Кетанейм раствор 100 мг/2мл

Бір ампуланың ішінде белсенді зат –100 мг кетопрофен, қосымша заттар: пропиленгликоль, этанол (96 %), бензил спирті, натрий гидроксиді, инъекцияға арналған су. Сыртқы түрінің иісінің, дәмінің сипаттамасы Көзге көрінетін бөлшектерсіз, түссізден сәл сарғыштау түске дейінгі мөлдір ерітінді.

Кетопрофеннің анальгетикалық және қабынуға қарсы белсенділігін, көтере алмаушылық көріністерінің маңыздылығын ескере отырып, ересектер мен жасөспірімдерде (15 жастан асқан) мына жағдайларда қолданылады: - ревматизмнің өршуін, белдегі жедел ауырсынуды, радикулит кезіндегі ауырсынуды қысқа мерзімді симптоматикалық емдеу - онкологиялық аурулардан туындаған ауырсыну - бүйрек шаншуы ұстамасы кезіндегі ауыру.

Әсер ету механизмі Кетопрофен-бұл простагландин мен лейкотриен синтезіне тежегіш әсер ететін пропион қышқылының туындысы, қабынуға қарсы стероидты емес препарат (ҚҚСП). Ол арахидон қышқылының метаболизмінде простагландиндер синтезін катализдейтін циклооксигеназа-1 (ЦОГ-1) және циклооксигеназа-2 (ЦОГ-2) ферментін тежейді. In-vitro және in-vivo кетопрофен липосомалық жарғақшаларды тұрақтандырды, жоғары концентрацияларда in-vitro лейкотриендер синтезіне тежегіш әсер етті және антибрадикининдік белсенділік көрсетті. Кетопрофеннің ыстықты түсіретін әсер ету механизмі белгісіз, ол орталық жүйке жүйесінде простагландин синтезін тежеуі мүмкін (ең алдымен гипоталамуста). Кейбір әйелдерде кетопрофен простагландин синтезінің тежелуіне және/немесе простагландин тиімділігіне байланысты бастапқы дисменорея симптомдарын жеңілдетті.

Дозалау режимі Жағымсыз реакцияларды симптомдарды бақылау үшін қажетті қысқа уақыт кезеңі ішінде ең төмен тиімді дозаны қолдана отырып, барынша азайтуға болады. 200 мг дозаны қолданар алдында пайда/қауіп арақатынасын мұқият бағалау қажет, тек бүйрек шаншуы мен нефроз кезінде анағұрлым жоғары дозаларды қолдануға болады, бірақ ұсынылған ең жоғары емдеу ұзақтығынан аспау керек. Ревматологиялық немесе онкологиялық аурулардан туындаған ауырсыну кезінде: 1-ден 2 ампулаға дейін, яғни күніне 100-ден 200 мг-ға дейін. Бүйрек шаншуы ұстамасы кезінде: күніне 100-ден 300 мг-ға дейін. Енгізу әдісі мен жолы Бұлшықет ішіне енгізген кезде инъекцияны терең бұлшықет ішіне жасау керек. Инъекция қатаң түрде асептикалық жағдайда жамбастың жоғарғы сыртқы квадрантына, терең және баяу жүргізу керек. Әрбір қайта инъекция жасаған кезде енгізу жағын өзгерту ұсынылады. Инъекцияға дейін иненің ұшы тамырда емес екенін анықтау үшін аспирация жасау керек. Егер инъекция кезінде науқаста қатты ауырсыну болса, инъекцияны дереу тоқтату керек. Жамбаста протез болғанда инъекцияны протезге қарама-қарсы жақтан жүргізу қажет. Емдеу ұзақтығы Ревматологиялық немесе онкологиялық ауруларда емдеу ұзақтығы 2-3 күн (қажет болса, осы кезеңде бастапқы терапияны пероральді немесе ректальді дәрілік түрлермен жүргізуге болады. Бүйрек шаншуы ұстамасы кезінде 48 сағаттан асырмай қолдану керек. Тәуліктік дозаны 2-3 инъекцияға бөлген жөн.

