Мексидол® раствор 50 мг/мл

1 мл препараттың құрамында: белсенді зат - этилметилгидроксипиридин сукцинаты -50 мг, қосымша заттар: натрий метабисульфиті, инъекцияға арналған су Сыртқы түрінің, иісінің, дәмінің сипаттамасы Мөлдір, түссіз немесе сәл сарғыштау сұйықтық.

• ми қанайналымының жедел бұзылуларында • бассүйек-ми жарақатында, бассүйек-ми жарақатының салдарында • дисциркуляторлы энцефалопатияда • созылмалы ми ишемиясында • вегетативті дистония синдромында • жеңіл (орташа) когнитивті бұзылыстарда • невроздық және невроз тәрізді жағдайдағы үрейлі бұзылыстарда • жедел миокард инфарктінде (бірінші тәуліктен бастап) кешенді ем құрамында • әр түрлі сатыдағы бастапқы ашық бұрышты глаукомада кешенді ем құрамында • невроз тәрізді және вегетативті-қантамырлық бұзылыстар басым болатын алкоголизм кезіндегі абстиненттік синдромды басуда • психозға қарсы дәрілермен жедел уыттанғанда • іш қуысының жедел іріңді-қабыну үдерістерінде (жедел некроздық панкреатит, перитонит) кешенді ем құрамында

