Идарубицин гидрохлориді ФаРес® 5 мг/5 мл раствор 1мг/мл

1 мл ерітінді құрамында белсенді зат - 1 мг идарубицин гидрохлориді қосымша заттар: глицерин, натрий гидроксиді, хлорсутек қышқылы, инъекцияға арналған су. Көлемі 5 мл 1 құтыда натрий мөлшері 1 ммоль (23 мг) аспайды. Сыртқы түрінің сипаттамасы Іс жүзінде көрінетін бөлшектерден бос мөлдір қызыл-қызғылт сары ерітінді.

• басқа цитостатикалық препараттармен, мысалы, цитарабинмен біріктірілімде жедел миелобластты лейкозы бар бұрын емделмеген ересек пациенттерде ремиссияны индукциялау үшін; • цитарабинмен біріктірілімде жедел миелобластты лейкозы бар бұрын емделмеген бала жасындағы пациенттерде ремиссияны индукциялау үшін.

Әсер ету механизмі Идарубицин топоизомераза II ферментімен өзара әрекеттесетін, ДНҚ екі еселеніп өсуін тежейтін антрациклиндерге жатады және нуклеин қышқылдарының синтезіне тежегіш әсерін көрсетеді. Антрациклин құрылымын 4-ші позицияда модификациялау идарубицин молекуласына жоғары липофильділік береді, доксорубицинмен және даунорубицинмен салыстырғанда, бұл жасушалармен идарубициннің сіңірілуі артуына әкеледі. Идарубицин көп түрлі дәрілік төзімділіктің дамуына жауапты ақуыз – Р-гликопротеин экспрессиясын бәсеңдетеді. Осыған байланысты идарубицин көп түрлі дәрілік төзімділік модуляторы қасиеттеріне ие болады, бұл біріктірілген химиялық емде де, басқа цитостатикалық дәрілерге төзімді жағдайларда да оның тиімділігін арттырады. Идарубициннің негізгі метаболиті идарубицинол in vitro және in vivo эксперименттік модельдерінде ісікке қарсы белсенділікті көрсетті. Егеуқұйрықтарда дәл сол дозадағы идарубицинол идарубицинге қарағанда әлдеқайда төмен кардиоуыттылық әсер берді.

Емдеуді онкологиялық ауруларды стационар жағдайында емдеу тәжірибесі бар дәрігерлер ғана жүргізуі тиіс. Дәрілік препаратты енгізу қатаң түрде нұсқаулық бойынша жүргізілуі тиіс. Дозалау режимі Ересектер Біріктірілген емде (мысалы, цитарабинмен) идарубициннің дозасы 3 күн бойы вена ішіне күнделікті дене беткейінің ауданына (ДБА) 12 мг/м2 немесе 5 күн бойы вена ішіне күнделікті 8 мг/м2 құрайды. Идарубициннің жинақталатын дозасы ДБА 120 мг/м2 аспауы тиіс. Идарубициннің жинақталатын дозасын анықтау кезінде басқа антрациклиндердің алдыңғы енгізілуін ескеру қажет, осылайша идарубицинге қайта есептегенде даунорубицин немесе доксорубициннің енгізілген дозасының төрттен бір бөлігі алынады. Идарубицинмен емдеу кезінде пациенттердің жалпы жай-күйін және бір мезгілде енгізілетін басқа цитостатикалық дәрілік заттардың дозасын ескеру керек. Идарубициннің ДБА қарай 12 мг/м2 дозасын цитарабинмен біріктірілімде 3 күн қатарынан енгізген кезде ДБА 45 мг/м2 дозада даунорубицин енгізумен салыстырғанда ем анағұрлым қарқынды болады. Идарубицинмен емдеу ұзақтығы емдеу хаттамасына байланысты. Идарубицинмен емдеудің ең жоғары ұзақтығы анықталмаған. Пациенттердің арнайы топтары Балалар Жедел миелобластты лейкозы бар балаларда цитарабинмен біріктірілген идарубициннің ұсынылатын дозасы баяу вена ішілік инъекциялар жолымен 3 күн бойы күнделікті енгізілетін 10 – 12 мг/м2 құрайды. Бұл ұсыныстар жалпы сипатта болады. Идарубициннің нақты дозалау режимдері балаларда жедел миелобластты лейкозды емдеу