Ибуфен® Д Форте суспензия 200 мг/5 мл

100 мл суспензияның құрамында белсенді зат – 4.00 г ибупрофен, қосымша заттар: макрогол глицеролгидроксистеараты, ксантан шайыры, глицерол, натрий бензоаты, натрий фосфаты додекагидраты (немесе натрий фосфаты дигидраты) лимон қышқылы моногидраты, натрий сахаринаты, сұйық мальтитол, «Кола» хош иістендіргіші, тазартылған су Сыртқы түрінің, иісінің, дәмінің сипаттамасы Кола иісі бар, түсі ақ немесе ақ дерлік біртекті суспензия.

Мына жағдайлардағы шығу тегі әртүрлі дене температурасының жоғарылауында: • суық тию аурулары • жедел респираторлық вирустық инфекциялар • тұмау • баспа, фарингит • дене температурасының жоғарылауымен қатар жүретін балалар инфекциялары Мына жағдайлардағы әлсіз және орташа қарқындылықтағы шығу тегі әртүрлі ауыру синдромы: • ортаңғы құлақтағы қабыну кезінде құлақ ауыруында • тіс ауырғанда, тіс жарып шыққандағы ауырсыну • бас ауыруы, бас сақинасы • невралгиялар • ревматизмдік ауырулар • бұлшықеттердегі, буындардағы ауырсыну • тірек-қимыл аппаратының жарақатары.

Әсер ету механизмі Ибупрофен ыстықты түсіретін, ауыруды басатын және қабынуға қарсы әсер ететін пропион қышқылының туындысы болып табылады. Ибупрофеннің әсер ету механизмі арахидон қышқылының простагландиндерге дейін айналуын катализдейтін простагландин циклооксигеназа белсенділігін тежеу арқылы простагландиндердің босап шығуы мен синтезін бәсеңдетуге негізделген, бірақ басқа механизмдер де жоққа шығарылмайды. Фармакодинамикалық әсерлері Ибупрофен тромбоциттер агрегациясын қайтымды бәсеңдетеді. Егер осы препараттар бір мезгілде қолданылса, ибупрофен ацетилсалицил қышқылының төмен дозаларының тромбоциттер агрегациясына әсерін бәсеңдетуі мүмкін. Ибупрофеннің ыстықты түсіретін және ауыруды басатын әсері препаратты қабылдаған сәттен бастап 30 минуттың ішінде басталады.

Дозалау режимі Доза жасына және дене салмағына байланысты есептеледі. 5 мл суспензияның құрамында 200 мг ибупрофен бар. Ибуфен Д Форте препаратының бір реттік дозасы тәулігіне 3-4 рет баланың дене салмағының 5-10 мг/кг құрайды. Суспензияның ең жоғары тәуліктік дозасы дене салмағының 20-30 мг/кг құрайды. Препарат төмендегі сызба бойынша бір реттік дозада тағайындалады: Дене салмағы (пациенттің жасы) — Бір реттік доза — Ең жоғарғы тәуліктік доза 20-29 кг (7-ден 9 жасқа дейінгі балалар) — 5 мл (200 мг ибупрофенге сәйкес келеді) — 15 мл (600 мг ибупрофенге сәйкес келеді) 30-39 кг (10-нан 12 жасқа дейінгі балалар) — 5-7,5 мл (200-300 мг ибупрофенге сәйкес келеді) — 22,5 мл (900 мг ибупрофенге сәйкес келеді) 40 кг-ден астам (балалар мен 12 жастан асқан жасөспірімдер және ересектер) — 5-10 мл (200-400 мг ибупрофенге сәйкес келеді) — 30 мл (1200 мг ибупрофенге сәйкес келеді) Келесі дозалар арасындағы ең аз аралық 4-6 сағатты құрайды. Препаратты дәрігердің бақылауынсыз 3 күннен артық қолдануға болмайды. Ең төмен тиімді доза симптомдарды жеңілдету үшін қажетті ең қысқа уақыт кезеңі ішінде пайдаланылуы тиіс. Егер препаратты қысқа уақыт аралығында, симптомдарды жою үшін қажетті ең аз тиімді дозада қабылдаса, жағымсыз реакциялардың пайда болу қаупін барынша азайтуға болады. Препарат құрамында қант жоқ, сондықтан оны қант диабетімен ауыратын адамдарға қолдануға болады. Қолдану тәсілі Ішке қабылданады. Қолданар алдында біртекті суспензия алынғанша шайқау керек. Дәрілік препарат тамақтан кейін сұйықтықпен қабылданады. Қаптамамен бірге берілетін шкаласы бар өлшеуіш стақан препаратты дәл дозалауға мүмкіндік береді.

