Маннитол-Келун-Казфарм раствор 15%

Бір мл препарат құрамында белсенді зат – 150.0 мг маннитол, қосымша заттар: натрий хлориді, инъекцияға арналған су. Сыртқы түрінің, иісінің, дәмінің сипаттамасы Мөлдір түссіз сұйықтық.

Маннитол 15% вена ішіне енгізуге арналған ерітінді мынадай жағдайларда диурездік дәрі ретінде қолданылады: • қайтымсыз бүйрек жеткіліксіздігінің түпкілікті диагнозын қойғанға дейін олигуриялық сатысында бүйректің жедел жеткіліксіздігі профилактикасы және/немесе емдеу кезіндегі қарқынды диурез; • гематоэнцефалдық бөгет зақымданбаған кезде бассүйекішілік қысымын және ми ісінуін төмендету; • басқа дәрілермен төмендетуге келмейтін жоғары көзішілік қысымын төмендету; • улану кезінде уытты заттарды бүйрек арқылы қарқынды шығару.

Маннитол плазманың осмолярлығын арттырады, сұйықтықтың тіндерден қан тамырларына ауысуын тудырады. Маннитол күшті несеп айдағыш әсерге ие. Маннитолдың диуретикалық әсер ету қағидаты оның бүйрек шумақтарында жақсы сүзілетіндігінде болып табылады, бүйрек түтікшелерінің саңылауында жоғары осмостық қысым жасайды (маннитол кері сіңірілуге аз ұшырайды) және судың қайта сіңірілуін төмендетеді. Ол негізінен проксимальды түтікшелерде жүреді, дегенмен, әсері белгілі бір дәрежеде нефронның төменгі ілмегінде және жинақтайтын түтікшелерде сақталады. Басқа осмостық диуретиктерден айырмашылығы, маннитол бос суды көп мөлшерде кетіруге қабілетті. Диурез калийдің шығарылуына айтарлықтай әсерін тигізбестен натрий мен хлордың елеулі бөлінуімен қатар жүреді. Маннитолды тағайындау кезінде пайда болатын натрийурездің суға қарағанда мөлшері аз екенін есте ұстаған жөн, бұл кейде гипернатриемияға алып келеді. Маннитол қышқылдың негізгі күйіне айтарлықтай әсерін тигізбейді. Маннитолдың несеп айдағыш әсері бүйрек арқылы сүзілген препараттың көлеміне байланысты. Препараттың концентрациясы мен оны енгізу жылдамдығы неғұрлым жоғары болса, әсер соғұрлым айқын болады. Бүйрек шумақтарының сүзу функциясы бұзылғанда маннитол ерітіндісінің диуретикалық әсерінің болмауы мүмкін.

Дозалау режимі Маннитолды вена ішіне баяу сорғалатып немесе тамшылатып енгізеді. Маннитол 15% ерітіндісінің емдік дозасы 1,0-1,5 г/кг құрайды. Маннитолдың тәуліктік дозасы 140-180 г аспауы керек. Ересектерге тәулігіне 50-100 г маннитолды (330-дан 660 мл-ге дейін) диурез деңгейін кемінде 30-50 мл/сағ жылдамдықпен енгізеді. Ересектерде улану кезінде 50-200 г инфузия жылдамдығымен 5 минут ішінде енгізіледі. 5 минуттан кейін инфузия жылдамдығы 200 г / 24 сағат ең жоғары дозада сағатына кемінде 30-50 мл несеп ағынын ұстап тұратындай етіп қайта түзетіледі. Олигурия немесе бүйрек жеткіліксіздігі бар пациенттерде пайдалану Олигуриясы айқын немесе бүйрек функциясының бұзылуына күдік бар пациенттерге 3-5 минут ішінде маннитолдың сынама дозасын (дене салмағына 200 мг/кг немесе 1.3 мл/кг) вена ішіне тамшылатып алдын ала енгізу керек. Мысалы, салмағы 70 кг болатын ересек адамға шамамен 100 мл 15% маннитол ерітіндісі енгізіледі. Егер 2-3 сағат ішінде несеп 30-50 мл/сағаттан төмен болмайтын жылдамдықпен шығарылса, сынамалық дозаға жауап талапқа сай деп есептеледі. Егер мұндай адекватты реакцияға қол жеткізу мүмкін болмаса, пациентке қосымша сынақ дозасын енгізуге болады. Егер маннитолды қайта енгізу кезінде қажетті реакция алынбаса, препаратпен емдеу тоқтатылады және пациентте бүйрек жеткіліксіздігінің болуына қайта тексеру жүргізіледі. Бассүйекішілік қысымның, мидың ісінуінің және көзішілік қысымның төмендеуі Стандартты доза дене салмағының 1.5-2 г/кг (10-13 мл/кг) 30-60 минут ішінде вена ішіне