Дилакса® капсулы 100 мг

Бір капсуланың құрамында белсенді зат – целекоксиб 100 мг немесе 200 мг, қосымша заттар: лактоза моногидраты, натрий лаурилсульфаты, повидон, натрий кроскармеллозасы, магний стеараты, капсула қабығының құрамы: титанның қостотығы (Е171), желатин (100 мг доза үшін), капсула қабығының құрамы: титанның қостотығы (Е171), желатин, темірдің сары тотығы (Е172) (200 мг доза үшін). Сыртқы түрінің, иісінің, дәмінің сипаттамасы Ақ түсті корпусы және қақпақшасы бар №3 өлшемді капсулалар. Капсула ішіндегісі – ақ немесе ақ дерлік түсті түйіршіктелген ұнтақ (100 мг доза үшін). Қоңыр-сары түсті корпусы және қақпақшасы бар №1 өлшемді капсулалар. Капсула ішіндегісі – ақ немесе ақ дерлік түсті түйіршіктелген ұнтақ (200 мг доза үшін).

• остеоартрит пен ревматоидты артритті симптоматикалық емдеуде • шорбуынданатын спондилит симптомдарын басуда ЦОГ-2 селективті тежегішін тағайындау туралы шешімді әрбір пациент үшін жалпы қауіптерді бағалау негізінде қабылдау қажет.

Әсер ету механизмі Целекоксиб қабынуға қарсы, ауыруды басатын және ыстық түсіретін әсерге ие, негізінен циклооксигеназа-2 (ЦОГ-2) тежелуі есебінен қабыну простагландиндерінің (Pg) түзілуін бөгейді. ЦОГ-2 индукциясы қабынуға жауап ретінде жүреді және простагландиндердің, әсіресе простагландин Е 2 синтезі мен жиналуына әкеледі, бұл кезде қабыну көріністерінің күшеюі (ісіну және ауырсыну) орын алады. Емдік дозаларда целекоксиб циклооксигеназа-1 (ЦОГ-1) айтарлықтай тежемейді және ЦОГ-1 белсендіру нәтижесінде синтезделетін простагландиндерге әсер етпейді, сондай-ақ ЦОГ-1-мен байланысты және тіндерде, ең алдымен асқазан, ішек тіндерінде және тромбоциттерде болатын қалыпты физиологиялық процестерге әсер етпейді. Фармакодинамикалық әсерлері Бүйрек функциясына әсері Целекоксиб PGE2 және 6-кето-PgF1 (простациклин метаболиті) несеппен шығарылуын төмендетеді, бірақ сарысулық тромбоксан В2-ге және 11-дегидро - тромбоксан В2-ге, тромбоксан метаболитіне (екеуі де - ЦОГ-1 өнімдері) әсер етпейді. Целекоксиб егде жастағы пациенттерде және созылмалы бүйрек жеткіліксіздігі бар адамдарда шумақтық сүзілу жылдамдығын төмендетпейді, натрийдің шығарылуын транзиторлы төмендетеді. Артриті бар пациенттерде шеткері ісінулердің, артериялық гипертензияның және жүрек жеткіліксіздігінің байқалатын даму жиілігі ЦОГ-1 және ЦОГ-2 қатысты тежейтін белсенділігі бар селективті емес ЦОГ тежегіштерін қабылдау аясында осындай жиілікпен салыстыруға болады.