• әсер етуші затқа немесе қосымша заттардың кез келгеніне, сондай-ақ басқа қабынуға қарсы стероидты емес дәрілік препараттарға (ҚҚСП) аса жоғары сезімталдық • ацетилсалицил қышқылын (салицилаттар) немесе басқа ҚҚСП қабылдау түрткі болған бронх демікпесі, есекжем, тұмаурату • асқазан-ішек жолының ойық жаралы зақымдануы (асқазан мен он екі елі ішектің ойық жара ауруы) • анамнезінде ҚҚСП емімен байланысты асқазан-ішектен қан кетудің немесе тесілудің болуы • ми қантамырларынан қан кету немесе басқа жедел қан кету • геморрагиялық диатез, этиологиясы анықталмаған қан түзілуінің бұзылуы • ауыр сусыздану (құсу, іш өтуі немесе сұйықтықты жеткіліксіз қабылдаудан туындаған) • циклооксигеназа-2 спецификалық тежегіштерін қоса, басқа ҚҚСП бір мезгілде қолдану • бүйректің немесе бауырдың ауыр жеткіліксіздігі • жүректің ауыр жеткіліксіздігі (NYHA бойынша IV класс – Нью-Йорк кардиологтары ассоциациясының жіктемесі) • жүктіліктің үшінші триместрі • 7 жасқа дейінгі балалар, дене салмағы 20 кг кем балалар • тұқым қуалайтын фруктоза жақпаушылығы

Жиі • іштің ауыруы, жүрек айнуы, диспепсия, диарея, метеоризм, іш қату, қыжыл және сирек жағдайларда анемияға әкелуі мүмкін жеңіл асқазан-ішектен қан кетулерді қоса асқазан-ішек жолы тарапынан бұзылулар. Жиі емес • аса жоғары сезімталдық реакциялары: спецификалық емес аллергиялық реакциялар және анафилаксиялық реакциялар, деміпке, демікпенің өршуі, бронхтүйілуі, ентігу, әртүрлі типтегі бөртпе, қышыну, есекжем, пурпура, ангионевроздық ісіну • бас ауыруын, бас айналуын, ұйқышылдық, ұйқысыздық, қозу, ашушаңдық немесе шаршауды қоса орталық жүйке жүйесін тарапынан бұзылулар • көру қабілетінің бұзылулары • асқазан-ішек жолының ойық жаралары, тесілуі немесе қан кетуімен, ойық жаралы стоматит, колиттің және Крон ауруының өршуі, гастрит • тері бөртпесінің алуан түрлері. Сирек • құлақтың шыңылдауы • бүйрек тінінің зақымдануы (бүйрек бүртіктерінің некрозы), қандағы мочевина мен несеп қышқылының концентрациясының жоғарылауы • гемоглобин деңгейінің төмендеуі. Өте сирек • инфекциямен байланысты қабынудың өршуі (мысалы, некролиздық фасцииттің дамуы), сирек жағдайларда препаратты желшешек кезінде қабылдағанда терінің ауыр инфекциялары және жұмсақ тіндер тарапынан асқынулар дамуы мүмкін • гемопоэз бұзылулары (анемия, лейкопения, тромбоцитопения, панцитопения және агранулоцитоз). Алғашқы белгілер: қызба, тамақтың ауыруы, ауыз қуысының беткейлі ойық жаралары, тұмауға ұқсас симптомдар, айқын әлсіздік, мұрыннан қан кету, белгісіз этиологиядағы қан кетулер мен қанталаулар болып табылады. Мұндай жағдайларда препаратты қабылдауды тоқтату, анальгетиктермен және ыстық түсіретін дәрілермен кез келген өзін-өзі емдеуден бас тарту тиіс және дәрігерге жүгіну ұсынылады • беттің, тілдің және тамақтың ісінуі, ентігу, тахикардия және гипотензия (анафилаксия, ангиневроздық ісіну немесе ауыр шок) түрінде көрінетін ауыр аса жоғары сезімталдық реакциялары • демікпенің өршуі • психоздық реакциялар, депрессия • асептикалық менингит: ҚҚСП қабылдау аясында асептикалық менингиттің даму механизмі толық анық емес, бірақ қолда бар деректер иммундық реакцияны көрсетеді (препаратты қабылдаумен және препаратты тоқтатқаннан кейін симптомдардың жоғалуымен уақытша байланыс негізінде). Айта кету керек, асептикалық менингит симптомдарының жекелеген жағдайлары (мысалы, шүйде бұлшықетінің қаттылығы, бас ауыруы, жүрек айнуы, құсу, қызба немесе сананың бұлыңғырлығы) аутоиммунды аурулары бар (мысалы, жүйелі қызыл жегімен және дәнекер тіннің аралас ауруымен) пациенттердің ибупрофен қабылдаған кезде байқалды. • жүрек жеткіліксіздігі, жүректің жиі соғуы, ісіну, миокард инфарктісі • артериялық гипертензия, васкулит • эзофагит, ішектің жарғақшалық құрылымдарының қалыптасуы, панкреатит • бауыр дисфункциясы, бауырдың зақымдануы, әсіресе ұзақ уақыт қабылдаған кезде, бауыр жеткіліксіздігі, жедел гепатит • денеде қызылдау біркелкі емес, нысанаға немесе дөңгелек дақтарға ұқсайтын, көбінесе ортасында күлбіреуіктермен, терінің қабыршықтануымен, ауыздың, тамақтың, мұрынның, гениталийлер мен көздің ойық жаралары. Бұл ауыр тері бөртпелерінен бұрын қызба және тұмауға ұқсас симптомдар болуы мүмкін [эксфолиативтік дерматит, мультиформалы эритема, Стивенс-Джонсон синдромы, уытты эпидермалық некролиз]. • алопеция • ісінулер, әсіресе артериялық гипертензиясы немесе бүйрек жеткіліксіздігі бар пациенттерде, нефроздық синдром, интерстициальді нефрит, олар бүйректің жедел жеткіліксіздігімен бірге жүруі мүмкін. Белгісіз • тыныс алу жолдарының гиперреактивтілігі, соның ішінде демікпе, бронхтүйілу немесе ентігу • кеудедегі ауырсыну, бұл Кунис синдромы деп аталатын ықтимал ауыр аллергиялық реакцияның белгісі болуы мүмкін • жайылған бөртпе, дене қызуының жоғарылауы және ұлғайған лимфа түйіндері (DRESS-синдромы) • тері астындағы күлбіреуіктермен және қызбамен бірге жүретін төмпешіктері бар қызыл, қабыршақты кең таралған бөртпе. Симптомдар әдетте емдеудің басында пайда болады (жедел жалпыланған экзантематозды пустулез) • фотосезімталдық реакциялары Жағымсыз дәрілік реакциялар туындаған кезде медицина қызметкеріне, фармацевтика қызметкеріне немесе дәрілік препараттардың тиімсіздігі туралы хабарламаны қоса, дәрілік препараттарға жағымсыз реакциялар (әсерлер) бойынша ақпараттық деректер базасына тікелей жүгіну қажет Қазақстан Республикасы Денсаулық сақтау министрлігі Медициналық және фармацевтикалық бақылау комитетінің «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

Симптомдары: іштің ауыруы, құсу, мәңгіру, бас ауыруы, құлақтағы шуыл, депрессия, ұйқышылдық, метаболизмдік ацидоз, кома, геморрагиялық диатез, АҚ төмендеуі, құрысулар, жедел бүйрек жеткіліксіздігі, бауыр функциясының бұзылуы, тахикардия, брадикардия. Емі: асқазанды шаю (тек препаратты қабылдағаннан кейін бір сағат ішінде), белсендірілген көмір, сілтілік сусындар ішу, симптоматикалық ем.

