Дутабит Плюс капсулы 0.5 мг/0.4 мг

Әр капсуланың құрамында: белсенді заттар: 0.500 мг дутастерид, 0.400 мг тамсулозин гидрохлориді; қосымша заттар: глицерин монокаприлокапраты, I типі, бутилгидрокситолуол (Е 321), желатин, 160 блюм, глицерин, титанның қостотығы (Е 171), темірдің сары тотығы (Е 172), 30 % метакрил қышқылы және этилакрилат сополимерінің қоспасы (1:1), микрокристалды целлюлоза (тазалығы 101), тальк, триацетин, кальций стеараты, гипромеллоза, каррагинан, калий хлориді, титанның қостотығы (Е 171), күн батар түстес сары (FCF) (FD&C сары №6) (Е 110), темірдің қызыл тотығы (Е 172), темірдің қара тотығы (Е 172), шеллак (Е 904), калий гидроксиді. Сыртқы түрінің, иісінің, дәмінің сипаттамасы Қара сиямен «0.5/0.4» жазуы басылған мөлдір емес қоңыр корпусты, құрамында бір жұмсақ желатинді дутастерид капсуласы және ақтан ақ дерлік түске дейінгі тамсулозин гидрохлориді түйіршіктері бар және мөлдір емес қызғылт сары қақпағы бар, қара сиямен «DTT» жазуы басылған, өлшемі «00» қатты целлюлоза капсулалары.

- қуық асты безінің қатерсіз гиперплазиясының (ҚБҚГ) орташа және ауыр симптомдарын емдеу - ҚБҚГ орташа және ауыр симптомдары бар пациенттерде жедел несеп іркілісі (ЖНІ) және хирургиялық араласу қаупінің төмендеуі

ATX коды G04CA52 Әсер ету механизмі Дутастерид-тамсулозин препараты екі дәрілік заттың біріктірілімі түрінде болады: дутастерид – 5 α-редуктазаның қосарлы тежегіші және тамсулозин гидрохлориді – α1a және α1d-адренорецепторлар антагонисі. Аталған дәрілердің комплементтік әсер ету механизмдері бар, соның нәтижесінде симптомдардың және несеп шығару жылдамдығының тез жақсаруы, жедел несеп іркілісі (ЖНІ) қаупінің және ҚБҚГ себебімен хирургиялық операция жасау қажеттілігінің төмендеуі болады. Дутастерид тестостеронның дигидротестостеронға (ДГT) айналуына жауап беретін 1 және 2 типті альфа-редуктазаның 5 изоферментін тежейді. ДГT – көбінесе қуық асты безінің өсуіне және ҚБҚГ дамуына жауап беретін андроген. Тамсулозин көбінесе қуық асты безі стромасының тегіс бұлшықеттерінде және қуық мойнағында α1a және α1d-адренорецепторлар белсенділігін бәсеңдетеді. Қуық асты безіндегі α1- рецепторлардың 75% жуығы α1a қосалқы типіне жатады. Фармакодинамикалық әсерлер Дутастеридті тамсулозинмен бір мезгілде қабылдау Төменде берілген деректер дутастид пен тамсулозинді бір мезгілде қабылдау туралы қолда бар ақпаратты көрсетеді. Дутастерид 0.5 мг/тәулік (n = 1623), тамсулозин 0.4 мг/тәулік (n = 1611) немесе 0.5 мг дутастеридке қоса 0.4 мг тамсулозинді (n = 1610) бірге қабылдау қуық асты безінің көлемі ≥ 30 мл және 1.5-10 нг/мл диапазонындағы ПСA мәні бар пациенттер арасында ҚБҚГ орташа және ауыр симптомдары бар ерлерде бағаланды. Қуық асты безінің көлемі ≥ 30 мл және 1.5-10 нг/мл диапазонындағы ПСA мәні бар ҚБҚГ орташа және ауыр симптомдары бар ерлердің қатысуымен қатар топтарда жүргізілген 4 жылдық көп орталықтық, көп ұлтты, рандомизацияланған, салыстырмалы жасырын зерттеуде 0.5 мг/тәулік дозада дутастеридті (n = 1623), 0.4 мг/тәулік дозада тамсулозинді (n = 1611) қолдану немесе 0.5 мг дутастеридке қоса 0.4 мг тамсулозинді (n = 1610) бір мезгілде қабылдау бағаланды. Пациенттердің 53% жуығы бұрын 5-альфа-редуктаза тежегішінің немесе альфа-адренорецепторлар антагонисінің әсеріне ұшыраған. Алғашқы 2 жыл емделу кезіндегі тиімділікті бастапқы соңғы нүктесі – өмір сапасы туралы қосымша сауалнамамен AUA-SI негізіндегі 8 тармақтан тұратын құрал – Қуық асты безі ауруы симптомдарының халықаралық шкаласы (IPSS) бойынша өзгеру болды. Тиімділіктің екінші соңғы нүктелері 2 жыл өткен соң бағаланды және несеп ағынының ең жоғары жылдамдығын (Qmax) және қуық асты безінің көлемін қамтыды. Біріктірілімді қабылдаған топтағы IPSS нәтижелері дутастерид тобымен салыстырғанда 3 айдан бастап және тамсулозин тобымен салыстырғанда 9 айдан бастап айтарлықтай көрсеткішке жетті. Біріктірілімді қабылдаған топтағы Qmax нәтижелері, дутастерид пен тамсулозин топтарымен салыстырғанда, 6 айдан бастап айтарлықтай көрсеткішке жетті. Дутастерид пен тамсулозин біріктірілімі осы компоненттердің әрқайсысын бөлек қолдануға қарағанда, симптомдарды тиімдірек жеңілдетеді. 2 жыл емделуден кейін біріктірілген ем тобында бастапқы мәнінен -6.2 балл құраған симптомдар шкаласы бойынша статистикалық маңызды түзетілген орташа жақсару байқалды. Бастапқы деңгеймен салыстырғанда, несеп шығару жылдамдығының түзетілген орташа жақсаруы біріктірілген ем тобында 24 мл/сек; дутастерид тобында 1.9 мл/сек, ал тамсулозин тобында 0.9 мл/сек құрады. Бастапқы деңгеймен салыстырғанда, ҚБҚГ әсер ету индексінің (BII) түзетілген орташа жақсаруы біріктірілген ем тобында 2.1 балл; дутастерид тобында -1.7 балл, ал тамсулозин тобында -1.5 балл құрады. Несеп шығару жылдамдығының және ҚБҚГ әсер ету индексінің байқалатын жақсаруы, монотерапияның екі тобымен де салыстырғанда, біріктірілген ем тобында статистикалық маңызды болды. 2 жыл емделуден кейін қуық асты безінің жалпы көлемінің және ауыспалы аймақ көлемінің төмендеуі біріктірілген ем тобында, тамсулозин монотерапиясымен салыстырғанда, статистикалық маңызды болды. 4 жылдық емдеуден кейінгі тиімділіктің бастапқы соңғы нүктесі ЖНІ немесе ҚБҚГ-мен байланысты хирургиялық операцияның алғашқы жағдайының дамуына дейінгі уақыт болды. 4 жылдық емдеуден кейін біріктірілген ем, тамсулозин монотерапиясымен салыстырғанда, ЖНІ немесе ҚБҚГ-мен байланысты хирургиялық операциялар қаупін едәуір төмендетті (қаупінің 65.8% төмендеуі, p < 0,001 [95% CА 54.7% - 74.1%]). 