Имбрувика® капсулы 140 мг

Бір капсуланың құрамында белсенді зат – 140 мг ибрутиниб, 100 % затқа шаққанда, қосымша заттар: микрокристалды целлюлоза, натрий кроскармеллозасы, натрий лаурилсульфаты, магний стеараты; капсуланың корпусы: титанның қостотығы (Е 171), желатин; жазуға арналған бояудың құрамы Colorcon Opacode® S-1-17822 және Opacode® S-1-17823: этанолдағы шеллак лагы (этерификацияланған 20%), темірдің қара тотығы (Е 172), n-бутил спирті, 2-пропанол, аммиак ерітіндісі 28%, пропиленгликоль (Е 1520). Сыртқы түрінің, иісінің, дәмінің сипаттамасы Өлшемі 0, «ibr 140 mg» қара жазуы бар, ақ түсті қатты желатинді мөлдір емес капсулалар. Капсуланың ішіндегісі – ақтан ақ дерлік түске дейінгі ұнтақ.

Бұл препарат ересектерде қан обырының келесі типтерін емдеу үшін қолданылады: • мантия аймағы жасушаларының қайталанатын немесе рефрактерлік лимфомасы (МАЖЛ) бар ересек пациенттерді емдеу үшін монотерапия түрінде қолданылады; • бұрын емделмеген созылмалы лимфоциттік лейкозы (СЛЛ) бар ересек пациенттерді емдеу үшін монотерапия түрінде немесе ритуксимабпен немесе обинутузумабпен немесе венетоклакспен біріктірілімде қолданылады; • СЛЛ бар, осының алдында кемінде бір емдеу курсын қабылдаған ересек пациенттерді емдеу үшін монотерапия түрінде немесе бендамустинмен және ритуксимабпен біріктірілімде қолданылады; • Вальденстрем макроглобулинемиясы (ВМ) бар, осының алдында кемінде бір емдеу курсын қабылдаған ересек пациенттерді емдеу үшін монотерапия түрінде, немесе иммуно-химиотерапияға жарамайтын пациенттерге емнің бірінші желісінде қолданылады. Ритуксимабпен біріктірілген Имбрувика® препараты ВМ бар ересек пациенттерді емдеу үшін қолданылады.

Нұсқаулықта көрсетілмеген.

Бұл препаратты әрдайым емдеуші дәрігердің ұсыныстарына дәл сәйкес етіп қабылдаңыз. Дозалану режимі Мантия жасушалы лимфома (МЖЛ) Имбрувика® препаратының ұсынылатын дозасы күніне бір рет төрт капсуланы (560 мг) құрайды. Созылмалы лимфоциттік лейкоз (СЛЛ)/Вальденстрем макроглобулинемиясы (ВМ) Имбрувика® препаратының ұсынылатын дозасы күніне бір рет үш капсуланы (420 мг) құрайды. Емдеуші дәрігер дозаны түзетуі мүмкін. Имбрувика®препаратын анти-CD20 терапиямен біріктіріп қолданғанда, егер қабылдау сол күні жүзеге асырылса, Имбрувика® препаратын ритуксимаб немесе обинутузумаб қабылдағанға дейін қабылдау ұсынылады. Енгізу әдісі және жолы • Капсулаларды бір стақан сумен іше отырып пероральді (ауыз арқылы) қабылдаңыз. Имбрувика® препаратын грейпфрут шырынымен немесе померанц шырынымен ішуге болмайды. • Капсулаларды күн сайын белгілі бір уақытта қабылдаңыз. • Капсулаларды тұтастай жұтыңыз. Капсулаларды ашпаңыз, сындырмаңыз және шайнамаңыз. Дәрілік препараттың бір немесе бірнеше дозасын жіберіп алғанда қажетті шаралар • Дозасын жіберіп алған жағдайда, оны тура сол күні барынша тезірек қабылдауға және келесі күні әдеттегі кестеңізге оралуыңызға болады. • Жіберіп алған дозаның орнын толтыру үшін екі есе доза қабылдамаңыз. • Егер сіз сенімді болмасаңыз, келесі дозаны қабылдау уақыты туралы емдеуші дәрігерден кеңес алыңыз. Тоқтату симптомы қаупінің болуына көрсетілім Бұл дәрілік препаратты қабылдауды емдеуші дәрігердің нұсқауынсыз тоқтатпаңыз. Дәрілік препаратты қолдану тәсілін түсіндіру үшін медициналық қызметкер кеңесіне жүгіну жөніндегі ұсыныстар Осы дәрілік препараттың қолданылуына байланысты кез келген қосымша сұрақтарыңыз пайда болса, емдеуші дәрігерден немесе медбикеден кеңес алыңыз.

