НЕОДЕКС глазные

Бір мл ерітіндінің құрамында белсенді заттар: дексаметазон (дексаметазон натрий фосфаты түрінде) 1 мг, неомицин (неомицин сульфаты түрінде) 5 мг, қосымша заттар: динатрий фосфаты додекагидраты, инъекцияға арналған су. Сыртқы түрінің, иісінің, дәмінің сипаттамасы Түссіз немесе сары мөлдір сұйықтық.

- жедел және созылмалы бактериялық блефаритте - жедел және созылмалы бактериялық конъюнктивитте - аллергиялық конъюнктивитте - кератиттерде (эпителийдің зақымдануынсыз) - жедел және созылмалы бактериялық иритте және иридоциклитте - көздің алдыңғы бөлігінің операциядан кейінгі қабынуының профилактикасында (эпителийдің бүтіндігі сақталған кезде) - жедел және созылмалы сыртқы отитте - сыртқы құлақтың инфекциялық-аллергиялық ауруларында - гайморитте, синуситте - риниттерде (этиологиясы әртүрлі, бактериялық инфекциямен асқынған)

Әсер ету механизмі Неодекс препаратының емдік әсері дексаметазонның қабынуға қарсы әсерімен және неомицин антибиотигінің бактерияға қарсы әсерімен байланысты. Неомицин – Streptomyces fradiae өндіретін аминогликозидтер тобына жататын антибиотик. Микробтық жасушадағы ақуыз синтезін бұзады, бактерицидтік әсері бар. Бактерияға қарсы кең спектрлі әсері бар, Staphylococcus aureus, Streptococcus pneumonie, Escherichia coli, Klebsiella pneumoniae, Haemophilus influenzae, Proteus spp қоса алғанда, көптеген грамтеріс және грамоң микроорганизмдерге қатысты белсенді. Pseudomonas aeruginosa және стрептокококктарға қатысты белсенді емес; патогенді саңырауқұлақтарға, вирустарға, анаэробты флораға қатысты белсенді емес. Микроорганизмдердің неомицинге төзімділігі баяу және шамалы дәрежеде дамиды. Дексаметазон – глюкокортикостероид, минералокортикоидтық белсенділігі жоқ. Қабынуға қарсы, аллергияға қарсы және десенсибилизациялайтын әсері бар. Жергілікті қолданғанда қышуды басатын және тамырды тарылтатын әсері бар. Қабыну медиаторларының эозинофилдерінің шығарылуын, мес жасушалардың миграциясын тежейді және капиллярлардың өткізгіштігін азайтады. Гиалуронидазаның, коллаген мен протеазалардың белсенділігін тежейді. Дексаметазонның неомицинмен біріктірілуі инфекциялық процестің даму қаупін төмендетуге мүмкіндік береді.

Дозалау режимі Көзге: ересектерге ауыр емес инфекциялық процесс кезінде конъюнктивалық қалтаға әр 4-6 сағат сайын 1-2 тамшыдан тамызады. Ауыр инфекциялық процесс дамыған жағдайда препаратты конъюнктивалық қалтаға күніне 1-2 сағат аралықпен 1-2 тамшыдан тамызып, қолдану жиілігін күніне 4-6 рет 1-2 тамшыға дейін біртіндеп азайта отырып тамызады. Созылмалы қабыну кезінде 1 тамшыдан күніне 2 рет. Құлаққа: препаратты қолданар алдында сыртқы есту жолын мұқият тазалап, тампонмен сүрту керек. Ұсынылатын бастапқы доза күніне 2-3 рет 3-4 тамшыны немесе препаратқа малынған мақта тампонын құрайды. Оң нәтижеге жеткеннен кейін, дәрі дозасын біртіндеп толық жазылғанға дейін азайтуға болады. Құлаққа тамшыларды тамызар алдында, жағымсыз сезімдерді болдырмау үшін, құтыны қолмен ұстап, жылыту ұсынылады. Мұрынға: 2-3 тамшыдан күніне 3-4 рет әр мұрын жолына. Енгізу әдісі мен жолы Субконъюнктивальді, интраназальді, құлаққа. Емдеу ұзақтығы Қолдану ұзақтығы зақымдану түріне және терапиялық жауапқа байланысты. Емдеу курсының ұзақтығын емдеуші дәрігер анықтайды. Егер емдеудің 7 күні ішінде клиникалық жауап болмаса, тамшыларды қабылдауды тоқтату керек. Дәрілік препаратты қолдану тәсілін түсіндіру үшін медициналық қызметкер кеңесіне жүгіну жөніндегі кеңестер Препаратты қолдану туралы сұрақтар туындаған жағдайда емдеуші дәрігерге қаралыңыз.

