Клеримед таблетки 500 мг

Бір таблетканың құрамында белсенді зат – 257.00 мг және 515.50 мг кларитромицин ( 250 мг және 500 мг сусыз кларитромицинге баламалы ), қосымша заттар: микрокристалды целлюлоза, сусыз коллоидты кремнийдің қостотығы, натрий кроскармеллозасы, повидон, стеарин қышқылы, тальк, магний стеараты. Қабығы: гипромеллоза, пропиленгликоль, сорбитан моноолеаты, құрғақ ванильді хош иістендіргіш, титанның қостотығы (Е171), хинолинді сары бояғыш (Е 104), гидроксипропилцеллюлоза, сорбин қышқылы Сыртқы түрінің, иісінің, дәмінің сипаттамасы Сопақша пішінді, екі беті дөңес, бір жағында сындыру сызығы бар сары түсті үлбірлі қабықпен қапталған таблеткалар, ядро өлшемі 14 х 8 мм (250 мг доза үшін). Сопақша пішінді, екі беті дөңес, сары түсті үлбірлі қабықпен қапталған таблеткалар, ядро өлшемі 19 х 10 мм (500 мг доза үшін).

Клеримед сезімтал микроорганизмдер туғызған инфекцияларды емдеуге көрсетілген: - жоғарғы тыныс жолдарының инфекциялары (синусит, фарингит) - төменгі тыныс жолдарының инфекциялары (жедел және созылмалы бронхит, пневмония) - ауырлығы бір қалыптыдан орташа дәрежеге дейінгі терінің және жұмсақ тіндердің инфекциялары (фолликулит, тілмелі қабыну, целлюлит) - Mycobacterium avium немесе Mycobacterium intracellulare туғызған диссеминацияланған немесе шоғырланған микобактериялық инфекциялар - Mycobacterium chelonae, Mycobacterium fortuitum немесе Mycobacterium kansasii туғызған шоғырланған инфекциялар - он екі елі ішектің ойық жаралы ауруы (Helicobacter Pylori эрадикациясы, біріктірілген ем құрамында)

Әсер ету механизмі Клеримед – макролидтер тобына жататын жартылай синтетикалық антибиотик. Препараттің бактерияға қарсы әсері оның сезімтал бактериялардың 5OS-рибосомалық қосалқы бірлігімен байланысуымен және жасушаішілік ақуыз биосинтезінің бәсеңдеуімен айқындалады. Mycobacterium spp. қоса, микроорганизмдердің көпшілігі үшін 14-гидрокси-метаболиттің, бастапқы қосылысқа қарағанда, белсенділігі аз. Бұл тек қана Haemophilus influenza қоздырғышына қатысты, оған қарсы 14-гидрокси-метаболит, бастапқы қосылысқа қарағанда, екі есе белсендірек. Зертханалық жағдайларда Кларитромицин, әдетте, төменде атап көрсетілген микроорганизмдерге қарсы белсенді. Грам-оң бактериялар: Staphylococcus aureus (метициллинге сезімтал); Streptococcus pyogenes (Group A beta-hemolytic streptococci); альфа-гемолиздік стрептококк (viridans group); Streptococcus (Diplococcus) pneumoniae; Streptococcus agalactiae; Listeria monocytogenes. Грам-теріс бактериялар: Haemophilus influenzae; Haemophilus parainfluenzae; Moraxella (Branhamella) catarrhalis; Neisseria gonorrhoeae; Legionella pneumophila; Bordetella pertussis; Helicobacter pylori; Campylobacter jejuni. Микоплазма: Mycoplasma pneumoniae; Ureaplasma urealyticum. Басқа организмдер: Chlamydia trachomatis; Mycobacterium avium; Mycobacterium leprae. Анаэробтар: Macrolide-susceptible; Bacteroides fragilis; Clostridium perfringens; Peptococcus species; Peptostreptococcus species; Propionibacterium acnes. Кларитромициннің бірнеше бактериялық штаммдарға қатысты бактерицидті белсенділігі бар. Осы организмдер Haemophilus influenzae, Streptococcus pneumoniae, Streptococcus pyogenes, Streptococcus agalactiae, Moraxella (Branhamella) catarrhalis, Neisseria gonorrhoeae, H. pylori және Campylobacter spp. түрлерін қмтиды. Бақылау нүктелері Бақылау нүктелері Еуропалық микробқа қарсы сезімталдықты тестілеу комитеті (EUCAST) белгіледі. Тоқтату нүктелері (ең төмен бәсеңдету дозасы - ЕБД, мг/л) Микроорганизм — Сезімтал (≤) — Төзімді (>) Staphylococcus spp. — 1 мг/л — 2 мг/л Streptococcus A, B, C және G — 0,25 мг/л — 0,5 мг/л Streptococcus pneumonia — 0,25 мг/л — 0,5 мг/л Viridans group streptococcus — IE — IE Haemophilus spp. — 1 мг/л — 32 мг/л Moraxella catarrhalis — 0,25 мг/л 1 — 0,5 мг/л 1 Helicobacter pylori — 0,25 мг/л 1 — 0,5 мг/л 1 Тоқтату нүктелері жабайы типті изоляттарды сезімталдығы төмен изоляттардан ерекшелейтін эпидемиологиялық шектік мәндерге негізделген. «IE» белгісі осы түрдің препаратпен емдеуге сай келетін түр екеніне жеткілікті дәлелдер жоқ екенін көрсетеді.