4 жыл ішінде ЖHІ немесе ҚБҚГ-мен байланысты хирургиялық операциялар жағдайларының жиілігі біріктірілген ем тобында 4.2% және тамсулозин тобында 11.9% құрады (p <0.001). Дутастерид монотерапиясымен салыстырғанда, біріктірілген ем ЖНІ немесе ҚБҚГ-мен байланысты хирургиялық араласулар қаупін 19.6% төмендетті (p = 0.18 [95% CА -10.9% -41.7%]). Дутастерид тобында 4 жыл ішінде ЖHІ немесе ҚБҚГ-мен байланысты хирургиялық операциялар жағдайларының жиілігі 5.2% құрады. 4 жыл емдеуден кейін тиімділіктің екінші соңғы нүктелеріне клиникалық үдеуге дейінгі уақытты қамтыды (IPSS шкаласы бойынша ≥ 4 балл нашарлауы, ҚБҚГ-мен байланысты ЖНІ жағдайлары, несепті ұстай алмау, несеп шығару жолдарының инфекциясы (НЖИ) және бүйрек жеткіліксіздігі қамтылған жағдайлар жиынтығы); қуық асты безінің аурулары симптомдарының халықаралық шкаласының (IPSS) өзгеруі, несеп шығарудың ең жоғары жылдамдығының және қуық асты безі көлемінің өзгеруі. 4 жыл емнен кейін алынған зерттеу нәтижелері төменде берілген. Параметр — Уақыт кезеңі — Біріктірілім — Дутастерид — Тамсулозин ЖНІ немесе ҚБҚГ-мен байланысты хирургиялық араласу (%) — 48 ай өткеннен кейінгі жиілік — 4.2 — 5.2 — 11.9a Клиникалық үдеу* (%) — 48 ай — 12.6 — 17.8b — 21.5a IPSS (баллдар) — [Бастапқы деңгей] 48 ай (бастапқы деңгейден өзгеруі) — [16.6] -6.3 — [16.4] -5.3b — [16.4] -3.8a Qmax (мл/сек) — [Бастапқы деңгей] 48 ай (бастапқы деңгейден өзгеруі) — [10.9] 2.4 — [10.6] 2.0 — [10.7] 0.7a Қуық асты безінің көлемі (мл) — [Бастапқы деңгей] 48 ай (бастапқы деңгейден % өзгеруі) — [54.7] -27.3 — [54.6] -28.0 — [55.8] +4.6a Қуық асты безінің ауыспалы аймағының көлемі (мл)# — [Бастапқы деңгей] 48 ай (бастапқы деңгейден % өзгеруі) — [27.7] -17.9 — [30.3] -26.5 — [30.5] 18.2a ҚБҚГ әсер ету индексі (BII) (баллдар) — [Бастапқы деңгей] 48 ай (бастапқы деңгейден % өзгеруі) — [5.3] -2.2 — [5.3] -1.8b — [5.3] -1.2a IPSS, 8 сұрақ (ҚБҚГ-мен байланысты денсаулық жағдайын бағалау) (баллдар) — [Бастапқы деңгей] 48 ай (бастапқы деңгейден өзгеруі) — [3.6] -1.5 — [3.6] -1.3b — [3.6] -1.1a Бастапқы деңгей орташа мәндер түрінде болады, ал бастапқы деңгейден ауытқулар түзетілген орташа мәндер болып табылады. * Клиникалық үдеу келесі көрсеткіштердің жиынтығы болып табылады: IPSS шкаласы бойынша ≥ 4 балл нашарлау, ҚБҚГ-мен байланысты ЖНІ жағдайлары, несепті ұстай алмау, НЖИ және бүйрек жеткіліксіздігі. # Бағалау жеке зерттеу орталықтарында жүргізілді (рандомизацияланған пациенттердің 13%-ы). а. Біріктірілген ем тобында 48 ай өткен соң, тамсулозин тобымен салыстырғанда, маңызды нәтижелер алынды (p < 0.001). б. Біріктірілген ем тобында 48 ай өткен соң, дутастерид тобымен салыстырғанда, маңызды нәтижелер алынды (p < 0.001). Дутастерид Плацебомен салыстырғанда, дутастеридті 0.5 мг/тәулік дозада қабылдау қуық асты безінің көлемі ≥ 30 мл және ПСА көрсеткіші 1.5-10 нг/мл ҚБҚГ орташа және ауыр симптомдары бар 4325 ер адамның қатысуымен жүргізілген бастапқы тиімділігінің 2 жылдық көп орталықтық, көп ұлтты, плацебо-бақыланатын, салыстырмалы жасырын зерттеулерінде бағаланды. Одан кейін зерттеулер 4 жылға дейінгі ашық қосымша кезеңдермен жалғасты, осы орайда зерттеуде қалған пациенттердің бәрі бірдей дутастеридті сол 0.5 мг дозада алуды жалғастырды. 4 жыл өткен соң бастапқыда плацебо алған пациенттердің 37%-ы және бастапқыда дутастерид қабылдаған барлық пациенттің 40%-ы зерттеуге қатысуды жалғастырды. Зерттеудің ашық қосымша кезеңіне қатысқан 2340 пациенттің көпшілігі (71%) осының үстіне 2 жыл бойы ем қабылдады. Клиникалық тиімділіктің ең көп маңызды параметрлері Америка урологиялық қауымдастығының симптомдар индексі (AUA-SI), несеп шығару жылдамдығының ең жоғары жылдамдығы (Qmax), жедел несеп іркілісі және ҚБҚГ-мен байланысты хирургиялық араласулар жағдайларының жиілігі болды. AUA-SI ҚБҚГ-мен байланысты симптомдарды бағалауға арналған жеті тармақтан тұратын, ең жоғары мәні 35 балл сауалнама түрінде болады. Индекстің бастапқы орташа мәні шамамен 17 балл құрады. Алты ай, бір жыл және екі жыл емнен кейін плацебо тобында орташа жақсару, тиісінше, 2.5, 2.5 және 2.3 балл, ал Аводарт препараты тобында 3.2, 3.8 және 4.5 балл құрады. Екі топтың арасындағы айырмашылықтар статистикалық тұрғыдан маңызды болды. Салыстырмалы жасырын емнің алғашқы 2 жылының ішінде байқалған AUA-SI индексінің жақсаруы ашық қосымша зерттеу барысында тағы 2 жыл бойы сақталды. Qmax (ең жоғары несеп шығару жылдамдығы) Зерттеулердегі Qmax орташа бастапқы мәні шамамен 10 мл/сек құрайды (қалыпты Qmax мәні ≥15 мл/сек). Бір жыл және екі жыл емделуден кейін плацебо тобындағы несеп шығару жылдамдығы, тиісінше, 0.8 және 0.9 мл/сек, ал Аводарт препараты тобында, тиісінше, 1.7 және 2.0 мл/сек жақсарды. Екі топтың арасындағы айырмашылық 1-ден 24 айға дейінгі кезеңде статистикалық маңызды болды. Салыстырмалы жасырын емнің алғашқы 2 жылының ішінде байқалған ең жоғары несеп шығару жылдамдығының артуы ашық қосымша зерттеулер барысында тағы 2 жыл бойы сақталды. Жедел несеп іркілісі және хирургиялық араласу Екі жыл емделуден кейін ЖНІ жиілігі, дутастерид тобындағы 1.8%-бен салыстырғанда, плацебо тобында 4.2% құрады (қауіптің 57% төмендеуі). Осы айырмашылық статистикалық тұрғыдан маңызды және екі жыл бойы дутастерид қабылдау 42 пациентте бір ЖНІ жағдайының алдын алуға көмектеседі (95% CА 30-73). Екі жылдық емдеуден кейін ҚБҚГ-мен байланысты хирургиялық операциялар жиілігі плацебо тобында 4.1% және дутастерид тобында 2.2% құрады (қауіптің 48% төмендеуі). Осы айырмашылық статистикалық тұрғыдан маңызды және екі жыл бойы дутастерид қабылдаудың 51 