- әсер етуші затқа немесе қосымша заттардың кез келгеніне аса жоғары сезімталдық - бронх түйілуі, демікпе, ринит, есекжем және кетопрофенге, ацетилсалицил қышқылына немесе басқа ҚҚСП-ға аллергиялық реакциялар, анафилаксиялық реакциялар (осы пациенттерде ауыр, сирек өліммен аяқталғаны туралы хабарланған) сияқты бұрын болған аса жоғары сезімталдық реакциялары -асқазан-ішек жолының (АІЖ) эрозиялық-ойық жаралы зақымдануларының өршуі, анамнездегі ойық жара немесе тесілуі - ішектің қабыну аурулары (ойық жаралы колиттің өршуі немесе Крон аурулары) - қан түзудің бұзылуы, гемостаздың бұзылуы (гемофилияны қоса) - гемостаздың бұзылуы және антикоагулянттық терапияны бір мезгілде жүргізу - декомпенсацияланған жүрек жеткіліксіздігі - асқазан-ішек, цереброваскулярлық және басқа да қан кетулер (немесе бассүйекішілік қан кетуге күдік) -бүйректің ауыр жеткіліксіздігі (креатинин клиренсі 30 мл/мин аз), бүйректің үдемелі аурулары -бауырдың ауыр жеткіліксіздігі (Чайлд-Пью шкаласы бойынша 10-15 балл) немесе бауыр ауруының белсенді фазасы - жүктіліктің III триместрі және емшек емізу кезеңі - 15 жастан кіші балалар

Жиі - іштің жоғарғы бөлігіндегі ауырсыну немесе жайсыздық, жүрек айну, құсу, іштің ауыруы, асқазанның ауыруы. Жиі емес - жиі сұйық нәжіс, гастрит, іш қату, ішекте газдардың жиналуы - бас ауыруы, бас айналуы, ұйқышылдық, шаршағыштық, ісіну - өртпе, эрозия, терінің қышынуы. Сирек - қан кетуден кейінгі қан аздығы - ашыту, шаншу, жыбырлату сезімімен сезімталдықтың бұзылуы - көздің көруі анық емес, құлақтағы шуыл - ауыз қуысының шырышты қабығының қабынуы, асқазан мен он екі елі ішектің ойық жарасы, тоқ ішектің шырышты қабығының қабынуы (колит), дене салмағының артуы -бауырдың қабынуы, трансаминазалар мен билирубин деңгейінің жоғарылауы - бронх демікпесінің ұстауы. Белгісіз • колит пен Крон ауруының өршуі, асқазан-ішектен қан кету, тесілуі, панкреатит • ангионевроздық ісіну, анафилаксиялық реакциялар (анафилаксиялық шокты қоса), есекжем, созылмалы есекжемнің өршуі, фотосезімталдық, алопеция және дерматоздар, буллездік реакциялар (Стивенс-Джонсон синдромы және Лайелл синдромы)) • бронх түйілуі, әсіресе бұрын аспиринге аллергия болғанда, басқа ҚҚСП, ринит • асептикалық менингит, құрысулар, вестибулярлық бас айналу, дәм сезудің бұзылуы • сананың шатасуы, көңіл-күйдің бұзылуы • қауіп факторлары бар пациенттерде жедел бүйрек жеткіліксіздігі. Бүйректің органикалық зақымдануы ЖБЖ - ға әкелуі мүмкін: интерстициальді нефриттің бірлі-жарым жағдайлары (өзекшелердің жедел некрозы, нефротикалық синдром, папиллярлық некроз туралы хабарланды), бүйрек функциясының бұзылуы • сұйықтықтың іркілуі, гиперкалиемия, агранулоцитоз, тромбоцитопения, сүйек кемігінің жеткіліксіздігі, гемолиздік анемия, лейкопения • жүрек жеткіліксіздігі • артериялық гипертензия, вазодилатация, васкулит (лейкоцитокластық васкулитті қоса) • инъекция орнындағы реакциялар (ауырсыну және күйдіру сезімі), соның ішінде Николау синдромы деп аталатын ливедоидты дерматит. Жағымсыз дәрілік реакциялар туындаған кезде медицина қызметкеріне, фармацевтика қызметкеріне немесе дәрілік препараттардың тиімсіздігі туралы хабарламаны қоса, дәрілік препараттарға жағымсыз реакциялар (әсерлер) бойынша ақпараттық деректер базасына тікелей жүгіну қажет Қазақстан Республикасы Денсаулық сақтау министрлігі Медициналық және фармацевтикалық бақылау комитетінің «Дәрілік заттарды және медициналық бұйымдарды сараптау ұлттық орталығы» ШЖҚ РМК» http://www.ndda.kz

