Нусинерсен раствор 2,4 мг/мл

Бір мл ерітіндінің құрамында белсенді зат- 2.4 мг нусинерсен (натрий тұзы түрінде), қосымша заттар: натрий дигидрофосфаты дигидраты, сусыз натрий гидрофосфаты, натрий хлориді, калий хлориді, кальций хлориді дигидраты, магний хлориді гексагидраты, натрий гидроксидінің 1 М ерітіндісі, хлорсутек қышқылының 1 М ерітіндісі, инъекцияға арналған су. Сыртқы түрінің, иісінің, дәмінің сипаттамасы Ерімеген бөлшектері жоқ, мөлдір, түссіз ерітінді.

Нусинерсен препараты ересектер мен балалардағы 5q жұлын бұлшықет атрофиясын емдеуге арналған.

ATХ коды M09AX07 Әсер ету механизмі Нусинерсен жұлын бұлшықет атрофиясын (ЖБА) емдеуге арналған антисенстік олигонуклеотид (АСО) болып табылады, бұл аутосомалық-рецессивті тұқым қуалаушылық түрі бар жүйке-бұлшықеттің үдемелі ауруы, оның себебі 5q хромосомасының ұзын иініндегі мутациялар болып табылады. Бұл мутациялар SMN1 генінің (survival motor neuron 1) функциясын жояды, салдары SMN ақуызының тапшылығы болып табылады. SMN2 гені SMN ақуызын өндіруге де жауап береді, бірақ SMN2 қатысуымен түзілетін функциялық ақуыздың мөлшері аз болып келеді. ЖБА ауырлығы аурудың дебют жасына және SMN2 гені көшірмелерінің санына байланысты. Нусинерсен SMN2 генінің мРНҚ ізашарының 7-интронында орналасқан интрондық сплайсинг сайленсерімен (Intronic splice silencing site - ISS-N1) байланысу арқылы 2-мотонейронның тіршілік қабілетінің гені 7-экзонының (SMN2) қосылуымен ақпараттық мРНҚ транскрипттерінің үлесін арттырады. Онымен байланысу арқылы АСО әдетте оны басатын сплайсинг факторларын ығыстырады. Осы факторлардың ығысуы SMN2 генінің мРНҚ-да 7-экзонды сақтайды; демек, SMN2 генінің мРНҚ-сы өндірілген кезде толық тізбекті және сақталған функциялық белсенділігі бар SMN ақуызына оның трансляциясы жүруі мүмкін. Клиникалық тиімділігі және қауіпсіздігі ЖБА симптомдары бар пациенттер Сәби шақта манифестациясы Нусинерсеннің қимыл функциясына және тіршілік қабілетіне әсерін бағалау үшін симптомдары бар және диагностикаланған ЖБА (симптомдары 6 айлығына дейін пайда бола бастады) бар сәби шақтағы 121 пациенттің (бірінші дозаны енгізген кезде ≤ 7 айлық) қатысуымен 3 фазадағы рандомизацияланған, салыстырмалы жасырын, плацебо-бақыланатын зерттеу жүргізілді. Рандомизация кезінде пациенттер нусинерсенді (қолдану бекітілген сызбасына сәйкес) немесе плацебоны енгізу үшін 2:1 арақатынасында бөлінді. Емдеу ұзақтығы 6-дан 442 күнге дейінді құрады. ЖБА клиникалық белгілері мен симптомдары басталуының медианалық жасы нусинерсен қабылдаған пациенттер үшін 6,5 аптаны және плацебо қабылдаған пациенттер үшін 8 аптаны құрады. Пациенттердің 99%-да SMN2 генінің 2 көшірмесі болды, сондықтан олар I типті ЖБА дамуына аса бейім болып саналды. Қолда бар деректер негізінде, пациенттерде I типті ЖБА даму ықтималдығы неғұрлым жоғары деп есептелді. Бірінші дозаны енгізген кездегі орташа жас пациенттер үшін 164,5 күнді және плацебо қабылдаған пациенттер үшін 205 күнді құрады. Бақыланатын зерттеу жүргізгенде аурудың бастапқы күйіндегі сипаттамалары (зерттеуге енгізілген кездегі аурудың клиникалық көрінісі) нусинерсен қабылдаған пациенттерде плацебо қабылдаған бақылау тобындағы пациенттермен