Норматин капли 0,5%

1 мл препараттың құрамында белсенді зат – тимолол (6,83 мг тимолол малеаты түрінде) 5,00 мг, қосымша заттар: натрий дигидрофосфаты моногидраты, сусыз динатрий фосфаты, бензалконий хлориді, натрий гидроксиді, инъекцияға арналған су. Сыртқы түрінің, иісінің, дәмінің сипаттамасы Мөлдір түссіз немесе сәл сарғыш сұйықтық, сәл білінетін өзіне тән иісі бар.

- көз гипертензиясы немесе ашық бұрышты глаукомасы бар пациенттерде көзішілік қысымның жоғарылауын емдеуге арналған Қолдану басталғанға дейін қажетті мәліметтер тізбесі

Әсер ету механизмі және фармакодинамикалық әсерлер Тимолол бета-адренорецепторлардың селективті емес блокаторы болып табылады, ішкі симпатомиметикалық және жарғақша тұрақтандыратын белсенділігі жоқ. Көзге тамызатын дәрі түрінде жергілікті қолданғанда тимолол көзішілік сұйықтықтың түзілуін азайту есебінен қалыпты және жоғары көзішілік қысымды төмендетеді. Тимолол малеатының әсері бета-адренорецептормен қайтымды байланысу арқылы жүзеге асырылады, бұл оның рецепторлық функциясының тежелуіне және рецепторлардың биологиялық стимуляциясының блокадасына әкеледі. Бәсекелестік антагонизмнің көрсетілген механизміне сәйкес бета-адренорецепторларға әсер ететін эндогендік және экзогендік стимулдар блокадасы жүреді. Бета-адренорецепторлардың блокадасын бета-адренорецепторлар агонистерінің концентрациясын жоғарылату арқылы басуға болады, бұл рецепторлық аппарат функциясының қалпына келуіне әкеледі. Препараттың әсері конъюнктивалық қапқа тамызғаннан кейін 20 минуттан соң көрінеді. Көзішілік қысымның барынша төмендеуі 1-2 сағаттан соң басталады және 24 сағат бойы сақталады. Клиникалық тиімділігі және қауіпсіздігі Миотиктерден айырмашылығы, тимолол қарашықтың көлеміне және аккомодацияға әсер етпей, көзішілік қысымды төмендетеді. Катарактасы бар пациенттер тимололды қолданғанда қарашықтың тарылуына және көз бұршағының бұлдырау аймақтарына жарық сәулелерінің түсуіне байланысты көру қабілетінің төмендеуі байқалмайды. Пациенттерді миотиктермен гипотензиялық емнен тимололмен емдеуге ауыртырған кезде шеткері м-холинорецепторлардың стимуляциялану симптомдарының басылуы орын алады. Тимололмен ұзақ уақыт емдегенде бірқатар пациенттерде гипотензиялық әсерінің төмендеуі байқалды. Балалар Балаларда тимололды тәулігіне 2 рет 1 тамшыдан 0,25% және 0,5% концентрациясында қолдану тәжірибесі туралы шектеулі мәліметтер қолжетімді. Салыстырмалы жасырын рандомизацияланған клиникалық зерттеуде тимололдың туа біткен глаукоманың инфантильді және ювенильді формаларының гипотензиялық терапиясында қысқа курста қолданған кездегі тиімділігі көрсетілді. Зерттеуге қатысушылардың жасы 12 күннен 5 жасқа дейін болды, зерттеу шеңберінде тимололмен емдеуді зерттеуге енгізілген 105 пациенттің 71 пациенті алды, емдеу ұзақтығы 12 айды құрады.

