Клоназепам таблетки 2 мг

Бір таблетканың құрамында белсенді зат – клоназепам 2.0 мг, қосымша заттар: картоп крахмалы, күріш крахмалы, натрий карбоксиметилкрахмалы (А типі), желатин, полисорбат 80, натрий лаурилсульфаты, тальк, магний стеараты, лактоза моногидраты. Сыртқы түрінің, иісінің, дәмінің сипаттамасы Дөңгелек пішінді, екі беті жайпақ, ақтан ашық крем түстіге дейінгі, таблетканы төрт бөлікке бөлетін крест тәрізді сызығы бар, шеттері бүтін, сызатсыз таблеткалар.

Клоназепамды ересектер мен балаларда монотерапия ретінде немесе басқа эпилепсияға қарсы дәрілермен біріктіріп қолдануға болады: • жайылған эпилепсиялық ұстамаларды (клонустық, тонустық, тонусты-клонустық, абсанстар, миоклонустық, атониялық, балалардағы түйілулер) емдеу • Леннокс-Гасто синдромы • парциальді эпилепсиялық ұстамаларды (салдарлы жайылған немесе онсыз парциальді ұстамалар) емдеу. Балалардағы түйілу (оның ішінде Веста синдромы) және тонусты-клонустық ұстамалар жағдайында Клоназепам препараты тек қосымша ем ретінде немесе басқа дәрілік препараттарға реакция болмаған кезде қолданылады. Күнделікті тіршілік мәселелеріне байланысты болатын жүйке ширығуы және мазасыздық жай-күйлері дәрілік препаратты қолдануға көрсетілім болып табылмайды. Асқынуларды болдырмау үшін препаратты қатаң түрде дәрігер тағайындауымен қабылдау керек.

Әсер ету механизмі Клоназепам бензодиазепин туындылары тобына жатады. Орталық жүйке жүйесінің көптеген құрылымына - ең алдымен лимбиялық жүйеге және гипоталамусқа, яғни эмоционалдық қызметті реттеуге байланысты құрылымға әсер етеді. Барлық басқа да бензодиазепиндер сияқты, ол ми қыртысының, гипокамптың, мишықтың, жұлын бағанының және орталық жүйке жүйесінің басқа құрылымдарының ГАМҚ-ергиялық нейрондарының тежегіш әсерін күшейтеді. Осының салдары әртүрлі топтағы: норадренергиялық, холинергиялық, допаминергиялық және серотонинергиялық нейрондардың белсенділігінің азаюы болып табылады. Бензодиазепиндердің спецификалық байланысу бөліктері бары, оның ГАМҚ-А рецепторларынан және хлорлық өзекшелерден тұратын кешенмен байланысы бар ақуыз құрылымды жасушалық жарғақшадан тұратыны анықталған. Клоназепамның әсер етуі эндогенді тежегіш нейромедиаторлар болып табылатын осы рецептордың гамма-аминмай қышқылына (ГАМҚ) тектестігі артуына әкеп соқтыратын ГАМҚ-ергиялық рецептор сезімталдығының модуляциясына байланысты. Бензодиазепиндік рецептордың немесе ГАМҚ-А-ның белсенділенуінің салдары хлор өзегі арқылы нейрон ішінде хлор иондарының тасымалдануы болып табылады, ол жасушалық жарғақшаның гиперполяризациясына, соның нәтижесінде нейрон белсенділігінің (яғни нейромедиаторлардың босап шығуы) бәсеңдеуіне әкеп соқтырады. Клиникалық тұрғыдан клоназепамның құрысуға қарсы, анксиолитикалық, тыныштандыратын және айқындығы орташа ұйықтататын әсері бар, қаңқа бұлшықеттерінің тонусын төмендетеді. Клоназепам құрысудың басталу шегін жоғарылатады және жайылған құрысу ұстамаларының пайда болуына жол бермейді. Жайылған құрысу ұстамаларының, сондай-ақ парциальді құрысу ұстамаларының ағымына қолайлы әсер етеді.

