Декскетопрофен-ЛФ раствор 50 мг/2 мл

Бір ампуланың ішінде белсенді зат – декскетопрофен (декскетопрофен трометамолы түрінде) 50.0 мг (73.8 мг); қосымша заттар: этанол, натрий хлориді, натрий гидроксидінің 1 М ерітіндісі, инъекцияға арналған су. Сыртқы түрінің, иісінің, дәмінің сипаттамасы Мөлдір түссіз ерітінді.

Препаратты пероральді қолдану мүмкіндігі болмаған жағдайларда, мысалы, операциядан кейінгі ауырсыну, бүйрек шаншуы және арқаның төменгі жағының (бел) ауырсынуы кезінде қарқындылығы орташа және жоғары дәрежелі жедел ауырсынуды симптоматикалық емдеу.

Қабынуға қарсы және ревматизмге қарсы препараттар. Қабынуға қарсы және ревматизмге қарсы, стероидты емес препараттар. Пропион қышқылы туындылары. Декскетопрофен. АТХ коды М01АЕ17 Фармакодинамикалық әсерлері Декскетопрофен трометамолы - қабынуға қарсы стероидты емес дәрі, анальгетикалық, ыстық түсіретін және қабынуға қарсы әсері бар. Әсер ету механизмі циклооксигеназаның 1 және 2 таңдамай тежеуімен және простагландиндер синтезінің төмендеуімен байланысты. Анальгетикалық әсер парентеральді енгізгенде 30 минуттан кейін дамиды, алғашқы 45 минут ішінде ең жоғары мәнге жетеді және 8 сағатқа созылады. Декскетопрофен трометамолы апиын қатарының анальгетиктерімен біріктірілген ем кезінде апиынға қажеттілікті едәуір (30-45% дейін) төмендетеді.

Дозалау режимі Ересектерге ұсынылатын доза: әр 8-12 сағат сайын 50 мг. Қажет болған жағдайда препаратты 6 сағаттық аралықпен қайталап енгізуге болады. Ең жоғары тәуліктік доза 150 мг құрайды. Декскетопрофен-ЛФ жедел ауыру синдромы кезеңінде қысқа мерзімді (2 күннен аспайтын) қолдануға арналған. Пациент одан әрі қарай пероральді анальгетиктерге ауыстырылуы мүмкін. Бұлшықет ішіне енгізу Бір ампуланың ішіндегісі (2 мл) бұлшықет ішіне терең баяу енгізіледі. Вена ішіне енгізу Қажет болған жағдайда бір ампуланың ішіндегісін (2 мл) ұзақтығы кемінде 15 с болатын вена ішіне баяу инъекция жолымен енгізуге болады. Вена ішіне инфузия Бір ампуланың ішіндегісін (2 мл) 30-100 мл 0.9 % натрий хлориді ерітіндісінде, декстроза (глюкоза) ерітіндісінде немесе Рингер (лактат) ерітіндісінде сұйылтады. Ерітінді асептикалық жағдайда дайындалуы және әрдайым күндізгі жарық әсерінен қорғалуы керек. Дайындалған ерітіндіні ұзақтығы 10-30 мин вена ішіне баяу инфузия жолымен енгізеді (дайындалған ерітінді мөлдір болуы тиіс). Пациенттердің ерекше топтары Егде жастағы пациенттер Егде жастағы пациенттер үшін дозаны түзету әдетте қажет етілмейді. Алайда, бүйрек функциясының физиологиялық төмендеуіне байланысты препараттың төменірек дозасы ұсынылады: егде жастағы пациенттерде бүйрек функциясының жеңіл бұзылуларында жалпы тәуліктік доза 50 мг. Бауыр функциясы бұзылған пациенттер Бауыр патологиясы жеңілден орташа ауырлық дәрежесіне дейінгі (Чайлд-Пью шкаласы бойынша 5-9 балл) пациенттер үшін тәуліктік жиынтық дозаны 50 мг-ға дейін қысқартып және бауыр функциясын мұқият бақылау керек. Декскетопрофен-ЛФ бауырдың ауыр дисфункциясы бар пациенттерге (Чайлд-Пью шкаласы бойынша 10-15 балл) қарсы көрсетілімде. Бүйрек функциясы бұзылған пациенттер Бүйрек функциясы жеңіл дәрежеде бұзылған пациенттер үшін (креатинин клиренсі 50-80 мл/мин) тәуліктік жиынтық дозаны 50 мг дейін қысқарту керек. Декскетопрофен-ЛФ препаратын бүйрек жеткіліксіздігі орташа және ауыр дәрежедегі пациенттерге (креатинин клиренсі<50 мл/мин) қолдануға болмайды. Балалар мен жасөспірімдер Балалар мен жасөспірімдердегі препараттың тиімділігі мен қауіпсіздігі зерттелмеген, сондықтан препаратты пациенттердің осы санатында қолдануға болмайды. Енгізу әдісі мен жолы Вена ішіне және бұлшықет ішіне енгізу үшін.