салыстырғанда парадокстық демі бар (66% - бен салыстырғанда 89 %), пневмония немесе тыныс алу ағзаларының басқа аурулары (22% - бен салыстырғанда 35 %), жұту немесе тамақтану проблемалары (29% - бен салыстырғанда 51%) және тыныс алуды демеуге арналған аппараттарды қолдану қажеттілігі бар (15% - бен салыстырғанда 26 %) пациенттердің бастапқы күйінде анағұрлым жоғары пайызы байқалған деректі қоспағанда, нусинерсен қабылдаған пациенттерде де, плацебо қабылдаған бақылау тобындағы пациенттерде де көбінесе ұқсас болды. Қорытынды талдау нәтижелері плацебо қабылдаған пациенттер тобымен (0%) (p <0,0001) салыстырғанда нусинерсен қабылдаған пациенттердің статистикалық тұрғыдан айтарлықтай жоғары пайызында (51%) жақсарулар (моторлық дамудың бақылау көрсеткіштеріне қол жеткізу) байқалғанын көрсетті. Өлімге дейінгі немесе өкпені вентилациялау аппаратына тұрақты қосқанға дейінгі уақыт (жедел қайтымды құбылыс немесе трахеостомия болмаған кезде >21 күн бойы тәулігіне ≥16 сағат вентиляциялау) бастапқы ақырғы нүкте ретінде бағаланды. Оқиғасыз тіршілік қабілетіне, жалпы тіршілік қабілетіне, моторлық дамудың бақылау көрсеткіштеріне қол жеткізген пациенттердің үлесіне және CHOP INTEND шкаласы (Жаңа туған нәрестелердегі нейробұлшықетттік аурулар кезінде қимыл функцияларын бағалауға арналған Филадельфия балалар ауруханасының тесті) бойынша кем дегенде 4 тармаққа жақсару байқалған пациенттердің пайызына статистикалық маңызды әсер бастапқы деңгеймен салыстырғанда, плацебо қабылдаған пациенттермен салыстырғанда нусинерсен қабылдаған пациенттерде байқалды. Тиімділігін талдау барысында нусинерсен тобындағы 18 пациентке (25%) және плацебо қабылдаған 12 пациентке үнемі өкпенің тұрақты вентиляциясы қажет болды. Оның ішінде нусинерсен тобындағы 6 (33%) және бақылау тобындағы 0 (0%) пациент хаттамада белгіленген моторлық дамудың бақылау көрсеткіштеріне қатысты критерийлерге сәйкес келді. Осы пациенттерді ұзақмерзімді бақылауды қамтамасыз ету үшін 89 пациент бұрын нусинерсеннің басқа клиникалық зерттеулеріне қатысқан ЖБА бар пациенттерге арналған ашық қосымша зерттеуге енгізілді. Осы зерттеу барысында барлық пациент нусинерсен қабылдады; аралық талдау жүргізген кезде емдеу ұзақтығы 65-тен 592 күнге дейінді (орта есеппен 289 күн) құрады. Қимыл функциясының жақсаруы нусинерсенді қабылдауды жалғастырған пациенттерде, сондай-ақ осы зерттеуде нусинерсенді қабылдауды бастағандарда байқалды. Бұл ретте ең үлкен жақсарулар бұрын нусинерсенмен ем бастаған пациенттерде байқалды. Алынған нәтижелер ЖБА симптомдары бар пациенттерде жүргізілген 2 фазадағы ашық зерттеу нәтижелерімен расталды. Бұл зерттеудегі пациенттерде I типті ЖБА дамуы анағұрлым ықтимал деп есептелді. Бірінші дозаны енгізген кездегі орташа жас 162 күнді құрады. Бастапқы ақырғы нүкте моторлық дамудың бақылау көрсеткіштерінің бір немесе бірнеше санаты бойынша жақсару болды. Зерттеу барысында 20 пациенттің он екісі (60%) бастапқы ақырғы нүктеге қол жеткізді: оларда моторлық дамудың орташа көрсеткішінің жақсарғаны байқалды. CHOP INTEND шкаласы бойынша орташа баллдың жақсаруы зерттеу басталғаннан бастап (бастапқы деңгей) 1072 күнге дейін байқалды. Жалпы алғанда, 20 пациенттің 