Препаратты симптомдарды бақылауға қажетті қысқа уақыт ішінде ең төмен тиімді дозада қолдану жағымсыз реакцияларды азайтуға мүмкіндік береді. Егде жастағы пациенттер Егде жастағы адамдарда ҚҚСП қабылдағаннан кейін жағымсыз реакциялардың жиілігі жоғарылайды, әсіресе асқазан-ішектен қан кету немесе тесілу сияқты реакциялар өлімге әкелуі мүмкін. Егде жастағы адамдарда жағымсыз реакциялардың даму қаупі жоғары. Келесі аурулары бар пациенттерге сақ болу керек: • асептикалық менингиттің даму қаупінің жоғарылауына байланысты жүйелі қызыл жегі және дәнекер тінінің аралас ауруы • порфирин метаболизмінің туа біткен бұзылуы (мысалы, жедел алма-кезек порфирия) • асқазан-ішек жолдары тарапынан бұзылулар және ішектің созылмалы қабыну аурулары (ойық жаралы колит, Крон ауруы) • гипертензия және/немесе анамнездегі жүрек жеткіліксіздігі, өйткені ҚҚСП қабылдау аясында сұйықтықтың іркілуі және ісіну байқалды • бүйрек жеткіліксіздігі, өйткені бүйрек функциясының төмендеуі байқалуы мүмкін • бауыр дисфункциясы • тікелей ауқымды хирургиялық араласудан кейін • пішен қызбасы, мұрын қуысының полиптері немесе тыныс алу жүйесі тарапынан созылмалы обструктивті бұзылулары, демікпе ұстамалары (анальгетикалық демікпе деп аталатын), Квинке ісінуі немесе есекжем түріндегі аллергиялық реакциялардың даму қаупінің жоғарылауына байланысты • осы препаратқа аса жоғары сезімталдық реакциясының даму қаупінің жоғарылауына байланысты басқа заттарға аллергиялық реакция. Тыныс алу ағзалары тарапынан Бронх демікпесі немесе аллергиялық реакциясы бар пациенттерде бронхтүйілу құбылыстарының дамуы мүмкін. Басқа ҚҚСП Препаратты басқа ҚҚСП-мен, оның ішінде циклооксигеназа-2 селективті тежегіштерімен бірлесіп қолдануға жол берілмейді. Асқазан-ішек жолы тарапынан Емдеудің кез-келген кезеңінде ҚҚСП қабылдаған кезде асқазан-ішектен қан кетулер, ойық жаралар немесе тесілулер дамуы мүмкін, кейде өлімге әкеледі. Сонымен қатар, АІЖ тарапынан анамнездегі ауыр асқынулары жоқ және ескерту симптомдары жоқ пациенттерде асқынулар дамуы мүмкін. Анамнезінде ойық жарасы бар пациенттерде, әсіресе қан кетумен немесе тесілумен асқынған ойық жарамен және егде жастағы пациенттерде ҚҚСП дозасы жоғарылаған кезде асқазан-ішектен қан кету, ойық жара немесе тесілу қаупі артады. Осындай пациенттер емді ең төмен ықтимал дозадан бастау керек. Препаратты ацетилсалицил қышқылының төмен дозаларымен немесе асқазан-ішек жолдары тарапынан асқынулар даму қаупін арттыратын басқа дәрілік заттармен бірге қабылдайтын пациенттердегідей бұндай пациенттер үшін қорғаныс дәрілері (мысалы, мисопростол немесе протон сорғысының тежегіштері) пайдалана отырып кешенді емдеу нұсқасын қарастырған жөн. Анамнезінде ҚҚСП қабылдаған кезде АІЖ тарапынан асқынулары бар пациенттерге, әсіресе егде жастағы пациенттерге, ішперде қуысы ағзалары тарапынан кез келген ерекше симптомдар (әсіресе асқазан-ішектен қан кету) туралы, әсіресе емдеудің бастапқы кезеңінде хабарлау керек. Препаратты бір мезгілде ойық жара немесе қан кету қаупін арттыратын дәрілік заттармен, мысалы, пероральді кортикостероидтар, антикоагулянттар (мысалы, варфарин), серотонинді