НовоРапид® ФлексПен® раствор 100 единиц действия/мл

Бір мл препарат құрамында белсенді зат - инсулин аспарт*, 100 ӘБ (600 нмоль=3,5 мг), қосымша заттар - мырыш, глицерол, фенол, метакрезол, натрий гидрофосфатының дигидраты, натрий хлориді, 2 М хлорсутек қышқылы (рН үшін), 2 М натрий гидроксиді (рН үшін), инъекцияға арналған су. * Инсулин аспарт рекомбинантты ДНҚ технологиясы бойынша Saccharomyces cerevisiae жасушаларын қолдана отырып алынған. Бір алдын ала толтырылған шприц-қаламда инсулин аспарттың 300 ӘБ баламалы 3 мл ерітінді бар. Сыртқы түрінің, иісінің, дәмінің сипаттамасы Мөлдір, түссіз ерітінді. Сақтаған кезде өте жұқа тұнба қабаты пайда болуы мүмкін.

НовоРапид® ФлексПен® препараты ересек адамдардың, жасөспірімдердің және 1 жасқа толған және одан асқан балалардың қант диабетін емдеу үшін қолданылады.

Әсер ету механизмі және фармакодинамикалық әсерлері Инсулин аспарттың қандағы глюкоза деңгейінің төмендеуін тудыратын әсері оның молекулалары бұлшықет және май жасушаларының инсулиндік рецепторларымен байланыстыру есебінен глюкоза сіңіруді жеңілдеткен және бір мезгілде бауырдан глюкозаның шығарылуын бәсеңдеткен кезде орын алады. НовоРапид ФлексПен ерігіш адам инсулинімен салыстырғанда тезірек әсер ете бастауды және бір мезгілде ас қабылдаудан кейін алғашқы төрт сағат ішінде орнатылғандай глюкозаның төменірек концентрациясын қамтамасыз етеді. НовоРапид ФлексПен тері астына енгізілген ерігіш адам инсулинімен салыстырғанда әлдеқайда қысқа әсерге ие. Уақыт (сағ)Уақыт (сағ)Қандағы глюкозаның концентрациясы (ммоль/л)Қандағы глюкозаның концентрациясы (ммоль/л) 1-сурет. 1-ші типті қант диабеті бар пациенттердің тікелей ас қабылдаудан бұрын (тұтас қисық) НовоРапид ФлексПен бір реттік дозасын немесе ас қабылдауға дейін 30 минут бұрын (үзік сызық қисық) ерігіш адам инсулинінің бір реттік дозасын енгізгеннен кейін қандағы глюкоза концентрациясының өзгерістері. Тері астына енгізген кезде НовоРапид ФлексПен инъекциядан кейін 10-20 минут ішінде әсер ете бастайды. Максималды әсері инъекциядан кейін 1-3 сағат уақыт аралығында пайда болады. Әсер ету ұзақтығы 3-тен 5 сағатқа дейінгі уақытты құрайды. Клиникалық тиімділігі және қауіпсіздігі Клиникалық зерттеулердің нәтижелері 1-ші типті қант диабеті бар пациенттерде ерігіш адам инсулинін енгізгеннен гөрі, ас қабылдаудан және НовоРапид ФлексПен препаратын енгізгеннен кейін қандағы глюкозаның төменірек деңгейі байқалатынын көрсетті. 