Декскетопрофен-ЛФ, вена ішіне және бұлшықет ішіне енгізуге арналған ерітінді, келесі жағдайларда қолдануға болмайды: - әсер етуші затқа, кез келген басқа ҚҚСД-ға немесе қосымша заттардың кез келгеніне жоғары сезімталдық кезінде; - егер ұқсас әсер ететін заттар (мысалы, ацетилсалицил қышқылы және басқа ҚҚСД) демікпе ұстамалары, бронх түйілуі, жедел ринит дамуына түрткі болса немесе мұрын полиптерінің дамуын, есекжем немесе ангионевроздық ісінудің пайда болуын тудырса; - егер кетопрофенмен немесе фибраттармен емдеу кезінде фотоаллергиялық немесе фотоуыттылық реакциялары дамыса; - анамнезінде алдыңғы ҚҚСД емімен байланысты асқазан-ішектен қан кету немесе тесілу болса; - белсенді фазадағы пептидтік ойық жарасы /асқазан-ішектен қан кетуі бар немесе анамнезінде асқазан-ішектен қан кету, ойық жаралану немесе перфорация бар пациенттерге; - созылмалы диспепсиямен ауыратын пациенттерге; - асқазан-ішектен қан кету, белсенді фазада басқа қан кету немесе қатты қанағыштық болса; - Крон ауруында немесе спецификалық емес ойық жаралы колитте; - ауыр жүрек жеткіліксіздігінде; - орташа немесе ауыр дәрежелі (креатинин клиренсі <59 мл/мин) бүйрек функциясы бұзылуында; - бауыр функциясының ауыр бұзылуында (Чайлд-Пью шкаласы бойынша 10-15 балл); - геморрагиялық диатез және қан ұюының басқа бұзылулары кезінде; - айқын дегидратация кезінде (құсу, диарея немесе сұйықтықты жеткіліксіз қабылдау нәтижесінде); - жүктіліктің үшінші триместрінде және бала емізу кезеңінде. Құрамындағы этанолға байланысты препарат нейроаксиальді (интратекальді немесе эпидуральді) енгізуге қарсы көрсетілімде.

Жағымсыз реакциялар пайда болу жиілігіне қарай былайша жіктеледі: Жиі — (≥1/100-ден < 1/10-ға дейін) Жиі емес — (≥1/1 000-нан < 1/100-ге дейін) Сирек — (≥1/10 000-нан < 1/1 000-ға дейін) Өте сирек — (< 1/10 000) Жиілігі белгісіз — (қолда бар деректер негізінде есептеу мүмкін емес) Жиі - жүрек айнуы - құсу - инъекция орнының ауыруы - инъекция орнындағы реакция, оның ішінде қабыну, гематома, қан кету Жиі емес - анемия - ұйқысыздық - бас ауыруы - бас айналу - ұйқышылдық - көздің бұлдырауы - артериялық гипотония - бет пен мойынның қызаруы - іштің ауыруы - диспепсия - диарея - іш қату - қан аралас құсу - ауыздың құрғауы - дерматит - қышыну - бөртпе - қатты терлеу - қызба - қажу - ауыру - қалтырау Сирек - көмейдің ісінуі - гипергликемия - гипогликемия - гипертриглицеридемия - анорексия - парестезиялар - естен тану - құлақтың шыңылдауы - экстрасистолия - тахикардия - артериялық гипертензия - беткейлік веналардың