Магнефар В6 таблетки

Бір таблетканың құрамында белсенді заттар: магний гидроаспарагинат тетрагидраты - 500 мг (34 мг магнийге баламалы), пиридоксин гидрохлориді - 5 мг. қосымша заттар: микрокристалды целлюлоза, магний стеараты, гипромеллоза. Сыртқы түрінің, иісінің, дәмінің сипаттамасы Ұзынша пішінді, екі беті дөңес, бір жағында сызығы бар, ақ түсті таблеткалар.

Магнефар В6 магний тапшылығын емдеуге ұсынылады, мұны төменде аталған симптомдар дәлелдейді: - дене немесе психикалық шаршау, қатты ашушаңдық, күйгелектік, үрейлену жағдайы; - бұлшықеттің құрысуы, бұлшықеттің шаншуын сезіну; - жүрек соғуының жиілеуі (жүрек тарапынан патология жоқ).

Фармакодинамикалық әсері Магний жүйке, сүйек-буын, тыныс алу, жүрек-қантамыр, гормональді, қан түзу және иммундық жүйелердің физиологиялық үдерістеріне қатысады. Есту және көру жүйкесі белсенділігіне әсер етеді. Күйзеліске сезімталдықты (эмоционалды тепе-теңдік болмағанда, тынышсыздық, етеккір алдындағы ширығу синдромымен байланысты шаршау сезімі, депрессия, бас сақинасы, қиын ақыл-ой еңбегі кезінде) азайтады, жүйке-бұлшықет қозғыштығын (бұлшықет дірілінде, балаларда зейін қою тапшылығы синдромы және жоғары қимыл белсенділігі, жоғары қимыл белсенділігі – ауыр дене жұмысы, спортпен айналысу кезінде) төмендетеді, бұлшықеттердің физиологиялық жиырылуының шарты (мысалы балтырдың түнгі құрысулары кезінде) болып табылады, жүрек бұлшықеттеріне қорғағыш әсер береді (жүрек жеткіліксіздігі, артериялық гипертония кезінде), жүрек бұлшықеттері ишемиясына қарсы әсер етеді. Антикоагулянттық фактор рөлін атқарады және қан тамырларында кальцийдің шөгуін болдырмайды, сондай-ақ сүйек жүйесінің дұрыс дамуы мен минералдануына әсері етеді. Ересек адамда магний қажеттілігі күніне дене салмағына қарай 5 мг/кг құрайды (яғни 270-350 мг, немесе 11-14 ммоль Mg2+). Жоғары тапшылық жағдайында, қарқынды дене жүктемесі, балалардың жылдам өсуі кезеңінде, жүкті және бала емізетін әйелдердегі қажеттілік дене салмағының 7-10 мг/кг дейін артады. Магний тапшылығы жүйке мен бұлшықеттің тітіркенуін арттырады, тремор, атаксия, жүрек ырғағының бұзылуы, тахикардия пайда болуы мүмкін, организмнің стресске қарсы тұру қабілеті төмендеуі мүмкін. Келесі симптомдардың пайда болуы магний тапшылығының белгісі болуы мүмкін: -ашушаңдық, күйгелектік, жеңіл мазасыздық, уақытша шаршау, орташа ұйқышылдық -асқазан-ішек түйілуі немесе үрейлену белгісі сияқты жүректің қағуы жиілеуі (жүректің бұзылыстары болмайтын) -бұлшықет түйілуі (балтырдың түйілуі), ұюы. Магнийді қосымша ретінде қабылдау бұл симптомдарды жеңілдетуі мүмкін. Пиридоксин суда еритін дәрумен болып табылады және аминқышқылдарының метаболизміне жауап беретін ферменттердің коферменті болып табылады. Магнийден басқа, ақуыз биосинтезі үшін B6 дәруменінің мөлшері де маңызды. В6 дәрумені гемоглобин синтезі үшін де маңызды. Магний мен пиридоксиннің синергиялық әсері болады, өйткені пиридоксин магнийдің сіңуіне ықпал етеді. Клиникалық аспектілері: қан сарысуындағы құрамының 12-ден 17 мг/л дейінгі (0,5-тен 0,7 ммоль/л-ге дейін) деңгейі магнийдің орташа тапшылығын көрсетеді, ал қан сарысуындағы деңгей 12 мг/л (0,5 ммоль/л) - ден төмен болса, бұл магнийдің аса тапшылығын көрсетеді. (Алайда, магний жасушаішілік ион екенін ескерсек, сарысулық магний деңгейі организмдегі магний гомеостазымен талапқа сай сәйкес келмейді. Магний тапшылығы болған кезде магний деңгейін бақылау тек ақпараттық нәтиже береді. Организмдегі магний деңгейінің айқын көрінісін қанның эритроциттеріндегі магнийді бақылау ғана береді.) Магний тапшылығының себептері мыналар болуы мүмкін: -бастапқы, туа біткен магний метаболизмі ауытқуларынан туындаған -салдарлық: жеткіліксіз түсіп тұрудан туындаған (дұрыс тамақтанбаудың ауыр түрі, алкоголизм, толық парентеральді тамақтану, мальабсорбция, созылмалы диарея, асқазан-ішек жыланкөзі) немесе бүйрек функциясы бұзылуында магнийдің шамадан тыс жойылуы салдарынан (созылмалы пиелонефрит, гломерулонефрит, тиазид және өзекшелік диуретиктер қабылдау салдарынан болатын полиурия, бүйрек трансплантациясынан кейінгі диурез, бүйрек өзекшелері аурулары, Барттер синдромы, диабеттік кетоацидоз, созылмалы стрессте аминогликозидтер, циклоспорин және цисплатин қабылдау) және кейбір гормондық бұзылуларда (мысалы, гипопаратиреозда, бастапқы гиперальдостеронизмде).