Клоназепам препаратын әрқашанда дәрігер нұсқауларына сәйкес қабылдау керек. Күдік болған жағдайда дәрігерге жүгіну керек. Таблеткалардағы крест тәрізді сызық таблетканы 2 немесе 4 бірдей бөлікке бөлуге мүмкіндік береді. Дозалану режимі Дозаны пациенттің көтере алуына және клиникалық реакциясына байланысты жекелей анықтау қажет. Бастапқы дозалары Жағымсыз реакцияларды болдырмау үшін емдеуді төмен тәуліктік дозалардан бастайды, мысалы: Балалар (≤10 жас немесе ≤30 кг дене салмағы): тәулігіне 0,01 мг/кг-ден тәулігіне 0,05 мг/кг дейін. Балалар (>10 жас немесе >30 кг дене салмағы): тәулігіне екі рет 0,25 мг. 13-18 жастағы жасөспірімдер және ересектер: тәулігіне екі рет 0,5 мг. Дозаны демеуші, тәуліктік дозасы анықталғанға дейін 2-4 апта емдеу барысында бірте-бірте арттыру қажет. Демеуші дозалары Жас ерекшелігіне байланысты, төменде келтірілген дозалар демеуші емдеу үшін қолданылуы мүмкін. 10 жасқа дейінгі немесе дене салмағы 30 кг болатын балалар үшін демеуші доза тәулігіне 0,1-ден тәулігіне 0,2 мг/кг дейін құрайды. Балалар (>10 жас немесе >30 кг дене салмағы): 3-6 мг. Жасөспірімдер (13-18 жас) және ересектер: 4-8 мг. • Тәуліктік дозаны бірдей уақыт аралықтарында қолданылатын 3 немесе 4 бөлікке бөлу керек. Қажет болса дозаны біртіндеп арттыруға болады. • Ересектер үшін ең жоғары демеуші тәуліктік доза 20 мг-ден аспауға тиіс. • Клоназепам қолдануды күрт тоқтатуға болмайды. Препаратты бірте-бірте тоқтату қажет. Пациенттердің ерекше топтары Егде жастағы пациенттер Егде жастағы пациенттер әсіресе орталық жүйке жүйесіне бәсеңдететін әсер беретін дәрілік заттарға сезімтал. Осы жас тобында құлауға және жарақаттарға әкелуі мүмкін бағдарлаудың және қимыл үйлесімінің бұзылуы жиі байқалатынына байланысты, бұл пациенттер үшін мүмкін болатын ең аз дозасы ұсынылады. Бауыр функциясы бұзылған пациенттер Бензодиазепиндерді және ұқсас әсерлі препараттарды бауырдың ауыр жеткіліксіздігі бар пациенттерге қолдану ұсынылмайды. Бауыр функциясы ауырлығы жеңіл және орташа дәрежеде бұзылған пациенттерге мүмкін болатын ең төмен дозаны тағайындау керек. Бүйрек функциясы бұзылған пациенттер Клоназепамды бүйрек функциясының бұзылулары бар пациенттерде қолданғанда сақтық таныту керек. Клоназепамның бүйрек жеткіліксіздігі бар пациенттердегі қауіпсіздігі мен тиімділігі зерттелмеген, бірақ, фармакокинетикалық пайымдаулар негізінде, мұндай пациенттерде дозаны түзету қажет емес. Дозалануын дәрігер зақымданған ағзаның жеткіліксіздік дәрежесіне байланысты жеке анықтайды. Демеуші ем Демеуші ем кезінде пациенттің жасын ескеріп, жоғарыда келтірілген дозалану жөніндегі ұсынымдарды пайдалану керек. Тәуліктік доза күні бойы 3-4 қабылдауға бөлінуге тиіс; қажет болса оларды арттыруға болады. Егер ем уақытында пациентке препарат әсері тым күшті немесе тым әлсіз болып көрінсе, ол дәрігерге қаралуы тиіс. Енгізу әдісі және жолы Таблеткаларды ішке, аздаған мөлшердегі сумен ішу арқылы қабылдау керек. Емдеу ұзақтығы Емнің ұзақтығы пациенттің жай-күйіне байланысты. Егер клоназепамды бірнеше күн бойы қолданудан кейін жақсару байқалмаса дәрігерге қаралу керек. Дәрілік препаратты қолдану тәсілін түсіну үшін медицина қызметкерінен кеңес алуға бару жөнінде нұсқаулар Клоназепам препаратын пайдаланар алдында препаратты қолдану тәсілін түсініп алу үшін медицина қызметкерінің кеңесіне жүгіну ұсынылады.

‒ бензодиазепиндерге немесе қосымша заттарының кез келгеніне аса жоғары сезімталдық; ‒ тыныс алудың ауыр жеткіліксіздігі; ‒ түнгі апноэ ұстамалары, балаларда жұтынудың бұзылуы; ‒ бауырдың ауыр (жедел немесе созылмалы) жеткіліксіздігі (энцефалопатияның пайда болу қаупі); ‒ миастения; ‒ жедел порфирия; ‒ жабық бұрышты глаукома; ‒ алкогольмен, есірткілік анальгетиктермен және ұйықтататын дәрілік заттармен улану; ‒ анамнездегі дәріге тәуелділік; ‒ тұқым қуалайтын галактоза жақпаушылығы, Lapp-лактаза ферменті тапшылығы, глюкоза-галактоза мальабсорбциясы; ‒ жүктілік және бала емізу кезеңі.

