ИБУФЕН таблетки 200 мг

Бір таблетканың құрамында белсенді зат - ибупрофен 400.0 мг қосымша заттар: микрокристалды целлюлоза, желатинделген крахмал, натрий кроскармеллозасы, сусыз коллоидты кремнийдің қостотығы, тальк, стеарин қышқылы. ОPADRY® QX ақ: полиэтиленгликоль/(макрогол), тальк, титанның қостотығы (Е171), глицерол монокаприлокапраты, поливинил спирті. Сыртқы түрінің, иісінің, дәмінің сипаттамасы Ақ немесе ақ дерлік түсті, беткейі бұдырлы, екі беті дөңес сопақша пішінді, бір жағында сызығы бар қабықпен қапталған таблеткалар.

Бас сақинасын, бас ауыруын, арқаның ауыруын, тіс ауыруын, невралгияны, етеккір кезіндегі ауыруды, ревматизмдік және бұлшықет ауырсынуын жеңілдету үшін. ИБУФЕН ауырсынуды бәсеңдетеді, қабыну мен температураны төмендетеді, бас ауыруын және ауырсынудың басқа да түрлерін жеңілдетеді. Ол сондай-ақ суық тию және тұмау симптомдарын жеңілдетеді.

Әсер ету механизмі Ибупрофен - бұл ҚҚСП, пропион қышқылының туындысы, оның әсері простагландиндер синтезін тежеуімен шартталған. Ибупрофен адамдағы қабыну процестерінде ауырсынуды, ісінуді және қызбаны азайтады. Сонымен қатар, ибупрофен тромбоциттердің агрегациясын қайтымды тежейді. Эксперименттік деректер оларды бірге қолданған жағдайда аспириннің (ацетилсалицил қышқылы) төмен дозаларының тромбоциттердің агрегациясына әсерін ибупрофеннің бәсекелес түрде тежей алатынын айғақтайды. Бірнеше фармакодинамикалық зерттеулер 81 мг дозада аспирин (ацетилсалицил қышқылы) дереу босап шыққаннан кейін одан 8 сағат бұрын немесе 30 минуттан кейін 400 мг мөлшердегі ибупрофеннің бір реттік дозасын қабылдағанда ацетилсалицил қышқылының тромбоксан түзілуіне немесе тромбоциттер агрегациясына әсерінің төмендегені байқалғанын көрсетті. Бұл деректерді клиникалық тәжірибеде экстраполяциялауға қатысты белгісіздік болса да, ибупрофенді үнемі, ұзақ уақыт қолдану ацетилсалицил қышқылының төмен дозаларының кардиопротекторлық әсерін төмендетуі мүмкін екенінің ықтималдығын жоққа шығаруға болмайды. Ибупрофенді эпизодтық қолдану кезінде клиникалық елеулі әсері қарастырылмайды (4.5 бөлімін қараңыз).

Дозалау режимі Ересектер және 12 жастан үлкен > 40 кг балалар 1 таблеткадан тәулігіне 3 ретке дейін. Таблеткаларды қабылдау аралығы кемінде 4 сағат болуы керек, 24 сағат ішінде 3 таблеткадан артық қабылдамаңыз. 12 жастан 18 жасқа дейінгі балалар мен жасөспірімдерге препаратты ұзақ уақыт қолдану қажет болған жағдайда - 3 күннен артық немесе симптомдары нашарлаған жағдайда дәрігермен ақылдасу қажет. Егер симптомдар сақталса немесе нашарласа немесе препаратты 10 күннен артық қабылдау қажет болса, ересектер дәрігерге жүгінуі тиіс. Пациенттердің ерекше топтары Балалар Препаратты 12 жасқа дейінгі балаларға қабылдауға болмайды. Енгізу әдісі және жолы Ішке қабылдауға арналған. Таблеткаларды сумен ішіп қабылдау керек. Қабылдау уақыты көрсетілген қолдану жиілігі Таблеткаларды қабылдау аралығы кемінде 4 сағат болуы керек. Емдеу ұзақтығы Тек қысқа мерзімді қолдану үшін! Жағымсыз реакциялардың даму қаупін ең аз ету үшін ибупрофенді ең төмен тиімді дозада және симптомдарды жеңілдету үшін қажетті ең қысқа мерзімде қабылдау керек. Дәрілік препараттың бір немесе бірнеше дозасын жіберіп алған кезде қажетті шаралар Өткізіп алғанының орнын толтыру үшін препараттың қосарлы дозасын қабылдамаңыз. Дәрілік препаратты қолдану тәсілін түсіндіру үшін медицина қызметкерінің кеңесіне жүгіну бойынша нұсқаулар Дәрілік препаратты қолданар алдында кеңес алу үшін дәрігерге жүгініңіз.

