Лидокаин спрей 4.6 мг/доза

Бір құтының ішінде белсенді зат – 3,8 г лидокаин (бір дозада 4,6 мг), қосымша заттар: бұрыш жалбызы майы, пропиленгликоль, этанол (96%). Құрамында фреон жоқ. Сыртқы түрінің, иісінің, дәмінің сипаттамасы Түссіз дерлік, өзіне тән ментол иісі бар спирт ерітіндісі.

Лидокаин спрей терінің немесе шырышты қабықтардың тез және тиімді анестезиясы қажет болған барлық жағдайларда ересектерге және балаларға қолдануға арналған. Стоматологиялық емшаралар және операциялар - инъекциялық жергілікті анестетикті енгізер алдында инъекция жасалатын жерді анестезиялау - беткейлік абсцестерді кесу - қозғалатын сүт тістерді немесе сүйек фрагментін жұлу - шырышты қабықтың жарасынан тігістерді алып тастау - тіс сауытын немесе аспалы протезді бекіту алдында қызылиекті анестезиялау - препаратты сондай-ақ тіс тастарын қолмен немесе құрал-сайманмен алып тастау немесе тісаралық өсіп кеткен емізікшені кесіп тастау үшін де қолдануға болады - рентген үлбірін жапсыруға дайындау немесе салу алдында жұтқыншақ рефлексінің жоғарылауын төмендету немесе басу (препаратты тек эластикалық жапсырғыш материалдармен бірге қолдану керек). Аспирация қаупі бар болғандықтан, Лидокаин спрей препаратын, жапсырғышты әзірлеу үшін гипс пайдаланылған кезде қолдануға болмайды. - Лидокаин спрей препаратын балаларда френулотомия және сілекей бездерінің кистасын кесу үшін қолдануға болады - шырышты қабықтардың беткейлік қатерсіз ісіктерін алып тастауға Оториноларингология - электрокаутеризация, септэктомия және мұрын полиптерінің резекциясы алдында мұрыннан қан кетуді емдеуде - тонзиллэктомияда жұтқыншақ рефлексін басу және инъекция жасалатын жерді анестизациялауда - перитонзиллярлық абсцесті тілу немесе жоғарғы жақ қуыстарына пункция жасау алдында қосымша анестезия ретінде - синусты шаю алдында анестезиялау үшін. Лидокаин спрей препаратын жұтқыншаққа немесе мұрын-жұтқыншаққа хирургиялық операцияларда пайдаланған жағдайларда лидокаин жұтқыншақ рефлексін баса отырып, көмейге және кеңірдекке түсетіндігін және жөтелу рефлексін басатындығын, ол бронх-пневмонияға әкелуі мүмкін екенін ескеру керек. Бұл балалар үшін аса маңызды, өйткені оларда жұтыну рефлексі жиі туындайды. Осыған сәйкес, Лидокаин спрей 8 жасқа дейінгі балаларға тонзиллэктомия және аденотомия алдында жергілікті анестезия үшін ұсынылмайды. Эндоскопия және аспаптық зерттеу әдістері - мұрын немесе ауыз арқылы әртүрлі түтіктерді енгізер алдында жұтқыншақты анестезиялау (гастро-дуоденальді зонд немесе Сенгстакен зонды) - трахеотомиялық түтіктерді алмастырғанда Гинекология және акушерлік - эпизиотомия алдында немесе осы операцияға ықтимал қажеттілік болғанда шатты анестезиялау үшін - тігістерді алып тастауға - қынапқа және жатыр мойнына операция жасағанда оның айналасындағы тіндерді анестезиялау үшін - қыздық перденің жарылуын немесе тігіс абсцесін сылып алып өңдеу үшін. Дерматология - кіші хирургиялық операциялар алдында теріні немесе шырышты қабықтарды анестезиялауға.

