Ибупрофен таблетки 200 мг

Бір таблетканың құрамында белсенді зат – ибупрофен, 200 мг, қосымша заттар: повидон К-25, магний стеараты, картоп крахмалы, қабығы: Аквариус™ Преферред қызғылт [гидроксипропилметилцеллюлоза (NRMS) 6ср, коповидон, полидекстроза, полиэтиленгликоль 3350, каприлик/каприк триглицеридтер (орта тізбекті триглицеридтер), титанның қостотығы (Е-171), кармуазин Лейк (Е-122) (15-17%)]. Сыртқы түрінің, иісінің, дәмінің сипаттамасы Екі беті дөңес, қызғылт түсті үлбірлі қабықпен қапталған таблеткалар. Таблеткалар беткейінің тегіс болмауына жол беріледі.

Бас сақинасы, арқаның ауыруы, тіс ауыруы, невралгия және етеккір кезіндегі ауырғанды, ревматизмдік және бұлшықет ауырғанын жеңілдету үшін. Ибупрофен ауыруды басады, қабыну мен температураны азайтады, бас ауыруы мен басқа да ауыруларды жеңілдетеді. Ибупрофен суық тию мен тұмау симптомдарын жеңілдетеді. Қолдану басталғанға дейін қажетті мәліметтер тізбесі

Нұсқаулықта көрсетілмеген.

Дозалау режимі Препарат тек қысқа мерзімді ішке қабылдауға арналған. Жағымсыз реакциялардың даму қаупін барынша ең төменге азайту мақсатында ибупрофенді тиімді ең төмен дозада және клиникалық әсерге қол жеткізу үшін қажетті ең жоғары қысқа кезең ішінде қабылдау керек. Қысқа мерзімді қолдану кезінде, егер симптомдар сақталса немесе нашарласа, пациент дәрігермен кеңесу керек. Егер ересектерде препаратты 10 күннен артық қабылдау қажет болса немесе симптомдар нашарласа, пациент дәрігерге қаралуы керек. Қажет болған жағдайда 1-2 таблеткадан тәулігіне 3 рет. Дозалар арасында кем дегенде 4 сағат өтуі тиіс. Ересектер үшін ең жоғары тәуліктік доза 1200 мг аспауы тиіс (24 сағат ішінде 6 таблеткадан артық емес). Балалар Ибупрофенді 18 жасқа дейінгі балаларға қолдануға болмайды. Бүйрек / бауыр жеткіліксіздігі бар пациенттер, егде жастағы пациенттер Жеңіл және орташа дәрежедегі бүйрек және/немесе бауыр жеткіліксіздігі бар пациенттерде және егде жастағы пациенттерде емдеудің ықтимал ең аз кезеңінде ең аз тиімді дозаны қолдану ұсынылады. Енгізу әдісі мен жолы Ішке. Таблеткаларды сумен ішіп, жұту керек. Қабылдау уақыты көрсетілген қолдану жиілігі Дозалар арасында кем дегенде 4 сағат өтуі тиіс. Дәрілік препараттың бір немесе бірнеше дозасын өткізіп алған кездегі қажетті шаралар Дәрілік препараттың дозасын қабылдауды өткізіп алған жағдайда белгілі бір уақытта мынадай дозаны қабылдау керек. Өткізіп алған дозаны толтыру мақсатында екі еселенген дозаны қабылдауға болмайды. Дәрілік препаратты қолдану тәсілін түсіндіру үшін медицина қызметкерінің кеңесіне жүгіну бойынша ұсынымдар Препаратты қолдану бойынша сұрақтар болған жағдайда медицина қызметкеріне жүгіну керек.