Дозалау режимі Емдеуді тимололды 0,25% концентрациясында тәулігіне 2 рет 1 тамшыдан зақымданған көзге қолдана отырып бастайды. Жеткілікті клиникалық әсер болмаған жағдайда тимололды 0,5% концентрациясында 1 тамшыдан тәулігіне 2 рет зақымданған көзге қолданады. Қажет болған жағдайда Норматин препаратын көзішілік қысымды төмендететін басқа дәрілермен біріктіруге жол беріледі. Екі бета-адреноблокаторды бір уақытта қолдану ұсынылмайды. Көзішілік қысымды бақылау препаратты қолдануды бастағаннан кейін 4 аптадан соң жүзеге асырылады, өйткені тимололдың көзішілік қысымға әсері бірнеше аптадан кейін басталуы мүмкін. Егер қанағаттанарлық көзішілік қысымға қол жеткізілсе, дозалау режимі тәулігіне 1 рет 1 тамшыдан қолдануға өзгертілуі мүмкін. Басқа гипотензиялық емнен ауысу Бета-адреноблокатор тобынан басқа препаратпен емнен тимололмен емге ауысқанда бұрын қолданылған гипотензиялық препаратпен емнің толық күнін аяқтау, ал келесі күні тимололды әрбір зақымданған көзге 0,25% концентрациясында тәулігіне 2 рет 1 тамшыдан инстилляциялауды бастау ұсынылады. Жеткілікті гипотензиялық әсер болмаған кезде дозалау режимі тимололдың 0,5% концентрациясында әрбір зақымданған көзге 1 тамшыдан тәулігіне 2 рет инстилляциясына өзгертілуі мүмкін. Басқа топтағы гипотензиялық препаратпен (бета-адреноблокаторларға емес) емге ауысқан кезде тимолол инстилляциясын тәулігіне 2 рет әрбір зақымданған көзге 1 тамшыдан 0,25% концентрациясында қоса отырып, бұрын тағайындалған препараттың инстилляциясын жалғастырады. Келесі күні бұрын қолданылған емдеуді тоқтату жүзеге асырылады және тимололмен емдеу жалғасады. Жеткілікті гипотензиялық әсер болмаған кезде дозалау режимі тимололдың 0,5% концентрациясында әрбір зақымданған көзге 1 тамшыдан тәулігіне 2 рет инстилляциясына өзгертілуі мүмкін. Пациенттердің ерекше топтары Егде жастағы пациенттер Егде жастағы пациенттерде тимололды қолданудың үлкен тәжірибесі жинақталған. Жоғарыда келтірілген дозалау режимі егде жастағы адамдарда препаратты қолдану тәжірибесін ескереді. Балалар 18 жасқа дейінгі балаларда дәрілік заттың тиімділігі мен қауіпсіздігі жөніндегі деректер жоқ. Енгізу әдісі мен жолы Препарат тек офтальмологиялық қолдануға арналған. Жергілікті қолданылатын бета-адреноблокаторлардың жүйелі сіңірілуін мұрын-жас каналын қыса отырып және инстилляциядан кейін 2 минут бойы көз жұмып тұрып төмендетуге болады. Ерітіндінің микробтық ластануының алдын алу үшін сақ болу керек және тамшылатқышты қабаққа, көз айналасындағы жерлерге және басқа беткейлерге тигізбеу керек. Ластанған ерітінділерді қолдану көздің инфекцияларына әкелуі мүмкін және кейіннен көру қабілетінің жоғалуына әкелуі мүмкін.

- бронх демікпесі немесе тыныс алу жолдарының басқа да ауыр созылмалы обструктивті аурулары (оның ішінде анамнезінде); - синустық брадикардия; - жасанды ырғақ жүргізушісінсіз II немесе III дәрежедегі атриовентрикулярлық блокада; - декомпенсацияланған созылмалы жүрек жеткіліксіздігі; - кардиогенді шок; - синустық түйінінің әлсіздік синдромы; - синоатриальді блокада; - тимололға немесе препараттың басқа компоненттеріне аса жоғары сезімталдық; - балалар мен 18 жасқа дейінгі жасөспірімдер.