Жағымсыз әсерлердің саны және айқындығы пациенттің жеке сезімталдығына және дозаға байланысты болады. Жиі ‒ нистагм; ‒ зейін қоюдың бұзылуы; ‒ ұйқышылдық, реакцияның баяулауы; ‒ бас айналуы; ‒ бұлшықет гипотониясы; ‒ атаксия; ‒ жалпы әлсіздік, естен тану. Сирек ‒ тромбоцитопения; ‒ терінің аллергиялық реакциялары (бөртпе, қышыну, есекжем); ‒ шаштың өткінші түсуі, пигментация өзгерістері; ‒ депрессия (негізгі аурумен де байланысты болуы мүмкін); ‒ либидо бұзылулары; ‒ бас ауыруы; ‒ жүрек айну, диспепсиялық құбылыстар, ауыздың құрғау сезімі; ‒ жағымсыз дәм; ‒ аминотрансфераза белсенділігінің елеусіз жоғарылауы; ‒ сарғаюмен қатар жүретін бауыр функциясының бұзылулары; ‒ несепті ұстай алмау; ‒ белсіздік. Өте сирек ‒ анафилаксиялық реакциялар; ‒ жайылған ұстама Белгісіз ‒ аллергиялық реакциялар; ‒ парадокстық реакциялар – психомоторлық мазасыздық, ұйқысыздық, қозу және озбырлық, ашушаңдық, өшпенділік, ұйқының бұзылуы, қорқынышты түстер көру, тұлғалық бұзылу, бұлшықет треморы, мазасыздық, ұйқының бұзылуы, сандырақтау, ашу-ыза, қорқыныштар және әдеттен тыс түстер көру, елестеулер, психоздар, аса жоғары белсенділік, орынсыз мінез-құлық және басқа мінез-құлық бұзылыстары, құрысулар (жаңа типтері). Парадоксалды реакциялар көбінесе алкоголь тұтынғаннан кейін, егде жастағы пациенттерде, балаларда және психикалық аурулары бар пациенттерде байқалады; ‒ тәбеттің болмауы; ‒ сананың шатасуы және бағдардан адасу, жүріс-тұрыс пен қимыл үйлесімінің бұзылуы (атаксия). Кейде басқа бензодиазепиндерді, әсіресе үлкен дозаларда қабылдаудан кейінгі жағдайдағыдай, түсініксіз сөйлеумен және дұрыс айтпаумен дизартрия, еске сақтаудың бұзылуы дамуы мүмкін. Антероградтық амнезия және амнезиялық әсерлер, олар оғаш мінез-құлықпен байланысты болуы мүмкін, эпилепсияның кейбір түрлерінің жиілігі артуы. Бұл әсерлер көбінесе емдеудің басында, егде жастағы пациенттерде байқалады және, әдетте, емнің жалғасу барысында жоғалады. Осы реакциялар күшейген жағдайда, дозаны тиісінше азайту әдетте олардың айқындығы мен жиілігін төмендетеді; ‒ артериялық қан қысымының елеусіз төмендеуі; ‒ анық көрмеу, диплопия; ‒ жүрек жеткіліксіздігі, жүрек тоқтауын қоса; ‒ тыныс алу орталығының бәсеңдеуі. Манипуляциядан кейінгі жарақаттар, уыттану және асқынулар Белгісіз: бензодиазепиндерді қабылдаған пациенттерде құлау және сынулар туралы хабарламалар бар. Қауіп егде жастағы адамдарда, сондай-ақ седативті заттарды (оның ішінде алкогольдік сусындар) бір уақытта қабылдайтын адамдарда ұлғаяды. Зертханалық және аспаптық деректер Сирек жағдайларда тромбоциттер санының азаюы байқалуы мүмкін. Басқа бензодиазепиндердегі сияқты, қан көрінісі өзгеруінің бірлі-жарым жағдайлары және бауыр сынамаларының нәтижелеріне ықпалы туралы хабарланды. Тәуелділік және тоқтату симптомдары Асқынбаған порфириясы бар пациенттерде қолданылатын Клоназепам эпилепсия ұстамаларына сирек түрткі болды. Педиатриялық популяция Эндокриндік бұзылулар Балаларда екіншілік жыныстық белгілердің мезгілінен бұрын қайтымды дамуының (мезгілінен бұрын толық емес жыныстық жетілу) жекелеген жағдайлары туралы хабарланды. Сілекейдің шамадан тыс бөлінуі және тыныс алу жолдарында секреттің шамадан тыс өндірілуі, әсіресе емшек еметін және ерте жастағы балаларда. Кейбір пациенттерде Клоназепам препаратын қолдану уақытында басқа да жағымсыз әсерлер туындауы мүмкін. Жоғарыда аталған немесе кез келген бұл нұсқаулықта көрсетілмеген басқа жағымсыз құбылыстар пайда болған жағдайда олар туралы дәрігерге хабарлау керек. Жағымсыз дәрілік реакциялар туындағанда медициналық қызметкерге, фармацевтикалық қызметкерге немесе, дәрілік препараттардың тиімсіздігі туралы хабарламаларды қоса, дәрілік препараттарға болатын жағымсыз реакциялар (әсерлер) жөніндегі ақпараттық деректер базасына тікелей хабарласу керек: Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