тамшылатуынан құралады. Егер инфузия операция алдында енгізілсе, онда ең жоғары әсерді алу үшін дозаны хирургиялық араласу басталғанға дейін 1-1.5 сағат бұрын енгізу керек. Улану кезінде уытты заттарды бүйрек арқылы қарқынды шығару Қарқынды диурез кезінде маннитолдың дозасы несептің шығарылу жылдамдығы 100 мл/сағ төмен болмайтын деңгейде сақталатындай етіп түзетіледі. Емнің мақсаты - 1-2 литр оң су теңгеріміне қол жеткізу. Пациенттерге бастапқы 25 мг (165 мл) жүктеме дозасын енгізуге болады. Пациенттердің ерекше топтары Педиатрияда қолдану Бүйрек жеткіліксіздігі кезінде 200 мг маннитол/кг (1.3 мл/кг) сынама дозасы 3-5 минут ішінде вена ішіне тамшылатып енгізіледі. Дозалардың емдік ауқымы дене салмағының 0.5-1.5 г/кг (3-10 мл/кг) құрайды. Қажет болған жағдайда, сынама дозаны 4-8 сағат аралықпен бір рет немесе екі рет енгізуге болады. Жоғары бассүйекішілік немесе көзішілік қысымды емдеу кезінде дозаны ересек пациенттердегідей 30-60 минут ішінде енгізуге болады. Егде жастағы пациенттерде қолдану Ересек пациенттердегі сияқты, доза пациенттің дене салмағына, клиникалық және биологиялық жағдайына, бірге қабылданатын препараттарға байланысты. Дозалардың стандартты ауқымы ересектердегі сияқты, яғни тәулік ішінде 50-200 г маннитолды (тәулігіне 330-1320 мл) құрайды, бұл ретте бір реттік доза 50 г маннитолдан (330 мл) аспауы тиіс. Пациенттерде бүйрек жеткіліксіздігінің болу мүмкіндігін ескере отырып, дозаны таңдау кезінде сақ болу керек. Маннитолды ұзақ уақыт қолдану ұсынылмайды. Енгізу әдісі мен жолы Ерітінді вена ішіне стерильді және апирогенді инфузиялық жүйе арқылы енгізіледі. Ерітіндінің осмолярлығына назар аудару керек. Шамадан тыс жоғары осмолярлығы веналарға зақым келтіруі мүмкін. Бұл гипертониялық ерітіндіні ірі шеткергі немесе орталық вена арқылы енгізу керек. Шеткергі веналар арқылы тез құйылу жылдамдығы пациенттің денсаулығына зиян келтіруі мүмкін. Маннитол кристалдарының пайда болу қаупі бар болғандықтан, кірістірілген түпкілікті сүзгісі бар инфузиялық жүйелерді пайдаланыңыз және асептикалық жұмыс әдістерін қолданыңыз. Жүйеге ауаның кіруіне жол бермеу үшін оны алдымен инфузиялық ерітіндімен жуу керек. Үлбірлі қаптамадан инфузиялық жиынтықты дәл қолданар алдында алыңыз. Ішкі пакет өнімнің стерильділігін сақтап тұрады. Ерітіндіні тек мөлдір, көзге көрінетін бөгде бөлшектері жоқ, түсі өзгермеген және контейнердің герметикалығы бұзылмаған жағдайда ғана пайдаланыңыз. Қолданар алдында контейнердің герметикалығына көз жеткізіңіз. Зақымдалған контейнерлерді пайдаланбаңыз. Құю үдерісі контейнерге инфузиялық жүйені қосқаннан кейін тікелей жүргізіледі. Төмен температураның әсерінен маннитолдың ерітінділерінің кристалдануы мүмкін. Маннитолдың концентрациясы неғұрлым жоғары болса, ерітіндінің кристалдану қаупі соғұрлым жоғары болады. Инфузияны енгізер алдында ерітіндіні ондағы кристалдардың бар-жоғына тексеру қажет. Егер кристалдар анықталса, оларды ерітіндіні 37 °C-ден аспайтын температураға дейін қыздыру және оны аздап шайқау арқылы қайта ерітіңіз. Жылыту үшін тек жылу шкафы сияқты құрғақ жылуды қолданыңыз. Ерітіндіні кристалдардың бар-жоғын қайта қарап, пациентке енгізер алдында бөлме температурасына немесе дене температурасына дейін салқындатыңыз. Дәрілік препаратты қолдану тәсілін түсіндіру үшін медицина қызметкерінен кеңес алу үшін жүгіну ұсынымдары Дәрілік препаратты қолдану тәсілін түсіндіру үшін дәрігерге жүгіну қажет. В/і енгізуге арналған. Препаратты тек маманның енгізуі керек. Препаратты артерия ішіне енгізуден немесе қоршаған тіндерге түсуінен аулақ болу керек.