Әсер етуші зат лидокаин – жарғақшаны тұрақтандыратын амидтік жергілікті анестетик. Жергілікті анестетиктер теріде және шырышты қабықтарда сезімтал жүйке ұштарының белсенділігін басады, яғни жүйке тіндерінің элементтерінде (нейронда, аксонда және синапстарда) импульстердің өтуін қайтымды түрде тежейді. Әсер ету механизмі Жергілікті анестезиялайтын заттардың әсері импульстің түзілуі үшін қажетті жүйке жасушаларының жасушалық жарғақшалары арқылы иондық ағындардың басылуына негізделген. Лидокаин тыныш кезде натрий иондары үшін стимуляциядан туындаған өткізгіштіктің өткінші жоғарылауын бәсеңдетеді және аз дәрежеде калий және натрий иондары үшін өткізгіштікті төмендетеді, бұл нейрондардың жасушалық жарғақшаларының тұрақтануына әкеледі. Лидокаин физиологиялық стимулдардың әсерінен деполяризация жылдамдығын төмендетеді, сондай-ақ әсер ету потенциалдарының амплитудасын азайтады және жүйке импульсінің жүруін тежейді. Әртүрлі модальділік ішінде жергілікті анестетиктер ең бірінші кезекте ауыру сезімін, ал содан кейін температуралық және тактильді сезімталдықты бәсеңдетеді. Егер лидокаин көп мөлшерде жергілікті қолданудан кейін сіңсе, ол қозуды да, сонымен қатар орталық жүйке жүйесі функциясының басылуын да туындатуы мүмкін. Оның жүрек-қантамырлық әсері қозудың жүруінің бұзылулары және шеткері қантамырлардың дилатациясы ретінде көрініс беруі мүмкін.

Дозалау режимі Препараттың дозасы көрсетілімдеріне және анестезиялайтын беттің көлеміне байланысты. Баллонның дозалаушы клапанын басқан кезде босайтын спрейдің бір порциясында 4,6 мг лидокаин бар. Қан плазмасында препараттың жоғары концентрацияға жетуіне жол бермеу үшін қанағаттанарлық әсер байқалатын ең төмен дозаларды қолдану керек. Әдетте клапанды 1 - 3 басу жеткілікті, алайда акушерлік іс-тәжірибеде 15 -20 порция пайдаланылады (ең жоғары мөлшер – 70 кг дене салмағына 40 порция). Әртүрлі көрсетілімдерде ұсынылатын дозалар Қолдану саласы — Дозасы (клапанды басу саны) Стоматология — 1-3 Стоматологиялық хирургия — 1-4 Оториноларингология — 1-4 Эндоскопия — 2-3 Акушерлік — 15-20 Гинекология — 4-5 Дерматология — 1-3 Пациенттердің ерекше топтары Балалар Әдебиет деректерін негізге алсақ, стоматологиялық емшараларда және операцияларда Лидокаин спрейін балаларға, көбіне жағу әдісімен (мақта тампонымен) қолдануға болады, педиатрияда ол препаратты бүріккен кездегі қорқуды, сондай-ақ әдеттегі жағымсыз әсер – күйдіру сезімін болдырмауға мүмкіндік береді. Енгізу әдісі және жолы Жергілікті және сыртқа қолдану үшін дозаланған спрей. Препаратты сондай-ақ оған малынған мақта тампонмен жағу жолымен де пайдалануға болады. Препаратты алғаш қолданар алдында дозалаушы сорғыны толтыру керек. Ол үшін қорғаныш қалпақшасын алып, бүріккіш-қондырманы кигізу және дозалаушы клапанды спрей пайда болғанға дейін бірнеше рет басу керек. Баллонды пайдалануға ұзақ үзіліс жасағаннан кейін сорғыны қайталап толтыру қажеттілігі туындауы мүмкін. Лидокаин спрейі эндотрахеальді түтіктің пластмасса манжетіне түспеуі тиіс. Дәрілік препаратты қолдану тәсілін түсіну үшін медицина қызметкерінен кеңес алуға жүгіну жөнінде нұсқаулар Егер Сізде осы препаратты қолдану жөнінде қосымша сұрақтар туындаса, өзіңіздің дәрігеріңізге барыңыз.