пациентке жасалатын бір хирургиялық араласуды болдырмауға көмектесетінін білдіреді (95% CА 33-109). Шаш жабынының таралуы ІІІ фаза зерттеулерінің бағдарламасы шеңберінде шаш жабынының таралуына дутастеридтің әсері ресми зерттелмеді, алайда, 5-альфа-редуктаза тежегіштерін қабылдау шаштың түсуін азайтуы және ерлер типіндегі таздануы (ерлердің андрогендік алопециясы) бар пациенттерде оның өсуіне ықпал етуі мүмкін. Қалқанша без функциясы Қалқанша без функциясы дені сау ерлердің қатысуымен бір жылға созылған зерттеуде бағаланды. Бір жылдық ем соңында бос тироксин деңгейлері өзгермеді, бірақ плацебомен салыстырғанда, тиреотропты гормон (TТГ) деңгейі болымсыз (0.4 мкХБ/мл) жоғарылады. Алайда, TТГ деңгейінің осы өзгерістері клиникалық маңызды емес болып бағаланды, өйткені TТГ деңгейлері ауытқумен болды, осы орайда TТГ диапазоны (1.4 - 1.9 мкХБ/мл) медианасы қалып шегінде қалды (0,5 - 4,0 мкХБ/мл), ал тироксин деңгейлері қалып шегінде тұрақты әрі плацебо тобында және дутастерид тобында ұқсас болды. Барлық клиникалық зерттеулер нәтижелері дутастеридтің қалқанша без функциясына кері әсер ету дәлелдерін көрсетпеді. Сүт безінің жаңа түзілімдері Дутастеридтің 3374 пациент/жыл әсерін қамтамасыз еткен 2 жылға созылған клиникалық зерттеулерде және препаратты тіркеу кезінде 2 жыл бойы созылған ашық қосымша зерттеуде дутастерид қабылдаған ер адамдарда сүт безі обырының 2 жағдайы және плацебо қабылдаған пациенттегі 1 жағдайы хабарланды. Дутастеридтің 17489 пациент/жыл және дутастерид пен тамсулозин біріктірілімінің 5027 пациент/жыл әсерін қамтамасыз еткен 4 жылға созылған CombAT және REDUCE клиникалық сынақтарында топтардың бір де бірінде сүт безі обырының жағдайлары хабарланбады. Бірі АҚШ-та (n = 339 кеуде обыры және n = 6780 бақылау жағдайы), ал екіншісі Ұлыбританияның денсаулық сақтау деректерінің базасында (n = 398 кеуде обыры және n = 3930 бақылау жағдайы) жүргізілген екі эпидемиологиялық «жағдай-бақылау» зерттеуінде 5-альфа-редуктаза тежегіштерін қолданғанда ерлерде сүт безі обырының даму қаупінің артуы байқалмады (4.4 бөлімін қараңыз). Бірінші зерттеу нәтижелерінде ерлерде сүт безі обырының дамуымен оң байланыс анықталмады (≥ 1 жыл қолданумен салыстырғанда, сүт безінің обыры диагнозының қойылуына дейін < 1 жыл қолдану үшін салыстырмалы қауіп: 0.70: 95% CА 0.34, 1.45). Екінші зерттеуде 5-альфа-редуктаза тежегіштерін қолдану кезіндегі сүт безі обырының даму мүмкіндіктерін бағалау қатынасы, оларды қолданбаған топпен салыстырғанда, 1.08: 95% CА 0.62, 1.87 құрады. Ерлерде сүт безі обырының туындауы мен дутастеридті ұзақ уақыт қолдану арасындағы себеп-салдарлы байланыс анықталмады. Ерлер фертильділігіне әсері Дутастеридті 0.5 мг тәулік/дозада қабылдаудың шәуһет сипаттамаларына әсері 18-ден 52 жасқа дейінгі дені сау еріктілердің қатысуымен жүргізілген зерттеуде (дутастерид тобында n = 27; плацебо тобында n = 23) 52 апталық ем және одан кейінгі 24 апталық қадағалау барысында бағаланды. 52 аптада плацебо тобындағы бастапқы деңгеймен салыстыру бойынша өзгерістерді түзете отырып, дутастерид тобында сперматозоидтардың жалпы санының, сперматозоидтар көлемінің және қозғалғыштығының бастапқы деңгейден орташа азаю пайызы, тиісінше, 23%, 26% және 18% құрады. Бұл сперматозоидтар концентрациясы мен морфологиясына ықпал етпеді. Одан кейінгі 24 апталық қадағалаудан соң дутастерид тобындағы сперматозоидтардың жалпы санының орташа пайыздық өзгерісі бастапқы деңгейден 23% төмен күйде қалды. Сонымен қатар, барлық уақыт кезеңдері үшін бүкіл параметрлердің орташа мәндері қалып шегінде қалып, клиникалық мәнді өзгерістердің алдын ала белгіленген критерийлеріне сәйкес келмеді (30%), 52 апта емделуден кейін дутастерид тобындағы екі пациентте сперматозоидтар саны бастапқы деңгейден 90%-дан астам төмендеді, бірақ артынан келесі 24 апталық қадағалаудан соң ішінара қалпына келді. Ерлер фертильділігінің төмендеу мүмкіндігін жоққа шығаруға болмайды. Жүрек-қантамыр жүйесі тарапынан жағымсыз құбылыстар Дутастерид пен тамсулозин біріктірілімін қолданумен 4844 ер адам қатысқан 4 жылдық ҚБҚГ зерттеуінде (CombAT зерттеуі) «жүрек жеткіліксіздігі» құрама терминімен сипатталған жағдайлардың жиілігі, монотерапияның екі тобына: дутастерид (4/1623, 0.2%) және тамсулозинге (10/1611, 0.6%) қарағанда, біріктірілім қабылдаған топта жоғары (14/1610, 0.9%) болды. Жеке төрт жылдық клиникалық зерттеуге (REDUCE зерттеуі) 50-ден 75 жасқа дейінгі 8231 пациент қатысып, 50-ден 60 жасқа дейін ерлер үшін 2.5 нг/мл-ден 10.0 нг/мл дейінгі диапазондағы, ал 60 жастан асқан ерлер үшін 3 нг/мл-ден 10 нг/мл дейінгі диапазондағы және ПСA бастапқы деңгейі және қуық асты безінің обырына жасалған биопсияның теріс нәтижесі болды, «жүрек жеткіліксіздігі» құрама терминімен сипатталған жағдайлар жиілігі, плацебо тобына (16/4126, 0.4%), қарағанда, тәулігіне бір рет 0.5 мг дозада дутастерид қабылдаған пациенттерде жоғары болды (30/4105, 0.7%) Осы зерттеудің ретроспективтік талдауы дутастерид және α1-адренорецепторлар антагонисін (12/1152, 1.0%) бір мезгілде қабылдап жүрген пациенттертерде, α1-адренорецепторлар антагонисінсіз дутастеридті (18/2953, 0.6%), плацебо және α1-адренорецепторлар антагонисін (1/1399, < 0,1%) немесе тек плацебоны (15/2727, 0.6%) қабылдаған пациенттерге қарағанда, «жүрек жеткіліксіздігі» құрама терминімен сипатталған жағдайлар жиілігінің өте жоғары екенін көрсетті Дутастерид қолдану кезіндегі (бақылаумен салыстырғанда) жүрек-қантамырлық жағымсыз құбылыстардың даму қауіптері бағаланған плацебо бақылауымен немесе