1-ші типті қант диабеті бар 1070 және 884 пациенттердің қатысуымен жүргізілген екі ұзақ ашық зерттеуде НовоРапид ФлексПен адам инсулинімен салыстырғанда гликозилирленген гемоглобин деңгейінің 0,12 пайызға [95% C.I. 0.03; 0.22] және 0,15 пайызға [95% C.I. 0.05; 0.26] төмендеуін туғызды; айырмашылық шектелген клиникалық мәнге ие. 1-ші типті қант диабеті бар пациенттерге жүргізілген клиникалық зерттеулердің нәтижелері ерігіш адам инсулинімен салыстырғанда инсулин аспартты қолданған кезде түнгі гипогликемияның даму қаупі төмендейтінін көрсетеді. Гипогликемияның күндізгі уақытта орын алу қаупі өзгеріссіз қалды. Инсулин аспарттың молярлық негізі ерігіш адам инсулиніне арналған негізге пара-пар. Пациенттердің ерекше топтары Егде жастағы пациенттер 2-ші типті қант диабеті бар егде жастағы пациенттерде инсулин аспарт пен ерігіш адам инсулинінің фармакокинетикасы мен фармакодинамикасының рандомдалған қос жасырын айқас зерттеуі жүргізілді (65-83 жастағы 19 пациент, орташа жасы 70). Егде жастағы пациенттерде инсулин аспарт пен адам инсулині арасындағы фармакодинамикалық қасиеттердің салыстырмалы айырмашылықтары (GIRmax, AUCGIR, 0-120 min) сыналған сау адамдар мен қант диабеті бар жастау пациенттердің осы көрсеткіштерімен ұқсас болды. Балалар Кішкентай балаларға (2-ден 6 жасқа дейінгі 20 пациент, 12 апта ішінде зерттелді және төртеуі 4 жастан кіші болды) ас қабылдауға дейін постпрандиальді инсулин аспартты енгізумен ерігіш адам инсулинін енгізудің салыстырмалы клиникалық зерттеуі жүргізілді және балалар (6-12 жас) мен жасөспірімдерде (13-17 жас) бір реттік дозаның фармакокинетикасы мен фармакодинамикасы зерттелді. Балаларда инсулин аспарттың фармакодинамикалық бейіні ересек пациенттердікінен өзгеше болмайтыны анықталды. Негіздік инсулин ретінде инсулин детемирмен немесе инсулин деглудекпен үйлесімде болюстік инсулин ретінде қолданылатын НовоРапид ФлексПен препаратының тиімділігі мен қауіпсіздігі 1 жастан бастап 18 жасқа дейінгі (n = 712) балалар мен жасөспірімдерге жүргізілген екі рандомдалған бақыланатын клиникалық зерттеулерде 12 айға дейінгі мерзім ішінде зерттелді. Зерттеулерге 1-5 жастағы 167 бала, 6-11 жастағы 260 бала және 12-ден 17 жасқа дейінгі 285 бала қатысты. HbA1c байқалатын жақсарулар және қауіпсіздік бейіндері барлық жас топтарының арасында салыстырымды болды. Жүктілік 1-ші типті қант диабеті бар жүкті әйелдерді инсулин аспартпен және адам инсулинімен (322 жүкті әйел (инсулин аспарт: 157; адам инсулині: 165)) емдеу қауіпсіздігі мен тиімділігі салыстырылған клиникалық зерттеудің нәтижелері инсулин аспарттың жүктілік ағымына немесе ұрық пен жаңа туған нәрестелердің денсаулығына қандай да бір жағымсыз реакцияларын көрсетпеді. Сонымен бірге рандомдалған тәртіппен инсулин аспартпен немесе адам инсулинімен (инсулин аспарт: 14; адам инсулині: 13) емдеу алған гестациялық диабеті бар 27 әйелді қамтыған клиникалық зерттеудің деректері емдеулер арасындағы қауіпсіздіктің ұқсас бейінін көрсетті.