Симптомдары: ұйқышылдық, бағдарсыздық жағдайы, түсініксіз сөйлеу, ал ауыр жағдайларда есін жоғалту, кома (бірнеше сағатқа созылуы мүмкін). Клоназепам мен алкогольді, немесе клоназепам және орталық жүйке жүйесін бәсеңдететін басқа да дәрілік препараттарды бір уақытта қолданудан туындаған улану өмірге қауіпті болуы мүмкін. Емі: мүмкіндігінше жылдамырақ құстыру керек (есін жоғалтпаған жағдайда) және дәрігерге қаралу керек. Ең алдымен, симптоматикалық, организмнің негізгі тіршілік функцияларына (тыныс алу, жүрек қағысы, артериялық қысым) мониторинг жасауға және демеуге негізделеді. Атап айтқанда, пациенттерге жүрек-қантамыр, тыныс алу және орталық жүйке жүйесі тарапынан бұзылулар кезінде симптоматикалық емдеу жүргізу қажет болуы мүмкін. Дәрілік препараттың одан әрі сіңуін тиісті тәсілмен болдырмауға болады, мысалы, егер бұл қарсы көрсетілімді болмаса, 1-2 сағаттың ішінде белсендірілген көмір енгізу арқылы. Ұйқышылдық жағдайындағы пациенттерге белсендірілген көмірді қолданған кезде тыныс алу жолдарының өткізгіштігін қамтамасыз ету керек. Әртүрлі субстанцияларды қабылдаған жағдайда асқазанды шаю мүмкіндігін қарастыруға болады, алайда бұл стандартты емшара болмауға тиіс. ОЖЖ қатты бәсеңдеген жағдайда бензодиазепиндердің антагонистін – флумазенилді (бензодиазепиндік рецептордың бәсекелес тежегішін) енгізуді қарастыру керек. Оны қатаң бақылаумен ғана қолдануға болады. Флумазенилдің жартылай шығарылу кезеңі қысқа (1 сағатқа жуық) болғандықтан, оның әсері аяқталғаннан кейін пациенттер бақылауда болуға тиіс. Құрысу шегін төмендететін дәрілік препараттарды (мысалы, трициклдық антидепрессанттарды) бір мезгілде қабылдағанда флумазенилді үлкен сақтықпен қолдану керек. Ескерту Эпилепсиясы бар, бензодиазепиндерді қабылдаған пациенттерге бензодиазепиндердің антагонистін (флумазенилді) қолдану ұсынылмайды, ОЖЖ ауыр депрессия жағдайларын және мұқият мониторинг жағдайын қоспағанда. Бензодиазепиндер әсерінің флумазенилмен антагонизмі құрысулардың пайда болуына жағдай жасауы мүмкін. Препаратты ұсынылғаннан үлкен дозада қабылдаған жағдайда дереу дәрігерге қаралу керек. Дәрілік препараттың бір немесе бірнеше дозаларын өткізіп алғанда қажет болатын шаралар Егер препарат дәл тағайындалған уақытында қабылданбаса, оны мүмкіндігінше тез қабылдау керек (егер препаратты кезекті қабылдау уақытына дейін әлі уақыт жеткілікті болса) немесе препаратты тұрақты қабылдауды жалғастыра беру керек. Өткізіп алғанның орнын толтыру мақсатымен екі есе дозаны қабылдауға болмайды.

Таблеткаларды аз мөлшердегі сумен іше отырып, ішке қабылдау керек. Дәрігер емді барынша аз мөлшердегі тиімді дозаларды, тәулігіне 3-4 рет (емдеудің бастапқы кезеңінде) қолданудан бастап, оларды біртіндеп әрбір 3 күн сайын тиісті емдік әсерге немесе ең жоғары тәуліктік дозаға жеткен кезге дейін ұлғайтып отыруға тиіс. Егер препаратты бірдей дозаларда қолдану мүмкін болмаса, үлкен дозасын ұйықтар алдында қабылдау керек. Тиімді демеуші доза анықталғаннан кейін препаратты бір реттік тәуліктік дозада ұйықтар алдында қабылдауға болады. Препаратты дәрігердің бақылауымен, біртіндеп тоқтату керек. Клоназепамды қолдануды күрт тоқтатқанда тоқтату синдромы туындауы мүмкін. Әсіресе ұзақ уақыт бойы жүргізілген емнің немесе препараттың үлкен дозаларын талап ететін емнің күрт тоқтатылуы ерекше қауіпті болып табылады. Тоқтату синдромы онда айқынырақ болады. Препаратты біртіндеп тоқтатуды дәрігер әрбір пациент үшін жеке анықтауы тиіс. Арнайы сақтандырулар Клоназепам препаратын қолданғанда ескерілуі тиіс бензодиазепиндермен және басқа да ұйықтататын препараттармен емдеуде бақыланатын әсерлерге қатысты жалпы ақпарат. Эпилепсияға қарсы препараттарды қолдану, сирек жағдайларда, ұстамалардың күшеюіне немесе пациентте жаңа типті талмалардың пайда болуына түрткі болуы мүмкін. Мұның себебі препаратты дұрыс таңдамау, пациенттегі эпилепсия синдромы немесе эпилепсияға қарсы емдегі өзгерістер, оның фармакинетикалық өзара әрекеттесуі, оның уытылығы немесе артық дозалануы болуы мүмкін. Клоназепамды созылмалы өкпе жеткіліксіздігі бар немесе бүйрек немесе бауыр функциясы нашарлаған пациенттерде, сондай-ақ егде жастағы