Ең жиі кездесетін жағымсыз реакциялар - тамызғаннан кейін күйдіруді немесе шымылдатуды сезіну (шамамен сегіз пациенттің біреуінде). Тимолол малеаты препараттарын офтальмологиялық қолданғанда болатын сирек кездесетін келесі жағымсыз реакциялар төменде келтірілген. Сирек - бас ауыруы, астения/қажу, кеуденің ауыруы - брадикардия, аритмия, артериялық гипотензия, артериялық гипертензия, естен тану, жүрек өткізгіштігінің блокадасы, ми қан айналымының жедел бұзылуы, ми ишемиясы, жүрек жеткіліксіздігі, стенокардияның нашарлауы, жүрек соғуының жиілеуі, жүректің тоқтауы, өкпе ісінуі, ісіну, ара-кідік ақсаңдау, Рейно феномені, қол мен аяқтың салқындауы - жүрек айнуы, диарея, диспепсия, анорексия, ауыздың құрғауы - жүйелі қызыл жегі - бас айналу, ауыр миастения гравис белгілері мен симптомдарының күшеюі, парестезия, ұйқышылдық, ұйқысыздық, түнгі қорқыныш, мінез-құлықтың өзгеруі және психикалық бұзылулар, соның ішінде депрессия, сананың шатасуы, елестеулер, мазасыздық, бағдарсыздық, күйгелектік және есте сақтау қабілетінің жоғалуы - алопеция және псориаз тәрізді бөртпе немесе псориаздың өршуі - анафилаксия, ангионевроздық ісіну, есекжем, оқшауланған және жайылған бөртпе сияқты жүйелік аллергиялық реакциялардың белгілері мен симптомдары - бронх түйілуі (негізінен бронх түйілуі ауруы бар пациенттерде), тыныс алу жеткіліксіздігі, ентігу, мұрынның бітелуі, жөтел, тыныс жолдары жоғарғы бөлімдерінің инфекциясы - қант диабетімен ауыратын пациенттерде гипогликемияның бүркемеленген симптомдары - көз тітіркенуінің белгілері мен симптомдары, соның ішінде конъюнктивит, блефарит, кератит, көздің ауыруы, көздегі бөлінулер (мысалы, қабықтың пайда болуы), бөгде денені сезіну, қышыну, көзден жас ағуы, көздің құрғауы; птоз; мөлдір қабық сезімталдығының төмендеуі; кистдозды макулярлы ісіну; рефракциялық өзгерістер мен диплопияны қоса, көру қабілетінің бұзылуы және диплопия; псевдопемфигоид; хирургиялық офтальмологиялық емдеуден кейін торлы қабықтың ажырауы - құлақтың шуылдауы; - ретроперитонеальді фиброз, либидоның төмендеуі, импотенция, Пейрони аурулары. Тимолол малеатын және басқа бета-адреноблокаторларды пероральді қабылдау кезінде келесі жағымсыз реакциялар байқалды және тимолол малеаты препараттарын офтальмологиялық қолдану кезінде тіркелуі мүмкін ықтимал жағымсыз реакциялар болуы мүмкін. Өте сирек - мөлдір қабық айтарлықтай зақымданған кейбір пациенттерде құрамында фосфат бар көзге тамызатын дәрілерді қолданғанда мөлдір қабық кальцификациясының жағдайлары хабарланған Жиілігі белгісіз - эритематозды бөртпе, бұлшықет пен сүйекті ауыртатын дене температурасының жоғарылауы, тамақтың ауыруы, тыныс алу бәсеңдейтін ларингоспазм - аяқ-қолдың ауыруы, дене жүктемесіне төзімділіктің төмендеуі, дене салмағының төмендеуі - артериялық жеткіліксіздіктің нашарлауы, тамырлардың кеңеюі - іштің ауыруы, гепатомегалия, құсу, мезентериялық артериялар тромбозы, ишемиялық колит - тромбоцитопениялық емес пурпура, тромбоцитопениялық пурпура, агранулоцитоз - гипергликемия, гипогликемия - қышыну, терінің тітіркенуі, гиперпигментация, қатты терлеу - артралгия - вертиго, әлсіздік, концентрацияның төмендеуі, кататонияға ауысатын сананың қайтымды тежелуі, уақыт пен кеңістіктегі бағдарсыздықпен сипатталатын жедел қайтымды синдром, эмоционалдық тұрақсыздық, концентрацияның шамалы