Зиромин порошок 200 мг/5 мл

5 мл суспензияның құрамында белсенді зат - азитромицин дигидраты 209.6212 мг (200.0 мг азитромицинге баламалы), қосымша заттар: сахароза, үш негізді натрий фосфаты додекагидраты, «Банан» хош иістендіргіші, натрий бензоаты, «Шие» хош иістендіргіші, ксантан шайыры, гидроксипропилцеллюлоза. Сыртқы түрінің, иісінің, дәмінің сипаттамасы Шие мен бананға тән иісі бар ақ түсті біртекті ұнтақ. Қалпына келтірілген суспензия. Суда ерігеннен кейін - шие мен бананға тән иісі бар ақ немесе ақ дерлік түсті біртекті суспензия.

Зиромин препараты азитромицинге сезімтал патогенді микроорганизмдерден туындаған инфекцияларды емдеу үшін көрсетілген: - жоғарғы тыныс алу жолдарының инфекцияларында, оның ішінде синуситте, фарингитте, тонзиллитте; - төменгі тыныс алу жолдарының инфекцияларында, оның ішінде бронхитте және пневмонияда; - жедел ортаңғы отитте; - тері мен жұмсақ тіндердің инфекцияларында. Бактерияға қарсы дәрілерді тиісінше пайдалану жөніндегі ресми нұсқаулықтарда қамтылған ақпаратты назарға алу қажет.

Азитромицин 15-мүшелі лактонды сақинасы бар азалидтің жартылай синтетикалық туындысы болып табылады; азалидтер макролидті антибиотиктер тобына жатады. Әсер ету механизмі Азитромициннің әсер ету механизмі рибосоманың 50S суббірлігімен байланысу есебінен бактериялар ақуызының биосинтезін тежейді; әдетте, дәрілік зат бактериостатикалық әсер етеді. Фармакокинетика мен фармакодинамика арасындағы өзара байланыс Азитромициннің тиімділігі айтарлықтай дәрежеде AUC мәндерінің қатынасына және ең төмен тежейтін концентрацияға (ЕТТК) байланысты. Резистенттілік механизмдері Микроорганизмдердің азитромицинге резистенттілігін дамыту механизмдері: - эффлюкс - жасушадан тек 14- және 15-мүшелі макролидтердің шығарылуына ықпал ететін (М-фенотип деп аталатын) цитоплазмалық жарғақшадағы эффлюкс сорғыларының санының артуы; - нысаналардың модификациясы - 23S рибосомалық рибонуклеин қышқылын (23S рРНҚ) метилдеу кезінде дәрілік заттың рибосомалардағы байланыстыру бөліктеріне жақындығы төмендейді, нәтижесінде B (SB) тобының стрептограминдеріне (MLS B-фенотип деп аталатын), макролидтеріне (М) және линкозамидтеріне (L) резистенттілік пайда болады; - макролидтердің ферментативті белсенділігін жою (ең аз клиникалық мәні бар). М-фенотипте азитромицинге кларитромицинге, эритромицинге немесе рокситромицинге толық айқаспалы резистенттілік байқалады, MLSB-фенотипте қосымша клиндамицинге және стрептограминге айқаспалы резистенттілік байқалады; ішінара айқаспалы резистенттілік 16-мүшелі макролид спирамицинге де байқалады. Шекті концентрациялар Микробқа қарсы препараттарға сезімталдықты анықтау жөніндегі Еуропалық комитеттің (EUCAST) деректеріне сәйкес, стандартты сұйылту серияларын қолдана отырып жүргізілген зерттеулерде азитромицинге сезімтал және резистентті микроорганизмдер үшін келесі ЕКТК белгіленді (11.0 нұсқасы): Патогенді микроорганизм — S — R Staphylococcus spp.* — ≤ 1 мг/л — > 2 мг/л Streptococcus spp. (A, B, C, G тобының)* — ≤ 0,25 мг/л — > 0,5 мг/л Streptococcus pneumoniae* — ≤ 0,25 мг/л — > 0,5 мг/л Moraxella catarrhalis* — ≤ 0,25 мг/л — > 0,5 мг/л Neisseria gonorrhoeae# — ≤ 1 мг/л — > 1 мг/л * Эритромицинді азитромицинге сезімталдықты растау үшін зерттелетін зат ретінде пайдалануға болады. # Азитромицин әрқашан басқа тиімді антибиотикпен біріктірілімде қолданылады. Шекті концентрация жабайы типтегі изоляттарды сезімталдығы төмен изоляттардан ажыратуға мүмкіндік беретін эпидемиологиялық шекті мәнге (epidemiological cut-off value, ECOFF) негізделген. S – стандартты экспозиция кезіндегі сезімтал микроорганизм; I – экспозиция жоғарылаған кезде сезімтал микроорганизм; R – резистентті микроорганизм. Жүре пайда болған резистенттіліктің таралуы Бактериялардың жекелеген түрлерінде жүре пайда болған резистенттіліктің таралуы географиялық өңірге байланысты және уақыт өте келе өзгеруі мүмкін. Осыған байланысты белгілі бір уақыт кезеңінде, әсіресе ауыр инфекцияларды тиісті емдеу үшін белгілі бір өңірдегі микроорганизмдердің резистенттілігі туралы ақпарат болуы керек. Бактериялардың резистентті штаммдары туралы ақпаратты ескере отырып, азитромицинді қолданудың тиімділігі күмән тудыратын жағдайларда тиісті маманнан кеңес алу керек. Ауыр инфекцияларды емдеу кезінде немесе емдеудің тиімсіздігі кезінде аурудың қоздырғышын және оның азитромицинге сезімталдығын