Инсуфор таблетки 500 мг

Бір таблетканың құрамында белсенді зат – 500.00 мг, 850.00 мг және 1000.00 мг метформин гидрохлориді; қосымша заттар: кросповидон (коллидон CL), желатинделген крахмал (крахмал 1500), повидон К30 (коллидон 30), повидон К90 (коллидон 90), магний стеараты. Қабық құрамы: Opadry® II White 85F18422 (поливинил спирті, титанның қостотығы (Е171), макрогол/ПЭГ, тальк). Сыртқы түрінің, иісінің, дәмінің сипаттамасы 500 мг доза. Дөңгелек, екі беті дөңес, ақ түсті үлбірлі қабықпен қапталған таблеткалар. 850 мг доза. Дөңгелек, екі беті дөңес, ақ түсті үлбірлі қабықпен қапталған таблеткалар. 1000 мг доза. Сопақша, екі беті дөңес, екі жағында сызығы бар ақ түсті үлбірлі қабықпен қапталған таблеткалар.

2 типті қант диабетін емдеу, әсіресе артық салмағы бар пациенттерде, гликемиялық тепе-теңдікті қалпына келтіру үшін диетотерапия мен физикалық белсенділік тиімсіз болса. • Ересектерде препаратты монотерапия түрінде немесе диабетке қарсы басқа пероральді дәрілермен немесе инсулинмен біріктірілімде пайдалануға болады. • 10 жастан асқан балалар мен жасөспірімдерде препаратты монотерапия түрінде немесе инсулинмен біріктірілімде пайдалануға болады. Диетаны бұзғаннан кейін бірінші желідегі ем ретінде метформин қабылдаған 2 типті қант диабеті және артық салмағы бар ересек пациенттерде диабеттік асқынулардың төмендеуі көрсетілді.

Әсер ету механизмі Метформин базальді де, постпрандиальді де гипергликемияға әсер көрсететін гипергликемияға қарсы қасиеттерге ие бигуанид болып табылады. Ол инсулин секрециясын стимуляцияламайды, сондықтан да гипогликемия тудырмайды. Метформин базальді гиперинсулинемияны және инсулинмен біріктірілімде инсулинге қажеттілікті төмендетеді. Метформин бірнеше механизмдер есебінен гипергликемияға қарсы әсерін көрсетеді. Метформин бауырда глюкоза өндірілуін төмендетеді. Метформин ішінара инсулиннің әсерін күшейту есебінен шеткері тіндердің глюкозаны сіңіруіне және утилизациялауына ықпал етеді. Метформин глюкозаның ішек метаболизмін өзгертеді: қан ағымынан сіңірілуі артады және тағамнан сіңуі төмендейді. Ішек метаболизмімен байланысты басқа механизмдері 1 глюкагон тәрізді пептидтің (GLP-1) көп босап шығуын және өт қышқылдары сіңуінің төмендеуін қамтиды. Метформин ішек микробиомасын өзгертеді. Метформин гиперлипидемиясы бар тұлғаларда липидтік бейінді жақсартуы мүмкін. Клиникалық зерттеулерде метформинді қолдану салмақ тұрақтылығымен немесе салмақты бірқалыпты жоғалтумен астасқан. Метформин аденозинмонофосфат белсендірілген протеинкиназа (AMPK) белсендіргіші болып табылады және жарғақшалы глюкоза тасымалдаушыларының (GLUTs) барлық типтерінің тасымалдау қабілетін арттырады. Клиникалық тиімділігі және қауіпсіздігі UKPDS перспективалық рандомизацияланған зерттеуі 2 типті