ЛИНОЛИД® таблетки 600 мг

Бір таблетканың құрамында белсенді зат - 600 мг линезолид, қосымша заттар: микрокристалды целлюлоза (РН 101), микрокристалды целлюлоза (РН 102), ішінара желатинделген крахмал, натрий крахмалының гликоляты, гидроксипропилцеллюлоза, магний стеараты, қабықтың құрамы: Opadry 03B58600 ақ (гипромеллоза, титанның қостотығы (E 171), макрогол), тазартылған су. Сыртқы түрінің, иісінің, дәмінің сипаттамасы Ақ түсті үлбірлі қабықпен қапталған, екі беті дөңес, сопақша пішінді, екі жағы тегіс таблеткалар.

- ауруханалық пневмония - ауруханадан тыс пневмония - тері мен жұмсақ тіндердің асқынған инфекциялары ЛИНОЛИД® ересектерде, егер қоздырғыш белгілі немесе күдікті болса, грамоң бактериялар туындатқан ауруханадан тыс және ауруханаішілік пневмонияны емдеу үшін көрсетілген. ЛИНОЛИД® тағайындалған кезде микробиологиялық зерттеулердің нәтижелері мен грамоң бактериялардың тұрақтылығы туралы ақпарат ескерілуі керек. Грамтеріс микроорганизмдер туындатқан инфекцияларға қатысты белсенді. Грамтеріс организмдерге қарсы спецификалық ем егер грамтеріс патоген белгілі болса немесе күдік болса, оны бір уақытта бастау керек. ЛИНОЛИД® микробиологиялық зерттеу инфекцияның сезімтал грамоң бактериялар туындатқанын анықтаған жағдайда ғана терінің және жұмсақ тіндердің асқынған инфекцияларын емдеуге арналған. - Enterococcus faecium туындатқан, ванкомицинге төзімді инфекциялар, соның ішінде бактериемиямен қатар көрінетіндер. Грамтеріс микроорганизмдер туындатқан инфекцияларға қатысты белсенді емес. ЛИНОЛИД® инфекцияның белгілі қоздырғыштарымен терінің және жұмсақ тіндердің асқынған инфекциялары бар пациенттерге немесе емдеудің баламалы нұсқалары болмаған жағдайда грамтеріс микроорганизмдермен біріктірілген инфекция кезінде тағайындау керек. Бұл жағдайларда грамтеріс микроорганизмдерге қарсы емдеуді бір уақытта бастау керек. Линезолидпен емдеу стационар жағдайында және микробиологпен немесе дәрігер-инфекционистпен кеңескеннен кейін жүргізілуі тиіс.

ATХ коды J01XX08 Әсер ету механизмі Линезолидтің әсер ету механизмі басқа кластағы микробқа қарсы препараттардың (мысалы, аминогликозидтер, бета-лактамдар, фолий қышқылының антагонистері, гликопептидтер, линкозамидтер, хинолондар, рифампицин, стрептограминдер, тетрациклиндер және хлорамфеникол) әсер ету механизмдерінен ерекшеленеді, сондықтан линезолид пен осы препараттар арасында айқаспалы резистенттілік жоқ. Линезолид осы препараттарға сезімтал да, резистентті де патогенді микроорганизмдерге қатысты белсенді. Линезолидке қатысты резистенттілік рибосомалық РНҚ-ның 23S көпсатылы мутациясы жолымен баяу дамиды және 1х10 -9- 1х10-11 аз жиілікте байқалады. Фармакодинамикалық әсерлері Линезолид – бактерияларға қарсы синтетикалық препарат, аэробты грамоң бактерияларға, кейбір грамтеріс бактерияларға және анаэробты микроорганизмдерге қатысты in vitro белсенді оксазолидинондарға жатады. Линезолид бактериялық ақуыздардың синтезін селективті түрде тежейді. Бактериялық рибосомалармен байланысу есебінен ол ақуыз синтезінде трансляция процесінің маңызды компоненті болып табылатын, функциялық тұрғыдан бастаушы 70S кешеннің түзілуіне жол бермейді. Сезімталдығы Препарат in vitro және in vivo белсенді. Грамоң