адамдарда немесе әлсіреуге байланысты сақтықпен пайдалану керек. Бұл жағдайларда дозасы әдетте төмендетілуі тиіс. Толеранттылық Бензодиазепиндерді немесе әсері осыған ұқсас препараттарды, оның ішінде клоназепамды, бірнеше апта бойына ұдайы қолдану олардың әсерінің тиімділігі азаюына алып келуі мүмкін. Бауыр жеткіліксіздігі бар пациенттер Бензодиазепиндерді және ұқсас әсері бар препараттарды бауырдың ауыр жеткіліксіздігі бар пациенттерге қолдану ұсынылмайды, өйткені олар бауыр энцефалопатиясының дамуын жеделдетуі мүмкін. Бауыр жеткіліксіздігі бензодиазепиндердің жағымсыз әсерлерінің күшеюіне әкелуі мүмкін. Бауыр функциясы ауырлығы жеңіл және орташа дәрежеде бұзылған пациенттерге мүмкін болатын ең төмен дозаны тағайындау керек. Психоз Бензодиазепиндер психоздық бұзылыстарды бастапқы емдеу үшін ұсынылмайды. Суицидтік ойлар және мінез-құлық Эпилепсияға қарсы дәрілерді бірнеше көрсетілім бойынша қабылдаған пациенттерде суицидтік ойлар мен мінез-құлық туралы хабарланды. Эпилепсияға қарсы препараттар бойынша деректердің метаталдауы да суицидтік ойлар мен мінез-құлық қаупінің аздап жоғарылауын көрсетті. Бұл қауіптің механизмі белгісіз және қолда бар деректер клоназепам үшін қауіптің ұлғаю мүмкіндігін жоққа шығармайды. Сондықтан пациенттер суицидтік ойлар және мінез-құлық белгілерін қадағалауы керек және тиісті ем қарастыру керек. Пациенттерге (және пациенттердің қамқоршыларына) суицидтік ойлар және мінез-құлық белгілері пайда болса медициналық көмекке жүгінуге кеңес беру керек. Депрессия және/немесе өз-өзіне қол жұмсау тарихы бар пациенттер мұқият қадағалауда болуы тиіс. Миастения гравис Клоназепамды миастениясы бар пациенттерге қолдануға болмайды. Алкогольді немесе орталық жүйке жүйесін бәсеңдететін препараттарды бір мезгілде қолдану. Клоназепамды алкогольмен және/немесе орталық жүйке жүйесін бәсеңдететін препараттармен бір мезгілде қолданбау керек, өйткені бұл клоназепамның клиникалық әсерлерін көтермелеуі мүмкін және комаға немесе өлімге дейінгі шамадан тыс седативтік әсерге, сондай-ақ тыныс алудың және/немесе жүрек-қантамыр жүйесінің клиникалық маңызы бар бәсеңдеуіне әкеліп соғуы мүмкін. Дәріге тәуелділік Бензодиазепиндерді немесе әсері осыған ұқсас препараттарды қолдану психикалық және физикалық дәріге тәуелділіктің дамуына алып келуі мүмкін. Дәріге тәуелділік дамуының қаупі доза мен емнің ұзақтығымен бірге ұлғаяды, және алкогольге тәуелділігі бар пациенттерде, сондай-ақ есірткілік және дәрілік заттарға тәуелділігі бар пациенттерде жоғарылай түседі. Дәріге тәуелділік дамыған жағдайда препаратты қолданудың күрт тоқтатылуы тоқтату синдромының туындауына алып келуі мүмкін. Тоқтату синдромының өзіне тән белгілері: бас ауыруы, бұлшықет ауыруы, қозу және эмоционалдық ширығу, қимыл-қозғалыс мазасыздығы, сананың шатасуы және бағдардан адасу жай-күйі, ашушаңдық және ұйқысыздық болып табылады. Ауыр жағдайларда мыналар пайда болуы мүмкін: дереализация, тұлғаның бұзылуы, тактилдік, акустикалық және жарық парестезиясы, «дененің жыбырлауы» сезімі және аяқ-қолдардың ұйып қалуы, жарыққа, дыбысқа және физикалық байланысқа сезімталдықтың жоғарылауы, елестеулер немесе құрысу ұстамалары. Қысқа әсер ететін бензодиазепиндер мен ұқсас әсерлі препараттар жағдайында тоқтату синдромының пайда болуы, тіпті жеке дозаларды қабылдау аралықтарында да, әсіресе егер препарат үлкен дозаларда қабылданса, байқалуы мүмкін екені туралы мәліметтер бар. Жоғарыда көрсетілген симптомдар пайда болған жағдайда дәрігерге көріну керек. Парадоксалды реакциялар Клоназепам препараты, сондай-ақ бензодиазепиндер және осыған ұқсас басқа да препараттар сияқты қимыл-қозғалыс мазасыздығы, қозу, ашушаңдық, сандырақтау, озбырлық, иланғыштық, өшпенділік, шым-шытырық түстер көру, елестеулер, психоздар, сомнамбулизм, тұлғалық бұзылу, айқын ұйқысыздық сияқты парадоксалды реакциялар туындатуы мүмкін. Бұл реакциялар егде пациенттерде, балаларда не болмаса алкогольге тәуелділігі бар пациенттерде едәуір жиі бақыланады. Бұл симптомдар пайда болған