• әсер етуші затқа немесе кез келген қосымша заттарына аса жоғары сезімталдық; • анамнезінде ацетилсалицил қышқылын (салицилаттар) немесе басқа да ҚҚСП қолданумен байланысты аса жоғары сезімталдық реакцияларының (бронх демікпесі, ринит, ангионевроздық ісіну немесе есекжем) болуы; • белсенді немесе қайталанатын ойық жара ауруы/қан кету немесе анамнезінде қайталанатын ойық жара ауруы/қан кету бар пациенттерге (расталған ойық жараның немесе қан кетудің екі немесе одан да көп жеке эпизодтары); • ҚҚСП қолдану арқылы туындаған анамнезінде АІЖ ойық жарасынан қан кетуі немесе перфорациясы; • ауыр жүрек жеткіліксіздігі (NYHA бойынша IV класс), бауыр немесе бүйрек жеткіліксіздігі бар пациенттерге; • жүктілік (III триместр); • 12 жасқа дейінгі балалар.

Жиі емес • Есекжем мен қышынуы бар аса жоғары сезімталдық2 • Бас ауыруы • Іш ауыруы, жүрек айнуы, диспепсия5 • Тері бөртпесінің әртүрлі түрлері2 Сирек • Диарея, метеоризм, іш қатуы және құсу Өте сирек • Қан түзілуінің бұзылулары1 • Беттің, тілдің және тамақтың ісінуін, ентігуді, тахикардияны, гипотензияны (анафилаксия, ангионевроздық ісіну немесе ауыр шок) қоса, ауыр аса жоғары сезімталдық реакциялары2 • Асептикалық менингит 3 • Пептидтік ойық жара, перфорация немесе асқазан-ішектен қан кету, мелена, қан құсу6. Ойық жаралы стоматит, гастрит • Бауыр функциясының бұзылуы • Терінің ауыр жағымсыз реакциялары (SCARs) (эритеманы, мультиформалы эксфолиативті дерматит, Стивенс-Джонсон синдромын және уытты эпидермальді некролизді қоса). • Жедел бүйрек жеткіліксіздігі8 • Гемоглобин деңгейінің төмендеуі Белгісіз (қолда бар деректер негізінде бағалау мүмкін емес) • Тыныс алу жолдарының гиперреактивтілігі, оның ішінде демікпе, бронх түйілуі немесе ентігу 2 • Жүрек жеткіліксіздігі мен ісінуі4 • Коунис синдромы аталатын күрделілігі потенциалды аллергиялық реакцияның белгісі болуы мүмкін кеудедегі ауырсыну • Артериялық гипертензия • Спецификалық емес ойық жаралы колиттің және Крон ауруының өршуі7 • DRESS-синдромы (дәріге байланысты жүйелік симптомдары болатын эозинофилия), жедел жайылған экзантематозды пустулез (AGEP), фотосезімталдық реакциялары ретінде белгілі терінің ауыр реакциялары. Жекелеген жағымсыз реакциялардың сипаттамасы 1 Мысалы анемия, лейкопения, тромбоцитопения, панцитопения және агранулоцитоз болады. Алғашқы белгілер - қызба, тамақ ауыруы, ауыздың беткейлік ойық жаралары, тұмауға ұқсас симптомдар, қатты жүдеу, түсініксіз қан кетулер және гематомалар. 2 Аса жоғары сезімталдық реакциялары: олар (а) спецификалық емес аллергиялық реакциялармен және анафилаксиямен, (б) демікпені, демікпенің өршуін, бронх түйілуін және ентігуді қоса, тыныс алу жолдарының реактивтілігімен немесе (в) қышыну, есекжем, пурпураны қоса, әртүрлі тері реакцияларымен, ангионевроздық ісіну және сирек уытты эпидермалық некролиз, Стивенс - Джонсон синдромы және көп түрлі эритеманы қоса, эксфолиативті және буллезді дерматозбен білінуі мүмкін. 