кері қармаудың селективті тежегіштері немесе тромбоциттерге қарсы препараттар (мысалы, ацетилсалицил қышқылы), бірге қабылдайтын пациенттерге сақтықпен ұсыну керек. Егер ибупрофен қабылдаған пациенттерде асқазан-ішектен қан кету немесе ойық жара пайда болса, емдеуді тоқтату керек. Асқазан-ішек жолының аурулары бар пациенттерге (ойық жаралы колит, Крон ауруы) аталған аурулардың өршуіне байланысты ҚҚСП-ны сақтықпен тағайындау керек. Терінің ауыр жағымсыз реакциялары (тыртықтар) Терінің ауыр реакциялары, соның ішінде эксфолиативтік дерматит, көп формалы эритема, Стивенс Джонсон синдромы, уытты эпидермалық некролиз, эозинофилиямен және жүйелік симптомдармен дәрілік реакция (DRESS), жедел жайылған экзантематозды пустулез (AGEP), ибупрофенмен емдеумен байланысты. Ибуфен® Д Форте препаратын пайдалануды тоқтатыңыз және "Жағымсыз реакциялардың сипаттамасы, ..." бөлімінде сипатталған осы терінің ауыр реакцияларына байланысты қандай да бір симптомдарды байқасаңыз, дереу медициналық көмекке жүгініңіз. Жүрек-қантамырлық және цереброваскулярлық әсерлер Ибупрофен сияқты қабынуға қарсы/ауырсынуды басатын дәрілік препараттарды қабылдау жүрек ұстамасы дамуы немесе инсульт қаупінің шамалы жоғарылауымен қатар жүруі мүмкін, әсіресе жоғары дозада қабылдаған кезде. Ұсынылған дозалар мен емдеу ұзақтығынан аспауы керек. Егер пациентте келесілер болса Ибуфен® Д Форте препаратын қабылдағанға дейін емдеуді дәрігермен немесе фармацевтпен талқылау керек: • жүрек аурулары, соның ішінде жүрек жеткіліксіздігі (NYHA II-III класы), стенокардия (кеудедегі ауырсыну), сондай-ақ егер пациентте жүрек ұстамасы, коронарлық тамырларға опреация, кез-келген түрдегі инсульт (соның ішінде "мини-инсульт" немесе "ТИШ" транзиторлық ишемиялық шабуыл) немесе пациентте шеткері артерия ауруы болса (артериялардың тарылуына немесе бітелуіне байланысты табандардағы нашар айналым); • қан қысымының бақыланбайтын жоғарылауы, қант диабеті, қандағы холестериннің жоғарылауы, жүрек ауруы немесе отбасы мүшелерінде инсульт болса, немесе пациент темекі шегетін болса. Бұл дәріге аллергиялық реакцияның белгілері, соның ішінде тыныс алумен байланысты проблемалары, бет пен мойын аймағының ісінуі (ангионевроздық ісіну), ибупрофен қабылдаған кезде кеудедегі ауырсыну туралы хабарланды. Егер осы белгілердің кез келгенін байқасаңыз, Ибуфен® Д Форте қабылдауды дереу тоқтатыңыз және дереу дәрігерге немесе жедел медициналық көмек қызметіне хабарласыңыз. Бүйрек тарапынан бұзылулар Анальгетиктерді үнемі қабылдау, әсіресе әртүрлі ауырсынуды басатын дәрілер біріктірілімін қабылдау, әдетте бүйрек жеткіліксіздігінің даму қаупі бар бүйректің тұрақты зақымдалуына әкеледі (анальгетикалық нефропатия). Дегидратациясы бар балаларда бүйрек функциясының бұзылу қаупі бар. Инфекциялар Ибуфен® Д Форте қызба және ауырсыну сияқты инфекциялардың белгілерін жасыруы мүмкін. Сондықтан Ибуфен® Д Форте инфекцияның тиісті емін кейінге қалдыруы мүмкін, бұл асқыну қаупінің жоғарлауына әкелуі мүмкін. Бұл бактериялар туындатқан пневмония кезінде және желшешекпен байланысты терінің бактериялық инфекциялары