Дозалау режимі Жүрек-қантамыр ауруларының (ЖҚА) даму қаупі целекоксибтің дозасына және қабылдау ұзақтығына байланысты артуы мүмкін болғандықтан, оны барынша қысқа курстарда және ең төмен тиімді тәуліктік дозаларда қолдану керек. Пациенттің, әсіресе остеоартритпен ауыратын пациенттерде ауру симптомдары мен емге реакциясын азайту қажеттілігін мезгіл-мезгіл бағалау қажет. Остеоартрит Әдеттегі ұсынылатын тәуліктік доза күніне бір рет немесе екі рет 200 мг құрайды. Кейбір пациенттерде симптомдар айқындылығының жеткіліксіз төмендеуі жағдайында дозаны күніне екі рет 200 мг-ға дейін арттыру препараттың тиімділігін арттыруы мүмкін. Емдеудің екі аптасынан кейін емдік әсерінің жоғарылауы болмаған кезде басқа да ықтимал емдеу әдістерін қарастыру қажет. Ревматоидты артрит Бастапқы ұсынылатын тәуліктік доза екі дозада 200 мг құрайды. Қажет болса, қабылдауды күніне екі рет 200 мг-ға дейін арттыруға болады. Емдеудің екі аптасынан кейін емдік әсерінің жоғарылауы болмаған кезде басқа да ықтимал емдеу әдістерін қарастыру қажет. Шорбуынданатын спондилит (Бехтерев ауруы) Ұсынылатын тәуліктік доза күніне бір рет немесе екі рет 200 мг құрайды. Кейбір пациенттерде симптомдар айқындылығының жеткіліксіз төмендеуі жағдайында дозаны күніне бір рет 400 мг-ға дейін арттыру немесе екі қабылдауға бөлу препараттың тиімділігін арттыруы мүмкін. Емдеудің екі аптасынан кейін емдік әсерінің жоғарылауы болмаған кезде басқа да ықтимал емдеу әдістерін қарастыру қажет. Барлық көрсетілімдер үшін ұзақ қабылдау кезінде ұсынылатын ең жоғары тәуліктік доза - 400 мг. Пациенттердің ерекше топтары Балалар Целекоксиб балалар мен 18 жасқа дейінгі жасөспірімдерде қолдануға көрсетілмеген. Егде жастағы пациенттер (>65 жас) Анағұрлым жастау ересектердегідей, бастапқы ұсынылатын доза күніне 200 мг құрайды. Содан кейін, қажет болса, оны күніне екі рет 200 мг-ға дейін арттыруға болады. Препаратты дене салмағы 50 кг-нан кем егде жастағы пациенттерге сақтықпен қабылдау керек. Бауыр жеткіліксіздігі бар пациенттер Сарысуда 25-35 г/л альбумин бар ауырлығы орташа дәрежедегі бауыр жеткіліксіздігі диагнозы қойылған пациенттерге емдеуді ұсынылған дозаның жартысынан бастаған жөн. Қолдану тәжірибесі бауыр циррозы бар пациенттермен шектеледі. Бүйрек жеткіліксіздігі бар пациенттер Целекоксибті орташа және қалыпты дәрежелі бүйрек жеткіліксіздігіне шалдыққан пациенттерде қолдану тәжірибесі шектеулі, сондықтан мұндай пациенттерге препаратты сақтықпен қолдану керек. CYP2C9 метаболизмінің төмендеуі Целекоксибті генотиптеуге немесе алдыңғы анамнезге/басқа CYP2C9 субстраттарын қолдану тәжірибесіне байланысты CYP2C9 белсенділігі белгілі немесе күтілетін төмендеген пациенттерде сақтықпен қолдану керек, өйткені дозаға тәуелді жағымсыз әсерлердің даму қаупі артады. Мұндай пациенттерде дозаны ең төмен ұсынылған дозаның жартысына дейін төмендету қарастырылады. Енгізу әдісі мен жолы Ішке қабылдауға арналған. Капсулаларды су іше отырып, тұтастай жұту керек. Дилакса® препаратын тамақтануға қарамастан қолдануға болады. Дәрілік препараттың бір немесе бірнеше дозасын өткізіп алған кездегі қажетті шаралар Егер сіз препаратты қабылдауды өткізіп алған болсаңыз, онда дозаны есіңізге түскеннен кейін қабылдау керек. Өткізіп алған дозаны толықтыру үшін қосарлы дозаны қабылдауға болмайды. Дәрілік препаратты қолдану тәсілін түсіндіру үшін медицина қызметкерінің кеңесіне жүгіну бойынша ұсынымдар Осы дәрілік препаратты қолдану бойынша қосымша сұрақтар туындаған жағдайда дәрігерге немесе фармацевтке жүгіну керек.