тромбофлебиті - брадипноэ - ойық жара ауруы - қан кету немесе тесілу. - гепатит - сарғаю - есекжем - безеу - бұлшықеттің сіресуі - буын қозғалысының шектелуі - бұлшықет құрысулары - арқаның ауыруы - бүйректің жедел жеткіліксіздігі - полиурия - бүйрек шаншуы - кетонурия - протеинурия; - етеккір оралымының бұзылуы - қуықасты безі функциясының бұзылуы - діріл - шеткері ісінулер Өте сирек - нейтропения - тромбоцитопения - анафилаксиялық реакциялар, оның ішінде анафилаксиялық шок. - бронх түйілуі - ентігу - панкреатит - гепатоцеллюлярлық патология - Стивенс-Джонсон синдромы - уытты эпидермалық некролиз (Лайелл синдромы) - ангионевроздық ісіну - беттің ісінуі - фотосенсибилизация. - нефрит - нефроздық синдром Белгісіз (қолда бар мәліметтер негізінде бағалау мүмкін емес) - бауыр сынамаларының ауытқулары - Коунис синдромы деп аталатын әлеуетті ауыр аллергиялық реакцияның белгісі болуы мүмкін кеудедегі ауырсыну - бекітілген есірткі бөртпе Көбінесе АІЖ тарапынан жағымсыз әсерлер байқалады. Кейде өліммен аяқталатын ойық жара ауруы, тесілу немесе асқазан-ішектен қан кету, әсіресе егде жастағы пациенттерде дамуы мүмкін. Қолда бар деректер бойынша, препаратты қолдану аясында жүрек айну, құсу, диарея, метеоризм, іш қату, диспепсиялық құбылыстар, іштің ауыруы, мелена, қан аралас құсу, ойықжаралы стоматит, колиттің өршуі және Крон ауруы туындауы мүмкін. Гастрит сирек анықталады. Ісіну, АГ және жүрек жеткіліксіздігі де анықталды. Басқа ҚҚСД қолдану жағдайындағы сияқты, келесі жағымсыз реакциялар болуы мүмкін: асептикалық менингит, ол жүйелі қызылжегі немесе дәнекер тінінің аралас аурулары бар пациенттерде және қан тарапынан реакциялар (пурпура, гипопластикалық және гемолиздік анемия, сирек агранулоцитоз және сүйек кемігінің гипоплазиясы) бар пациенттерде туындайды. Буллезді реакциялар, оның ішінде Стивенс-Джонсон синдромы және уытты эпидермалық некролиз (өте сирек) болуы мүмкін. Жағымсыз дәрілік реакциялар туындаған кезде медицина қызметкеріне, фармацевтика қызметкеріне немесе дәрілік препараттардың тиімсіздігі туралы хабарламаларды қоса алғанда, дәрілік препараттарға күтілетін реакциялар (әсерлер) бойынша тікелей ақпараттық дерекқорға жүгіну керек Қазақстан Республикасы Денсаулық сақтау министрлігі Медициналық және фармацевтикалық бақылау комитетінің «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

Симптомдары: жүрек айнуы, анорексия, абдоминальді ауыру, бас ауыруы, бас айналу, бағдардан жаңылу, ұйқысыздық. Емі: симптоматикалық ем; қажет болғанда: асқазанды шаю, диализ.

