланғандағыдай, препараттың дозасы пациенттің жеке метаболизмдік реакциясына (қандағы глюкоза, HbAlc) байланысты түзетіледі. Бастапқы доза Ұсынылатын бастапқы доза 30 мг құрайды. Қандағы глюкоза деңгейі тиімді бақыланған жағдайда бұл дозаны демеуші ем ретінде пайдалануға болады. Егер глюкоза деңгейі тиісті түрде бақыланбаса, дозаны күніне 60 мг, 90 мг немесе 120 мг-ге дейін сатылы арттыруға болады. Препарат дозасын біртіндеп арттыру арасындағы аралық, екі апта емдегеннен кейін қандағы глюкоза деңгейі төмендемеген пациенттерден басқа, кем дегенде 1 айды құрауы тиіс. Мұндай жағдайларда емдеуді бастағаннан кейін екі аптадан соң дозаны арттыруға болады. Ұсынылатын ең жоғары тәуліктік доза күніне 120 мг құрайды. Гликлазид МВ 60 мг модификацияланып босап шығатын бір таблеткасы Гликлазид МВ 30 мг модификацияланып босап шығатын екі таблеткасына баламалы. Диабетке қарсы басқа препараттан Гликлазид МВ препаратына ауысу: Гликлазид МВ препаратын диабетке қарсы басқа пероральді препараттарды алмастыру үшін қолдануға болады. Гликлазид МВ препаратына ауысқан кезде алдыңғы диабетке қарсы препараттың дозасын және жартылай шығарылу кезеңін ескеру керек. Әдетте, өтпелі кезеңді сақтау қажет емес. Қабылдауды жоғарыда сипатталғандай қандағы глюкоза деңгейінің реакциясына байланысты кейін түзету арқылы 30 мг дозадан бастау керек. Жартылай шығарылу кезеңі ұзаққа созылатын сульфонилмочевина тобының басқа препараттарынан ауысқан кезде, екі препараттың да аддитивті әсеріне жол бермеу үшін, ұзақтығы бірнеше күнге созылатын дәрі-дәрмексіз кезең қажет етілуі мүмкін. Гликлазид МВ прпаратына ауысу емдеуді бастау үшін сипатталған емшара бойынша жүргізілуі тиіс, яғни бастапқы дозасы метаболизмдік реакцияға байланысты дозаны кейіннен кезең-кезеңмен арттыра отырып, күніне 30 мг құрайды. Диабетке қарсы басқа препараттармен біріктіріп қолдану: Гликлазид МВ препараты бигуанидиндермен, альфа-глюкозидаза тежегіштерімен немесе инсулинмен біріктіріп тағайындалуы мүмкін. Қандағы глюкоза деңгейі Гликлазид МВ препаратын қабылдаумен жеткіліксіз бақыланатын пациенттерге қатаң медициналық бақылаумен бір мезгілде инсулинмен емдеу тағайындалуы мүмкін. Пациенттердің ерекше топтары Егде жастағы пациенттер: Гликлазид МВ препараты 65 жасқа дейінгі пациенттерге бірдей дозада тағайындалады. Бүйрек функциясы бұзылған пациенттер Бүйрек функциясының жеңіл немесе орташа жеткіліксіздігі бар пациенттерге бүйрек функциясы қалыпты пациенттерге тағайындағандай медициналық бақылаумен бірдей дозаны тағайындауға болады. Мұндай ұсыныстар клиникалық зерттеулермен расталды. Гипогликемия даму қаупі бар пациенттер: - жеткіліксіз тамақтанғанда немесе дұрыс тамақтанбағанда, - ауыр немесе әлсіз компенсацияланған эндокриндік бұзылыстарда (гипопитуитаризм, гипотиреоз, адренокортикотропты гормонының жеткіліксіздігі); - мұның алдында ұзаққа созылған және/немесе жоғары дозалы кортикостероидтық емдеуді тоқтатқаннан кейін, - ауыр қантамырлық ауруларда (жүректің коронарлық ауруының ауыр түрінде, күретамыр өткізгіштігінің ауыр бұзылуларында, диффузиялы қантамырлық бұзылыстарда) Препаратты ең аз тәуліктік 30 мг дозадан бастап қабылдау ұсынылады. Балаларда қолдану Балалар мен жасөспірімдерде Гликлазид МВ препаратының тиімділігі мен қауіпсіздігі анықталмаған. Деректер жоқ. Енгізу әдісі мен жолы Ішке қабылдауға арналған. Таблеткаларды күніне бір рет таңертеңгі тамақтану кезінде қабылдаған жөн. Шайнамай, тұтастай жұтып қабылдау ұсынылады. Препаратты қабылдауды өткізіп алған жағдайда келесі күні дозаны арттыруға болмайды.