НовоРапид® ФлексПен® препараты қандағы қант деңгейін енгізгеннен 10-20 минуттан кейін төмендете бастайды, әсер ету шыңы енгізгеннен 1-3 сағаттан кейін байқалады және әсер ету ұзақтығы 3-5 сағатты құрайды. НовоРапид® ФлексПен® препаратының әсер ету ұзақтығы қысқалау болғандықтан, әдетте оны әсер ету ұзақтығы орташа немесе ұзақ инсулин препараттарымен бірге үйлестіріп пайдаланады. Сонымен бірге, НовоРапид® ФлексПен® препаратын инсулиндік сорғыларда үздіксіз инфузия жасау үшін қолдануға болады. Дозалау режимі Дәрігеріңізден немесе медбикеден инсулин дозасы жайында кеңес алыңыз. Дәрігеріңізбен тағайындалғандай түрлі-түсті кодировкасы бар НовоРапид® ФлексПен® препаратын қолданатыныңызға көз жеткізіңіз. Егер дәрігеріңіз Сізді инсулиннің басқа типіне немесе басқа сауда таңбасының препаратына ауыстырса, дәрігеріңіздің дозаны өзгертуі қажет болуы мүмкін. Дәрігеріңізден кеңес алмай, өз бетіңізше инсулинді ауыстыруға болмайды. Гипогликемия қайталануының профилактикасы үшін инъекциядан кейін 10 минут ішінде көмірсуларға бай тамақ ішу ұсынылады. НовоРапид® ФлексПен® препаратын әдетте тікелей ас қабылдау алдында енгізу керек, қажет болғанда НовоРапид® ФлексПен® препаратын ас қабылдаудан кейін жуық арада енгізуге болады. Пациенттердің айрықша топтары Бүйрек немесе бауыр функциясы бұзылған пациенттердің немесе 65 жастан асқан пациенттердің қанындағы қант деңгейін үнемі бақылап, инсулин аспарт дозасын дәрігеріңізбен жекеше түзету қажет. Балалар Балаларда препараттың тез әсер ете бастауы қажет болған жағдайда, ерігіш адам инсулинінің орнына НовоРапид® ФлексПен® препаратын қолданған дұрыс. Мысалы, балаға инъекция мен ас қабылдау арасындағы қажетті уақыт аралығын сақтау қиын болған жағдайда. Енгізу әдісі және жолы НовоРапид® ФлексПен® препараты тері астына (теріасты) инъекция жасауға немесе үздіксіз тері астына енгізуге арналған инсулиндік инфузиялар (ҮТИИ) жасауға арналған. Инсулиндік сорғымен енгізу медициналық қызметкерлердің толық нұсқау беруін талап етеді. Егер қажет болса, НовоРапид® ФлексПен® препараты дәрігердің немесе басқа медициналық қызметкердің қатаң бақылауымен венаға (вена ішіне) да енгізілуі мүмкін. Инсулинді ешқашан бұлшықетке (бұлшықет ішіне) енгізбеңіз. Терінің ісінуіне немесе домбығуына жол бермеу үшін инъекция енгізу орнын бір аймақ шегінде әрқашан ауыстырып отыру. Өз бетінше инъекция жасау үшін ұсынылатын жерлер мыналар болып табылады: алдыңғы құрсақ қабырғасы (іш); мықынның алдыңғы беті немесе иық. Инсулин алдыңғы құрсақ қабырғасы (іш) аймағына енгізілсе, ол тезірек әсер етеді. Пациентке қандағы қант деңгейін үнемі өлшеу қажет. НовоРапид® ФлексПен® препаратын қалай пайдалану керек НовоРапид® ФлексПен® шприц-қаламын пайдаланар алдында қолдану жөніндегі нұсқаулықты мұқият оқып шығыңыз. Шприц-қаламды нұсқаулықта сипатталғандай қолданған жөн. Дәрілік препараттың бір немесе бірнеше дозасын жіберіп алған кезде қажет шаралар Инсулин дозасын жіберіп алған кезде қаныңыздағы қант деңгейі қатты жоғарылап кетуі (гипергликемия) мүмкін. Гипергликемия мына жағдайларда да орын алуы мүмкін: - қажетті инсулиннен ұдайы аз дозаны қабылдасаңыз; - инфекция немесе қызу болған кезде; - тамақтың әдеттен тыс көп мөлшерін тұтынған кезде; - дене жүктемелері азайған кезде. Әдетте гипергликемияның хабаршы-симптомдары біртіндеп дамиды. Симптомдарға несеп шығару жиілігінің артуы, шөлдеу, тәбеттің жоғалуы, лоқсу, құсу, ұйқышылдық