• әсер етуші затқа немесе қосымша заттардың кез келгеніне аса жоғары сезімталдық • ануриямен бірге сүзу үдерісінің бұзылуымен бүйректің ауыр жеткіліксіздігі • геморрагиялық инсульт, субарахноидты қан кету (бас сүйегінің трепанациясын жүргізу кезіндегі қан кетуден басқа) • жедел сол жақ қарыншалық жеткіліксіздік аясында өкпенің ісінуі • декомпенсацияланған жүрек-қан тамырлары жеткіліксіздігі • сусызданудың ауыр дәрежесі • гипокалиемия, гипонатриемия, гипохлоремия • қан құйылу қаупі бар бассүйекішілік қысымның жарақаттан кейін жоғарылауы • белсенді бассүйекішілік қан кету (бас сүйегінің трепанациясын жүргізу кезіндегі қан кетуден басқа) • гематоэнцефалдық бөгеттің бұзылуы

Жиілігі белгісіз - аллергиялық реакция - анафилаксиялық шокты қоса алғанда, анафилаксиялық реакция * - сұйықтық және электролиттік теңгерімсіздігі** - сусыздану - ісіну - метаболизмдік ацидоз - бас ауыру, бас айналу - бассүйекішілік қысымның қайта жоғарылауы - ОЖЖ тарапынан уыттылығы (конвульсиялар, кома, сананың шатасуы, летаргия) - көздің анық көрмеуі - жүрек аритмиясы, жүректің іркілісті жеткіліксіздігі - гипотензия немесе гипертензия - өкпенің ісінуі - ринит - ауыздың кеберсуі, шөлдеу - жүректің айнуы, құсу - тері некрозы, есекжем - құрысулар - шамадан тыс диурез - осмостық нефроз - несептің іркілуі, бүйректің жедел жеткіліксіздігі - азотемия - анурия, олигурия, полируя - қалтырау, қызба - кеуденің ауырсынуы - астения, өзін нашар сезіну - инфузиялық реакциялар (инфузиялық тромбофлебит, инфузия енгізген жердегі қабыну, инфузия енгізген жердің ауырсынуы, инфузия енгізген жердің бөртуі, инфузия енгізген жердегі эритема, инфузия енгізген жердің қышуы) - компартмент-синдромы (экстравазация және инфузия енгізілген жердің ісінуі аясында) *ол терінің, АІЖ бұзылуы, ауыр қан тамырлары реакциясы (гипотензия) және тыныс алу органдарының реакциясы (ентігу) түрінде көрінуі мүмкін. Басқа аса жоғары сезімталдық реакцияларына/инфузиялық реакцияларға гипертензия, дене температурасының жоғарылауы, қалтырау, терлеудің артуы, жөтел, бұлшықет-қаңқаның сіресуі және миалгия, есекжем / бөртпе, қышу, жаппай ауырсыну, жайсыздық сезімі, жүрек айну, құсу және бас ауруы жатады. ** оның ішінде гиперволемия, шеткергі ісіну, сусыздану, гипонатриемия, гипернатриемия, гиперкалиемия, гипокалиемия. Жағымсыз дәрілік реакциялар туындағанда медициналық қызметкерге, фармацевтикалық қызметкерге немесе, дәрілік препараттардың тиімсіздігі туралы хабарламаларды қоса, дәрілік препараттарға болатын жағымсыз реакциялар (әсерлер) жөніндегі ақпараттық деректер базасына тікелей хабарласу керек Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

Симптомдары: маннитолмен артық дозаланудың симптомдары мен белгілері жедел бүйрек жеткіліксіздігін, электролиттік теңгерімсіздікті, гиперволемияны, ОЖЖ уыттылығын қамтуы мүмкін. Гиперосмостық ерітінділердің көп мөлшерін ұзақ уақыт енгізу немесе тез құю қан айналымының шамадан тыс жүктелуіне және ацидозға әкелуі мүмкін. Температура өзгерместен бас ауруы, жүрек айну және діріл бастапқы белгілері / симптомдары болып табылуы мүмкін. Сананың шатасуы, летаргия, құрысулар, мелшию және команың пайда болуы мүмкін. Емі: препаратты енгізуді тоқтату қажет. Сұйықтық пен электролиттердің теңгерімін бақылай отырып, симптоматикалық ем жүргізу. Маннитол гемодиализбен шығарылады.