• белсенді затқа немесе «Дәрілік препараттың құрамы» бөлімінде атап келтірілген қосымша заттардың кез келгеніне аса жоғары сезімталдық • Имбрувика® препаратымен емделіп жүрген пациенттерде құрамында шілтерлі шайқурай бар препараттарды қолдануға болмайды.

Барлық дәрілік препараттар сияқты, бұл дәрілік препарат та жағымсыз әсерлерді туғызуы мүмкін, әйтсе де олар пациенттердің барлығында бірдей көрініс бере бермейді. Мынадай жағымсыз әсерлердің кез келгені пайда болған жағдайда, Имбрувика® препаратын қабылдауды тоқтатыңыз және емдеуші дәрігеріңізге дереу хабарлаңыз: қышынумен ілесе жүретін бұдыр бөртпе, тыныстың тарылуы, беттің, еріннің, тілдің немесе тамақтың ісінуі – бұл дәріге аллергиялық реакцияның көрінісі болуы мүмкін. Егер келесі жағымсыз әсерлердің кез келгенін байқасаңыз, дереу дәрігерге хабарлаңыз: Өте жиі • қызба, қалтырау, дененің сырқырап ауыруы, шаршау, суық тию немесе тұмау симптомдары, ентігу – бұл инфекцияның (вирустық, бактериялық немесе зеңдік) белгілері болуы мүмкін. Оларға мұрынның, мұрын қуысының немесе тамақтың инфекциялары (жоғарғы тыныс жолдарының инфекциясы), немесе өкпенің, немесе терінің инфекциясы кіруі мүмкін • қанталаулар немесе қанталауларға бейімділіктің артуы • ауыз қуысындағы ойық жаралар • бас айналуын сезіну • бас ауыруы • іш қатуы • жүрек айнуы немесе құсу • асқазанның бұзылуы • диарея, емдеуші дәрігер сізге сұйықтықтың немесе тұздың орнын толтыруға арналған препаратты немесе басқа дәрілік затты тағайындауға тиіс болуы мүмкін • тері бөртпесі • қолдың немесе аяқтың ауыруы • арқаның немесе буындардың ауыруы • бұлшықеттердің құрысуы, ауыруы немесе түйілулері • қан талдауының нәтижелері бойынша – қанның қоюлауына ықпал ететін жасушалар (тромбоциттер) санының азаюы, лейкоциттер санының тым төмендеуі (қан талдауының нәтижелері бойынша анықталады) • лейкоциттер мөлшерінің немесе арақатынасының артуы (қан талдауының нәтижелері бойынша анықталады) • қолдың, сирақтың немесе аяқтардың ісінуі • артериялық қысымның жоғарылауы • қандағы креатинин деңгейінің жоғарылауы Жиі • тұтас организмдегі ауыр инфекциялар (сепсис) • несеп шығару жолдарының инфекциялары • мұрыннан қан кету, тері астына қан құйылуынан туындаған кішкентай қызыл немесе қанқызыл түсті дақтар • асқазанда, ішекте, нәжісте немесе несепте қанның болуы, етеккірдің құйылып келуі немесе жарадан тоқтамай қан кетуі • жүрек жеткіліксіздігі • жүрек соғуының баяулауы, тамыр соғысының әлсіздігі немесе біркелкі соқпауы, бас