• белсенді затқа (лидокаин) немесе қосымша заттардың кез келгеніне аса жоғары сезімталдық • амид типті жергілікті анестетиктерге белгілі аса жоғары сезімталдық • стоматологиялық емшараларды жасаған кезде Лидокаин спрей препаратын, аспирация қаупіне байланысты, жапсырғышты әзірлеу үшін гипс пайдаланылған кезде қолдануға болмайды • шокта және жүрек өткізгіштігінің бұзылуында • препаратты нәрестелер мен 2 жасқа толмаған балаларға қолдануға болмайды. • лидокаин спрейі көзге тиіп кетпеуі тиіс. Көзге байқаусызда тиіп кеткен жағдайда оны судың мол мөлшерімен дереу шаю керек.

Лидокаинға жағымсыз әсерлер сирек туындайды және дозаның артық болуы немесе тез сіңірілуі салдарынан, әдетте, плазмалық концентрацияның жоғарылауына байланысты болады. Жүйелі уыттылық реакциялары, негізінен, орталық жүйке жүйесі және (немесе) жүрек-қантамыр жүйесі тарапынан көрініс береді. Кейбір жағымсыз реакциялар пациенттің аса жоғары сезімталдығымен, идиосинкразиясымен немесе жағымдылығының нашарлауымен байланысты болады. Қауіп тобына аса жоғары сезімталдығы бар, бауыр функциясы бұзылған, ацидозы және эпилепсиясы бар пациенттер жатады. Лидокаин спрей препаратын дұрыс қолданудан кейін жүйелі әсерлердің жиілігі төтенше аз, өйткені қанға түсуі мүмкін препарат мөлшері тым төмен. Әдетте, аса жоғары сезімталдық жергілікті болып табылады, бірақ сирек жағдайларда жүйелі сипатта болуы мүмкін. Өте сирек - аллергиялық реакциялар: есекжем, ангионевроздық ісіну, бронх түйілуі, ал төтенше ауыр жағдайларда – анафилаксиялық шок. Препаратты қолдануды кез келген аса жоғары сезімталдық реакциялары туындаған кезде дереу тоқтату керек. - қозу немесе орталық жүйке жүйесінің бәсеңдеу симптомдары (қатты қозғыштық, бас айналу, ұйқышылдық, конвульсиялар, естен тану, тыныстың тоқтап қалуы) - тыныс салу бұлшықеттерінің салдануы Белгісіз жиілікпен байқалатын (қолда бар деректер негізінде баға беру мүмкін емес). - енгізген жердегі сезімталдықтың уақытша бұзылуы, көрудің бұзылуы, тремор - уытты әсер миокард функциясының бәсеңдеуі, брадикардия, жүректің тоқтап қалуы түрінде көрініс беруі мүмкін - гипотензия - тамақтың өткінші ауыруы, дауыстың қарлығуы, дауыстың қайтымды жоғалуы - енгізген жерде терінің өткінші қызаруы немесе ісінуі дамуы мүмкін, спрейді жаққан сәтте шамалы ашып ауыру және шаншу сезіледі, ол препараттың әсері дамығаннан кейін (1 минут ішінде) қайтады. - препаратты жаққан жерде өткінші тітіркену және ісіну дамуы мүмкін. Жағымсыз дәрілік реакциялар туындаған жағдайда медицина қызметкеріне, фармацевтикалық қызметкерге немесе, дәрілік препараттардың тиімді еместігі туралы мәлімдемелерді қоса, дәрілік препараттарға жағымсыз реакциялар (әсерлер) жөнінде деректердің ақпараттық базасына тікелей хабарлау керек Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