- препараттың кез келген компоненттеріне жоғары сезімталдық - Herpes simplex немесе Varicella zoster вирусы туындатқан кератит (тармақтанған кератит) - желшешек және көздің, мұрынның және құлақтың басқа да вирустық аурулары - көз мен құлақтың зең аурулары - туберкулез - мөлдірқабықтан бөгде заттың асқындырмай алынуы - конъюнктиваның, қабақтың іріңді инфекциялары - мөлдір қабық эпителийі бүтіндігінің бұзылуы және аққабықтың жұқаруы - дабыл жарғағының инфекциялық немесе травмалық зақымданулары - жүктілік және лактация кезеңі - 18 жасқа дейінгі балалар мен жасөспірімдер Глаукома болған кезде қолдануға болмайды.

Сирек, ұзақ уақыт қолданғанда келесілер туындауы мүмкін: - тітіркендіретін, ашытатын, шаншылайтын, қышитын және дерматитті туындататын, әдетте баяу типті аса жоғары сезімталдық реакциялары - глаукоманың кейінгі даму қаупімен байқалатын көзішілік қысымның жоғарылауы, соның нәтижесінде көру нервінің сипатты зақымдануы, көру аумағының бұзылуы дамиды - артқы субкапсулярлық катарактаның пайда болуы - жаралардың біту процесінің баяулауы (мөлдір қабықтың немесе аққабықтың жұқаруын туындататын аурулармен ауырғанда стероид препараттарды жергілікті қолданғанда фиброзды қабықтың тесілуі мүмкін) - екінші қайтара (зең немесе вирустық) инфекцияның дамуы - дабыл жарғағының тұтастығы бұзылған кезде – есту және вестибулярлық аппаратқа уытты әсер ету қаупі - назальді кортикостероидтардың жүйелі әсерлері, әсіресе ұзақ уақыт бойы жоғары дозаларды тағайындағанда. Ұсынылған дозаларда назальді кортикостероидтарды қабылдайтын балаларда бой өсудің тежелгені туралы хабарланды. Назальді кортикостероидтармен ұзақ ем алатын балалардың бой өсуін ұдайы бақылау ұсынылады. Егер бой өсу баяуласа, симптомдарды тиімді бақылау сақталатын ең төменгі дозаға дейін, мүмкін болса, назальді кортикостероидтардың дозасын төмендету мақсатында емді қайта қарастыру керек. Сонымен қатар, пациентті педиатрға жіберу мүмкіндігін қарастырған жөн. Жағымсыз дәрілік реакциялар туындағанда медициналық қызметкерге, фармацевтикалық қызметкерге немесе, дәрілік препараттардың тиімсіздігі туралы хабарламаларды қоса, дәрілік препараттарға болатын жағымсыз реакциялар (әсерлер) жөніндегі ақпараттық деректер базасына тікелей хабарласу керек Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

Симптомдары: жағымсыз әсерлердің күшеюі. Емі: препаратты қолдануды тоқтату және симптоматикалық ем жүргізу.