хаттамаларында көрсетілген. Егде жастағы пациенттер Идарубицинді 65 жастан асқан пациенттерге аса сақтықпен тағайындау керек, өйткені жасына байланысты қатар жүретін аурулардың саны едәуір артады, гемопоэздік қорлар азаяды және ағзалар мен жүйелердің қауқарсыздығы артады. Бауыр және/немесе бүйрек функциясының бұзылуы бар пациенттер Бауыр және/немесе бүйрек функциясының елеусіз бұзылулары кезінде идарубициннің дозасын төмендету мүмкіндігін қарастыру керек («Жағымсыз реакциялардың сипаттамасы» бөлімін қараңыз). Идарубицинді бауыр және/немесе бүйрек функциясының ауыр бұзылулары бар пациенттерге енгізуге болмайды. Енгізу әдісі мен жолы Идарубицин тек вена ішіне енгізілуі тиіс. Бір құты бір рет енгізуге арналған. Мөлдір ерітінділерді ғана пайдалану қажет. Препарат ерітіндісін енгізер алдында бөлме температурасына дейін жеткізу қажет. Құтыда қалған дәрілік заттың кез келген мөлшерін жою қажет. Идарубицинді натрий хлоридінің физиологиялық ерітіндісінің инфузиясы жүргізілетін инфузиялық желі арқылы 5 – 10 минут ішінде баяу болюстік инъекция түрінде енгізу қажет. Идарубицинді енгізудің бұл әдісі тромбофлебиттің даму қаупін азайтады. Экстравазация деп аталатын, идарубициннің тамырдан тыс кеңістікке түсуі тіндердің ауыр некрозына әкелуі мүмкін. Сондықтан идарубицинді енгізуді бастар алдында иненің тамыр ішіне енгізілгеніне көз жеткізіп және оның сенімді бекітілуін қамтамасыз ету қажет. Енгізу аумағындағы күйдіруді сезіну идарубициннің тамырдан тыс кеңістікке түскенін айғақтайды. Мұндай жағдайларда идарубицинді енгізу тоқтатылуы және басқа венаға енгізіліп жаңартылуы тиіс. Идарубицинді бір венаға қайталап енгізу кезінде немесе өте жіңішке веналарға енгізу кезінде тамырлардың склероздану қаупі бар. Әдетте, идарубицинді енгізу 5-10 минут бойы жүргізіледі. Дәрілік препаратты қолдану тәсілін түсіндіру үшін медициналық қызметкер кеңесіне жүгіну жөніндегі ұсыныстар Идарубицин тек вена ішіне енгізілуі тиіс. Емдеуді онкологиялық ауруларды стационар жағдайында емдеу тәжірибесі бар дәрігерлер ғана жүргізуі тиіс. Дәрілік препаратты енгізу қатаң түрде нұсқаулық бойынша жүргізілуі тиіс.

• идарубицинге, басқа антрациклиндер мен антрахинондарға, сондай-ақ қосымша заттарға аса жоғары сезімталдық • негізгі аурудан туындамаған бүйректің ауыр (сарысу креатинині > 2.5 мг/дл) және бауырдың ауыр жеткіліксіздігі (билирубин > 2 мг/дл) • бақыланбайтын инфекциялар • үдемелі жүрек жеткіліксіздігі (Нью-Йорк NYHA кардиологиялық қауымдастығының жіктемесі бойынша IV кластық кардиомиопатия) • іркілісті жүрек жеткіліксіздігіне (Нью-Йорк NYHA кардиологиялық қауымдастығының жіктемесі бойынша III және IV кластар) әкелген жедел миокард инфаркті және/немесе бастан өткерген миокард инфаркті • жүректің жедел қабыну аурулары • ауыр аритмиялар • тұрақты миелосупрессия • осының алдында идарубицинмен немесе ең жоғары жинақталатын дозада басқа антрациклиндермен/антраценоидтармен емделу • геморрагиялық диатез • стоматит • бала емізу • тірі вакциналармен вакцинациялау (мысалы, сары қызбаға қарсы вакцинация) Деректер болмағандықтан, дененің толық сәулеленуіне немесе сүйек кемігін трансплантациялауға ұшыраған пациенттерде идарубицин қолдану ұсынылмайды.