немесе шаршау сезімі, терінің қызаруы және құрғауы, ауыз қуысының құрғауы, сондай-ақ тыныс алған кездегі (ацетон) иіс жатады. Бұл диабеттік кетоацидоз (ағзаның қанттың орнына майды ыдыратқандығынан қанда қышқылдың жинақталуы) деп аталатын өте ауыр күйдің белгілері болуы мүмкін. Бұл күйді емдемеген жағдайда ол диабеттік комаға және ақыр аяғында өлімге әкеп соғуы мүмкін. Егер осындай белгілер анықталса, қандағы қант деңгейін тексеру керек, егер мүмкін болса, несепте кетондардың бар болуын тексеріңіз, осыдан кейін дереу дәрігерге қаралу қажет. Болдырмау симптомдары қаупінің бар болуына нұсқау Инсулин қабылдауды тоқтату ауыр гипергликемияға және кетоацидозға әкелуі мүмкін. Не істеу керек екендігін түсіндіретін дәрігеріңізден кеңес алмайынша инсулин қабылдауды тоқтатпаңыз. Дәрілік препаратты қолдану тәсіліне қатысты түсінік алу үшін медицина қызметкерінен кеңес алуға жүгіну жөніндегі ұсыныстар Егер препаратты қолдану жөнінде қандай да бір сұрағыңыз болса, дәрілік препаратты қолдану тәсіліне қатысты түсінік алу үшін медицина қызметкерінен кеңес алуыңызды сұраймыз. Дәрілік препаратты стандартты түрде қолданған кезде байқалатын жағымсыз реакциялардың сипаттамасы және бұл жағдайда қолданылуы тиіс шаралар НовоРапид® ФлексПен® препараты барлық дәрілік препараттар сияқты жағымсыз реакциялар тудыра алады, алайда реакциялар әрбір пациентте орын алмайды. Өте жиі - Қандағы қанттың төмен деңгейі (гипогликемия) Жиі емес - Аллергия белгілері Енгізген жерде реакциялар (жергілікті аллергиялық реакция) – ауырсыну, қызару, есекжем, қабыну, ісіну, қышу байқалуы мүмкін. Бұл реакциялар әдетте инсулинді бірнеше апта бойы қабылдағаннан кейін жоғалады. Егер реакциялар жоғалмаса, емдеуші дәрігеріңізден кеңес алыңыз. Дереу дәрігерден кеңес алыңыз: – егер аллергия белгілері дененің басқа бөліктеріне таралса – егер хал-жайыңыз кенет нашарлап, терлей бастасаңыз; құсу басталса; тынысыңыз тарылса; жүрек соғысы жиіленсе; бас айналуын сезсеңіз. - Көру мүшелері тарапынан бұзылулар Инсулинмен емдеу басталғаннан кейін көру тарапынан бұзылыстар туындауы мүмкін, бірақ бұл бұзылыс уақытша. - Инъекция орнындағы терінің өзгеруі Бір аймақта инсулинді бірнеше рет енгізу май тінінің жұқаруына (липоатрофияға) немесе қалыңдауына (липогипертрофияға) әкелуі мүмкін. Сонымен қатар, амилоид ақуызының жиналуынан туындаған теріасты тығызданулары пайда болуы мүмкін (даму жиілігі белгісіз тері амилоидозы). Теріасты тығызданулары бар, терісі жұқарған немесе қалыңдаған жерлерде инсулинді енгізу препарат тиімділігінің төмендеуіне әкелуі мүмкін. Мұндай тері өзгерістерінің дамуын болдырмау үшін препаратты әрбір енгізгенде инъекция орнын өзгерту керек. - Буындардың ісінуі Инсулин қабылдай бастағаннан кейін сұйықтықтың жинақталуы тобық немесе басқа буындар айналасының ісінуі дамуына себеп бола алады. - Диабеттік ретинопатия (көру қабілетінен айырылуға әкеле алатын, диабетпен байланысты көз ауруы). Егер диабеттік ретинопатияға шалдықсаңыз және қаныңыздағы қант деңгейі жылдам жоғарылап кетсе, бұл диабеттік ретинопатия күйінің нашарлауына әкелуі мүмкін. Бұл жөнінде дәрігеріңізден кеңес алу қажет. Сирек - Ауырсындыратын нейропатия (жүйкенің зақымдалуымен байланысты аурырсыну). Егер қаныңыздағы қант деңгейі жылдам жоғарыласа, жүйкенің зақымдалуымен байланысты ауырсыну болуы мүмкін. Бұл күй шұғыл ауырсындыратын нейропатия деп аталады және әдетте ол уақытша сипатта болады. Өте