анықтауға бағытталған микробиологиялық диагностика жүргізу қажет. Төменде жүре пайда болған азитромицинге резистенттіліктің соңғы 5 жылдағы таралуы туралы деректер келтірілген (2021 жылғы сәуірдегі жағдай бойынша резистенттілік мониторингі бойынша ұлттық жобалар мен зерттеулердің мәліметтеріне сәйкес). Әдетте микроорганизмдердің сезімтал штаммдары: - аэробты грамоң микроорганизмдер - Mycobacterium avium*, Streptococcus pyogenes; - аэробты грамтеріс микроорганизмдер - Legionella pneumophila*, Moraxella catarrhalis, Neisseria gonorrhoeae; - басқа микроорганизмдер-Chlamydia trachomatis*, Chlamydophila pneumoniae*, Mycoplasma pneumoniae*. Жүре пайда болатын резистенттілікке ие болуы мүмкін микроорганизм штаммдары: - аэробты грамоң микроорганизмдер - Staphylococcus aureus (метициллин-сезімтал), Staphylococcus aureus (метициллин-резистентті)+, Staphylococcus epidermidis, Staphylococcus haemolyticus, Staphylococcus hominis, Streptococcus agalactiae, Streptococcus pneumoniae^. Табиғи резистенттілігі бар микроорганизмдер штаммдары: - аэробты грамтеріс микроорганизмдер-Escherichia coli, Klebsiella spp., Pseudomonas aeruginosa. * Құжатты жариялау кезінде өзекті деректер болған жоқ; әдеби дереккөздерде, іргелі еңбектерде және емдеу нұсқаулықтарында микроорганизмнің болжамды сезімталдығы туралы ақпарат болды. + Кем дегенде географиялық өңірлердің бірінде изоляттардың резистенттілік деңгейі 50%-дан астам болды. ^ Инвазивті ауруларда изоляттардың резистенттілік деңгейі 10% - дан төмен болды. Балалар мен жасөспірімдер Балалардың қатысуымен жүргізілген зерттеулер нәтижелеріне сәйкес азитромицин безгекті емдеу үшін монотерапия ретінде де, хлорохин немесе артемизинин негізіндегі дәрілік заттармен біріктірілген ем құрамында да пайдалану ұсынылмайды, себебі азитромицин асқынбаған безгекті емдеу үшін ұсынылған безгекке қарсы препараттармен салыстырғанда жеткілікті тиімді емес екендігі анықталды.

Дозалау режимі Азитромицин басқа антибиотиктерден организмнің тіндеріне жоғары жақындығымен ерекшеленеді. Дәрілік заттың организм тіндеріндегі концентрациясы қан сарысуындағы концентрациялардан 50 есеге дейін асады, ал тіндерден жартылай шығарылу кезеңі 2-4 күн аралығында өзгереді. Осыған байланысты Зиромин препаратын (ішке қабылдау үшін суспензия дайындауға арналған ұнтақ) және микробқа қарсы басқа дәрілерді дозалау режимдерінде елеулі айырмашылықтар бар. Дозалау Дене салмағы 45 кг-нан кем балалар мен жасөспірімдерге арналған азитромициннің дозасы дене салмағын ескере отырып есептеледі және 3 күн ішінде тәулігіне бір рет кг дене салмағына 10 мг немесе бірінші күні тәулігіне бір рет кг дене салмағына 10 мг және екінші күннен бесінші күнге дейін тәулігіне бір рет кг дене салмағына 5 мг құрайды (ерекшелік: стрептококкты фарингитті қараңыз). Пациенттің дене салмағы ескерілген дәрілік затты дозалау режимдері: Пациенттің дене салмағы — Күндер — Азитромициннің тәуліктік дозасы — Суспензия көлемі 15-25 кг — 1-3 — 200 мг — 5 мл 26-35 кг — 1-3 — 300 мг — 7,5 мл 36-45 кг — 1-3 — 400 мг — 10 мл Дене салмағы 45 кг-нан асатын ересектер мен жасөспірімдерде үлбірлі қабықпен қапталған таблеткалар түріндегі азитромицинді (250 мг және 500 мг доза) қолдануға болады. 5 күндік емдеу схемасы Баламалы нұсқа ретінде азитромицинді бірінші күні кг дене салмағына 10 мг және емдеудің келесі 4 күні бойы күн сайын кг дене салмағына 5 мг дозада қолдануға болады (тәуліктік дозаны өлшеуіш шприцтің көмегімен оңай өлшеуге болады). Жедел ортаңғы отит кезінде азитромициннің жалпы дозасы кг дене салмағына 30 мг құрайды. Дәрілік затты бір рет немесе 3 күндік немесе 5 күндік емдеу схемасына сәйкес қолданады (жоғарыда көрсетілген дозалау режимдеріне сәйкес). Стрептококкты фарингит кезінде азитромицинді кг дене салмағына 10 мг немесе кг дене салмағына 20 мг (тәуліктік доза 500 мг аспауы тиіс) дозаларда 3 күн ішінде қолданады. Клиникалық зерттеулерде жоғарыда көрсетілген дозаларда дәрілік заттың салыстырмалы клиникалық тиімділігі бар екені анықталды. Дегенмен, азитромицинді тәулігіне кг дене салмағына 20 мг дозада қолданғанда бактериялардың эрадикация дәрежесі жоғары болады. Пенициллин Streptococcus pyogenes туындатқан фарингитті емдеу және ревматизмдік қызбаның профилактикасы үшін бірінші таңдау препараты болып табылатынын назарға алған жөн. Барлық көрсетілімдер бойынша қолданған кезде балалар үшін азитромициннің ең жоғары жалпы дозасы 1500 мг құрайды (ересектер үшін әдеттегі доза). 