Симптомдары Артық дозалану реакциялары негізінен орталық жүйке және жүрек-қантамыр жүйелері тарапынан көрініс береді. Орталық жүйке жүйесінің уыттануы бірте-бірте білінеді, оның симптомдарының ауырлығы біртіндеп артады: бастапқы белгілері, әдетте, ауыз айналасындағы парестезия, тілдің ұюы, бас айналу, гиперакузия, құлақтың шуылдауы болып табылады; күрделірек біліністер көрудің бұзылулары және миофасцикуляциялар болып табылады, олар жайылған құрысудың басталуына ізашар болуы мүмкін. Осылардан кейін есінен айырылу және бірнеше секундтан бірнеше минутқа дейін созылатын үлкен құрысу ұстамасы дамуы мүмкін. Құрысу кезінде бұлшықет белсенділігінің жоғарылауына және желдетудің жеткіліксіздігіне байланысты гипоксия және гиперкапния тез жоғарылайды. Ауыр жағдайларда тыныс алудың тоқтап қалуы болуы мүмкін. Қатар жүретін ацидоз жергілікті анестетиктердің уытты әсерін ушықтырады. Симптоматиканың қайтуы жергілікті анестетиктің ОЖЖ-дан қайта ыдырауы және оның метаболизмі есебінен жүреді. Сипатталған құбылыстар, егер артық дозалану шамадан тыс болмаса, тез басылады. Жүрек-қантамыр жүйесінің зақымдануы, әдетте, жүйелі концентрациялардың өте жоғарылығын айғақтайды: артериялық қысымның төмендеуі, брадикардия, аритмиялар және жүректің тоқтап қалуы. Әдетте, мұның алдында ОЖЖ зақымдану белгілері болады, егер пациент бензодиазепиндер немесе барбитураттар сияқты дәрілік заттар себепші болатын наркозда немесе терең седацияда болса, ол жоғалуы мүмкін. Емі Тыныс алу жолдарының өткізгіштігін бақылау, қажет болған жағдайда оттегіні және/немесе өкпені жасанды желдетуді қолдану керек. Болуы мүмкін түйілулерді вена ішіне 50 - 100 мг сукцинилхолинді және/немесе 5 - 15 мг диазепамды мүмкіндігінше тезірек енгізу арқылы жою керек. Сукцинилхолин тыныс алудың тоқтап қалуын туындатуы мүмкін болғандықтан, оны кеңірдекті интубациялау және тыныс алу бұлшықеттері салданған науқастарға пайдалану тәжірибесі бар мамандар ғана қолдануы тиіс. Қысқа мерзімдік әсер ететін барбитуратты – натрий тиопенталын қолдануға болады. Жүрек-қантамыр жүйесі тарапынан симптомдарды (брадикардия және жүрек өткізгіштігінің бұзылулары) жою үшін атропинді (венаға 0,5 - 1 мг) және симпатомиметиктерді енгізу көрсетілген. Балаларға дозалар олардың жасына және дене салмағына сәйкес тағайындалады. Қарыншалардың фибрилляциясында және жүрек тоқтап қалғанда реанимациялық шаралар қажет.