кезінде байқалды. Егер сіз бұл препаратты инфекция кезінде қабылдасаңыз және инфекция симптомдары сақталса немесе нашарласа, дереу дәрігерге қаралыңыз. Арнайы ескертулер Ауыр жедел аса жоғары сезімталдық реакциялары (мысалы, анафилаксиялық шок) өте сирек кездеседі. Ибуфен® Д Форте қабылдауды дереу тоқтатыңыз және осы белгілердің кез келгенін байқасаңыз, дереу дәрігерге немесе жедел медициналық көмекке хабарласыңыз. Ибупрофен, Ибуфен® Д Форте препаратының құрамындағы белсенді зат, тромбоциттік қызметін уақытша тежей алады (тромбоциттер агрегациясы). Сондықтан коагуляциясы бұзылған пациенттердің жағдайын мұқият бақылау керек. Ибуфен® Д Форте препаратын ұзақ уақыт қолданған кезде бауыр мен бүйрек қызметін, сондай-ақ жалпы қан талдауын үнемі бақылау қажет. Бас ауыруын басатын кез-келген дәрілік затты ұзақ уақыт қолдану оның күшеюіне әкелуі мүмкін. Бұл жағдайда немесе жағдайдың осындай дамуына күдік болған жағдайда медициналық кеңес алуға жүгіну және емдеуді тоқтату керек. «Дәрілік заттарды шамадан тыс пайдаланудан туындаған бас ауыруы» диагнозы бас ауыруынан препараттарды үнемі қолдануға қарамастан немесе осындай қолдану нәтижесінде жиі немесе күнделікті бас ауыруы бар пациенттерге қойылуы мүмкін. Алкогольді қатар тұтынған кезде ҚҚСП-ден туындаған жағымсыз реакциялардың жоғарылауы мүмкін, әсіресе асқазан-ішек жолдары немесе орталық жүйке жүйесі тарапынан. Қосымша заттар Ибуфен® Д Форте құрамында сұйық мальтитол (E965) бар, осыған байланысты препаратты сирек тұқым қуалайтын фруктоза жақпаушылығы бар пациенттерде қолдануға болмайды. Фертильділік, жүктілік және лактация кезеңі Циклооксигеназа/простагландиндер тежегіштері овуляцияға әсер ете отырып, әйелдерде фертильділікті төмендететіні туралы жеке мәліметтер бар. Ибуфен® Д Форте жүктіліктің соңғы 3 айында қолданылмауы керек, себебі ол тумаған нәрестеге зиян келтіруі немесе босану кезінде қиындықтар тудыруы мүмкін. Тумаған нәрестеде бүйрек және жүрек проблемаларын тудыруы мүмкін. Бұл ана мен баланың қан кетуге бейімділігіне әсер етуі мүмкін және босанудың күтілгеннен кеш немесе ұзағырақ болуына әкелуі мүмкін. Жүктіліктің алғашқы 6 айында Ибуфен® Д Форте қабылдамаңыз, егер бұл өте қажет болмаса және дәрігер ұсынбаса. Егер пациентке осы кезеңде немесе жүкті болуға тырысу кезінде емдеу қажет болса, ең төменгі дозаны мүмкіндігінше қысқа уақыт ішінде қолдану керек. Жүктіліктің 20-шы аптасынан бастап бірнеше күннен артық қабылданатын Ибуфен® Д Форте тумаған нәрестеде бүйрек проблемаларын тудыруы мүмкін, бұл нәрестені қоршап тұрған амниотикалық сұйықтықтың төмен деңгейіне (олигогидрамниозға) немесе баланың жүрегіндегі қан тамырларының (артериялық түтіктің) тарылуына әкелуі мүмкін. Егер бірнеше күннен артық емдеу қажет болса, дәрігер қосымша бақылауды ұсынуы мүмкін. Ибупрофен емшек сүтіне өте төмен концентрацияда енеді. Препаратты қысқа мерзімге қолданғанда бала емізуді тоқтату қажеттілігі туындамайды. Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері Қысқа мерзімді қолдану кезінде бұл препарат механизмдерді жүргізу және басқару қабілетіне әсер етпейді немесе аз әсер етеді.