Симптомдары: артық дозаланудың негізгі симптомдары бас ауыруы, бас айналу, ұйқышылдық, сылбырлық, жүрек айну, жиі сұйық нәжіс және іштің және асқазанның ауыруы болып табылады. Ауыр уыттану кезінде гипотензия, тыныс алудың бәсеңдеуі және асқазан-ішектен қан кету байқалды. Емі: пациентті аурухананың мамандандырылған бөлімшесіне ауыстыру қажет, онда дереу симптоматикалық емді (сусыздануды, ацидозды түзетуді қоса) және бүйрек функциясын бақылау. Бүйрек жеткіліксіздігінің дамуы кезінде препаратты организмнен шығару үшін гемодиализ тиімді болуы мүмкін. бастауға болады. Спецификалық антидот жоқ.

Бүйрек жеткіліксіздігі және қарт адамдар: бастапқы дозаны азайту ұсынылады, содан кейін бүйректің төзімділігіне байланысты қажет болған жағдайда таңдаңыз. Сусыздануы бар пациенттер: бүйрек функциясының бұзылу қаупі. Арнайы ескертулер Симптомдарды бақылау үшін қажетті қысқа уақыт кезеңі ішінде ең төмен тиімді дозаны қолданған кезде жағымсыз әсерлер барынша азайтылуы мүмкін. Ойық жараның немесе қан кетудің даму қаупін арттыруы мүмкін дәрілік препараттарды, мысалы, пероральді гормональді препараттар (кортикостероидтар), қанның ұюын төмендететін препараттар (варфарин), антидепрессанттар немесе қанның тұтқырлығын төмендететін препараттарды (ацетилсалицил қышқылы, никорандил) бір мезгілде қабылдайтын пациенттерде сақ болу керек. Егер Кетанейм қолданған кезде қан кету немесе ойық жара пайда болса, емдеуді тоқтату керек. Кетопрофенді басқа ҚҚСП-мен бір мезгілде қолданудан аулақ болу керек. Асқазан-ішектен қан кету, ойық жаралар мен тесілулер: кейде өлімге әкелуі мүмкін асқазан-ішектен қан кету, ойық жаралар мен тесілулер бұрын ауыр асқазан-ішек оқиғалары болған немесе болмаған кезде немесе ескертетін симптомдармен немесе онсыз кез-келген ҚҚСП-мен емдеу кезінде кез-келген уақытта байқалды. Кейбір деректер кетопрофеннің кейбір басқа ҚҚСП-мен салыстырғанда, әсіресе жоғары дозаларды қолданғанда ауыр асқазан-ішек уытты әсерінің жоғары қаупін беруі мүмкін екенін көрсетеді. Жағымсыз әсерлер қаупі препараттың дозасын арттырған кезде, бұрын ойық жара ауруында (әсіресе, қан кетумен немесе тесілумен асқынған) және егде жастағы адамдарда артады. Мұндай жағдайларда емдеуді ең төменгі тиімді дозадан бастау қажет. Ацетилсалицил қышқылының төмен дозаларымен немесе асқазан-ішек жағымсыз әсерлерінің қаупін арттыруға қабілетті басқа да асқазан-ішек препараттарымен бір мезгілде емдеуді қажет ететін пациенттерге қорғаныс құралдарын (мысалы, мизопростолды) бір мезгілде қолдану көрсетілуі мүмкін. Глюкокортикоидтар, пероральді антикоагулянттар (мысалы, варфарин), серотонинді кері қармайтын селективті тежегіштері (СКҚСТ), аспирин және никорандил сияқты антиагреганттар сияқты ойық жараның немесе қан кетудің даму қаупін арттыратын препараттармен бір мезгілде емдеу кезінде ерекше назар аудару қажет. Құрсақ қуысында кез келген ерекше симптомдар пайда болған кезде (әсіресе асқазан-ішектен қан кету немесе