Магникум таблетки

Бір таблетканың құрамында: белсенді зат: 470.0 мг магний лактаты дигидраты, 100% құрғақ затқа шаққанда, бұл 48.0 мг магнийге және 5.0 мг пиридоксин гидрохлоридіне баламалы, қосымша заттар: микрокристалды целлюлоза, поливинил спирті, сусыз коллоидты кремнийдің қостотығы, тальк, магний стеараты, қабық: ішекте еритін үлбірлі жабынға арналған қоспа Acryl-Eze White (метакрил қышқылының кополимері, сусыз коллоидты кремнийдің қостотығы, натрий бикарбонаты, натрий лаурилсульфаты, тальк, титанның қостотығы (Е 171), триэтил цитраты). Сыртқы түрінің, иісінің, дәмінің сипаттамасы Екі беті дөңес, ұзынша пішінді, ақ немесе ақ дерлік түсті ішекте еритін қабықпен қапталған таблеткалар.

Препарат ересектерде, жасөспірімдерде, 6 жастан асқан балаларда қолданылады. - Оқшауланған немесе астасқан анықталған магний тапшылығы. Келесі симптомдардың біріктірілімі магний тапшылығын растауы мүмкін: • күйгелектік, ашушаңдық, жеңіл дәрежедегі үрей жағдайы, өтпелі шаршау, ұйқының шамалы бұзылуы • асқазан-ішектің түйілуі немесе жүрек қағуының жиілеуі сияқты үрей белгілері (жүрек тарапынан ешқандай патологиясысыз) • бұлшықет құрысуы, бұлшықеттегі шаншу сезімі

ATХ коды A12CC30 Препараттың емдік әсері оның екі белсенді компонентінің синергетикалық әсерінің нәтижесі болып табылады, олардың адам мен жануарлар организмінің биохимиялық реакцияларына кеңінен қатысатыны белгілі. Магний – барлық ферментативті, АТФ-тәуелді реакциялардың таптырмас құрамдас бөлігі; ол көмірсулар, ақуыздар және майлар метаболизміне, сондай-ақ тотығу-тотықсыздану реакцияларына қатысады. Магний гликолитикалық ферменттерді, жасушалық тотығу ферменттерін, нуклеин қышқылының синтез ферменттерін белсендіреді; ол миокардтың жиырылу процестерінде де маңызды рөл атқарады. Магний – тромбоциттер мен фибриноген стабилизаторы. Артериялық гипертензия, тамыр түйілуі, неопластикалық аурулар және нсеп-тас ауруы кезіндегі магний тапшылығының патогенетикалық рөлі жалпыға бірдей танылған. Магний жүйке-бұлшықет қозуында жетекші рөл атқарады – бұл процесте ол кальций антагонисті болып табылады. Пиридоксин негізінен амин қышқылдарының метаболизміне қатысады, пиридоксальфосфат түрінде декарбоксилдену мен қайта аминденуді, сондай-ақ көмірсулар мен майларды катализдейтін ферменттердің құрамына кіреді. Амин қышқылдарының жарғақша арқылы тасымалдануына ықпал етеді, фосфорилазаны белсендіру, нейротрансмиттерлер, гамма-аминмай қышқылы, глицин, серотонин түзілуі үшін қажет. В12 дәруменінің, фолий қышқылының алмасуына, порфириндердің, қанықпаған май қышқылдарының синтезіне қатысады. Миокардтағы метаболизмдік процестерді іске қосады, әсіресе гипоксия кезінде нейротропты, гемопоэздік, кардиотропты және гепатотропты қасиеттерге ие болуы мүмкін. Магний мен В6 дәруменінің өзара әрекеттесу механизмі әлі нақты анықталған жоқ. Тапшылық симптомдары, сондай-ақ екі компоненттің де артық дозалануы ұқсас, алайда В6 дәруменінің тапшылық құбылыстары магний тапшылығы кезінде айқынырақ, өйткені магний пиридоксинге тәуелді ферментативті жүйелерді іске қосу үшін қажет.