бұзылуы, нейропсихометриялық көрсеткіштердің төмендеуі - сырыл, бронх обструкциясы - несеп шығарудың қиындауы. Жағымсыз дәрілік реакциялар туындаған кезде медицина қызметкеріне, фармацевтика қызметкеріне немесе дәрілік препараттардың тиімсіздігі туралы хабарламаларды қоса алғанда, дәрілік препараттарға жағымсыз реакциялар (әсерлер) бойынша тікелей ақпараттық дерекқорға жүгіну керек Қазақстан Республикасы Денсаулық сақтау министрлігі Медициналық және фармацевтикалық бақылау комитетінің «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

Бета-адреноблокаторларды жүйелі қолданғанда ұқсас жүйелі реакциялардың дамуымен тимололдың байқаусызда артық дозалануы туралы хабарламалар бар: бас айналуы, бас ауыруы, ентігу, брадикардия, бронх түйілуі, жүректің тоқтауы, жедел жүрек-қантамыр жеткіліксіздігі, артериялық гипотензия Артық дозаланғанда келесі шараларды жүргізу қажет 1. Кездейсоқ жұтып қойғанда – асқазанды шаю. Тимолол диализ кезінде нашар шығарылатыны көрсетілген. 2. Брадикардия дамыған кезде кезбе жүйкенің блокадасын индукциялау үшін 0,25 мг-ден 2 мг-ге дейінгі дозада атропин сульфатын вена ішіне енгізу ұсынылады. Тұрақты брадикардияда сақтық таныта отырып, изопреналин енгізу көрсетілген. Рефрактерлі брадикардия кезінде жасанды ырғақ жүргізушісін орнату мәселесін қарастыру керек. 3. Артериялық гипотензияда допамин, добутамин, норепинефрин сияқты симпатомиметиктерді енгізу, әсері болмаған кезде – глюкагон енгізу ұсынылады. 4. Бронх түйілуінде: изопреналин гидрохлориді, аминофиллинді қолдануға болады. 5. Жедел жүрек жеткіліксіздігі дамығанда оймақгүл препараттарын және диуретиктерді дереу енгізу, сондай-ақ оттегі терапиясы, тиімсіз болса – аминофиллинді вена ішіне енгізу ұсынылады. Сосын, қажет болса, глюкагонды енгізуге болады (оның тиімділігі көрсетілген). 6. Екінші немесе үшінші дәрежедегі атриовентрикулярлық блокада дамыған кезде изопреналин гидрохлоридін енгізу немесе жасанды ырғақ жүргізушісін орнату көрсетіледі.

Норматин 0.5 % пайдаланар алдында дәрігермен кеңесіңіз. Бұл дәрілік затты қолдануды бастамас бұрын, егер сізде бұрын болған немесе болған болса, дәрігерге хабарлаңыз: - жүректің ишемиялық ауруы, жүрек жеткіліксіздігі, қан қысымының төмендеуі; - жүрек соғуының баяулауы сияқты жүрек ырғағының бұзылуы; - тыныс алу проблемалары, демікпе немесе өкпенің созылмалы обструктивті ауруы; - қан айналымы проблемалары (мысалы, Рейно ауруы немесе Рейно синдромы); - диабет, өйткені тимолол қандағы қант деңгейінің төмендеу белгілері мен симптомдарын бүркемелеуі мүмкін; - қалқанша бездің гиперфункциясы, өйткені тимолол белгілер мен симптомдарды бүркемелеуі мүмкін. Жоспарланған операциядан бұрын дәрігерге 0.5% Норматинді қолданып жүргеніңізді хабарлаңыз, өйткені тимолол анестезия кезінде қолданылатын кейбір дәрілердің әсерін өзгерте алады. Арнайы ескертулер Жергілікті қолдануға арналған басқа офтальмологиялық препараттар сияқты тимолол жүйелі қан ағымына өтеді. Жергілікті қолдану кезінде бета-блокаторларды жүйелі қолданған сияқты жағымсыз реакциялар байқалуы мүмкін. Мысалы, респираторлық және кардиологиялық жүйенің ауыр реакциясы, соның ішінде бронх түйілуі нәтижесінде демікпесі бар пациенттердің өлімі, сондай-ақ жүрек жеткіліксіздігіне байланысты жекелеген өлім жағдайлары туралы хабарланды. Жүрек жеткіліксіздігі Миокардтың жиырылуы