ойық жара кезінде) емдеуді тоқтату және шұғыл дәрігерге қаралу қажет, олар емнің басында жиі байқалады. Аурудың өршуінің даму қаупіне байланысты ҚҚСП-ны бұрын АІЖ аурулары (ойық жаралы колит, Крон ауруы) бар пациенттерге сақтықпен және мұқият қадағалаумен тағайындау керек. Егде жастағы пациенттер: егде жастағы пациенттерде ҚҚСП қолданғанда жағымсыз реакциялар жиілігі артады, әсіресе өліммен аяқталуға әкелуі мүмкін асқазан-ішектен қан кету және тесілу жиілігі артады. Тері реакциялары: ҚҚСП емдегенде эксфолиативті дерматит, Стивенс-Джонсон синдромы және уытты эпидермальді некролиз- Лайелл синдромы сияқты күрделі тері реакциялары байқалды.Өте сирек, олар өліммен аяқталды. Ең жоғары қауіп емнің басында, көбінесе бірінші айда байқалды. Тері бөртпесі, шырышты қабықтарда зақымданулар немесе жақпаушылықтың басқа да белгілері алғаш пайда болғанда Кетанейм препаратын қолдануды тоқтатып, дәрігерге қаралу қажет. Бүйрек функциясы: жүрек жеткіліксіздігінде, бауыр циррозында, нефрозда, несеп айдайтын немесе созылмалы бүйрек ауруларында (әсіресе егде жастағы адамдарда) қолданғанда, емдеудің басында бүйректің ауыр ауруының дамуы мүмкін болғандықтан бүйрек функциясын мұқият бақылау қажет. Емдеудің басында немесе дозасын арттырғаннан кейін диурезге бақылау жүргізу және мынадай қауіп факторлары бар пациенттерге бүйрек функциясын бағалау ұсынылады: егде жас, АӨФ тежегіштері, сартандар, диуретиктер сияқты препараттарды бір мезгілде қолдану, гиповолемия (даму себебіне қарамастан), жүрек жеткіліксіздігі, созылмалы бүйрек жеткіліксіздігі, нефроздық синдром, жегілік нефропатия, бауыр циррозы. Натрийдің іркілуі Ісінудің, артериялық гипертензияның дамуынан немесе артериялық гипертензияның күшеюінен, жүрек жеткіліксіздігінің нашарлауынан натрий іркілуі мүмкін. Мұндай жағдайларда емдеу басталғаннан бастап клиникалық мониторинг қажет. Гипотензивті препараттардың әсері төмендеуі мүмкін. Жүрек-қантамырлық және цереброваскулярлық реакциялар: клиникалық және эпидемиологиялық зерттеулердің деректері кейбір ҚҚСП (әсіресе жоғары дозалар және ұзақ уақыт) қолдану артериялық тромбоздың (мысалы, миокард инфарктісі немесе инсульт) даму қаупінің шамалы жоғарылауын туындатуы мүмкін деп болжауға мүмкіндік береді. Кетопрофенді қолдану кезінде мұндай қауіпті болдырмау үшін деректер жеткіліксіз. Барлық ҚҚСП сияқты бақыланбайтын артериялық гипертензиясы, іркілісті жүрек жеткіліксіздігі, жүректің ишемиялық ауруы, шеткері артерия аурулары және/немесе анамнезінде цереброваскулярлық аурулары бар пациенттерді (өтпелі ишемиялық шабуылды қоса) кетопрофенмен емдеу пайда/қауіп арақатынасын мұқият қарағаннан кейін ғана керек. Осындай тәсіл жүрек-қантамыр ауруларының (мысалы, артериялық гипертензия, гиперлипидемия, қант диабеті немесе темекі шегу) қауіп факторлары бар пациенттерді ұзақ емдеу курсын бастамас бұрын қажет. Коронарлық артерияны шунттау бойынша операция жүргізу кезеңінде ауыру синдромына байланысты ҚҚСП қабылдаған пациенттерде артериялық тромбоздың даму қаупінің жоғарылауы туралы хабарланды. Жеңіл және орташа ауырлықтағы қан қысымы және/немесе іркілісті жүрек жеткіліксіздігі жоғарылаған кезде ісінудің және сұйықтықтың іркілуінің ықтимал дамуына байланысты