айналуы, ентігу, кеудедегі жайсыздық (жүрек ырғағындағы қиындықтардың симптомдары) • қызбамен ілесе жүретін лейкоциттер деңгейінің төмендеуі (фебрильді нейтропения) • терінің меланомалық емес обыры, көбінесе, терінің жалпақжасушалы және базальді-жасушалы обыры • бұлыңғыр көру • терінің қызаруы • өкпенің қабынуы, ол қайтымсыз бұзылуға алып келуі мүмкін • қандағы «несеп қышқылы» деңгейінің жоғарылауы (қанәұ талдауының нәтижелері бойынша анықталады), ол подагра туғызуы мүмкін • тырнақтардың сынғыштығы • бүйректің кенеттен зақымдануы • әлсіздік, қолдың немесе аяқтың немесе дененің басқа бөліктерінің ұюы, шаншуы немесе ауыруы (шеткері нейропатия) Жиі емес • бауыр жеткіліксіздігі, өлімге әкелетін жағдайларды қоса алғанда • ауыр зеңдік инфекция • сананың шатасуы, түсініксіз сөйлеумен жүретін бас ауыруы немесе әлсіздік – бұл миға іштен қан құйылуының ауыр жағдайының белгілері болуы мүмкін • обырды емдеу кезінде, кейде тіпті емдемей-ақ туындайтын обыр жасушаларының жылдам ыдырауы салдарынан қандағы химиялық заттар деңгейінің нормаға сәйкес келмеуі (ісік лизисі синдромы) • аллергиялық реакция, кейде ауыр түрі, ол беттің, еріннің, ауыздың, тілдің немесе тамақтың ісінуін, жұтынған және тыныс алған кезде қиналуды, қышынумен жүретін бөртпені (есекжем) қамтуы мүмкін • тері астындағы май тіндерінің қабынуы • қан жүрмеуінен, инсульттен туындаған неврологиялық дисфункцияның уақытша көрінісі • көзге қан құйылуы (кейбір жағдайларда көрмей қалуға соқтырған) • жүректің тоқтап қалуы • аномальді жүрек соғуының жиілеуі • терінің ауырсынатын ойылып жаралануы (гангренозды пиодермия) немесе терідегі қызыл, дөңес, ауырсынатын дақтар, қызба және лейкоциттер деңгейінің жоғарылауы (бұл жедел фебрильді нейтрофильді дерматоздың немесе Свит синдромының белгілері болуы мүмкін) • оңай қанап кетуі мүмкін терідегі кішкентай қызыл түйін (пиогенді гранулема) Сирек • лейкоциттер санының едәуір артуы, ол жасушалардың жабысып қалуына алып келуі мүмкін • күлбіреуіктермен және әсіресе, ауыздың, мұрынның, көздің және жыныс мүшелерінің айналасындағы терінің қабыршықтануымен жүретін ауыр бөртпе (Стивенс-Джонсон синдромы). Жағымсыз дәрілік реакциялар туындағанда медициналық қызметкерге, фармацевтикалық қызметкерге немесе, дәрілік препараттардың тиімсіздігі туралы хабарламаларды қоса, дәрілік препараттарға болатын жағымсыз реакциялар (әсерлер) жөніндегі ақпараттық деректер базасына тікелей хабарласу керек Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