салыстыру препаратымен жүргізілген 12 рандомизацияланған клиникалық зерттеудің (n = 18802) мета-талдауында жүрек жеткіліксіздігінің даму қаупінің бірізді статистикалық мәнді артуы анықталмады (СҚ (салыстырмалы қауіп) 1.05; 95% CА 0.71; 1.57), жедел миокард инфарктісі (СҚ 1.00; 95% CА 0.77; 1.30) немесе инсульт (СҚ 1.20; 95% CА 0.88; 1.64). Қуық асты безінің обыры және қатерлілігі жоғары дәрежедегі ісіктер Плацебо мен дутастерид салыстырылған төрт жылдық зерттеуге (REDUCE зерттеуі) 50-ден 75 жасқа дейінгі 8231 пациент қатысып, 50-ден 60 жасқа дейінгі ерлер үшін 2.5 нг/ мл-ден 10.0 нг/мл дейінгі диапазондағы, ал 60 жастан асқан ерлер үшін 3 нг/мл-ден 10 нг/ мл дейінгі диапазондағы ПСА бастапқы деңгейі және қуық асты безінің обырына жасалған биопсиясы теріс нәтиже берді, 6706 пациент Глисон шкаласы бойынша баллдар қосындысын анықтау үшін пункциялық биопсия (хаттама бойынша бастапқы міндетті) нәтижелеріне ие болды. Осы зерттеуде қуық асты безінің обыры 1517 пациентте диагностикаланды. Екі емдеу тобында да биопсия арқылы анықталған қуық асты безінің обыры жағдайларының көпшілігі қатері төмен ісіктерге жатқызылды (Глисон шкаласы бойынша балл қосындысы 5-6, 70%). Глисон шкаласы бойынша 8-10 балл қосындысымен қуық асты безі обыры жағдайларының жоғары жиілігі, плацебо тобына қарағанда (n = 19, 0.6%), дутастерид тобында (n = 29, 0.9%) байқалды (p = 0.15). Емнің бірінші және екінші жылы барысында дутастерид тобында (n = 17, 0.5%) және плацебо тобында (n = 18, 0.5%) Глисон шкаласы бойынша 8-10 обыры бар пациенттер саны бірдей болды. Үшінші және төртінші жылдары Глисон шкаласы бойынша 8-10 балл қосындысымен қуық асты безінің обыры жағдайларының көпшілігі, плацебо тобына (n = 1, < 0.1%) қарағанда, дутастерид тобында (n = 12, 0.5%) диагностикаланды (p = 0.0035). Қуық асты безі обырының даму қаупі бар пациенттерде дутастеридті 4 жылдан астам қабылдаудың әсері туралы деректер жоқ. Глисон шкаласы бойынша 8-10 балл қосындысымен қуық асты безінің обыры диагнозы қойылған пациенттер пайызы зерттеудің бүкіл кезеңдері барысында (1-2 жыл, 3-4 жыл) дутастерид тобында (әр уақыт кезеңінде 0.5%) тұрақты болды, бірақ плацебо тобында Глисон шкаласы бойынша 8-10 балл қосындысымен қуық асты безінің обыры диагнозы қойылған пациенттер пайызы, 1-2 жылға қарағанда, 3-4 жылға төмен (<0.1%, тиісінше, 0.5%) болды (4.4 бөлімін қараңыз). Глисон шкаласы бойынша 7-10 балл қосындысымен обыр жағдайларының жиілік көрсеткіші бойынша айырмашылықтар болмады (p = 0.81). REDUCE зерттеуінің шеңберінде кейіннен қадағалауға ұласқан қосымша екі жылдық зерттеуінде Глисон 8-10 индексімен қуық асты безі обырының жаңа жағдайлары анықталмады. ҚБҚГ 4 жылдық зерттеуінде (CombAT зерттеуі) хаттамада биопсия жасау талап етілмеді, ал қуық асты безі обырының барлық диагноздары көрсетілімдер бойынша биопсияға негізделді, Глисон шкаласы бойынша 8-10 балл қосындысымен обыр жиілігі дутастерид (n = 8, 0.5%), тамсулозин (n = 11, 0.7%) және біріктірілген ем (n = 5, 0.3%) топтарында анықталды. Әртүрлі эпидемиологиялық қауымдық төрт зерттеуде (оның екеуі 174895 адамнан тұратын жалпы қауымға, біреуі 13892 адамдық қауымға және 38058 адамдық қауымға негізделген), 5-альфа-редуктаза тежегіштерін қолданудың қатерлілігі жоғары дәрежедегі қуық асты безі обырының немесе қуық асты безі обырының туындауымен немесе жалпы өлімге ұшыраумен байланысты еместігі анықталды. Дутастеридті қолдану мен қуық асты безінің қатері жоғары обырының арасындағы байланыс түсініксіз. Жыныс функциясына әсері Дутастерид+тамсулозин біріктірілімінің жыныс функциясына әсері ҚБҚГ бар, жыныстық өмірі белсенді ерлердің қатысуымен салыстырмалы жасырын плацебо-бақыланатын зерттеуде бағаланды (n = 243 дутастерид+тамсулозин, n = 246 плацебо). 12 ай өткен соң біріктірілген ем тобында Ерлердің сексуалдық денсаулығын бағалау сауалнамасы (MSHQ) бойынша статистикалық маңызды (p < 0.001) аса айқын төмендеу (нашарлау) байқалды. Төмендеу, негізінен, эякуляцияның және эрекцияға қатысты емес, жалпы қанағаттану деңгейін бағалаудың нашарлауымен байланысты болды. Осындай зардаптар қанағаттанушылығы 12 ай барысында, плацебомен салыстырғанда, статистикалық тұрғыдан едәуір жоғары маңызды деп бағаланған зерттеу қатысушыларының дутастерид+тамсулозин біріктірлімін қабылдауына әсер етпеді (p < 0.05). Осы зерттеуде жыныс функциясы тарапынан жағымсыз құбылыстар 12 ай емделу кезінде төмендеді және жағдайлардың жартысында ем аяқталған соң 6 ай ішінде басылды. Дутастерид-тамсулозин біріктірілімі мен дутастерид монотерапиясының жыныс функциясы тарапынан жағымсыз құбылыстар туындататыны белгілі (4.8 бөлімін қараңыз). CombAT және REDUCE қамтылатын басқа клиникалық зерттеулерде емді жалғастырғанда жыныс функциясы тарапынан жағымсыз құбылыстардың даму жиілігі уақыт өте келе азаяды. Тамсулозин Тамсулозин ең жоғары несеп шығару жылдамдығын арттырады. Қуық асты безінің және уретраның тегіс бұлшықеттер тонусын төмендету арқылы обструкцияны жеңілдетіп, сол арқылы нәжіс босату симптомдарын жақсартады. Ол қуықтың тұрақсыздануы маңызды рөл атқаратын толтыру симптомдарын да жақсартады. Босату және толтыру симптомдарына қатысты осындай әсері ұзаққа созылатын ем кезінде сақталады. Нәтижесінде хирургиялық араласу немесе катетерлендіру қажеттілігі едәуір уақыт кейінге шегеріледі. А1-адренорецепторлар антагонистері тамырлардың жалпы шеткері кедергісін төмендету есебінен артериялық қысымды түсіруге қабілетті. Тамсулозин зерттеулерінің барысында артериялық қысымның клиникалық мәнді төмендеуі байқалмады.