аэробтар: Enterococcus faecium (ванкомицинге резистентті штаммдарды қоса), Staphylococcus aureus (метициллинрезистентнті штаммдарды қоса), Streptococcus agalactiae, Streptococcus pneumoniae (полирезистентті штаммдарды қоса), Streptococcus pyogenes. Препарат in vitro белсенді. Грамоң аэробтар: Enterococcus faecalis (ванкомицинге резистентті штаммдарды қоса), Enterococcus faecium (ванкомицинге сезімтал штаммдар), Staphylococcus epidermidis (метициллинрезистентті штаммдарды қоса), Staphylococcus haemolyticus. Viridans тобының стрептококктары. Грамтеріс аэробтар: Pasteurella multocida. Линезолидке резистентті микроорганизмдер: Haemophilus influenzae, Moraxella catarrhalis, Neisseria spp., Enterobacteriaceae spp., Pseudomonas spp. Клиникалық тиімділігі және қауіпсіздігі Деректер жоқ

Емдеу ұзақтығы қоздырғышқа, инфекцияның орналасқан жеріне және ауырлығына, сондай-ақ клиникалық әсерге байланысты Емнің басында препарат вена ішіне тағайындалған пациенттерді бұдан былай ішке қабылдауға арналған препараттың дәрілік түріне ауыстыруға болады, бұл ретте дозаны таңдау қажет емес, өйткені ішке қабылдаған кезде линезолидтің биожетімділігі 100% жуығын құрайды. Ересектер Көрсетілімдер — Бір реттік дозасы — Ұсынылатын емдеу ұзақтығы Ауруханалық пневмония — 600 мг әр 12 сағ. сайын — 10-14 күн Ауруханадан тыс пневмония — 600 мг әр 12 сағ. сайын — 10 -14 күн Тері мен жұмсақ тіндердің асқынған инфекциялары — 600 мг әр 12 сағ. сайын — 10 -14 күн Enterococcus faecium туындатқан, ванкомицинге төзімді инфекциялар, соның ішінде бактериемиямен қатар көрінетіндер — 600 мг әр 12 сағ. сайын — 14 -28 күн Егде жастағы пациенттер Дозаны түзету қажет емес. Бүйрек жеткіліксіздігі бар пациенттер Дозаны түзету қажет емес. Бүйректің ауыр жеткіліксіздігі бар пациенттер (CLCR <30 мл/мин): Дозаны түзету қажет емес. Бүйректің ауыр жеткіліксіздігі бар пациенттерде линезолидтің екі негізгі метаболитінің жоғары экспозициясының (10 есеге дейін) белгісіз клиникалық маңыздылығына байланысты, ондай науқастарда линезолидті сақтықпен және емнің күтілетін пайдасы ықтимал қаупінен асып кеткен жағдайда ғана қолдану қажет. Қабылданған линезолид дозасының 30% гемодиализ кезінде 3 сағат ішінде жойылатындығына байланысты, линезолидті гемодиализ процедурасынан кейін қолдану қажет. Линезолидтің бастапқы метаболиттерінің белгілі бір бөлігі гемодиализ кезінде шығарылады, бірақ бұл метаболиттердің концентрациясы бүйрек функциясы қалыпты немесе бүйректің жеңіл және орташа дәрежелі жеткіліксіздігі бар пациенттердегіге қарағанда диализден кейін айтарлықтай жоғары болып қалады. Сондықтан линезолидті гемодиализ алатын бүйректің ауыр дәрежелі жеткіліксіздігі бар науқастарда және күтілетін пайдасы ықтимал қаупінен жоғары болған жағдайда ғана аса сақтықпен пайдалану керек. Үздіксіз амбулаториялық перитонеальді диализ алатын пациенттерде линезолидті қолдану тәжірибесі жоқ. Бауыр жеткіліксіздігі бар пациенттер Дозаны түзету қажет емес. Алайда клиникалық деректердің шектеулі санына байланысты ондай пациенттерде линезолидті қолдану күтілетін пайдасы ықтимал қаупінен асқан жағдайда ғана ұсынылады. Енгізу әдісі мен жолы Препаратты тамақтану кезінде де, тамақтану арасында да қабылдауға болады.

