МЕТФОРМИН таблетки 1000 мг

Бір таблетканың құрамында белсенді зат - метформин гидрохлориді - 500 мг, 850 мг немесе 1000 мг, қосымша заттар: повидон К-30, магний стеараты, глицерил дибегенаты, гипролоза (төмен алмастырылған), үлбірлі қабықтың құрамы: гипромеллоза, макрогол 4000 (Полиэтиленгликоль 4000), титанның қостотығы (Е 171). Сыртқы түрінің, иісінің, дәмінің сипаттамасы Ақ немесе ақ дерлік түсті, дөңгелек, екі беті дөңес пішінді, үлбірлі қабықпен қапталған таблеткалар.

2 типті қант диабеті, әсіресе дене салмағы артық пациенттерде, диеталық терапия мен физикалық жүктеменің тиімсіздігі кезінде: - ересектерде монотерапия ретінде немесе басқа пероральді гипогликемиялық дәрілермен немесе инсулинмен үйлесімде; - 10 жастан асқан балаларда монотерапия ретінде немесе инсулинмен үйлесімде. Сәтсіз болған диетадан кейін метформинді бірінші желі терапиясы ретінде қолданған 2 типті қант диабеті бар және дене салмағы артық ересек пациенттерде диабеттік асқынулардың төмендегені анықталды.

АТX коды A10BA02 Әсер ету механизмі Метформин – қан плазмасындағы глюкозаның базальді және постпрандиальді концентрациясын төмендететін бигуанидтер тобындағы гипогликемиялық дәрі. Ол инсулин секрециясын көтермейді, сондықтан гипогликемияны тудырмайды. Метформин үш механизм бойынша әрекет ете алады: • глюконеогенезді және гликогенолизді тежеу арқылы бауырдағы глюкоза өндірісін төмендетеді • бұлшықеттерде: шеткері рецепторлардың инсулинге сезімталдығын арттырады, жасушаларға глюкозаның шеткері сіңуін және утилизациясын жақсартады • ішекте глюкозаның сіңуін кешіктіреді. Метформин гликогенсинтазаны белсендіре отырып, гликогеннің жасушаішілік синтезін көтереді. Глюкозаның жарғақшалық тасымалдаушыларының барлық белгілі типтерінің тасымалдау қабілетін арттырады. Метформин гипогликемияны төмендетеді, бұл гипогликемияның дамуына әкелмейді. Сульфонилмочевина туындыларынан айырмашылығы, инсулин секрециясын көтермейді және дені сау адамда гипогликемиялық әсер етпейді. Клиникалық зерттеулер сондай-ақ өмір салтын өзгерту адекватты гликемиялық бақылауға қол жеткізуге мүмкіндік бермейтін 2 типті айқын қант диабетінің даму қаупінің қосымша факторлары бар диабет алдындағы пациенттерде қант диабетінің алдын алуға арналған метформиннің тиімділігін көрсетті. Фармакодинамикалық әсері Клиникалық зерттеулерде метформинді қолдану тұрақты дене салмағымен немесе дене салмағының орташа жоғалуымен байланысты болды. Метформин липидтердің метаболизміне оның гликемияға әсеріне қарамастан оң әсер етеді. Бақыланатын, орта мерзімді немесе ұзақ мерзімді клиникалық зерттеулерде метформинді емдік дозаларда қабылдау кезінде жалпы холестерин, тығыздығы төмен липопротеидтер және триглицеридтер концентрациясының төмендеуі байқалды. Клиникалық тиімділігі Британдық проспективті рандомизацияланған қант диабеті бойынша зерттеу (UKPDS) 2 типті қант диабетімен ауыратын ересек пациенттерде