Дозалау режимі Ересектер (егде жастағы пациенттерді қоса) Дутабит Плюс препаратының ұсынылатын дозасы тәулігіне бір рет бір капсуланы (0.5 мг/0.4 мг) құрайды. Қажет болған жағдайда дутастеридпен және тамсулозин гидрохлоридімен екі компонентті еммен емдеуді жеңілдету мақсатында Дутабит Плюс дәрілік препаратын қабылдаумен ауыстыруға болады. Клиникалық қажеттілік кезінде дутастеридпен немесе тамсулозин гидрохлоридімен монотерапиядан Дутабит Плюс препаратымен емге тікелей көшу қарастырылуы мүмкін. Пациенттердің ерекше топтары Бүйрек жеткіліксіздігі бар пациенттер Бүйрек функциясының бұзылуының дутастерид-тамсулозин біріктірілімінің фармакокинетикасына әсері зерттелмеген. Бүйрек функциясы бұзылған пациенттерге дозаны түзету қажет емес деп күтілуде. Бауыр жеткіліксіздігі бар пациенттер Бауыр функциясы бұзылуының дутастерид-тамсулозин біріктірілімінің фармакокинетикасына әсері зерттелмеген, сондықтан бауыр функциясы жеңілден орташа ауырлық дәрежесіне дейін бұзылған пациенттерде препаратты қолданғанда сақ болған жөн. Дутабит Плюс дәрілік препаратын қабылдау бауырдың ауыр жеткіліксіздігі бар пациенттерге қарсы көрсетілімде Балалар Дутастерид-тамсулозин біріктірілімі балаларға (18 жасқа дейінгі жаста) қарсы көрсетілімде. Енгізу әдісі және жолы Ішке қабылдауға арналған. Пациенттерге күнделікті белгілі бір тамақ ішуден кейін 30 минутқа жуық уақыт өткен соң бүтін капсуланы қабылдау қажеттілігін ескерту керек. Капсулаларды ашуға немесе шайнауға болмайды. Капсуланың қатты қабығының ішінде болатын дутастерид капсуласының ішіндегі затпен жанасу ауыз шырышты қабығының және жұтқыншақтың тітіркенуін тудыруы мүмкін.

- дутастеридке, 5-альфа-редуктазаның басқа тежегіштеріне, тамсулозинге (тамсулозин индукциялаған ангионевроздық ісінуі бар пациенттерді қоса), сояға, жер жаңғағына немесе «Құрамы» бөлімінде аталған қосымша заттардың кез келгеніне аса жоғары сезімталдық - әйелдер - балалар мен 18 жасқа дейінгі жасөспірімдер - бауыр жеткіліксіздігінің ауыр дәрежесі - анамнездегі ортостаздық гипотензия ұстамалары

Жиі - бас айналу - импотенция3 - либидо өзгеруі (төмендеуі)3 - эякуляция бұзылуы3^ - сүт безі тарапынан бұзылу2 Жиі емес - бас ауыру - жүрек жеткіліксіздігі (кешенді термин1) - жүректің жиі соғуы - ортостаздық гипотония - ринит - іш қату - диарея - жүрек айну - құсу - есекжем - бөртпе - қышыну - алопеция (көбінесе дене түктерінің түсіп қалуы түрінде) - гипертрихоз - астения Сирек - естен тану - ангионевроздық ісіну Өте сирек - Стивенс-Джонсон синдромы - приапизм Белгісіз (қолда бар деректер негізінде бағалау мүмкін емес) - аллергиялық реакциялар, бөртпені, қышынуды, есекжемді, жергілікті ісіну мен ангионевроздық ісінуді қоса - депрессия - аталық бездің ауыруы және ісінуі 1 «Жүрек жеткіліксіздігі» кешенді термині өзінде іркілісті жүрек жеткіліксіздігін, жүрек жеткіліксіздігін, сол жақ қарынша жеткіліксіздігін, жедел жүрек жеткіліксіздігін, кардиогенді шок, сол жақ қарыншаның жедел жеткіліксіздігін, оң жақ қарынша жеткіліксіздігін, оң жақ қарыншаның жедел жеткіліксіздігін, қарыншалық жеткіліксіздікті, жүрек-өкпе жеткіліксіздігін және дилятациялық кардимиопатияны қамтиды. 2 Сүт бездерінің ауырсынуын және ұлғаюын қоса. 3 Осы сексуалдық сипаттағы жағымсыз құбылыстар дутастерид (монотерапиясын және тамсулозинмен біріктірілімін қоса) қабылдаумен байланысты. Емді тоқтатудан кейін жағымсыз құбылыстар жалғасуы мүмкін. Олардың сақталуында дутастерид атқаратын рөл белгісіз. ^ Шәуһет көлемінің азаюын қоса. Жағымсыз дәрілік реакциялар туындағанда медициналық қызметкерге, фармацевтикалық қызметкерге немесе, дәрілік препараттардың тиімсіздігі туралы хабарламаларды қоса, дәрілік препараттарға болатын жағымсыз реакциялар (әсерлер) жөніндегі ақпараттық деректер базасына тікелей хабарласу керек Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

Дутастерид-тамсулозин біріктірілімімен артық дозалануға қатысты мәліметтер жоқ. Төменде берілген деректер жекелеген компоненттер туралы ақпаратты көрсетеді. Дутастерид Еріктілердің қатысуымен жүргізілген зерттеулерде дутастеридті 40 мг/тәулікке дейінгі (емдік дозадан 80 есе жоғары) дозаларда тәулігіне бір рет 7 тәулік бойы қабылдау қауіпсіздігінің күрделі мәселелерін туындатпады. Клиникалық зерттеулерде, емдік дозалармен (тәулігіне 0.5 мг) салыстырғанда, 6 ай бойы тәулігіне 5 мг қабылдағанда жағымсыз құбылыстар байқалмады. Дутастерид үшін арнайы антидот жоқ, сондықтан артық дозалануға күмән туындаса, симптоматикалық және демеуші ем тағайындау керек. Тамсулозин Тамсулозин гидрохлоридін 5 мг дозада қабылдау кезінде жедел артық дозалану хабарланды. Жедел гипотензия (систолалық артериялық қысым 70 мм сын. бағ.), құсу және диареяның дамуы байқалды, олар жоғалған сұйықтықты толықтырумен емделді, айтарлықтай жақсару болды және пациент сол күні ауруханадан шығарылды. Артық дозалану салдарынан туындаған жедел гипотензия жағдайында жүрек-қантамыр жүйесінің қызметіне қолдау көрсету қажет. Пациентті жатқызып қою керек, бұл артериялық қысымды қалпына келтіруге және жүректің жиырылу жиілігін қалыпқа түсіруге көмектеседі. Егер бұл көмектеспесе, айналымдағы қан көлемін арттыратын заттарды, ал қажет болса, тамыр тарылтатын дәрілерді қолдануға болады. Бүйрек функциясын бақылап отыру және жалпы демеуші шаралар қабылдау қажет. Тамсулозин плазма ақуыздарымен өте жоғары дәрежеде байланысатындықтан, диализдің тиімді болу ықтималдығы аз. Сіңуін болдырмау үшін пациентті құстыру сияқты шараларды қолдануға болады. Препараттың үлкен дозаларын қабылдағанда асқазанды шаюға, белсендірілген көмір және натрий сульфаты сияқты осмостық іш жүргізетін дәрілер қабылдауға рұқсат етіледі.