Сақтықпен: анамнезінде аллергиялық реакциялар бар пациенттерге қолдануда. Декскетопрофенді басқа ҚҚСД-мен, оның ішінде циклооксигеназа-2 селективті тежегіштерімен бір мезгілде қолданудан аулақ болу керек. Жағымсыз қолайсыз әсерлерді ауыру синдромын басуға қажетті ең аз ұзақтықта пайдаланып, дәрілік затты ең аз тиімді дозамен қолданған кезде барынша азайтуға болады. Асқазан-ішек жолы тарапынан бұзылулар Кейбір жағдайларда өліммен аяқталуы мүмкін асқазан-ішектен қан кету, ойық жаралану немесе тесілу, алдын алу симптомдарының болуына немесе АІЖ тарапынан анамнезде елеулі патологияның болуына қарамастан, емдеудің әртүрлі сатыларында барлық ҚҚСД қабылдаған кезде байқалады. Декскетопрофен-ЛФ дәрілік затын қабылдау аясында асқазан-ішектен қан кету дамыған жағдайда оны қабылдауды тоқтату керек. Асқазан-ішектен қан кетудің, ойық жараның пайда болуының немесе тесілуінің туындау қаупі анамнезінде ойық жарасы бар пациенттерде, әсіресе қан кету немесе тесілу түріндегі асқынулармен, сондай-ақ егде жастағы пациенттерде ҚҚСД дозасын ұлғайтқан кезде артады, сондықтан пациенттердің осы санатын емдеуді ең аз ұсынылған дозадан бастаған жөн. Эзофагит, гастрит және/немесе анамнезінде ойық жара ауруы бар пациенттер декскетопрофенді қолданар алдында, басқа ҚҚСД қабылдаған жағдайдағыдай, бұл аурулардың ремиссия кезеңінде екендігіне көз жеткізу керек. Ас қорыту жолы патологиясының айқын симптомдары бар және анамнезінде ас қорыту жолы аурулары бар пациенттерде дәрілік затты қабылдау кезінде әсіресе асқазан-ішек қан кетулеріне қатысты ықтимал бұзылуларды анықтау мақсатында ас қорыту жолының жай-күйін бақылау қажет. Декскетопрофен-ЛФ дәрілік затын анамнезінде асқазан-ішек аурулары (ойық жаралы колит, Крон ауруы) бар пациенттерде сақтықпен қолдану керек, өйткені бұл аурулардың өршуі мүмкін. Жоғарыда аталған санаттағы пациенттерге, сондай-ақ ацетилсалицил қышқылының төмен дозаларын немесе АІЖ тарапынан асқынулардың туындау қаупін арттыратын басқа дәрілерді бір мезгілде қолдануды талап ететін пациенттерге қосымша гастропротекторларды (мизопростол немесе протон помпасының блокаторлары) бір мезгілде қолдану ұсынылады. Дәрілік затты антиагреганттарды (мысалы, ацетилсалицил қышқылы) немесе антикоагулянттарды (мысалы, варфарин), кортикостероидтарды, серотонинді кері қармаудың селективті тежегіштерін бір мезгілде қабылдайтын пациенттерге сақтықпен тағайындау керек, өйткені асқазан-ішектен қан кетудің немесе ойық жараның пайда болу қаупі артады. Бүйрек жеткіліксіздігі Бүйрек функциясы бұзылған пациенттерге дәрілік затты сақтықпен тағайындау керек, өйткені ҚҚСД қабылдау аясында бүйрек функциясының нашарлауы, организмде сұйықтықтың іркілуі және ісіну болуы мүмкін. Диуретиктерді бір мезгілде қолданатын пациенттерде және нефроуыттылық қаупінің жоғарылауына байланысты гиповолемияның дамуы мүмкін пациенттерде дәрілік затты қолдану кезінде сақ болу керек. Емдеу кезінде организмде сусыздануды болдырмау үшін жеткілікті сұйықтық алуы керек, бұл бүйрекке уытты әсердің күшеюіне әкелуі мүмкін. Басқа ҚҚСД сияқты, Декскетопрофен-ЛФ дәрілік заты қан плазмасындағы креатинин мен азот концентрациясының жоғарылауына әкелуі мүмкін. Простагландин синтезінің басқа тежегіштері сияқты, Декскетопрофен-ЛФ дәрілік заты несеп шығару жүйесіне жағымсыз әсер етуі мүмкін, бұл гломерулонефриттің, интерстициальді нефриттің, папиллярлық некроздың, нефроздық синдромның және жедел бүйрек жеткіліксіздігінің дамуына әкелуі мүмкін. Бүйрек функциясының бұзылуының ең көп саны егде жастағы пациенттерде кездеседі. Бауыр жеткіліксіздігі Бауыр функциясы бұзылған пациенттерге сақ болу керек. Басқа ҚҚСД қолдану кезіндегідей, Декскетопрофен-ЛФ дәрілік