- әсер етуші затқа және қосымша заттардың кез келгеніне аса жоғары сезімталдық - МАО А немесе МАО В тежегіштерімен (мысалы, фенелзин, изокарбоксазид, селегилин, моклобемид) бір мезгілде және аталған дәрілік заттарды қабылдауды тоқтатқаннан кейін 2 апта ішінде қабылдау - бақыланбайтын артериялық гипертензия - феохромоцитома - тиреотоксикоз - биполярлық депрессия, шизоаффектілі бұзылыстар, сана шатасуының жедел көріністері - карциноидты синдром немесе серотонинді кері қармау тежегіштерімен, трициклді антидепрессанттармен, 5-НТ1 рецепторлар агонистерімен (триптандар), меперидинмен немесе буспиронмен бір мезгілде қабылдау - адреномиметиктермен (адренергиялық бронходилататорларды, псевдоэфедринді, фенилпропаноламинді қоса), тамырды тарылтатын препараттармен (эпинефрин, норэпинефрин), допаминомиметиктермен (мысалы, дофамин, добутамин), петидинмен немесе буспиронмен бір мезгілде қабылдау. - жүктілік және бала емізу кезеңі - балалар мен 18 жасқа дейінгі жасөспірімдер

Жағымсыз құбылыстардың жиілігін анықтау мынадай критерийлерге сәйкес жүргізіледі: өте жиі (≥ 1/10), жиі (≥1/100-ден < 1/10-ға дейін), жиі емес (≥ 1/1000-нан < 1/100-ге дейін), сирек (≥1/10000-нан < 1/1000-ға дейін), өте сирек (< 1/10000), белгісіз (қолда бар деректер негізінде бағалау мүмкін емес) Жиі - ауыз қуысының шырышты қабығының кандидозы, қынаптық кандидоз, зең инфекциялары - анемия* - ұйқысыздық - бас ауыру, дәм сезудің бұрмалануы (ауыздың «темір» татуы), бас айналу - артериялық гипертензия - диарея, жүрек айну, құсу, іш тұсының оқшаулап немесе жайылып ауыруы, іш қату, диспепсия - бауырдың функциялық тест нәтижелерінің өзгеруі, бауыр ферменттерінің (аланинаминотрансфераза (АЛТ), аспартатаминотрансфераза (ACT), сілтілік фосфатаза (СФ) белсенділігінің артуы - тері бөртпесі, қышыну - қандағы мочевина концентрациясының жоғарылауы - қызба, ошақталған ауырсыну - нейтрофилдер, эозинофилдер санының көбеюі, гемоглобиннің, гематокриттің немесе эритроциттер санының азаюы, тромбоциттер немесе лейкоциттер санының көбеюі немесе азаюы, лактатдегирогеназа, креатинкиназа, липаза, амилаза белсенділігінің жоғарылауы, глюкоза концентрациясының ашқарында емес жоғарылауы, жалпы ақуыздың, альбуминнің, натрийдің немесе кальцийдің азаюы, калийдің немесе бикарбонаттардың көбеюі немесе азаюы Жиі емес - вагинит - лейкопения*, нейтропения, тромбоцитопения*, эозинофилия - гипонатриемия - гипогликемия - құрысулар*, гипестезия, парестезия - көрудің бұлыңғырлануы* - құлақтың шыңылдауы - аритмия, тахикардия, транзиторлық ишемиялық шабуыл - флебит, тромбофлебит - панкреатит, гастрит, іштің кебуі, ауыздың құрғауы, глоссит, стоматит, тілдің шырышты қабығы түсінің өзгеруі, сұйық нәжіс - жалпы билирубин концентрациясының жоғарылауы - есекжем, дерматит, шамадан тыс терлеу - бүйрек жеткіліксіздігі, қан плазмасындағы креатинин концентрациясының жоғарылауы, полиурия - қынап пен вульва тарапынан бұзылулар - қалтырау, шаршау, шөлдеу - қан плазмасындағы натрий немесе кальций мөлшерінің көбеюі, глюкоза концентрациясының ашқарында емес төмендеуі, хлоридтердің көбеюі немесе азаюы, ретикулоциттер санының көбеюі, нейтрофилдер санының азаюы Сирек - антибиотиктерді қолданудан туындаған колит (соның ішінде жарғанжарғақшалы колит)* - панцитопения* - көру аймағының тарылуы* - тіс эмалі түсінің беткейлік өзгеруі - түкпен қапталған сияқты көрінетін тіл беткейінің қараюы - рабдомиолиз* Жиілігі белгісіз - миелосупрессия*, сидеробластты