қандағы глюкоза деңгейін қарқынды бақылаудың ұзақ қолайлы әсерін анықтады. Тек бір диетаны сәтсіз қолданғаннан кейін метформин қабылдаған артық салмағы бар пациенттердің нәтижелерін талдау мынаны көрсетті: - диета тобымен (43,3 жағдай/1000 пациент-жыл) салыстырғанда метформин тобындағы (29,8 оқиға/1000 пациент-жыл) диабетпен байланысты кез келген асқынудың абсолюттік қаупінің едәуір төмендеуі, р=0,0023; және сульфонилмочевина препараттары немесе инсулин қолданылған топпен салыстырғанда (40,1 жағдай/1000 пациент-жыл), р=0,0034; - диабеттен болатын өлім жағдайы абсолютті қаупінің едәуір төмендеуі: метформин тобы: 7,5 оқиға/1000 пациент-жыл, диета тобы: 12,7 оқиға/1000 пациент-жыл, p=0,017; - жалпы өлім жағдайының абсолюттік қаупінің едәуір төмендеуі: метформин тобы 13,5 оқиға/1000 пациент-жыл; диета тобы: 20,6 оқиға/1000 пациент-жыл (p=0,011); сульфонилмочевина немесе инсулин тобы: 18,9 оқиға/1000 пациент-жыл (р=0,021); - миокард инфарктісінің абсолюттік қаупінің едәуір төмендеуі: метформин тобы 11 оқиға/1000 пациент-жыл, диета тобы: 18 оқиға/1000 пациент-жыл (р=0,01). Сульфонилмочевинамен біріктірілімде екінші линия терапиясы ретінде пайдаланылатын метформин үшін клиникалық нәтижеге қатысты пайдасы дәлелденген жоқ. 1 типті қант диабетінде метформин мен инсулин біріктірілімі жеке пациенттерде қолданылды, бірақ бұл біріктірілімнің клиникалық пайдасы ресми түрде анықталған жоқ. Педиатриялық популяция 1 жыл ішінде метформин қабылдаған 10-16 жас тобындағы балалар популяциясындағы бақыланатын клиникалық зерттеу нәтижелері ересек популяциядағыдай гликемиялық бақылаудың әсерін көрсетті.

Дозалау режимі Бүйрек функциясы қалыпты ересектер Монотерапия және басқа пероральді гипогликемиялық дәрілермен біріктірілген ем Әдеттегі бастапқы доза тамақтану кезінде немесе одан кейін күніне 2-3 рет 500 мг немесе 850 мг құрайды. 10-15 күн сайын дозаны қан плазмасындағы глюкоза концентрациясын өлшеу нәтижелері негізінде түзету керек. Дозаның баяу ұлғаюы АІЖ тарапынан жағымсыз реакциялардың азаюына ықпал етуі мүмкін. Ұсынылатын ең жоғары доза 3 қабылдауға бөлінген тәулігіне 3000 мг құрайды. Метформин гидрохлоридінің жоғары дозасын қабылдайтын пациенттерде (тәулігіне 2000-3000 мг) дозасы 500 мг метформиннің екі таблеткасын дозасы 1000 мг бір таблеткаға ауыстыруға болады. Басқа пероральді гипогликемиялық препараттан ауысуды жоспарлаған жағдайда осы препаратты қабылдауды тоқтатып, жоғарыда көрсетілген дозада метформин қабылдауды бастау қажет. Инсулинмен біріктіру Қандағы глюкозаны жақсы бақылауға қол жеткізу үшін метформин мен инсулинді біріктірілген ем түрінде қолдануға болады. Метформин препаратының әдеттегі бастапқы дозасы 500 мг немесе 850 мг дозаларда тәулігіне 2-3 рет бір таблетканы құрайды, ал инсулин дозасын қандағы глюкоза концентрациясы негізінде таңдайды. Пациенттердің ерекше топтары Егде жастағы пациенттер Бүйрек функциясының