затымен емдеу аясында "бауыр" ферменттері белсенділігінің аздап өтпелі жоғарылауы байқалуы мүмкін. Егде жастағы пациенттерде бауыр мен бүйрек функциясын бақылау қажет. Тиісті көрсеткіштер айтарлықтай жоғарылаған жағдайда Декскетопрофен-ЛФ дәрілік затын қолдануды тоқтату керек. Жүрек-қантамыр жүйесі және ми қан айналымы тарапынан бұзылулар Дәрілік зат организмде сұйықтықтың іркілуін тудыруы мүмкін, сондықтан артериялық гипертензиясы бар, анамнезінде ауырлығы жеңілден орташаға дейінгі бүйрек және/немесе жүрек жеткіліксіздігі бар пациенттерде Декскетопрофен-ЛФ дәрілік затын өте сақтықпен қолдану керек. Жай-күйі нашарлаған жағдайда Декскетопрофен-ЛФ дәрілік затын қолдануды тоқтату қажет. Бақыланбайтын артериялық гипертензиясы, жүректің ишемиялық ауруы, іркілісті жүрек жеткіліксіздігі, шеткері артериялардың аурулары және/немесе цереброваскулярлық аурулары бар пациенттерде дәрілік затты сақтықпен қолдану керек. Осындай тәсіл жүрек-қан тамырлары ауруларының (артериялық гипертензия, гиперлипидемия, қант диабеті, шылым шегу) даму қаупі факторлары бар пациенттерге де қолданылады. Декскетопрофен-ЛФ дәрілік затын анамнезінде жүрек-қан тамырлары аурулары бар пациенттерге, әсіресе болжамды үдеу қаупіне байланысты жүрек жеткіліксіздігі бар пациенттерге тағайындағанда сақ болу қажет. Селективті емес ҚҚСД тромбоциттер агрегациясын төмендетуге және простагландиндер синтезін тежеу есебінен қан кету уақытын ұлғайтуға ықпалды. Сондықтан гемостазға әсер ететін дәрілік заттарды, мысалы, варфарин немесе басқа кумариндер немесе гепариндерді қабылдайтын пациенттерге декскетопрофенді тағайындау ұсынылмайды. Дәрілік заттардың жүрек-қан тамыр жүйесінің функциясына әсер етуіне егде жастағы пациенттер ерекше бейім. Декскетопрофенмен емделген пациенттерде Коунис синдромының жағдайлары тіркелген. Коунис синдромы миокард инфарктісіне әкелуі мүмкін коронарлық артериялардың тарылуымен байланысты аллергиялық немесе аса сезімталдық реакциясынан туындаған жүрек-қан тамырлары симптомдары ретінде анықталады. Декскетопрофенді қолдану кезінде осы препаратқа аллергиялық реакция белгілері, оның ішінде тыныс алудың қиындығы, бет пен мойынның ісінуі (ангионевротикалық ісіну), кеуденің ауыруы байқалды. Декскетопрофен-ЛФ препаратын қабылдауды дереу тоқтатыңыз және егер сіз осы белгілердің бірін байқасаңыз, дереу дәрігерге немесе шұғыл медициналық қызметке барыңыз. Тері тарапынан реакциялар ҚҚСД қолдану кезінде тері реакцияларының сирек жағдайларының (эксфолиативтік дерматит, Стивенс-Джонсон синдромы, уытты эпидермалық некролиз сияқты) туындағаны туралы деректер бар. Тері бөртпесінің алғашқы көріністерінде, шырышты қабықтардың зақымдануында немесе аллергиялық реакцияның басқа белгілерінде ДЕКС дәрілік затын қабылдауды дереу тоқтатып, дәрігермен кеңесу керек. Басқа ақпарат Дәрілік затты порфирин метаболизмінің туа біткен бұзылуы бар пациенттерге, сусыздануы бар пациенттерге, сондай-ақ тікелей елеулі хирургиялық араласудан кейін тағайындау кезінде сақ болу қажет. Декскетопрофенді ұзақ уақыт қолданған жағдайда бауыр мен бүйрек функцияларын үнемі бақылап отыру керек. Өте сирек жағдайларда аса жоғары сезімталдықтың ауыр реакцияларының дамуы мүмкін (мысалы, анафилаксиялық шок). Декскетопрофен-ЛФ дәрілік затын қабылдағаннан кейін ауыр аллергиялық реакцияның алғашқы белгілері кезінде емдеу тоқтатылуы тиіс. Жеке-дара жағдайларда желшешек аясында тері мен жұмсақ тіндердің тарапынан ауыр инфекциялық асқынулардың дамуы мүмкін. Бүгінгі таңда ҚҚСД-нің осындай инфекциялық асқынулардың дамуымен өзара байланысының ықтималдығын толығымен жоққа шығару мүмкін емес. Сондықтан, желшешекте Декскетопрофен-ЛФ дәрілік затын қолданудан аулақ болу