Препарат келесі жағдайларда қарсы көрсетілімді: - гликлазидке немесе қосымша заттардың біріне, сондай-ақ сульфонилмочевина тобының басқа препараттарына, сульфонамидтерге жоғары сезімталдық - 1-типті қант диабеті - диабеттік кетоацидоз, кома алдындағы жағдай және диабеттік кома - бүйрек немесе бауырдың ауыр жеткіліксіздігі: мұндай жағдайларда инсулин қолдану ұсынылады - миконазолмен емдеу - бала емізу - жүктілік кезеңі - 18 жасқа дейінгі балалар мен жасөспірімдер.

Гликлазидті қолдану кезінде мынадай жағымсыз әсерлер байқалған: Гликлазидті қолдану кезінде жиі кездесетін жағымсыз реакция – гипогликемия. Сульфонилмочевина тобының басқа препараттары сияқты, Гликлазид МВ тұрақты емес тамақтану жағдайында және әсіресе оны қабылдауды өткізіп алған жағдайда гипогликемияны туындатуы мүмкін. Гипогликемияның ықтимал симптодарына мыналар жатады: бас ауыру, қатты ашығу сезімі, жүрек айну, құсу, тез шаршау, ұйқының бұзылуы, қозу, озбырлық, зейін қоюдың әлсіреуі, жағдайды бағалау қабілетінің төмендеуі және баяуланған реакциялар, депрессия, сананың бұлыңғырлануы, көру және сөйлеу бұзылыстары, афазия, тремор, парездер, сезімталдықтың төмендеуі, бас айналу, дәрменсіздік сезімі, өзін-өзі бақылауды жоғалту, сандырақ, құрысулар, үстіртін дем, брадикардия, ұйқышылдық және есін жоғалту, бұл комамен және өліммен аяқталуы мүмкін. Сонымен қатар, терлеу, жабысқақ тері, үрей, тахикардия, жоғары қан қысымы, жүректің жиі соғуы, стенокардия және жүрек аритмиясы сияқты адренергиялық реттелудің бұзылу белгілері дамуы мүмкін. Әдетте бұл клиникалық көріністер көмірсулар (қант) қабылдағаннан кейін жоғалады. Ол кезде жасанды дәмдеуіштер тиімсіз болады. Сульфонилмочевина тобының басқа препараттарын қолдану тәжірибесі гипогликемияның қайталану мүмкіндігін, тіпті оны жою үшін қабылданған шаралар басында тиімді болып көрінген жағдайларда да көрсетеді. Гипогликемияның ауыр және ұзаққа созылған ұстамаларында, егер оны қант қабылдау арқылы уақытша жоюға болатын болса да, дәрігердің шұғыл көмегі немесе тіпті ауруханаға жатқызу қажет. Басқа жағымсыз әсерлер: - Асқазан-ішек бұзылыстары, соның ішінде іштің ауыруы, жүрек айну, құсу, диспепсия, диарея және іш қату: мұндай әсерлерді болдырмау немесе оларды азайту үшін таңғы ас кезінде гликлазид қабылдау керек. Келесі жағымсыз құбылыстар туралы сирек хабарланды: -Тері жабындары мен тері асты тіндері тарапынан бұзылулар: бөртпе, қышыну, есекжем, Квинке ісінуі, эритема, макуло-папулезді бөртпелер, буллезді реакциялар (Стивенс-Джонсон синдромы және уытты эпидермалық некролиз) және ерекше жағдайларда эозинофилиямен және жүйелі көріністермен байқалатын дәрілік бөртпе (DRESS-синдром). - Қан түзу және лимфа жүйесі тарапынан бұзылулар: гематологиялық