3 Дәрілік-индукцияланған асептикалық менингиттің патогенетикалық механизмі аяғына дейін зерттелмеген. Алайда, ҚҚСП туындаған асептикалық менингит туралы қолда бар деректер аса жоғары сезімталдық реакциясын көрсетеді (препаратты қабылдаумен уақытша байланыстылығына және оны тоқтатқаннан кейін симптомдардың жоғалуына байланысты). Аутоиммунды аурулары бар (жүйелі қызыл жегі және дәнекер тінінің аралас аурулары сияқты) пациенттерде ибупрофенмен емдеу кезінде асептикалық менингит симптомдарының (мысалы, мойынның сіресуі, бас ауыруы, жүрек айнуы, құсу, қызба немесе бағдардан жаңылу) көріністерінің жекелеген жағдайлары байқалғанын айта кету керек. 4 Клиникалық зерттеулердің мәліметтері мен эпидемиологиялық деректер ибупрофенді (әсіресе тәулігіне 2400 мг жоғары дозада) және ұзақ мерзімді емдеу кезінде қолдану артериялық тромбоздық оқиғалардың (мысалы, миокард инфарктісі немесе инсульт) даму қаупінің аздаған жоғарылауымен байланысты болуы мүмкін екенін көрсетеді. 5 Ең жиі байқалатын жағымсыз құбылыстар асқазан-ішек жолындағы сипатта болады. 6 Кейде өліммен аяқталатын. 7 «Қолдану кезіндегі қажетті сақтандыру шаралары» бөлімді қараңыз 8 Әсіресе ұзақ уақыт қолданғанда қан сарысуындағы мочевина деңгейінің жоғарылауымен және ісінумен астасады. Сонымен қатар, оларға папиллярлық некроз жатады. Жағымсыз дәрілік реакциялар туындаса медицина қызметкеріне, фармацевтика қызметкеріне немесе дәрілік препараттардың тиімсіздігі туралы хабарламаларды қоса, дәрілік препараттарға жағымсыз реакциялар (әсерлер) бойынша ақпараттық деректер базасына тікелей хабарласыңыз Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

Баланың организміне 400 мг/кг-дан астамының түсуі артық дозалану симптомдарын тудыруы мүмкін. Ересектерде дозаға тәуелділік әсерінің айқындығы аз білінеді. Артық дозаланғанда жартылай шығарылу кезеңі 1,5-3 сағатты құрайды. Симптомдары ҚҚСП клиникалық елеулі мөлшерін қабылдаған пациенттердің көпшілігінде жүрек айнуы, құсу, эпигастрий тұсының ауыруы, сирек жағдайларда диарея дамиды. Сондай-ақ, құлақтың шуылы, бас ауыруы және асқазан-ішектен қан кетуі мүмкін. Тым күрделі улану жағдайында орталық жүйке жүйесінің уытты зақымдануы мүмкін, ол ұйқышылдықпен, мезгіл-мезгіл қозумен және бағдарлай алмаумен немесе комаға түсу түрінде білінеді. Кейде құрысулар пайда болады. Ауыр артық дозаланған жағдайда метаболизмдік ацидоз болуы мүмкін, ал протромбин уақыты/ХҚҚ жоғарылауы мүмкін және бұл қан ұюының айналымдағы факторлармен өзара әрекеттесуіне байланысты болуы ықтимал. Жедел бүйрек жеткіліксіздігі және бауыр функциясының бұзылуы дамуы мүмкін. Бронх демікпесі бар пациенттерде демікпенің өршуі ықтимал. Емі Емі симптоматикалық және демеуші болуы тиіс және тыныс алу жолдарының өткізгіштігін ұстап тұруды және жүрек қызметі мен басқа да өмірлік функцияларды тұрақтандырғанға дейін бақылауды қамтуы тиіс. Егер пациент препараттың потенциалды уытты мөлшерін 1 сағаттан аз уақыт бұрын қабылдаған болса, белсендірілген көмірді пероральді қабылдау нұсқасын қарастырған жөн. Егер құрысулар байқалса, әсіресе көп реттік және ұзақ болса, пациентке вена ішіне диазепам немесе лоразепам енгізілуі керек. Демікпе ұстамаларының алдын алу үшін бронходилататорларды қолдану ұсынылады.