анемия* - анафилаксия - лактоацидоз* - серотониндік синдром, шеткері нейропатия* - көру жүйкесінің нейропатиясы*, көру жүйкесінің невриті*, көрмей қалу*, көз көргіштігінің өзгеруі*, түс көру қабілетінің өзгеруі* - Стивенс-Джонсон синдромы, уытты эпидермалық некролиз, ангионевроздық ісіну, алопеция сияқты буллезді бұзылыстар * «Айрықша нұсқаулар және қолдану кезіндегі сақтандыру шаралары» бөлімін қараңыз. Линезолидті сирек жағдайларда қолданған кезде келесі жағымсыз әсерлер ауыр санатқа жатқызылды: іш тұсындағы оқшауланған ауыру, транзиторлық ишемиялық шабуыл, артериялық гипертензия. Жағымсыз дәрілік реакциялар туындағанда медициналық қызметкерге, фармацевтикалық қызметкерге немесе, дәрілік препараттардың тиімсіздігі туралы хабарламаларды қоса, дәрілік препараттарға болатын жағымсыз реакциялар (әсерлер) жөніндегі ақпараттық деректер базасына тікелей хабарласу керек Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

Симптомдары: кездейсоқ артық дозаланғанда жағымсыз әсерлер күшеюі мүмкін. Емі: симптоматикалық ем; шумақтық сүзілуді демеуге бағытталған іс-шаралар, гемодиализ. Дәрілік препаратты қолданар алдында дәрігерге немесе фармацевтке жүгініңіз

Миелосупрессия Миелосупрессия (оның ішінде анемия, лейкопения, панцитопения және тромбоцитопения) линезолид қабылдаған пациенттерде байқалды. Линезолидпен емдеуді тоқтатқаннан кейін гематологиялық параметрлер емдеу басталғанға дейінгі деңгейлерге қайта оралды. Бұл әсерлердің даму қаупі емдеу ұзақтығына байланысты болуы мүмкін. Линезолид қабылдаған егде жастағы пациенттерде қанның патологиялық өзгерістерінің туындау қаупі жасырақ пациенттердегіге қарағанда көбірек дәрежеде болуы мүмкін. Тромбоцитопения пациенттің гемодиализде болуына қарамастан, бүйректің ауыр жеткіліксіздігі бар пациенттерде жиірек байқалуы мүмкін. Бұрыннан анемиясы, гранулоцитопениясы немесе тромбоцитопениясы бар; сонымен қатар гемоглобин деңгейін немесе шеткері қандағы тромбоциттер санын азайтуға немесе олардың функциясын тежеуге қабілетті препараттарды бір уақытта қабылдайтын; бүйректің ауыр жеткіліксіздігі бар; 10-14 күннен астам линезолид қабылдайтын пациенттерде қанның толық талдауын мұқият бақылау ұсынылады. Ондай пациенттер үшін линезолидті тағайындау қан талдауына, гемоглобин деңгейіне және тромбоциттер санына мұқият мониторинг жүргізілген жағдайда ғана мүмкін болады. Егер линезолидпен емдеу кезінде айтарлықтай миелосупрессия байқалса, емдеуді жалғастыру өте қажет деп танылған жағдайларды қоспағанда, емдеу тоқтатылуы тиіс. Ондай жағдайларда қанның толық талдауы көрсеткіштерінің қарқынды мониторингін және пациентті жүргізудің тиісті стратегияларын қолдану керек. Қан талдауының бастапқы көрсеткіштеріне қарамастан, аптасына 1 рет линезолид қабылдайтын науқастарда қанның толық талдауына (оның ішінде гемоглобин, тромбоциттер деңгейі, лейкоциттердің жалпы және сараланған саны) мониторинг жүргізу қосымша ұсынылады. Линезолидті ең жоғары ұсынылған кезеңнен ұзақ - 28 күн қабылдаған пациенттерде ауыр анемияның ең ұзақ даму жиілігі туралы деректер бар. Ондай пациенттер көбінесе қан құюды қажет етеді. Сидеробластты анемия жағдайлары постмаркетингтік кезеңде тіркелген. Сидеробластты анемия линезолидті 28 күннен артық қабылдаған пациенттердің көпшілігінде байқалды. Пациенттердің көпшілігі линезолидті қабылдауды тоқтатқаннан кейін толық немесе ішінара қалпына келді. Қанның катетермен астасқан грамоң инфекциялары бар пациенттерде клиникалық