2000 мг дозада қолдану үшін үлбірлі қабықпен қапталған таблеткалар түріндегі азитромицинді (250 мг және 500 мг доза) пайдалануға болады. Дене салмағы 45 кг кем балалар мен жасөспірімдерде дәрілік затты емдеу жөніндегі қолданыстағы клиникалық нұсқауларға сәйкес пайдалану қажет. Қолдану ұзақтығы Әдетте, балалар мен ересектерде тиісті дозада азитромицинмен 3 күндік емдеу режимі қолданылады. Баламалы нұсқа ретінде азитромицинмен 5 күндік емдеу схемасын тиісті жалпы дозада қолдануға болады. Пневмонияны азитромицинмен 5 күндік емдеу схемасының тиімділігін растайтын деректер жеткілікті; көп жағдайда 3 күндік емдеу схемасы да тиімді болып табылады. Пациенттердің ерекше топтары Егде жастағы пациенттер Егде жастағы пациенттерде азитромицинді ересектердегідей дозада қолдану керек. Егде жастағы пациенттерде жүрек аритмиясының туындауына бейімділік болуы мүмкін, сондықтан мұндай пациенттерде дәрілік затты қолданған кезде жүрек аритмиясы мен "пируэт" типті қарыншалық тахикардияның даму қаупіне байланысты ерекше сақ болу керек. Бүйрек жеткіліксіздігі бар пациенттер Шумақтық сүзілу жылдамдығы 10-80 мл/мин құрайтын, бүйрек функциясының бұзылулары бар пациенттерде дәрілік заттың дозасын түзету талап етілмейді. Бауыр жеткіліксіздігі бар пациенттер Бауыр функциясының жеңіл және орташа ауырлық дәрежесіндегі бұзылулары бар пациенттерде дәрілік заттың дозасын түзету талап етілмейді. Енгізу әдісі мен жолы Ұнтақ ішке қабылдау үшін суспензия дайындауға арналған. Суспензияны дайындар алдында құтыны қарқынды сілку қажет. Ішінде Зиромин препаратының ұнтағы бар құтыға суспензия дайындау үшін салқындатылған қайнаған суды (ыстық суды емес!) қосу керек. Шприцтің көмегімен 15 мл суды өлшеп, құтыға біртіндеп қосып, біртекті суспензия алынғанша мұқият араластыру керек. Ұнтақ пен 15 мл суды араластырғанда 30 мл суспензия алынады. 30 мл дайын суспензия құрамында 200 мг/5 мл азитромицин бар. Дайындалған суспензияны 25ºС-ден аспайтын температурада 5 күннен асырмай сақтау керек. Препаратты тамақ ішуге қарамастан қабылдауға болады. Препаратты әр қолданар алдында құтыны сілку қажет. Дайындалған суспензияны дозалау үшін қаптамадағы өлшеуіш шприцті қолданады. Суспензияны қабылдағаннан кейін өлшеуіш шприцті ағынды сумен жуады, кептіреді және препаратпен бірге сақтайды.

Азитромицинге, эритромицинге, кез келген макролидті немесе кетолидті басқа антибиотиктерге немесе қосымша заттардың кез келгеніне аса жоғары сезімталдық.

Өте жиі • диарея • іштің ауыруы • жүрек айнуы • метеоризм • іштегі жайсыздық • сұйық нәжіс Жиі • бас ауыруы • құсу • қандағы лимфоциттер санының азаюы • қандағы эозинофилдер санының артуы • қандағы бикарбонат деңгейінің төмендеуі • қандағы базофилдер, моноциттер мен нейтрофилдер санының артуы • анорексия • бас айналу • парестезия • дәм сезудің бұзылуы • көрудің бұзылуы • бөртпе • қышыну • артралгия • шаршау • кереңдік Жиі емес • кандидоз • қынап инфекциялары • пневмония • зең инфекциясы • бактериялық инфекция • фарингит • гастроэнтерит • респираторлық аурулар • ринит • ауыз қуысының кандидозы • лейкопения • нейтропения • эозинофилия • ангионевроздық ісіну • аса жоғары сезімталдық реакциялары • күйгелектік • ұйқысыздық • ұйқышылдық • есту мүшесі тарапынан бұзылулар • вертиго • пальпитация • ысыну • ентігу • мұрыннан қан кету • іш қату • диспепсия • гастрит • дисфагия • іштің кебуі • ауыздың құрғауы • кекіру • ойық жаралы стоматит • сілекей бөлінудің жоғарылауы • есекжем • дерматит • терінің құрғауы • қатты терлеу • остеоартрит • миалгия • арқаның ауыруы • мойынның ауыруы • дизурия • бүйректің ауыруы • метроррагия • аталық без тарапынан бұзылулар • ісіну • астения • дімкәстану • беттің ісінуі • кеуденің ауыруы • дене температурасының жоғарылауы • ауыру • шеткері ісінулер • қандағы аспартатаминотрансфераза, аланинаминотрансфераза, билирубин, мочевина және креатинин деңгейлерінің жоғарылауы • қандағы калий концентрациясының өзгеруі • қандағы сілтілі фосфатаза, хлоридтер, глюкоза деңгейлерінің жоғарылауы • қандағы тромбоциттер санының артуы • гематокриттің төмендеуі • қандағы бикарбонат деңгейінің жоғарылауы • қандағы натрий концентрациясының өзгеруі • хирургиялық араласымнан кейінгі асқынулар Сирек • ажитация • бауыр функциясының бұзылуы • сарғаю • холестаз • фотосезімталдық