керек. Декскетопрофен-ЛФ дәрілік затын қан түзілуі бұзылуы, жүйелі қызыл жегі және дәнекер тіннің аралас аурулары бар пациенттерге сақтықпен қолдану керек. Басқа ҚҚСД сияқты, декскетопрофен инфекциялық аурулардың симптомдарын бүркемелеуі мүмкін. Препараттың әр ампуласында 200 мг этанол бар, ол 5 мл сыраға немесе 2.08 шарапқа сәйкес келеді. Препарат алкоголизммен ауыратын адамдарға теріс әсер етуі мүмкін. Препаратты жүктілік және лактация кезеңінде, балалар мен қауіп тобындағы, мысалы, бауыр аурулары кезінде, сондай-ақ эпилепсиямен ауыратын пациенттерге тағайындау кезінде этанолдың құрамын ескеру керек. Арнайы ескертулер Дәрілік зат дозасында 1 ммольден (23 мг) аз мөлшерде натрий бар, яғни "натрий жоқ" деп санауға болады. Педиатрияда қолдану Балалар мен жасөспірімдердегі препараттың тиімділігі мен қауіпсіздігі зерттелмеген, сондықтан препаратты пациенттердің осы санатында қолдануға болмайды. Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері Көлік құралдарын басқару және механизмдермен жұмыс істеу кезінде (бас айналу және ұйқышылдық даму қаупі) сақ болу қажет.

Препаратты жүктіліктің үшінші триместрінде және лактация кезеңінде қолдануға болмайды. Жүктілік Простагландиндер синтезін бәсеңдету жүктіліктің ағымына және/немесе ұрық және шарананың дамуына жағымсыз әсер етуі мүмкін. Эпидемиологиялық зерттеулердің нәтижелеріне сәйкес жүктіліктің ерте кезеңдерінде простагландиндердің синтезін басатын препараттарды қолдану түсік тастау, шаранада жүрек ақауы мен алдыңғы іш қабырғасының болмауы даму қаупін арттырады. Сонымен, жүрек-қантамыр жүйесі ауытқулары дамуының абсолютті қаупі <1%-дан шамамен 1,5%-ға дейін өсті. Дозаның жоғарылауымен және қолдану ұзақтығымен қауіп артады деп саналады. Жануарларда простагландиндер синтезінің тежегішін қолдану имплантацияға дейінгі және постимплантациялық шығындар қаупінің жоғарылауына және эмбриофеталдық өлім артуына ықпал етті. Бұдан басқа, органогенез кезеңінде простагландиндер синтезінің тежегіштерін алған жануарларда ұрықта даму ақауларының, оның ішінде жүрек-қантамыр жүйесінің ауытқуларының пайда болу жиілігі артты. Дегенмен, декскетопрофен трометамолын зертханалық жануарларға зерттеуде репродукция ағзаларына қатысты уыттылық белгілері анықталған жоқ. Жүктіліктің соңғы үш айында Декскетопрофен-ЛФ препаратын қабылдамаңыз, себебі бұл туылмаған нәрестеге зиянын тигізуі немесе босану кезінде қиындықтар тудыруы мүмкін. Бұл туатын нәрестеде бүйрек және жүрек ауруларын тудыруы мүмкін. Ана мен баланың қан кетуге бейімділікке әсер етуі және мерзімінен асып кеткен жүктіліктің (кешіктірілген босану) немесе созылып кеткен (ұзақ) босанудың себебі болуы мүмкін. Жүктіліктің алғашқы 6 айында, өте қажет болған және дәрігердің ұсынысымен жағдайларды қоспағанда, Декскетопрофен-ЛФ қабылдауға болмайды. Егер осы уақыт кезеңінде Декскетопрофен-ЛФ қабылдау қажет болса немесе пациент жүкті болуды жоспарлап жүрсе, ең аз дозаны ең аз қысқа мерзімде қолдану керек. Жүктіліктің 20-шы аптасынан бастап Декскетопрофен-ЛФ препаратын бірнеше күннен артық қолдану туылмаған нәрестеде бүйрек ауруларын тудыруы, бұл шарананы қоршап тұрған қағанақ суының мөлшерінің төмендеуіне (су аздық) әкелуі мүмкін. Егер бірнеше күннен артық емдеу қажет болса, дәрігер қосымша мониторинг ұсынуы мүмкін. Лактация Декскетопрофеннің ана сүтіне өтуі туралы мәліметтер жоқ. Фертильділік Барлық ҚҚСП сияқты, декскетопрофен трометамолы әйелдің фертильділігін төмендетуі мүмкін, сондықтан оны жүктілікті жоспарлап жүрген әйелдерге тағайындау ұсынылмайды. Бала көтере алмай жүрген немесе бедеулікке байланысты тексеруден өтетін әйелдерде декскетопрофен трометамолын тоқтату мүмкіндігін қарастыру керек.