Арнайы ескертулер Препарат нақты диагноз қойылғаннан кейін және вирустық және зеңді тектес қабыну жоққа шығарылғаннан кейін ғана қолданылуы мүмкін. Кортикостероидтар мен антибиотиктер біріктірілімдерімен емдеуді клиникалық жақсарулар болмаған кезде 7 күннен артық жалғастыруға болмайды, өйткені ұзақ уақыт қолдану стероидтің бүркемелеуші әсеріне байланысты инфекцияның жасырын таралуын туындатуы мүмкін. Ұзақ мерзімді пайдалану терінің сенсибилизациясын және төзімді организмдердің пайда болуын туындатуы мүмкін. Кортикостероидтық препараттармен офтальмологиялық емдеуді көзішілік қысымның жоғарылауын, катаракта туындауын немесе күтпеген инфекцияларды болдырмау үшін тұрақты тексерусіз қайталауға немесе ұзартуға болмайды. Аминогликозидті антибиотиктер жүйелі қолданғанда немесе ашық жараларға немесе зақымдалған теріге жергілікті қолданғанда қайтымсыз, ішінара немесе толық кереңдікті туындатуы мүмкін. Бұл әсер дозаға байланысты және бүйрек немесе бауыр функциясының жеткіліксіздігімен күшейеді. Басқа аминогликозидтерді бір мезгілде қолдануға болмайды. Сақтықпен: егде жастағы адамдардың ото - және нефроуыттылық қаупі. Бүйрек функциясының жеткіліксіздігі кезінде препарат жинақталуы мүмкін. Емдеу кезеңінде әр 3 күн сайын шумақшалық сүзілуді бақылау керек. Катарактаға, глаукомаға шалдыққанда сақтықпен қолдану керек. Құрамында глюкокортикостероидтар бар препараттарды 7 күннен астам қолданған кезде көзішілік қысымды және мөлдір қабықтың жағдайын тұрақты бақылау керек. Неодекс препаратымен емдегенде жұмсақ контактылы линзаларды киюге болмайды. Қатты линзаларды қолданғанда тамызар алдында оларды шешіп тастау керек және препаратты тамызғаннан кейін 15-20 минуттан кейін қайта кию керек. Егер мұрынның емделмеген инфекциясы болса немесе пациентте өкпе туберкулезі болса немесе мұрынға жасалған операциядан кейін (сауыққанға дейін) кортикостероидтарды мұрынға енгізу ұсынылмайды. Назальді кортикостероидтардың жүйелі әсерлері, әсіресе ұзақ уақыт бойы жоғары дозаларды тағайындағанда туындауы мүмкін. Бұл әсерлер пероральді кортикостероидтар кезінде болатын әсерлерге қарағанда әлдеқайда аз туындайды және жеке пациенттерде және әртүрлі кортикостероидтық препараттар арасында өзгеруі мүмкін. Ықтимал жүйелі әсерлерге Кушинг синдромы, Кушингоид белгілері, бүйрекүстібез тежелуі, балалар мен жасөспірімдерде бой өсудің тежелуі, катаракта, глаукома және психомоторлық гиперактивтілік, ұйқының бұзылуы, мазасыздық, депрессия немесе агрессия (әсіресе балаларда) сияқты психологиялық немесе мінез-құлық әсерлері кіруі мүмкін. Көру қабілетінің бұзылуы кортикостероидтарды жүйелі және жергілікті қолданғанда байқалуы мүмкін. Егер пациентте бұлыңғыр көру немесе көрудің басқа бұзылыстары сияқты симптомдар байқалса, пациентті офтальмологке катаракта, глаукома немесе орталықтық серозды хориоретинопатия сияқты сирек кездесетін ауруларды қамтуы мүмкін себептерді бағалау үшін жіберу мүмкіндігін қарастырған жөн. Тамызғы-құты ұшының және ерітіндінің ластануын болдырмау үшін, беткейлерге тамызғы-құты ұшының тиіп кетуден сақ болу керек. Қолданғаннан кейін құтыны жабыңыз. Педиатрияда қолданылуы 18 жасқа дейінгі балаларға дәрілік заттың тиімділігі мен қауіпсіздігі жөніндегі деректер жоқ.