реакциялары • жедел жайылған экзантематозды пустулез (AGEP) • эозинофилиямен және жүйелік симптомдармен дәрілік реакция (DRESS) (жағымсыз реакциялардың жиілігін бағалау үшін "үш ереже" қолданылды) • гипестезия • есту қабілетінің бұзылуы • құлақтағы шуыл • гепатит • Стивенс-Джонсон синдромы (SJS) Жиілігі белгісіз • жалған жарғақшалы колит • тромбоцитопения • гемолитикалық анемия • ауыр (кейде өмірге қауіп төндіретін) анафилаксиялық реакциялар (мысалы, анафилаксиялық шок) • озбырлық • үрей • сандырақ • елестеулер • естен тану • құрысу • психомоторлық қозу • иіс/дәм сезудің жоғалуы • паросмия • миастения гравис • есту қабілетінің бұзылуы, соның ішінде кереңдік және/немесе құлақтағы шуыл • "пируэт" типті қарыншалық тахикардия • аритмия, соның ішінде қарыншалық тахикардия, электрокардиограммадағы QT аралығының ұзаруы • артериялық гипотензия • панкреатит • тіл түсінің өзгеруі • бауыр жеткіліксіздігі (сирек жағдайларда өліммен аяқталады) • бауыр некрозы • уытты эпидермальді некролиз (TEN) • мультиформды эритема • интерстициальді нефрит • бүйректің жедел жеткіліксіздігі Жағымсыз дәрілік реакциялар туындағанда медициналық қызметкерге, фармацевтикалық қызметкерге немесе дәрілік препараттардың тиімсіздігі туралы хабарламаларды қоса, дәрілік препараттарға болатын жағымсыз реакциялар (әсерлер) бойынша ақпараттық деректер базасына тікелей хабарласу керек Қазақстан Республикасы Денсаулық сақтау министрлігі Медициналық және фармацевтикалық бақылау комитеті "Дәрілік заттар мен медициналық бұйымдарды сараптау ұлттық орталығы" ШЖҚ РМК http://www.ndda.kz

Дәрілік затты ұсынылған дозадан асатын дозаларда қолдану кезінде туындайтын жағымсыз реакциялар ұсынылған дозаларда қабылдау кезінде байқалатын жағымсыз реакцияларға ұқсас. Симптомдары Макролидті антибиотикпен артық дозаланудың әдеттегі симптомдарына қайтымды естімей қалу, айқын жүрек айнуы, құсу және диарея жатады. Емі Артық дозаланған жағдайда қажет болғанда өмірлік маңызды функциялардың сақталуын қамтамасыз ету, белсендірілген көмірді пайдалану және жалпы симптоматикалық ем жүргізу керек.

Бауырдың ауыр аурулары бар пациенттерде Зиромин препаратын сақтықпен қолданған жөн, себебі азитромициннің организмнен шығарылу процесінде гепатобилиарлық жүйе басым түрде қатысады. Арнайы ескертулер Гепатоуыттылық Бауырдың ауыр аурулары бар пациенттерде Зиромин препаратын сақтықпен қолданған жөн, себебі азитромициннің организмнен шығарылу процесінде гепатобилиарлық жүйе басым түрде қатысады. Азитромицинді қолдану кезінде бауыр функциясының бұзылуы, гепатит, холестаздық сарғаю, бауыр некрозы және бауыр жеткіліксіздігі, оның ішінде өліммен аяқталған жағдайлар туралы хабарланды; бұл ретте, кейбір пациенттерде бауыр аурулары бұрыннан болған немесе олар басқа гепатоуытты дәрілік заттармен ем алған. Бауыр функциясының бұзылуын көрсететін симптомдар дамыған кезде (мысалы, сарғаюмен тез үдейтін астения, несептің күңгірттенуі, қан кетуге бейімділік немесе бауыр энцефалопатиясы) бауырдың функционалдық жағдайын дереу бағалау керек. Бауыр функциясының бұзылулары пайда болған кезде Зиромин препаратымен емдеуді тоқтату керек. Балалардағы гипертрофиялық пилорустық стеноз Жаңа туған нәрестелерде эритромицинді қолданғаннан кейін (туылғаннан кейін алғашқы 42 күнде емдеу) гипертрофиялық пилорустық стеноздың даму жағдайлары тіркелді. Егер баланы тамақтандыру кезінде құсу немесе тітіркену пайда болса, ата-аналар немесе балаға күтім жасайтын адамдар дәрігермен кеңесу керек. Clostridium difficile туындатқан диарея (CDAD) Азитромицинді қоса алғанда, антибиотиктердің көбін қолданғанда Clostridium difficile туындатқан диареяның пайда болу жағдайлары туралы хабарланды, оның көріністерінің ауырлығы диареяның жеңіл түрінен өліммен аяқталған колитке дейін өзгеруі мүмкін. Антибиотикпен емдеу аясында ішек микрофлорасы өзгереді, бұл Clostridium difficile штаммдарының шамадан тыс өсуіне әкелуі мүмкін. Clostridium difficile диареяның дамуына ықпал ететін А және В токсиндерін өндіреді. Гипертоксин өндіретін Clostridium difficile штаммдары анағұрлым жоғары аурушаңдық пен өлім-жітімге байланысты, олар антибиотикпен емдеуге резистентті болуы мүмкін, бұл ретте колэктомияны жүргізу қажет болуы мүмкін. Сондықтан антибиотиктерді қолданғаннан кейін диарея дамыған барлық пациенттерде Clostridium difficile туындатқан диареяның туындау қаупін назарға