Симптомдарды басу үшін қажет қысқа уақыт ішінде ең төмен тиімді дозаны қолдану арқылы жағымсыз әсерлерді ең аз етуге болады (“Дозалау режимі” бөлімін қараңыз, сонымен қатар АІЖ мен жүрек-қан тамырлары жүйесі үшін қаупі төменде). Егде жастағы адамдарда ҚҚСД жағымсыз реакциялардың жиілігі жоғары болады, әсіресе асқазан-ішектен қан кету және перфорация, бұл өліммен аяқталуға әкелуі мүмкін. Тыныс алу мүшелері ҚҚСП қабылдау аясында өршу сатысындағы немесе анамнезінде бронх демікпесі немесе аллергиялық аурулары бар пациенттерде бронх түйілуі дамуы мүмкін. Басқа ҚҚСП Ибупрофенді қатарлас ҚҚСП, соның ішінде селективті циклооксигеназа-2 тежегіштерімен бір мезгілде қолданудан аулақ болу керек . Жүйелі қызыл жегі немесе дәнекер тіннің аралас ауруы Асептикалық менингит қаупінің жоғарылауы. Несеп шығару жүйесінің мүшелері Бүйрек жеткіліксіздігі, өйткені бүйрек функциясының төмендеуі жалғасуы мүмкін. Дегидратациясы бар балалар мен жасөспірімдерде бүйрек функциясының бұзылу қаупі бар. Гепатобилиарлық жүйе Бауыр функциясының бұзылуы. Жүрек-қантамыр жүйесі Анамнезінде артериялық гипертензиясы және/немесе жүрек жеткіліксіздігі бар пациенттерге препаратты қабылдауды сақтықпен бастауы керек (дәрігермен ақылдасу қажет), өйткені сұйықтықтың іркілуі, артериялық гипертензия және ҚҚСП қабылдаумен байланысты ісінулер туралы хабарланған. Клиникалық зерттеулер ибупрофенді ұзақ уақыт, әсіресе жоғары дозаларда (тәулігіне 2400 мг) қолдану тромбоздық асқынулардың (мысалы, миокард инфарктісі немесе инсульт) даму қаупінің елеусіз жоғарылауымен байланысты болуы мүмкін екенін көрсетеді. Жалпы, эпидемиологиялық зерттеулер ибупрофеннің төмен дозаларын (мысалы, ≤1200 мг/тәулік) қабылдау артериялық тромбоздық оқиғалардың даму қаупінің жоғарылауымен байланысты екенін көрсетпейді. Ибупрофеннің ұсынылған тәуліктік дозасын қабылдау (тәулігіне 1200 мг) жүрек-қан тамырлары жүйесінің тарапынан асқыну дамуының қаупі жоғарылауын тудырмайды. Бақыланбайтын артериялық гипертензиясы, II-III класты NYHA жіктемесі бойынша іркілісті жүрек жеткіліксіздігі, жүректің анықталған ишемиялық ауруы, шеткері артерия аурулары және/немесе цереброваскулярлық аурулары бар пациенттерге ибупрофеннің жоғары дозаларын (тәулігіне 2400 мг) қолданудан аулақ болу керек. Ибупрофенмен ұзақ мерзімді, әсіресе жоғары дозаларда (тәулігіне≥ 2400 мг) ем басталғанға дейін жүрек-қан тамырлары асқынуларының (мысалы, гипертония, гиперлипидемия, қант диабеті, шылым шегу) даму қаупі факторлары бар пациенттерде пайда-қауіп арақатынасын мұқият бағалау қажет. Жүрек-қан тамырлары және цереброваскулярлық әсерлер Ибупрофен қабылдаған пациенттерде Коунис синдромының жағдайлары туралы хабарланды. Коунис синдромы коронарлық артериялардың тарылуымен байланысты және миокард инфарктісіне әкелуі мүмкін аллергиялық немесе аса жоғары сезімталдық реакцияларының салдарлық жүрек-қан тамырлары симптомдары ретінде анықталады. Асқазан-ішек жолы (АІЖ) ҚҚСП анамнезінде асқазан-ішек аурулары бар (спецификалық емес ойық жаралы колит, Крон ауруы) пациенттерге, көрсетілген аурулардың өршуі болуы ықтималдығына байланысты, сақтықпен тағайындау керек. Емдеудің кез келген сатысында ҚҚСП қабылдау анамнезіндегі ескерту симптомдарына немесе асқазан-ішек жолдары тарапынан жағымсыз реакцияларының болуына қарамастан, кейде