қант диабеті бар ересек пациенттерде гликемияны қарқынды бақылаудың ұзақ мерзімді пайдасын анықтады. Диета тиімсіз болғаннан кейін метформинмен ем қабылдаған артық салмағы бар пациенттердің нәтижелерін талдау: • Метформин тобындағы қант диабетімен байланысты асқынулардың кез келген типінің абсолютті қаупінің айтарлықтай төмендеуі (1000 пациент-жылға 29,8 оқиға) бір ғана диетамен салыстырғанда (1000 пациент-жылға 43,3 оқиға), p=0,0023 және сульфонилмочевина мен инсулинмен біріктірілген еммен салыстырғанда (1000 пациент-жылға 40,1 оқиға), p=0,0034; • Диабетпен байланысты өлімнің абсолютті қаупінің айтарлықтай төмендеуі: метформин 1000 пациент-жылға 7,5 оқиға, тек диета 1000 пациент-жылға 12,7 оқиға, p=0,017; • Жалпы өлімнің абсолютті қаупінің айтарлықтай төмендеуі: метформин 1000 пациент-жылға 13,5 оқиға бір ғана диетамен салыстырғанда 1000 пациент-жылға 20,6 оқиға (p=0,011) және сульфонилмочевина мен инсулинмен біріктірілген еммен салыстырғанда 1000 пациент-жылға 18,9 оқиға (p=0,021); • Миокард инфарктісінің абсолютті қаупінің айтарлықтай төмендеуі: метформин 1000 пациент-жылға 11 оқиға, тек диета 1000 пациент-жылға 18 оқиға (p=0,01). Метформинді екінші желідегі ем ретінде сульфонилмочевинамен үйлесімде пайдаланған кезде клиникалық пайдасы көрсетілген жоқ. 1 типті қант диабеті кезінде кейбір пациенттерде метформиннің инсулинмен біріктірілімі қолданылды, бірақ бұл біріктірілімнің клиникалық пайдасы ресми түрде көрсетілген жоқ) Глюкофаж, 500 мг, 850 мг, 1000 мг, қабықпен қапталған таблеткалар, MERCK SANTE S.A.S. түпнұсқалық дәрілік препараттың қысқаша сипаттамасына сәйкестендіру. Франция. Балалар 1 жыл бойы емделген шектеулі педиатриялық популяциядағы 10-16 жас тобындағы бақыланатын клиникалық зерттеулер гликемиялық бақылау кезінде ересектерде байқалғанғаа ұқсас жауапты көрсетті.

Дозалау режимі Бүйрек функциясы қалыпты ересектер (шумақтық сүзілу жылдамдығы (ШСЖ) ≥ 90 мл/мин) Монотерапия немесе басқа пероральді гипогликемиялық дәрілермен біріктірілген ем Бастапқы доза әдетте тамақтану кезінде немесе одан кейін күніне 2-3 рет 500 мг немесе 850 мг метформин гидрохлоридін құрайды. Әр 10-15 күн сайын дозаны қандағы глюкоза деңгейінің көрсеткіштеріне қарай түзету керек. Асқазан-ішек жолдары тарапынан жағымсыз реакцияларды төмендету мақсатында препарат дозасын арттыру біртіндеп жүргізілуі тиіс. Метформин гидрохлоридінің жоғары дозаларын қабылдайтын пациенттерде (тәулігіне 2 г-ден 3 г-ге дейін) 500 мг Инсуфор екі таблеткасын 1000 мг Инсуфор бір таблеткасымен ауыстыруға болады. Ұсынылатын ең жоғары доза 3 қабылдауға бөлінген тәулігіне 3000 мг метформин гидрохлоридін құрайды. Басқа пероральді диабетке қарсы дәріден ауысқан кезде, оны қабылдауды тоқтату және жоғарыда аталған сызба бойынша Инсуфорды