сақтық қажет. Кетанейм қабыну ауруының симптомдарын бүркемелеуі, қажетті емнің басталуын кешіктіріп, сол арқылы оның ағымын нашарлатуы мүмкін. Бұл ауруханадан тыс бактериялық пневмония, бактериялық асқынулар және желшешек кезінде байқалды. Препарат инфекциядан туындаған қызбаны немесе ауырсынуды жеңілдету үшін тағайындалған кезде аурудың ағымын бақылаған жөн. Егер амбулаториялық емдеу кезінде симптомдар жоғалмаса немесе нашарласа, емдеуші дәрігердің кеңесі қажет. Бауыр функциясы: бұрын бауыр функциясы бұзылған немесе бауыр аурулары бар пациенттерде, әсіресе ұзақ мерзімді емдеу кезінде, қан талдауын, трансаминазалардың деңгейін, бауыр мен бүйрек функциясының көрсеткіштерін үнемі бақылау қажет. Кетопрофенді қолданғанда сарғаю мен гепатиттің сирек кездесетін жағдайлары сипатталған. Егер көру қабілетінің бұзылуы, мысалы, бұлыңғыр көру пайда болса, емдеуді тоқтату керек. Кетанейм препаратын ауырсынуды басатын, ыстық түсіретін немесе қабынуға қарсы дозаларда басқа ҚҚСП, пероральді антикоагулянттармен, литиймен, аспиринмен емдеген кезде, аптасына 20 мг астам дозаларда метотрексатпен, фракцияланбаған, төмен молекулалы және оларға ұқсас гепариндермен (емдік дозаларда және/немесе егде жастағы адамдарда), бүйрек функциясының ауыр немесе орташа айқын бұзылуы бар пациенттерде пеметрекседпен емдеу кезінде қолданудан аулақ болу керек. Тыныс алу жолдарының аурулары: демікпесі, мұрынның, мұрынның қосалқы қойнауларының шырышты қабығының созылмалы қабынуы, және/немесе мұрын полиптері бар науқастарда ацетилсалицил қышқылына және/немесе ҚҚСП-ға аллергиялық реакциялар қаупі жоғары және дәрілік препаратты енгізу оларда демікпе ұстамасын немесе бронх түйілуін тудыруы мүмкін, әсіресе егер ацетилсалицил қышқылына немесе ҚҚСП аллергиясы болса. Қандағы калий деңгейінің жоғарылауы: қант диабетінде және калий жинақтаушы дәрілік препараттарды бір мезгілде қолданғанда қандағы калий деңгейі едәуір жоғарылауы мүмкін. Фотосезімталдық: бұрын фотосезімталдық немесе фотоуыттылық реакцияларын байқаған пациенттер емдеу кезеңінде өз жағдайын мұқият қадағалауы қажет. Бұл препарат құрамында 12,3 к. % спирт бар, бұл 200 мг (2 мл) құрайды, сондықтан бұл препаратты алкоголизмде, бала емізетін әйелдерге, жүкті әйелдерге, балаларға және бауыр аурулары мен эпилепсия кезінде қолдану ұсынылмайды. Кетопрофенді жүкті болғысы келетін әйелдерге қолдану ұсынылмайды. 2 мл препаратта 800 мг пропиленгликоль (1 мл-де 400 мг) бар, ол шаранаға және емшек сүтіне енуі мүмкін. Пропиленгликоль бүйрек аурулары (жедел тубулярлы некроз, жедел бүйрек жеткіліксіздігі) және бауыр жұмысының бұзылуы сияқты әртүрлі жағымсыз реакцияларды тудыруы мүмкін. Кетанейм препаратының әр 2 мл-де 40 мг бензил спирті бар, бұл 1 мл-де 20 мг сәйкес келеді. Бензил спиртінің жинақталу қаупіне және уытты әсеріне байланысты препараттың үлкен дозаларын сақтықпен және аса қажет болғанда ғана, әсіресе бауыр мен бүйрек ауруларында қолдану қажет. Педиатрияда қолдану: 15 жасқа толмаған балаларда қолданылмайды. Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері Ұйқышылдық, бас айналу, құрысулар және көру проблемалары дамыған кезде автомобильді басқару және қозғалатын механизмдермен жұмыс істеу ұсынылмайды.