жағдайда дәрігерге қаралу керек. Антеградтық амнезия Клоназепам препараты, сондай-ақ бензодиазепиндер және осыған ұқсас басқа да препараттар антеградтық амнезия туындатуы мүмкін. Бұндай жай-күй бәрінен бұрын препаратты жиі, әсіресе үлкен дозаларда қабылдағаннан кейін бірнеше сағаттан соң бақыланды. Егер дәрігер препаратты тәулігіне бір рет қабылдауды тағайындаса, Клоназепам дәрілік препаратымен емделген пациенттер амнезия даму қаупін төмендету үшін препаратты ұйықтар алдында қабылдауы тиіс және үздіксіз 7-8 сағат ұйықтайтын жағдайда болуы тиіс. Апноэ Клоназепамды түнгі апноэ ұстамалары бар пациенттерге қолдануға болмайды. Тыныс алудың созылмалы жеткіліксіздігі бар пациенттер Тыныс алудың созылмалы жеткіліксіздігі бар пациенттерге клоназепамды сақтықпен қолдану керек, өйткені бензодиазепиндердің тыныс алу орталығына бәсеңдеткіш әсері бар екені анықталған. Тыныс алу жеткіліксіздігі кезінде бензодиазепиндердің депрессиялық әсерін ескеру керек (әсіресе мазасыздық пен қозу тыныс алу функциясының декомпенсациясын туғызатын белгілер болуы мүмкін, бұл қарқынды ем бөліміне ауыстыруды негіздейді). Клоназепамның дозасын респираторлық аурулары (мысалы, өкпенің созылмалы обструкциялық ауруы) бар пациенттердің, сондай-ақ орталық жүйке жүйесінің басқа депрессантын немесе эпилепсияға қарсы препаратты бір мезгілде қабылдайтын пациенттердің жеке қажеттіліктерін ескере отырып түзету қажет. Эпилепсия Клоназепамның дозасын орталық әсері бар препараттармен немесе құрысуға қарсы (эпилепсияға қарсы) басқа препараттармен ем қабылдап жүрген пациенттердің жеке қажеттіліктеріне сәйкес мұқият таңдау керек. Клоназепам сияқты құрысуға қарсы препараттарды эпилепсиясы бар пациенттерде күрт тоқтатуға болмайды, өйткені бұл эпилепсиялық статусқа түрткі болуы мүмкін. Дәрігердің пікірі бойынша клоназепамның дозасын азайту немесе оны тоқтату қажеттілігі туған кезде, оны біртіндеп жүзеге асыру керек. Мұндай жағдайда эпилепсияға қарсы басқа дәрілік затпен біріктіріп емдеу көрсетілген. Эпилепсияның кейбір түрлерінде ұзақ емдеу кезінде ұстамалардың жиілігі артуы мүмкін. Жүйке жүйесіне және қаңқа бұлшықеттеріне әсер ететін жағымсыз реакциялар, сондай-ақ қажу, бұлар салыстырмалы түрде жиі кездеседі және әдетте өтпелі, негізінен өздігінен немесе емдеу кезінде дозаны азайтқаннан кейін басылады. Емдеуді бастағанда дозаны баяу арттыру жолымен оларды ішінара болдырмауға болады («Жағымсыз әсері» бөлімін қараңыз). Атап айтқанда, ұзақ емдеген кезде және жоғары дозаларында дизартрия, жүріс-тұрыс пен қимыл үйлесімінің бұзылуы (атаксия) немесе нистагм және көру бұзылыстары (диплопия) сияқты қайтымды бұзылулар туындауы мүмкін. «Рикошет» синдромы Клоназепаммен емдеуді тоқтатқан кезде «рикошет» синдромы – бензодиазепиндерді қолдануға себеп болған симптомдардың күшеюі уақытша пайда болуы мүмкін. Жинақталу қаупі Бензодиазепиндер және ұқсас әсерлі препараттар (басқа да дәрілік препараттар сияқты) организмде жартылай шығарылудың шамамен 5 кезеңі бойы сақталады. Егде жастағы адамдарда немесе бүйрек немесе бауыр жеткіліксіздігі бар адамдарда жартылай шығарылу кезеңі айтарлықтай ұзаруы мүмкін. Көп рет қабылдаған кезде препарат немесе оның метаболиттері тепе-теңдік платосына әлдеқайда кейінірек және әлдеқайда жоғары деңгейде жетеді. Теңгерімдігіне қол жеткеннен кейін ғана препараттың тиімділігін де, қауіпсіздігін де бағалауға болады. Дозаны түзету қажет болуы мүмкін. Апиындық препараттарды бір мезгілде қабылдауға байланысты қауіп Клоназепам дәрілік препараты мен апиындарды бір мезгілде қолдану седацияға, тыныс алудың бәсеңдеуіне, комаға және өлімге әкелуі мүмкін. Жоғарыда аталған қауіпке байланысты бензодиазепиндер сияқты седативтік дәрілерді немесе олардың, мысалы, Клоназепам препараты сияқты туындыларын апиындармен бір мезгілде қолдану олардың жағдайында баламалы емдеу әдістерін қолдану мүмкін болмайтын пациенттер үшін сақталып тұруы тиіс. Егер Клоназепам препаратын апиындармен бір мезгілде тағайындау туралы шешім қабылданса, тиімді