сирек - НовоРапид® препаратына немесе қосымша заттардың біріне (жүйелі аллергиялық реакция деп аталады) елеулі аллергиялық реакциялар. Егер қандай да бір жағымсыз реакция ауыр сипатқа ие болса немесе Сіз осы нұсқаулықта көрсетілмеген жағымсыз реакцияларды байқасаңыз, дәрігеріңізге хабарлауыңызды сұраймыз. Жағымсыз дәрілік реакциялар туындаған жағдайда медицина қызметкеріне, фармацевтика қызметкеріне немесе дәрілік препараттардың тиімсіздігі туралы хабарламаларды қосқанда, дәрілік препараттарға жағымсыз реакциялар (әрекеттер) бойынша ақпараттық дерекқорға тікелей хабарласыңыз. Қазақстан Республикасы Денсаулық сақтау министрлігі медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

• белсенді затқа немесе қосымша заттардың кез келгеніне аса жоғары сезімталдық • гипогликемия (қандағы қанттың төмен деңгейі) • 1 жасқа дейінгі жастағы балалар (пациенттердің бұл тобына клиникалық зерттеулер жүргізілген жоқ).

Нұсқаулықта көрсетілмеген.

Егер тым көп инсулин алсаңыз, қаныңыздағы қант деңгейі өте төмен болып кетеді (гипогликемия). Бұл мынадай себептермен де болуы мүмкін: - Қабылдау көлемі азайған кезде немесе тамақтануды өткізіп алсаңыз. - Егер дене жүктемесін әдеттегіден асырып жіберсеңіз. Гипогликемияның хабаршы-симптомдары кенет пайда болады және оларға суық тер, тері солғындығы, бас ауруы, жиіленген жүрек соғысы, дімкәстік, айқын аштық сезімі, көру қабілетінің уақытша бұзылуы, ұйқышылдық, әдеттен тыс шаршау немесе әлсіздік, кейігіштік немесе діріл, үрей сезімі, бағыт-бағдар бұзылысы, зейін қою қабілетінің төмендеуі жатады. Гипогликемия басталғанын сезген кезде пациент қант немесе құрамында қанты бар тамақ өнімдерін ішке қабылдап, қандағы қант деңгейін өлшей алады. Егер қаныңыздағы қант деңгейі тым төмен болса, глюкоза таблеткаларын немесе қантқа бай басқа тамақ өнімдерін (кәмпит, печенье, жеміс шырыны) қабылдап, одан соң тынығып алыңыз. Сондықтан қант диабетіне шалдыққан адамдарға үнемі өздерімен бірге қант, тәттілер, печенье немесе құрамында қант бар сусындар алып жүру ұсынылады. Гипогликемия симптомдары жоғалғанда немесе қаныңыздағы қант деңгейі тұрақталған кезде инсулинмен емделуді жалғастырыңыз. Пациентке айналасындағы адамдарға қант диабетімен ауыратынын, және оның қандай зардаптары болуы мүмкін, соның ішінде гипогликемия салдарынан естен тану қаупі бар екенін хабарлауы керек, егер ол есінен танып қалса, айналасындағы адамдар оны бір бүйіріңе аударып, дереу медициналық көмекке жүгінуі керек. Олар тамақ немесе сусындар бермеуі керек. Бұл тұншығуға әкелуі мүмкін. Бұл күйден шығару үшін арнайы оқытылған адамға пациентке есін тез қалпына келтіруге көмектесетін глюкагон гормонының инъекциясын беруі керек. Пациентке глюкагон берілгеннен кейін глюкоза немесе тәтті дәмтатым қажет болады. Егер пациент глюкагонды енгізуге жауап бермесе, ауруханада емдеу қажет. Глюкагон инъекциясынан кейін, кез келген жағдайда, гипогликемияның себебін анықтау және қайталану мен асқынулардың алдын алу үшін дәрігерге немесе шұғыл жәрдем бөліміне бару керек. • Ұзақ ауыр емделмеген гипогликемия мидың зақымдануына (уақытша немесе тұрақты) және тіпті өлімге әкелуі мүмкін. • Қысқа уақытқа естен тануды болдыратын гипогликемия кезінде, немесе гипогликемияның жиі эпизодтары болса, өзіңіздің дәрігеріңізбен кеңесіңіз. Мүмкін инсулин дозасын немесе енгізу режимін, тамақ қабылдау уақытын немесе физикалық жүктемелердің көлемін түзету қажет.