Арнайы сақтандырулар Біріктірілген ем жағымсыз құбылыстардың (жүрек жеткіліксіздігін қоса) даму қаупінің арту ықтималдығына байланысты пайда-қауіп арақатынасын мұқият бағалаудан кейін және монотерапияны қоса, баламалы емдеу нұсқаларын қарастырудан кейін тағайындалу керек. Қуық асты безінің обыры және қатерлілігі жоғары дәрежедегі ісіктер Төрт жылдық көп орталықты, рандомизацияланған, жасырын салыстырмалы, плацебо-бақыланатын REDUCE зерттеуінде қуық асты безі қатерлі обырының даму қаупі жоғары пациенттерге (ПСА деңгейі 2.5-10 нг/мл 50-ден 75 жасқа дейінгі еркектерді және зерттеуге қосудан 6 ай бұрын қуық асты безінің қатерлі обырына алынған биопсияның теріс нәтижесін қоса алғанда) тәулігіне 0.5 мг дозада дутастеридті қабылдаудың әсері плацебомен салыстыра зерттелді. Осы зерттеу нәтижелері бойынша плацебомен (n = 19, 0.6%) салыстырғанда дутастерид (n = 29, 0.9%) алған ерлерде Глисон шкаласы бойынша барлығы 8-10 балл қуықасты безі обырының анағұрлым жоғары жиілігі анықталды. Дутастерид қабылдау мен қуықасты безі обырының Глисон шкаласы бойынша барлығы 8-10 баллы арасындағы байланыс түсініксіз. Осылайша, дутастерид-тамсулозин біріктірілімін қабылдаған ер адамдар қуықасты безі обырының дамуына үнемі тексеруден өтуі керек. Простата-спецификалық антиген (ПСА) Простата-спецификалық антигеннің (ПСА) қан сарысуындағы концентрациясы қуық асты безінің обырын диагностикалаудың маңызды компоненті болып табылады. Дутабит Плюс препараты 6 ай қабылдаудан кейін сарысудағы ПСА орташа деңгейінің шамамен 50% төмендеуін туындатады. Дутабит Плюс препаратын қабылдап жүрген пациенттерде Дутабит Плюс 6 ай қабылдаудан кейін анықталған жаңа бастапқы ПСА деңгейі болуы тиіс. Әріқарай ПСА мәніне жүйелі мониторинг өткізу ұсынылады. Дутабит Плюс қабылдау кезінде анықталған оның ең аз мәніне қатысты ПСА деңгейінің кез келген расталған жоғарылауы қуық асты безі обырының бар екенін немесе Дутабит Плюс препаратымен емдеу режимінің қадағаланбауын көрсетуі мүмкін, ал егер тіпті осы ПСА көрсеткіштері 5-альфа-редуктаза тежегішін қабылдамайтын ерлер үшін қалып шегінде қалса да, мұқият бағалау жүргізілуі тиіс. Дутастерид қабылдап жүрген пациентте ПСА мәнінің түсіндірілуін алдыңғы ПСА көрсеткіштерімен салыстыру арқылы жүргізген жөн. Дутабит Плюс препаратымен емдеу оның жаңа бастапқы деңгейін анықтаудан кейін қуық асты безінің обырын диагностикалау құралы ретінде ПСА пайдалануға ықпалын тигізбейді. Сарысудағы жалпы ПСА деңгейі емдеуді тоқтатудан кейін 6 ай ішінде бастапқы мәніне оралады. Бос ПСА мөлшерінің жалпы мөлшерге қатынасы тіпті Дутабит Плюс дәрілік препаратын қабылдау кезінде де тұрақты күйде қалады. Егер дәрігер Дутабит Плюс қабылдап жүрген ерлерде қуық асты безінің обырын анықтау үшін бос ПСА мөлшерінің пайызын пайдалануды шешсе, онда осы мәнді түзету қажет емес. Дутабит Плюс препаратымен емді бастар алдында, сондай-ақ емдеу барысында мезгіл-мезгіл саусақпен жүргізілетін ректальді зерттеу өткізген жөн, сондай-ақ қуық асты безінің обырын немесе ҚБҚГ кезіндегі белгілеріне ұқсас симптомдарды тудыруы мүмкін басқа ауруларды анықтау үшін басқа зерттеу әдістерін пайдалану қажет. Жүрек-қантамыр жүйесінің тарапынан жағымсыз құбылыстар Екі 4 жылдық клиникалық зерттеулерде жүрек жеткіліксіздігінің (бастапқы жүрек жеткіліксіздігі және іркілісті жүрек жеткіліксіздігі сияқты құбылыстарды айқындауға арналған құрама термин) туындау жиілігі дутастерид пен альфа1-адренорецепторлар антагонисінің, ең алдымен, тамсулозиннің біріктірілімін қабылдайтын пациенттер арасында осы біріктірілімді қабылдамаған пациенттер арасындағыдан сәл жоғары болды. Алайда, осы зерттеулерде жүрек жеткіліксіздігінің даму жиілігі, плацебо тобымен салыстырғанда, белсенді емделуде жүрген топтардың бәрінде төмен болды; дутастерид пен альфа-адренорецепторлар антагонистеріне қатысты басқа деректерде жүрек-қантамыр асқынуларының жоғары даму қаупі туралы қорытынды расталмайды. Кеуде безінің жаңа түзілімдері Клиникалық зерттеулерде және тіркеуден кейінгі кезеңде дутастерид қабылдайтын ерлерде кеуде безі обырының дамуының сирек жағдайлары туралы хабарланды. Алайда, эпидемиологиялық зерттеулер 5-альфа-редуктаза тежегіштерін қолданған кезде ерлерде кеуде безі қатерлі обырының даму қаупінің жоғарылағанын көрсеткен жоқ. Дәрігерлер өз пациенттеріне емшек ұштарының қатаюы немесе одан бөліністер сияқты сүт безі тіндеріндегі кез келген өзгерістер туралы дереу хабарлау қажеттілігін ескертуі тиіс. Бүйрек жеткіліксіздігі Бүйрек жеткіліксіздігінің ауыр дәрежесіндегі (креатинин клиренсі <10 мл/мин) пациенттерді емдеу абайлап жүргізіледі, өйткені препаратты осындай пациенттерде қолдану зерттелмеді. Гипотония Ортостаздық: альфа1-адренорецепторлардың басқа антагонистерімен болған жағдайдағы сияқты, тамсулозин қабылдау кезінде сирек жағдайларда естен тануларға әкелетін артериялық қысым төмендеуін байқауға болады. Дутабит Плюс препаратымен емдеуді бастаған пациенттерге ортостаздық гипотонияның