қабылдауды бастау қажет. Инсулинмен біріктірілім Қандағы глюкоза деңгейін жақсы түзетуге қол жеткізу үшін метформин мен инсулинді біріктіруге болады. Метформиннің әдеттегі бастапқы дозалары тәулігіне 2-3 рет 500 мг немесе 850 мг құрайды, ал инсулин дозасы қандағы глюкоза көрсеткіштерінің мәндеріне байланысты. Енгізу әдісі мен жолы Таблеткаларды ішке қабылдау керек. Бастапқы доза әдетте тамақтану кезінде немесе одан кейін тәулігіне 1 рет 500 мг немесе 850 мг метформин гидрохлоридін құрайды. Әр 10-15 күн сайын дозаны қандағы глюкоза деңгейінің көрсеткіштеріне қарай түзету керек. Асқазан-ішек жолдары тарапынан жағымсыз реакцияларды азайту үшін дозаны біртіндеп арттыру керек. Ұсынылатын ең жоғары тәуліктік доза 2-3 қабылдауға бөлінген тәулігіне 2000 мг метформин гидрохлоридін құрайды. Пациенттердің ерекше топтары Егде жастағы пациенттер Егде жастағы пациенттерде бүйрек функциясы нашарлауы мүмкін, сондықтан метформин дозасын бүйрек функциясының көрсеткіштерін үнемі бақылап отырып таңдау керек. Бүйрек жеткіліксіздігі ШСЖ құрамында метформин бар препараттармен емдеуді бастамас бұрын, содан кейін жылына кемінде 1 рет бағалануы керек. Бүйрек жеткіліксіздігінің үдеу қаупі жоғары пациенттерде және егде жастағы пациенттерде бүйрек функциясын жиі бағалау керек (әр 3-6 ай сайын). ШСЖ (мл/мин) — Ең жоғары тәуліктік доза (2-3 қабылдауға бөлінеді) — Қосымша факторларды ескеру қажет 60-89 — 3000 мг — Бүйрек функциясының нашарлауына байланысты дозаны азайтуды қарастырған жөн. 45-59 — 2000 мг — Метформинді қабылдауды бастағанға дейін лактоацидоз қаупін арттыруы мүмкін факторлар бағалануы тиіс. Бастапқы доза ең жоғары тәуліктік дозаның жартысынан аспауы тиіс. 30-44 — 1000 мг < 30 — - — Метформинді қолдануға болмайды. Балалар Монотерапия немесе инсулинмен біріктірілген ем Инсуфорды 10 жастан бастап балалар мен жасөспірімдерде монотерапия ретінде де, инсулинмен біріктіріп те қолдануға болады. Дәрілік препаратты қолдану тәсілін түсіндіру үшін медицина қызметкеріне кеңес алу үшін жүгіну бойынша ұсынымдар Препаратты қолданардың алдында міндетті түрде дәрігерден кеңес алу керек.

- метформинге немесе қосымша заттардың кез келгеніне аса жоғары сезімталдық - жедел метаболизмдік ацидоздың кез-келген типі (мысалы, лактоацидоз, диабеттік кетоацидоз) - диабеттік прекома - бүйректің ауыр жеткіліксіздігі (ШСЖ < 30 мл/мин); - организмнің сусыздануы, ауыр инфекциялық аурулар, шок сияқты бүйрек функциясының бұзылуларының даму қаупімен жүретін жедел жағдайлар; - жедел аурулар немесе тіндік гипоксияның дамуына әкелуі мүмкін созылмалы аурулардың өршуі: декомпенсацияланған жүрек жеткіліксіздігі, тыныс алу жеткіліксіздігі, таяуда өткерген миокард инфарктісі, шок; - бауыр жеткіліксіздігі, жедел алкогольдік уыттану, алкоголизм.