Аса жоғары сезімталдық Маннитолды қолдануға байланысты анафилаксияны қоса алғанда, анафилаксиялық/анафилактоидты реакциялардың дамуы туралы, сондай-ақ аса жоғары сезімталдықтың, оның ішінде өліммен аяқталатын басқа да реакциялар туралы хабарланды. Аса жоғары сезімталдық реакциясының кез келген белгілері немесе симптомдары пайда болған жағдайда енгізуді дереу тоқтатып, нақты клиникалық көрсетілімдерге байланысты терапиялық араласуды жүргізу керек. Маннитол табиғи түрде (мысалы, кейбір көкөністер мен жемістерде) кездеседі және дәрілік заттар мен косметикалық өнімдерде көмекші зат ретінде кеңінен қолданылады. Сондықтан сезімталдық реакциясы маннитол ерітіндісін вена ішіне қабылдамаған пациенттерде де болуы мүмкін. ОЖЖ тарапынан реакциялар Маннитол қабылдаған пациенттерде, әсіресе бүйрек функциясының бұзылуы кезінде, ОЖЖ тарапынан уыттылық сананың шатасуы, летаргия және кома түрінде көрінді. Сондай-ақ, өлімге әкелген жағдайлар туралы да хабарланды. ОЖЖ тарапынан уытты реакциялардың себебі мыналар болуы мүмкін: • қан сарысуындағы маннитолдың жоғары концентрациясы • жүйке жасушаларының жасушаішілік сусыздануына әкелетін сарысудың гиперосмолярлығы • маннитолды вена ішіне құйғаннан кейінгі гипонатриемия немесе электролиттік және сілтілік-қышқылдық теңгерімінің басқа да бұзылулары. Жоғары концентрацияда маннитол, әсіресе ацидоз кезінде, ми жұлын сұйықтығының рН деңгейін реттеу бойынша ми функциясын бұза отырып, гематоэнцефалдық бөгет арқылы өтуі мүмкін. Гематоэнцефалдық бөгет бұзылған пациенттерде маннитолмен емдеуден күтілетін пайдаға қатысты әрбір нақты жағдайда мидың ісінуінің (ошақтық немесе жаппай) күшею қаупін бағалау қажет. Маннитолды енгізгеннен кейін бірнеше сағаттан соң бассүйекішілік қысымның қайта үдеуі мүмкін. Бұл қауіп әсіресе гематоэнцефалдық бөгет бұзылған пациенттерде жоғары. Бүйрек тарапынан асқыну қаупі Емді бастар алдында бүйрек функциясы қалыпты болған пациенттерде, маннитолдың вена ішіне көп дозасын енгізгеннен кейін қайтымды жедел олигоануриялық бүйрек жеткіліксіздігі жағдайлары байқалған. Маннитолды енгізумен байланысты осмостық нефроз әдетте қайтымды сипатқа ие екендігіне қарамастан, оның бүйрек жеткіліксіздігінің созылмалы немесе тіпті терминалды сатысына дейін үдеуі мүмкін екендігі жақсы белгілі. Бүйрек аурулары бар пациенттерде немесе потенциалды нефроуытты препараттарды қабылдайтын пациенттерде маннитолды енгізгеннен кейін бүйрек жеткіліксіздігінің даму қаупі жоғары. Сарысудың осмолярлығын және бүйрек функциясын мұқият бақылау және бүйрек функциясының нашарлау белгілері пайда болған жағдайда қажетті шараларды қабылдау қажет. Маннитолды бүйрек жеткіліксіздігі ауыр пациенттерге сақтықпен тағайындау керек. Мұндай пациенттерге ерітіндінің