Дозалану режимі • Ересектер мен 12 жастан асқан балаларға: тәулігіне 3 рет 1 немесе 2 таблеткадан. 6-дан 12 жасқа дейінгі және салмағы 20-дан 40 кг дейінгі балаларға: тәулігіне 3 рет 1 таблеткадан (ең жоғары бір реттік доза – 1 таблетка, ең жоғары тәуліктік доза – 3 таблетка). Профилактикасы үшін: - ересектер мен 12 жастан асқан балаларға: тәулігіне 1 рет 1 немесе 2 таблеткадан. Дозаның кез келген ұлғайтылуын дәрігермен кеңескен жөн. Енгізу әдісі және жолы Ішке қабылдау үшін. Магнефар В6 дұрысы аздаған мөлшердегі сұйықтықпен іше отырып, тамақтан соң қабылдау керек. Емдеу ұзақтығы Емдеуді магний тапшылығының симптомдары жойылғанша жалғастыру керек. Дәрілік препаратты қолдану тәсілін түсіндіру үшін медициналық қызметкер кеңесіне жүгіну жөніндегі ұсыныстар Осы препаратты қолдануға қатысты қандай да бір сұрақтар туындаған жағдайда емдеуші дәрігермен немесе фармацевтпен хабарласыңыз.

• әсер етуші заттарға немесе қосымша заттардың кез келгеніне аса жоғары сезімталдық • ауыр бүйрек жеткіліксіздігі (креатинин клиренсі 30 мл/мин/1.73 м2 аз) • леводопамен бір мезгілде қабылдау препарат құрамында пиридоксиннің болуына байланысты ұсынылмайды • су-тұз теңгерімінің ауыр бұзылулары • 6 жасқа дейінгі балалар • гипермагниемия • В6 дәруменінің гипервитаминозы • айқын артериялық гипотония • атриовентрикулярлық блокада • myasthenia gravis.

Сирек - диарея - іштің ауыруы Өте сирек - аллергиялық реакциялар Белгісіз (қолда бар деректер негізінде бағалау мүмкін емес) -тері реакциялары Жағымсыз дәрілік реакциялар туындағанда медициналық қызметкерге, фармацевтикалық қызметкерге немесе, дәрілік препараттардың тиімсіздігі туралы хабарламаларды қоса, дәрілік препараттарға болатын жағымсыз реакциялар (әсерлер) жөніндегі ақпараттық деректер базасына тікелей хабарласу керек Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

Үлкен дозаларды ұзақ уақыт қабылдау гипермагнезиемияға әкелуі мүмкін. Ішке қабылдаған кезде магнийдің артық дозалануы бүйрек функциясы қалыпты пациенттерде уытты реакциялардың пайда болуына әкелмейді. Бүйрек жеткіліксіздігі бар пациенттерде магниймен улану дамуы мүмкін. Уыттылық деңгейі қандағы магний концентрациясына байланысты және келесі белгілер мен симптомдарды тудыруы мүмкін: - қан қысымының төмендеуі - жүрек айнуы, құсу - ОЖЖ бәсеңдеуі, бұзылған рефлекстер - ЭКГ патологиялық өзгерістері - тыныстың бәсеңдеуі дамуы, кома, жүрек тоқтауы және тыныс алудың салдануы - анурия Емі: регидратация, қарқынды диурез. Бүйрек жеткіліксіздігі кезінде гемодиализ немесе перитонеальді диализ қажет. Арнайы антидоты – кальций глюконаты.