Идарубициннің екі күрделі жағымсыз реакциялары миелосупрессия және кардиологиялық уыттану болып табылады. Миелосупрессия нәтижесінде өз кезегінде өліммен аяқталуға алып келуі мүмкін қан кету, қызба, инфекциялар, сепсис/сепсистік шок және тіндік гипоксия дамуы ықтимал. Әрбір жиілік тобында жағымсыз реакциялар ауырлығының азаюы ретімен ұсынылады. Өте жиі (10 пациенттің 1-нен жиі) • инфекциялар • анемия, ауыр лейкопения және нейтропения (гранулоцитопения), тромбоцитопения. • анорексия • препарат енгізілген вена бойының қызаруы • жүрек айну, құсу, мукозиттер/стоматиттер, диарея, құрсақ қуысындағы ауырсыну немесе күйдіру сезіну • алопеция (әдетте қайтымды), әдетте ем тоқтатылғаннан кейін 2-3 ай ішінде шаш өседі. • препарат енгізуден кейін 1-2 күн ішінде несептің қызыл түске боялуы • қызба, бас ауыру, қалтырау Жиі (10 пациенттің 1-нен сирек) • іркілісті жүрек жеткіліксіздігі, брадикардия, синустық тахикардия, тахиаритмия, кардиомиопатия, сол жақ қарыншаның лықсыту фракциясының симптомсыз азаюы, кардиомиопатия • жергілікті флебиттер, тромбофлебиттер, қан кетулер • асқазан-ішек қан кетулері, іштің ауырсынуы • бауыр ферменттерінің және билирубиннің жоғарылауы • бөртпе, қышыну, сәулеленуден кейінгі аса жоғары сезімталдық (радиациялық жады деп аталатын реакция) Жиі емес (100 пациенттің 1-нен сирек) • сепсис/септицемия • салдарлы лейкоз (жедел миелобластты лейкоз және миелодисплазиялық синдром) • дегидратация • гиперурикемия • ЭКГ өзгерістері (мысалы, ST сегментіндегі спецификалық емес өзгерістер), миокард инфарктісі • шок • эзофагиттер, колиттер (ауыр энтероколитті немесе тесілумен болатын нейтропениялық энтероколитті қоса) • терінің және тырнақ пластинкаларының гиперпигментациясы, есекжем, флегмона (ауыр түрінде), тіндер некрозы Сирек (1000 пациенттің 1-нен сирек) • миға қан құйылу Өте сирек (10000 пациенттің 1-нен сирек) • анафилаксия • перикардит, миокардит, жүрекше-қарыншалық блокада немесе Гисс шоғырының бөгелісі • тромбоэмболия, беттің гиперемиясы • қарыншалық эрозиялар/ойылып жаралану • акральді эритема Жиілігі белгісіз (қолда бар деректер бойынша жиілігін бағалау мүмкін емес) • панцитопения • ісік лизисі синдромы • енгізген орындағы реакциялар Жекелеген жағымсыз реакциялар сипаттамасы Қан түзу ағзалары тарапынан Айқын миелосупрессия идарубицинмен емдеудің ең ауыр жағымсыз реакциясы болып табылады. Алайда, миелосупрессия лейкоз жасушаларын жою үшін қажет. Идарубицин енгізуді бастағаннан кейінгі 10 – 14 күні лейкоциттер мен тромбоциттер саны тым аз деңгейге жетеді. Лейкоциттер мен тромбоциттер саны препаратты енгізуді бастағаннан үшінші аптаға қарай қалыпты мәндерге дейін қалпына келеді. Терең миелосупрессияның дамуы аясында ауыр инфекциялар және/немесе қан кетулер даму себебінен өліммен аяқталу хабарланған. Миелосупрессияның клиникалық зардаптары өліммен аяқталуға әкелуі мүмкін қызба, инфекциялар, сепсис, сепсистік шок, қан кету, тіндер гипоксиясы болды. Фебрильді нейтропения дамыған жағдайда венаішілік антибиотиктермен ем жүргізу ұсынылады. Кардиоуыттылық Өмірге қауіпті іркілісті жүрек жеткіліксіздігі антрациклиндермен индукцияланған кардиомиопатияның ең ауыр түрі болып табылады және препараттың дозаны шектейтін жинақтаушы уыттылығы болып табылады. Асқазан-ішек жолы тарапынан Стоматит көбінесе емдеудің басында пайда болады және ауыр жағдайларда шырышты қабықтың ойылып жаралануына дейін үдеуі мүмкін. Алайда, пациенттердің көпшілігі осы жағымсыз реакциялардан емдеу басталғаннан кейінгі 3-ші аптада қалпына келеді. Қатты құсу және диарея организмнің сусыздануына әкелуі мүмкін. Жүрек айнуы мен құсуды құсуға қарсы дәрілерді профилактикалық енгізу арқылы реттеуге болады. Аспаптық араласым кезінде тоқ ішектің тесілу қаупі артады. Іштің қатты ауыруы дамыған пациенттерде тесілудің болуы мүмкіндігін ескеру керек. Енгізу орнындағы реакциялар Флебит/тромбофлебит қаупін «Қолдану бойынша ұсынымдар» бөлімде сипатталған емшараға сәйкес ең аз етуге болады. Экстравазация оқшау ауырсынуды, айқын целлюлитті және тіндер некрозын туындатады. Басқа жағымсыз әсерлері Гиперурикемия ісік жасушаларының жылдам лизисі нәтижесінде туындауы мүмкін. Гиперурикемия симптомдарын гидратация, несепті сілтілеу және аллопуринол көмегімен бақылау керек. Басқа жағымсыз реакция буллезді эритема болып табылады. Балалар және жас ересектер Балалар мен жас ересектердегі жағымсыз реакциялар, балалардың антрациклинді кардиоуыттылыққа көбірек сезімталдығын қоспағанда, ересек пациенттердегіге ұқсас сипатта болады. Жағымсыз дәрілік реакциялар туындағанда медициналық қызметкерге немесе фармацевтикалық қызметкерге немесе, дәрілік препараттардың тиімсіздігі туралы хабарламаларды қоса, дәрілік препараттарға болатын жағымсыз реакциялар (әсерлер) жөніндегі ақпараттық деректер базасына тікелей хабарласу керек. Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

Симптомдары: идарубициннің өте жоғары дозаларын енгізуден енгізілген сәттен бастап 24 сағат ішінде жедел миокардиальді уыттану және келесі 1 – 2 аптаның ішінде терең миелосупрессияның дамуы мүмкін. Кейіннен білінетін жүрек жеткіліксіздігі антрациклиндердің артық дозалануынан соң бірнеше ай өткенде дамуы мүмкін. Емі: Идарубицинге арнайы антидот белгісіз. Пациенттерді мұқият қадағалау қажет және жүрек жеткіліксіздігінің белгілері білінгенде кардиолог кеңесін алу керек. Айқын миелосупрессияның дамуы кезінде миелопоэздің қай тармағы көбірек зақымдануына байланысты, пациентті асептикалық үй-жайға ауыстыру немесе жетіспейтін қанның формалық элементтерін құю сияқты демеуші терапия шараларын жүргізу орынды.