НовоРапид® препаратын қолданбаңыз, егер: - ФлексПен® түсіріп алсаңыз немесе зақымдалған болса немесе жаншылған болса, себебі инсулиннің ағып кету қаупі бар; - инсулинді сақтау шарттары көрсетілгенге сәйкес келмесе, немесе препарат мұздатып қатырылса; - инсулин мөлдір және түссіз болмаса. НовоРапид® ФлексПен® препаратын пайдаланар алдында - Инсулиннің типі дұрыс таңдалғанына көз жеткізу үшін қаптаманы тексеру қажет. - Жұқтыруды болдырмау үшін әр инъекция үшін үнемі жаңа инені пайдаланыңыз. - Инелер мен НовоРапид® ФлексПен® препараты тек жеке қолдануға арналған. НовоРапид® ФлексПен® препаратымен қолданған кезде айрықша сақтандыру шаралары • Бүйрек, бауыр, бүйрекүсті бездері, гипофиз немесе қалқанша безінің ауруларында. • Физикалық белсенділіктің жоғарылауында немесе қалыпты тамақтанудың өзгеруінде бұл қандағы қант деңгейіне әсер етуі мүмкін. • Дімкәстік кезінде, инсулинді қабылдауды жалғастырыңыз және дәрігермен кеңесіңіз. • Бірнеше уақыт белдеулерінің қиысуымен саяхаттаған кезде, инсулинге немесе инсулинді енгізу режиміне қажеттілік өзгеруі мүмкін. Мұндай сапарларды жоспарлау кезінде дәрігермен кеңесу керек Инъекция орнында терінің өзгеруі Терінің қалыңдауына немесе жұқаруына, тері астындағы тығызданулардың пайда болуына және басқа да бұзылуларға әкелетін тері астындағы май тінінің өзгеруін болдырмау үшін инъекция орнын мезгіл-мезгіл өзгерту керек. Тері асты тығызданулары бар, терісі жұқарған немесе қалыңдаған учаскелерде инсулинді енгізу препарат тиімділігінің төмендеуіне әкелуі мүмкін («Енгізу әдісі мен жолы» бөлімін қараңыз). Инъекция орнында терінің кез-келген өзгерістері үшін дәрігермен кеңесіңіз. Егер қазіргі уақытта препарат осындай зақымдалған жерлерге енгізсеңіз, инъекция орнын ауыстырмас бұрын дәрігерге хабарлаңыз. Дәрігер қандағы глюкоза деңгейін мұқият бақылауды және инсулин немесе басқа гипогликемиялық препараттың дозасын түзетуді тағайындай алады. Препараттың көлік құралын немесе әлеуетті қауіпті механизмдерді басқару қабілетіне әсер ету ерекшеліктері Егер қандағы қант деңгейі төмен немесе жоғары болса, бұл пациенттердің зейін қою қабілетіне және реакция жылдамдығына әсер етуі мүмкін, бұл автокөлік басқарғанда немесе механизмдермен жұмыс істеген кезде қауіп төндіруі мүмкін. Сіз өзіңізді немесе басқаларды қауіпке душар ете алатыңызды есте сақтаңыз. Автокөлікті және механизмдерді басқару мүмкіндігі туралы мына жағдайларда дәрігеріңізден кеңес алыңыз: • гипогликемия оқиғалары жиі болса; • гипогликемияны байқап білу қиын болса. НовоРапид® препараты тез әсер етеді. Осылайша, гипогликемия ерігіш адам инсулинін енгізгенге қарағанда ертерек туындауы мүмкін.