төмен пациенттерде қан айналымын демеу үшін симпатикалық көтермелеу қажет болуы мүмкін және оны бета-адренорецепторлардың блокадасымен басу ауырлау жүрек жеткіліксіздігіне әкелуі мүмкін. Анамнезінде жүрек жеткіліксіздігі жоқ пациенттерде бета-адреноблокаторлармен белгілі бір уақыт бойы миокард бәсеңдеуінің жалғасуы кейбір жағдайларда жүрек жеткіліксіздігі дамуына әкелуі мүмкін. Жүрек жеткіліксіздігінің алғашқы белгілері немесе симптомдары пайда болған кезде препарат қолдануды тоқтату керек. Өкпенің обструктивті ауруы Өкпенің созылмалы обструктивті ауруы (мысалы, созылмалы бронхит, эмфизема) жеңіл немесе орташа дәрежедегі, бронхоспазмдық синдромы бар пациенттерге, оның ішінде анамнезінде (бронх демікпесінен немесе препаратты қолдануға болмайтын анамнездегі бронх демікпесінен басқа) пациенттерге бета-адреноблокаторларды, соның ішінде Норматинді қолдануға болмайды. Операция кезінде Ауыр хирургиялық араласудан бұрын бета-адреноблокаторларды тоқтату қажеттілігі немесе орындылығы даулы. Бета-адренорецепторлардың блокадасы жүректің бета-адренорецепторларға байланысты рефлекторлық стимулдарға реакция қабілетін төмендетеді. Бұл хирургиялық емшаралар кезінде жалпы анестезияға байланысты қауіпті арттыруы мүмкін. Бета-адренорецепторларды бөгейтін препараттарды қабылдаған кейбір пациенттерде анестезия кезінде ұзаққа созылған ауыр гипотензия болды. Сондай-ақ жүрек соғуын қалпына келтіру және демеу қиындықтары туралы хабарланды. Осы себептерге байланысты пациенттерде жоспарлы операция кезінде кейбір мамандар бета-адренорецепторларды бөгейтін препараттарды біртіндеп тоқтатуды ұсынады. Қажет болса, операция кезінде бета-адреноблокаторлардың әсері адренергиялық агонистердің жеткілікті дозаларымен кері қайтарылуы мүмкін. Гипогликемия/қант диабеті Гипогликемияның өздігінен пайда болуы немесе қант диабеті (әсіресе тұрақсыз), инсулин немесе пероральді гипогликемиялық дәрілерді қабылдайтын пациенттерде бета-адренергиялық блокаторларды қолданғанда сақ болу керек. Бета-адреноблокаторлар жедел гипогликемияның белгілері мен симптомдарын бүркемелеуі мүмкін. Тиреотоксикоз Бета-адренергиялық блокаторлар гипертиреоздың белгілі бір клиникалық белгілерін бүркемелеуі мүмкін (мысалы, тахикардия). Дамып келе жатқан тиреотоксикозға күдік бар пациенттерді тиреоуытты криз тудыруға қабілетті бета-адренергиялық блокаторлардың күрт тоқтатылуын болдырмау үшін сақтықпен емдеу керек. Тамырлар тарапынан бұзылулар Бета-адреноблокаторлардың артериялық қысым мен тамыр соғысына ықтимал әсеріне байланысты оларды цереброваскулярлық жеткіліксіздігі бар пациенттерде сақтықпен қолданған жөн. Егер тимолол қолдануды бастағаннан кейін ми қан айналымының төмендеу белгілері немесе симптомдары пайда болса, балама емдеуді қарастырған жөн. Жабық бұрышты глаукома Жабық бұрышты глаукоманы емдеудің негізгі патогенетикалық аспектісі алдыңғы камера бұрышының ашылуы болып табылады. Бұл әсер миотикті қолдану арқылы қарашықтың тарылуында жүзеге асырылады. Тимолол қарашық өлшеміне әсер етпейді. Жабық бұрышты глаукоманың гипотензивті емінде тимололды миотиктермен біріктірілген емнің құрамында ғана қолдануға болады. Анафилаксиялық реакциялар Анамнезінде атопиясы немесе әртүрлі аллергендерге ауыр патологиялық реакциялары бар пациенттерге бета-адреноблокаторларды қолдану әртүрлі аллергендерді