сынама дозасын енгізу керек және маннитолмен емдеуді оларда несеп шығарудың талапқа сай деңгейіне жеткен жағдайда ғана жалғастыру қажет. Егер маннитол ерітіндісін вена ішіне енгізу кезінде несептің шығарылу жылдамдығы төмендесе, пациенттің клиникалық жағдайын оның бүйрек жеткіліксіздігінің даму жағдайына бағалау қажет; қажет болған жағдайда инфузияны тоқтата тұру қажет. Гиперволемия қаупі Маннитолдың 15% ерітіндісін тез жылдамдықпен енгізер алдында пациенттің жүрек-қан тамырлары жүйесінің жай-күйін мұқият бағалау қажет. Жоғары дозалар және / немесе енгізу жылдамдығының жоғарылығы, сондай – ақ организмде маннитолдың жинақталуы (оның бүйрек арқылы жеткіліксіз шығарылуына байланысты) гиперволемияға - жасушадан тыс сұйықтық көлемінің шамадан тыс ұлғаюына әкелуі мүмкін, бұл өз кезегінде бұрыннан бар жүрек жеткіліксіздігінің пайда болуына немесе оның асқынуына әкелуі мүмкін. Организмдегі маннитолдың жинақталуы құю кезінде несеп шығару жылдамдығы төмендеген жағдайда пайда болуы мүмкін, бұл жүрек жеткіліксіздігінің бар немесе жасырын іркілуін асқындыруы мүмкін. Пациентте жүрек немесе өкпе функциясы нашарлаған кезде емді толық тоқтату керек. Су-электролит теңгерімінің бұзылу қаупі, гиперосмолярлық Маннитолды қабылдаудан туындаған осмостық диурез сусызданудың/гиповолемияның дамуына немесе асқынуына және қанның қоюлануына әкелуі мүмкін. Маннитолды енгізу гиперосмолярлықты туындатуы мүмкін. Егер емдеу кезінде пациентте сарысудың осмолярлығы жоғарыласа, бұл диурезді жылдамдату, бассүйекішілік және көзішілік қысымның төмендеуі бойынша маннитолдың тиімділігінің жеткіліксіздігін көрсетуі мүмкін. Бұдан басқа, енгізу дозасы мен ұзақтығына байланысты трансцеллюлярлы сұйықтықтар (су және электролиттер) деңгейінің өзгеруі, осмостық диурез және/немесе басқа механизмдер электролиттік және/немесе қышқылдық-сілтілік теңгерімнің бұзылуына себеп болуы мүмкін. Мұндай бұзушылықтардың ауыр болуы мүмкін, тіпті өлімге әкелуі мүмкін. Маннитолмен емдеудің нәтижесінде электролиттік және/немесе қышқылдық-сілтілік теңгерімнің бұзылуы • Гипернатриемия, сусыздану және қанның қоюлануы (судың шамадан тыс жоғалуына байланысты). • Гипонатриемия – маннитолды енгізгеннен кейін жасушадан тыс аймаққа натрийсіз жасушаішілік сұйықтықтың қозғалуы сарысудағы натрий концентрациясын төмендетіп, бұрыннан бар гипонатриемияны күшейтуі мүмкін, бұл ретте несепте натрий мен калийдің жоғалу деңгейі артады. Гипонатриемия бас ауруына, жүрек айнуына, эпилепсиялық ұстамаларға, летаргияға, комаға, бас миының ісінуіне және өлімге әкелуі мүмкін. Гипонатриемияның аясында жедел симптоматикалық энцефалопатия өмірге қауіп төндіретін және жедел медициналық көмекті қажет ететін жағдай болып табылады. Пациенттердің мынадай санаттарында гипонатриемияның даму қаупі жоғары: – балалар; – егде жастағы адамдар; – әйелдер; – операциядан кейінгі пациенттер; – психогендік полидипсиямен ауыратын пациенттер. Пациенттердің мынадай санаттарында гипонатриемияның асқынуы ретінде энцефалопатияның даму қаупі жоғары: – балалар (≤16 