өліммен аяқталуға әкелетін асқазан-ішектен қан кетуге, ойық жаралануға немесе тесілуге соқтыруы мүмкін. Анамнезінде ойық жарасы бар пациенттерде, әсіресе қан кетумен немесе тесілумен асқынған ойық жарасы бар және егде жастағы пациенттерде ҚҚСП дозасын ұлғайтқанда асқазан-ішектен қан кету, ойық жара немесе тесілу қаупі артады. Мұндай пациенттер препарат қабылдауды мүмкін болатын ең аз дозадан бастауы керек. Анамнезінде асқазан-ішек уыттылығы бар пациенттерге, әсіресе егде жастағы пациенттерге, әсіресе емдеудің бастапқы сатысында құрсақ қуысы мүшелерінің тарапынан кез келген ерекше симптомдары (әсіресе асқазан-ішектен қан кету туралы) туралы хабарлау керек. Ойық жара түзілу немесе қан кету қаупін арттыруы мүмкін мысалы, пероральді кортикостероидтар, антикоагулянттар (мысалы, варфарин), серотонинді кері қармаудың селективті тежегіштері немесе тромбоциттерге қарсы препараттар (мысалы, аспирин) сияқты дәрілік препараттарды қабылдайтын пациенттерге препаратты сақтықпен ұсыну керек . Егер ибупрофен қабылдаған пациенттерде асқазан-ішектен қан кету немесе ойық жара пайда болса, емдеуді тоқтату керек. Жасырын инфекциялардың симптомдарын бүркемелеу ИБУФЕН препараты инфекциялық аурулардың симптомдарын бүркемелеуі мүмкін, бұл тиісті емдеуді бастаудың кешігуіне әкелуі мүмкін және осылайша ауруды асқындырады. Бұл ауруханадан тыс бактериялық пневмония және желшешектің бактериялық асқынуларында байқалды. Ибупрофенді дене температурасы көтерілгенде немесе инфекция кезінде ауырсынуды жеңілдету үшін қолданғанда, инфекциялық ауруға мониторинг жүргізу ұсынылады. Медициналық мекемеден тыс емдеу жағдайында, егер симптомдар сақталса немесе күшейсе, пациент дәрігерге жүгінуі тиіс. Тері және шырышты қабықтар ҚҚСП ибупрофенді қолдануға байланысты терінің ауыр жағымсыз реакциялары (тыртықтар), кейбіреулері өліммен аяқталатын, мысалы, эксфолиативті дерматит, мультиформалы эритема, Стивенс-Джонсон синдромы (SJS), уытты эпидермальді некролиз (TEN) және эозинофилиямен және жүйелік симптомдарымен дәрілік реакция (DRESS синдромы), сондай-ақ өмірге қауіпті болуы мүмкін немесе өлімге әкелетін жедел жайылған экзантематозды пустулез (AGEP) тіркелген. Мұндай реакциялардың пайда болу қаупі емдеудің басында жоғарырақ, бұл реакциялардың көпшілігі көп жағдайда бірінші айда дамыды. Құрамында ибупрофен бар препараттарды қолдануға байланысты жедел жайылған экзантематозды пустулез (AGEP) туралы хабарланды. Осы реакцияларды көрсететін белгілер мен симптомдар пайда болғанда, ибупрофенді қабылдауды дереу тоқтату керек және тері бөртпесі, шырышты қабықтың зақымдануы немесе аса жоғары сезімталдықтың кез келген басқа белгілері сияқты терінің ауыр реакцияларының белгілері мен симптомдары алғаш рет пайда болған кезде балама емдеуді қарастыру керек (қажет болған жағдайда). Арнайы ескертулер Қосымша заттар Бұл препараттың бір таблеткасының құрамында 3,0 мг немесе 0,131 ммоль натрий бар, яғни натрий жоқ дерлік. Педиатрияда қолдану Препаратты 12 жасқа дейінгі балаларға қабылдауға болмайды. Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері Ибупрофен қабылдаған кезде бас айналуды, ұйқышылдықты, мәңгіруді немесе көру қабілетінің бұзылуын байқайтын пациенттер автокөлік жүргізуден немесе қозғалатын механизмдерді басқарудан аулақ болуы керек.