Декскетопрофен-ЛФ препаратын бір шприцте допамин, прометазин, пентозицин, петидин гидроксизин ерітіндісімен араластыруға болмайды (шөгінді пайда болады). Декскетопрофен-ЛФ препаратын бір шприцте гепарин, лидокаин, морфин және теофиллин ерітіндісімен араластыруға болады. Декскетопрофен-ЛФ – инфузия үшін дайындалған ерітіндіні прометазинмен немесе пентазоцинмен араластыруға болмайды. Декскетопрофен-ЛФ – инфузия үшін дайындалған ерітіндісі келесі инъекцияға арналған: допамин, гепарин, гидроксизин, лидокаин, морфин, петидин және теофиллин ерітінділерімен үйлесімді. Декскетопрофен-ЛФ препаратын – инфузия үшін дайындалған ерітінділерді пластик контейнерлерде сақтағанда немесе этилвинилацетаттан, пропионат целлюлозасынан, тығыздығы төмен полиэтиленнен немесе поливинилхлоридтен жасалған инфузиялық жүйелерді қолданғанда, аталған материалдармен әсер етуші заттың сіңірілуі болмайды. Төмендегі өзара әрекеттесулер барлық ҚҚСД тән: Қолайсыз біріктірілімдер Жоғары дозалардағы салицилаттарды қоса алғанда, басқа ҚҚСД-мен (тәулігіне 3 г-дан астам), оның ішінде циклооксигеназа-2 (ЦОГ-2) селективті тежегіштері: синергиялық әсер салдарынан бірнеше ҚҚСД бір мезгілде қолдану асқазан-ішектен қан кетулер мен ойық жаралардың пайда болу қаупін арттырады. Пероральді антикоагулянттармен, профилактикалық дозадан асатын гепаринмен және тиклопидинмен: тромбоциттер агрегациясының тежелуіне және асқазан-ішек жолы шырышты қабығының зақымдалуына байланысты қан кету қаупінің жоғарылауы. Литий препараттарымен: ҚҚСД қандағы литий концентрациясын уыттыға дейін арттырады, осыған байланысты тағайындағанда, дозаны өзгерту кезінде және ҚҚСД тоқтатылғаннан кейін бұл көрсеткішті бақылап отыру қажет. Метотрексатпен жоғары дозаларда (15 мг/апта және одан астам): ҚҚСД емі аясында оның бүйрек клиренсінің төмендеуіне байланысты метотрексаттың гематологиялық уыттылығының жоғарылауы. Гидантоиндермен және сульфаниламидті препараттармен: осы препараттардың уытты әсерінің арту қаупі. Сақтықты қажет ететін біріктірілімдер Диуретиктермен, ангиотензин өзгертуші фермент тежегіштерімен, ангиотензин II рецепторларының антагонистерімен, бактерияға қарсы препараттармен (аминогликозидтер): ҚҚСД емі жедел бүйрек жеткіліксіздігінің даму қаупімен байланысты сусызданған пациенттерде (простагландиндер синтезінің төмендеуіне байланысты гломерулярлық сүзудің төмендеуі). ҚҚСД кейбір препараттардың гипертензияға қарсы әсерін азайтуы мүмкін. Диуретиктермен бір мезгілде тағайындаған кезде пациенттің су-электролиттік теңгерімінің барабар екендігіне көз жеткізу және ҚҚСД тағайындар алдында бүйрек функциясын бақылау қажет. Метотрексатпен төмен дозаларда (аптасына 15 мг кем): ҚҚСД емдеу аясында бүйрек