Жағымсыз реакциялар жиілігінің параметрлері мынадай түрде анықталады: өте жиі (≥ 1/10); жиі (≥ 1/100, бірақ <1/10); сирек (≥ 1/1000, бірақ < 1/100); сирек (≥1/10000, бірақ < 1/1000); өте сирек (< 1/10000); жиілігі белгісіз (қолда бар деректер бойынша бағалау мүмкін емес). Өте жиі: - жүрек айнуы, құсу, диарея, іштің ауыруы, тәбеттің болмауы сияқты асқазан-ішек жолдары тарапынан бұзылу. Көбінесе бұл жағымсыз реакциялар емдеудің басында туындайды және әдетте өздігінен жоғалады. Асқазан-ішек жолдары тарапынан жағымсыз реакциялардың туындауын болдырмау үшін метформинді тамақтану кезінде немесе одан кейін күніне 2-3 рет қолдану ұсынылады. Асқазан-ішек жолдары тарапынан жағымсыз реакцияларды азайту үшін дозаны біртіндеп арттыру керек. Жиі: - В12 дәрумені деңгейінің төмендеуі/тапшылығы; - дәм сезудің бұзылуы Өте сирек - лактоацидоз - метформинді тоқтатқаннан кейін басылатын бауыр функциясының бұзылуы немесе гепатиттің жекелеген жағдайлары. - эритема, қышыну, есекжем сияқты тері реакциялары. Балаларда қолдану Жарияланған деректер, постмаркетингтік деректер, сондай-ақ 1 жыл бойы ем қабылдаған балалар популяциясындағы шектеулі 10-16 жас тобындағы клиникалық зерттеулер балалардағы жағымсыз реакциялардың сипаты мен ауырлығы ересек пациенттерге ұқсас екенін көрсетеді. Жағымсыз дәрілік реакциялар туындаған кезде медицина қызметкеріне, фармацевтика қызметкеріне немесе дәрілік препараттардың тиімсіздігі туралы хабарламаларды қоса алғанда, дәрілік препараттарға жағымсыз реакциялар (әрекеттер) бойынша тікелей ақпараттық дерекқорға жүгіну Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

Метформин гидрохлоридін 85 г дейінгі дозада қолданған кезде гипогликемияның дамуы байқалмады, бірақ кейбір жағдайларда лактоацидоз туындады. Метформиннің дозасын едәуір арттыру немесе қатар жүретін қауіп факторлары лактоацидоздың туындауына әкелуі мүмкін. Лактоацидоз төтенше жағдай болып табылады және оны стационарда емдеу керек. Лактат пен метформинді организмнен шығару үшін ең тиімді шара гемодиализ болып табылады.

Лактоацидоз Лактоацидоз – өте сирек, бірақ ауыр метаболизмдік сипаттағы асқыну, ол көбінесе бүйрек функциясының жедел нашарлауы кезінде, кардиореспираторлық ауруларда немесе сепсисте кездеседі. Бүйрек функциясының жедел нашарлауы кезінде метформиннің жинақталуы жүреді, бұл лактоацидоздың даму қаупін арттырады. Сусыздану жағдайында (диарея, қатты құсу, қызба немесе сұйықтықты тұтынудың төмендеуі) метформинді қолдануды уақытша тоқтату және дәрігерге жүгіну керек. Метформин қабылдаған пациенттерде бүйрек функциясын күрт нашарлататын дәрілік заттарды (мысалы, гипертензияға қарсы препараттар, диуретиктер және қабынуға қарсы стероидты емес дәрілер (ҚҚСД)) сақтықпен қолдану керек. Лактоацидоздың басқа қауіп факторлары туындайтынын ескеру қажет: алкогольді шамадан тыс тұтыну, бауыр жеткіліксіздігі, нашар бақыланатын қант диабеті, кетоз, ұзақ уақыт ашығу және гипоксиямен байланысты кез келген жай-күй және лактоацидозды тудыруы мүмкін дәрілік заттарды қатар қолдану. Пациенттер және/немесе күтім жасайтын адамдар лактоацидоз қаупі туралы хабардар болуы керек. Лактоацидоз ацидоздық ентігуімен, іштің ауыруымен, бұлшықет құрысуларымен, астениямен және соңынан комаға ұласатын гипотермиямен сипатталады. Лактоацидозға күдік болған кезде, препаратты қолдануды тоқтату және дереу медициналық көмекке жүгіну қажет. Диагноз қою үшін маңызды зертханалық көрсеткіштерге