Әсер ету механизмі Мексидолдың әсер ету механизмі оның антиоксидантты, гипоксияға қарсы және жарғақшапротекторлық әсеріне байланысты. Ол липидтердің асқын тотығу үдерісін тежеп, супероксиддисмутазаның белсенділігін арттырады, липид-ақуыз арақатынасын жақсартады, жарғақшаның тұтқырлығын төмендетеді, оның аққыштығын арттырады. Жарғақшаларды байланыстыратын ферменттердің (кальцийге тәуелді емес фосфодиэстеразаның, аденилатциклазаның, ацетилхолинэстеразаның), рецепторлық кешендердің (бензодиазепиндік, гамма-аминмай қышқылының (ГАМҚ), ацетилхолиндік) белсенділігін модульдайды, бұл олардың лигандтармен байланысу қабілетін күшейтіп, биожарғақшалардың құрылымдық- функциялық құрылуының сақталуына, нейромедиаторлардың тасымалдануына және синапстық берілістердің жақсаруына көмектеседі. Мексидол мидағы дофамин мөлшерін жоғарылатады. Аэробтық гликолиздің компенсаторлы белсенділігін арттырып және Кребс цикліндегі тотығу үрдістерін бәсеңдету дәрежесін азайтып, гипоксия орын алғанда аденозинтрифосфаттың (АТФ) және креатинфосфаттың мөлшерін көбейтеді, митохондрийлердің энергия синтезделу функциясын жандандырып, жасуша жарғақшаларын тұрақтандырады. Фармакодинамикалық әсерлері Антигипоксиялық, жарғақшапротекторлы, ноотропты, құрысуға қарсы, анксиолитиктік әсер етеді, организмнің стресске төзімділігін жоғарылатады. Мексидол организмнің негізгі зақымдаушы факторлардың әсеріне, оттекке тәуелді патологиялық жағдайларға (шок, гипоксия және ишемия, ми қан айналымының бұзылуы, алкогольмен және психозға қарсы препараттармен (нейролептиктермен) улану) төзімділігін жоғарылатады. Гемолизде қан жасушаларының жарғақшалық құрылымдарын (эритроциттер және тромбоциттер) тұрақтандырады. Мексидол ми метаболизмі мен мидың қанмен қамтылуын жақсартады, қанның микроциркуляциясы мен реологиялық қасиеттерін жақсартады, тромбоциттер агрегациясын азайтады. Гиполипидемиялық әсер етеді, жалпы холестерин мен тығыздығы төмен липопротеидтер (ТТЛП) деңгейін төмендетеді. Мексидол ишемияланған миокардта метаболизм үдерістерін қалыпқа түсіреді, некроз аймағын азайтады, миокардтың қуаттық белсенділігі мен жиырылғыштығын қалпына келтіреді және жақсартады, сондай-ақ ишемия аймағында коронарлық қан ағымын ұлғайтады, жедел коронарлық жеткіліксіздік кезінде реперфузиялық синдромның салдарын азайтады. Нитропрепараттардың антиангиналық белсенділігін жоғарылатады. Мексидол үдемелі нейропатия кезіндегі торқабықтың ганглиозды жасушалары мен көру жүйкесі талшықтарының сақталуына ықпал етеді, ал оның себептері созылмалы ишемия және гипоксия болып табылады. Торқабық пен көру жүйкесінің функциялық белсенділігін, көру өткірлігін арттыра отырып, жақсартады. Жедел панкреатитте ферментативті токсемияны және эндогенді уыттануды азайтады. Клиникалық тиімділігі және қауіпсіздігі Жедел және ерте қалпына келтіру кезеңдеріндегі жарты шарында ишемиялық инсульт алған пациенттерде III фазалы (ЭПИКА) ұзақ бірізді ем кезінде Мексидол препаратының тиімділігі мен қауіпсіздігін параллельді топтарда рандомизацияланған салыстырмалы жасырын плацебо бақыланатын зерттеу 40-тан бастап 79 жасқа дейінгі жастағы 150 пациенттің қатысуымен жүргізілді. Пациенттер 2 топқа рандомизацияланды: бірінші топ Мексидол препаратымен тәулігіне 500 мг-ден в/і тамшылатып 10 күн бойы ем алды, содан кейін 8 апта бойы тәулігіне 3 рет 1 таблеткадан (125 мг) қабылдады. Мексидол препаратымен ем тобында плацебомен салыстырғанда симптомдар мен функциялық бұзылулардың нақты азайғаны көрсетілген. Мексидол препаратын қолдану кезінде плацебомен салыстырғанда тіршілік әрекетінің нақты айқынырақ жақсаруы байқалды: ем аяқталған сәтте өзгертілген түрлендірудің Рэнкин шкаласы (тРШ) бойынша орташа балл Мексидол препаратын қолдану тобында төмен болды (p = 0,04); сондай-ақ, бұл топта тРШ бойынша орташа баллдың азаю динамикасы айқынырақ болды (p = 0,023). Ем аяқталғанда тРШ бойынша 0-2 баллға сәйкес келетін қалпына келтіруге қол жеткізген пациенттердің үлесі Мексидол препаратын қолдану тобында плацебомен салыстырғанда – 59 (96,7 %) және 53 (84,1%) сәйкесінше анық жоғары болды (p = 0,039). Ем аяқталған кезде неврологиялық тапшылық Мексидол препаратымен ем тобында анық төмен болды: терапия аяқталғанда Ұлттық денсаулық институтының инсульт шкаласы бойынша тестілеу кезінде Мексидол препаратымен ем тобында орташа мән төмен болды (p = 0,035). Мексидол препаратын қолдану жақсы функциялық қалпына келтіруге ықпал етті: кеңістікте қозғалу проблемалары жоқ пациенттердің үлесі сенімді түрде жоғары болды (p = 0,022). Субанализ нәтижелері бойынша Мексидол препаратының барлық қолданылатын шкалалардағы тиімділігі барлық жас топтарында тең болды. Екі топтағы пациенттерде жағымсыз реакциялардың жиілігінде нақты айырмашылықтар анықталған жоқ, Мексидол препаратымен ұзақ бірізді емнің қауіпсіздік бейіні әртүрлі жас топтарындағы пациенттердегі плацебомен салыстырарлық болды. Созылмалы ми ишемиясы бар пациенттерде Мексидол және Мексидол ФОРТЕ 250 препараттарымен III фазалы (МЕМО) бір ізді емнің тиімділігі мен қауіпсіздігін бағалауға арналған халықаралық көп орталықты рандомизацияланған жасырын салыстырмалы плацебо бақыланатын зерттеу 40–тан 90 жасқа дейінгі жастағы 318 пациенттің қатысуымен жүргізілді. Пациенттер 2 топқа рандомизацияланды: бірінші топ 10 мл –ден (500 мг) Мексидол препаратымен емді тәулігіне 1 рет в/і тамшылатып немесе вена ішіне баяу сорғалатып 14 күн бойы қабылдады, содан кейін келесі 60 күн ішінде тәулігіне 3 рет 1 таблеткадан 250 Мексидол ФОРТЕ қабылдады. Зерттеу нәтижелері бойынша ем аяқталған кезде пациенттер Мексидол/Мексидол ФОРТЕ 250 және Плацебо препараттары топтары арасындағы динамиканы салыстыру кезінде Монреаль когнитивті функцияны бағалау шкаласы (MоCA) бойынша баллдардың статистикалық елеулі өзгерістерін анықтады (p < 0,000001, тәуелсіз үлгілерге арналған t-критерий). Мексидол/Мексидол ФОРТЕ 250 және Плацебо препараттары топтарындағы орташа негізгі тиімділік көрсеткіштерінің айырмашылығы үшін 95% сенімділік аралығының төменгі шегі 1,51 құрады. Бұл шекара Мексидол және Мексидол ФОРТЕ 250 препараттарының плацебодан тиімділігінің жоғарылығын белгілеуге мүмкіндік беретін оң мән болып табылады. Сондай-ақ, пациенттің емді аяқтау сатысында Монреаль MоCA шкаласымен баллдың статистикалық елеулі өзгерістерінің зерттеу нәтижелері бойынша барлық жас топтары үшін субанализ жүргізуде Мексидол және Мексидол ФОРТЕ 250 және Плацебо препараттары топтары арасындағы динамиканы салыстыру үшін анықталды, бұл барлық жас топтарында Мексидол және Мексидол ФОРТЕ 250 препараттарының бірдей тиімділігін айғақтайды. Мексидол және Мексидол ФОРТЕ 250 препараттарының тиімділігінің салдарлы соңғы нүктелерін бағалау нәтижелері бойынша ем барысында плацебомен салыстырғанда келесі көрсеткіштер бойынша статистикалық елеулі айырмашылықтар алынды: MoCA шкаласы бойынша когнитивтік бұзылулардың айқындылық динамикасы; цифрлық символдарды ауыстыру тесті бойынша когнитивтік бұзылулардың айқындылық динамикасы; MFI-20 астения шкаласы бойынша астениялық бұзылулардың айқындылық динамикасы; вегетативтік өзгерістердің Вейн сауалнамасы бойынша динамикасы; Бек шкаласы бойынша мазасыздық деңгейінің динамикасы; Тинетти шкаласы бойынша қозғалыс өзгерістерінің динамикасы; жалпы клиникалық әсер шкаласы бойынша жалпы клиникалық әсер динамикасы (The Clinical Global Impressions Scale); SF-36 сауалнамасы бойынша пациенттердің өмір сапасының динамикасы (денсаулықтың психологиялық компоненті). Жағымсыз құбылыстардың пайда болу жиілігін статистикалық талдау нәтижелері, зертханалық талдау, денесін ұстап, тыңдап тексеру көрсеткіштері негізгі қауіпсіздік көрсеткіштері бойынша салыстырылатын топтар арасында айтарлықтай айырмашылықтардың жоқтығын көрсетеді, бұл зерттелетін Мексидол және Мексидол ФОРТЕ 250 және Плацебо препараттарының қауіпсіздік бейіндерінің салыстырмалы сипатын көрсетеді. Субанализ жүргізу кезінде әртүрлі жас топтарындағы пациенттерде Мексидол+Мексидол ФОРТЕ 250 (этилметилгидроксипиридин сукцинаты) және Плацебо препараттарының қауіпсіздік бейіндерінің ұқсас сипаты дәлелденді. Балалар Қатысты емес.