алғашқы белгілерінде (бас айналу, әлсіздік) симптомдар басылатын сәтке дейін отыруға немесе жатуға кеңес беру керек. Ортостаздық гипотонияның даму мүмкіндігін азайта түсу үшін фосфодиэстераза-5 (ФДЭ-5) тежегіштерімен емдеуді бастар алдында пациент альфа1-адренорецепторлардың басқа антагонистерімен емге гемодинамикалық тұрақты болуы тиіс. Симптоматикалық: тамсулозинді қоса, альфа-адреноблокаторларды ФДЭ-5 тежегіштерімен (мысалы, силденафил, тадалафил, варденафил) бір мезгілде қолдану кезінде сақтық шарасы қадағаланады. Альфа1-адренорецепторлар антагонистері және ФДЭ-5 тежегіштері артериялық қысымды төмендетуге қабілетті тамыр кеңейтетін дәрілер болып табылады. Осы екі класқа жататын дәрілік препараттарды бір мезгілде қабылдау симптоматикалық гипотонияны тудыруы мүмкін Интраоперациялық флоппи-ирис синдромы Тамсулозин қабылдап жүрген немесе оны бұрын қабылдаған кейбір пациенттерде катарактаны алып тастау операциясы кезінде интраоперациялық флоппи-ирис синдромы (ИФИС, кішкентай қарашық синдромының алуан түрінің бірі) байқалды. ИФИС операция барысында және одан кейін көз асқынуларының даму қаупін арттыруы мүмкін. Сондықтан катаракта себебімен хирургиялық араласу жоспарланған пациенттерде Дутабит Плюс препаратымен емді бастау ұсынылмайды. Операция алдындағы тексеру кезінде хирург-офтальмолог пен офтальмологиялық бригадалар операция барысында ИФИС еміне арналған тиісті шаралар қолдануға дайындалу үшін пациенттер Дуодарт препаратын қабылдап жүрген-жүрмегенін немесе мүмкін оны бұрын қабылдағанын нақты анықтауы тиіс. Катаракта себебімен жасалатын операциядан 1-2 апта бұрын тамсулозин қабылдауды тоқтату оң әсерін көрсетеді деп саналады, бірақ катаракта себебімен жасалатын операция алдында препарат қабылдауды тоқтату пайдасы мен ұзақтығы анықталмады. Бүлінген капсула Дутастерид тері арқылы сіңеді, сондықтан әйелдер, балалар мен жасөспірімдер бүлінген капсулалармен жанасудан аулақ болуы тиіс. Бүлінген капсулалармен жанасу жағдайында терінің тиісті бөлігін дереу сабынды сумен жуып-шаю қажет. CYP3A4 және CYP2D6 тежегіштері Тамсулозин гидрохлоридін күшті CYP3A4 тежегіштерімен (мысалы, кетоконазол) немесе аз дәрежеде күшті CYP2D6 тежегіштерімен (мысалы, пароксетин) бір мезгілде қабылдау тамсулозин әсерін арттыруы мүмкін. Сондықтан тамсулозин гидрохлориді CYP3A4 күшті тежегіштерін қабылдап жүрген пациенттерге ұсынылмайды және CYP3A4 орташа тежегіштерін, CYP2D6 күшті немесе орташа тежегіштерін, CYP3A4 және CYP2D6 тежегіштерінің біріктірілімін қабылдап жүрген пациенттерде немесе CYP2D6 метаболизмі баяу жүретін пациенттерде сақтықпен қолданылуы тиіс. Бауыр жеткіліксіздігі Бауыр жеткіліксіздігі бар пациенттерде Дутабит Плюс дәрілік затты қолдану зерттелмеген. Дутабит Плюс препаратын бауыр функциясының жеңілден орташа ауырлыққа дейінгі бұзылулары бар пациенттерге тағайындағанда сақ болу керек. Қосымша заттар Бұл дәрілік препараттың құрамында аллергиялық реакциялар тудыруы мүмкін күн батар түстес сары (FCF) (FD&C сары №6) (E 110) бояғышы бар. Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері Дутабит Плюс дәрілік препаратының автокөлік басқару және механизмдермен жұмыс істеу қабілетіне әсеріне зерттеулер жүргізілмеді. Алайда, пациенттерді дутастерид-тамсулозин біріктірілімін қабылдау кезінде бас айналу сияқты ортостаздық гипотониямен байланысты симптомдардың туындауы мүмкін екенінен хабардар ету керек.

Дутабит Плюс дәрілік препараты әйелдерде қолдануға қарсы көрсетілімді. Дутастерид-тамсулозин біріктірілімінің жүктілікке, бала емізуге және фертильділікке әсеріне зерттеу жүргізілмеді. Төменде берілген ақпарат препараттың жекелеген компоненттерін зерттеу нәтижесінде алынды. Дутастерид, 5-альфа-редуктазаның басқа тежегіштері сияқты, тестостеронның дигидротестостеронға айналуын тежейді, ал ер жынысты шаранаға жүкті әйел қабылдағанда шаранада сыртқы жыныс мүшелерінің дамуын тежеуі мүмкін. Дутастерид қабылдап жүрген пациенттер шәуһетінен дутастеридтің аздаған мөлшерлері табылды. Дутастеридпен емделіп жүрген еркектің шәуһетімен бірге жүкті әйелдің организміне түскенде (оның қаупі жүктіліктің алғашқы 16 аптасының ішінде көбірек жоғары) дутастеридтің ер жыныс ұрығына теріс әсер көрсетуі белгісіз. 5-альфа-редуктазаның басқа тежегіштерін қабылдаған жағдайдағы сияқты, жұптас әйел жүкті болса немесе жүкті болуы мүмкін болса, пациенттерге әйел организміне шәуһет түсуін болдырмас үшін мүшеқап пайдалану ұсынылады. Тамсулозин гидрохлориді буаз ұрғашы егеуқұйрықтар мен үй қояндарына енгізілгенде ұрыққа зиянды әсер ету белгілері байқалмады. Дутастерид немесе тамсулозиннің емшек сүтіне өту-өтпеуі белгісіз. Дені сау ерлерде дутастеридтің шәуһет сипаттамаларына ықпал етуі (сперматозоидтар санының және қозғалғыштығының төмендеуі, шәуһет көлемінің азаюы) хабарланды. Ерлер фертильділігінің төмендеу мүмкіндігін жоққа шығаруға болмайды. Тамсулозин гидрохлоридінің сперматозоидтар санына және функциясына әсері бағаланбады.