- целекоксибке немесе қосымша заттардың кез келгеніне аса жоғары сезімталдық • сульфонамидтерге белгілі жоғары сезімталдық • өршу сатысындағы пептидтік ойық жара немесе асқазан-ішектен қан кету • ЦОГ-2 басқа тежегіштерін қоса, бронх демікпесі, жедел ринит, мұрын полипозы, ангионевроздық ісіну, есекжем немесе ацетилсалицил қышқылын (аспирин) немесе қабынуға қарсы стероидты емес препараттарды (ҚҚСП) қабылдағаннан кейінгі басқа аллергиялық реакциялар • жүктілік және лактация кезеңі • бауырдың ауыр жеткіліксіздігі (сарысудағы альбумин <25 г/л немесе Чайлд-Пью шкаласы бойынша > 10) • бүйрек жеткіліксіздігі (креатинин клиренсі < 30 мл/мин) • ішектің қабыну аурулары • созылмалы жүрек жеткіліксіздігі (NYHA II-IV дең.) • клиникалық расталған жүректің ишемиялық ауруы, шеткергі артериялардың аурулары және цереброваскулярлық аурулар • балалар мен 18 жасқа дейінгі жасөспірімдер • тұқым қуалайтын галактоза көтере алмаушылығы, Lapp (ЛАПП)-лактаза ферментінің тапшылығы, глюкоза-галактоза мальабсорбциясы

Өте жиі • артериялық гипертензия Жиі • синусит, жоғарғы тыныс алу жолдарының инфекциялары, несеп шығару жолдарының инфекциялары • аллергиялық реакциялардың өршуі • ұйқысыздық • бас айналу, гипертензия • миокард инфарктісі • фарингит, ринит, жөтел, диспноэ • іштің ауыруы, диарея, диспепсия, метеоризм, құсу, дисфагия • бөртпе, қышыну (жайылған қышынуды қоса) • тұмауға ұқсас симптомдар, шеткері ісіну / организмде сұйықтықтың іркілуі • артралгия • травматизм (кездейсоқ жарақат) Жиі емес • анемия • гиперкалиемия • мазасыздық, депрессия, шаршау • парестезия, ұйқышылдық, церебральді инфаркт • көрудің бұлыңғырлануы, конъюнктивит • құлақтағы шу, гипоакузия • жүрек жеткіліксіздігі, жүректің жиі соғуы, тахикардия, • артериялық гипертензия ағымының ауырлауы • бронх түйілуі • іш қату, кекіру, гастрит, стоматит, асқазан-ішек жолдарының қабыну ауруларының өршуі • бауыр функциясының бұзылуы, АЛТ және АСТ деңгейінің жоғарылауы • есекжем, экхимоздар • аяқтағы құрысулар • қандағы креатинин, мочевина азоты деңгейінің жоғарылауы • беттің ісінуі, кеуде қуысының ауыруы Сирек • лейкопения, тромбоцитопения • сананың шатасуы, елестеулер • атаксия, дәмнің өзгеруі • көзге қан құйылу • аритмия • өкпе эмболиясы, ысыну • пневмониттер • асқазан-ішек жолы ағзаларына қан құйылу, асқазанның және он екі елі ішектің ойық жарасы, өңештің, жіңішке және жуан ішектің ойық жарасы, ішектің тесілуі, эзофагиттер, мелена, панкреатиттер, колиттер • гепатиттер • ангионевроздық ісіну, алопеция, фотосезімталдық • бүйректің жедел жеткіліксіздігі • етеккір оралымының бұзылуы Өте сирек • панцитопения • анафилаксиялық шок, анафилактоидты реакциялар • бассүйекішілік қан кетулер (өліммен аяқталған бассүйекішілік қан кетулерді қоса), асептикалық менингит, эпилепсия (асқынуды қоса алғанда), агевзия (дәм сезудің бұзылуы), аносмия (иіс сезудің бұзылуы) • ретинальді артериялар мен веналардың окклюзиясы • васкулиттер • бауыр жеткіліксіздігі (кейде өліммен аяқталатын немесе бауыр трансплантациясын қажет ететін), фульминантты гепатит (кейде өліммен аяқталатын), бауыр некрозы, холестаз, холестаздық гепатит, сарғаю • эксфолиативтік дерматит, мультиформалық эритема, Стивенс-Джонсон синдромы, уытты эпидермальді некролиз, эозинофилиямен және жүйелі симптомдармен дәрілік реакция (DRESS), жедел жайылған экзантематозды пустулез (AGEP), буллездік дерматит • миозит • тубулоинтерстициальді нефрит, нефроздық синдром, ең аз өзгерістерімен гломерулонефрит Белгісіз (қолда бар деректер негізінде бағалау мүмкін емес) • әйелдер бедеулігі (әйелдер фертильділігінің төмендеуі) Жағымсыз дәрілік реакциялар туындаған кезде медицина қызметкеріне, фармацевтика қызметкеріне немесе дәрілік препараттардың тиімсіздігі туралы хабарламаларды қоса алғанда, дәрілік препараттарға жағымсыз реакциялар (әсерлер) бойынша тікелей ақпараттық деректер базасына хабарласу керек Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