11-і (55%) ақырғы бақылау сапары кезінде CHOP INTEND шкаласы бойынша жалпы балл (≥4 балл) көбеюінің ақырғы нүктесіне қол жеткізді. Ақырғы бақылау сапары кезінде тіркелген 20 қатысушыдан 11 (55%) пациент тірі болды және оларға өкпенің тұрақты вентиляциясы қажет болмады. Төрт пациент өкпенің тұрақты вентиляциясын қажет етті және зерттеу кезінде бес пациент қайтыс болды. Кеш басталатын 3-фазаның рандомизацияланған, салыстырмалы жасырын, плацебо-бақыланатын зерттеуі кеш басталған ЖБА-ға шалдыққан 126 пациенттің қатысуымен жүргізілді (симптомдары 6 айлығынан кейін пайда болды). Рандомизация арқылы пациенттер нусинерсенді (әр 6 ай сайын 3 жүктеме дозасы және демеуші дозалары) немесе плацебоны енгізу үшін 2:1 арақатынасында бөлінді. Емдеу ұзақтығы 324-тен 482 күнге дейінді құрады. Скринингтік сапар кезіндегі орташа жас шамасы 3 жасты құрады, ал ЖБА-ның клиникалық белгілері мен симптомдарының орташа байқалу жасы 11 айлық жасты құрайды. Зерттеуге енгізілген кезде пациенттердегі қозғалыс функцияларын бағалаудың Хаммерсмиттің кеңейтілген шкаласы (HFMSE) бойынша орташа балл 21,6 құрады, қайта қаралған RULM модулі бойынша орташа балл (қолдың функциялық белсенділігін бағалау шкаласы) - 19,1 . Барлық пациент өздігінен отыра алды және олардың ешқайсысы өздігінен жүре алмады. Зерттеуге енгізілген кездегі аурудың клиникалық көрінісі бұрын тек өздігінен тұру немесе біреудің көмегімен жүру қабілетіне қол жеткізген пациенттердің үлесіндегі теңгерімсіздікті қоспағанда (нусинерсен тобындағы пациенттердің 13% және плацебо тобындағы пациенттердің 29%)(нусинерсен тобындағы пациенттердің 24% және плацебо тобында 33%), барлық пациентте ұқсас болды. Қорытынды талдау барысында плацебо қабылдаған пациенттер тобымен салыстырғанда нусинерсен тобында зерттеу басталғаннан бастап 15 айға дейін HFMSE көрсеткішінің статистикалық маңызды жақсарғаны атап өтілді. Аурудың ерте сатысында емделуді бастаған пациенттерде емделуді кейінірек бастаған пациенттердегіге қарағанда қимыл функциясының ертерек және айтарлықтай жақсарғаны байқалды; дегенмен, екі топта да плацебо қабылдаған пациенттер тобымен салыстырғанда айтарлықтай жақсарулар байқалды. 3-фазаның рандомизацияланған, салыстырмалы жасырын, плацебо-бақыланатын зерттеуі аяқталғаннан кейін 125 пациент қосымша зерттеуге енгізілді, онда барлық пациент нусинерсен қабылдады. Аралық талдауды жүргізген кезде емдеу ұзақтығы 74-тен 474 күнге дейінді (орта есеппен 250 күн) құрады. Нусинерсен қабылдаған пациенттердің көпшілігінде қимыл функциясының тұрақтанғаны немесе жақсарғаны байқалды, аурудың ерте сатыларында емделуді бастаған пациенттерде ең үлкен жақсарулар байқалды. Қосымша зерттеу барысында зерттеуге енгізілген сәттен бастап зерттеудің 265-ші күніне дейін барлық пациентте HFMSE орташа көрсеткіштерінің тұрақтанғаны немесе қосымша жақсарғаны байқалды. Енгізу критерийлеріне сәйкес келмейтін және осыған байланысты алдыңғы зерттеулерге енгізілмеген пациенттер үшін 2- фазаның рандомизацияланған, салыстырмалы жасырын, плацебо- бақыланатын зерттеуі болып табылатын қосымша клиникалық зерттеу әзірленді. Бұл зерттеуге сәби шағынан басталған (≤6 ай) диагностикаланған ЖБА симптомдары бар пациенттер