енгізуге жауап ретінде ауыр реакцияларды тудыруы мүмкін. Мұндай пациенттер анафилактикалық реакцияларды басу үшін адреналиннің әдеттегі дозаларын енгізуге нашар жауап беруі мүмкін. Бұлшықет әлсіздігі Бета-адренергиялық рецепторлардың блокадасы бұлшықет әлсіздігін және белгілі бір миастениялық симптомдарды (мысалы, диплопия, блефароптоз және жалпы әлсіздік) тудыруы мүмкін екендігі хабарланды. Тимолол сирек жағдайларда ауыр миастениямен немесе миастения симптомдарымен кейбір пациенттерде бұлшықет әлсіздігін арттыруы мүмкін. Пациенттерге арналған ақпарат Тамшылатқыш құтының ұшын көзге немесе айналасындағы тіндерге тигізбеу керек. Егер препарат дұрыс қолданылмаса және тамшылатқыштың ұшы көзге немесе оның айналасындағы тіндерге тиіп кетсе, офтальмологиялық ерітінділер көз инфекциясын тудыратын бактериялармен ластануы мүмкін. Ластанған ерітінділерді қолдану көзге айтарлықтай зақым келтіруі және одан әрі көру қабілетін жоғалтуы мүмкін. Алдағы көз операциясы немесе қатар жүретін патологияның дамуы жағдайында (мысалы, жарақат немесе инфекция) пациентке препаратты көп дозалы құтыда одан әрі пайдалану туралы мәселені шешу үшін дереу емдеуші дәрігермен кеңесу керек. Офтальмологияда жергілікті қолдануға арналған дәрілік препараттарды бірнеше рет дозалауға арналған контейнерлерді қолданумен байланысты бактериялық кератиттің дамуы туралы хабарламалар бар. Бронх демікпесі, анамнезінде бронх демікпесі, өкпенің созылмалы обструктивті ауруы, синус брадикардиясы, екінші немесе үшінші дәрежелі атриовентрикулярлық блокада немесе жүрек жеткіліксіздігі бар пациенттерге Норматин қолдануға болмайды. Қосымша заттар Норматин құрамында бензалконий хлориді консерванты бар, ол көздің тітіркенуін, «көздің құрғауы» синдромының дамуын немесе көз жасы үлбірі мен мөлдір қабық тарапынан бұзылулар, соның ішінде нүктелік кератопатияның және/немесе уытты ойық жаралы кератопатияның дамуын тудыруы мүмкін. Бензалконий хлориді жұмсақ жанаспалы линзалармен сіңіріліп, жанаспалы линзалардың түсін өзгерте алады. Препаратты қолданар алдында жанаспалы линзаларды шешіп алу керек және инстилляциядан кейін оларды киер алдында кемінде 15 минут күту керек. «Құрғақ көз» синдромы бар және мөлдір қабықтың зақымдануы мүмкін пациенттерде Норматинді сақтықпен қолдану керек. Препаратты ұзақ уақыт қолданған кезде пациенттерді мұқият бақылап отыру керек. Препаратты пайдаланғаннан кейін ерекше сезімдер, қышыну немесе көздің ауыруы пайда болған кезде пациент дәрігермен кеңесуі керек. Норматин құрамында фосфаттар бар; құрамында фосфат бар көзге тамызатын дәріні қолданғанда, кальцийдің жиналуына байланысты өте сирек жағдайларда мөлдір қабықтың бұлдырауы пайда болуы мүмкін. Педиатрияда қолдану Балалар мен 18 жасқа дейінгі жасөспірімдердегі дәрілік заттың тиімділігі мен қауіпсіздігі жөніндегі деректер жоқ. Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері Емдеу кезінде көрудің бұзылуы, бас айналуы, қажу, артериялық қысымның төмендеуі мүмкін, автокөлік жүргізу және жоғары зейін қоюды және психомоторлық реакциялардың жылдамдығын талап ететін басқа да қауіптілігі зор қызмет түрлерімен айналысу кезінде сақ болу қажет. Препаратты қолданғаннан кейін көру қабілетінің уақытша бұзылуы мүмкін, көру қалпына келгенге дейін автокөлікті басқару және қозғалыстағы механизмдермен жұмыс істеу ұсынылмайды.