• Жүкті медицина қызметкерлері идарубицинмен жұмыс істемеуі тиіс. • Медициналық қызметкерлер идарубицинмен жұмыс жасағанда қорғаныс киімін (халат, қолғап, көзілдірік және маска) киюі керек. • Препаратты сұйылту және дозалау бойынша барлық емшаралар ламинарлы ауа ағыны бар арнайы кабинетте жүргізілуі тиіс.Препаратты сұйылту жүргізілетін жұмыс беткейі сұйықтық өткізбейтін бір реттік үлбірдегі сіңіргіш төсеммен жабылуы тиіс. • Препаратты сұйылту және енгізу үшін, сондай-ақ препараттың сұйылту орнын тазалау үшін пайдаланылған барлық заттар, қолғаптарды қоса алғанда, өртеу әдісімен жою үшін қауіпті қалдықтарға арналған арнайы контейнерлерге салынуы тиіс. • Барлық ластанған заттарды натрий гипохлоридінің 10% ерітіндісімен өңдеу керек. Препарат ерітіндісінің бояуының жоғалуы оның цитоуыттылық белсенділігінің жоғалуын көрсетеді. • Егер препарат теріге және шырышты қабықтарға түссе, оларды дереу сумен немесе натрий хлоридінің изотониялық ерітіндісімен жуу керек. • Дәрілік препарат тек бір рет қолдануға арналған. Препараттың қалған барлық мөлшерін жою керек. Арнайы сақтандырулар Идарубицин цитоуытты химиялық ем жүргізу тәжірибесі бар дәрігерлердің бақылауымен ғана енгізілу қажет. Бұл олар туындаған жағдайларда аурудың өзінің де, жүргізілген емнің де асқынуларын (қан кетулер, инфекциялық асқынулар) тез және тиімді басуды қамтамасыз етеді. Идарубицинмен ем басталғанша пациенттер осының алдында цитоуытты дәрілермен химиялық емдеу курстарының жедел уыттану көріністерінен (стоматит, нейтропения, тромбоцитопения, жайылған инфекциялар сияқты) толық қалыпқа келуі тиіс. Идарубицинмен ем басталғанша кез келген жүйелі ағымдағы инфекциялар емделуі тиіс. Гематологиялық уыттану Идарубицин айқын миелосупрессиялық әсер көрсетеді. Идарубицинді емдік дозаларда енгізуден кейін барлық пациенттерде сүйек кемігінің ауыр бәсеңдеуі туындайды. Сондықтан қанның көрсеткіштерін (қанның жалпы талдауы және лейкоциттік формула), гранулоциттер, эритроциттер және тромбоциттерді қоса және әр ем курсына дейін және ем уақытында мұқият бақылау керек. Дозаға тәуелді қайтымды лейкопения және/немесе гранулоцитопения (нейтропения) идарубициннің гематологиялық уыттылығы басым болатын көрінісі және осы препараттың көбірек таралған дозасын шектейтін жедел уыттылығы болып табылады Лейкопения және нейтропения әдетте ауыр ағымды болады. Сондай-ақ тромбоцитопения және анемия туындауы мүмкін. Нейтрофилдер мен тромбоциттер препаратты енгізуден кейін 10 – 14 күннен соң өзінің ең төмен деңгейіне (надир) жетеді; алайда әдетте жасуша саны қалыпқа 3 апта ішінде оралады. Ауыр миелосупрессия аясындағы инфекциялар және/немесе қан кетулер салдарынан өліммен аяқталу жағдайлары туралы хабарланған. Ауыр миелосупрессияның клиникалық көріністері сондай-ақ қызба, инфекциялар, сепсис/септицемия, сепсистік шок, қан құйылу, тіндер гипоксиясы немесе өліммен аяқталуды қамтиды. Фебрильді нейтропения жағдайында вена ішіне антибиотиктер енгізу ұсынылады. Идарубицинмен емдеуде ауыр геморрагиялық және/немесе инфекциялық асқынулардың тиімді емін жылдам жүргізуге болатын жағдаймен қамтамасыз ету қажет. 