Имбрувика® препаратының дозасын қажет мөлшерден көп қабылдаған жағдайда емдеуші дәрігерден кеңес алыңыз немесе дереу медициналық мекемеге хабарласыңыз. Өзіңізбен бірге капсулалар мен осы қосымша парақты алыңыз.

Имбрувика® препаратын қабылдауды бастамас бұрын: • егер сізде бұрындары әдеттен тыс қанталаулар немесе қан кетулер болған болса, немесе егер сіз қан кету қаупін арттыратын қандай да бір дәрілік препараттарды немесе қоспаларды қабылдап жүрсеңіз; • егер жүрек соғуының тұрақсыздығы байқалса немесе бұрын жүрек соғуының тұрақсыздығы, немесе жүректің ауыр жеткіліксіздігі байқалса, немесе егер мына жағдайлардың кез келгені: ентігу, әлсіздік, бас айналуы, естен тану алдындағы жағдай, естен тану немесе естен тануға жақын жағдай, кеуденің ауыруы немесе аяқтардың ісінуі көрініс берсе; • бауыр проблемасы болғанда, оның ішінде бұрын өткерген немесе қазіргі кезде бар В гепатиті инфекциясы (бауыр инфекциясы); • артериялық қысымның жоғары болуы; • егер жақын арада қандай да бір операция болса, әсіресе, егер ол тамақтың немесе дәрілік заттың асқазаннан немесе ішектен сіңірілуіне ықпал ететін болса; • операциялық араласулаларды жоспарланған кезде – емдеуші дәрігер сізден Имбрувика® препаратын қабылдауды операцияға дейін және кейін қысқа уақытқа (3 күннен 7 күнге дейін) тоқтатуыңызды өтінуі мүмкін; • бүйрек проблемасы болғанда емдеуші дәрігерден кеңес алу керек. Жоғарыда атап келтірілгендердің кез келгенінің қатысы болған жағдайда (немесе күдігіңіз болса), бұл препаратты қабылдауды бастағанға дейін немесе қабылдау кезінде емдеуші дәрігерден кеңес алу керек (Жағымсыз реакциялардың сипаттамасы бөлімін қараңыз). Егер Имбрувика® препаратымен емделу кезінде мынадай жағдайлар байқалса, емдеуші дәрігеріңізге дереу хабарлау керек: жадының жоғалтуы, ойлау қызметінің проблемалары, жүру кезіндегі қиындықтар немесе көрмей қалу - бұл мидың өте сирек кездесетін, бірақ өлімге әкеп соқтыруы мүмкін ауыр инфекциясымен байланысты болуы мүмкін (үдемелі мультифокальді лейкоэнцефалопатия немесе ҮМЛ). Егер мынадай жағдайлар: аяқ-қолыңыздың кенеттен ұюы немесе әлсіздігі (әсіресе, дененің бір жағының), кенеттен сананың шатасуы, сөйлеудегі немесе сөйлегенді ұғынудағы қиындықтар, көрмей қалу, жүру кезіндегі қиындықтар, тепе-теңдікті жоғалту немесе қимыл-қозғалыс үйлесімінің бұзылуы, айқын себепсіз кенеттен қатты бас ауыруы байқалса, дереу емдеуші дәрігерге дереу хабарлау қажет. Бұл жағдайлар инсульттің белгілері мен симптомдары болуы мүмкін. Имбрувика® препаратын қабылдауды тоқтатқаннан кейін іштің жоғарғы сол жақ бөлігінде ауырсыну, сол жақ кеуде қуысының астында немесе сол жақ иықтың шеткі бөлігінде ауырсыну (бұл көкбауырдың жыртылу белгілері болуы мүмкін) пайда болған кезде емдеуші дәрігерге дереу хабарлау қажет. Имбрувика® препаратымен емделу кезінде ентігу, жатқан кезде тыныс алудың қиындауы, табанның, тобықтың немесе аяқтың ісінуі және әлсіздік/шаршау (бұл жүрек жеткіліксіздігінің белгілері болуы мүмкін) пайда болған кезде емдеуші дәрігерге дереу хабарлау қажет. Жүрекке әсер ету Имбрувика® препаратымен емдеу жүрекке әсер етуі мүмкін, әсіресе сізде