ықтимал төмендеуіне байланысты метформин препаратының дозасын бүйрек функциясының көрсеткіштерін тұрақты бақылау арқылы таңдау қажет (қан сарысуындағы креатинин концентрациясын жылына кемінде 2-4 рет анықтау). Бүйрек жеткіліксіздігі бар пациенттер Креатинин клиренсінің көрсеткіштерін метформинмен емдеу басталғанға дейін, сосын жылына кемінде бір рет бағалау керек. Бүйрек жеткіліксіздігінің әрі қарай өршу қаупі жоғары пациенттерде және егде жастағы адамдарда бүйрек функциясын жиі, яғни 3-6 ай сайын бақылау керек. Креатинин клиренсі (мл/мин) — Ең жоғары жиынтық тәуліктік доза (2-3 қабылдауға бөлінуі тиіс) — Қосымша факторлар 60-89 — 3000 мг — Бүйрек функциясының төмендеуіне байланысты дозаның төмендеуі мүмкін 45-59 — 2000 мг — Метформинмен емдеуді бастар алдында лактоацидоздың даму қаупін арттыратын факторларды зерттеу керек (4.4 бөлімді қараңыз), Бастапқы доза ең жоғары дозаның жартысынан аспайды. 30-44 — 1000 мг <30 — - — Метформинді қабылдауға болмайды Балалар мен жасөспірімдер Монотерапия және инсулинмен біріктіру 10 жастан бастап препарат монотерапияда да, инсулинмен біріктіріп те қолданыла алады. Әдеттегі бастапқы доза тамақтан кейін немесе тамақтану кезінде тәулігіне 1 рет 500 мг немесе 850 мг құрайды. 10-15 күннен кейін дозаны қан глюкозасының концентрациясы негізінде түзету керек. Ең жоғары тәуліктік доза 2-3 қабылдауға бөлінген 2000 мг құрайды. Енгізу жолы және тәсілі Таблетканы тамақтану кезінде немесе одан кейін ішке қабылдайды Қабылдау уақыты көрсетілген қабылдау жиілігі Ересектерге ұсынылатын ең жоғары доза күніне 3 г құрайды, тамақтану кезінде немесе одан кейін үш қабылдауға бөлінеді. Балаларда ұсынылатын ең жоғары доза тәулігіне 2 г, тамақтану кезінде немесе одан кейін 2-3 қабылдауға бөлінеді. Дәрілік препараттың бір немесе бірнеше дозасын жіберіп алған кезде қажетті шаралар Өткізіп алған дозаның орнын толтыру үшін препаратты қосарлы дозада қабылдамаңыз. Препаратты келесі қабылдау уақытында қабылдаңыз. Дәрілік препаратты қолдану тәсілін түсіндіру үшін медицина қызметкеріне кеңес алу үшін жүгіну жөніндегі нұсқаулар Препаратты қолдану бойынша сұрақтар туындаған жағдайда емдеуші дәрігерге хабарласыңыз.

- метформинге немесе препараттың қосымша заттарының кез келгеніне аса жоғары сезімталдық; - жедел метаболизмдік ацидоздың кез-келген типі (мысалы, лактоацидоз, диабеттік кетоацидоз); - диабеттік прекома; - бүйректің ауыр жеткіліксіздігі (креатинин клиренсі 30 мл/мин кем); - бүйрек функциясының бұзылу қаупімен өтетін жедел жағдайлар: дегидратация (диарея, құсу кезінде), ауыр инфекциялық аурулар, шок; - тіндік гипоксияның дамуына әкелуі мүмкін жедел және созылмалы аурулардың клиникалық айқын көріністері (оның ішінде декомпенсацияланған жүрек жеткіліксіздігі, тыныс алу жеткіліксіздігі, жақында бастан өткерген миокард инфарктісі, шок); - бауыр жеткіліксіздігі, созылмалы алкоголизм, алкогольден жедел улану.