мыналар жатады: қанның рН мәнінің төмендеуі (<7,35), плазмадағы лактат деңгейінің 5 ммоль/л-ден жоғары артуы, аниондық аралықтың жоғарылауы және лактат/пируват арақатынасы. Белгілі немесе болжамды митохондриялық аурулары бар пациенттер Лактоацидоз және инсульт тәрізді эпизодтары бар митохондриялық энцефалопатия (MELAS), сондай-ақ анасы жақтан тұқым қуалайтын қант диабеті және кереңдік (MIDD) сияқты белгілі митохондриялық аурулары бар пациенттерге ауру ағымының нашарлауына әкелуі мүмкін лактоацидоздың өршу қаупіне және неврологиялық асқынуларға байланысты метформинді тағайындау ұсынылмайды. Метформинді қабылдағаннан кейін MELAS немесе MIDD синдромына көрсететін белгілер мен симптомдар пайда болған жағдайда, метформинмен емдеуді дереу тоқтату және шұғыл диагностикалық тексеру жүргізу керек. Бүйрек функциясы ШСЖ емдеуді бастамас бұрын және одан кейін келесі кезеңде үнемі бағалануы керек. Метформин ШСЖ <30 мл/мин пациенттерге қолдануға болмайды. Бүйрек функциясына әсер ететін жағдайлар бар болған кезде препаратты қабылдау уақытша тоқтатылуы тиіс. Жүрек қызметі Жүрек жеткіліксіздігі бар пациенттерде гипоксия мен бүйрек жеткіліксіздігі дамуының жоғарырақ қаупіне ие. Тұрақты созылмалы жүрек жеткіліксіздігі бар пациенттерде метформинді жүрек және бүйрек функциясын үнемі мониторинг жүргізу кезінде қолдануға болады. Метформин жедел және тұрақсыз жүрек жеткіліксіздігі бар пациенттерге қолдануға болмайды. Құрамында йод бар контрастылы заттарды енгізу Құрамында йод бар контрастылы препараттарды тамырішілік енгізу контраст-индукцияланған нефропатияға және оның салдарынан метформиннің жинақталуына және лактоацидоздың даму қаупінің жоғарылауына әкелуі мүмкін. Метформинді қолдануды емшараны жүргізуге дейін немесе кезінде тоқтату керек және бүйрек функциясы қайта бағаланып, тұрақты деп танылғаннан кейін 48 сағаттан ерте қайта жаңғыртпау керек. Хирургиялық араласым Метформинді жалпы, жұлындық немесе эпидуралдық анестезиямен жүргізілетін жоспарлы хирургиялық араласым кезінде қолдануды тоқтату керек және операцияны жасағаннан кейін немесе пероральді тамақтануды қалпына келтіргеннен кейін 48 сағаттан ерте қайта жаңғыртауға болмайды және тек бүйректің қалыпты функциясы анықталған жағдайда ғана. Балалар Метформинмен емдеуді бастамас бұрын 2 типті қант диабеті диагнозы расталған болуы керек. Бір жылдық бақыланатын клиникалық зерттеулердің нәтижелері бойынша метформиннің балалардың бойы мен жыныстық жетілуіне әсері анықталған жоқ. Алайда, метформиннің ұзақтау қолданған кезде бой мен жыныстық жетілуге әсері туралы деректер жоқ, сондықтан метформин қабылдаған балаларда, әсіресе жыныстық жетілу кезеңінде бұл параметрлерді мұқият бақылау ұсынылады. 10-12 жас аралығындағы балалар 10-12 жас аралығындағы 15 баланың қатысуымен жүргізілген бақыланатын клиникалық зерттеулердің нәтижелері бойынша пациенттердің осы тобында метформинді қолданудың тиімділігі мен қауіпсіздігі үлкен жастағы балалар мен жасөспірімдердікінен ерекшеленбеді. Дегенмен, препаратты 10-12 жас аралығындағы балаларға аса сақтықпен тағайындау керек. Басқа сақтық шаралары Пациенттер тәулік бойы көмірсулардың біркелкі тұтынылатын диетасын ұстануы керек. Артық салмағы бар пациенттер төмен калориялы диетаны ұстауды жалғастыруы керек. Қант диабетін бақылау үшін үнемі стандартты зертханалық зерттеулер жүргізу ұсынылады. Метформин қан сарысуындағы В12 дәруменінің деңгейін төмендетуі мүмкін. В12 дәрумені