Кез келген дәрілік препаратты қолданар алдында дәрігеріңізден немесе фармацевттен кеңес алыңыз. Егер Сіз жүкті болсаңыз, жүктілікті жоспарласаңыз немесе бала емізсеңіз дәрігеріңізден кеңес алыңыз. НовоРапид® препаратын жүктілік және бала емізу кезінде қолдануға болады. Жүктілік кезінде және босанғаннан кейін НовоРапид® ФлексПен® препаратының дозасын түзету қажет болуы мүмкін. Диабетті мұқият бақылау, әсіресе гипогликемия профилактикасы балаңыздың денсаулығы үшін маңызды.

Кейбір дәрілік препараттар организмдегі глюкозаның метаболизміне әсер етеді және бұл инсулин дозасына әсер етуі мүмкін. Инсулинмен емдеуге әсер етуі мүмкін ең көп таралған препараттар төменде келтірілген. Егер кез-келген дәрілік затты, соның ішінде рецептсіз сатып алған дәрілік заттарды қабылдап жүрсеңіз немесе жақында қабылдасаңыз, дәрігерге хабарлаңыз. Атап айтқанда, егер сіз қандағы қант деңгейіне әсер ететін дәрілік заттарды қабылдасаңыз, дәрігерге хабарлаңыз. Төмендегі препараттардың кез-келгенін қабылдаған кезде қандағы қант деңгейі төмендеуі мүмкін (гипогликемия): пероральді қант төмендететін препараттар, моноаминооксидаза тежегіштері, бета-адреноблокаторлар, ангиотензин өзгертуші фермент тежегіштері (АӨФ), салицилаттар, анаболикалық стероидтар және сульфонамидтер. Төмендегі препараттардың кез-келгенін қабылдаған кезде қандағы қант деңгейіңіз жоғарылауы мүмкін (гипергликемия): пероральді контрацептивтер, тиазидті диуретиктер, глюкокортикостероидтар, тиреоидты гормондар, симпатомиметиктер, өсу гормоны және даназол. Октреотид пен ланреотид Сіздің қандағы қант деңгейіңізді жоғарылатуы, төмендетуі мүмкін. Бета-адреноблокаторлар ізашар симптомдарын бүркемелеуі немесе басуы мүмкін, олар гипогликемияны тануға көмектесуі мүмкін. Тиазолидиндиондар (2 типті қант диабетін емдеу үшін қолданылатын пероральді диабетке қарсы препараттар класы) 2 типті қант диабетімен ұзақ ауыратын және жүрек-қантамыр аурулары бар немесе анамнезінде инсулинмен бірге тиазолидиндиондармен емделген инсульт бар кейбір пациенттерде жүрек жеткіліксіздігі дамуы мүмкін. Егер сіз жүрек жеткіліксіздігінің белгілерін, мысалы, әдеттен тыс ентігу немесе салмақтың тез артуы немесе ісіну сияқты белгілерді байқасаңыз, дәрігерге мүмкіндігінше тезірек хабарлаңыз. НовоРапид® препаратын тамақпен және сусындармен қолдану Алкогольді тұтынған кезде, инсулинге деген қажеттілік өзгеруі мүмкін, өйткені қандағы қант жоғарылауы немесе төмендеуі мүмкін. Мұқият мониторинг ұсынылады.

Сақтау мерзімі 30 ай Бірінші ашылғаннан кейін 4 апта Жарамдылық мерзімі өткеннен кейін қолдануға болмайды! Сақтау шарттары 2°С-ден 8°С-ге дейінгі температурада (тоңазытқышта) сақтау керек, бірақ мұздатқыш камераға жақындатпай. Мұздатып қатыруға болмайды. Шприц-қаламды жарықтан қорғау үшін қақпақшамен жабу керек. Жарықтан және шамадан тыс жылудың әсер етуінен сақтау керек. Бірінші ашылғаннан кейін: 30°С-ден аспайтын температурада сақталған жағдайда 4 апта бойы пайдалануға болады. Тоңазытқышта (2°С-8°С) сақтауға рұқсат етілген. Балалардың қолы жетпейтін жерде сақтау керек!