Емдеудің басында жиі жағымсыз реакциялар жүрек айнуы, құсу, диарея, іштің ауыруы және тәбеттің жоғалуы, олар көп жағдайда өздігінен қайтып кетеді. Олардың алдын алу үшін метформиннің тәуліктік дозасын 2 немесе 3 қабылдауға және дозаны біртіндеп арттыру ұсынылады. Өте жиі: жүрек айнуы, құсу, диарея, іштің ауыруы және тәбеттің жоғалуы. Көбінесе олар емдеудің бастапқы кезеңінде пайда болады және көп жағдайда қабылдауды жалғастыра отырып, өздігінен өтеді. Жағымсыз әсерлерді азайту үшін препаратты тамақтану кезінде немесе одан кейін, 2-3 рет қабылдау ұсынылады. Дозаның баяу жоғарылауы асқазан-ішек жолдарының жағымдылығын жақсарта алады. Жиі: • дәм сезудің бұзылуы • метформинді ұзақ уақыт қолданған кезде В12 дәруменінің абсорбциясы төмендеуі мүмкін, бұл оның сарысудағы деңгейінің төмендеуімен бірге жүреді. Мегалобластты анемия анықталған кезде мұндай этиологияның мүмкіндігін ескеру қажет. Өте сирек: • лактоацидоз • бауыр функциясының бұзылуы немесе гепатит туралы жеке хабарламалар бар. Метформин жойылғаннан кейін бұл жағымсыз құбылыстар толығымен жоғалады • эритема, қышыну, есекжем сияқты тері реакциялары. Бала жасындағы пациенттер Жарияланған постмаркетингтік деректер, сондай-ақ 1 жыл бойы ем қабылдаған 10-16 жас тобындағы шектеулі балалар популяциясындағы бақыланатын клиникалық зерттеулер балалардағы жағымсыз әсерлерінің сипаты мен ауырлығы бойынша ересек пациенттердегі жағымсыз әсерлерге ұқсас екенін көрсетеді. Жағымсыз дәрілік реакциялар туындаса медицина қызметкеріне, фармацевтика қызметкеріне немесе дәрілік препараттардың тиімсіздігі туралы хабарламаларды қоса, дәрілік препараттарға жағымсыз реакциялар (әсерлер) бойынша ақпараттық деректер базасына тікелей хабарласыңыз Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

Препаратты 85 г дозада қолданған кезде (ең жоғары тәуліктік дозадан 42,5 есе) гипогликемияның дамуы байқалмады, бірақ лактоацидоздың дамуы байқалды. Метформинмен едәуір артық дозалану немесе ұштасқан қауіп факторлары лактоацидоздың дамуына әкелуі мүмкін. Лактоацидоз ауруханаға жатқызуды қажет ететін шұғыл медициналық жағдай болып табылады. Емі: лактоацидоз белгілері пайда болған жағдайда препаратпен емдеуді дереу тоқтату, пациентті шұғыл ауруханаға жатқызу және лактат концентрациясын анықтап, диагнозды нақтылау қажет. Организмнен лактат пен метформинді шығару бойынша ең тиімді іс-шара гемодиализ болып табылады. Сондай-ақ, симптоматикалық емдеу де жүргізіледі.

Лактоацидоз Лактоацидоз өте сирек кездесетін, бірақ ауыр (жедел емдеу болмаған кезде өлім жағдайының жоғары деңгейі) метаболизмдік асқыну, көбінесе ауыр бүйрек жеткіліксіздігі, жүрек-өкпе аурулары немесе сепсис кезінде пайда болады. Бүйрек функциясының жедел нашарлауымен метформиннің жинақталуы жүреді, бұл лактоацидоздың даму қаупін арттырады. Сусыздану жағдайында (ауыр диарея немесе құсу, қызба немесе сұйықтықты тұтынудың төмендеуі) метформинді қабылдауды уақытша тоқтату керек, дәрігермен кеңесу ұсынылады. Бүйрек функциясының жедел бұзылуын тудыруы мүмкін дәрілік препараттарды (мысалы, гипертензияға қарсы дәрілер, диуретиктер және ҚҚСП) метформин алатын пациенттерге сақтықпен тағайындау керек. Декомпенсацияланған қант диабеті, кетоз, ұзақ уақыт ашығу, алкогольді шамадан тыс тұтыну, бауыр жеткіліксіздігі және ауыр гипоксиямен байланысты кез-келген жағдай, сондай-ақ лактоацидозды тудыруы мүмкін дәрілік заттарды бір уақытта қабылдау сияқты лактоацидоздың басқа да қауіп факторларын ескеру қажет. Пациенттер және/немесе күтуші адамдар лактоацидоз қаупі туралы хабардар болуы тиіс. Лактоацидоз ацидоздық ентігу, іштің ауыруы, бұлшықет құрысуы, айқын астения, комаға ұласатын гипотермия сияқты спецификалық емес