Симптомдары: әлсіздік, ұйқышылдық, жүрек айнуы, құсу, әдетте өтетін эпигастрий тұсының ауырсынуы. Асқазан-ішектен қан кету туындауы мүмкін, сондай-ақ артериялық қысымның жоғарылауы, бүйректің жедел жеткіліксіздігі, тыныс алу жеткіліксіздігі және кома өте сирек туындауы мүмкін. Емі: артық дозалануға күдік туған жағдайда құстырту, белсендірілген көмірді тағайындау және тиісті демеуші ем жүргізуді қамтамасыз ету қажет. Диализ препаратты ақуызбен байланысудың жоғары дәрежесіне байланысты қаннан препараттың шығарылуының тиімді әдісі болып табылмайды.

Асқазан-ішек жолына әсері Целекоксиб қабылдаған пациенттерде асқазан-ішек жолының жоғарғы бөлімдерінің зақымдану жағдайлары (тесілу, ойық жара немесе қан кету) байқалды, кейбіреулері өліммен аяқталған жағдайға әкеп соқты. Препаратты ҚҚСП қабылдайтын пациенттерде сақтықпен қолдану ұсынылады, өйткені олардың асқазан-ішек жолы тарапынан асқынулардың даму қаупі жоғары: бұл егде жастағы пациенттер, басқа ҚҚСП немесе ацетилсалицил қышқылын бір мезгілде қолданатындар немесе асқазан-ішек жолының аурулары, мысалы, асқазан-ішек жолдарынан ойық жаралар мен қан кетулер. Целекоксибті ацетилсалицил қышқылымен (тіпті төмен дозаларда) бір мезгілде қолданғанда асқазан-ішек жолы тарапынан целекоксибтің жағымсыз әсерлерінің пайда болу қаупінің одан әрі жоғарылауы байқалады (асқазан-ішек жолында ойық жаралардың пайда болуы немесе асқазан-ішек жолы тарапынан басқа асқынулар). ЦОГ-2 + ацетилсалицил қышқылы селективті тежегіштерін қолдану қауіпсіздігінде ҚҚСП + ацетилсалицил қышқылымен салыстырғанда АІЖ қатысты елеулі айырмашылық анықталған жоқ. ҚҚСП-мен бір мезгілде қолдану Бір мезгілде целекоксиб пен аспирин емес ҚҚСП қолдануға болмайды. Жүрек-қантамыр жүйесіне әсері Күніне екі рет 200 мг дозада целекоксиб және күніне екі рет 400 мг қабылдаған спорадиялық аденоматозды полиптері бар пациенттерде ауыр жүрек-қантамыр оқиғалар, негізінен миокард инфарктісі санының ұлғаюы байқалды. Целекоксибтің дозасы мен қабылдау ұзақтығына байланысты жүрек - қантамыр ауруларының даму қаупі артуы мүмкін болғандықтан, емнің ең қысқа курстарын және ең аз тиімді тәуліктік дозаларды тағайындау керек. Пациенттің, әсіресе остеоартритпен ауыратын пациенттерде симптомдар мен емге реакциялардың көрінісін азайту қажеттілігін мезгіл-мезгіл бағалау керек. Жүрек-қантамыр асқынуларының (мысалы, артериялық гипертензия, гиперлипидемия, қант диабеті, шылым шегу) даму қаупінің елеулі факторлары бар пациенттерді мұқият тексеруден кейін ғана целекоксибпен емдеу қажет. ЦОГ-2 селективті тежегіштері жүрек-қантамыр тромбоэмболиялық ауруларының профилактикасы кезінде ацетилсалицил қышқылын алмастырмайды, себебі олардың антиагрегантты қасиеті жоқ. Сондықтан антиагрегантты емді тоқтатуға болмайды. Сұйықтықтың іркілуі және ісіну Простагландиндер синтезін тежейтін басқа препараттарды қабылдағандағы сияқты, целекоксиб қабылдайтын пациенттерде де организмде сұйықтықтың іркілуі және ісіну байқалуы