өзгерістер сирек кездеседі. Оларға анемия, лейкопения, тромбоцитопения, гранулоцитопения жатады. Әдетте олар препаратты тоқтатқаннан кейін қайтымды болады. - Бауыр мен өтқалта тарапынан бұзылулар: бауыр ферменттерінің жоғары деңгейі (ACT, АЛТ, сілтілі фосфатаза), гепатит (жекелеген жағдайлар). Холестаздық сарғаю пайда болған жағдайда емдеуді тоқтатыңыз. Бұл клиникалық көріністер әдетте емдеуді тоқтатқаннан кейін кетеді. - Көру мүшесі тарапынан бұзылулар: қандағы глюкоза деңгейінің өзгеруіне байланысты, әсіресе емдеудің басында, өткінші көру бұзылыстары болуы мүмкін. - Осы фармакологиялық топқа байланысты әсерлер: Сульфонилмочевина тобының басқа препараттарын қолданғандағыдай, мынадай жағымсыз әсерлер байқалды: эритроцитопения, агранулоцитоз, гемолиздік анемия, панцитопения, аллергиялық васкулит, гипонатриемия, бауыр ферменттері деңгейінің жоғарылауы және тіпті бауыр функциясының бұзылуы (мысалы, холестаз және сарғаю) және сульфонилмочевина қабылдауды тоқтатқаннан кейін туындаған гепатит, кейбір жағдайларда өмірге қауіп төндіретін бауыр функциясының жеткіліксіздігін туындатты. Жағымсыз дәрілік реакциялар туындағанда медициналық қызметкерге, фармацевтикалық қызметкерге немесе, дәрілік препараттардың тиімсіздігі туралы хабарламаларды қоса, дәрілік препараттарға болатын жағымсыз реакциялар (әсерлер) жөніндегі ақпараттық деректер базасына тікелей хабарласу керек Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

Сульфонилмочевина тобының препараттарымен артық дозалану гипогликемияны туындатуы мүмкін. Орташа ауырлықтағы, есін жоғалтусыз немесе неврологиялық бұзылулардың белгілерінсіз гипогликемия симптомдарын көмірсулар қабылдау, дозаны түзету және/немесе тамақтануды өзгерту арқылы жою керек. Дәрігер пациентке ештеңе қауіп төндірмейтініне көз жеткізгенге дейін пациенттің жағдайын мұқият бақылау керек. Комамен, құрысумен немесе басқа неврологиялық бұзылулармен қатар жүретін ауыр гипогликемиялық эпизодтар болуы мүмкін, оларды шұғыл көмекті қажет ететін, пациентті дереу ауруханаға жатқыза отырып, қарастыру керек. Гипогликемиялық кома басталған кезде немесе оған күдік туындаған кезде пациент тез арада 50 мл глюкозаның концентрацияланған ерітіндісін (20-30% вена ішіне) енгізуі, содан кейін қандағы глюкоза концентрациясын 1 г/л-ден астам деңгейде ұстап тұруды қамтамасыз ететін жылдамдықпен глюкозаның неғұрлым сұйылтылған ерітіндісімен (10%) инфузияны жалғастыруы тиіс. Пациенттің жағдайын мұқият бақылау керек және ұстама аяқталғаннан кейін оның жағдайына байланысты дәрігер бақылауды жалғастыру немесе оны жою қажеттілігі туралы шешім қабылдайды. Диализ гликлазидті қан ақуыздарымен берік байланысуына байланысты пациенттің жағдайын жеңілдетпейді.