белгілердің пайда болуымен де сипатталады. Диагностикалық зертханалық көрсеткіштер қан рН төмендеуі (7,35-тен төмен), қан плазмасындағы лактат деңгейінің жоғарылауы (5 ммоль/л-ден жоғары), аниондық аралықтың және лактат/пируват арақатынасының ұлғаюы болып табылады. Метаболизмдік ацидозға күдік туған жағдайда препаратты қабылдауды тоқтатып, дереу дәрігерге қаралу қажет. Қосымша нұсқаулар алу үшін дереу дәрігерге хабарласыңыз, егер: • Сіз MELAS синдромы (митохондриялық энцефалопатия, миопатия, лактоацидоз және инсульт тәрізді эпизодтар) немесе тұқым қуалайтын қант диабеті және анасы жағынан берілетін кереңдік (MIDD) сияқты митохондрияларға (жасушаларда энергия өндіретін компоненттер) әсер ететін генетикалық тұқым қуалайтын аурудан зардап шегетініңіз белгілі. • Метформинді қабылдауды бастағаннан кейін сізде осы белгілердің кез келгені пайда болды: құрысулар, когнитивті қабілеттердің төмендеуі, дене қозғалысының қиындауы, жүйке зақымдануын көрсететін белгілер (мысалы, ауырсыну немесе ұйқышылдық), мигрень және саңырау. Бүйрек функциясы Метформин емді бастар алдында бүйрекпен шығарылатындықтан және кейіннен жүйелі түрде креатинин клиренсіне бақылау жүргізген жөн: - бүйрек функциясы қалыпты пациенттерде жылына кемінде бір рет; - 3-6 ай сайын егде жастағы пациенттерде, сондай-ақ қалыптың төменгі шегінде креатинин клиренсі бар пациенттерде. Метформин креатинин клиренсінің көрсеткіштері 30 мл/мин төмен пациенттерге қарсы көрсетілген, бүйрек функциясын бұзатын жағдайлар болған кезде оны қабылдау уақытша тоқтатылуы тиіс. Жүрек жеткіліксіздігі Жүрек жеткіліксіздігі бар пациенттерде гипоксия мен бүйрек жеткіліксіздігінің даму қаупі жоғары болады. Созылмалы жүрек жеткіліксіздігі бар пациенттерге метформинді қабылдау кезінде жүрек және бүйрек функциясына үнемі мониторинг жүргізу керек. Гемодинамиканың тұрақсыз көрсеткіштері бар жүрек жеткіліксіздігі кезінде метформинді қабылдауға болмайды. Құрамында йод бар рентгенконтрастылы заттарды қолдану Құрамында йод бар контрастылы заттарды тамыр ішіне енгізу контраст-индукцияланған нефропатияны туындатуы мүмкін, бұл метформиннің жиналуына және лактоацидоздың даму қаупінің жоғарылауына әкеледі. Метформинді қабылдауды йоды бар рентген-контрастылы заттарды қолдана отырып, зерттеуге дейін немесе сол уақытта тоқтату және бүйрек функциясы қайта бағаланған және тұрақты деп танылған жағдайда, процедурадан кейін 48 сағаттан соң ғана қайта бастау керек. Хирургиялық операциялар Жалпы, жұлын немесе эпидуральді анестезиямен жоспарлы хирургиялық операциялар жүргізу кезінде метформинді қолдану тоқтатылуы тиіс. Бүйрек функциясы қайта тексеріліп, тұрақты деп танылған жағдайда ем хирургиялық араласудан немесе пероральді тамақтануды қалпына келтіргеннен кейін 48 сағаттан соң ғана қайта басталуы мүмкін. Педиатриялық популяция 2 типті қант диабеті диагнозы метформинмен емдеу басталғанға дейін расталуы тиіс. Ұзақтығы 1 жылды құрайтын клиникалық зерттеулер барысында метформиннің өсу мен жыныстық жетілуге әсер етпейтіні байқалды. Алайда, ұзақ мерзімді деректердің болмауына байланысты метформиннің балалардағы, әсіресе жыныстық жетілу кезіндегі осы параметрлерді кейінгі әсерін мұқият бақылау ұсынылады. 