Арнайы сақтандырулар Аумақтық және жергілікті анестезия тәжірибелі мамандармен, дереу пайдалануға дайын қолжетімді құралдармен жабдықталған және жүрек қызметіне мониторингті және реанимациялық шараларды, оттегімен емді жүргізу үшін қажетті препараттары бар, тиісінше жабдықталған бөлмеде жүргізілуі тиіс. Анестезия жасайтын қызметкер маманданған және анестезияны жасу техникасын үйренген болуы тиіс, жүйелі уытты реакциялардың, жағымсыз құбылыстар мен реакциялардың, және басқа да асқынулардың диагностикасымен және емімен таныс болуы тиіс. Лидокаинның жоғары дозалары немесе дозалар арасындағы қысқа аралық плазмада жоғары деңгейлерге және ауыр жағымсыз реакцияларға әкелуі мүмкін. Шырышты қабық арқылы сіңу дәрежесі өзгеріп отырады, бірақ бронх бағанында аса жоғары болады. Демек, бронх бағанында пайдалану оның плазмада тез артуына немесе жоғары деңгейлеріне әкелуі мүмкін, бұл құрысулар сияқты уытты симптомдардың жоғары қаупімен байланысты. Жағуға арналған аймақтың шырышты қабығының тұтастығы бұзылған және/немесе жарақаттанған жағдайда лидокаин спрейін жағу сақтықты қажет етеді. Зақымданған шырышты қабыққа жағу жүйелі сіңудің жоғарылауына әкеледі. Күрделі жағымсыз реакцияларды жою үшін реанимациялық құралдарды, оттегіні және басқа да реанимациялық заттарды пайдалану қажет болуы мүмкін. Салданған пациенттерде жалпы анестезия кезінде, өздігінен дем ала алатын пациенттерге қарағанда, қан плазмасында өте жоғары концентрациялар байқалады. Салданбаған пациенттер дозаның көп бөлігін жұтып қоюы мүмкін, бұл ішектен сіңгеннен кейін алғашқы өту кезінде өте жоғары дәрежедегі метаболизмге әкелуі мүмкін. • Қан плазмасында лидокаинның жоғары концентрациясына және жағымсыз реакциялар (конвульсиялар) қаупіне жол бермеу үшін қанағаттанарлық әсер беретін ең төмен дозаны қолдану керек. • Тыныс алу жолдарына лидокаинның түсіп кетуін болдырмау маңызды (аспирация қаупі бар). • Жұтқыншаққа жағу аса сақтықты қажет етеді. • Ауыздың шырышты қабығына жағу, әсіресе балаларда, дисфагия қаупімен және кейін аспирациямен қоса жүреді. Тілдің және ұрттың шырышты қабығының сезімталдығы бұзылғанда олардың тістелу қаупі жоғарылайды. • Лидокаин шырышты қабық (әсіресе кеңірдектің) және зақымданған тері арқылы жақсы сіңеді. Бұған әсіресе балаларда тіннің үлкен аумақтарын өңдегенде көңіл бөлу керек. • Лидокаинды зақымданған шырышты қабыққа және/немесе инфекцияланған аймаққа жаққанда сақтық таныту керек. • Препаратты эпилепсиясы бар науқастарда, сондай-ақ жүрек-қантамыр ауруларында (брадикардияда, жүрек өткізгіштігінің бұзылуларында, жүрек жеткіліксіздігінде), бауыр немесе бүйрек функциясының бұзылуларында, әсіресе тіннің үлкен аумақтарын жоғары дозалармен өңдегенде препараттың елеулі мөлшері сіңетінін күтуге болатын кезде, сақтықпен қолдану керек. • Препаратты миастения грависі бар пациенттерде сақтықпен қолдану керек (егер тағайындалған доза қандағы препарат деңгейінің жоғарылауына әкелуі мүмкін болса, кейбір пациенттер қауіптілігі зор жағымсыз реакциялардың мүмкіндігіне байланысты бақылауда болуы керек) • Лидокаинның порфириногендік әсері бар, сондықтан оны тек жедел порфириясы бар пациенттерге шұғыл көрсетілімдер бойынша ғана қолдануға болады. Тиісті сақтық шараларын порфириясы бар барлық пациенттерде орындау қажет. • Неғұрлым төмен дозаларды әлсізденген және егде жастағы пациенттердегі жедел аурулар кезінде, сондай-ақ балалардың жасына және жалпы жағдайына сәйкес қолдану керек. • Лидокаин спрей препаратын жағу кезінде құтыны мүмкіндігінше тік ұстау керек. • Спрей көзге тиіп кетпеуі тиіс. • Лидокаин спрей эндотрахеальді түтіктің (ПВХ/ПВХ емес) пластмасса манжеткасына түспеуі тиіс, өйткені лидокаин оны (ұсақ тесіктер түзіп) зақымдауы мүмкін, бұл манжеткада қысымның төмендеуіне әкелуі мүмкін. Егер тағайындалған доза қанда препарат деңгейінің артуына әкелуі мүмкін болса, кейбір пациенттер әлеуетті қауіпті жағымсыз реакциялар тұрғысында бақылануы тиіс: • жүрек-қантамыр аурулары және жүрек жеткіліксіздігі бар пациенттер; • жүрегі ішінара немесе толық бөгеліс бар пациенттер; • егде жастағы пациенттер және әлсіз күйдегі пациенттер; • бүйректің ауыр жеткіліксіздігі бар пациенттер; • бауыр ауруы үдеген пациенттер. Аритмияға қарсы ІІІ класс препараттарын (мысалы, амиодарон) қабылдап жүрген пациенттер мұқият бақылауда болуы тиіс, сондай-ақ ЭКГ-ні бақылау керек, өйткені олардың жүрекке әсері өзара күшеюі мүмкін. Препараттың құрамында этанолдың (алкогольдің) аздаған мөлшері бар: әрбір порцияда – 100 мг-ден азырақ. Осы препараттың әрбір порциясында 10,5 мг-ге жуық пропиленгликоль бар, ол терінің және шырышты қабықтардың тітіркенуін туындатуы мүмкін. Препараттың көлік құралын және қауіптілігі зор механизмдерді басқару қабілетіне әсер ету ерекшеліктері Көлік құралдарын басқару және механизмдермен жұмыс істеу қабілетіне лидокаинның ықпалын көрсететін деректер жоқ. Дозаға байланысты, өте сирек жағдайларда жергілікті анестетиктер жүйке жүйесі тарапынан жағымсыз әсерлерді туындатуға қабілетті және, осылайша, көлік құралдарын басқару және механизмдермен жұмыс істеу қабілетіне ықпалын тигізуі мүмкін.