сынақтағы өлім-жітім көрсеткіштерінің теңгерімсіздігі Ванкомицин/диклоксациллин/оксациллин біріктірілімімен салыстырғанда линезолидпен емделетін грамоң қоздырғыштар туындатқан катетерлік сепсистік инфекциялары бар ауыр науқастанған пациенттерде өлім-жітім деңгейінің жоғарылағаны туралы деректер бар. Линезолид пен салыстыру препараттарын қолданған кезде өлім жағдайларының жиілігі 78/363 (21,5%) және 58/363 (16,0%) құрады. Өлім-жітім деңгейіне әсер ететін негізгі фактор емдеу басталғанға дейін грамоң инфекцияның болғаны болды. Өлім-жітім деңгейі тек грамоң микроорганизмдер туындатқан инфекциясы бар пациенттердегі өлім-жітім деңгейіне (арақатынасы 0,96; 95% сенімді аралық: 0.58-1.59), ұқсас болды, бірақ емдеу басталғанға дейін кез келген басқа патогендер немесе патогенді еместер туындатқан инфекциялары бар пациенттерде линезолидте едәуір жоғары (р = 0,0162) болды (арақатынасы 2,48, 95% сенімді аралық: 1.38-4.46). Ең үлкен теңгерімсіздік емдеу кезінде және линезолидті қабылдауды тоқтатқаннан кейін 7 күн ішінде байқалды. Линезолидті қабылдаған пациенттердің көпшілігінде зерттеу барысында грамтеріс микроорганизмдер туындатқан инфекциялар қосылды және грамтеріс патогендер мен полимикробты инфекциялар туындатқан инфекциялардан болған өлім-жітім байқалды. Осылайша, терінің және жұмсақ тіндердің асқынған инфекциясы кезінде, егер баламалы емдеу нұсқалары болмаса, линезолидті грамтеріс микроорганизмдер туындатқан белгілі немесе ықтимал біріктірілген инфекциясы бар пациенттерде ғана қолдану керек. Бұл жағдайларда грамтеріс микроорганизмдерге қарсы емдеуді бір уақытта бастау керек. Антибиотик-астасқан диарея және колит Жалғанжарғақшалы колит барлық дерлік бактерияға қарсы препараттарды, соның ішінде ЛИНОЛИД® препаратын қабылдаған кезде байқалады; оның ауырлық дәрежесі шамалы және өмірге қауіп төндіретін деңгейге дейін өзгеруі мүмкін. Сондықтан бактерияға қарсы кез келген препаратты қабылдағаннан кейін диарея бойынша жүгінген пациенттерде осы диагноздың ықтималдылығын есте ұстаған жөн. Антибиотик-астасқан колитке күмән туындаған немесе расталған жағдайда ЛИНОЛИД® препаратын қабылдауды тоқтату орынды. Тиісті шаралар қабылдау қажет. Жалғанжарғақшалы колит пен Clostridium difficile астасқан диареяны қоса алғанда, антибиотик-астасқан диарея және антибиотик-астасқан колит жағдайлары туралы линезолидті қоса алғанда, барлық дерлік бактерияға қарсы препараттарды пайдалануға байланысты хабарланады, олардың ауырлық дәрежесі болмашы диареядан өлімге әкелетін колитке дейін құбылуы мүмкін. Сондықтан бұл диагнозды линезолидті қолданғанда немесе одан кейін ауыр диареясы бар науқастарда қарастыру маңызды. ЛИНОЛИД® препаратымен емдеу антибиотик-астасқан диареяға немесе антибиотик-астасқан колитке күмән туындағанда немесе расталғанда тоқтатылуы және дереу тиісті емдік шаралар қабылдануы тиіс. Бұл жағдайда ішек перистальтикасын тежейтін препараттар қарсы көрсетілімді. Артериялық қысымның жоғарылауымен байланысты ықтимал өзара әрекеттесулер Артериялық қысымның жоғарылауына тиісті бақылау жүргізілмеген жағдайда линезолидті бақыланбайтын артериялық гипертензиясы, феохромоцитомасы, тиреотоксикозы бар пациенттерде және/немесе келесі препараттар топтарының қандай да біреуін қабылдайтын пациенттерде қолдануға болмайды: тікелей және тікелей емес әсер ететін симпатомиметик дәрілер (мысалы, псевдоэфедрин), вазопрессорлық дәрілер (мысалы, адреналин, норадреналин), дофаминергиялық дәрілер (мысалы, дофамин, добутамин). Лактоацидоз Линезолидті қолданғанда лактоацидоз дамыған жағдайлар туралы хабарланады. Қайталанатын жүрек айнуды немесе құсуды, іштің ауыруын, ЛИНОЛИД® препаратын қолданған кезде қандағы бикарбонаттың төмен деңгейін қоса алғанда, метаболизмдік ацидоз белгілері мен симптомдары бар пациенттер жедел медициналық көмек алуы тиіс. Сүтқышқылды ацидоз туындаған кезде ықтимал қауіптерін салыстырып, препаратты одан әрі қолдану туралы шешім қабылдау қажет. Митохондриялық дисфункция Линезолид ақуыздың митохондриялық синтезін тежейді. Лактоацидоз, анемия және нейропатия (көру және шеткері) сияқты жағымсыз әсерлер ақуыз синтезінің тежелуі нәтижесінде туындауы мүмкін; бұл әсерлер препаратты 28 күннен артық қолданғанда жиірек байқалады. Серотониндік синдром Антидепрессанттарды қоса, линезолидті және серотонинергиялық препараттарды, атап айтқанда серотонинді кері қармаудың селективті тежегіштерін (СКҚСТ) бір мезгілде қолданумен байланысты серотониндік синдром туындаған жағдайлар туралы деректер алынды. Линезолид пен серотонинергиялық препараттарды қабылдау клиникалық тұрғыдан қажет болатын жағдайларды қоспағанда, линезолид пен серотонинергиялық препараттарды бірге қабылдауға болмайды. Бұл жағдайда пациент когнитивтік дисфункция, гиперпирексия, гиперрефлексия және қимыл-қозғалыс үйлесімінің бұзылуы сияқты серотониндік синдромның белгілері мен симптомдарын уақтылы анықтау үшін мұқият бақылауда болуы керек. Көрсетілген белгілер мен симптомдар туындаған жағдайда дәрігер осы екі немесе екі препараттың біреуін қолдануды тоқтату қажеттілігі туралы мәселені қарауы тиіс. Серотонинергиялық препаратты тоқтатқан кезде көрсетілген симптомдар басылуы мүмкін. Рабдомиолиз Линезолидті, соның ішінде таблеткалар түрінде қолданғанда рабдомиолиздің дамығаны туралы хабарланды. Егер пациентте бұлшықеттердің ауыруы, пальпациялағанда ауырсынғыштық немесе бұлшықет әлсіздігі, несеп түсінің күңгірттенуі немесе қандағы креатинфосфокиназа деңгейінің жоғарылауы сияқты рабдомиолиздің белгілері немесе симптомдары байқалса, препаратты қабылдауды тоқтатып, тиісті емді бастау керек. Гипогликемия Линезолидпен (МАО қайтымды селективті емес тежегіші) емделгенде инсулинмен немесе пероральді гипогликемиялық препараттармен ем алған қант диабеті бар пациенттерде постмаркетингтік кезеңде симптоматикалық гипогликемия жағдайлары туралы хабарланды. МАО кейбір тежегіштерін қабылдаған кезде инсулин немесе гипогликемиялық дәрілер қабылдайтын, қант диабеті бар пациенттерде гипогликемия көріністері байқалды. Линезолид пен гипогликемия арасындағы себеп-салдарлық байланыс анықталмады, бірақ қант диабеті бар пациенттерге линезолидпен емделгенде ықтимал гипогликемиялық реакциялар туралы хабарлау керек. Гипогликемия туындаған кезде инсулин немесе пероральді гипогликемиялық дәрінің дозасын төмендету немесе пероральді гипогликемиялық дәріні, инсулинді немесе линезолидті қабылдауды тоқтату қажеттілігі туындауы мүмкін. Гипонатриемия және/немесе антидиурездік гормонның талапқа сай емес секрециясы синдромы (syndrome of inappropriate antidiuretic hormone secretion, SIADH) Линезолидпен ем алған пациенттерде постмаркетингтік кезеңде гипонатриемия және/немесе SIADH дамыған жағдайлар туралы хабарланды. Тіркелген жағдайларда белгілер мен симптомдары сананың шатасуын, ұйқышылдықты, жалпы әлсіздікті қамтыды, ал ауыр жағдайларда тыныс алу жеткіліксіздігі дамыды, соның ішінде өлім жағдайлары тіркелді. Егде