Нұсқаулықта көрсетілмеген.

Ибупрофенді келесі дәрілік препараттармен бір мезгілде қолданудан аулақ болу керек: Басқа ҚҚСП, атап айтқанда, циклооксигеназа-2 селективті тежегіштері: жағымсыз реакциялардың туындау қаупінің ықтимал ұлғаюына байланысты ҚҚСП тобынан екі және одан да көп препаратты бір мезгілде қолданудан аулақ болу керек. Ацетилсалицил қышқылы: жағымсыз реакциялардың ықтимал күшейюіне байланысты ибупрофен мен ацетилсалицил қышқылын бір мезгілде қабылдау ұсынылмайды. Егер осы препараттар бір мезгілде қолданылса, ибупрофен ацетилсалицил қышқылының төмен дозаларының тромбоциттер агрегациясына әсерін бәсеңдетуі мүмкін. Сондықтан қан ұю бұзылулары бар пациенттерді мұқият бақылау керек. Келесі дәрілік препараттармен бір мезгілде сақтықпен қолдану: Гипертензияға қарсы препараттар (АКФ тежегіштері, бета-рецепторлардың блокаторлары және ангиотензин-II антагонистері) және диуретиктер: ҚҚСП бұл препараттардың тиімділігін төмендетуі мүмкін. Бүйрек функциясы бұзылған кейбір пациенттерде (мысалы, сусыздануы бар пациенттер немесе бүйрек қызметі бұзылған егде жастағы пациенттер) препаратты АКФ тежегіштерімен, бета-рецепторлардың блокаторларымен немесе ангиотензин-II антагонистерімен және циклооксигеназаны тежейтін препараттармен бірге қабылдау бүйрек функциясының одан әрі нашарлауына, соның ішінде әдетте қайтымды болып табылатын бүйректің жедел жеткіліксіздігіне әкелуі мүмкін. Сондықтан препараттардың біріктірілімін сақтықпен қабылдау керек; бұл әсіресе егде жастағы пациенттерге қатысты. Пациенттер оңтайлы су балансының сақталуын қадағалап отыру керек және қатар ем басталғаннан кейін және одан әрі мезгіл-мезгіл бүйрек қызметін тексеруі керек. Диуретиктер ҚҚСП нефроуыттылық қаупін арттыруы мүмкін. Дигоксин сияқты жүрек гликозидтері: ҚҚСП жүрек жеткіліксіздігін нашарлатуы, шумақтық сүзілу жылдамдығын төмендетуі және гликозидтердің плазмалық концентрациясын жоғарылатуы мүмкін. Ибуфен® Д Фортені дигоксин препараттарымен бірге қабылдау қан сарысуындағы дигоксин деңгейін жоғарылатуы мүмкін. Дұрыс қолданған кезде қан сарысуындағы дигоксин деңгейін тексеру қажет емес (3 күннен аспайды). Литий препараттары: ибупрофен қан плазмасындағы литий концентрациясын жоғарылатуы мүмкін. Дұрыс қолданған кезде қан сарысуындағы литий деңгейін тексеру қажет емес (3 күннен аспайды). Калий сақтайтын диуретиктер: Ибуфен® Д Форте препаратын калий сақтайтын диуретиктермен бірге қабылдау гиперкалиемияға әкелуі мүмкін (қан сарысуындағы калий деңгейін тексеру ұсынылады). Фенитоин: Ибуфен® Д