дозаның ең азын пайдалану керек, ал емдеу ұзақтығы мүмкіндігінше қысқа болуға тиіс. Пациенттерде тыныстың тарылуы мен седацияның симптомдары мен белгілерін мұқият бақылау қажет. Бұл ретте мұндай симптомдар туралы пациенттерге және оларға күтім жасайтын тұлғаларға (егер қолданылса) мағлұмат беру ұсынылады. Педиатрияда қолданылуы Клоназепам әсіресе нәрестелер мен кішкене балаларда (емшек еметін және ерте жастағы) сілекейдің шамадан тыс бөлінуіне және тыныс алу жолдарынан секреттің шамадан тыс өндірілуіне әкелуі мүмкін. Емдеу кезінде тыныс алу жолдарының өткізгіштігін бақылау керек. Порфирия Асқынбаған порфириясы бар пациенттерде қолданылған клоназепам, сирек эпилепсия ұстамаларына түрткі болған. Сондықтан клоназепамды порфириясы бар пациенттерде сақтықпен қолдану керек. Егде жастағы пациенттер Бұл жас тобында негізінен бағдардың және қимыл-қозғалыс үйлесімінің бұзылуы (құлау, жарақаттар) сияқты жағымсыз әсерлері күшеюіне байланысты клоназепамның азырақ дозаларын қолдану керек. Басқа да жай-күйлер Клоназепамды глаукомасы бар пациенттерде сақтықпен қолдану керек. Глаукомасы бар пациенттер Клоназепам препаратымен емделер алдында окулист-дәрігермен кеңесуі тиіс. Клоназепамды мишық және жұлын атаксиясы бар пациенттерде үлкен сақтықпен қолдану керек. Бүйректің созылмалы жеткіліксіздігі бар пациенттер Клоназепам препаратын қолданар алдында бұл аурулары туралы дәрігерге хабарлауы тиіс. Бензодиазепиндерді және ұқсас әсері бар препараттарды психозы бар пациенттерде қолдану ұсынылмайды. Бензодиазепиндерді және ұқсас әсері бар препараттарды анамнезінде алкогольдік, есірткілік және дәрілік тәуелділігі бар пациенттерге үлкен сақтықпен қолдану қажет. Дағдылану мен психикалық тәуелділіктің даму қаупі бар тобында болғандықтан, бұл пациенттер клоназепамды қабылдау кезінде қатаң бақылауда болуға тиіс. Клоназепаммен ұзақ емдеу кезінде қанға және бауырдың функционалдық сынамаларына ауық-ауық зерттеу (жағындымен жасаумен бірге морфологиялық талдау) жүргізу көрсетілген. Клоназепаммен емдеу кезінде және ол аяқталған соң тағы 3 күн бойы ешқандай спиртті сусындарды тұтынуға болмайды. Препарат құрамында лактоза бар. Клоназепамды лактоза жақпаушылығымен, туа біткен Lapp-лактаза жеткіліксіздігімен немесе глюкоза/галактоза сіңуінің бұзылуымен байланысты сирек тұқым қуалайтын аурулары бар пациенттерге қолдануға болмайды. Тіпті егер жоғарыда келтірілген ескертулер бұрын бақыланған жағдайларға қатысты болса да, дәрігермен кеңесу қажет. Педиатрияда қолданылуы • Оңтайлы дозасы анықталатын уақытқа дейін, балалар құрамында 0,5 мг дозада әсер етуші заты бар таблеткаларды қабылдауға тиіс. Препараттың көлік құралын және қауіптілігі зор механизмдерді басқару қабілетіне әсер ету ерекшеліктері Эпилепсиямен ауыратын пациенттер автокөлікті басқармауға тиіс. Клоназепам препаратымен емдеу уақытында және ол аяқталған соң тағы 3 күн бойы автокөлік басқаруға және қозғалатын механикалық қондырғылармен жұмыс істеуге болмайды. Ұйқышылдық пайда болу мүмкіндігіне, зейін қоюдың төмендеуіне немесе зейін қоюды төмендететін басқа да жағымсыз әсерлер пайда болу мүмкіндігіне байланысты автокөлікті басқару және қозғалатын механикалық қондырғылармен жұмыс істеу қабілеті шектелуі мүмкін («Жағымсыз реакциялардың сипаттамасы» бөлімін қараңыз).

Препаратты жүктілік және бала емізу кезеңінде қолдануға болмайды. Жүктіліктің соңғы триместрінде немесе перинатальді кезеңде клоназепамды қолдану жаңа туған нәрестеде дене температурасының, қысымның төмендеуін, жүрек ырғағының бұзылуын, тыныс алудың бұзылуын және сору рефлексінің әлсіреуін туғызуы мүмкін. Аналары жүктіліктің соңғы мерзімдерінде бензодиазепиндерді ұдайы қабылдаған балаларда физикалық тәуелділік дамиды және туғаннан кейін тоқтату синдромының пайда болу қаупі бар. Ұрпақ өрбітетін жастағы әйелдерді жүктілікті жоспарлаған немесе жүктілікке күдіктенген жағдайда дәрігерге көріну қажеттілігі туралы хабардар ету керек. Клоназепам ана сүтіне өтеді. Емшек емізетін әйелдердің қолдануына болмайды.