мүмкін. Сондықтан целекоксиб анамнезінде жүрек жеткіліксіздігі, сол жақ қарыншаның дисфункциясы немесе артериялық гипертензиясы бар пациенттерге, сондай-ақ кез келген басқа этиологиясы бар ісінген пациенттерге сақтықпен қолданған жөн, өйткені простагландиндердің тежелуі бүйрек функциясының бұзылуына және организмдегі сұйықтықтың іркілуіне әкелуі мүмкін. Диуретиктермен емдеудегі немесе гиповолемияның даму қаупі тобындағы пациенттерге сақтықпен қабылдау қажет. Артериялық гипертензия Барлық ҚҚСП сияқты, целекоксиб жаңа артериялық гипертензияның дамуына немесе алдыңғы артериялық гипертензияның нашарлауына әкелуі мүмкін, олардың кез келгені жүрек-қантамыр асқынуларының туындау жиілігінің артуына ықпал етуі мүмкін. Сондықтан целекоксибпен емнің басында және емдеу курсы бойы артериялық қысымды үнемі бақылау керек. Бауыр мен бүйрек функциясына әсері Бүйрек немесе бауыр функциясының бұзылуы, әсіресе жүрек функциясының бұзылуы көбінесе егде жастағы пациенттерде байқалды, сондықтан олар үнемі медициналық бақылауда болуы керек. Целекоксибті қоса алғанда, ҚҚСП бүйрекке уытты әсер етуі мүмкін. Целекоксиб бүйрекке басқа салыстыру препараттары - ҚҚСП сияқты әсер еткені атап өтілді. Бүйрек функциясы бұзылған, жүрек жеткіліксіздігі, бауыр дисфункциясы бар пациенттер, диуретиктерді, АӨФ тежегіштерін, ангиотензин II рецепторларының антагонистерін қабылдағандар және егде жастағы пациенттер бүйрек уыттылығының даму қаупі жоғары топқа жатады. Целекоксиб қолданған кезде мұндай пациенттердің жай-күйін үнемі бақылап отыру керек. Целекоксибті қолдану кезінде фульминатты гепатитті (өліммен аяқталатын кейбір жағдайлар), бауыр некрозын және бауыр жеткіліксіздігін (өліммен аяқталатын кейбір жағдайлар немесе бауыр трансплантациясын қажет ететін жағдайлар) қоса, бауырдың ауыр реакцияларының кейбір жағдайлары туралы хабарланды. Бұрын хабарланған жағдайлардың арасында бауыр тарапынан ауыр жағымсыз реакциялардың көпшілігі целекоксиб препаратын қолдану басталғаннан кейін бір ай ішінде дамыды. Егер емдеу кезінде пациентте жоғарыда көрсетілген органдардың кез келген жүйесінің функциясы бұзылса, тиісті шаралар қабылдау және целекоксибпен емдеуді тоқтату мүмкіндігін қарастыру керек. CYP2D6 тежегіштері Целекоксиб CYP2D6 тежейді. CYP2D6 көмегімен метаболизденетін препараттардың дозасын төмендету қажет болуы мүмкін, дегенмен целекоксиб осы ферменттің күшті тежегіші болып табылмайды. CYP2C9 метаболизмінің деңгейі төмендеген пациенттер («нашар метаболизаторлар») CYP2C9 метаболизмінің деңгейі төмендеген пациенттерге целекоксибті сақтықпен тағайындау керек. Аса жоғары сезімталдықтың тері және жүйелік реакциялары Тері тарапынан елеулі реакциялар туралы сирек хабарламалар бар, олардың кейбіреулері эксфолиативті дерматитті, Стивенс-Джонсон синдромын және уытты эпидермальді некролизді қоса алғанда, өліммен аяқталған. Пациенттер емдеу курсының басында осы реакциялардың даму қаупі жоғары топта болады (мұндай реакциялардың пайда болуы көп жағдайда емнің бірінші айында байқалды). Целекоксиб қабылдаған пациенттерде аса жоғары сезімталдықтың елеулі реакцияларының (анафилаксиялық шокты, ангионевроздық ісінуді және эозинофилиямен және жүйелік симптомдармен (DRESS немесе аса жоғары сезімталдық синдромы) дәрі-дәрмектік бөртпені қоса алғанда)) дамуы туралы хабарланды. Сульфонамидтерге аллергиясы бар немесе кез келген басқа препаратқа аллергиялық реакциясы бар пациенттерде тері тарапынан елеулі жағымсыз