Дозалау режимі Ересектер: ең жоғары тәуліктік доза 1200 мг-дан аспауы тиіс. Қолдану сызбасы ауруға байланысты. Ми қан айналымының жедел бұзылуларында Мексидол® алғашқы 10-14 күнде қолданылады - вена ішіне тамшылатып 200 - 500 мг тәулігіне 2 - 4 рет, содан кейін бұлшықет ішіне 200 - 250 мг тәулігіне 2-3 рет 2 апта бойы, содан кейін пероральді дәрілік түрлерін қабылдауға ауысу ұсынылады. Бассүйек-ми жарақаты және бассүйек-ми жарақатының салдарында Мексидол® вена ішіне тамшылатып 200 - 500 мг-ден тәулігіне 2 - 4 рет 10 - 15 күн бойы қолданылады, содан кейін пероральді дәрілік түрлерін қабылдауға ауысу ұсынылады. Дисциркуляторлы энцефалопатияның қалпына келмейтін фазасында Мексидол® вена ішіне сорғалатып немесе тамшылатып 200-500 мг дозада тәулігіне 1 - 2 рет 14 күн бойы тағайындалғаны жөн. Содан соң бұлшықет ішіне тәулігіне 100 - 250 мг-ден кейінгі 2 апта бойы, содан кейін пероральді дәрілік түрлерін қабылдауға ауысу ұсынылады. Дисциркуляторлы энцефалопатияның курстық профилактикасы үшін Мексидол® бұлшықет ішіне 200 - 250 мг дозада тәулігіне 2 рет 10 - 14 күн бойы енгізіледі, содан кейін пероральді дәрілік түрлерін қабылдауға ауысу ұсынылады. Созылмалы ми ишемиясында Мексидол тәулігіне 1 рет 10 мл-ден (500 мг) вена ішіне тамшылатып немесе вена ішіне баяу сорғалатып 14 күн бойы енгізуге тағайындалуы керек, содан кейін пероральді дәрілік түрлерін қабылдауға ауысу ұсынылады. Жеңіл (орташа) когнитивті бұзылуларда Мексидол тәулігіне 1 рет 10 мл-ден (500 мг) вена ішіне тамшылатып немесе вена ішіне баяу сорғалатып 14 күн бойы енгізуге тағайындалуы керек, содан кейін пероральді дәрілік түрлерін қабылдауға ауысу ұсынылады. Мазасыздық бұзылыстарында Мексидол® бұлшықет ішіне 100 -300 мг тәуліктік дозада 14 - 30 күн бойы қолданылады, содан кейін пероральді дәрілік түрлерін қабылдауға ауысу ұсынылады. Жедел миокард инфарктісінде кешенді ем құрамында Мексидол® нитраттар, бета-адреноблокаторлар, ангиотензин өзгертуші фермент тежегіштері (АӨФ), тромболитиктер, антикоагулянтты және антиагрегантты дәрілер, сондай-ақ көрсетілімдер бойынша симптоматикалық дәрілерді қамтитын миокард инфарктісін дәстүрлі емдеу аясында вена ішіне немесе бұлшықет ішіне 14 тәулік бойы енгізіледі. Алғашқы 5 тәулікте ең жоғары әсеріне қол жеткізу үшін Мексидол® мүмкіндігінше вена ішіне енгізілгені дұрыс, одан кейінгі 9 тәулікте Мексидол® бұлшықет ішіне енгізілуіне болады. Мексидол® 0,9 % натрий хлориді ерітіндісінде немесе 5 % декстроза ерітіндісінде (глюкоза) 30 -90 мин бойы 100 - 150 мл көлемінде вена ішіне тамшылатып, баяу (жағымсыз әсерлерін болдырмас үшін) енгізіледі. Қажет болғанда Мексидол® ұзақтығы кем дегенде 5 минут болатындай, баяу сорғалатып енгізілуі мүмкін. Мексидол® (вена ішіне немесе бұлшықет ішіне) тәулігіне 3 рет әрбір 8 сағат сайын енгізіледі. Тәуліктік емдік дозасы дене салмағының әр кг тәулігіне 6-9 мг, бір реттік доза – дене салмағының әр кг 2-3 мг құрайды. Ең жоғары тәуліктік доза 800 мг, бір реттік доза - 250 мг аспауы тиіс. Әр түрлі сатыдағы бастапқы ашық бұрышты глаукомада кешенді ем құрамында Мексидол® бұлшықет ішіне тәулігіне 100-300 мг-ден, тәулігіне 1-3 рет 14 күн бойы енгізіледі. Абстиненттік алкогольдік синдромда Мексидол® 200-500 мг дозада вена ішіне тамшылатып немесе бұлшықет ішіне тәулігіне 2-3 рет 5-7 күн бойы енгізіледі. Психозға қарсы дәрілермен жедел уыттанғанда Мексидол® вена ішіне тәулігіне 200-500 мг дозада 7-14 күн бойы енгізіледі. Іш қуысының жедел іріңді–қабыну үдерістерінде (жедел некроздық панкреатит, перитонит) Мексидол® операцияның алдындағы және операциядан кейінгі тәуліктерде тағайындалады. Енгізілетін дозалар аурудың түріне және ауырлығына қарай, үдерістің таралғандығына, клиникалық ағымының нұсқаларына байланысты болады. Мексидол® тоқтатылуы біртіндеп, тек тұрақты клиникалық-зертханалық оң әсерден кейін ғана жүргізілуі тиіс. Жедел ісінумен (интерстициялық) панкреатитте Мексидол® 200-500 мг-ден күніне 3 рет, вена ішіне тамшылатып (0,9 % натрий хлоридінің ерітіндісінде) және бұлшықет ішіне тағайындалады. Жеңіл дәрежедегі ауырлықтағы некроздық панкреатит – 100-200 мг-ден күніне 3 рет вена ішіне тамшылатып (0,9 % натрий хлоридінің ерітіндісінде) және бұлшықет ішіне. Ауырлығы орташа дәрежеде – 200 мг-ден күніне 3 рет, вена ішіне тамшылатып (0,9 % натрий хлоридінің ерітіндісінде) тағайындалады. Ауыр түрінде – алғашқы тәулікте 800 мг пульс-дозалануда, екі рет енгізу режимінде; бұдан әрі тәуліктік дозаны біртіндеп төмендете отырып, 200-500 мг-ден күніне 2 рет. Өте ауыр түрінде – бастапқы дозалауда панкреатогенді шоктың байқалуы тұрақты басылғанға дейін тәулігіне 800 мг-ден, жағдай қалыптанған соң 300-500 мг-ден күніне 2 рет тәуліктік дозалауды біртіндеп төмендете отырып, вена ішіне тамшылатып (0,9 % натрий хлоридінің ерітіндісінде) енгізеді. Енгізу әдісі және жолы Вена ішіне немесе бұлшықет ішіне (сорғалатып немесе тамшылатып). Мексидол® сорғалатып баяу 5-7 минут бойы, тамшылатып – минутына 40-60 тамшы жылдамдықпен енгізіледі. Инфузиялық енгізу әдісімен препаратты 100-150 мл 0,9 % натрий хлориді ерітіндісінде немесе 5% декстроза (глюкоза) ерітіндісінде сұйылту керек.