Простагландин синтезінің тежелуі жүктілік барысына, эмбрион мен ұрықтың дамуына теріс әсер етуі мүмкін. Эпидемиологиялық зерттеулердің деректері жүктіліктің ерте кезеңінде простагландин синтезінің тежегіштерін қолданғаннан кейін өздігінен түсік түсіру, жүрек ақаулары және гастрошизис қаупінің жоғарылауын растайды. Жүрек-қан тамырлары жүйесінің патологиясы туындауының абсолютті қаупі 1% - дан аздан шамамен 1,5% - ға дейін ұлғайды. Қаупі дозаның жоғарылауымен және емнің ұзақтығымен артатыны болжанады. Жануарларда простагландин синтезінің тежегіштерін қолдану имплантацияға дейінгі және одан кейінгі шығындардың және эмбрион өлімінің жоғарылауына әкеледі. Сонымен қатар, органогенетикалық кезеңде простагландин синтезінің тежегіштерін қабылдаған жануарларда әртүрлі, соның ішінде жүрек-қан тамырлары ақауларының даму жиілігі жоғарылағаны анықталды. Жүктіліктің 20-шы аптасынан бастап ибупрофенді қолдану ұрықтың бүйрек функциясының бұзылуына байланысты олигогидрамниозды тудыруы мүмкін. Бұл емдеу басталғаннан кейін көп ұзамай пайда болуы мүмкін және әдетте оны тоқтатқаннан кейін қайтымды болады. Сонымен қатар, жүктіліктің екінші триместрінде емдеуден кейін артериялық түтіктің тарылуы туралы хабарламалар бар, ол көп жағдайда емдеуді тоқтатқаннан кейін жойылады. Сондықтан жүктіліктің бірінші және екінші триместрлерінде егер бұл аса қажет болмаса, ибупрофенді тағайындауға болмайды. Егер ибупрофенді әйел бала көтергісі келіп жүргенде немесе жүктіліктің бірінші және екінші триместрінде қолданса, онда доза мүмкіндігінше аз болуы тиіс, ал емдеу ұзақтығы мүмкіндігінше қысқа болуы керек. Ибупрофенді 20-шы гестациялық аптадан бастап бірнеше күн қабылдағаннан кейін олигогидрамниозға және артериялық түтіктің тарылуына антенатальді бақылау жүргізу керек. Егер олигогидрамниоз немесе артериялық түтіктің тарылуы анықталса, ибупрофенді қабылдауды тоқтату керек. Жүктіліктің үшінші триместрінде простагландин синтезінің барлық тежегіштері ұрыққа қауіп төндіруі мүмкін: • кардиопульмональді уыттылық (артериялық түтіктің мезгілінен бұрын жабылуымен және өкпе гипертензиясы дамуымен); • бүйрек жеткіліксіздігіне және олигогидрамнионға дейін үдейтін бүйрек дисфункциясы; • қан кету уақытын ұзарту мүмкіндігі, тіпті өте төмен дозаларда да білінетін антиагрегациялық әсер ету; • босанудың іркілісіне немесе ұзаққа созылуына әкелетін жатырдың жиырылуының кідірісі. Осыған байланысты ибупрофен жүктіліктің үшінші триместрінде қарсы көрсетілімде . Кейбір зерттеулерде ибупрофен емшек сүтінде өте төмен концентрацияда табылды, бала емізетін әйелдерге қолдануға ұсынылмайды

Ибупрофенді келесі дәрілік заттармен бір мезгілде қолданудан аулақ болу керек: Ацетилсалицил қышқылы (аспирин) Ибупрофеннің ацетилсалицил қышқылымен аралас емі жағымсыз реакциялардың даму қаупінің жоғарылауына байланысты ұсынылмайды. Ерекше жағдай дәрігердің ұсынысы бойынша аспириннің төмен дозаларын (тәулігіне 75 мг-дан аспайтын) тағайындау болып табылады. Эксперименттік деректер ибупрофеннің тромбоциттер агрегациясына бір мезгілде қабылданатын аспириннің төмен дозаларының әсерін тежей алатынын айғақтайды. Алайда, бұл деректердің шектеулілігі және ex vivo деректерін клиникалық жағдайға экстраполяциялауға қатысты белгісіздік ибупрофенді үнемі қолдануға байланысты нақты қорытынды жасауға мүмкіндік бермейді, ал ибупрофенді эпизодтық қолдану кезінде клиникалық