жастағы пациенттерде, диуретиктерді қабылдайтын пациенттерде және линезолидті қабылдағанда гипонатриемия және/немесе SIADH даму қаупі бар басқа пациенттерде қан сарысуындағы натрий деңгейіне тұрақты мониторинг жүргізу қажет. Егер гипонатриемия және/немесе SIADH белгілері мен симптомдары туындаса, препаратты қолдануды тоқтатып, тиісті демеуші ем жүргізу қажет. Шеткері және көру нейропатиясы Шеткері нейропатияның, көру нейропатиясының, көру жүйкесі невритінің дамуы, линезолид қабылдайтын пациенттерде көру қабілетінің жоғалуы көбінесе препаратты ең ұзақ ұсынылған мерзімнен - 28 күннен артық қолданғанда мүмкін болады. Көз көргіштігінің төмендеуі, түстерді қабылдаудың өзгеруі, анық көрмеу, көру аймағының ақаулары сияқты симптомдар туындаған жағдайда шұғыл офтальмологиялық тексеру ұсынылады. Линезолидті 28 күннен артық қабылдаған кезде көру функциясын үнемі бақылап отыру керек. Шеткері немесе көру нейропатиясы дамыған жағдайда линезолидті қолданудың мақсаттылығын және осыған байланысты ықтимал қауіпті таразылау керек. Туберкулезді емдеу үшін микобактерияға қарсы дәрілерді қабылдайтын немесе жақында қабылдаған науқастарда нейропатиялардың туындау қаупінің жоғарылағаны байқалады. Құрысулар Линезолидті қабылдаған науқастарда құрысулардың туындағаны туралы мәліметтер бар. Осы жағдайлардың көпшілігінде құрысу ұстамалары немесе пациенттер анамнезінде құрысулардың туындау қаупі факторларының болғаны туралы хабарланды. Пациенттер анамнезінде құрысулар мен құрысу ұстамаларының болғаны туралы дәрігерді хабардар етуі тиіс. Моноаминоксидаза тежегіштері Линезолид моноаминоксидазаның қайтымды селективті емес тежегіші болып табылады. Клиникалық деректердің шектеулі болуына байланысты линезолидті моноаминоксидаза тежегіштерімен бір мезгілде қабылдау ұсынылмайды. Тираминге бай тағамдарды пайдалану Пациенттер тираминге бай тағамдарды тұтынудан аулақ болу керек. Суперинфекция Линезолидтің ішектің қалыпты микрофлорасына тигізетін әсеріне клиникалық зерттеу жүргізілген жоқ. Антибиотиктерді қолдану сезімтал емес микроорганизмдердің өсуіне әкелуі мүмкін, мысалы, линезолидтің ұсынылған дозаларын қабылдаған пациенттердің шамамен 3% - ында клиникалық зерттеулер кезінде кандидоз байқалған. Линезолидпен емдегенде суперинфекция дамыған жағдайда тиісті шаралар қабылдау қажет. Бауыр және бүйрек жеткіліксіздігінде қолдану Бүйректің ауыр жеткіліксіздігі бар пациенттерде ерекше сақтық таныту және линезолидті болжамды пайдасы ықтимал қаупінен асып кеткен жағдайда ғана қолдану ұсынылады. Бауыр функциясының ауыр бұзылуы бар пациенттерге линезолидті болжамды пайдасы ықтимал қаупінен асып кеткен жағдайларда ғана қолдану ұсынылады. Фертильділікке әсері Линезолид фертильділікті қайтымды төмендетеді және ересек еркек егеуқұйрықтарда шәуеттің қалыптан тыс морфологиясын адамдағы ондаймен шамамен бірдей әсер ету деңгейінде индукциялайды. Линезолидтің еркек адамның ұрпақты болу жүйесіне ықтимал әсері белгісіз. Клиникалық зерттеулер Линезолидті 28 күннен артық уақыт ішінде қолданған кезде оның қауіпсіздігі мен тиімділігі анықталмаған. Табанның диабеттік зақымдануы, ойылулар, ишемиялық зақымданулары, ауыр күйіктері немесе гангренасы бар пациенттерде линезолидті қолдану тәжірибесі шектеулі. Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері Орталық жүйке жүйесі тарапынан жағымсыз реакциялардың болуына байланысты емдеу кезеңінде көлікті немесе қауіптілігі зор механизмдерді басқару ұсынылмайды.