Гипогликемия Бұл емді тек кепілдендірілген тұрақты тамақтанатын (таңғы асты қоса) науқастарға тағайындау керек. Көмірсулардың жүйелі қабылдау маңыздылығы гипогликемияның даму қаупінің жоғарылауымен, тамақ ішудің кешіктірілуімен, оның жеткіліксіз мөлшерімен немесе көмірсулардың аздығымен байланысты. Гипогликемияның туындау қаупі төмен калориялы диета кезінде, ұзақ немесе шамадан тыс физикалық жүктеме жасағаннан, алкоголь ішкеннен кейін немесе бірнеше гипогликемиялық препараттарды біріктіріп қолданған жағдайда артады. Гипогликемия сульфонилмочевина тобының препараттарын қабылдағаннан кейін дамуы мүмкін. Кейде ол ауыр және ұзаққа созылады, науқасты ауруханаға жатқызуды және оған бірнеше күн бойы глюкозаны енгізуді талап етеді. Гипогликемиялық ұстамалар қаупін азайту үшін науқастарды мұқият таңдау, дозаны дұрыс таңдау және оны қабылдау бойынша нақты ұсыныстар қажет. Гипогликемияның даму қаупін арттыратын факторлар: - бас тарту немесе (әсіресе егде жастағы науқастарда) дәрігердің нұсқауларын орындай алмау, - жеткіліксіз немесе дұрыс тамақтанбау, дұрыс тамақтанбау немесе тамақтанбау, ашығу кезеңдері немесе тамақтанудың өзгеруі, - физикалық жүктемелер жасаудың және көмірсулар қабылдаудың теңгерімсіздігі, - бүйрек функциясының жеткіліксіздігі, - бауыр функциясының ауыр жеткіліксіздігі, - Гликлазид МВ препаратымен артық дозалану, - кейбір эндокриндік бұзылулар: қалқанша без функциясының бұзылуы, гипопитуитаризм және бүйрек үсті без функциясының жеткіліксіздігі, - кейбір басқа препараттарды бір мезгілде қабылдау. Бауыр немесе бүйрек функциясының жеткіліксіздігі: гликлазидтің фармакокинетикалық және/немесе фармакодинамикалық параметрлері бауыр функциясының немесе бүйрек функциясының ауыр жеткіліксіздігі бар пациенттерде өзгеруі мүмкін. Мұндай пациенттерде гипогликемия эпизодтары ұзағырақ болуы мүмкін, бұл тиісті шараларды қабылдауды талап етеді. Пациенттерді ақпараттандыру Науқастар мен олардың отбасы мүшелері гипогликемияның қауіптілігін түсіндіріп, оның белгілері, емдеу әдістері және осы асқынудың дамуына бейім факторлар туралы айтуы керек. Пациентке диетаны ұстанудың, тұрақты физикалық жүктеме жасаудың және қандағы глюкоза деңгейін үнемі бақылаудың маңыздылығы туралы хабарлау керек. Қандағы глюкоза деңгейін қанағаттанарлықсыз бақылау: диабетке қарсы ем қабылдайтын науқастың қандағы глюкозаны бақылау тиімділігі мынадай факторлардың әсерінен төмендеуі мүмкін: шайқурай препараттарын қабылдау (Hypericum perforatum), жоғары температура, жарақат, инфекция немесе хирургиялық араласу. Жекеленген жағдайларда инсулинді енгізу қажет болуы мүмкін. Көптеген науқастарда кез келген пероральді диабетке қарсы дәрінің, оның ішінде гликлазидтің гипогликемиялық тиімділігі уақыт өте келе төмендейді: бұл қант диабетінің өршуіне немесе препаратқа реакцияның әлсіреуіне байланысты болуы мүмкін. Бұл құбылыс ем әсерінің салдарлық болмауы ретінде белгілі, оның бастапқы болмауынан айырмашылығы, бірінші сызықтағы емдеу препаратын қолданудың басында. Әсердің салдарлық болмауы туралы қорытынды дозаны тиісті түзетуден кейін және пациент тамақтану режимін сақтаған кезде ғана жасалуы мүмкін. Қандағы глюкоза деңгейінің нормадан ауытқуы Фторхинолондарды қабылдайтын диабетпен ауыратын науқастарда, әсіресе егде пациенттерде қандағы глюкоза деңгейінің нормадан ауытқуы, оның ішінде гипогликемия және гипергликемия байқалды. Бір мезгілде Гликлазид МВ және фторхинолондар тобының препаратын қабылдайтын барлық пациенттерге