Жүктіліктің ағымына және шарананың құрсақішілік дамуына теріс әсер етуі мүмкін (жүктіліктің ерте кезеңдерінде ҚҚСП қолданған кезде түсік тастау және жүрек пен алдыңғы құрсақ жақтауының ақаулары қаупі жоғары). Дәрігердің тағайындауынсыз Кетанейм препаратын жүктіліктің бірінші және екінші триместрінде қолдануға болмайды. Жүктіліктің үшінші триместрінде осы топтың препараттары шаранада мыналарды тудыруы мүмкін: жүрек ақаулары (артериялық түтіктің мерзімінен бұрын жабылуы, өкпе гипертензиясы), бүйрек жұмысының бұзылуы (бүйрек ауруына дейін) және су аздығы. Туғаннан кейін жаңа туған нәрестеде бүйрек жеткіліксіздігі (қайтымды немесе қайтымсыз) сақталуы мүмкін, әсіресе кеш және ұзақ әсер ету жағдайында (кешіктірілген ауыр гиперкалиемия қаупі бар). Жүктіліктің 6-шы айынан бастап (24-ші аптадан кейін) Боталлов түтігінің тарылуы дамуы мүмкін және шаранада/жаңа туған нәрестеде бұл жүректің оң бөлігінің жеткіліксіздігіне және тіпті шарананың өліміне әкелуі мүмкін. Босану мерзімі жақындаған сайын құл қауіп соғұрлым маңызды (әсердің қайтымдылығы аз). Бұл әсер препаратты бір рет қабылдағанда да болуы мүмкін. Жүктіліктің соңында қан кету уақытының ұзаруы, қанның тұтқырлығының төмендеуі (кішкентай дозалардан кейін де), жатырдың жиырылуының тежелуі, мерзімнің кешігуіне және босану ұзақтығының артуына әкелуі мүмкін. Кетанейм препаратын жүктіліктің III триместрінде қолдануға болмайды. Бала емізу: Кетанейм бала емізетін аналарға ұсынылмайды, өйткені ол емшек сүтіне енеді. Фертильдігі: Кетанейм препараты жүкті болғысы келетін, ұрықтану проблемалары бар немесе бедеулікке байланысты тексеруден өтетін әйелдерге ұсынылмайды.