алу керек. Сонымен қатар, мұндай пациенттерде анамнезді мұқият жинау керек, өйткені Clostridium difficile туындатқан диарея антибиотиктерді қабылдағаннан кейін екі айдан соң да дамуы мүмкін. Жалған жарғақшалы колит Жалған жарғақшалы колит жағдайлары макролидті антибиотиктерді қолданғаннан кейін тіркелді. Осыған байланысты азитромицинмен емдеуден кейін шамамен 3 апта ішінде пайда болатын диареясы бар пациенттерде осы аурудың даму қаупін ескеру керек. Зиромин препаратымен емдеу аясында пайда болған жалған жарғақшалы колиті бар пациенттерде ішек перистальтикасын төмендететін дәрілік заттарды қолдануға болмайды. Суперинфекциялар Зиромин препаратымен емдеу кезінде резистентті патогенді микроорганизмдерден (мысалы, зеңді инфекцияларының қоздырғыштары) туындаған суперинфекциядан туындаған симптомдардың даму қаупін ескеру керек). Суперинфекция дамыған кезде препаратты қабылдауды тоқтату және тиісті ем жүргізу қажеттілігі туындауы мүмкін. Айқаспалы резистенттілік Айқаспалы резистенттілікке байланысты Зиромин препаратымен жүргізілетін емді эритромицинге резистентті грамоң микроорганизмдерден және метициллинге резистентті стафилококктар штаммдарының көбінен туындаған инфекциялық аурулары бар пациенттерде жүргізуге болмайды. Географиялық өңірде азитромицинге және басқа антибиотиктерге резистентті микроорганизмдер штаммдарының таралуы туралы ақпаратты назарға алу қажет. Бүйрек жеткіліксіздігі Бүйрек жеткіліксіздігі бар пациенттерде (шумақтық сүзілу жылдамдығы 10 мл/мин кем) Зиромин препаратын сақтықпен қолданған жөн, өйткені мұндай пациенттерде қан плазмасындағы азитромицин концентрациясы 33% - ға артқаны анықталды. Ауыр инфекциялар Зиромин препараты қандағы антибиотиктің жоғары концентрациясына тез жетуде қажеттілігі бар ауыр инфекцияларды емдеуге арналмаған. Ұзақ уақыт бойы қолдану Жоғарыда көрсетілген көрсетілімдер кезінде азитромицинді ұзақ уақыт бойы қолдану қауіпсіздігі мен тиімділігі туралы деректер жоқ. Жиі қайталанатын инфекциялар кезінде баламалы антибиотиктерді қолдану туралы мәселені қарастырған жөн. Фарингит/тонзиллит Зиромин препараты Streptococcus pyogenes туындатқан фарингитті немесе тонзиллитті емдеуге арналған таңдау препараты болып табылмайды. Пенициллин жедел ревматизмдік қызбаны емдеу және профилактикасы үшін таңдау препараты болып табылады. Синусит Зиромин препараты жиі синуситті емдеуге арналған таңдау препараты болып табылмайды. Жедел ортаңғы отит Зиромин препараты жиі жедел ортаңғы отитті емдеуге арналған таңдау препараты болып табылмайды. Инфекция жұққан күйік Зиромин препараты инфекция жұққан күйікті емдеуге арналмаған. Жыныстық жолмен берілетін инфекциялар Жыныстық жолмен берілетін инфекциялар кезінде Treponema pallidum туындатқан қатарлас жүретін аурудың болуын жоққа шығару керек. Неврологиялық және психикалық бұзылыстар Неврологиялық және психикалық бұзылыстары бар пациенттерде Зиромин препаратын сақтықпен қолданған жөн. Аса жоғары сезімталдық Азитромицинді пайдалану кезінде эритромицинді немесе басқа макролидтерді қолданғандағыдай, сирек жағдайларда ангионевроздық ісінуді және анафилаксияны (сирек өліммен аяқталатын), жедел жайылған экзантематозды пустулезді (AGEP), Стивенс-Джонсон синдромын (SJS), уытты эпидермальді некролизді (TEN) (сирек өліммен аяқталатын) қоса алғанда, ауыр аллергиялық реакциялар және эозинофилиямен және жүйелік симптомдармен дәрілік реакция (DRESS) байқалды. Азитромицинді қолданумен байланысты жоғарыда аталған реакциялардың кейбірі қайталанатын симптомдармен қатарлас жүрді және ұзаққа созылатын бақылау мен емдеуді қажет етті. Аллергиялық реакция туындаған жағдайда, Зиромин препаратын қолдануды тоқтатып, тиісті емдеуді бастау қажет. Симптоматикалық емді тоқтатқаннан кейін аллергия симптомдары қайтадан пайда болуы мүмкін екенін ескерген жөн. Қастауыш алкалоидтары (қастауыш алкалоидтарының туындылары) Қастауыш алкалоидтары мен макролидті антибиотиктерді бір мезгілде қолданғанда эрготизм анағұрлым қысқа мерзімде дамығаны анықталды. Азитромицин мен қастауыш алкалоидтарының өзара әрекеттесуі зерттелмеген. Эрготизмнің даму қаупіне байланысты Зиромин препаратын және қастауыш алкалоидтарының туындыларын бірге қолдануға болмайды. QT аралығының ұзаруы Азитромицинді қоса, макролидтермен ем қабылдаған пациенттерде жүректің реполяризация фазасының ұзаруы және QT аралығының ұзаруы байқалды, бұл жүрек