реакциялардың немесе аса жоғары сезімталдық реакцияларының даму қаупі жоғары. Терідегі, шырышты қабықтардағы бөртпелердің алғашқы көріністерінде немесе аса жоғары сезімталдықтың басқа реакцияларында целекоксиб қолдануды тоқтату керек. Жалпы Целекоксиб қызбаны және қабынудың басқа белгілерін бүркемелеуі мүмкін. Пероральді антикоагулянттармен қолдану Варфаринмен бір мезгілде қолданған кезде пациенттерде елеулі қан кету жағдайлары тіркелген, олардың кейбіреулері өліммен аяқталған. Протромбин уақытының (INR) бір мезгілде емдеумен артқаны туралы хабарланды. Осыған байланысты варфарин/кумарин үлгісіндегі пероральді антикоагулянттарды алатын пациенттерді, әсіресе целекоксибпен емнің басында немесе целекоксиб дозасының өзгеруінде мұқият бақылау керек. ҚҚСП-мен антикоагулянттарды бір мезгілде қабылдау қан кету қаупін арттыруы мүмкін. Целекоксибті варфаринмен немесе басқа да пероральді антикоагулянттармен, соның ішінде жаңа антикоагулянттармен (мысалы, апиксабан, дабигатран және ривароксабан) біріктірген кезде сақ болу керек. Арнайы ескертулер Педиатрияда қолдану Целекоксиб балалар мен 18 жасқа дейінгі жасөспірімдерде қолдануға көрсетілмеген. Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері Бас айналуы, вертиго немесе ұйқышылдығы бар Дилакса® препаратын қабылдайтын пациенттер механизмдерді жүргізуден немесе басқарудан бас тартуы тиіс.

Жүктілік Жануарларға (егеуқұйрықтар мен қояндарға) жүргізілген зерттеулер даму кемістіктерін қоса, репродуктивтік уыттылықты көрсетті. Простагландин синтезін тежеу жүктіліктің барысына теріс әсер етуі мүмкін. Эпидемиологиялық зерттеулердің деректері жүктіліктің ерте кезеңдерінде простагландиндер синтезі тежегіштерін қолданғаннан кейін өздігінен түскен түсік қаупінің жоғарылағанын көрсетеді. Жүктілік кезінде адам үшін ықтимал қауіп белгісіз, бірақ оны жоққа шығаруға болмайды. Целекоксиб, простагландиндер синтезін тежейтін басқа дәрілік заттар сияқты, жатыр тонусының төмендеуіне және соңғы триместрде артериялық түтікшенің мерзімінен бұрын бітелуіне әкеп соғуы мүмкін. Жүктіліктің екінші немесе үшінші триместрінде ҚҚСП, соның ішінде целекоксиб, шаранада бүйрек функциясының бұзылуына әкелуі мүмкін, бұл амниондық сұйықтық көлемінің төмендеуіне немесе ауыр жағдайларда қағанақ суының аздығына әкеп соғуы мүмкін. Мұндай әсерлер емдеу басталғаннан кейін көп ұзамай пайда болуы мүмкін және әдетте қайтымды болады. Целекоксиб жүктілік кезінде және жүкті болуы мүмкін әйелдерге қарсы көрсетілімді. Егер емдеу кезінде әйел жүкті болса, целекоксиб қабылдауды тоқтату керек. Бала емізу Целекоксиб плазмадағы осыларға ұқсас концентрацияларда лактацияланатын егеуқұйрықтардың сүтімен бөлінеді. Целекоксибті емізетін әйелдердің шектеулі санына қолдану целекоксибтің емшек сүтіне енуінің өте төмен деңгейін көрсетті. Целекоксиб қабылдаған әйелдерге емшекпен емізбеген жөн. Фертильділігі Әсер ету механизміне сүйене отырып, ҚҚСП қолдану, соның ішінде целекоксиб, кейбір әйелдерде қайтымды бедеулікпен байланысты аналық без фолликулдарының жарылуын кешіктіруі немесе болдырмауы мүмкін. Қосымша заттар Дилакса® препаратының құрамында лактоза мен натрий бар. Дилакса® құрамында лактоза бар. Тұқым қуалайтын галактоза көтере алмаушылығы, Lapp (ЛАПП)-лактаза ферментінің тапшылығы, глюкоза-галактоза мальабсорбциясы бар пациенттер осы препаратты қабылдамауы тиіс. Препараттың құрамында бір таблеткаға 1 ммольден аз (23 мг) натрий бар, яғни құрамында натрий жоқ.