Дутастерид-тамсулозин біріктірілімінің дәрілік өзара әрекеттесуіне зерттеулер жүргізілмеді. Төменде берілген деректер жекелеген компоненттер үшін қолда бар ақпаратты көрсетеді. Дутастерид Дутастеридпен емдеу кезінде қан сарысуында ПСА деңгейінің төмендеуі туралы ақпарат және қуық асты безінің обырын диагностикалауға қатысты ұсынымдар «Арнайы сақтандырулар» бөлімінде берілген. Дутастерид фармакокинетикасына басқа дәрілік заттардың әсері Дутастерид көбінесе метаболизм арқылы шығарылады. Іn vitro зерттеулері метаболизм катализаторлары CYP3A4 және CYP3A5 екенін көрсетеді. CYP3A4 күшті әсер ететін тежегіштерімен өзара әрекеттесуіне ресми зерттеулер жүргізілмеді. Алайда, қауымдық фармакокинетикалық зерттеуде, верапамил немесе дилтиаземді (CYP3A4 орташа тежегіштері және P-гликопротеин тежегіштері) бір мезгілде қабылдаған пациенттердің шағын санында қан сарысуындағы дутастерид концентрациясы басқа пациенттердегіден, орта есеппен, 1.6-1.8 есе жоғары болды. Дутастеридті CYP3A4 ферментінің күшті әсер ететін тежегіштері болып табылатын басқа дәрілермен (мысалы, ритонавир, индинавир, нефазодон, интраконазол, кетоконазол сияқты ішке қабылдауға арналған препараттар) біріктірілімде ұзақ мерзімді қолдану қан сарысуында дутастерид концентрациясын арттыруы мүмкін. Дутастерид әсері жоғарылағанда 5-альфа-редуктазаның одан әрі тежелу ықтималдығы аз. Алайда, жағымсыз реакциялар пайда болғанда, дутастеридті дозалау жиілігін азайту мүмкіндігін қарастыруға болады. Фермент тежелген жағдайда ұзаққа созылатын жартылай шығарылу кезеңін қосымша ұзартуға болатынын атап өту керек, бұл жаңа тепе-тең концентрациясына жету үшін 6 айдан астам уақыт ішінде бір мезгілде ем қолданылуын талап етуі мүмкін. Дутастеридті 5 мг дозада бір рет қабылдаудан кейін бір сағаттан соң 12 г холестирамин енгізу дутастерид фармакокинетикасына ықпалын тигізбеді. Дутастеридтің басқа дәрілік препараттар фармакокинетикасына әсері Дені сау ерлердің қатысуымен екі аптаға созылған шағын зерттеуде (n = 24) дутастерид (тәулігіне 0.5 мг) тамсулозин немесе теразозин фармакокинетикасына ықпалын тигізбеді. Осы зерттеуде фармако-динамикалық өзара әрекеттесу байқалмады. Дутастерид варфарин немесе дигоксин фармакокинетикасына ықпал етпейді. Бұл дутастеридтің CYP2C9 ферментін немесе Р-гликопротеин тасымалдаушысын тежемейтінін/индукцияламайтынын білдіреді. Іn vitro өзара әрекеттесу зерттеулері дутастеридтің CYP1A2, CYP2D6, CYP2C9, CYP2C19 немесе CYP3A4 ферменттерін тежемейтінін көрсетеді. Тамсулозин Тамсулозинді артериялық қысымды төмендететін препараттармен анестетиктерді, ФДЭ-5 тежегіштерін және альфа1-адренорецепторлардың басқа антагонистерін қоса, бір мезгілде қабылдау гипотензия әсерінің күшеюіне әкелуі мүмкін. Дутастерид-тамсулозин біріктірілімін альфа1-адренорецепторлардың басқа антагонистерімен бірге қолдануға болмайды. Тамсулозин гидрохлориді мен кетоконазолды (CYP3A4 күшті тежегіші) бір мезгілде қабылдау тамсулозин гидрохлоридінің Cmax және AUC мәндерінің, тиісінше, 2.2 және 2.8 есе артуына алып келді. Тамсулозин гидрохлориді мен пароксетинді (CYP2D6 күшті тежегіші) бір мезгілде қабылдау тамсулозин гидрохлоридінің Cmax және AUC мәндерінің, тиісінше, 1.3 және 1.6 есе артуына алып келді. CYP2D6 метаболизмі баяу пациенттерде, метаболизмі жылдам пациенттермен салыстырғанда, CYP3A4 күшті тежегішімен бір мезгілде қолдану кезіндегі әсерінің осылай жоғарылауы күтіледі. CYP3A4 және CYP2D6 тежегіштерін тамсулозин гидрохлоридімен бір мезгілде қабылдау әсері клиникалық практикада бағаланбады, алайда, тамсулозин әсерінің едәуір арту ықтималдығы бар. Тамсулозин гидрохлоридін (0.4 мг) және циметидинді (алты тәулік бойы әр алты сағат сайын 400 мг) бір мезгілде қабылдау клиренс төмендеуіне (26%) және тамсулозин гидрохлоридінің AUC (44%) артуына алып келді. Дутастерид пен тамсулозин біріктірілімін циметидинмен бірге абайлап қолдану керек. Тамсулозин гидрохлоридінің варфаринмен дәрілік өзара әрекеттесуіне толық зерттеу жүргізілмеді. Шектеулі in vitro және in vivo зерттеулерінің нәтижелері түпкілікті қорытындылар жасауға мүмкіндік бермейді. Алайда, диклофенак пен варфарин тамсулозиннің шығарылу жылдамдығын арттыруы мүмкін. Варфарин мен тамсулозин гидрохлоридін бір мезгілде қолданғанда сақ болу керек. Тамсулозин гидрохлоридін атенолол, эналаприл, нифедипин немесе теофиллинмен бір мезгілде қолданғанда өзара әрекеттесу байқалмады. Фуросемидпен бір мезгілде қабылдау қан плазмасында тамсулозин деңгейінің төмендеуін туындатады, бірақ деңгейлер қалыпты диапазон шектерінде қалатындықтан, дозаны түзету қажет емес. In vitro жағдайларында диазепам, пропранолол, трихлорметизиад, хлормадинон, амитриптилин, диклофенак, глибенкламид, симвастин адамның қан плазмасында тамсулозиннің бос фракциясын өзгертпеді. Тамсулозин диазепам, пропранолол, трихлорметиазид және хлормадинонның бос фракцияларын да өзгертпеді.

Сақтау мерзімі 2 жыл Жарамдылық мерзімі өткеннен кейін қолдануға болмайды! Сақтау шарттары 25 ºС-ден аспайтын температурада сақтау керек. Балалардың қолы жетпейтін жерде сақтау керек!