және SMN2 (1-бөлім) 2 немесе 3 көшірмесі бар кеш басталған ЖБА бар пациенттер қатысты, содан кейін қосымша ашық ұзақ мерзімді зерттеу (2-бөлім) жүргізілді. Осы зерттеудің бірінші бөлігінде пациенттерді бақылау орта есеппен 302 күн ішінде жүргізілді. Зерттеудің 1-бөлігін ерте тоқтатқан кезде нусинерсен қабылдаған барлық пациент тірі болды, бірақ бақылау тобындағы бір пациент зерттеудің 289-күні қайтыс болды. Бұдан басқа, пациенттер плацебо қабылдаған нусинерсен тобындағы немесе бақылау тобындағы бірде-бір пациентке өкпені жасанды вентиляциялау аппаратына тұрақты қосу қажет болмады. ЖБА симптомдары сәби шағында пайда болған 13 пациенттің ішінде, нусинерсен тобындағы 9 пациенттің 7-інде және плацебо тобындағы 4 пациенттің 0-інде моторлық дамудың бақылау көрсеткіштерінің жақсарғаны байқалды. Бұл ретте ондай пациентте жақсару нашарлауға қарағанда көбірек санат бойынша байқалғаны керек еді. Кеш басталған ЖБА бар 8 пациенттің ішінде нусинерсен тобындағы 5 пациенттің 4 -інде және плацебо тобындағы 3 пациенттің 2-уінде бірдей емдік әсер байқалды. Ересектер Клиникалық практиканың қолда бар деректері II және III типті ЖБА бар кейбір ересек пациенттерде қимыл функциясын тұрақтандыруға немесе жақсартуға қол жеткізудегі нусинерсеннің тиімділігін растайды. Нусинерсенмен емдеудің 14 айына қарай HFMSE бойынша бастапқы деңгейден клиникалық маңызды жақсаруы бар пациенттер саны (≥ 3 балл) 129 пациенттің 53-ін құрады, RULM шкаласы бойынша клиникалық маңызды жақсаруы бар пациенттер саны (≥ 2 балл) – 70-тің 28-ін және 6 минуттық жаяу тест нәтижелері (6MWT) (≥30 метр) бойынша жүре алатын пациенттер арасында 49-дың 25-ін құрады. Ересек популяциядағы қауіпсіздік деректері нусинерсеннің белгілі қауіпсіздік бейініне және негізгі аурудың дамуымен байланысты ЖБА қатарлас асқынуларына сәйкес келеді. Симптоматика алды сатыдағы сәби шақтағы пациенттер ЖБА диагнозы генетикалық зерттеулердің нәтижелері негізінде қойылған симптоматика алды сатыдағы сәби шақтағы пациенттер қатысқан ашық зерттеу деректері бар. Зерттеуге енгізілген кездегі пациенттердің жасы ≤6 айды құрады. Бұл зерттеудегі пациенттерде I немесе ІІ типті ЖБА дамуы анағұрлым ықтимал деп есептелді. Бірінші дозаны енгізген кездегі орташа жас 22 күнді құрады. Аралық талдау пациенттердің зерттеуге қатысу мерзімі орта есеппен 27,1 айды құрағанда (15,1–35,5 ай) және олардың соңғы бақылау сапарындағы орташа жасы 26,0 айды (14,0-34,3 ай) құрағанда жүргізілді. Аралық талдау жүргізгенде барлық 25 пациент (SMN2 генінің 2 көшірмесі: n = 15; SMN2 генінің 3 көшірмесі: n = 10) тірі болды және оларға өкпенің тұрақты вентиляциясы қажет болмады. Пациенттер I немесе II типті ЖБА кезінде күтілмейтін және қалыпты дамуға сәйкес келетін бақылау көрсеткіштеріне қол жеткізді. Аралық талдау жүргізген кезде барлық 25 (100%) пациент өздігінен отыру қабілеті сияқты моторлық даму кезеңіне (ДДҰ бойынша) қол жеткізді, ал 22 (88%) пациент біреудің көмегімен жүре алды. Жас шамасы «жетістік терезесі» (ДДҰ бойынша) (95-ші процентиль) деп аталатын шеңберден шығатын 22 (77%) пациенттің 17-сі өздігінен жүру кезеңіне қол жеткізді. Соңғы бағалау жүргізген кезде барлық пациенттің ему және жұту қабілеті