10 жастан 12 жасқа дейінгі балалар Метформинді 10-нан 12 жас аралығындағы балаларда қолданудың клиникалық тәжірибесі шектеулі - тек 10-нан 12 жас аралығындағы 15 адам бақыланатын клиникалық зерттеулерге енгізілді. Бұл балалар үшін метформиннің тиімділігі мен қауіпсіздігі үлкен балалар мен жасөспірімдер үшін тиімділік пен қауіпсіздіктен ерекшеленбегенімен, аталған жас тобындағы балаларға препаратты тағайындағанда ерекше сақ болу керек. Басқа сақтандыру шаралары Пациенттерге күні бойы көмірсуларды біркелкі тұтына отырып, диетаны ұстануды жалғастыру ұсынылады. Дене салмағы артық пациенттерге гипокалориялық диетаны ұстануды жалғастыру ұсынылады (бірақ тәулігіне 1000 ккал кем емес). Қант диабетін бақылау үшін үнемі стандартты зертханалық зерттеулер жүргізу ұсынылады. Метформин қан сарысуындағы В12 дәрумені деңгейін төмендетуі мүмкін. В12 дәрумені деңгейінің төмендеу қаупі метформин дозасының, емдеудің ұзаруымен және/немесе В12 дәрумені тапшылығын тудыратын қауіп факторлары бар пациенттерде артады. В12 дәруменінің тапшылығына күдік туындаған жағдайда (мысалы, анемия немесе нейропатия кезінде) оның қан сарысуындағы деңгейін бақылау керек. В12 дәрумені тапшылығының қауіп факторлары бар пациенттер үшін В12 дәрумені деңгейіне мерзімді тексеру қажет болуы мүмкін. Метформинмен емдеуді ол жақсы көтерімді және қарсы көрсетілімдері болмағанша жалғастыру қажет, ал В12 дәруменінің тапшылығын қажетті түзететін емдеу ағымдағы клиникалық нұсқауларға сәйкес жүргізіледі. Метформин монотерапия кезінде гипогликемияны туғызбайды, алайда оны инсулинмен немесе басқа гипогликемиялық дәрілермен (мысалы, сульфонилмочевина туындыларымен, меглитинидтер тобының препараттарымен) біріктіріп қолданғанда сақтық таныту ұсынылады. Арнайы сақтандырулар Жүктілік кезінде және бала емізу кезінде қолдану Жүктілік Прегравидарлық кезеңде және жүктілік кезінде бақыланбайтын гипергликемия туа біткен ауытқулардың дамуы, жүктіліктің соңына дейін жетпеуі, жүктіліктен туындаған гипертензияның пайда болуы, преэклампсия және перинатальді өлім қаупінің жоғарылауымен астасады. Ана мен бала үшін гипергликемиямен байланысты қолайсыз нәтижелер қаупін азайту үшін жүктілік кезінде қандағы глюкоза деңгейін қалыпты жағдайға жақын ұстау қажет. Метформин аналық деңгейге жетуі мүмкін концентрацияда плацента арқылы өтеді. Регистрлер және жарияланған деректер (метаанализдер, клиникалық зерттеулер, регистрлер) негізінде когорттық зерттеуден алынған жүкті әйелдер туралы деректердің басым бөлігі (1000-нан астам жағдай) метформинді прегравидарлық кезеңде және/немесе жүктілік кезінде қолданғаннан кейін туа біткен ауытқулардың, фетоуыттылықтың немесе неонатальді уыттылықтың даму қаупінің жоғарылағанын көрсетпейді. Құрсақішілік даму кезеңінде метформиннің балаларға әсер етуінің алыс нәтижелері туралы жеткіліксіз және дәлелсіз деректер бар. Метформин, құрсақішілік кезеңде оның әсеріне ұшыраған 4 жасқа дейінгі балалардың моторикасы мен әлеуметтік дамуына әсер етпейді, дегенмен кейіннен білінетін нәтижелері туралы мәліметтер шектеулі. Клиникалық қажеттілік кезінде метформинді жүктілік кезінде және прегравидарлық кезеңде қолдануды инсулинге қосымша немесе альтернатива ретінде қарастыруға болады. Лактация Метформин емшек сүтіне өтеді. Метформинді қабылдау аясында емшек сүтімен емізу кезінде нәрестелерде жағымсыз әсерлер байқалмады. Алайда, деректердің шектеулі болуына байланысты бала емізу кезеңінде препаратты қолдану ұсынылмайды. Бала емізуді тоқтату туралы шешім бала емізудің пайдасы мен балада жағымсыз әсерлердің пайда болу қаупін ескере отырып қабылдануы керек. Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері Препаратпен монотерапия гипогликемия туғызбайды, сондықтан көлік құралдары мен механизмдерді басқару қабілетіне әсер етпейді. Пациенттерді метформинді басқа гипогликемиялық дәрілермен (сульфонилмочевина туындыларымен, инсулинмен немесе меглитинидтер тобының препараттарымен және т.б.) бірге қолданған кезде гипогликемияның даму қаупі туралы ескерту керек, бұл кезде көлік құралдарын басқару және жоғары зейін қоюды және жылдам психомоторлық реакцияларды талап ететін басқа да қауіпті қызмет түрлерімен айналысу қабілеті нашарлайды.