- этилметилгидроксипиридин сукцинатына немесе қосымша заттарының кез келгеніне аса жоғары сезімталдық - бүйректің жедел жеткіліксіздігі - бауырдың жедел жеткіліксіздігі - жүктілік, бала емізу (препараттың әсерін зерттеудің жеткіліксіздігіне байланысты) - 18 жасқа дейінгі балалық жас (препараттың әсерін зерттеудің жеткіліксіздігіне байланысты).

Өте сирек: - анафилаксиялық шок, ангионевроздық ісіну, есекжем - ұйқышылдық - бас ауыруы, бас айналуы (енгізу жылдамдығы шамадан тыс жоғары болуымен байланысты болуы мүмкін және ол қысқа мерзімдік сипатқа ие) - АҚ төмендеуі, АҚ жоғарылауы (енгізу жылдамдығы шамадан тыс жоғары болуымен байланысты болуы мүмкін және ол қысқа мерзімдік сипатқа ие) - құрғақ жөтел, тамақтың жыбырлап ашуы, кеуде қуысындағы жайсыздық, тыныс алудың қиындауы (енгізу жылдамдығы шамадан тыс жоғары болуымен байланысты болуы мүмкін және ол қысқа мерзімдік сипатқа ие) - ауыздың құрғауы, жүрек айнуы, жағымсыз иісті сезіну, ауыздың темір татуы - қышыну, бөртпе, гиперемия - жылуды сезіну Жағымсыз дәрілік реакциялар туындағанда медициналық қызметкерге, фармацевтикалық қызметкерге немесе, дәрілік препараттардың тиімсіздігі туралы хабарламаларды қоса, дәрілік препараттарға болатын жағымсыз реакциялар (әсерлер) жөніндегі ақпараттық деректер базасына тікелей хабарласу керек Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

Симптомдары: ұйқышылдық, ұйқысыздық. Емі: препараттың уыттылығы төмен болғандықтан, артық дозалану ықтималдығы аз. Әдетте емдеу қажет емес - симптомдар тәулік ішінде өздігінен жоғалады. Айқын көріністерде демеуші және симптоматикалық емдеу жүргізіледі.

Арнайы сақтандырулар Жекелеген жағдайларда, әсіресе бронх демікпесі бар әрі сульфиттерге жоғары сезімталдыққа бейім пациенттерде аса жоғары сезімталдықтың ауыр реакциялары және бронх түйілуі дамуы мүмкін. Егде жастағы пациенттер Егде жастағы пациенттер үшін дозаны түзету қажет емес. Педиатрияда қолдану 18 жасқа дейінгі пациенттерге Мексидол® препаратын қабылдауға болмайды. Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері Препаратты қабылдау кезеңінде психофизикалық реакциялардың жылдамдығын талап ететін жұмыста (көлік құралдарын, механизмдерді басқару және т.б.) сақ болу керек.

Жүктілік және бала емізу кезеңінде әйелдерге Мексидол® препаратын қабылдауға болмайды.

Бензодиазепиндік анксиолитиктердің, құрысуға қарсы дәрілердің (карбамазепиннің), паркинсон ауруына қарсы дәрілердің (леводопаның) әсерін күшейтеді. Этил спиртінің уытты әсерін төмендетеді.

Сақтау мерзімі 3 жыл Қаптамасында көрсетілген жарамдылық мерзімі өткеннен кейін қолдануға болмайды. Сақтау шарттары Жарықтан қорғалған жерде, 25 ºС-ден аспайтын температурада сақтау керек. Балалардың қолы жетпейтін жерде сақтау керек!