Фармакодинамикалық өзара әрекеттесуі Антикоагулянттар Варфарин немесе басқа антикоагулянттар алатын пациенттерде целекоксиб қолданудың алғашқы күндері ішінде немесе оның дозасы өзгерген кезде антикоагулянттық белсенділікті бақылау өте маңызды, өйткені пациенттердің бұл санаты қан кетудің жоғары қаупіне ұшырайды. Сондықтан антикоагулянттарды ішке қабылдайтын пациенттерге протромбин уақытын және халықаралық қалыптасқан қатынасты (ХҚҚ), атап айтқанда целекоксиб қолданудың алғашқы күндері ішінде немесе оның дозасы өзгерген кезде мұқият бақылау керек. Бір мезгілде целекоксиб пен варфаринді қабылдайтын егде жастағы пациенттерде протромбин уақытының ұлғаюымен байланысты қан кету жағдайлары туралы хабарланды, кейбіреулері өліммен аяқталды. Гипотензивті препараттар ҚҚСП диуретиктер мен гипотензивті препараттардың әсерін төмендетуі мүмкін. Целекоксибті қоса алғанда, ҚҚСП-ның АӨФ тежегіштерімен немесе ангиотензин II рецепторының антагонистерімен біріктірілімін қолдану кезінде бүйрек функциясы бұзылған кейбір пациенттерде (мысалы, дегидратациясы бар пациенттерде, диуретиктер алатын пациенттерде немесе егде жастағы пациенттерде) бүйрек жеткіліксіздігінің, әдетте қайтымды даму қаупі артады. Сондықтан мұндай біріктірілімдегі препараттарды, әсіресе егде жастағы пациенттерде сақтықпен қолдану керек. Пациенттер талапқа сай гидратация алуы тиіс, сондай-ақ біріктірілген емді қолдануды бастағаннан кейін бүйрек функциясын мұқият бақылап, мезгіл-мезгіл қайталап бақылау жүргізу керек. Лизиноприл көмегімен бақыланатын І және ІІ сатыдағы артериялық гипертензиясы бар пациенттерде целекоксибті күніне 2 рет 200 мг дозада қолдану 24 сағаттық амбулаториялық артериялық қысым мониторингі ішінде плацебомен салыстырғанда диастолалық немесе систолалық артериялық қысымның орташа тәуліктік көрсеткішінің клиникалық мәнді жоғарылауына әкелмеді. Циклоспорин және такролимус ҚҚСП мен циклоспоринді немесе такролимусты бір мезгілде қолдану циклоспорин мен такролимустың нефроуытты әсерін күшейтетіні белгілі. Целекоксибті және жоғарыда аталған препараттардың кез келгенін біріктіріп емдегенде бүйрек функциясын бақылау қажет. Ацетилсалицил қышқылы Целекоксибті ацетилсалицил қышқылының төмен дозаларымен қолдануға болады, бірақ ол жүрек-қантамыр ауруларының профилактикасында оны алмастырмайды. Ұсынылған зерттеулерде, басқа ҚҚСП қолдану кезіндегідей, целекоксиб монотерапиясымен салыстырғанда целекоксибті және ацетилсалицил қышқылының төмен дозаларын бір мезгілде қолдану кезінде асқазан-ішек жолы тарапынан ойық жаралардың немесе басқа асқынулардың пайда болу қаупінің жоғарылығы байқалды. Фармакокинетикалық өзара әрекеттесу Целекоксибтің басқа препараттарға әсері CYP2D6 тежегіштері Целекоксиб CYP2D6 тежегіші болып табылатындықтан, целекоксиб қолдану барысында CYP2D6 декстрометорфан субстратының плазмалық концентрациясы 136% - ға артты. Целекоксиб пен осы ферменттің субстраты болып табылатын препараттарды