• ибупрофенге немесе қосымша заттардың кез келгеніне аса жоғары сезімталдық. • анамнезде ацетилсалицил қышқылын немесе басқа ҚҚСП қабылдағаннан кейінгі аса жоғары сезімталдық реакциялары (мысалы, демікпе, ринит, ангионевроздық ісіну немесе есекжем) • анамнездегі жедел немесе қайталанатын пептидтік ойық жара немесе қан кету (анықталған ойық жараның немесе қан кетудің екі немесе одан да көп көріністері) • анамнезінде алдыңғы ҚҚСП емімен байланысты асқазан-ішектен қан кетудің немесе тесілудің болуы • ауыр жүрек жеткіліксіздігі (NYHA бойынша IV класы), ауыр бүйрек немесе бауыр жеткіліксіздігі • жүктіліктің үшінші триместрі • 18 жасқа дейінгі балалар мен жасөспірімдер

Жиі емес - есекжем және қышыну сияқты аса жоғары сезімталдық реакциялары. Аса жоғары сезімталдық реакцияларына мыналар кіруі мүмкін: (а) спецификалық емес аллергиялық реакциялар және анафилаксия, (б) демікпе, демікпенің өршуі, бронх түйілуі, ентігуді қоса, тыныс алу жолдарының белсенділігі; немесе (в) тері тарапынан әртүрлі бұзылулар, соның ішінде әртүрлі типтегі бөртпе, қышыну, есекжем, пурпура, ангионевроздық ісіну және сирек жағдайда эксфолиативті және буллезді дерматоздар (эпидермалық некролиз және көп формалы эритема); - бас ауыруы; - іштің ауыруы, жүрек айнуы, диспепсия; - әртүрлі тері бөртпелері. Сирек - диарея, метеоризм, іш қату және құсу. Өте сирек - қан түзудің бұзылуы (анемия, лейкопения, тромбоцитопения, панцитопения, агранулоцитоз). Мұндай бұзылулардың алғашқы симптомдары - қызба, тамақ ауыруы, ауыз қуысының беткейлік ойық жаралары, тұмауға ұқсас симптомдар, қатты жүдеу, себепсіз қан кету және қанталау; - ауыр аса жоғары сезімталдық реакциялары. Симптомдарға мыналар кіруі мүмкін: беттің, тілдің және көмейдің ісінуі, ентігу, тахикардия, артериялық гипотензия (анафилаксия, Квинке ісінуі немесе ауыр анафилаксиялық шок); - асептикалық менингит. Дәрілік асептикалық менингиттің патогендік механизмі толық зерттелмеген. Дегенмен, ҚҚСП қабылдаумен байланысты асептикалық менингит туралы қолда бар деректер аса жоғары сезімталдық реакциясын (препарат қабылдауға уақытша және препаратты тоқтатқаннан кейін симптомдардың жоғалуына есебінен) көрсетеді. Айта кету керек, асептикалық менингит симптомдарының оқшауланған жағдайлары (мысалы, мойын бұлшықеттерінің сіресуі, бас ауыруы, жүрек айнуы, құсу, қызба немесе бағдардан жаңылу) аутоиммунды аурулары бар (мысалы, жүйелік қызыл жегі, дәнекер тіннің аралас ауруы) пациенттерде ибупрофенмен емдеу кезінде байқалды; - асқазанның немесе он екі елі ішектің ойық жарасы, тесілу немесе асқазан-ішектен қан кету, мелена, қан құсу, кейде өліммен аяқталады, әсіресе егде жастағы пациенттерде, ойық жаралы стоматит, гастрит; - бауыр функциясының бұзылуы; - терінің ауыр жағымсыз реакциялары (SCARs) (мультиформалы эритема, эксфолиативті дерматит, Стивенс-Джонсон синдромы және уытты эпидермалық некролиз); - жедел бүйрек жеткіліксіздігі, папиллярлық некроз, әсіресе қан сарысуынды мочевина деңгейінің жоғарылауымен және ісінудің дамуымен қатар жүретін ұзақ уақыт қабылдау