қандағы глюкоза деңгейін мұқият бақылау ұсынылады. Зертханалық тестілер: қандағы глюкоза деңгейін бақылауды бағалау кезінде гликирленген гемоглобин (немесе ашқарынға веналық қан плазмасындағы глюкоза) деңгейін өлшеу ұсынылады. Қандағы глюкоза деңгейін өздігінен бақылау пайдалы болуы мүмкін. G6PD тапшылығы бар пациенттерге сульфонилмочевина тобының препараттарын тағайындау гемолиздік анемияны туындатуы мүмкін. Гликлазид сульфонилмочевина тобы препараттарының химиялық класына жататындықтан, оны G6PD тапшылығы бар пациенттерге тағайындағанда сақтықты таныту және басқа кластағы препаратпен баламалы емдеу мүмкіндігін қарастыру керек. Порфириямен ауыратын пациенттер Жедел порфирия жағдайлары порфириямен ауыратын науқастарда сульфонилмочевина тобының басқа препараттарымен сипатталды. Қосымша заттар Лактозаның тұқым қуалайтын жақпаушылығы, Лапп лактаза тапшылығы немесе глюкоза-галактоза нашар сіңірілуі сирек кездесетін проблемалары бар пациенттерге Гликлазид МВ тағайындауға болмайды. Арнайы ескертулер Педиатрияда қолдану Балалар мен жасөспірімдерде Гликлазид МВ препаратының тиімділігі мен қауіпсіздігі анықталмаған. Деректер жоқ. Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері Гликлазидтің автокөлік жүргізу және машина жабдықтарын пайдалану қабілетіне әсері жоқ немесе елеусіз. Алайда, науқастар гипогликемия симптомдарын ажырата білуі және көлік құралын немесе басқа механизмдерді басқару кезінде, әсіресе емнің бас кезінде сақтық таныту керек.

Жүктілік Жүкті әйелдерде гликлазидті қолдану туралы деректер шектеулі немесе жоқ (жүктіліктің 300 нәтижесінен аз), дегенмен сульфонилмочевина тобының басқа препараттары бойынша кейбір деректер бар. Жануарларға жүргізілген зерттеулерде гликлазид тератогенді әсер көрсеткен жоқ. Сақтық мақсатында жүктілік кезінде гликлазидті қолданудан аулақ болған жөн. Компенсацияланбаған диабетпен байланысты нормадан туа біткен ауытқулар қаупін азайту үшін жүкті болмастан бұрын диабетті бақылауға қол жеткізу керек. Пероральді гипогликемиялық препараттар қолданылмайды, жүктілік кезіндегі диабетті емдеудің бірінші желідегі препараты инсулин болып табылады. Бала біткенге дейін немесе жүктілік фактісі расталғаннан кейін бірден пероральді гипогликемиялық емнен инсулинге ауыстыру ұсынылады. Бала емізу Гликлазид пен оның метаболиттері сүтке бөлінетін-бөлінбейтіні әлі белгісіз. Жаңа туған нәрестелерде гипогликемия қаупін ескере отырып, бұл препаратты бала емізу кезінде қабылдауға болмайды. Жаңа туған нәрестелер мен емшектегі балалар үшін қауіпті жоққа шығаруға болмайды. Фертильділік Фертильділікке және репродуктивті функцияға әсері аталық және аналық егеуқұйрықтарда анықталмады.

Гипогликемияның даму қаупі келесі препараттардың әсерінен артады Қолдануға болмайтын біріктірілімдер: - миконазолмен (оны жүйелі енгізген кезде немесе ауыз қуысының шырышты қабатына гель түрінде жаққанда): гипогликемиялық әсері күшейеді, гипогликемия гипогликемиялық комаға дейін дамуы мүмкін. Қолдануға ұсынылмайтын біріктірілімдер: - фенилбутазонмен (жүйелі енгізу): сульфонилмочевина туындыларының гипогликемиялық әсерін күшейтеді (оларды плазма ақуыздарымен байланысынан ығыстырып шығарады және/немесе олардың организмнен шығарылуын баяулатады). Басқа қабынуға қарсы препаратты тағайындаған жөн, сондай-ақ пациентке ескерту жасап, оған қандағы глюкоза деңгейін өз бетінше бақылаудың маңыздылығын түсіндірген жөн. Қажет болған жағдайда қабынуға қарсы препаратпен емдеу кезінде және ол