жас) – әйелдер (әсіресе, менопауза алдындағы кезеңде) – гипоксемиясы бар пациенттер – орталық жүйке жүйесінің негізгі ауруы бар пациенттер. • Гипокалиемия • Гиперкалиемия • Электролиттердің басқа бұзылулары • Метаболизмдік ацидоз • Метаболизмдік алкалоз Диурезге ықпал ете отырып, маннитолды құю талапқа сай емес гидратацияны немесе гиповолемияны жасыруы және күшейтуі мүмкін. Инфузиялық реакциялар Инфузияны енгізу орнындағы тітіркену мен қабынуды, сондай-ақ экстравазация аясындағы ауыр реакцияларды (компартмент-синдром) қоса алғанда, маннитолды пайдалануға байланысты инфузиялық реакциялардың дамуы туралы хабарланды. Басқа препараттарды қатар қолдану немесе дұрыс енгізбеу әдісі пирогендік заттардың түсуіне байланысты фебрильді реакциялардың дамуына әкелуі мүмкін. Жағымсыз реакциялар туындаған жағдайда инфузияны дереу тоқтату қажет. Пайдаланар алдында сұйықтықтар мен электролиттер көлемін толықтыру Шок және бүйрек әрекеті бұзылған пациенттерде сұйықтықтар мен электролиттер көлемі толтырылғанға дейін маннитол енгізуді жүргізуге болмайды. Мониторинг Маннитолды қолданған кезде қышқылдық-сілтілік теңгерімді, бүйрек функциясын және сарысудың осмолярлығын мұқият бақылау қажет. Маннитолды қабылдайтын пациенттер оларда бүйрек, жүрек немесе өкпе функцияларының төмендеуі тұрғысынан бақылануы тиіс; жағымсыз құбылыстар туындаған жағдайда емдеу толығымен тоқтатылады. Сондай-ақ, несеп шығару жылдамдығы, сұйықтық теңгерімі, орталық веноздық қысым және электролиттердің тепе-теңдігі (атап айтқанда, натрий мен калий деңгейі) мұқият бақылау нысаны болуы керек. Қан препараттарымен үйлеспеушілігі Маннитолды қан препараттарымен бір мезгілде енгізуге болмайды, себебі бұл қан жасушаларының агглютинациясына және олардың ойық пішінді болуына әкелуі мүмкін. Кристалдануы Төмен температураның әсерінен маннитолдың ерітінділерінің кристалдануы мүмкін. Енгізер алдында ерітіндіні ондағы кристалдардың бар-жоғына тексеру қажет. Егер кристалдар анықталса, оларды ерітіндіні 37 °C-ден аспайтын температураға дейін қыздыру және оны аздап шайқау арқылы қайта ерітіңіз. Зертханалық көрсеткіштердің ауытқуы Маннитол қандағы бейорганикалық фосфордың құрамын талдаудың кейбір жүйелерін қолдану кезінде қате нәтиже беруі мүмкін. Маннитол қан талдауы кезінде жалған оң этиленгликоль нәтижелерін береді, онда маннитол бастапқыда альдегидке дейін тотығады. Педиатрияда қолдану Балалардағы препараттың қауіпсіздігі мен тиімділігі клиникалық зерттеулердің аясында зерттелмеген. Егде жастағы адамдарда пайдалану Әдетте, егде жастағы пациенттер үшін дозаны таңдау кезінде бауыр, бүйрек және жүрек функциясының төмендеуінің жоғары жиілігін, сондай-ақ қатар жүретін патологиялар мен дәрілік емді ескере отырып, аса сақтықпен қарау керек. Ауамен таралатын эмболия қаупі Рет-ретімен қосылған кезде пластик контейнерлерді пайдаланбаңыз. Бұл екінші контейнерден сұйықтықты енгізуді аяқтамас бұрын бірінші контейнерден қалдық ауаның шығуына байланысты ауамен таралатын эмболияның пайда болуына әкелуі мүмкін. Егер