кезінде; - гемоглобин деңгейінің төмендеуі Белгісіз (қолда бар деректер негізінде бағалау мүмкін емес) - тыныс алу жолдары тарапынан реакциялар (бронх демікпесі, соның ішінде оның өршуі, бронх түйілуі немесе ентігу); - жүрек жеткіліксіздігі, ісіну, Коунис синдромы; - артериялық гипертензия; - ойық жаралы колит пен Крон ауруының өршуі; - эозинофилиямен және жүйелік симптомдармен дәрілік реакция (DRESS-синдром), жедел жайылған экзантематозды пустулез (ЖЖЭП) және фотосезімталдық реакциялары; - тәбеттің төмендеуі, гипокалиемия, бүйрек жеткіліксіздігі, несепағар шаншуы, дизурия, бүйрек өзекшелері ацидозы. Бүйрек тубулярлық ацидозы және гипокалиемия тіркеуден кейінгі кезеңде, әдетте, ибупрофен компонентін ұсынылғаннан жоғары дозада ұзақ уақыт қолданғаннан кейін тіркелді. Клиникалық зерттеулер ибупрофенді, әсіресе жоғары дозаларда (тәулігіне 2400 мг) қолдану артериялық тромбоздық құбылыстар (мысалы, миокард инфарктісі немесе инсульт) қаупінің аздап жоғарылауымен байланысты болуы мүмкін екенін көрсетеді. Жағымсыз дәрілік реакциялар пайда болған кезде медицина қызметкеріне, фармацевтика қызметкеріне немесе дәрілік препараттардың тиімсіздігі туралы хабарламаларды қоса, дәрілік препараттарға жағымсыз реакциялар (әсерлер) бойынша ақпараттық дерекқорға тікелей жүгінуге болады Қазақстан Республикасы Денсаулық сақтау министрлігі Медициналық және фармацевтикалық бақылау комитетінің «Дәрілік заттар мен медициналық бұйымдарды сараптау ұлттық орталығы» ШЖҚ РМК https://www.ndda.kz

Симптомдары ҚҚСП клиникалық маңызды дозаларын қабылдайтын пациенттердің көпшілігінде жүрек айнуы, құсу, эпигастрий аймағындағы ауырсыну немесе сирек, диарея болуы мүмкін. Сонымен қатар: құлақтың шуылдауы, бас ауыруы және асқазан-ішектен қан кетуі болуы мүмкін. Неғұрлым ауыр жағдайларда ұйқышылдық түрінде көрінетін ОЖЖ уытты зақымдануы, кейбір жағдайларда-қозған жай-күй және бағдардан адасу немесе кома пайда болуы мүмкін. Кейде пациенттерде құрысулар туындауы мүмкін. Ауыр улану кезінде метаболизмдік ацидоз дамуы мүмкін, протромбин уақытының/ХҚҚ жоғарылауы мүмкін (қан ағымында айналатын қан ұю факторларымен өзара әрекеттесу салдарынан болуы ықтимал). Жедел бүйрек жеткіліксіздігі және бауырдың зақымдануы туындауы мүмкін. Бронх демікпесі бар пациенттерде аурудың симптомдары өршуі мүмкін. Ұсынылғаннан жоғары дозада ұзақ уақыт қолдану ауыр гипокалиемияға және бүйрек түтікшелерінің ацидозына әкелуі мүмкін. Симптомдарға сананың төмендеуі және жалпы әлсіздік кіруі мүмкін. Емі Емдеу симптоматикалық және демеуші болуы тиіс және тыныс алу жолдары өткізгіштігінің болуын және жүрек фукциясына және пациенттің жағдайы қалыпқа келгенше өмір сүрудің негізгі көрсеткіштеріне мониторинг жүргізуді қамтамасыз етуді қамтиды. Препараттың потенциалды уытты дозасын қабылдағаннан кейін 1 сағат ішінде белсендірілген көмірді пероральді қабылдау ұсынылады. Жиі немесе ұзақ ұстамалар кезінде емдеуді диазепам немесе лоразепам вена ішіне енгізу арқылы жүргізу керек. Бронх демікпесі жағдайында бронходилататорларды қолдану керек.