Жүктілік Лидокаин плаценталық бөгет арқылы өтеді. Клиникалық қажеттілік болған жағдайда лидокаинды жүктілік кезінде пайдалануға болады. Лактация Лидокаинның метаболизмі біршама тез және көбіне бауырда жүретін болғандықтан, лидокаинның өте төмен мөлшері ғана емшек сүтімен бөлініп шығуы мүмкін деп күтіледі, ал лидокаинды емдік дозаларда пайдаланғанда емшек еміп жүрген жаңа туған нәрестелерге/сәбилерге жағымсыз әсері тиеді деп күтілмейді. Лидокаинды бала емізу кезінде пайдалануға болады.

Препаратты жоғары дозаларда пайдаланғанда басқа жергілікті анестетиктерді немесе құрылысы ұқсас препараттарды, мысалы, аритмияға қарсы мексилетин және токаинид сияқты препараттарды қабылдап жүрген пациенттерде қосымша жүйелі уыттылық қаупін ескеру керек. Лидокаинды аритмияға қарсы 1В класының препараттарын (мысалы, токаинид, мексилетин) қабылдап жүрген пациенттерге, уытты әсерлердің жинақталу қаупіне байланысты, сақтықпен қолдану керек. Лидокаинды аритмияға қарсы 1А класының препараттарымен (мысалы, хинидин, прокаинамид, дизопирамид сияқты) біріктіріп қолдану QT аралығының ұзаруын, ал өте сирек жағдайларда жүрекшелік-қарыншалық блокаданы немесе жүрекшелердің фибрилляциясын туындатуы мүмкін. Аритмияға қарсы ІІІ класының препараттарымен (мысалы, амиодарон сияқты) өзара әрекеттесуіне спецификалық зерттеулер жүргізілген жоқ, дегенмен оларды сақтықпен қолдану керек, өйткені кардиологиялық әсерлер жинақталуы мүмкін. Лидокаинның клиренсі төмендеуіне ықпал ететін препараттар (мысалы, циметидин, пропранолол және надолол) лидокаинды жоғары дозаларда ұзақ уақыт бойы пайдаланғанда плазмада уытты концентрацияларды туындатуы мүмкін. Бұл өзара әрекеттесудің лидокаинды ұсынылған дозаларда қысқа мерзімдік пайдаланған кезде клиникалық маңызы болмайды. Фенитоин лидокаинның кардиодепрессиялық әсерін арттырады.

Сақтау мерзімі 5 жыл Жарамдылық мерзімі өткеннен кейін қолдануға болмайды. Сақтау шарттары 25°С-ден аспайтын температурада сақтау керек. Балалардың қолы жетпейтін жерде сақтау керек!