Дозалау режимі Тыныс жолдарының/терінің және жұмсақ тіндердің инфекциялары. Ұсынылатын доза - күніне екі рет 250 мг, қажет болса, оны күніне екі рет 500 мг дейін арттыруға болады (аурудың ауыр ағымында). Әдеттегі емдеу ұзақтығы 6-дан 14 күнге дейін созылады. Он екі елі ішектің ойық жарасы кезінде H. pylori бактериясын жою Әдеттегі емдеу ұзақтығы 6-дан 14 күнге дейін. Емдеу сызбалары. Клеримед препараты 500 мг, күніне екі рет лансопразолмен (күніне екі рет 30 мг) және амоксициллинмен (күніне екі рет 1000 мг) бірге. Клеримед препараты 500 мг, күніне екі рет лансопразолмен (күніне екі рет 30 мг) және метронидазолмен (күніне екі рет 400 мг) бірге. Клеримед препараты 500 мг, күніне екі рет амоксициллинмен (күніне екі рет 1000 мг) және омепразолмен (күніне 20 мг) бірге. 500 мг күніне екі рет омепразолмен (күніне 40 мг), амоксициллинмен (1000 мг күніне екі рет) немесе метронидазолмен (күніне екі рет 400 мг) бірге. Енгізу әдісі және жолы Клеримед препараты ас ішуге байланыссыз ішке қабылданады.

- препарат компоненттеріне, макролидтер тобының антибиотиктеріне немесе қосымша заттардың кез келгеніне аллергиялық реакция - эрготамин немесе дигидроэрготаминмен бір мезгілде қолдану, осылайша қастауыштың уытты әсері болуы мүмкін - пероральді мидозолам, тикагрелор, ивабрадин немесе ранолазинмен бір мезгілде қолдану - астемизол, цизаприд, домперидон, пимозид, терфинадинмен бір мезгілде қолдану (бұл, жүректің жиі соғуының ауыр ұстамаларын қоса, жүрек аритмиясының дамуына, ЭГК бұзылуларына әкелуі мүмкін) - бұрын жүрек ырғағының бұзылуы болған пациенттер немесе жүрек ырғағының басқа ауыр (туа біткен немесе жүре пайда болған) бұзылулары - бауыр немесе бүйрек ауруы бар пациенттерде колхицин және Р-гликопротеинмен бір мезгілде қолдану - бүйрек ауруымен біріккен бауырдың ауыр ауруы - ловастатин немесе симвастатинді қоса, статиндермен бір мезгілде қолдану - электролиттік бұзылулары бар пациенттер үшін - қандағы калий деңгейінің төмендеуі (жүрек ырғағының қауіпті азаюы болуы мүмкін екендіктен) - ауыр бүйрек ауруы (оны азайту мүмкін болмағандықтан, Клеримед препаратының 500 мг дозасы үшін) - кларитромицин мен ломитапидті бір мезгілде қолдану - балалар мен 18 жасқа толмаған жасөспірімдерге.