Дәрігерге соңғы уақытта қабылданып жүрген барлық дәрілік препараттар туралы, тіпті рецептісіз босатылатындары туралы да хабарлау қажет. Клоназепамды басқа эпилепсияға қарсы препараттармен бірге қолдануға болады, өзара әрекеттесу сирек кездеседі. Клоназепам препаратын эпилепсияға қарсы басқа препараттармен бірге қолдануға болады, өзара әрекеттесудің туындау ықтималдығы сирек кездеседі. Пациенттерді седация, апатия сияқты симптомдардың болуына мұқият бақылау қажет. Бірге қолданған кезде әрбір препараттың дозасы қажетті оңтайлы әсерге жету үшін реттелуі керек. Алкоголь Алкоголь бензодиазепиндердің және олардың туындыларының седативтік әсерін күшейтеді. Зейін қоюдың нашарлауы көлік құралдарын басқарғанда және механикалық құрылғыларға қызмет көрсеткенде қауіпті болуы мүмкін. Құрамында алкоголь бар сусындарды және дәрілік препараттарды тұтынудан аулақ болу керек. Клоназепаммен емдеу уақытында алкоголь қабылдау орталық жүйке жүйесін бәсеңдететін әсерін күшейтеді, психомоторлық қозу, озбыр мінез-құлық сияқты парадоксальді реакциялар дамуына алып келуі мүмкін. Бұдан басқа алкоголь клоназепамның тыныштандыратын әсерін қимыл-қозғалыс үйлесімін бұзуға және естен тануға дейін жеткізіп күшейтеді. Карбамазепин Карбамазепинді бір мезгілде қолданған кезде карбамазепиннің белсенді метаболитінің плазмадағы концентрациясы ұлғаюы мүмкін. Карбамазепин клоназепамның плазмадағы концентрацияларын оның бауырлық метаболизмін ұлғайту есебінен төмендетеді. Мұндай пациенттерді әсіресе біріктірілген емнің бас кезінде, қажет болса дозаны тиісінше түзете отырып мұқият клиникалық бақылау ұсынылады. Клозапин Тыныс алудың және/немесе жүректің тоқтап қалу кезіндегі коллапстың қаупі жоғары. Бупренорфин Орын басу емі ретінде қолданылған кезде тыныстың тарылу қаупі жоғарылайды, ол өлімге әкеліп соғуы мүмкін. Бір мезгілде қолданудың пайда/қауіп арақатынасын мұқият бағалау қажет. Морфий Тыныстың тырылу қаупін жоғарылатады, артық дозаланған жағдайда ол орталық жүйке жүйесіне жинақталатын бәсеңдетуші әсерінің салдарынан өлімге әкеліп соғуы мүмкін. Фенитоин Болжанбайтын әсерлер: фенитоиннің плазмадағы концентрациялары артық дозалану белгілеріне дейін жоғарылауы да, төмендеуі де немесе тұрақты күйде қалуы да мүмкін. Фенитоиннің плазмадағы концентрациясына клиникалық бақылау және мониторинг жүргізу керек. Клоназепамның орталық жүйке жүйесін бәсеңдететін әсерін апиынды ауыруды басатын препараттар, жалпы анестезияға арналған препараттар (анестетиктер), психотроптық препараттар, антидепрессанттар, антигистаминдік препараттар, орталықтық әсері бар қан қысымын төмендететін препараттар күшейтеді. Натрий вальпроаты Натрий вальпроатымен бір мезгілде қолданылатын Клоназепам абсанстар түріндегі (petit mal) эпилепсиялық талмаларды тудыруы мүмкін. Апиындар Бензодиазепиндер сияқты седативті дәрілерді немесе Клоназепам препараты сияқты ұқсас әсерлі дәрілік заттарды апиындармен бір мезгілде қолдану ОЖЖ бәсеңдететін қосымша жиынтық әсерінің салдарынан седацияның, тыныстың тарылуын, кома туындауының және өлімнің қаупін арттырады. Оларды бірге қолданудың дозасы және ұзақтығы шектеулі болуға тиіс. Клоназепамның өзі метаболизмдік ферменттердің индукциясын тудырмайды. Клоназепамның метаболизміне қатысатын ферменттер әлі нақты анықталған жоқ, бірақ CYP3A4 олардың бірі болып табылады. CYP3A4 тежегіштері (мысалы, флуконазол) клоназепамның метаболизмін бұзып, оның шамадан тыс концентрациясын және жанама әсерлерді тудыруы мүмкін. Серотонинді кері қармайтын селективті тежегіштер ‒ сертралин (CYP3A4 әлсіз индукторы) және флуоксетин (CYP2D6 тежегіші) және эпилепсияға қарсы фелбамат препараты (CYP2C19-9 тежегіші; CYP3A4 индукторлары) бір мезгілде қолданғанда клоназепамның фармакокинетикасына әсер етпейді. Дисульфирам, циметидин, эритромицин, кетоконазол, ритонавир Р-450 цитохромы изоферменттерінің тежегіштері болғандықтан, 1,4-бензодиазепин туындыларының биотрансформация үдерістерін бәсеңдетеді және олардың ОЖЖ бәсеңдетуші әсерін күшейтеді. Клоназепам қаңқа бұлшықеттерін босаңсытатын дәрілермен бірге қабылданғанда соңғысының әсерін ұзартады және күшейтеді. Клоназепамды III класты антиаритмиялық препаратпен – амиодаронмен бір уақытта қолданғанда бензодиазепиндерге тән (мысалы, орталық депрессия, қимыл-қозғалыс үйлесімінің бұзылысы) уыттылықтың күшеюін туындатуы мүмкін. Клоназепам құрысуға қарсы басқа препараттармен, әсіресе гидантоинмен немесе фенобарбиталмен бір уақытта қолданылғанда орталық жүйке жүйесі функциясының бәсеңдеуімен байланысты жағымсыз әсерлердің күшеюін туындатуы мүмкін. Темекі шегу клоназепам әсерінің әлсіреуіне алып келуі мүмкін.

Сақтау мерзімі 3 жыл Жарамдылық мерзімі өткеннен кейін қолдануға болмайды! Сақтау шарттары Түпнұсқалық қаптамасында, ылғалдан және жарықтан қорғалған жерде, 25°C-ден аспайтын температурада сақтау керек. Балалардың қолы жетпейтін жерде сақтау керек!