Фортені фенитоин препараттарымен бірге қабылдау қан сарысуындағы фенитоин деңгейін жоғарылатуы мүмкін. Дұрыс қолданған кезде қан сарысуындағы фенитоин деңгейін тексеру қажет емес (3 күннен аспайды). Метотрексат: Ибуфен® Д Форте препаратын метотрексатты қабылдағанға дейін немесе одан кейін 24 сағат ішінде қабылдау метотрексат біріктірілімінің жоғарылауына және оның уытты әсерінің жоғарылауына әкелуі мүмкін. Такролимус: нефроуыттылық қаупінің жоғарылауы. Циклоспорин: нефроуыттылық қаупінің жоғарылауы. Кортикостероидтар: асқазан-ішек ойық жаралары немесе қан кету қаупінің жоғарылауы. Антикоагулянты: ҚҚСП варфарин сияқты антикоагулянттардың әсерін күшейтуі мүмкін. Антитромбоциттік препараттар және серотонинді кері қармаудың селективті тежегіштері (СКҚСТ): асқазан-ішектен қан кету қаупінің жоғарылауы. Сульфонилмочевина препараттары: бірге қабылдаған кезде сақтық шарасы ретінде қандағы глюкоза деңгейін тексеру ұсынылады. Зидовудин: зидовудинмен және ибупрофенмен бірге ем қабылдаған гемофилиясы бар АИТВ-жұқтырған пациенттерде гемартроз және гематома туындау қаупі жоғарылағаны туралы деректер бар. Пробенецид және сульфинпиразон: құрамында пробенецид немесе сульфинпиразон бар препараттар ибупрофеннің шығарылуын кешіктіруі мүмкін. Баклофен: ибупрофенді қабылдағаннан кейін баклофеннің уыттылығының даму қаупі бар. Ритонавир: плазмадағы ҚҚСП концентрациясын жоғарылатуы мүмкін. Аминогликозидтер: ҚҚСП аминогликозидтердің шығарылуын төмендетуі мүмкін. Хинолон антибиотиктері: ҚҚСП және хинолон антибиотиктерімен бірлескен ем қабылдайтын пациенттерде құрысулар қаупінің жоғарылауы мүмкін. CYP2C9 тежегіштері: ибупрофенді CYP2C9 изоферментінің тежегіштерімен бір мезгілде қолданғанда CYP2C9 субстраты болып табылатын ибупрофеннің әсері күшейтіледі. Ибупрофенді CYP2C9 тежегіштерімен бірге қолданғанда, әсіресе ибупрофеннің жоғары дозаларын вориконазолмен және флуконазолмен бірге қолданғанда, ибупрофен дозасын төмендету мүмкіндігін қарастыру қажет. Каптоприл: эксперименттік зерттеулерде ибупрофен натрийдің бөлінуін тежейтіні көрсетілген (каптоприл әсері). Холестирамин: ибупрофен мен холестираминді бір мезгілде қолданғанда ибупрофеннің сіңуі кешіктіріледі және төмендейді (25%-ға). Бұл препараттарды бірнеше сағат аралықпен қабылдау керек.

Сақтау мерзімі 2 жыл Ашылған құтыны 6 ай ішінде пайдалану керек. Жарамдылық мерзімі өткеннен кейін қолдануға болмайды! Сақтау шарттары Түпнұсқалық қаптамасында, 25 °С-ден аспайтын температурада сақтау керек. Балалардың қолы жетпейтін жерде сақтау керек!