Өте жиі - енгізу кезіндегі флебит (кларитромицинді вена ішіне енгізу үшін қолданғанда). Жиі - ұйқысыздық, бас ауыру, тамырлар кеңеюі - дәмге сезімталдықтың бұзылуы, дәм сезудің бұрмалануы - жүрек айну, іштің ауыруы, құсу, іштің жоғарғы бөлімінің ауыруы немесе жайсыздануы, сұйық нәжіс - бауыр жұмысының бұзылуы (бауыр функциясының зертханалық көрсеткіштерінің қалып шегінен ауытқуы) - бөртпе, қатты тершеңдік - енгізген жердің ауыруы, қабынуы (кларитромицинді вена ішіне енгізу үшін қолданғанда). Жиі емес - май жасушалары санының шоғырлана артуы және май тінінде микроайналымның бұзылуы (целлюлит), ауыз қуысы шырышты қабығының зеңді зақымдануы, асқазан-ішек жолының шырышты қабығының қабынуы, кандидоз - инфекциялар, қынаптық инфекциялар - лейкоциттер, нейтрофилді лейкоциттер санының азаюы, тромбоциттер, эозинофилдер санының көбеюі - өмірге қауіп төндіретін жедел ауыр аллергиялық реакция, жоғары сезімталдық - тәбеттің толық болмауы, тәбеттің төмендеуі - үрейлену, күйгелектік - естен тану, әртүрлі бұлшықеттер топтарындағы еріктен тыс қимылдар, бас айналу, ұйқышылдық, бұлшықеттердің жиырылуы тудырған дене бөліктерінің немесе бүкіл дененің ырғақты қимылдары - вестибулярлы бас айналу, естудің нашарлауы, құлақтағы шыңыл - жүректің тоқтап қалуы, жүректің жылдам жүйесіз жиырылулары, ЭКГ өзгерістерімен жүрекішілік импульс өткізгіштігінің бұзылуы, жүректің кезектен тыс жиырылуы, жүрек қағу - демікпе, мұрыннан қан кету, өкпе артериясының тромбпен бітелуі - өңеш қабынуы, асқазан ішіндегісінің өңешке патологиялық лықсуынан болатын жай-күй, гастрит, анальді өтіс аумағының қатты ауыруы, стоматит, тілдің қабынуы, іш кебу, іш қату, ауыз кеберсуі, кекіру, ішекте көп газ түзілуі - он екі елі ішекте өт бөлінісінің азаюы, бауыр қабынуы, бауырдың АЛТ, АСТ, ГГТ ферменттері деңгейінің жоғарылауы - терінің үстінен көтерілетін сұйықтық толы қабыршақтар, қышыну, есекжем, күйіктен болған көпіршіктерге ұқсайтын теріде жылдам дамитын, қатты қышитын боз-қызғылт сулы бөртпелер, макулопапулёзді бөртпе - бұлшықеттердің түйілуі, бұлшықеттердің қарысуы, бұлшықет ауыруы - қандағы креатинин, мочевина жоғарылауы - дімкәстану, дене температурасының көтерілуі, созылмалы шаршау синдромы, кеуденің ауыруы, дененің мұздауын және дірілдеуін сезіну, қатты қалжырау - альбумин-глобулин арақатынасының өзгеруі, қандағы сілтілік фосфатаза, лактатдегидрогеназа деңгейінің жоғарылауы Жиілігі белгісіз - ішектің жедел қабыну ауруы, тілмелі қабыну - қанда гранулоцитоз мөлшерінің артуы, тромбоциттер санының азаюы - өмірге қауіп төндіретін жедел ауыр аллергиялық реакция, терінің терең қабаттарының және тері асты тіндерінің тығыз, симметриядан тыс, ауырсындыратын ісінуі - психоз, сананың шатасуы, өзіндік әрекеттерін ту сыртынан бақылағандай болу, депрессия, бағдардан жаңылу, елестеулер, қорқынышты түстер көру, маниялық реакциялар - құрысулар, дәм сезу сезімталдығынан айрылу, иіс сезудің өзгеруі, иіс сезбей қалу, ашытуды, шаншуды, тұла-бойдың шымырлауын түйсінумен болатын сезімталдық бұзылыстары - естімей қалу - кенеттен жүрек соғуының елеулі жиілеу ұстамаларымен жүрек ырғағының бұзылуы, жүректің жиі соғуы, өмірге зор қауіпті жылдам, жүйесіз жүрек ырғағы - қан кету - ұйқы безінің жедел қабынуы, тіл түсінің өзгеруі, тіс түсінің өзгеруі - бауыр жеткіліксіздігі, бауыр қабынуынан болатын сарғаю - іріңді бөртпе түріндегі жедел тері