аритмиялары мен "пируэт" типті қарыншалық тахикардияның даму қаупімен байланысты. Зиромин препаратын қолданар алдында қаупі жоғары пациенттерде пайда/қауіп арақатынасын бағалау кезінде QT аралығының ұзару қаупін ескеру қажет, себебі осының нәтижесінде жүректің тоқтап қалуы (кейде өліммен аяқталуы) туындауы мүмкін. QT аралығының ұзаруына қатысты қауіп топтары: - туа біткен немесе құжатпен расталған QT аралығының жүре пайда болған ұзару түрлері бар пациенттер; - ІА класының (хинидин және прокаинамид) және III класының (дофетилид, амиодарон және соталол) аритмияға қарсы препараттар, цизаприд және терфенадин, психозға қарсы дәрілер (пимозид), антидепрессанттар (циталопрам), фторхинолондар (моксифлоксацин және левофлоксацин) сияқты QT аралығын ұзартатын басқа дәрілік заттармен бір мезгілде ем алатын пациенттер; - су-электролит теңгерімінің бұзылуы, әсіресе гипокалиемия және гипомагнемиясы бар пациенттер; - клиникалық тұрғыдан маңызы бар брадикардиясы, жүрек аритмиясы немесе жүректің ауыр жеткіліксіздігі бар пациенттер; - әйел пациенттер және бұрыннан проаритмиясы бар егде жастағы пациенттер. Миастения гравис Азитромицинмен емдеу кезінде пациенттерде миастения гравис симптомдары асқынған немесе миастениялық синдром дамыған деген хабарламалар бар. Гидроксихлорохин немесе хлорохин Гидроксихлорохин немесе хлорохин қабылдаған барлық пациенттерде азитромицинді тағайындамас бұрын, жүрек-қантамыр асқынулары мен жүрек-қантамыр ауруларынан болатын өлім қаупінің жоғарылауына байланысты пайда мен қауіп арақатынасын мұқият бағалау қажет. Қосымша заттар Зиромин препаратының құрамында сахароза бар, сондықтан фруктоза жақпаушылығымен, глюкоза-галактоза мальабсорбциясымен немесе сахараза-изомальтаза жеткіліксіздігімен сипатталатын сирек тұқым қуалайтын ауруларға шалдыққан пациенттерге бұл препаратты қабылдауға болмайды. 5 мл дайындалған суспензия құрамында 3,63 г сахароза бар, мұны қант диабеті бар пациенттерде препаратты қолданған кезде ескеру керек. Зиромин препаратының құрамында натрий бензоаты (5 мл дайындалған суспензияда 14,32 мг) бар, ол жаңа туған нәрестелерде (4 аптаға дейін) сарғаюды (тері мен ақ қабықтың сары түске боялуы) күшейтуі мүмкін. Қандағы билирубин деңгейінің жоғарылауына байланысты, оның альбуминмен байланысынан ығыстырылу салдарынан, жаңа туылған нәрестелерде сарғаю күшейген кезде ядролық сарғаю пайда болуы мүмкін (kernicterus, ми тінінде конъюгацияланбаған билирубин шөгінділері). Зиромин препаратының құрамында 5 мл дайындалған суспензияда 1 ммольден аз натрий (23 мг) бар, яғни іс жүзінде "құрамында натрий жоқ". Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері Азитромицинді қолдану тәжірибесі, әдетте, дәрілік зат зейін қою қабілетіне және реакция жылдамдығына әсер етпейтінін көрсетеді. Алайда, пайда болған жағымсыз реакциялар реакция жылдамдығын өзгерте алады және көлік құралдарын жүргізу және механизмдерді басқару қабілетіне әсер етуі мүмкін.

Жүктілік Қазіргі уақытта жүкті әйелдерде Зиромин препаратын қолдану туралы деректер жеткіліксіз. Бірнеше елдерде жүргізілген обсервациялық зерттеулерден алынған және жүктілік (бірінші триместрдегі> 7300 әсер ету жағдайлары) кезіндегі азитромициннің әсерін антибиотиктерді қолданбаумен немесе сол кезеңде басқа антибиотикті қолданумен салыстырған деректердің үлкен көлемі бар. Зерттеулердің көпшілігі шарана үшін жағымсыз әсерлермен, мысалы, ауқымды туа біткен даму ақауларымен немесе жүрек-қантамыр жүйесінің ақауларымен байланысты көрсетпесе де, ерте мерзімдерде азитромициннің әсерінен кейін жүктіліктің соңына дейін жетпеу қаупінің жоғарылауын айғақтайтын шектеулі эпидемиологиялық дәлелдер бар. Осы себепті азитромицинді жүктілік кезінде тек клиникалық көрсетілімдер бойынша және емдеудің күтілетін пайдасы кез келген ықтимал шамалы жоғары қауіптерден асып кетсе ғана қолдану керек. Лактация Жарияланған шектеулі деректер азитромициннің емшек сүтімен бөлінетіндігін көрсетеді, бұл ретте болжамды ең жоғары доза тәулігіне орташа 0,1-0,7 мг/кг құрайды. Азитромицин еметін балаларда ауыр жағымсыз реакциялар туындатпады. Еметін балада сенсибилизация, диарея және зең инфекциялары байқалуы мүмкін. Бала емізуді тоқтату немесе Зиромин препаратымен емді уақытша тоқтату/тоқтату мәселесінде шешім қабылдау кезінде бала үшін емізудің пайдасын және ана үшін препаратты қолдану артықшылықтарын ескеру керек.

