Клодифен гель 5 %

100 г гельдің құрамында белсенді зат – натрий диклофенагы 5.0 г, қосымша заттар: этанол 96%, пропиленгликоль, гидроксиэтилцеллюлоза, метилпарагидроксибензоат, тазартылған су. Сыртқы түрінің, иісінің, дәмінің сипаттамасы Бір текті, көпіршіктері жоқ, иісі аздап спиртке ұқсас, мөлдір түссіз немесе аздап сарғыш гель.

Ересектердегі, жасөспірімдер мен 12 жастағы және одан асқан балалардағы ауырсынуды, қабынуды және ісінуді жергілікті емдеу: • спорттық жаттығу немесе жазатайым оқиға нәтижесінде созылу және арқаның ауыруы, терінің тұтастығы бұзылмаған (көгеру, созылу, орнынан таю) сіңірлердің, байламдардың, бұлшықеттер мен буындардың жарақаттық (оның ішінде спорттық) зақымдануында; • ревматизмнің жергілікті түрлерінде: тендинитте («теннистік шынтақ» деп аталады), қолдың альгодистрофиялық синдромында («иық-қол» синдромы), бурситте, периартритте; • теріге жақын орналасқан шеткері буындардың остеоартроздарында (мысалы, тізенің немесе саусақтың).

Диклофенак қабынуға қарсы және анальгетикалық қасиеттері бар стероидты емес дәрілік зат болып табылады. Диклофенактың әсер ету механизмі простагландиндердің синтезін тежеу болып табылады, нәтижесінде қабыну кезінде ауырсыну, ісіну және температура төмендейді. Диклофенак аденозиндифосфатты (АДФ) және тромбоциттердің коллагенге тәуелді агрегациясын қайтымды тежейді.

Дозалау режимі Ересектер, жасөспірімдер мен 12 жастан асқан балаларға күніне 2 рет (таңертең және кешке) дененің ауырсынатын жерлеріндегі теріге аздап ысқылап жағады. Пациенттердің ерекше топтары 12 жасқа дейінгі балалар 12 жасқа дейінгі балалардағы натрий диклофенагының қауіпсіздігі мен тиімділігі қазіргі уақытта анықталған жоқ. Клодифен гель препаратын пациенттердің осы санатында қолдану ұсынылмайды. Егде жастағы пациенттер Ересектер үшін әдеттегі тәуліктік дозаны қолдануға болады. Бүйрек және бауыр жеткіліксіздігі бар пациенттер Жүйелік қолжетімділіктің төмендігіне байланысты дозаны түзету талап етілмейді. Енгізу жолы және тәсілі Өңделетін аумақтың өлшеміне байланысты 2-4 грамм препаратты (шие немесе грек жаңғағы көлеміндей гель мөлшерін 400-800 см2 тері аумағына қолдану үшін жеткілікті) күніне 2 рет (дұрысы таңертең және кешке) абайлап ысқылап жағып қолдану керек. Препаратты қолданғаннан кейін алдымен қолыңызды құрғақ қағаз сүлгімен сүртіп, содан кейін жуу ұсынылады (саусақты емдеуді қоспағанда). Пайдаланылған қағаз сүлгіні тұрмыстық қоқыспен бірге утилизациялау керек. Себезгі немесе ванна қабылдағанға дейін пациент теріге қолданылатын препараттың кепкенін күтуі керек. Егер препаратты қолдануды бастағаннан кейін 7 күн ішінде жағдайдың жақсаруы байқалмаса немесе жағдай нашарласа, ауырсынудың басқа ықтимал себебін болдырмау үшін дәрігермен кеңесу керек. Дәрілік препаратты қолдану тәсілін түсіндіру үшін медицина қызметкерінің кеңесіне жүгіну бойынша нұсқаулар Дәрілік препаратты қолдану туралы сұрақтар туындаған жағдайда дәрігермен немесе фармацевтпен кеңесу керек.

• әсер етуші затқа немесе қосымша заттардың кез келгеніне аса жоғары сезімталдық • анамнезінде ацетилсалицил қышқылына және басқа қабынуға қарсы стероидты емес дәрілерге (мысалы, ибупрофен) бронх демікпесі, ангионевроздық ісіну, есекжем немесе жедел ринит сияқты аса жоғары сезімталдық реакциялары • жүктіліктің үшінші триместрі • 12 жасқа дейінгі балалар • терінің ашық зақымдануы, терінің қабыну немесе инфекциялық аурулары, экзема Клодифен гель препараты шырышты қабықтарға жағуға арналмаған.