реакциясы, терідегі және шырышты қабықтардағы бөртулермен жедел токсико-аллергиялық ауру (Стивенс-Джонсон синдромы), сұйықтық толы қабыршақтар түзілуімен терінің ауыр аллергиялық зақымдануы (уытты эпидермалық некролиз), дәрі-дәрмектен болатын (эозинофилиямен және жүйелі көріністермен қатар жүретін) тері реакциясы, безеулер - бұлшықеттік тін жасушаларының ыдырауы (рабдомиолиз), атрофия және бұлшықеттер ыдырауы - бүйрек жұмысының бұзылуы, созылмалы бүйрек қабынуы - қан ұюының зертханалық көрсеткіштерінің нашарлауы, несеп түсінің өзгеруі. Жағымсыз дәрілік реакциялар туындаған жағдайда медициналық қызметкерге, фармацевтикалық қызметкерге немесе, дәрілік препараттардың тиімсіздігі туралы хабарламаларды қоса, дәрілік препараттарға жағымсыз реакциялар (әсерлер) жөніндегі ақпараттық деректер базасына тікелей хабарласу керек Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттарды, медициналық бұйымдарды сараптау ұлттық орталығы» ШЖҚ РМК http://www.ndda.kz

Симптомдары: асқазан-ішек жолы тарапынан жағымсыз әсерлердің күшеюі. 8 г кларитромицин қабылдаған, бұрын психикалық бұзылулары болған бір пациентте психикалық статус пен мінез-құлық өзгерісі, қандағы калий деңгейінің төмендеуі және басқа бұзылулар аталды. Емдеу: асқазанды шаю, сорбенттер қабылдау, симптоматикалық емдеу. Гемодиализ және перитонеальді диализ тиімділігі аз.

Балалар: препарат 18 жасқа толмаған балаларға қарсы көрсетілімді. Егде жастағы пациенттер: дозалары ересектердегімен бірдей. Бүйрек ауруы бар пациенттер: бүйрек ауруы ауыр пациенттерде ауру ағымы ауырлап кеткенде Клеримед препаратының дозасын күніне бір рет 250 мг немесе күніне екі рет 250 мг дейін төмендетеді. Емдеу курсы 14 күннен аспауы тиіс. Арнайы сақтандырулар Дәрігердің тағайындауынсыз Клеримед препараты жүктілік кезінде, әсіресе, алғашқы үш айда қолданылмауы тиіс. Бүйректің орташа айқын және ауыр ауруында және бауырдың ауыр ауруында Клеримед препаратын сақтықпен тағайындау қажет. Бауыр жеткіліксіздігі: кларитромицин қолдану кезінде бауыр жеткіліксіздігінен өліммен аяқталған оқиғалар сирек болды. Бұл бауыр ауруымен немесе басқа бауырға уытты дәрілік препараттарды қабылдаумен байланысты болуы мүмкін. Тәбет болмауы, терінің сарғыш реңденуі, несептің қараюы, қышыну немесе құрсақ қуысының ауыруы сияқты бауыр ауруының симптомдары пайда болғанда, сізге емдеуді тоқтатып, шұғыл дәрігерге қаралу қажет. Ішектің жедел қабыну ауруы бактерияға қарсы препараттардың бәрін дерлік қолдану кезінде білінді және орташа айқыннан ауырға дейін (өліммен аяқталатын) ауырлығы әртүрлі дәрежеде болуы мүмкін. Бактерияға қарсы препараттармен емдеу ішектің қалыпты микрофлорасын өзгертеді және оларды қолданудан кейін екі ай ішінде ішек қабынуын тудыратын қоздырғыштар көбеюінің күшеюіне әкелуі мүмкін. Cұйық нәжіс білінгенде сізге шұғыл дәрігерге қаралу керек. Тиімдірек емдеу үшін бактериологиялық зерттеу қажет болуы мүмкін. Ішек қабынуы жағдайында ішек перистальтикасын бәсеңдететін препараттарды қолдануға болмайды. Колхициннің уытты әсері: кларитромицин мен колхицинді бір мезгілде қолданғанда, әсіресе, егде жаста немесе бүйрек ауруында колхициннің уытты әсері (кейде өліммен аяқталатын) болуы мүмкін. Егер сіз колхицин мен Клеримед препаратын бір мезгілде қабылдап жүрсеңіз, колхициннің қолайсыз жанама әсерлерінің даму мүмкіндігін білу қажет. Клеримед препаратын