55 жастан асқан пациенттерге аплазиялық фаза кезеңінде арнаулы демеуші ем жүргізу керек. Салдарлы лейкоз Идарубицинді қоса, антрациклиндермен ем қабылдаған пациенттерде лейкемия алдындағы фазасымен немесе онсыз салдарлы лейкоздың даму мүмкіндігі туралы хабарламалар бар. Салдарлы лейкоз ДНҚ өзгеріске түсуін туындататын басқа препараттармен біріктіріп антрациклиндерді тағайындайтын жағдайларда, сондай-ақ басқа цитоуытты дәрілік заттармен алдын ала өте күшті емделген пациенттерде немесе антрациклиндердің жоғары дозалары тағайындалғанда өте жиі дамиды. Салдарлы лейкоздардың 1-ден 3 жылға дейін созылатын жасырын кезеңі болады. Асқазан-ішек уыттылығы Идарубицин құстыруы мүмкін. Мукозит (ең негізгісі стоматит, сирек жағдайда эзофагит) әдетте идарубицин енгізгеннен кейін жедел туындайды және егер ол ауыр болса бірнеше күн ішінде шырышты қабықтың ойық жаралануына дейін үдеуі мүмкін. Пациенттердің көпшілігінде шырышты қабықтың жазылуы ем басталғаннан үшінші аптада болады. Кардиологиялық уыттылық Идарубицинмен ем аясында кардиоуыттану көріністері ерте немесе кеш білінетін сипатта болуы мүмкін. Идарубицин кардиоуыттылығының ерте көріністеріне негізінен синустық тахикардия және/немесе ЭКГ-дағы ST сегментінің және Т тісшесінің спецификалық емес өзгерістері сияқты электрокардиограмма (ЭКГ) өзгерістері жатады. Жүрек қарыншаларының мерзімінен бұрын жиырылуын және қарыншалық тахикардия, брадикардия, сондай-ақ жүректің жүрекше-қарыншалық блокадасы және жүрекше-қарыншалық шоғыр бөгелісін қамтитын тахиаритмиялардың да дамуы хабарланды. Кардиоуыттанудың ерте көріністері жүрек-қантамыр жүйесі тарапынан кешірек білінетін асқынулардың предикторлары болып табылмайды, клиникалық мәнді сипатта болуы сирек және идарубицинмен емді тоқтатуды талап етеді. Кешеуілді немесе кейін білінетін кардиоуыттану көріністері химиялық ем курсының аяқталуына таман немесе ем біткен соң 2-3 ай өткенде дамиды. Идарубицинмен ем тоқтатылған соң бірнеше ай немесе тіпті жыл өткенде кардиоуыттанудың дамуы туралы хабарламалар бар. Кейін білінетін кардиомиопатия сол жақ қарыншаны лықсыту фракциясының (СҚЛФ) жиырылуы және/немесе ентігу, өкпе ісінуі, ісінулер, кардиомегалия, гепатомегалия, олигоурия, асцит, плевралық жалқық, атшабыс ырғағы сияқты созылмалы жүрек жеткіліксіздігінің (СЖЖ) белгілері немесе симптомдары түрінде көрініс береді. Перикардит/миокардит сияқты жеделге жуық кардиоуыттану түрлерінің дамуы туралы хабарламалар бар. Өмірге қатерлі созылмалы жүрек жеткіліксіздігі антрациклиндер туғызған кардиомиопатияның ең ауыр түрі болып саналады және идарубициннің дозаны шектейтін уыттылығы болып табылады. Идарубицинді вена ішіне және ішу арқылы енгізу үшін жинақталатын шектік дозасы анықталмаған. Алайда, идарубицинмен ем салдарынан кардиомиопатияның дамуы вена ішіне идарубициннің 150-ден 290/м2 дейінгі шекте жинақталатын дозасын алған 5% пациентте білінген. Идарубицинді 400 мг/м2 дейінгі жинақталатын дозаларда ішу арқылы қабылдаған пациенттер туралы қолда бар деректер идарубициннің кардиоуыттылығының қуаты төмендігі туралы айғақтайды. Идарубицинмен емдеуді бастар алдында жүрек функциясына баға берілуі, сондай-ақ жүрек тарапынан ауыр бұзылулардың дамуын болдырмау мақсатындағы ем үдерісінде жүйелі жүргізілуі тиіс. Жүрек асқынуларының даму қаупін сол жақ қарыншаның лықсыту фракциясына (СҚЛФ) тұрақты мониторинг өткізу және осы көрсеткіш ауытқуларының бірінші белгілерінде идарубицинді шұғыл тоқтату арқылы төмендетуге болады. Жүрек жұмысын функционалдық бағалаудың талапқа сай сандық әдістеріне көп каналды жинақтау сканерлеуі (MUGA) немесе эхокардиография жатады. Ем басталар алдында, әсіресе, кардиоуыттанудың даму қаупі жоғары пациенттерде ЭКГ, сонымен қатар MUGA – сканерлеу немесе эхокардиография көмегімен жүрекке функционалдық бағалау жүргізу қажет. Сол жақ қарыншаның лықсыту фракциясына (СҚЛФ) тұрақты мониторинг өткізу үшін, әсіресе, антрациклиндердің жинақталатын дозасы арттырылғанда жүйелі MUGA – сканерлеу немесе эхокардиография жүргізілу қажет. Сол жақ қарыншаның лықсыту