Антацидтер және тұз қышқылы секрециясының тежегіштері Зерттеулердің бірінде бейорганикалық қосылыстар болып табылатын антацидтермен бір мезгілде қабылдаған кезде қан сарысуындағы азитромициннің (Cmax) ең жоғары концентрациясы 24% - ға төмендегені анықталды; бұл ретте дәрілік заттың сіңу дәрежесі кеміген жоқ ("концентрация-уақыт" қисығының астындағы аудан (AUC) мәні бойынша бағалау). Зиромин препаратын жоғарыда көрсетілген антацидтермен бір мезгілде қабылдауға болмайды, дәрілік заттарды қабылдау арасындағы аралық 2-3 сағатты құрауы тиіс. Циметидин азитромициннің сіңу жылдамдығы мен дәрежесіне әсер еткен жоқ, сондықтан циметидинді Зиромин препаратымен бір мезгілде қабылдауға болады. Цетиризин Дені сау еріктілерде азитромицин мен цетиризинді (20 мг) 5 күн бойы тепе-тең жағдайда пайдаланған кезде фармакокинетикалық өзара әрекеттесу және QT аралық ұзақтығының елеулі өзгерістері байқалған жоқ. Қастауыш алкалоидтары (қастауыш алкалоидтарының туындылары) Осы уақытқа дейін азитромициннің дигидроэрготаминмен немесе гидрогенизацияланбаған қастауыш алкалоидтарымен қандай да бір өзара әрекеттесудің тіркелмегеніне қарамастан, вазоконстрикторлық әсердің және қанайналым бұзылыстарының, әсіресе қол саусақтарында және аяқ башайларында, даму қаупін жоққа шығаруға болмайды. Сондықтан сақтық шарасы ретінде Зиромин препаратын қастауыш алкалоидтарымен және олардың туындыларымен біріктірілімде қолдануға болмайды. Вирусқа қарсы дәрілер Қазіргі уақытта азитромициннің вирусқа қарсы дәрілермен өзара әрекеттесуі туралы деректер көлемі дозалау режимін түзету бойынша ұсынымдар беру үшін жеткіліксіз болып табылады; төменде көрсетілген препараттармен өзара әрекеттесуі зерттелген. Зидовудин Азитромицинді бір мезгілде қолданғанда (1000 мг дозада бір рет қабылдау; 600 мг немесе 1200 мг дозада көп реттік қабылдау) бүйрекпен шығарылуын қоса, зидовудин немесе оның глюкуронидтік метаболитінің фармакокинетикасына елеусіз әсер етті. Бұл ретте шеткері қанның мононуклеарлы жасушаларында фосфорланған зидовудин, клиникалық белсенді метаболит концентрациясының жоғарылауы байқалды; бұл жағдайдың клиникалық маңыздылығы белгісіз, дегенмен бұл пациенттер үшін артықшылық бола алады. Диданозин Адамның иммунтапшылығы вирусын (АИТВ) жұқтырған 6 пациентте азитромицинді (тәулігіне 1200 мг) және диданозинді (тәулігіне 400 мг) бірге қолданғанда диданозиннің фармакокинетикасы азитромициннің орнына плацебо алған пациенттерден айырмашылығы жоқ. Рифабутин Азитромицин мен рифабутинді біріктіріп қолданған кезде қан сарысуындағы екі дәрілік заттың орташа концентрациясы айтарлықтай өзгерген жоқ. Пациенттерде азитромицин мен рифабутинді бір мезгілде пайдаланған кезде нейтропения байқалған. Дигоксин және колхицин (P-гликопротеин субстраттары) Азитромицинді және дигоксин мен колхицин сияқты Р-гликопротеин субстраттарын қоса, макролидті антибиотиктерді бір мезгілде қолданғанда қан сарысуындағы соңғысының концентрациясының жоғарылауы байқалған. Зиромин препаратын және дигоксин сияқты P-гликопротеин субстраттарын бірге пайдаланған кезде соңғысының қан сарысуындағы концентрациясының жоғарылау қаупін ескеру керек. Зироминмен емдеуді тоқтатқан кезде және одан кейін клиникалық мониторинг жүргізу қажет; қажет болған жағдайда қан сарысуындағы дигоксин концентрациясын арттыру керек. Азитромицин бауырдағы цитохром P450 жүйесінің ферменттеріне айтарлықтай әсер етпейді. Азитромицинге эритромицин мен басқа макролидтер қатысатын фармакокинетикалық өзара әрекеттесулер тән болу ықтималдылығы аз. Препарат метаболит-цитохром кешенінің түзілуі арқылы бауырдағы цитохром P450 жүйесінің ферменттерін индукцияламайды және тежемейді. Клиникалық зерттеулерде аторвастатин, карбамазепин, эфавиренз, флуконазол, индинавир, метилпреднизолон, мидазолам, силденафил, триазолам, триметоприм/сульфаметоксазол біріктірілімі сияқты цитохром Р450 жүйесі ферменттерінің қатысуымен метаболизденетін азитромицин мен дәрілік заттардың арасында