триазолбензодиазепиндермен, мысалы, триазолам, мидазоламмен бір мезгілде сақтықпен қолдану керек. Клеримед препаратын қоса, макролидтер тобының препараттарын қабылдағанда, жүрек соғуының айқын жиілеуін қоса, жүрек ырғағы бұзылуларының ауыр ұстамаларының дамуы білінді, әсіресе, жиі: • ишемиялық жүрек ауруы, ауыр жүрек жеткіліксіздігі бар пациенттерде, сирек жүрек ырғағында, • тұзды қан құрамының бұзылуында (магний немесе калий төмендеуінде), • жүрек ырғағының бұзылуын тудыратын басқа дәрілік препараттарды бір мезгілде қабылдағанда. Кларитромицинді астемизол, цизаприд, домперидон, пимозид және терфендинмен бір мезгілде қолдану қарсы көрсетілімді. Клеримед препараты туа біткен немесе жүре пайда болған сирек жүрек ырғағында немесе ырғақтың басқа бұзылуларында қолданылмауы тиіс. Өкпе қабынуы: өкпені қабындыратын кейбір қоздырғыштар препарат әсеріне сезімтал болмауы мүмкін, сондықтан Клеримед препаратын тағайындау алдында дәрігер сезімталдыққа тест өткізуді тағайындауына болады. Препаратты ұзақ уақыт қолдану препарат тиімділігінің төмендеуіне және зеңді инфекция дамуына әкелуі мүмкін. Бұл жағдайларда дәрігер қажетті емді тағайындайды. Егер сіздің ауруыңыздың қоздырғышы құрамына кларитромицин кіретін топтың басқа препараттарына немесе линкомицин мен клиндамицинге сезімтал болмаса, Клеримед препаратын қолданудан болатын әсер жеткіліксіз болуы да мүмкін. Терінің және жұмсақ тіндердің жеңіл және орташа ауыр инфекциялары: осы ауруларды препаратқа сезімтал емес қоздырғыштар бәрінен жиірек тудырады, сондықтан алдын ала сезімталдыққа тест өткізу маңызды. Қазіргі уақытта Клеримед препаратын эритразма, безеулер және тілмелі қабынуды емдеу үшін және тек пенициллин тобының препараттарын қолдануға болмайтын жағдайларда ғана қолдануға болады. Өмірге қауіп төндіретін ауыр жедел аллергиялық реакциялардың іріңді бөртпе түріндегі жедел тері реакциясын, терідегі және шырышты қабықтардағы бөртулермен уытты-аллергиялық ауруды, сұйықтық толы қабыршақтар түзілуімен терінің ауыр аллергиялық зақымдануын, қанда эозинофилдердің артуымен және ішкі ағзалар тарапынан симптомдармен дәрілік бөртпені қоса дамуында Клеримед препаратымен емдеуді дереу тоқтатып, бірден дәрігерге қаралу керек. Қандағы глюкоза деңгейін төмендетуге арналған пероральді препараттармен (натеглинид, пиоглитазон, репаглинид, розиглитазон) және/немесе инсулинмен бір мезгілде қолдану глюкоза деңгейінің айқын төмендеуін тудыруы мүмкін, сондықтан емдеу кезеңінде қандағы глюкоза деңгейін бақылау қажет. Қан ұюын төмендететін пероральді препараттар: варфаринмен бір мезгілде қолданғанда қан ұю уақытының ұзару және күрделі қан кетулердің даму қаупі жоғары. Ловастатинмен немесе симвастатинмен бір мезгілде қолдану қарсы көрсетілімді, өйткені атрофия және бұлшықеттердің ыдырау қаупі артады (ауыр түрде болуы мүмкін). Егер осы препараттар қажет болса, дәрігер ең төмен дозаны тағайындайды немесе осындай әсерлер тудырмайтын препаратты таңдап алады және сіздің жай-күйіңізді тұрақты бақылап отырады. Педиатрияда қолдану Клеримед препараты 18 жасқа толмаған пациенттерге қолданылмауы тиіс. Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері Құрысулар, бас айналу, елестеулер, сананың шатасуы, бағдардан жаңылу сияқты жүйке жүйесі тарапынан жағымсыз реакциялардың даму мүмкіндігін ескеріп, көлік құралын басқару немесе аса қауіпті механизмдермен жұмыс істеу кезінде сақ болу қажет.