фракциясына (СҚЛФ) мониторинг өткізудің бір ғана әдісін қолдану қажет. Кардиоуыттануды дамытатын қауіп факторларына белсенді немесе белсенді емес түрдегі жүрек-қантамыр аурулары бар пациенттерде болатын медиастинальді немесе перикардиальді аумақтардың алдыңғы немесе қатарлас сәулелі ем, осының алдындағы антрациклиндермен немесе антрацендиондармен ем, миокард жиырылуын бәсеңдететін басқа дәрілік заттармен немесе басқа кардиоуытты препараттармен (мысалы, трастузумабпен) қатарлас ем жатады. Пациенттердің жүрек функциясы мұқият қадағалауда болатын жағдайларды қоспағанда, идарубицинді қоса, антрациклиндерді басқа кардиоуытты дәрілік заттармен біріктіріп қолдануға болмайды. Антрациклиндерді, әсіресе, жартылай шығарылу кезеңі трастузумабтағыдай ұзаққа созылатын басқа кардиоуытты препараттармен емдеу аяқталған соң қабылдайтын пациенттерде кардиоуыттанудың жоғары даму қаупі сақталады. Трастузумабтың жартылай шығарылу кезеңі ауытқымалы және препарат жүйелі қан ағымында енгізу аяқталған соң 7 айға дейін сақталып қалуы мүмкін. Сондықтан, дәрігерлер мүмкіндігінше трастузумаб енгізу тоқтатылған соң 7 ай ішінде антрациклиндер тағайындаудан аулақ болулары тиіс. Егер трастузумаб енгізуді тоқтатудан кейін 7 айдан бұрын антрациклиндер енгізу басталса, осындай жағдайларда пациенттердің жүрек функциясына мұқият мониторинг өткізу қажет. Пациенттер антрациклиндердің жоғары жинақталатын дозаларына жеткенде және бірнеше қауіп факторлары болғанда міндетті түрде мұқият қадағаланады. Алайда, идарубицинмен емдеуде қауіп факторларының болуына немесе болмауына қарамастан жинақталатын төмен дозаларда да кардиоуыттану дамуы мүмкін. Бауыр және бүйректің функционалдық белсенділігі Бауыр мен бүйректің жай-күйі организмнен идарубициннің шығарылуына ықпалын тигізуі мүмкін екендіктен, ем басталар алдында және емдеу барысында әдеттегі зертханалық тестілер (сарысулық билирубин және сарысулық креатинин) көмегімен олардың функционалдық белсенділігін бағалау қажет. III фазаның бірнеше клиникалық зерттеулерінде сарысулық билирубин мен креатининнің 2 мг/дл-ден асып кететін деңгейлерінде идарубицин тағайындау қарсы көрсетілімді болды. Басқа антрациклиндермен емделген жағдайларда, егер билирубин деңгейі 1.2-ден 2.0 мг/дл дейінгі шекте болса, дозаны екі есе азайту қажет. Енгізген жердегі реакциялар Препарат шағын тамырларға енгізілгенде немесе бір ғана тамырға қайталап енгізуден кейін веналардың склероздануы дамуы мүмкін. Енгізген жерде флебиттер/тромбофлебиттердің даму қаупін төмендету мақсатында осы дәрілік затты енгізу ережелерін қадағалау қажет. Экстравазация Идарубициннің тамырдан тыс кеңістікке түсіп кетуі (экстравазация) енгізген жердегі ауыруды (жедел және ашытатын), тіндердің ауыр зақымдануын (везикация, ауыр целлюлит), тіндер некрозын туындатуы мүмкін. Идарубицин вена ішіне енгізілгенде экстравазацияның бірінші белгілері білінгенде, ол енгізу орнындағы ашыту сезінумен айғақталады, препаратты енгізуді дереу тоқтату қажет. Экстравазация жағдайларында тіндердің зақымдану көлемін азайту мақсатында дексразоксан енгізу қажет. Ісік лизисі синдромы Идарубицин жүргізілген емнен болатын ісік жасушаларының жылдам лизисі (ісік лизисі синдромы) нәтижесінде пуриндердің шектен тыс ыдырау салдарынан гиперурикемияның дамуын индукциялауы мүмкін. Ем басталған соң қандағы несеп қышқылы, калий, кальций фосфаты және креатинин деңгейлеріне тұрақты мониторинг өткізу қажет. Гидратация және несепті сілтілендіру, сондай-ақ гиперурикемия дамуын болдырмау үшін аллопуринолды профилактикалық тағайындау ісік лизисі синдромының даму