Дозалау режимі Профилактика: ересектер мен балалар 12 жастан бастап – тәулігіне 1 рет 2 таблетка немесе тәулігіне 2 рет 1-2 таблетка. Емі: тек дәрігердің нұсқауы бойынша. Емдеу ұзақтығын дәрігер анықтайды. Үлбірлі қабықпен қапталған таблеткаларды 6 жасқа дейінгі балаларға тағайындауға болмайды. 6 жастан асқан балалар үшін (дене салмағы >20 кг) 5-10 мг/кг/тәу магний тағайындаңыз, яғни жасына және дене салмағына байланысты күніне 2-4 таблеткадан, оларды 2-3 қабылдауға бөліңіз. Енгізу әдісі және жолы Таблетканы бүтіндей бір стақан сумен ішіп, жұту керек. Дәрілік препараттың бір немесе бірнеше дозасын жіберіп алған кезде қажетті шаралар Жіберіп алған препарат дозасының орнын толтыру үшін қосарлы дозаны қабылдамаңыз. Келесі таблетканы әдеттегі уақытта қабылдаңыз. Дәрілік препаратты қолдану тәсілін түсіндіру үшін медицина қызметкеріне консультацияға жүгіну бойынша нұсқаулар Препаратты қолданар алдында дәрігермен кеңесіңіз.

• әсер етуші заттарға немесе қосымша заттардың кез келгеніне аса жоғары сезімталдық • бүйректің ауыр жеткіліксіздігі (креатинин клиренсі 30 мл/мин/1.73 м2-ден аз) • препарат құрамындағы пиридоксин мөлшеріне байланысты леводопамен бір мезгілде қабылдау ұсынылмайды • су-тұз теңгерімінің ауыр бұзылуы • 6 жасқа дейінгі балалар

Жағымсыз құбылыстардың жиілігін анықтау мынадай критерийлерге сәйкес жүргізіледі: өте жиі (≥ 1/10), жиі (≥ 1/100-ден < 1/10-ға дейін), жиі емес (≥ 1/1000-нан < 1/100-ге дейін), сирек (≥ 1/10000-нан < 1/1000-ға дейін), өте сирек (< 1/10000), белгісіз (қолда бар деректер негізінде бағалау мүмкін емес). Өте сирек -асқазан-ішек жолдары тарапынан бұзылыстар (іш ауыруы, іш қату, диарея, жүрек айнуы, құсу) - аллергиялық реакциялар, соның ішінде қышыну, есекжем, тері бөртпесі. Жағымсыз дәрілік реакциялар туындаса медицина қызметкеріне, фармацевтика қызметкеріне немесе дәрілік препараттардың тиімсіздігі туралы хабарламаларды қоса, дәрілік препараттарға жағымсыз реакциялар (әсерлер) бойынша ақпараттық деректер базасына тікелей хабарласыңыз Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

Магнийді пероральді қолданған кезде оның артық дозалануы, әдетте, бүйрек функциясы қалыпты пациенттерде уытты реакциялардың дамуына әкелмейді. Алайда, бүйрек жеткіліксіздігі бар пациенттерде магниймен уыттану дамуы мүмкін. Бұл ретте уытты әсерлер қандағы магний деңгейіне байланысты. Симптомдары: жүрек айну, құсу, артериялық гипотензия, орталық жүйке жүйесінің бәсеңдеуі, бұлшықет әлсіздігі, тыныс алудың бәсеңдеуі, ЭКГ-дағы патологиялық өзгерістер, кома, жүрек тоқтауы және тыныс алудың салдануы, анурия, аяқ-қолдың ауыруы, рефлекторлық функциялардың бұзылуы. Емі: регидратация, мәжбүрлі диурез. Бүйрек жеткіліксіздігінде гемодиализ немесе перитонеальді диализ қажет. Симптоматикалық терапия.