Жағымсыз реакциялардың пайда болу қаупін азайту үшін препаратты ең қысқа уақыт ішінде ең аз тиімді дозада тағайындау қажет. Тыныс алу тарапынан бұзылулар Бронх түйілуі бронх демікпесімен зардап шегетін немесе анамнезінде бронх демікпесі немесе аллергиялық ауруы бар пациенттерде туындауы мүмкін. Басқа ҚҚСП қолдану Ибупрофенді басқа ҚҚСП-мен, соның ішінде циклооксигеназа-2 селективті тежегіштерімен бір мезгілде қабылдаудан аулақ болу керек. Жүйелі қызыл жегі және дәнекер тіннің аралас аурулары Жүйелі қызыл жегі және дәнекер тінінің аралас аурулары бар пациенттерде ибупрофен қабылдаған кезде асептикалық менингит қаупі артуы мүмкін. Жүрек-қантамырлық және цереброваскулярлық әсерлер Артериялық гипертензиямен және/немесе жүрек жеткіліксіздігі ауыратын пациенттерді емдеуді бастамас бұрын сақ болу керек, өйткені ҚҚСП қабылдаған кезде сұйықтықтың сақталуы, қан қысымының жоғарылауы және ісіну туралы хабарланған. Клиникалық зерттеулерге сәйкес, ибупрофенді, әсіресе жоғары дозаларда (тәулігіне 2400 мг) қабылдау миокард инфарктісі немесе инсульт сияқты артериялық тромбоздық оқиғалар қаупінің шамалы жоғарылауымен байланысты болуы мүмкін. Жалпы, эпидемиологиялық зерттеулер ибупрофеннің төмен дозаларын (мысалы, тәулігіне ≤1200 мг) қабылдау артериялық тромбоэмболиялық асқынулар қаупінің жоғарылауымен байланысты екенін көрсетпейді. Бақыланбайтын артериялық гипертензиясы, іркілісті жүрек жеткіліксіздігі (NYHA бойынша II-III класс), жүректің ишемиялық ауруы, шеткері артерия ауруы және/немесе цереброваскулярлық аурулары бар пациенттерге ибупрофенді пайда-қауіп арақатынасын мұқият бағалағаннан кейін ғана тағайындау керек, бұл ретте препаратты жоғары дозада (тәулігіне 2400 мг) тағайындаудан аулақ болу керек. Сондай-ақ, жүрек-қантамырлар ауруларының (мысалы, артериялық гипертензия, гиперлипидемия, қант диабеті, темекі шегу) даму қаупі факторлары бар пациенттерге ибупрофенмен ұзақ мерзімді емді тағайындамас бұрын, әсіресе ибупрофенді жоғары дозада (тәулігіне 2400 мг) қабылдау қажет болса, қауіп/пайда арақатынасын мұқият сараптау керек. Ибупрофенмен емделген пациенттерде Коунис синдромы жағдайлары туралы хабарланды. Коунис синдромы коронарлық артериялардың тарылуымен байланысты және миокард инфарктісіне әкелуі мүмкін аллергиялық немесе жоғары сезімталдық реакциясынан кейінгі жүрек-қантамырлар симптомдары ретінде анықталады. Асқазан-ішек жолы тарапынан бұзылулар ҚҚСП асқазан-ішек жолдарының аурулары бар пациенттерге сақтықпен тағайындау керек (ойық жаралы колит, Крон ауруы), өйткені ҚҚСП қабылдау кезінде бұл аурулардың өршуі мүмкін. Асқазан-ішектен қан кету, жаралар немесе тесілулер туралы хабарланды, олар барлық ҚҚСП емдеу кезінде кез келген уақытта, бұрын асқазан-ішек жолдарының симптомдары немесе құбылыстары болған кезде де, онсыз да өлімге әкелуі мүмкін. Асқазан-ішектен қан кету, ойық жара немесе тесілу қаупі ҚҚСП дозасының артуымен анамнезде асқазан ойық жарасы ауруы бар пациенттерде, әсіресе қан кету немесе тесілумен асқынған жағдайда, сондай-ақ егде жастағы пациенттерде жоғарылайды. Мұндай пациенттерге