Қандағы калийдің жоғарылауы: калий тұздары, калий жинақтайтын диуретиктер, ангиотензин өзгертуші фермент (АӨФ) тежегіштері, ангиотензин II антагонистері, ҚҚСП, гепариндер (төмен молекулалы немесе фракцияланбаған), иммуносупрессанттар (циклоспорин, такролимус және триметоприм) сияқты кейбір дәрілік препараттар қандағы калийдің жоғарылауына ықпал етуі мүмкін. Осы препараттардың біріктірілімі гиперкалиемия қаупін арттырады. Бұл қауіпті калий жинақтайтын диуретиктермен біріктірген кезде, атап айтқанда, олар бір-бірімен немесе калий тұздарымен біріктірілген кезде ескеру өте маңызды, ал АӨФ және ҚҚСП тежегіштерімен біріктірген кезде, егер ұсынылған сақтық шаралары сақталса, қауіп аз болады. Триметоприм сияқты кейбір дәрілер қандағы калий деңгейін жоғарылату үшін жоғарыда аталған басқа препараттармен бірге қосымша факторлар ретінде әсер етуі мүмкін. Кетопрофенді келесі препараттармен бір мезгілде қолдану пациенттің клиникалық-биологиялық жай-күйін мұқият бақылауды талап етеді. Ұсынылмаған біріктірілімдер + Басқа ҚҚСП (жоғары дозадағы аспиринді қоса): ас қорыту жолының ойық жаралары мен қан кетулерінің даму қаупі артады (аддитивті синергия). Ацетилсалицил қышқылы үшін қабынуға қарсы дозалар (дозаға≥ 1 г және / немесе күніне ≥ 3 г) және ауырсынуды басатын немесе ыстық түсіретін дозалар (дозаға≥ 500 мг және/немесе күніне <3 г) туралы сөз қозғалып отыр. + Антикоагулянттар: К дәрумені антагонисті (мысалы, варфарин), тромбин тежегіштері (мысалы, дабигатран), Ха факторының тікелей тежегіштері (мысалы, апиксабан, ривароксабан, эдоксабан). Қан кету қаупінің жоғарылауы + Фракцияланбаған гепариндер, төмен молекулалы және олармен тектес гепариндер және (емдік дозаларда) және / немесе егде жаста: қан кету қаупі артады (ҚҚСП-ның АІЖ шырышты қабығына агрессивті әсері). Егер біріктірілімді болдырмау мүмкін болмаса, пациенттің клиникалық жағдайын бақылау қажет. + Деферасирокс: асқазан-ішек ойық жарасы мен қан кету қаупі артады. + Литий: бүйректің бөлу функциясының төмендеуіне байланысты қан плазмасындағы литий деңгейінің жоғарылау қаупі бар және ол уытты деңгейге жетуі мүмкін. Бір мезгілде қолдану қажет болған жағдайда плазмадағы литий деңгейін мұқият бақылау және ҚҚСП емдеуді тоқтатқаннан кейін литий дозасын уақтылы түзету қажет. + Метотрексат аптасына 20 мг жоғары дозада: метотрексатты бүйрекпен шығарудың төмендеуіне байланысты, әсіресе үлкен дозаларды (> 20 мг/апта) қолданғанда, оның қанға уытты әсер ету қаупі жоғары. Кетопрофенді енгізуді тоқтату немесе бастау мен метотрексатты енгізу арасында кемінде 12 сағат уақыт аралығын сақтау қажет. + Пеметрексед: бүйрек функциясының жеңіл немесе орташа айқын бұзылуы бар пациенттерде ҚҚСП туғызған пеметрекседті бүйрекпен шығарудың төмендеуіне байланысты оның уытты әсер ету қаупі артады. Қолдану кезінде сақ болуды қажет ететін біріктірілімдер Ангиотензин өзгертуші фермент тежегіштері (АӨФ тежегіштері) және ангиотензин II антагонистері: қауіп тобындағы пациенттерде (мысалы, сусыздану, несеп айдайтын препараттармен емдеу кезінде немесе егде жастағы адамдарда), АөФ тежегіштерімен немесе ангиотензин II антагонистерімен бір мезгілде қолданғанда, ҚҚСП тудырған жедел бүйрек жеткіліксіздігінің дамуына дейін бүйрек функциясының бұзылуы мүмкін. Бұл әсерлер әдетте қайтымды, гипертензияға қарсы әсер