контейнердегі қалдық ауа препаратты енгізер алдында толық шығарылмаған жағдайда, шығынды ұлғайту мақсатында икемді пластик контейнерлердегі венаішілік ерітінділер қысымының артуы ауамен таралатын эмболияға әкеп соқтыруы мүмкін. Ашық желдеткіш тесігі бар желдетілетін инфузиялық жүйені пайдалану ауамен таралатын эмболияға алып келуі мүмкін. Мұндай инфузиялық жүйелерді икемді пластик контейнерлермен бірге қолдануға болмайды. Қосымша заттар туралы ақпарат 15% дозадағы маннитол құрамында сәйкесінше мл-ге 9.0 мг натрий бар. Бұл натрийді қабылдауды шектейтін диетадағы пациенттерге қолданған кезде ескерілуі керек. Арнайы сақтандырулар Педиатрияда қолдану Педиатриялық популяциядағы қауіпсіздігі мен тиімділігі анықталған жоқ. Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері Маңызды емес.

Жүкті әйелдерде маннитолды қолдану туралы тиісті деректер жоқ. Аса қажет болмаса, маннитолды жүктілік кезінде қолдануға болмайды. Маннитолдың емшек сүтімен бөлінуі туралы деректер жоқ. Маннитолды емшекпен емізу кезінде пайдалануға болмайды. Емізетін әйелге тағайындау қажет болса, бала емізуді тоқтату керек.

Әсерлерді күшейту Басқа диуретиктермен бірге қолдану маннитолдың әсерін күшейтуі және препарат дозасын төмендетуді талап етуі мүмкін. Әсерлерді тежеу Маннитол несептің шығарылуын көтермелейді, бұл негізінен бүйректе айтарлықтай қайта сіңірілетін препараттарға әсерін тигізеді, осылайша олардың клиренсін арттырады және экспозициясын төмендетеді. Маннитол литийдің несеппен шығарылуын күшейтеді, сондықтан маннитол мен литийді бірге қолдану соңғысының тиімділігін төмендетуі мүмкін. Маннитолды қабылдауға байланысты сұйықтық теңгерімінің бұзылуы себебінен препараттардың нефроуыттылығы Адамдарда мұндай өзара әрекеттесу ықтималдығының екіталай екендігіне қарамастан, циклоспорин мен аминогликозидті бірге қабылдайтын пациенттер бүйрек уыттылығы белгілерінің пайда болуы тұрғысынан мұқият бақылануы тиіс. Нейроуытты препараттар Маннитол мен нейроуытты заттарды (мысалы, аминогликозид) бірге пайдалану соңғыларының уытты әсерін күшейтуі мүмкін. Электролиттік теңгерімсіздік әсерін тигізетін препараттар Маннитолмен емдеудің аясында электролиттік теңгерімсіздіктің (мысалы, гиперкалиемия, гипокалиемия) дамуы ұқсас теңгерімсіздікке сезімтал препараттардың (дигоксин, QT аралығын ұзартуға қабілетті препараттар, жүйке-бұлшықет блокаторлары) тиімділігіне әсер етуі мүмкін. Басқа ықтимал өзара әрекеттесулер тубокуранинмен және деполяризациялайтын миорелаксанттармен (маннитол олардың әсерін күшейтеді), пероральді антикоагулянттармен (маннитол сусызданудың аясында ұю факторларының концентрациясының артуына байланысты олардың әсерін төмендетуі мүмкін) және дигоксинмен бірге пайдалануды қамтиды, егер маннитолмен емдеу гипокалиемияның дамуына әкелсе, дигоксиннің уытты әсер ету қаупі бар.

Сақтау мерзімі 2 жыл Жарамдылық мерзімі өткеннен кейін қолдануға болмайды! Сақтау шарттары Жарықтан қорғалған жерде, 25 ºС-ден аспайтын температурада сақтау керек. Балалардың қолы жетпейтін жерде сақтау керек!