бір мезгілде қолданғанда олардың плазмалық концентрациясы жоғарылауы мүмкін. CYP2D6 арқылы метаболизденетін препараттардың мысалдары антидепрессанттар (трициклді және SSRI), антипсихотиктер, аритмияға қарсы дәрілер және т. б. Целекоксибті қолданудың басында, оның дозасын арттырған кезде немесе емдеуді тоқтатқан кезде жеке таңдалатын CYP2D6 субстраттарының дозасын төмендету қажет болуы мүмкін. CYP2C19 тежегіштері Целекоксиб CYP2C19 катализделген метаболизмін тежей алатындығы анықталды. Диазепам, циталопрам және имипрамин CYP2C19 арқылы метаболизденетін препараттардың мысалдары болып табылады. Пероральді контрацептивтер Целекоксиб пероральді контрацептивтердің фармакокинетикасына клиникалық маңызды әсер еткен жоқ (1 мг норэтистерон/35 микрограмм этинилэстрадиол). Глибенкламид / толбутамид Целекоксиб толбутамидтің (CYP2C9 субстратының) немесе глибенкламидтің фармакокинетикасына клиникалық маңызды әсер етпейді. Метотрексат Ревматоидты артриті бар пациенттерде целекоксиб метотрексаттың (ревматизмдік ауруларды емдеуге арналған дозада) фармакокинетикасына (плазмалық және бүйрек клиренсіне) статистикалық маңызды әсерін көрсеткен жоқ. Алайда, оларды біріктіріп қолданған кезде метотрексатты қолданумен байланысты уыттылыққа тиісті мониторинг жүргізген жөн. Литий препараттары Күніне 2 рет 200 мг дозада целекоксибті және күніне 2 рет 450 мг дозада литий препараттарын бір мезгілде қолдану литийдің Cmax мәнін орта есеппен 16% - ға, ал AUC мәнін 18% - ға арттыруға әкелді. Сондықтан, целекоксибпен емнің басында немесе оны тоқтатқан кезде литий препараттарын қабылдайтын пациенттердің жағдайына тұрақты бақылау қажет. Басқа препараттардың целекоксибке әсері CYP2C9 метаболизмі төмен пациенттер («нашар метаболизаторлар») CYP2C9 метаболизмінің төмен деңгейі және целекоксибтің жүйелік экспозициясының жоғарылауы бар пациенттерде CYP2C9 тежегіштерін бір мезгілде қолдану целекоксиб экспозициясының одан әрі жоғарылауына әкелуі мүмкін. CYP2C9 метаболизмінің деңгейі төмен пациенттерде осындай біріктірілімдерді қолдануға болмайды. CYP2C9 индукторлары мен тежегіштері Целекоксиб негізінен CYP2C9 көмегімен метаболизденетіндіктен, флуконазол қолданатын пациенттерге ұсынылған дозаның жартысын тағайындау керек. Тәулігіне бір рет күшті әсер ететін CYP2C9 тежегіші коелекоксиб пен флуконазолдың 200 мг бір реттік дозасын бір мезгілде қолдану коелекоксибтің C max мәнінің орташа 60% — ға, ал AUC мәні - 130% - ға артуына алып келді. Рифампицин, карбамазепин және барбитураттар сияқты CYP2C9 индукторларын бір мезгілде қолдану целекоксибтің плазмалық концентрациясын төмендетуі мүмкін. Кетоконазол және антацидті препараттар Кетоконазолдың немесе антацидті дәрілердің целекоксиб фармакокинетикасына әсері байқалған жоқ.

Сақтау мерзімі 3 жыл. Жарамдылық мерзімі өткеннен кейін қолдануға болмайды! Сақтау шарттары 25 °С-ден аспайтын температурада сақтау керек. Балалардың қолы жетпейтін жерде сақтау керек!