аяқталғаннан кейін дозаны түзету керек. - алкогольмен: алкоголь гипогликемиялық команы туындатуы мүмкін гипогликемиялық әсерді күшейтеді (компенсаторлық реакцияларды басу арқылы). Алкогольді пайдаланудан және құрамына спирт кіретін дәрілік препараттарды қабылдаудан бас тарту қажет. Сақтық танытуды қажет ететін біріктірілімдер: Гипогликемиялық әсердің күшеюі, сондықтан кейбір жағдайларда гипогликемия келесі препараттардың біреуін қабылдаған кезде мүмкін: диабетке қарсы басқа препараттар (инсулиндер, акарбоза, метформин, тиазолидиндиондар, дипептидилпепдидаза IV тежегіштері, ГПП-1 рецепторының агонистері), бета-блокаторлар, флуконазол, ангиотензин-өзгертуші фермент тежегіштері (каптоприл, эналаприл), Н2 рецепторларының антагонистері, МАОТ, сульфаниламидтер, кларитромицин және стероидты емес қабынуға қарсы препараттар. Келесі препараттар қандағы глюкоза деңгейін жоғарылатуы мүмкін Қолдануға ұсынылмайтын біріктірілімдер: - даназолмен: даназолдың диабетогендік әсері бар. Егер даназолды қолданудан бас тарту мүмкін болмаса, онда пациентке қандағы және несептегі глюкоза концентрациясын бақылаудың маңыздылығын түсіндіру және ескерту қажет. Кейде диабетке қарсы препараттың дозасын даназолмен емдеу кезінде және одан кейін түзету қажет. Сақтық танытуды қажет ететін біріктірілімдер: - хлорпромазинмен (нейролептик): жоғары дозада (күніне >100 мг хлорпромазин) қандағы глюкоза деңгейін жоғарылатады (инсулин секрециясының төмендеуі). Бұл туралы пациентті ескерту және оған глюкоза деңгейін өздігінен бақылаудың маңыздылығын түсіндіру қажет. Диабетке қарсы препараттың дозасын нейролептиктермен емдеу кезінде және одан кейін түзету қажет болуы мүмкін. - глюкокортикоидтармен (жүйелі және жергілікті қолдану: буын ішіне, тері астына немесе теріге, ректальді) және тетракозактринмен: бұл препараттар қандағы глюкоза деңгейін жоғарылатады және кетозды туындатуы мүмкін (глюкокортикоидтардың әсерінен көмірсуларға төзімділіктің төмендеуі). Пациентке бұл туралы ескерту және оған глюкоза деңгейін, әсіресе емнің басында өздігінен бақылаудың маңыздылығын түсіндіру қажет. Диабетке қарсы препараттың дозасын глюкокортикоидтармен емдегенде және одан кейін түзету қажет болуы мүмкін. - ритодринмен, сальбутамолмен, тербуталинмен: (в/і) Бета-2 агонистінің әсерінен қандағы глюкоза деңгейінің жоғарылауы. Қандағы глюкоза деңгейін өздігінен бақылаудың маңыздылығын атап өтіңіз. Қажет болса, пациентті инсулинге ауыстырыңыз. - шайқурай препараттарымен (Hypericum perforatum): Шайқурай (Hypericum perforatum) гликлазид концентрациясын төмендетеді. Қандағы глюкоза деңгейін өздігінен бақылаудың маңыздылығын атап өтіңіз. Келесі препараттар қандағы глюкоза деңгейінің нормадан ауытқуын туындатуы мүмкін: Сақтық танытуды қажет ететін біріктірілімдер: - фторхинолондармен: Гликлазид МВ фторхинолондармен бір мезгілде қолданған кезде пациентті қандағы глюкоза деңгейінің нормадан ауытқу мүмкіндігі туралы ескерткен және қандағы глюкоза деңгейін дербес бақылаудың маңыздылығын атап өткен жөн. Ескеруді қажет ететін біріктірілімдер: - антикоагулянттармен (мысалы, варфарин): Қатарлас ем кезінде сульфонилмочевина тобының препараттары антикоагулянттық әсерді жоғарылатуы мүмкін. Антикоагулянттық емді түзету қажет болуы мүмкін.

Сақтау мерзімі 2 жыл Жарамдылық мерзімі өткеннен кейін қолдануға болмайды. Сақтау шарттары Құрғақ, жарықтан қорғалған жерде 25 0С-ден аспайтын температурада сақтау керек. Балалардың қолы жетпейтін жерде сақтау керек!