деңгейінің төмендеу қаупі препаратты жоғары дозаларда қабылдаған кезде, ұзақ мерзімді емді және/немесе В12 дәрумені тапшылығының даму қаупінің белгілі факторлары бар пациенттерде жоғарылайды. В12 дәруменінің жетіспеушілігіне күдік болған жағдайда, мысалы, анемия немесе нейропатия кезінде В12 дәруменінің деңгейін бақылау қажет. В12 дәрумені тапшылығының даму қаупі факторлары бар пациенттерде В12 дәруменінің мерзімді мониторингін қарастыру қажет. Метформинмен емдеуді ол жағымды болғанда және қарсы көрсетілімдері болмаған жағдайда жалғастыру керек. Қолданыстағы клиникалық ұсыныстарға сәйкес В12 дәруменінің тапшылығын түзету емін жүргізу қажет. Метформинмен монотерапия гипогликемияны тудырмайды, бірақ метформинді инсулинмен немесе басқа пероральді гипогликемиялық препараттармен (мысалы, сульфонилмочевина туындылары немесе меглитинидтер) бір мезгілде қолданғанда сақ болу керек. Арнайы ескертулер Жүктілік Жүкті болу алдындағы кезеңде және жүктілік кезіндегі бақыланбайтын гипергликемия туа біткен ауытқулар, жүктілікті сақтай алмау, жүктілік гипертензиясы, преэклампсия және перинаталды өлім қаупінің жоғарылауымен байланысты. Ана мен балаға гипергликемияның қолайсыз зардаптарының қаупін төмендету үшін бүкіл жүктілік кезеңі бойына қандағы глюкоза деңгейін қалыпты мәніне барынша жуық шекте ұстап тұру маңызды болады. Метформин адам плацентасы арқылы енеді, оның шарана тіндеріндегі концентрациясы аналық организмдегі деңгейіне жетуі мүмкін. Регистрлер мен жарияланған деректерге (мета-талдаулар, клиникалық зерттеулер және регистрлер) негізделген когорттық зерттеуден жүкті әйелдер туралы деректердің үлкен көлемі (1000-нан астам қолдану нәтижелері) туа біткен ауытқулардың немесе метформинді жүкті болу алдындағы кезең және/немесе жүктілік кезінде қолданған кезде фето/неонатальды уыттылықтың жоғарылау қаупінің жоқтығын көрсетеді. Құрсақішілік әсерге ұшыраған балалардағы метформиннің ұзақ мерзімді нәтижеге әсері туралы шектеулі және нәтижесіз дәлелдері бар. Метформин жүктілік кезінде әсерге ұшыраған 4 жасқа дейінгі балалардың қимыл және әлеуметтік дамуына әсер етпейтін сияқты, дегенмен ұзақ мерзімді нәтижелер туралы деректер шектеулі. Клиникалық қажеттілік кезінде метформинді қолдану жүктілік кезінде және жүкті болу алдындағы кезеңде инсулинге қосымша немесе балама ретінде қарастырылуы мүмкін. Лактация Метформин емшек сүтіне енеді. Емшек сүтімен қоректенетін жаңа туған нәрестелерде/сәбилерде жағымсыз реакциялар байқалмады. Алайда, препаратты қолданудың қауіпсіздігі туралы деректер шектеулі болғандықтан, метформинмен емдеу кезінде бала емізу ұсынылмайды. Бала емізуді тоқтату туралы шешім бала емізудің пайдасы мен балада жағымсыз реакциялардың туындау қаупін ескере отырып қабылдануы керек. Фертильділік Метформин адамда қолдануға ұсынылған және дене беткейінің ауданына шаққанда есептелген ең жоғары тәуліктік дозасынан үш есеге жуық асып кететін 600 мг/кг/күнге дейінгі дозаларында қабылданғанда аталық және аналық егеуқұйрықтар фертильділігіне ықпалын тигізбеді. Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері Метформинмен монотерапия гипогликемияны тудырмайды, сондықтан автокөлікті басқару және механизмдермен жұмыс істеу қабілетіне әсер етпейді. Алайда пациенттерге метформинді басқа гипогликемиялық препараттармен (мысалы, сульфонилмочевина туындылары, инсулин немесе меглитинидтермен) бірге қолданған кезде гипогликемия қаупі туралы ескерту керек.