Жүктілік: кларитромициннің жүкті әйелдер үшін қауіпсіздігі зерттелмеді, сәбидің жатыр ішінде дамуына жайсыз әсер ету мүмкіндігі жоққа шығарылмайды. Жоғарыда атап көрсетілгенінің бәрін ескеріп, дәрігердің тағайындауынсыз жүкті әйелдерде, әсіресе, жүктіліктің алғашқы үш айында кларитромицин қолдану ұсынылмайды. Бала емізу: кларитромицин емшек сүтімен бөлінеді. Емшекпен қоректену кезеңіндегі балалар үшін кларитромицин қолдану қауіпсіздігі анықталмады.

Төменде атап көрсетілген препараттарды қолдану, осы өзара әрекеттесудің ауыр зардаптарының даму мүмкіндігіне орай, қатаң түрде қарсы көрсетілімді. Клеримед препаратын цизаприд, домперидон, пимозид, терфенадин, астемизолмен бір мезгілде қолдану қарсы көрсетілімді, өйткені бұл жүрек ырғағының ауыр бұзылуларына (өмірге зор қауіпті жүрек соғуының едәуір жиілеу ұстамаларына) әкелуі мүмкін. Эрготаминмен немесе дигидроэрготаминмен бір мезгілде қолдану осы препараттардың жедел уытты әсерін туғызуы мүмкін, бұл тамырлар түйілуімен, орталық жүйке жүйесін қоса, аяқ-қолда және басқа ағзаларда қан айналымының бұзылуымен көрініс береді. Пероральді мидазоламмен бір мезгілде қабылдау, мидазолам әсерінің күшеюі мүмкін екеніне орай, қарсы көрсетілімді. Ловастатин немесе симвастатинмен бір мезгілде қолдану қарсы көрсетілімді, өйткені, ауыр түрін қоса, атрофия мен бұлшықеттер ыдырауы қаупі артады. Егер осы препараттар қажет болса, дәрігер ең төмен дозасын тағайындайды немесе осындай әсерлер тудырмайтын препаратты таңдап алады және сіздің жай-күйңізді тұрақты бақылап отырады. Клеримедті құрамында ломитапид бар дәрілермен бір мезгілде қабылдамаңыз. Клеримед препаратының әсеріне басқа дәрілік препараттардың ықпалы. Рифампицин, фенитоин, карбамазепин, фенобарбитал, шайқурай препараттары сияқты дәрілік препараттар Клеримед препаратының тиімділігін төмендетуі мүмкін. Рифабутин мен Клеримед препаратын бір мезгілде қолдану көздің тамырлы торқабығының қабынуын (увеит) дамытатын жоғары қауіппен рифабутин әсерінің күшеюіне және Клеримед препараты әсерінің төмендеуіне әкелуі мүмкін. Гидроксихлорохин немесе хлорохинон (ауруларды, соның ішінде ревматоидты артритті емдеу немесе безгекті емдеу немесе алдын алу үшін қолданылады). Бұл дәрі-дәрмектерді кларитромицинмен бір мезгілде қабылдау жүрек ыpғағының бұзылу ықтималдығын және жүрекке әсер ететін басқа да ауыр жанама әсерлерді арттыруы мүмкін. Инъекция немесе ингаляция арқылы ішке енгізілетін кортикостероидтер (дененің иммундық жүйесін басу үшін қолданылады- бұл көптеген ауруларды емдеуде пайдалы) Клеримед препаратының әсеріне ықпал ете алатын немесе ықпал ету мүмкіндігі жорамалданатын преапараттар. Эфавиренз, невирапин, рифампицин, рифапентин және этравирин сияқты препараттар Клеримед препаратының тиімділігіне ықпал етуі мүмкін. Флуконазолмен бір мезгілде қолданғанда Клеримед препаратының дозасын өзгерту қажет емес. Ритонавирмен қолданғанда бүйрек функциясының орташа айқын бұзылуында Клеримед препаратының дозасын 50% (күніне 1 таблетка – ең жоғары дозасына дейін) азайтады. Бүйрек функциясының ауыр бұзылуында Клеримед 500 мг таблеткаларда тағайындалмайды. Клеримед препаратының 1г/күннен асатын тәуліктік дозалары ритонавирмен бір мезгілде және ритонавирді, атазанавир мен саквинавирді қоса, АИТВ инфекциясын емдеуге арналған басқа препараттармен бір мезгілде қолданғанда (бүйрек функциясының төмендеуінде) қолданылмайды. Клеримед