ырғақ проблемалары, жүрек жеткіліксіздігі, жоғары қан қысымы сияқты жүрек аурулары, қант диабеті немесе кәрілік болса. Салдары ауыр болуы мүмкін және өлімге, соның ішінде кейде кенеттен өлімге әкелуі мүмкін. Имбрувика® препаратымен емдеу алдында және емдеу кезінде жүрек қызметін тексеру керек. Имбрувика® препаратымен емделу кезінде ентігу, жатқан кезде тыныс алудың қиындауы, табанның, тобықтың немесе аяқтың ісінуі және әлсіздік/шаршау пайда болған кезде емдеуші дәрігерге дереу хабарлау - бұл жүрек жеткіліксіздігінің белгілері болуы мүмкін. Имбрувика® препаратымен емдеу кезінде вирустық, бактериялық немесе зеңдік инфекцияар туындауы мүмкін. Ысыну, қалтырау, әлсіздік, сананың шатасуы, дененің сырқырап ауыруы, суық тию немесе тұмау симптомдары, шаршау немесе ентігу сезімдері, терінің немесе көздің сарғаюы (сарғаю) пайда болған жағдайда, емдеуші дәрігерге жүгінген жөн. Бұл инфекцияның белгісі болуы мүмкін. Гемофагоцитарлық лимфогистиоцитоз Қабынумен байланысты лейкоциттердің аса жоғары белсенділігі (гемофагоцитарлық лимфогистиоцитоз) туралы сирек хабарламалар болды, егер оның диагнозы қойылмаса және ерте сатысында емделмесе, өлімге әкелуі мүмкін. Қызба, бездердің ұлғаюы, көгеру немесе тері бөртпесі сияқты бірнеше симтомдар пайда болған кезде дереу емдеуші дәрігерге хабарласыңыз. Арнайы сақтандырулар Талдаулар және емдеуге дейінгі және емдеу кезіндегі тексерулер Ісік лизис синдромы: Обыр жасушаларының тез бұзылыстарынан туындаған қандағы химиялық заттардың қалыпқа сәйкес емес деңгейі обыр ауруын емдеу кезінде және кейбір жағдайларда емделмеген кезде де пайда болған. Бұл бүйрек функциясының өзгерулеріне, жүрек ырғағы бұзылуына немесе құрысуларға әкелуі мүмкін. Емдеуші дәрігер немесе басқа медицина қызметкері ісік лизисі синдромының болуына қан талдауын жүргізуі мүмкін. Лимфоцитоз: зертханалық тесттер емдеудің алғашқы бірнеше аптасында қандағы қанның ақ денешіктерінің («лимфоциттер») деңгейі жоғарылауын көрсетуі мүмкін. Бұл күтілетін жағдай және ол бірнеше айға созылуы мүмкін. Бұл міндетті түрде аурудың нашарлауының көрсеткіші емес. Емдеуші дәрігер емдеуге дейін немесе емдеу кезінде қан көрсеткіштерін тексереді және сирек жағдайларда басқа дәрілік препаратты тағайындау қажеттілігі туындауы мүмкін. Тест нәтижелерінің маңыздылығы жөнінде дәрігерден кеңес алыңыз. Бауырмен байланысты жағдайлар: емдеуші дәрігер бауырдың функционалды жағдайын анықтау үшін және вирустық гепатит ретінде белгілі бауыр инфекциясының немесе өлімге әкелуі мүмкін, В гепатиті реактивациясының болмауын қамтамасыз ету үшін кейбір қан талдауын жүргізеді. Натрий мөлшері Имбрувика® препаратының құрамында бір дозасында 1 ммольден аз натрий бар (23 мг), яғни, препарат «натрийсіз» дерлік. Педиатрияда қолданылуы Имбрувика® препаратын 18 жасқа дейінгі балалар мен жасөспірімдерде қолдануға болмайды. Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері Имбрувика® препаратын қабылдағаннан кейін шаршау сезімі немесе бас айналуы пайда болуы мүмкін, бұл көлік құралын басқару немесе кез келген құралдарды немесе механизмдерді пайдалану қабілетіне ықпал етуі мүмкін.