ЛИНОЛИД® жүктілік кезінде және лактация кезеңінде қолдануға болмайды. Линезолид фертильділікті қайтымды төмендетеді және ересек еркек егеуқұйрықтарда шәуеттің қалыптан тыс морфологиясын адамдағы ондаймен шамамен бірдей әсер ету деңгейінде индукциялайды. Линезолидтің еркек адамның ұрпақты болу жүйесіне ықтимал әсері белгісіз.

Моноаминоксидаза тежегіштері Линезолид моноаминоксидазаның қайтымды селективті емес тежегіші болып табылады. Линезолидпен өзара әрекеттесудің клиникалық зерттеулерінің деректері шектеулі. Сондықтан, егер пациентті мұқият бақылау және мониторинг жүргізу мүмкін болмаса, линезолидті моноаминоксидаза тежегіштерімен бір мезгілде қабылдау ұсынылмайды. Артериялық қысымның жоғарылауына әкелетін препараттармен өзара әрекеттесуі Линезолидті псевдоэфедринмен немесе фенилпропаноламинмен бірге қабылдау тек линезолидті қабылдаған кезде 11-15 мм сын.бағ. жоғарылауымен салыстырғанда систолалық артериялық қысымның 30-40 мм сын.бағ. және тек псевдоэфедрин немесе фенилпропаноламинді қабылдаған кезде 14-18 мм сын.бағ. және плацебомен қабылдаған кезде 8-11 мм сын.бағ. жоғарылауына әкеледі. Вазопрессорлық әсері бар дәрілік препараттардың, оның ішінде дофаминергиялық препараттардың дозасын титрлеу ұсынылады. Серотонинергиялық заттар Линезолидтің декстрометорфанмен дәрілік өзара әрекеттесуі дені сау еріктілерде зерттелді. Субъектілер декстрометорфанды (4 сағаттан кейін 20 мг-ден 2 доза) линезолидпен және линезолидсіз қабылдады. Линезолид пен декстрометорфанды қабылдаған еріктілерде серотониндік синдром (сананың шатасуы, сандырақтау, мазасыздық, тремор, қызару, терлеу, гиперпирексия) байқалмады. Постмаркетингтік қолдану тәжірибесі: линезолид пен декстрометорфанды қабылдағанда серотониндік синдромы бар науқас туралы бір хабарлама болды, ол екі препаратты қабылдауды тоқтатқаннан кейін кетті. Линезолидті серотонинергиялық препараттармен, оның ішінде антидепрессанттармен, мысалы серотонинді кері қармаудың селективті тежегіштерін (СКҚСТ) қолданғанда серотониндік синдром жағдайлары тіркелді. Тираминге бай тағамдарды қабылдау 100 мг-ден кем емес мөлшерде линезолид пен тирамин қабылдаған науқастарда елеулі прессорлық жауап байқалған жоқ. Тирамин мөлшері көп тағамдар мен сусындарды тұтынудан аулақ болу керек (мысалы: ірімшік, ашытқы экстрактілері, дистилденбеген алкогольдік сусындар, соя соусы). P450 цитохромымен метаболизденетін препараттар Р450 цитохромының изоферменттері in vitro линезолид метаболизміне қатыспайтыны анықталды. Линезолид Р450 (1А2, 2С9, 2С19, 2D6, 2Е1, 3А4) цитохромының клиникалық маңызды изоферменттерінің белсенділігін тежемейді және күшейтпейді. Рифампицин Линезолидтің фармакокинетикасына рифампициннің әсері 2,5 күн бойы күніне 2 рет 600 мг линезолид және 8 күн бойы күніне 1 рет 600 мг римфампицин қабылдаған 16 дені сау ересек еркек еріктіде зерттелген. Рифампицин линезолидтің Cmax және AUC орта есеппен сәйкесінше 21% [90% CI, 15, 27] және 32% [90% CI, 27, 37] азайтты. Бұл өзара әрекеттесу механизмі және оның клиникалық маңызы белгісіз. Варфарин Варфарин мен линезолидті стационарлық жағдайларда бірге қолданған кезде линезолидтің AUC 5% - ға төмендегені байқалды. Осы нәтижелердің клиникалық маңыздылығын бағалау үшін деректер саны жеткілікті емес.

Сақтау мерзімі 3 жыл. Жарамдылық мерзімі өткеннен кейін қолдануға болмайды. Сақтау шарттары Түпнұсқалық қаптамасында 25ºС-ден аспайтын температурада сақтау керек. Балалардың қолы жетпейтін жерде сақтау керек!