төмендеуі де мүмкін. Осы біріктірілімді қолданған кезде пациенттер сұйықтықтың жеткілікті мөлшерін қабылдауы тиіс, емнің басында және емдеу кезеңінде ұдайы бүйрек функциясын бақылау қажет. + Несеп айдайтын: қауіп тобындағы пациенттерде (егде жастағы және/немесе сусыздануы бар) жедел бүйрек жеткіліксіздігінің дамуы және диуретиктердің гипотензивті әсері төмендеуі мүмкін. Осы біріктірілімді қолданған кезде пациенттер сұйықтықтың жеткілікті мөлшерін қабылдауы тиіс және бүйрек функциясын бақылау қажет. + Төмен дозаларда қолданылатын метотрексат (аптасына 20 мг-нан аз немесе оған тең): метотрексаттың гематологиялық уыттылығы жоғарылайды (метотрексаттың бүйрекпен шығарылуының төмендеуіне байланысты). Біріктірілген емнің алғашқы апталарында қан талдауын апта сайын тексеру керек. Бүйрек функциясының нашарлауы кезінде (тіпті елеусіз) және егде жастағы адамдарда жағдайды бақылауды күшейту қажет. + Пеметрексед: бүйрек функциясы қалыпты пациенттерде пеметрекседті бүйрекпен шығарудың ықтималды төмендеуіне байланысты ҚҚСП-дан туындаған пеметрекседтің уытты әсер ету қаупі бар. Бүйрек функциясының биологиялық мониторингі. + Циклоспорин, такролимус: нефроуытты әсерді жиынтықтау қаупі жоғары, әсіресе егде жастағы адамдарда. ҚҚСП-мен бір мезгілде қолданудың басында бүйрек функциясын бақылау қажет. + Тенофовир дизопроксилі: нефроуыттылықтың жоғарылау қаупі бар, әсіресе ҚҚСП жоғары дозаларын қолданғанда немесе бүйрек жеткіліксіздігінің қауіп факторлары болғанда. Осы біріктірілім қолданылған жағдайда бүйрек функциясын бақылау қажет. Осы біріктірілімді қолданған кезде бүйрек функциясын бақылау қажет. + Жүрек гликозидтері: кетопрофен мен дигоксин арасындағы өзара әрекеттесу байқалмады, алайда, әсіресе бүйрек жеткіліксіздігі бар пациенттерде сақ болу керек, өйткені ҚҚСП бүйрек қызметін бұзуы және бүйрек арқылы жүрек гликозидтері шығарылуын азайтуы мүмкін. Қолдану кезінде ескеру қажет біріктірілімдер Антиагрегациялық дозалардағы ацетилсалицил қышқылы (1 және одан да көп дозаларда тәулігіне 50 мг-ден 375 мг-ға дейін): асқазан-ішек ойық жаралары мен қан кетулердің даму қаупі жоғары. + Глюкокортикостероидтар (орын басушы терапиядағы гидрокортизоннан басқа): асқазан-ішек ойық жаралары, қан кету қаупі жоғары. + Антиагреганттар: асқазан-ішектен қан кету қаупі жоғары. + Серотонинді кері қармайтын селективті тежегіштері (СКҚСТ): асқазан-ішектен қан кету қаупі жоғары. + Фракцияланбаған, төмен молекулалы гепариндер (профилактикалық дозалар): қан кету қаупі жоғары. + Деферасирокс: асқазан-ішек ойық жаралары мен қан кету қаупі жоғары. + Бета-адреноблокаторлар (эсмололдан басқа): гипертензияға қарсы әсердің төмендеуі (ҚҚСП вазодилатациялайтын простагландиндердің бәсеңдеуі, ал фенилбутазонмен қолданғанда натрий гидроксидінің шығарылуы кідіруі мүмкін. + Пентоксифиллин: қан кету қаупінің жоғарылауы. Жиі клиникалық бақылау және қан кету уақытын бақылау қажет. + Басқа гиперкалиемиялық препараттар: өлімге әкелетін гиперкалиемия қаупі жоғары. + Никорандил: ҚҚСП-мен бір мезгілде қолданғанда ойық жара, тесілуі және АІЖ қан кетуі сияқты күрделі асқынулардың қаупі жоғары.

Сақтау мерзімі 3 жыл Жарамдылық мерзімі өткеннен кейін қолдануға болмайды! Сақтау шарттары 25 °С-ден аспайтын температурада сақтау керек. Балалардың қолы жетпейтін жерде сақтау керек!