Жүктілік кезінде осы препаратты қолданудың қауіпсіздігі мен тиімділігі анықталмаған. Жүктілік кезінде аминогликозидті антибиотиктерді қолданған кезде шарананың отоуыттылық қаупі бар. Препаратты жүктілік кезінде қолдану ұсынылмайды. Емшек сүтіне жергілікті қолданғаннан кейін препараттың белсенді компоненттерінің енетіні туралы сенімді деректер жоқ. Жүйелік кортикостероидтар мен аминогликозидтер емшек сүтіне енетіндіктен, емшектегі бала үшін қаупі жоққа шығарылмауы мүмкін. Препаратты тағайындаған кезде бала емізуді үзу немесе оны тоқтату туралы (бала үшін бала емізудің пайдасын/қаупін және әйел үшін емдеудің пайдасын ескере отырып, препаратпен емдеуден бас тарту) салмақты шешім қабылдау қажет. Дәрілік заттың көлік құралдарын немесе қауіптілігі зор механизмдерді басқару қабілетіне әсер ету ерекшеліктері Препаратты тамызғаннан кейін ашытуы және көз жасаурау мүмкін болғандықтан, оны көлік құралын басқару немесе механикалық жабдыққа қызмет көрсету алдында тікелей қолдану ұсынылмайды.

Препаратты басқа офтальмологиялық дәрілермен бірге қолданған кезде тамызулар арасындағы аралықты кемінде 10 минут сақтау қажет. Неомицин жүйелі аминогликозидтік антибиотиктермен (мономицин, стрептомицин, гентамицин, амикацин, нетилмицин, ванкомицин) бір мезгілде жергілікті тағайындалса, нефро- және отоуыттылықтың күшею қаупіне байланысты қан сарысуындағы препараттың жалпы концентрациясын қадағалау керек. Аминогликозидтер нейробұлшықеттік берілісті нашарлатуы мүмкін, сондықтан анестетиктермен бір мезгілде тағайындау ұсынылмайды. Аминогликозидтермен кортикостероидтарды ұзақ және жиі жергілікті қолданғанда жүйелі әсерлер дамуы мүмкін. Фармацевтикалық үйлесімсіздік аминогликозидтер мен эритромицинді немесе хлорамфениколды біріктірген кезде болады. Дексаметазонды идоксуридинмен ұзақ уақыт қолдану мөлдірқабық эпителийінде деструкциялық процестердің күшеюін туындатуы мүмкін. М-холиноблокаторлармен (антигистаминдік препараттарды, трициклді антидепрессанттарды қоса алғанда), нитраттармен бір мезгілде тағайындау көзішілік қысымның жоғарылауына әсер етеді. Неомицинге аллергия болғанда антибиотиктерге аминогликозидтерге айқаспалы аллергия болуы мүмкін. Құрамында кобицистат бар өнімдерді қоса алғанда, CYP3A тежегіштерімен бірлескен емдеу жүйелі жағымсыз әсерлердің даму қаупін арттырады деп күтіледі. Егер пайдасы кортикостероидтардың жүйелі жағымсыз әсерлерінің жоғары қаупінен аспаса, біріктірілімдерден аулақ болу керек; бұл жағдайда пациенттер кортикостероидтардың жүйелі жағымсыз әсерлерін анықтау үшін бақылауда болуы тиіс.

Сақтау мерзімі 2 жыл Құтыны ашқаннан кейін препараттың сақталу мерзімі - 4 апта. Жарамдылық мерзімі өткеннен кейін қолдануға болмайды! Сақтау шарттары Жарықтан қорғалған жерде, 15 С-ден 25 С-ге дейінгі температурада сақтау керек. Балалардың қолы жетпейтін жерде сақтау керек!