қаупін азайта түсуі мүмкін. Иммуносупрессия және инфекцияларға жоғары сезімталдық Идарубицинді қоса, цитоуытты дәрілік заттармен емдеу салдарынан иммунитеті түсіп кеткен пациенттерге тірі немесе тірі әлсіретілген вакциналарды енгізу өліммен аяқталатын ауыр инфекциялық асқынулардың дамуына әкелуі мүмкін. Идарубицинмен емделу кезінде тірі вакциналармен вакцинациялаудан аулақ болу керек. Өлтірілген немесе белсенділігі жойылған вакциналармен вакцинация жүргізуге болады, алайда ондай вакциналармен вакцинациялау тиімділігі төмендеуі мүмкін. Балалар жасындағы пациенттер Сәбилер және үлкендеу жастағы балалар кардиоуыттанудың дамуына бейімірек, сондықтан осы топ пациенттерінде жүректің функционалдық белсенділігін ұзақ уақыт және жүйелі қадағалап отыру қажет. Идарубицин және басқа антрациклиндер немесе антрахинондар кардиоуыттылығы өзара толықтыру сипатында болуы мүмкін. Егде жастағы пациенттер Идарубицинді 65 жастан асқан пациенттерге ерекше сақтықпен тағайындау керек, өйткені жасына қарай қатарлас аурулары саны елеулі артады, гемопоэздік қор азаяды және органдар мен жүйелердің осалданып әлсіреуі артады. Репродуктивті жүйе Идарубицин гендік уыттылықты туындатуы мүмкін. Идарубицинмен емдеу кезінде және одан кейін белгілі бір уақыт ішінде ер және әйел жынысты пациенттер контрацепцияның тиімді әдістерін қолданулары керек. Идарубицинмен ем қабылдап жүрген ер адамдарға, егер қажет болса және мүмкін болса, емнен туындаған қайтымсыз бедеуліктің даму мүмкіндігіне байланысты шәуһетті консервациялау бойынша кеңес алу ұсынылады. Терапия аяқталғаннан кейін балалы болғысы келетін пациенттер алдымен тиісті маманмен кеңесу керек. Басқалары Басқа цитоуытты дәрілермен емдеу кезіндегідей идарубицинді қолданғанда кезде себеп-салдарлы байланысы анықталмаса да, өкпе артериясының тромбоэмболиясын қоса, тромбофлебит және тромбоэмболия дамуы туралы хабарланды. Идарубицин препаратты енгізуден кейін 1-2 күн ішінде несептің қызыл түске боялуын туындатуы мүмкін, сондықтан, пациенттерге препараттың осындай әсерлері туралы хабарлау қажет. Фертильділік Идарубицинмен ем алып жатқан ер адамдар емдеу кезінде және идарубициннің соңғы дозасы енгізілгеннен кейін 3.5 ай ішінде әйелдің жүкті болу ықтималдылығы жоққа шығарылуы керек. Идарубицинмен ем басталғанша қажет және қолжетімді болса шәуһетті консервациялау керек, өйткені бұл препарат қайтымсыз бедеуліктің дамуына әкелуі мүмкін. Әйелдерде идарубициннің бала туу қабілетіне әсер етуі туралы деректер жоқ. Идарубицинмен ем кезінде және идарубициннің соңғы дозасы енгізілгеннен кейін 6.5 ай ішінде әйелдер жүкті болып қалудан сақтануы тиіс. Бала туу жасындағы пациенттер сенімді контрацептивтік заттарды пайдалануы қажет. Жүктілік Жүктілік кезінде идарубицинді емдеудің көзделетін пайдасы шаранаға уытты әсер ету қаупін ақтайтын айрықша жағдайларда ғана қолдану керек. Пациенттерге емнің шаранаға зиянды әсер ету мүмкіндігі туралы хабарлау қажет. Емдеу аяқталған соң бала тууды жоспарлайтын пациенттерге генетикалық кеңес алуды ұсыну қажет. Бала емізу Идарубицин немесе оның метаболиттерінің емшек сүтіне өтетіні белгісіз. Басқа антрациклиндер емшек сүтімен бөлінетіндіктен, емшек еметін нәрестелерде идарубицинге ауыр жағымсыз реакциялардың дамуы мүмкін болғандықтан, әйелдерге идарубицинмен емдеу кезінде және оның соңғы дозасы енгізілгеннен кейін кемінде 14 күн бойы бала емізбеу туралы кеңес беру керек. Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері Идарубициннің көлік құралдарын басқару немесе механизмдермен жұмыс істеу қабілетіне әсерін жүйелі бағалау жүргізілген жоқ.