препаратының басқа препараттар әсеріне ықпалы. Клеримед препаратымен бір мезгілде қолдану мына препараттармен: альпразолам, астемизол, карбамазепин, цилостазол, цизаприд, циклоспорин, дизопирамид, қастауыш алкалоидтары, ловастатин, метилпреднизолон, мидазолам, омепразол, пероральді антикоагулянттар (мысалы, варфарин дабигатран, ривароксабан, апиксабан, эдоксабан), психозға қарсы атипті препараттар (мысалы, кветиапин), пимозид, хинидин, рифабутин, силденафил, симвастатин, сиролимус, такролимус, терфенадин, триазолам және винбластинмен, сондай-ақ фенитоин, теофиллин және вальпроатпен бір мезгілде қолданғанда олардың әсерін ұзартуы және жағымсыз реакциялардың даму қаупін арттыруы мүмкін. Хинидин немесе дизопирамидпен бір мезгілде қолданғанда жүрек жиырылуының айқын жиілеуі болуы мүмкін, сондықтан дәрігердің ЭКГ бақылауын тағайындауына болады. Пероральді қант төмендететін препараттар/инсулин: натеглинид және репаглинид сияқты кейбір қант төмендететін препараттармен бір мезгілде қолданғанда қандағы глюкоза деңгейінің айқын төмендеуіне орай ауыр жай-күй дамуы мүмкін, сондықтан осы жағдайларда қандағы глюкоза деңгейін мұқият бақылап отыру ұсынылады. Омепразол әсері бір мезгілде қолданғанда күшеюі мүмкін. Клеримедпен бір мезгілде қолданғанда силденафил, тадалафил, варденафил, теофиллин, карбамазепин және толтеродин әсері күшеюі мүмкін, бұл олардың дозасын азайтуды талап етуі мүмкін. Клеримед препаратымен бір мезгілде қолданғанда пероральді мидазолам әсерінің күшеюіне орай, осы біріктірілімнен сақтану керек. Мидазоламды вена ішіне енгізу, дозаны түзету қажет болуы мүмкін екендіктен, дәрігердің бақылауымен жүргізіледі. Дәл осы алдын ала сақтану шаралары триазолам мен алпразоламға да қолданылады. Темазепам, нитразепам, лоразепам үшін Клеримед препаратымен елеулі өзара әрекеттесу ықтималдығы аз. Осы препараттармен бір мезгілде қолданғанда орталық жүйке жүйесі тарапынан жағымсыз әсерлер болуы мүмкін, өйткені триазолам ұйқышылдық пен сананың шатасуын тудырды. Дәрілік өзара әрекеттесулердің басқа түрлері Колхицин, фенитоин және вальпроат әсерінің күшеюі мүмкін. Жүрек ырғағының өлімге ұшырататын бұзылуларын қоса, дигоксин әсерінің күшеюі мүмкін. Клеримед препаратымен бір мезгілде қолданғанда зидовудин әсері төмендеуі мүмкін, сондықтан осы екі препаратты қабылдау арасында кемінде 4 сағат үзілісті қадағалау қажет. Екі бағытты дәрілік өзара әрекеттесулер Атазанавирмен бір мезгілде қолданғанда кларитромицин мен атазанавир әсерінің күшеюі білінеді, сондықтан орташа айқын және ауыр бүйрек ауруында Клеримед препаратының дозасы төмендетіледі. Амлодипин, дилтиазем, верапамилмен бір мезгілде қолданғанда жағымсыз әсерлері (қан қысымының төмендеуі, сирек жүрек жиырылуы және т.б. түрінде) дамуы мүмкін. Бір мезгілде қолданғанда саквинавир мен Клеримед препаратының әсері күшеюі мүмкін. Саквинавирді ритонавирмен бірге қолданғанда Клеримед әсерінің айқын күшеюі болуы мүмкін. Бір мезгілде қолданғанда итраконазол мен Клеримед препараты әсерінің күшеюі болуы мүмкін, бірақ, әдетте бұл дозаны өзгертуді талап етпейді. Клеримед препараты ұрықтануға қарсы пероральді дәрілер әсеріне ықпал етпейді.

Сақтау мерзімі 3 жыл Жарамдылық мерзімі өткеннен кейін қолдануға болмайды! Сақтау шарттары Құрғақ, жарықтан қорғалған жерде, 25 °С-ден аспайтын температурада сақтау керек. Балалардың қолы жетпейтін жерде сақтау керек!