емдеуді қолжетімді ең төменгі дозадан бастауы керек. Анамнезінде асқазан-ішек аурулары бар пациенттер, әсіресе егде жастағы пациенттер, әсіресе емдеудің бастапқы кезеңдерінде асқазан-ішек жолы тарапынан кез келген симптомдары (әсіресе асқазан-ішектен қан кету) туралы хабарлауы керек. Ойық жаралар немесе қан кету қаупін арттыруы мүмкін препараттармен (пероральді кортикостероидтар, варфарин сияқты антикоагулянттар, серотонинді кері қармаудың селективті тежегіштері немесе ацетилсалицил қышқылы сияқты тромбоциттерге қарсы препараттар) қатар жүретін емі бар пациенттерге препаратты қабылдау кезінде сақ болу керек. Ибупрофен қабылдаған пациенттерде асқазан-ішектен қан кету немесе ойық жара пайда болса, емдеуді тоқтату керек. Терінің ауыр жағымсыз реакциялары (SCARs-тыртықтар) Эксфолиативті дерматит, мультиформалы эритема, Стивенс-Джонсон синдромы (SJS), уытты эпидермалық некролиз (TEN) және эозинофилиямен және жүйелік симптомдармен дәрілік реакция (DRESS-синдром), сондай-ақ өмірге қауіп төндіретін немесе өлімге әкелетін жедел жайылған экзантематозды пустулез (AGEP) сияқты ауыр тері жағымсыз реакциялары (тыртықтар) ибупрофенді қолданғанда тіркелген. Бұл реакциялардың көпшілігі емдеудің бірінші айында туындаған. Осы реакцияларды көрсететін белгілер мен симптомдар пайда болса, ибупрофен қабылдауды дереу тоқтатып, балама емдеуді (қажет болған жағдайда) қарастыру керек. Негізгі инфекциялық аурулар симптомдарын бүркемелеу Ибупрофенді қабылдау инфекцияның маңызды симптомдарын бүркемелеуі мүмкін, бұл дұрыс диагноз қою уақытының ұзаруына, тиісті емнің кешіктіріліп басталуына және инфекциялық аурудың нәтижесінің нашарлауына әкелуі мүмкін. Нашарлау бактериялық ауруханадан тыс пневмония аясында және желшешектің бактериялық асқынулары кезінде байқалды. Дене температурасын төмендету немесе ауырсынуды жеңілдету үшін инфекциялық ауруға ибупрофен тағайындалған жағдайда инфекциялық аурудың мониторингін қамтамасыз ету ұсынылады. Амбулаториялық кезеңде, егер симптомдар сақталса немесе нашарласа, пациент дәрігерге қаралуы керек. Арнайы ескертулер Препарат құрамында аллергиялық реакциялар тудыруы мүмкін кармуазин лейк (Е-122) бояғышы бар. Бүйрек жеткіліксіздігі бар пациенттер Препарат бүйрек жеткіліксіздігінің дамуымен бүйрек функциясының нашарлауын туындатуы мүмкін. Бүйрек тубулярлық ацидозы мен гипокалиемия жедел артық дозаланудан кейін және ибупрофен препараттарын, ұсынылған тәуліктік дозадан асатын дозаларды қоса, ұзақ уақыт кезеңі бойы жоғары дозада (әдетте 4 аптадан астам) қабылдаған пациенттерде туындауы мүмкін. Егде жастағы пациенттер Егде жастағы пациенттерде ҚҚСП-ға жағымсыз реакциялар туындауы, әсіресе, өліммен аяқталуға әкелуі мүмкін асқазан-ішектен қан кетуі және тесілуінің жиілігі жоғары болады. Педиатрияда қолдану Ибупрофенді 18 жасқа дейінгі балаларға қолдануға болмайды. Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері Ибупрофеннің ұсынылған дозада және емнің ұсынылған ұзақтығында қабылдаған кезде көлік құралдарын басқару немесе механизмдермен жұмыс істеу қабілетіне әсері күтілмейді.