Нұсқаулықта көрсетілмеген.

Идарубицин – күшті миелосупрессор, ал оның басқа миелосупрессиялық препаратпен біріктірілуінен сүйек кемігі бәсеңдеуінің күшею әсерін күтуге болады. Миелосупрессияның күшеюі бір мезгілде сәулемен ем жүргізу салдарынан немесе идарубицинмен емнің басталуынан 2-3 апта бұрын дамуы мүмкін. Басқа кардиоуыттылығы зор препараттармен біріктіріп идарубицинмен емдеу немесе жүрек-қантамыр жүйесіне уытты әсер көрсететін дәрілік заттармен бір мезгілде қабылдау идарубицинмен емдеудің бүкіл кезеңі бойына жүректің функционалдық белсенділігіне тұрақты мониторинг өткізумен қатар жүруі тиіс. Басқа препараттардан болатын бауыр немесе бүйрек тарапынан өзгерістер идарубицин метаболизміне, сондай-ақ оның фармакокинетикасына және емдік тиімділігіне және/немесе уыттылығына ықпал етуі мүмкін. Өлімге әкелетін жайылған инфекциялардың даму қаупіне орай, тірі әлсіретілген вакциналармен (мысалы, сары қызбаға қарсы) бір мезгілде вакцинациялау ұсынылмайды. Ауыр инфекциялардың даму қаупі негізгі онкогематологиялық ауру салдарынан иммунитеті түсіп кеткен пациенттерде де жоғары. Қажет болса, белсенділігі жойылған вакциналарды пайдалануға болады. Алайда, осындай вакциналармен вакцинация жасау тиімділігі төмендеуі мүмкін. Ісікке қарсы ем бір мезгілде жүргізілгенде және ішуге арналған антикоагулянттар тағайындалғанда ХҚҚ-ны (Халықаралық қалыптасқан қатынас) жиірек анықтау ұсынылады, өйткені аталған препараттардың өзара әрекеттесу мүмкіндігін нақты жоққа шығаруға болмайды. Циклоспорин А: химиотерапияға ісіктің сезімталдығын арттыратын препарат ретінде бірге циклоспорин А енгізу жедел лейкозы бар пациенттер қанында идарубицин (1.78 есе) мен идарубицинол (2.46 есе) концентрациясын (AUC) едәуір арттыруы мүмкін. Осындай өзара әрекеттесудің клиникалық мәні әзірге анықталмаған. Сол себепті кейбір пациенттерде идарубициннің дозасын өзгерту қажет. Үйлесімсіздіктер Идарубицинді басқа дәрілік заттармен араластыруға немесе басқа дәрілік заттың инфузиясы жүргізілетін сол жүйе арқылы енгізуге болмайды. Егер идарубицин басқа цитостатиктермен бірге енгізілсе, тікелей араластыру болмауы керек. Идарубицин гепаринмен байланысуға қабілетті, бұл екі препараттың да шөгіндісінің түзілуіне және тиімділігінің төмендеуіне әкеледі. Идарубицинді препараттың гидролиздік ыдырау ықтималдығы себепті сілтілік ерітінділермен араластыруға болмайды. Вена ішіне енгізуге арналған басқа препараттардың (мысалы, ацикловир, цефтазидим, клиндамицин, дексаметазон, этопозид, фуросемид, имипенем, гентамицин, гидрокортизон, метотрексат, мезлоциллин, пиперациллин/тазобактам, ванкомицин, винкристин) идарубицинмен бір мезгілде енгізілгенде сәйкес келмейтіні туралы in vitro зерттеу деректері бар.

Сақтау мерзімі 3 жыл Ашқаннан кейін бөлме температурасында 24 сағаттан асырмай сақтау керек. Жарамдылық мерзімі өткеннен кейін қолдануға болмайды. Сақтау шарттары Жарықтан қорғалған жерде, 2°C – 8°C температурада сақтау керек. Мұздатып қатыруға болмайды. Балалардың қолы жетпейтін жерде сақтау керек!