клиренсінің төмендеуіне байланысты метотрексаттың гематологиялық уыттылығының жоғарылауы. Бір мезгілде емнің алғашқы апталарында қан жасушаларын апта сайын есептеуді жүргізу қажет. Бүйрек функциясының тіпті жеңіл дәрежедегі бұзылуында, сондай-ақ егде жастағы пациенттерде мұқият медициналық бақылау қажет. Пентоксифиллинмен: қан кету қаупінің жоғарылауы. Қарқынды клиникалық бақылау және қан кету уақытын (қанның ұю уақытын) жиі бақылау қажет. Зидовудинмен: ҚҚСД тағайындалғаннан кейін бір аптадан соң ауыр анемияның дамуымен, ретикулоциттерге әсер етумен шартталған эритроциттерге уытты әсерінің арту қаупі. ҚҚСД емі басталғаннан кейін 1-2 аптадан соң барлық қан жасушалары мен ретикулоциттерді есептеу қажет. Ішуге арналған гипогликемиялық препараттармен: ҚҚСД қан плазмасы ақуыздарымен байланысатын жерлерден ығыстыруы салдарынан осы препараттардың гипогликемиялық әсерін күшейтуі мүмкін. Гепариндермен (төмен молекулалық): қан кету дамуы қаупінің жоғарылауы. Кортикостероидтармен: ойық жара және АІЖ қан кету дамуы қаупінің жоғарылауы Антиагреганттармен және серотонинді кері қармау селективті тежегіштерімен: АІЖ қан кету қаупінің жоғарылауы. Ескеру қажет біріктірілімдер Бета-блокаторлармен: ҚҚСД бета-адреноблокаторлардың гипертензияға қарсы әсерін төмендетуі мүмкін, бұл простагландиндер синтезінің тежелуіне байланысты. Циклоспорин мен такролимуспен: ҚҚСД нефроуыттылықты арттыруы мүмкін, бұл ренальді простагландиндердің әсерінен болады. Бір мезгілде ем жүргізу кезінде бүйрек функциясын бақылау қажет. Тромболитиктермен: қан кету қаупі дамуының жоғарылауы. Пробенецидпен: қан плазмасындағы ҚҚСД концентрациясы жоғарылауы мүмкін, бұл бүйрек тубулярлық секрециясына және/немесе глюкурон қышқылымен конъюгацияға тежейтін әсерге байланысты болуы мүмкін, бұл ҚҚСД дозасын түзетуді талап етеді. Жүрек гликозидтерімен: ҚҚСД қан плазмасындағы гликозидтер концентрациясының жоғарылауына әкелуі мүмкін. Мифепристонмен: простагландиндер синтезі тежегіштерінің әсерінен мифепристон тиімділігінің өзгеру қаупі болуы мүмкін болғандықтан, ҚҚСД мифепристонды тоқтатылғаннан кейін 8-12 күннен ерте тағайындауға болмайды. Хинолонмен: жануарларға эксперименттік зерттеулерде алынған деректер жоғары дозаларда хинолонмен емдеу аясында ҚҚСД тағайындау кезінде конвульсиялардың даму қаупінің жоғары екендігін көрсетеді.

Сақтау мерзімі 4 жыл. Жарамдылық мерзімі өткеннен кейін қолдануға болмайды! Сақтау шарттары Жарықтан қорғалған жерде, 25 °С-ден аспайтын температурада сақтау керек Инфузия үшін дайындалған ерітіндіні жарықтан қорғалған жерде 2°- 8 °С температурада 24 сағат бойы сақтайды. Дайындалған ерітінді мөлдір және түссіз болуы тиіс. Балалардың қолы жетпейтін жерде сақтау керек!