Балаларда қолдану Қабықпен қапталған таблеткалар ересектер мен 6 жастан асқан балаларды емдеуге арналған. Бүйрек жеткіліксіздігі Жеңіл және орташа бүйрек жеткіліксіздігі жағдайында пациент қан плазмасындағы магний деңгейін мұқият бақылай отырып (кез келген этиологиядағы гипермагниемия қаупін болдырмау үшін) препараттың азайтылған дозасымен ем ала алады. Басқа жағдайлар Магнийдің ауыр тапшылығы жағдайында емдеуді препаратты парентеральді енгізуден бастау керек, сондай-ақ ауыр дәрежедегі мальабсорбция синдромы бар пациенттерге парентеральді енгізу ұсынылады. Қатарлас кальций тапшылығы кезінде, кальцийді қоспа түрінде алудан бұрын, алдымен магний тапшылығын жою керек. Магний деңгейінің жоғарылауы жүректің жұмысына әсер етеді, артериялық қысымды сәл төмендете отырып, жүрек импульсін баяулатады, жүрек функциясын әлсіретуі мүмкін, сондықтан препаратты дигитализацияланған пациенттерге тек мұқият медициналық бақылаумен (ЭКГ бақылау, қан қысымының төмендеуі) тағайындауға болады. Тек пиридоксин үшін: Пиридоксинмен созылмалы артық дозаланудың негізгі әсері сенсорлық, аксональді нейропатия болып табылады, ол егер пиридоксиннің жоғары дозалары ұзақ уақыт бойы (бірнеше ай немесе жылдар) қабылданса, пайда болуы мүмкін. Бұл дәрілік заттың құрамында 1 дозада натрий <1 ммоль (23 мг) бар, яғни іс жүзінде натрий жоқ. Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері Дәрілік зат автокөлік құралдарын басқару қабілетіне және ықтимал қауіпті механизмдермен жұмыс істеуге әсер етпейді.

Дәрілік затты қолдану шаранаға қандай да бір қауіп төндіретіні белгісіз, өйткені жүктілік кезінде тиісті зерттеулер жүргізілмеген. Сондықтан жүктілік кезінде немесе бала емізу кезінде дәрілік затты қолдану туралы мәселені әйелге пайдасы/шаранаға (балаға) қауіп арақатынасын ескере отырып, әр пациент үшін жеке дәрігер ғана шешеді.

Қарсы көрсетілімдері бар біріктірілімдер -Леводопамен бір мезгілде тағайындаудан аулақ болу керек, өйткені бұл препаратты қабылдау шеткері допа-декарбоксилаза тежегіштерімен біріктірілмесе, леводопаның белсенділігі В6 дәруменімен шеткері тежеледі. Ұсынылмайтын біріктірілімдер -Фосфаттар немесе кальций тұздары негізіндегі препараттарды және құрамында темір II иондары бар препараттарды бір мезгілде қабылдау ұсынылмайды, өйткені мұндай өнімдер ішекте магнийдің сіңуіне кедергі жасайды. Сақтықпен пайдалану керек біріктірілімдер -Пероральді тағайындалған тетрациклиндермен, бифосфонаттармен, оймақгүл гликозидтерімен және натрий фторидімен қатар емдеу кезінде қабықпен қапталған Магникум таблеткаларын қабылдағанда осы препараттардың кез келгенін қабылдағаннан кейін кемінде 3 сағат аралықты сақтау қажет, өйткені магний олардың асқазан-ішек жолында сіңуін төмендетеді. - Хинолондарды құрамында магний бар препараттардан кем дегенде 2 сағат бұрын немесе олардың сіңуіне әсер етпеу үшін құрамында магний бар препараттардан 6 сағаттан кейін қабылдау керек.

Сақтау мерзімі 3 жыл Жарамдылық мерзімі өткеннен кейін қолдануға болмайды! Сақтау шарттары Түпнұсқалық қаптамасында, 25С-ден аспайтын температурада сақтау керек. Балалардың қолы жетпейтін жерде сақтау керек!