Тимололды жүкті әйелдерде қолдану туралы жеткілікті деректер жоқ. Жүктілік кезінде нақты қажет жағдайларды қоспағанда қолдануға болмайды. Жүйелік әсерді азайту үшін «Қолдану тәсілі және дозалау режимі» бөлімін қараңыз. Эпидемиологиялық зерттеулер бета-блокаторларға шаранадағы туа біткен даму кемістіктерінің дамуына әсерін (тератогендік әсері) анықтаған жоқ, алайда пероральді қолданғанда құрсақішілік өсудің тежелуін көрсетті. Егер бета-блокаторлар босанғанға дейін қолданылса, бета-блокаданың белгілері мен симптомдары (брадикардия, гипотензия, репираторлық дистресс-синдром, гипогликемия) жаңа туған нәрестелерде байқалды. Егер тимолол босануға дейін қолданылса, нәрестелерді өмірінің алғашқы күндерінде мұқият бақылау қажет. Бета-блокаторлар емшек сүтімен бөлінеді. Алайда, нәрестелерде бета-блокаданың клиникалық симптомдарының дамуын тудыру үшін тимололдың емшек сүтінде жеткілікті мөлшерде болуы екіталай. Жүйелі абсорбцияның төмендеуі, «Қолдану тәсілі және дозалау режимі» бөлімін қараңыз.

Тимолол малеатының дәрілермен өзара әрекеттесуіне зерттеулер жүргізілген жоқ. Офтальмологиялық бета-адреноблокаторларды және кальций өзекшелері блокаторларының пероральді түрлерін, бета-адреноблокаторларды, аритмияға қарсы дәрілерді (амиодаронды қоса), оймақгүл гликозидтерін, раувольфия алкалоидтарын, парасимпатомиметиктерді, гуанетидинді бірге қолданғанда гипотензиямен және/немесе айқын брадикардиямен көрініс табатын аддитивті әсер ету мүмкіндігі бар. Тимололдың қарашық мөлшеріне әсерінің болмауына қарамастан, бета-адреноблокаторлар мен адреналинді бірге қолданғанда мидриаз дамуы мүмкін. Тимолол мен CYP2D6 изоферменті тежегіштерін (хинидин, флуоксетин, пароксетин) бірге қолданғанда депрессия және жүрек жиырылуы жиілігінің төмендеуі сияқты бета-адреноблокада симптомдарын көтермелеуге болады. Пероральді бета-адреноблокаторлар клонидинді тоқтату аясында рикошеттік гипертензия ағымын ауырлатуы мүмкін. Аддитивті әсердің және гипотензияның және/немесе айқын брадикардияның даму мүмкіндігіне байланысты бета-блокаторды және симпатолитиктерді (резерпин сияқты) бірге қолданған жағдайда пациенттерге мұқият мониторинг талап етіледі, олар өз кезегінде вертиго, естен тану немесе ортостаздық гипотензия себебі болуы мүмкін. Пероральді қолдануға арналған кальций өзекшелерінің блокаторларын бета-адреноблокаторлармен біріктіріп жүректің функционалдық жағдайы қалыпты кезінде ғана қолдануға болады, ал жүрек жұмысының бұзылуы кезінде оларды қолданудан аулақ болу керек, өйткені кальций өзекшелерінің блокаторын бета-блокаторлармен емдеу сызбасына қосқан кезде гипотензия дамуы, атриовентрикулярлық жүргізудің бұзылуы, сол жақ қарыншалық жеткіліксіздік болуы мүмкін. Жүрек-қантамыр жүйесі тарапынан болатын бұзылулардың сипаты емде қолданылатын кальций өзекшелерінің блокаторы типіне байланысты. Нифедипин сияқты дигидропиридин туындылары гипотензияның дамуына әкелуі мүмкін, ал верапамил мен дилтиазем бета-блокаторлармен бірге қолданғанда атриовентрикулярлық жүргізудің бұзылуына және сол жақ қарыншалық жеткіліксіздіктің дамуына ықпал етеді. Вена ішіне енгізуге арналған кальций өзекшелерінің блокаторларымен қатарлас емде бета-адреноблокаторларды сақтықпен қолдану керек. Бета-адреноблокаторларды, дигиталис және дилтиазем немесе верапамил препараттарын бірге қолдану атриовентрикулярлық жүргізудің анағұрлым айқын баяулауына әкелуі мүмкін.

Сақтау мерзімі 5 жыл Жарамдылық мерзімі өткеннен кейін қолдануға болмайды. Сақтау шарттары 25 °С-ден аспайтын температурада сақтау керек. Құтыны ашқаннан кейінгі қолдану кезеңі – 28 күн ішінде. Балалардың қолы жетпейтін жерде сақтау керек!