Простагландин синтезін тежеу жүктілікке және шарананың құрсақішілік дамуына теріс әсер етуі мүмкін. Эпидемиологиялық зерттеулер деректері жүктіліктің ерте кезеңінде простагландиндер синтезі тежегіштерін қолданғаннан кейін түсік тастауы, жүрек ақауларының дамуы мен гастрошизис қаупінің жоғарылағанын көрсетеді. Жүрек-қантамыр ақауларының абсолюттік қаупі 1%-дан азынан шамамен 1,5% дейін жоғарылаған. Дозаның жоғарылауымен және ибупрофенмен емдеу ұзақтығының артуымен қауіп артады деп саналады. Жануарларға жүргізілген зерттеулерде простагландин синтезі тежегіштерін енгізу имплантацияға дейінгі және кейінгі шарананың өлімі мен эмбриональды өлімнің жоғарылауына әкелетіні көрсетілген. Сонымен қатар, органогенез кезеңінде простагландин синтезінің тежегіші енгізілген жануарларда әртүрлі ақаулардың, соның ішінде жүрек-қантамырлар жүйесі тарапынан даму жиілігінің жоғарылауы байқалды. Жүктіліктің 20-шы аптасынан бастап ибупрофенді қабылдау шарананың бүйрек функциясының бұзылуына байланысты пайда болатын қағанақ суының аздығын тудыруы мүмкін. Бұл емдеуді бастағаннан кейін көп ұзамай пайда болуы мүмкін және әдетте емдеуді тоқтатқаннан кейін қайтымды болады. Сонымен қатар, екінші триместрде емдеуден кейін артериялық түтіктің тарылуы туралы хабарланды, жағдайлардың көпшілігі емдеуді тоқтатқаннан кейін қайтқан. Жүктілікті жоспарлау немесе препаратты жүктіліктің бірінші және екінші триместрінде 20 аптаға дейін қолдану кезінде Ибупрофен, құрамында басқа ибупрофен бар ҚҚСП сияқты, нақты қажеттіліксіз тағайындауға болмайды. Тағайындалған ибупрофеннің дозасы өте төмен болуы, ал емдеу ұзақтығы мүмкіндігінше қысқа болуы керек. Ибупрофенді жүктіліктің 20-шы аптасынан бастап бірнеше күн бойы қабылдаған кезде, босануға дейінгі қағанақ суының аздығына және артериялық түтіктің тарылуына бақылау жүргізу мүмкіндігін қарастыру керек. Қағанақ суының аздығы немесе артериялық түтіктің тарылуы туындаған кезде Ибупрофен препаратын қабылдауды тоқтату керек. Жүктіліктің үшінші триместрі кезінде простагландин синтезінің кез келген тежегіштерін қолдану мынадай әсер етуі мүмкін: • шаранаға: • жүрек-өкпе уыттылығы (артериялық түтіктің мерзімінен бұрын тарылуы/жабылуы және өкпе гипертензиясының дамуы); • олигогидрамнион дамуымен бүйрек жеткіліксіздігіне дейін үдеуі мүмкін бүйрек функциясының бұзылуы; • жүктіліктің соңында ана мен жаңа туған нәрестеге: • қан кету қаупінің артуы ықтимал, тіпті өте төмен дозаларды қабылдағанның өзінде туындауы мүмкін антиагрегациялық әсер; • жатырдың жиырылуының бәсеңдеуі, бұл босанудың кешігуіне немесе ұзаққа созылуына әкеледі. Осылайша, Ибупрофенді жүктіліктің 20-шы аптасынан бастап қабылдауға болмайды. Шектеулі зерттеулерде ибупрофеннің емшек сүтіне аз мөлшерде енетіні және емшек сүтімен қоректенетін нәрестеге жағымсыз әсер етуі екіталай екендігі анықталды. Циклооксигеназа/ простагландиндер синтезін тежейтін препараттар овуляцияға әсер ету есебінен әйел фертильділігінің төмендеуін тудыруы мүмкін екендігі туралы шектеулі деректер бар. Бұл емдеуді тоқтатқаннан кейін қайтымды болады.