-Магний тапшылығы ауыр болған жағдайда емдеуді дәрілік затты парентеральді енгізумен бастау керек, сондай-ақ ауыр дәрежедегі мальабсорбция синдромы бар пациенттерге де парентеральді енгізу ұсынылады. -Кальций тапшылығы қатарласқанда кальцийді қосымша ретінде қабылдамас бұрын алдымен магний жетіспеушілігін жою керек. -Жеңіл және орташа бүйрек жеткіліксіздігі жағдайында пациент қан плазмасындағы магний деңгейін мұқият бақылай отырып (кез келген этиологиядағы гипермагниемия туындау қаупінің алдын алу үшін) препараттың азайтылған дозасымен ем ала алады. -Магний деңгейінің жоғарылауы жүрек жұмысына әсер етеді, қан қысымын сәл төмендетеді, жүрек импульсінің өтуін баяулатады, жүрек функциясын әлсіретеді, сондықтан препарат дигитализацияланған пациенттерге тек мұқият медициналық бақылауда (ЭКГ бақылауы, қан қысымының төмендеуі) тағайындалуы мүмкін. -Пиридоксиннің созылмалы артық дозалануының негізгі әсері егер пиридоксиннің жоғары дозалары ұзақ уақыт бойы (бірнеше ай және басқа жағдайларда көптеген жылдар бойы) қабылданса пайда болуы мүмкін сенсорлық, аксональді нейропатия болып табылады, бірақ бұл аз мөлшерде (тәулігіне 50-300 мг) қабылдаған кезде де болуы мүмкін. Симптомдарына мыналар жатады: ұйып қалуы және дене қалпын сезіну бұзылуы, аяқ-қолдың дистальді треморы және біртіндеп үдейтін сенсорлық атаксия (қозғалыстардың үйлесімі бұзылуы). Бұл әсер, әдетте, пиридоксинді тоқтатқаннан кейін қайтымды болады. - Таблеткалар ересектер мен 6 жастан асқан балаларды емдеуге арналған. Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері Анықталмаған

Жүкті немесе бала емізетін әйелдерде қолдану қауіпсіздігіне қатысты қолжетімді деректердің болмауына байланысты ең жоғары ұсынылатын емдік дозалардан асып кету ұсынылмайды (яғни әрбір компоненттің, атап айтқанда магнийдің ұсынылатын тәуліктік нормасы: күніне 250 мг; B6 дәруменінің ұсынылатын тәуліктік нормасы: күніне 25 мг).

Қарсы көрсетілімдері бар біріктірілімдер -Леводопамен бір мезгілде тағайындаудан аулақ болу керек, өйткені леводопаның белсенділігі, егер бұл препаратты қабылдау шеткері допа-декарбоксилаза тежегіштерін қабылдаумен біріктірілмесе В6 дәруменімен шеткері тежеледі және леводопа гематоэнцефалды бөгеттен өте алмайды. Осылайша, леводопаның әсері бәсеңдетіледі. Ұсынылмайтын біріктірілімдер: - флюорохинолондар тобының антибиотиктерімен, - пероральді антикоагулянттармен – ең алдымен варфарин туындыларымен, - фосфатты немесе кальций тұздарымен, құрамында темір II иондары бар препараттармен, өйткені бұл ретте олардың жіңішке ішекте сіңуі өзара бәсеңдейді. Сақтықпен қолдану керек біріктірілімдер -Пероральді тағайындалған тетрациклиндермен, бифосфонаттармен, оймақгүл гликозидтерімен және натрий фторидімен қатар емдеу жағдайында магний препараттарын қабылдау кезінде осы препараттардың кез-келгенін қабылдағаннан кейін кем дегенде 3 сағат аралықты сақтау керек, өйткені магний олардың асқазан-ішек жолында сіңуін төмендетеді. Несеп айдайтын препараттар (фуросемид, этакрин қышқылы) несеппен магний бөлінуін арттырады. Калийді сақтайтын, ұзақ уақыт қолданылатын несеп айдайтын препараттар бүйрек өзекшелерінде магнийдің резорбциясын жоғарылатып, гипермагниемияға әкелуі мүмкін Магний гидроаспарагинатымен бір уақытта қабылданатын іш жүргізетін дәрілер және асқазан сөлін бейтараптандырғыштар сияқты құрамында магний бар басқа тағамдар, әсіресе бүйрек жеткіліксіздігі бар адамдарда магниймен улану симптомдарын тудыруы мүмкін.

Сақтау мерзімі 3 жыл Жарамдылық мерзімі өткеннен кейін қолдануға болмайды. Сақтау шарттары Құрғақ жерде 25 ºС-ден аспайтын температурада сақтау керек. Балалардың қолы жетпейтін жерде сақтау керек!