елеулі өзара әрекеттесу байқалмаған. Дегенмен, жоғарыда аталған дәрілік заттарды Зиромин препаратымен бір мезгілде қолданған кезде сақ болу керек. Аторвастатин Азитромицинді (тәулігіне 500 мг) және аторвастатинді (тәулігіне 10 мг) бірге пайдаланған кезде қан плазмасындағы соңғысының концентрациясы өзгерген жоқ (3-гидрокси-3-метил-глутарил-кофермент A редуктазасын тежеуді зерттеу нәтижелері негізінде бағалау). Бұл ретте статиндермен біріктіріп азитромицин алған пациенттерде маркетингтен кейінгі кезеңде рабдомиолиз жағдайлары тіркелді. Теофиллин Фармакокинетикалық және клиникалық зерттеулерде азитромицин мен теофиллин арасындағы өзара әрекеттесулер анықталған жоқ. Теофиллин мен басқа макролидтер арасындағы өзара әрекеттесулер туралы хабарламалардың болуына байланысты, Зиромин препаратын теофиллинмен бірге қолданғанда қан плазмасындағы соңғысының концентрациясының жоғарылауымен байланысты әдеттегі симптомдарды анықтау мақсатында пациенттерге мұқият мониторинг жүргізу қажет. Антикоагулянттар Дені сау еріктілердегі фармакокинетикалық зерттеулерде азитромицин варфариннің (бір рет 15 мг) антикоагулянттық әсеріне әсер еткен жоқ. Алайда, азитромицинмен бір мезгілде қабылдау кезінде кумарин қатарындағы пероральді антикоагулянттардың антикоагулянттық әсерінің күшеюі туралы хабарламалар бар, бұл ретте себеп-салдарлық байланыс анықталмаған. Мұндай біріктірілімдерді пациенттерде пайдаланған кезде протромбиндік уақытқа жиі мониторинг жүргізген жөн. Циклоспорин 3 күн ішінде азитромицинді тәулігіне 500 мг дозада, содан кейін циклоспоринді 10 мг/кг дозада бір рет ішке қабылдаған дені сау еріктілердің қатысуымен жүргізілген фармакокинетикалық зерттеуде циклоспорин үшін Cmax және AUC0-5 мәндерінің едәуір артқаны анықталды. Зиромин мен циклоспорин препаратын бір мезгілде қолданғанда қан плазмасындағы циклоспорин концентрациясына сақтық таныту және бақылау, сондай-ақ оның дозасын тиісті түрде түзету керек. Терфенадин Фармакокинетикалық зерттеулерде азитромицин мен терфенадин арасындағы өзара әрекеттесу байқалған жоқ. Мұндай өзара әрекеттесу қаупін толығымен жоққа шығаруға болмайтын жағдайлар туралы сирек хабарламалар бар, бірақ бұл жағдайда дәрілік заттардың өзара әрекеттесуінің тікелей дәлелі анықталған жоқ. Зиромин препараты мен терфенадинді біріктіріп қолданғанда сақ болу керек. Басқа антибиотиктер Азитромицинге және макролидті антибиотиктерге (мысалы, эритромицин), сондай-ақ линкомицин мен клиндамицинге қатарлас резистенттіліктің даму қаупін назарға алған жөн; осы топтағы бірнеше дәрілік заттарды бірге пайдалану ұсынылмайды. QT аралығын ұзартатын дәрілік заттар Азитромицинді гидроксихлорохин сияқты жүрек аритмиясын әлеуетті түрде туындатуға қабілетті, QT аралығын ұзартатыны белгілі дәрілерді қабылдайтын пациенттерде сақтықпен қолдану керек. Нелфинавир Нелфинавир (тәулігіне үш рет 750 мг) мен азитромицинді (1200 мг) тепе-теңдік күйде бірге пайдаланған кезде соңғысының қан плазмасындағы концентрациясы жоғарылаған; бұл ретте клиникалық маңызды жағымсыз реакциялар тіркелмеген, азитромицин дозасын түзету талап етілмейді. Гидроксихлорохин немесе хлорохин Обсервациялық зерттеулердің деректері ревматоидты артритпен ауыратын пациенттерде азитромицин мен гидроксихлорохинді бірлесіп қолданғанда жүрек-қантамыр асқынуларының және жүрек-қантамыр ауруларынан болатын өлім қаупінің жоғарылайтынын көрсетеді. Гидроксихлорохин қабылдаған барлық пациенттерде азитромицинді тағайындамас бұрын пайда мен қауіптің арақатынасын мұқият бағалау қажет. Хлорохин қабылдаған пациенттерде азитромицинді тағайындамас бұрын, хлорохинді қолдану кезінде жоғарыда аталған қауіптің жоғарылауына байланысты пайда мен қауіптің арақатынасын мұқият бағалау қажет.

Сақтау мерзімі 5 жыл Жарамдылық мерзімі өткеннен кейін қолдануға болмайды! Сақтау шарттары 25°С-ден аспайтын температурада сақтау керек. Балалардың қолы жетпейтін жерде сақтау керек! Дайындалған суспензияны 5 күннен артық сақтауға болмайды.