Осы препаратты қабылдау кезінде жүктіліктің басталуынан аулақ болу керек. Имбрувика® препаратын жүктілік кезінде қолдануға болмайды. Имбрувика® препаратын жүкті әйелдерде қолдану қауіпсіздігі туралы ақпарат жоқ. Бала туатын жастағы әйелдер Имбрувика® препаратымен емделу кезінде жүктіліктің басталуынан сақтану үшін, Имбрувика® препаратын қабылдау кезінде және қабылдағаннан кейін үш айға дейін контрацепцияның тиімділігі жоғары әдісін пайдалануы тиіс. • Егер сіз жүкті болсаңыз, емдеуші дәрігерге дереу хабарлау керек. • Бұл дәрілік препаратпен емделу кезінде емшек емізбеңіз.

Емдеуші дәрігерге қазіргі уақытта қабылдап жүрген, қабылдаған немесе жақында қабылдануы ықтимал кез келген басқа дәрілік препараттар туралы хабарлау керек. Оның ішінде рецептісіз алынған дәрілік препараттар, өсімдік текті дәрілік препараттар мен қоспалар. Бұл Имбрувика® препаратының кейбір басқа дәрілік препараттардың әсеріне ықпал етуі мүмкін екендігімен байланысты. Сондай-ақ кейбір басқа дәрілік препараттар Имбрувика® препаратының әсеріне ықпал етуі мүмкін. Имбрувика® препараты қан кетуге бейімділікті арттыруы мүмкін. Қан кету қаупін арттыратын басқа дәрілік заттарды қабылдаған жағдайда емдеуші дәрігерге хабарлау қажет. Оларға мынадай препараттар жатады: • ацетилсалицил қышқылы және ибупрофен немесе напроксен сияқты қабынуға қарсы стероидты емес дәрілер (ҚҚСД); • варфарин, гепарин сияқты қанды сұйылтатын препараттар немесе ұйындыларды емдеуге арналған басқа дәрілік заттар; • балық майы, Е дәрумені немесе зығыр дәндері сияқты, қан кету қаупін арттыруы мүмкін қоспалар. Жоғарыда атап келтірілгендердің кез келгенінің қатысы болған жағдайда (немесе күдігіңіз болса), Имбрувика® препаратын қабылдамас бұрын емдеуші дәрігерден кеңес алу керек. Сонымен қатар, мына дәрілік заттардың кез келгенін қабылдап жүрсеңіз де, емдеуші дәрігеріңізге айтыңыз (егер Имбрувика® препараты мына дәрілік заттардың кез келгенімен бірге қолданылса, Имбрувика® препаратының әсеріне немесе басқа дәрілік заттарға ықпал ету ықтималдығы бар): • бактериялық инфекцияларды емдеуге арналған антибиотиктер деп аталатын дәрілік заттар – кларитромицин, телитромицин, ципрофлоксацин, эритромицин немесе рифампицин; • зеңдік инфекцияларды емдеуге арналған дәрілік заттар – позаконазол, кетоконазол, итраконазол, флуконазол немесе вориконазол; • АИТВ инфекциясын емдеуге арналған дәрілік заттар – ритонавир, кобицистат, индинавир, нелфинавир, саквинавир, ампренавир, атазанавир немесе фосампренавир; • химиотерапиямен байланысты жүрек айнуы мен құсуды бәсеңдетуге арналған дәрілік заттар – апрепитант; • депрессияны емдеуге арналған дәрілік заттар – нефазодон; • обырдың басқа типтерін емдеуге арналған, киназа тежегіштері деп аталатын дәрілік заттар – кризотиниб немесе иматиниб; • артериялық қысымның жоғарылауын немесе кеуденің ауыруын емдеуге арналған, кальций өзекшелерінің блокаторлары деп аталатын дәрілік заттар – дилтиазем немесе верапамил; • холестерин деңгейінің жоғарылауын емдеуге арналған, статиндер деп аталатын дәрілік заттар – розувастатин; • жүрек жеткіліксіздігін емдеуге арналған дәрілік заттар/аритмияға қарсы дәрілер – амиодарон немесе дронедарон; • құрысулардың профилактикасына немесе эпилепсияны емдеуге арналған дәрілік заттар, немесе беттегі үшкіл жүйке невралгиясы деп аталатын ауырсыну жағдайын емдеуге арналған дәрілік заттар – карбамазепин немесе фенитоин. Жоғарыда атап келтірілгендердің кез келгенінің қатысы болған жағдайда (немесе күдігіңіз болса), Имбрувика® препаратын қабылдамас бұрын емдеуші дәрігерден кеңес алу қажет. Жүрек жеткіліксіздігін емдеуге арналған препарат дигоксин, немесе обырдың басқа типтерін емдеуге және иммундық жүйенің белсенділігін төмендетуге (мысалы, ревматоидтық артрит немесе псориаз кезінде) арналған препарат метотрексат қабылданатын жағдайда, аталған дәрілік заттарды Имбрувика® препаратын қабылдағанға дейін кемінде 6 сағат бұрын немесе қабылдағаннан кейін кемінде 6 сағаттан соң қабылдау керек. Тамақпен өзара әрекеттесуі Имбрувика® препаратын грейпфруттермен немесе померанцтермен (ащы апельсиндермен) бірге қабылдамаңыз – жемістерін жеуге, осы жемістердің шырынын ішуге немесе құрамында олар болуы мүмкін қоспаларды қабылдауға болмайды. Бұл қандағы Имбрувика® препараты мөлшерінің жоғарылауына әкелуі мүмкін.

Сақтау мерзімі 3 жыл Жарамдылық мерзімі өткеннен кейін қолдануға болмайды! Сақтау шарттары 25 °С-ден аспайтын температурада сақтау керек. Түпнұсқалық қаптамасында сақтау керек. Балалардың қолы жетпейтін жерде сақтау керек!