Жиі • бөртпе, экзема, эритема, дерматит (оның ішінде жанаспалы), қышыну Сирек • буллезді дерматит Өте сирек • Квинке ісінуі • аса жоғары сезімталдық реакциялары (есекжемді қоса) • демікпе • іріңді бөртпе (пустулезді бөртпе) • фотосезімталдық реакциялары Ішке қабылдауға арналған диклофенак препараттарымен салыстырғанда жүйелі жағымсыз әсерлердің пайда болу ықтималдығы өте төмен. Егер Клодифен гель препараты дененің үлкен аумақтарына және ұзақ уақыт бойы қолданылса, онда жүйелі жағымсыз әсерлердің көрінісін жоққа шығаруға болмайды. Мұндай жағдайларда диклофенактың пероральді түрі туралы ақпаратты ескеру қажет. Жағымсыз дәрілік реакциялар туындаса медицина қызметкеріне, фармацевтика қызметкеріне немесе дәрілік препараттардың тиімсіздігі туралы хабарламаларды қоса, дәрілік препараттарға жағымсыз реакциялар (әсерлер) бойынша ақпараттық деректер базасына тікелей хабарласыңыз Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

Препараттың артық дозалануы екіталай, өйткені жергілікті қолданған кезде диклофенак жүйелі қан ағымына аз мөлшерде енеді. Препаратты кездейсоқ ішке қабылдаған кезде (бір сықпада 2,25 г диклофенак натрий бар) жағымсыз реакциялар дамуы мүмкін, олар диклофенактың пероральді түрлерінің артық дозалануымен байқалады. Егер (мысалы, балаларда) препаратты дұрыс қолданбау немесе кездейсоқ қабылдау нәтижесінде айқын жүйелік жағымсыз реакциялар пайда болса, онда улануды емдеу үшін әдеттегі шаралар қолданылады. Асқазанды шаю және белсендірілген көмірді қолдану туралы мәселені, әсіресе егер дәрілік затты қабылдаған сәттен бастап аз уақыт өтсе, қарастыру керек.

Клодифен гель препаратын тек сау тері аймақтарына жағу керек. Препаратты жараларға немесе ашық зақымданулары бар тері аймақтарына қолдануға болмайды. Арнайы ескертулер Препаратты ұзақ уақыт бойы тері беткейінің үлкен аймағына қолданған жағдайда, жүйелі жағымсыз реакциялардың даму қаупін жоққа шығаруға болмайды (жүйелік әсерлері туралы ақпарат қамтылған диклофенактың оральді түрлерін медициналық қолдану жөніндегі тиісті нұсқаулықты қараңыз). Дәрілік заттарды қолданған кезде гельдің көзге немесе шырышты қабықтарға түсуіне жол бермеу үшін абай болу керек. Клодифен гель препаратын ішке қабылдауға болмайды. Егер препаратты қолданғаннан кейін теріде бөртпе пайда болса, оны қолдануды тоқтату керек. Клодифен гель препаратын окклюзиялық емес таңғыштардың астында қолдануға болады және ауа өткізбейтін окклюзиялық таңғыштардың астында қолдануға болмайды. Егер препаратпен емдеуді бастағаннан кейін 3 күн ішінде жағдай жақсармаса, пациент дәрігермен кеңесу керек. Қосымша заттар Клодифен гель препараттың құрамында аллергиялық реакциялар (оның ішінде кешеуілдеген) тудыруы мүмкін метилпарагидроксибензоат бар. Клодифен гель препараттың құрамында теріні тітіркендіретін пропиленгликоль бар. Балалар мен жасөспірімдер Клодифен гель препаратты пациенттердің берілген санатында препаратты қолдану туралы деректердің болмауына байланысты балалар мен жасөспірімдерде қолдану ұсынылмайды.

Жүктілік Егер сіз жүкті болсаңыз немесе бала емізетін болсаңыз, жүкті бола аламын деп ойласаңыз немесе балалы болуды жоспарласаңыз, осы препаратты қабылдамас бұрын дәрігеріңізбен немесе фармацевтпен кеңесіңіз. Егер сіз жүктіліктің соңғы 3 айында болсаңыз, Клодифен гель препаратын қолданбаңыз. Клодифен гель препаратын жүктіліктің алғашқы 6 айында дәрігердің нақты қажеттіліксіз және дәрігеріңіздің ұсынымдарынсыз қолдануға болмайды. Егер сізге осы кезең аралығында емдеу қажет болса, ең төменгі дозаны мүмкіндігінше анағұрлым қысқа уақыт ішінде қолдану керек. Диклофенактың пероральді түрлері (мысалы, таблеткалар) сіздің туылмаған балаңызда жағымсыз әсерлер туындатуы мүмкін. Клодифен гель препаратын теріге қолданған кезде осындай қауіптің бар-жоғы белгісіз. Лактация Бала емізу кезінде Клодифен гель препаратын қолдануға болмайды. Дәрігердің нұсқауы бойынша Клодифен гель препаратын қолданған кезде кеуде аймағына, терінің үлкен аумағына және ұзақ уақыт бойы қолдануға болмайды. Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері Жергілікті қолданған кезде препарат көлік жүргізу және механизмдерді басқару қабілетіне әсер етпейді.

Жергілікті қолданған кезде диклофенак жүйелі қан ағымына аз ғана енеді, сондықтан препаратты қолданған кезде дәрілік өзара әрекеттесу күтілмейді.

Сақтау мерзімі 3 жыл Жарамдылық мерзімі өткеннен кейін қолдануға болмайды! Сақтау шарттары 25°С-ден аспайтын температурада сақтау керек. Балалардың қолы жетпейтін жерде сақтау керек!