Нұсқаулықта көрсетілмеген.

Ұсынылмайтын біріктірілімдер Алкоголь Жедел алкогольдік уыттану кезінде лактоацидоздың даму қаупі артады, әсіресе: • ашығу; • дұрыс тамақтанбау; • бауыр жеткіліксіздігі. Құрамында йод бар рентгенконтрастылы заттар Метформинді қабылдауды құрамында йоды бар рентгенконтрастылы заттарды қолдана отырып, зерттеуге дейін немесе сол уақытқа тоқтату және бүйрек функциясы қайта бағаланған және тұрақты деп танылған жағдайда, оны қабылдауды процедурадан кейін 48 сағаттан соң ғана қайта бастау керек. Сақтықты қажет ететін біріктірілімдер Кейбір дәрілік заттар бүйрек функциясына теріс әсер етуі мүмкін, бұл лактоацидоздың даму қаупін арттыруы мүмкін - мысалы, ҚҚСП, циклооксигеназа-2 (ЦОГ-2) селективті тежегіштерін, ангиотензин өзгертуші фермент (АӨФ), ангиотензин II рецепторларының антагонистерін және диуретиктерді, әсіресе ілмектік диуретиктер қамтылған. Мұндай препараттарды қабылдаудың басында немесе метформинмен бірге қолдану процесінде бүйрек функциясын мұқият бақылау қажет. Ішкі гипергликемиялық белсенділігі бар дәрілік препараттар (мысалы, глюкокортикоидтар (жүйелі және жергілікті енгізу) және симпатомиметиктер) Қандағы глюкоза деңгейін, әсіресе емдеудің басында жиі бақылау қажет болуы мүмкін. Қажет жағдайда метформин дозасы тиісті дәрілік затпен емдеу уақыты кезінде және оны тоқтатқаннан кейін түзетілуі мүмкін. Органикалық катиондар транспортерлері (ОСТ) Метформин органикалық катиондардың екі транспортерінің субстраты - OСT1 және OСT2. Метформинмен бірге қолданған кезде: - ОСТ1 тежегіштері (верапамил сияқты) метформиннің гипогликемиялық әсерін төмендетуі мүмкін; - ОСТ1 индукторлары (рифампицин сияқты) асқазан-ішек жолында метформиннің сіңуін арттырып, оның гипогликемиялық әсерін күшейте алады; - ОСТ2 тежегіштері (циметидин, долутегравир, ранолазин, триметоприм, вандетаниб, изавуконазол сияқты) метформиннің бүйрек арқылы шығарылуын төмендетуі және оның қан плазмасындағы концентрациясының ұлғаюына әкелуі мүмкін; - екі ОСТ тежегіштері (кризотиниб, олапариб сияқты) метформиннің тиімділігін және оның бүйрекпен шығарылуын өзгерте алады. Осыған байланысты метформинмен аталған препараттарды бір мезгілде қолданған кезде, әсіресе бүйрек жеткіліксіздігі бар пациенттерге сақ болу ұсынылады, өйткені метформиннің плазмалық концентрациясы жоғарылауы мүмкін. Қажет жағдайда метформин дозасын түзету мүмкіндігін қарастыруға болады, өйткені ОСТ тежегіштері/индукторлары метформиннің тиімділігін өзгерте алады.

Сақтау мерзімі 3 жыл Жарамдылық мерзімі өткеннен кейін қолдануға болмайды! Сақтау шарттары 25 °С-ден аспайтын температурада сақтау керек. Балалардың қолы жетпейтін жерде сақтау керек!