Нұсқаулықта көрсетілмеген.

Пайдалануға ұсынылмайтын біріктірілімдер Алкоголь Жедел алкогольдік уыттану лактоацидоздың даму қаупінің жоғарылауымен астасқан, әсіресе ашығу немесе жеткіліксіз тамақтану жағдайында, сондай-ақ бауыр жеткіліксіздігі кезінде. Құрамында йод бар контрастты заттар Метформинді қолдануды зерттеу жүргізілгенге дейін немесе кезінде тоқтату керек және зерттеуден кейін 48 сағаттан ерте жаңғыртпау керек және бүйрек функциясын қайта бағалағаннан кейін және бүйрек жағдайының одан әрі нашарлауының жоқтығын растағаннан кейін ғана қайта бастау керек. Сақ болуды қажет ететін біріктірілімдер Кейбір дәрілік препараттар бүйрек функциясына теріс ықпал етуі мүмкін, бұл лактацидоз даму қаупін арттыруы мүмкін (мысалы, ҚҚСД, циклооксигеназа II тежегіштерін қоса, ангиотензин өзгертетін фермент тежегіштері, ангиотензин ІІ рецепторларының антагонистері және диуретиктер, әсіресе, ілмектік диуретиктер). Бұл препараттарды қолданудың басында немесе оларды метформинмен бірге қолданған кезде бүйрек функциясын мұқият бақылау қажет. Гипергликемиялық әсер көрсететін дәрілік заттар (жүйелік және жергілікті әсер ететін глюкокортикоидтар, симпатомиметиктер) Қандағы глюкозаны жиі бақылау қажет болуы мүмкін, әсіресе емнің басында. Қажет болса, мұндай біріктірілген емді тоқтату кезінде және одан кейін метформиннің дозасын түзету керек. Органикалық катиондардың тасымалдаушысы (OCT) Метформин OCT1 және OCT2 екі тасымалдаушы үшін де субстрат болып табылады. Метформинді бірге қолдану: - OCT1 тежегіштері (мысалы, верапамилмен) метформиннің тиімділігін төмендетуі мүмкін; - OCT1 индукторлары (мысалы, рифампицинмен) асқазан-ішек жолында сіңуін және метформиннің тиімділігін арттыруы мүмкін; - OCT2 тежегіштерімен (мысалы, циметидинмен, долутегравирмен, ранолазинмен, триметоприммен, вандетанибпен, изавуконазолмен) метформиннің бүйрек элиминациясын төмендетуі мүмкін және осылайша оның плазмадағы концентрациясының жоғарылауына әкелуі мүмкін; - OCT1 және OCT2 тежегіштерімен (мысалы, кризотинибпен, олапарибпен) метформиннің тиімділігі мен бүйрек элиминациясына әсер етуі мүмкін. Сондықтан, әсіресе бүйрек жеткіліксіздігі бар пациенттерде бұл препараттар метформинмен бірге енгізілгенде сақ болу керек, өйткені плазмадағы метформин концентрациясы жоғарылауы мүмкін. Қажет болса, метформин дозасын түзету қарастырылуы мүмкін, өйткені OCT тежегіштері/индукторлары метформиннің тиімділігін өзгерте алады.

Сақтау мерзімі 3 жыл. Жарамдылық мерзімі өткеннен кейін қолдануға болмайды! Сақтау шарттары 25°С-ден аспайтын температурада сақтау керек. Балалардың қолы жетпейтін жерде сақтау керек!