Ибупрофенді және келесі препараттарды бір мезгілде қабылдаудан аулақ болу керек: Ацетилсалицил қышқылы Дәрігердің ацетилсалицил қышқылын төмен дозада (тәулігіне 75 мг аспайтын) тағайындауын қоспағанда, жағымсыз реакциялар жиілігінің ықтимал ұлғаюына байланысты ибупрофен мен ацетилсалицил қышқылын бір мезгілде қабылдау ұсынылмайды. Эксперименттік деректер ибупрофеннің ацетилсалицил қышқылы төмен дозаларын бір мезгілде қолданғанда тромбоциттер агрегациясын бәсекеге қабілетті түрде тежей алатынын көрсетеді. Бұл деректерді клиникалық тәжірибеге экстраполяциялау мүмкіндігі белгісіз болып қалғанымен, ацетилсалицил қышқылы төмен дозаларының кардиопротекторлық әсерін төмендетуге ибупрофенді тұрақты ұзақ уақыт қолданудың ықтимал әсерін жоққа шығаруға болмайды. Ацетилсалицил қышқылының кардиопротекторлық қасиеттеріне ибупрофенді эпизодтық қолданудың әсер ету ықтималдығы аз. Циклооксигеназа-2 селективті тежегіштерін қоса, басқа ҚҚСП Бір уақытта екі немесе одан да көп ҚҚСП қабылдаудан аулақ болу керек, себебі бұл жағымсыз реакциялар даму қаупін арттыруы мүмкін. Ибупрофенді келесі препараттармен біріктірілімде сақтықпен қабылдау керек: Кортикостероидтар Кортикостероидтар АІЖ тарапынан жағымсыз реакциялар немесе қан кету қаупін арттыруы мүмкін. Диуретиктер және гипертензияға қарсы препараттар ҚҚСП диуретиктер мен гипертензияға қарсы дәрілік препараттардың әсерін азайтуы мүмкін. Бүйрек функциясы бұзылған кейбір пациенттерде (мысалы, сусызданған пациенттерде немесе бүйрек функциясы бұзылған егде жастағы пациенттерде) циклооксигеназаны тежейтін дәрілік препаратпен AӨФ тежегішін немесе ангиотензин II антагонистін бір мезгілде қабылдау тіпті жедел бүйрек жеткіліксіздігіне дейінгі (әдетте қайтымды) бүйрек функциясының одан әрі нашарлауына әкелуі мүмкін. Бұл өзара әрекеттесулерді AӨФ тежегіштерімен немесе ангиотензин II антагонистерімен бір мезгілде коксибтер қабылдайтын пациенттерде ескеру қажет. Сондықтан мұндай біріктірілімді, әсіресе егде жастағы пациенттерге сақтықпен тағайындау керек. Пациенттерді талапқа сай гидратациямен қамтамасыз еткен жөн және біріктірілген ем басталғаннан кейін және одан әрі мезгіл-мезгіл бүйрек функциясының мерзімді мониторингін жүргізу керек. Диуретиктер ҚҚСП нефроуыттылығы қаупін арттыруы мүмкін. Антикоагулянттар ҚҚСП варфарин сияқты антикоагулянттардың әсерін күшейтуі мүмкін. Тромбоциттерге қарсы препараттар және серотонинді кері қармаудың селективті тежегіштері (СКҚСТ) Асқазан-ішектен қан кету қаупінің жоғарылауы. Жүрек гликозидтері ҚҚСП жүрек жеткіліксіздігін ушықтыруы, ШСЖ төмендетуі және плазмадағы жүрек гликозидтерінің деңгейін жоғарылатуы мүмкін. Литий препараттары ҚҚСП қан плазмасында литий концентрациясын жоғарылатуы мүмкін екендігі туралы деректер бар. Метотрексат ҚҚСП қан плазмасындағы метотрексат концентрациясын жоғарылатуы мүмкін екендігі туралы деректер бар. Циклоспорин Нефроуыттылық қаупінің жоғарылауы. Мифепристон ҚҚСП қабылдауды мифепристонды қабылдағаннан кейін кем дегенде 8-12 күннен соң бастау керек, өйткені ҚҚСП мифепристонның тиімділігін төмендетуі мүмкін. Такролимус Такролимус пен ҚҚСП бір мезгілде қолдану кезінде нефроуыттылық қаупінің артуы мүмкін. Зидовудин ҚҚСП зидовудинмен бір мезгілде қабылданғанда гематологиялық уыттылық қаупі жоғары. Зидовудинмен және ибупрофенмен қатар емдеу жағдайында гемофилиямен ауыратын АИТВ-оң пациенттерде гемартроз және гематомалардың пайда болу қаупінің жоғарылауы туралы деректер бар. Хинолон тобындағы антибиотиктер Клиникаға дейінгі зерттеулердің деректері ҚҚСП хинолонды қатардағы антибиотиктермен бір мезгілде құрысулардың туындау қаупін арттыруы мүмкін екенін көрсетеді. ҚҚСП және хинолонды қатардағы антибиотиктермен бір мезгілде ем алатын пациенттерде құрысулардың пайда болу қаупі артуы мүмкін.

Сақтау мерзімі 3 жыл. Жарамдылық мерзімі өткеннен кейін қолдануға болмайды! Сақтау шарттары Ылғалдан, жарықтан қорғалған жерде, 25°С-ден аспайтын температурада сақтау керек. Балалардың қолы жетпейтін жерде сақтау керек!