елеулі әсері қарастырылмайды. Басқа ҚҚСП, оның ішінде ЦОГ-2 селективті тежегіштері Жағымсыз реакциялардың пайда болу қаупінің жоғарылау мүмкіндігіне байланысты ҚҚСП тобынан екі немесе одан да көп препараттарды бір мезгілде қолданудан аулақ болу керек. Келесі дәрілік заттармен бір мезгілде сақтықпен қолдану керек: Кортикостероидтар АІЖ ойық жарасы пайда болуының және асқазан-ішек қан кетулерінің жоғары қаупі болады. Гипертензияға қарсы дәрілер (АӨФ тежегіштері және ангиотензин II антагонистері) және диуретиктер ҚҚСП осы топтардағы препараттардың тиімділігін төмендетуі мүмкін. Бүйрек функциясы бұзылған кейбір пациенттерде (мысалы, сусыздануы болған пациенттер немесе бүйрек функциясы бұзылған егде жастағы пациенттер) ибупрофенді АӨФ тежегіштерімен немесе ангиотензин II антагонистерімен және циклооксигеназаны тежейтін дәрілік заттармен бірге қабылдау бүйрек функциясының одан әрі нашарлауына, соның ішінде әдетте қайтымды болатын жедел бүйрек жеткіліксіздігіне әкелуі мүмкін. Бұл өзара әрекеттесулерді АӨФ тежегіштерімен немесе ангиотензин II антагонистерімен бір мезгілде коксиб қабылдайтын пациенттерде ескеру қажет. Сондықтан бұл біріктірілімді, әсіресе егде жастағы адамдарға сақтықпен тағайындау керек. Пациенттер қатарлас ем басталғаннан кейін және одан әрі мезгіл-мезгіл оңтайлы су теңгерімінің сақталуын қадағалап және бүйрек функциясын тексеріп отыруы керек. Диуретиктер ҚҚСП нефроуыттылық қаупін арттыруы мүмкін. Антикоагулянттар ҚҚСП антикоагулянттардың, мысалы варфариннің әсерін күшейтуі мүмкін Антиагреганттар және серотонинді кері қармау селективті тежегіштері Асқазан-ішектен қан кету туындауы қаупінің жоғарылауы. Жүрек гликозидтері ҚҚСП мен жүрек гликозидтерін бір мезгілде тағайындау жүрек жеткіліксіздігінің ушығуына, шумақтық сүзіліс жылдамдығының төмендеуіне және қан плазмасында жүрек гликозидтері концентрациясының артуына әкелуі мүмкін. Литий препараттары Қан плазмасында литий деңгейінің арту ықтималдығы туралы деректер бар. Метотрексат Қан плазмасында метотрексат деңгейінің арту мүмкіндігі туралы деректер бар. Циклоспорин Нефроуыттылық қаупінің артуы. Мифепристон ҚҚСП қабылдауды мифепристон қабылдағаннан кейін 8-12 күннен соң ғана бастау керек, өйткені ҚҚСП мифепристон тиімділігін төмендетуі мүмкін. Такролимус ҚҚСП мен такролимусты бір мезгілде тағайындағанда нефроуыттылық қаупі артуы мүмкін. Зидовудин ҚҚСП мен зидовудинді бір мезгілде қолдану гематологиялық уыттылықтың жоғарылауына әкелуі мүмкін. Зидовудинмен және ибупрофенмен бір мезгілде ем қабылдаған гемофилиясы бар АИТВ-оң пациенттерде гемартроз және гематома туындау қаупі жоғарылағаны туралы деректер бар. Хинолонды қатардағы антибиотиктер ҚҚСП және хинолонды қатардағы антибиотиктермен бірге ем қабылдайтын пациенттерде құрысулар туындау қаупі артуы мүмкін. Аминогликозидтер Ибупрофен аминогликозидтердің экскрециясын азайтуы мүмкін. Сульфонилмочевина туындылары ҚҚСП сульфонилмочевина препараттарының әсерін күшейтуі мүмкін. Сульфонилмочевина мен ибупрофен препараттарын қабылдаған пациенттерде гипогликемия туралы сирек хабарлар болды, сондықтан сақтық шарасы ретінде қандағы қанттың деңгейін үнемі бақылау қажет.

Сақтау мерзімі 2 жыл Жарамдылық мерзімі өткеннен кейін қолдануға болмайды! Сақтау шарттары Түпнұсқалық қаптамасында, 25°С-ден аспайтын температурада сақтау керек. Балалардың қолы жетпейтін жерде сақтау керек!