болды, бұл ретте 22 бала (88%) HINE 1 бөліміне сәйкес ең жоғарғы балл алды. ЖБА клиникалық көріністері бар пациенттерді бағалау аралық талдау жүргізген кезде 700 күн ішінде ем алған пациенттер бойынша деректерді пайдалана отырып жүргізілді (n = 16). Тиісті хаттамада ДДҰ бойынша бесінші перцентильден төмен салмақты (жасына қарай түзетілген), дене ұзындығына/бойына қатысты дене салмағының ≥2 перцентильге төмендеуін, асқазан сүңгісін (тері арқылы) орнатуды және/немесе ДДҰ бойынша жас бойынша күтілетін моторлық даму кезеңдеріне қол жеткізе алмауды (демеусіз отыру, демеп тұру, еңбектеу, демеп жүру, өздігінен тұру және өздігінен жүру) қамтитын ЖБА клиникалық көріністерінің критерийлері анықталды. 700-күні SMN2 генінің 2 көшірмесі бар 11 пациенттің 7-сінде (64%) және SMN2 генінің 3 көшірмесі бар 5 пациенттің 0-інде (0%) хаттамада белгіленген ЖБА клиникалық көріністерінің критерийлеріне сәйкестігі атап өтілді, алайда бұл пациенттерде дене салмағының артқаны және ДДҰ бойынша моторлық даму кезеңдеріне қол жеткізгені байқалды, бұл I типті ЖБА сәйкес келмеді. Фармакодинамикалық әсерлері Фармакодинамикалық әсерлері нусинерсеннің биологиялық әсеріне сәйкес келеді. Ем алған сәбилерді сойғанда алынған жұлынның кеуде бөліктеріндегі тіндерінің үлгілерінде мұндай емді қабылдамаған ЖБА бар сәбилермен салыстырғанда 7-экзоны бар SMN2 матрицалық рибонуклеин қышқылының (мРНҚ) анағұрлым жоғары деңгейі болды.

Дозалау режимі Нусинерсен препаратының ұсынылатын дозасы 12 мг құрайды. Нусинерсен препараты енгізіледі: • емдеуді бірінші күні, 0-күн; • содан кейін 14-күні, 28-күні және 63-күні; • әрі қарай, әр 4 айда бір рет. Пациенттердің ерекше топтары Егде жастағы пациенттер (≥65) 65 жастан асқан егде жастағы пациенттерде қолдану тәжірибесі жоқ. Бауыр және бүйрек жеткіліксіздігі бар пациенттер Бауыр және бүйрек функциясы бұзылған пациенттерде Нусинерсен зерттелмеген. Бауырдың немесе бүйректің клиникалық маңызды жеткіліксіздігі бар пациенттердің сирек екенін ескере отырып, бауыр немесе бүйрек жеткіліксіздігінің әсерін популяциялық фармакокинетикалық модельде толық бағалау мүмкін болмады. Популяциялық фармакокинетикалық талдау бауыр мен бүйректің клиникалық биохимиялық маркерлері мен жекелей өзгергіштігі арасында айқын өзара байланысты анықтаған жоқ. Нусинерсенді тағайындаған кезде бауыр немесе бүйрек жеткіліксіздігі бар пациенттерге әсіресе мұқият бақылау ұсынылады. Енгізу әдісі мен жолы Бел пункциясы арқылы интратекальді енгізуге арналған. Препаратты енгізуді бел пункциясын орындау тәжірибесі бар медицина қызметкерлері жүргізуі тиіс. Нусинерсен препараты жұлын анестезиясына арналған инені пайдаланып, 1-3 минут ішінде интратекальді болюстік инъекция арқылы енгізіледі. Инъекцияны инфекция немесе қабыну белгілері бар тері аймақтарына жасауға болмайды. Нусинерсен препаратын енгізер алдында енгізілетін Нусинерсен препаратының көлеміне баламалы жұлын сарысуының (МЖС) көлемін алу ұсынылады. Егер бұл пациенттің клиникалық жағдайына сәйкес қолданылса, Нусинерсен препаратын енгізу үшін седация қажет болуы мүмкін. Нусинерсенді интратекальді енгізуді бақылау үшін ультрадыбыс (немесе басқа визуализациялау әдісі) қолданылуы мүмкін. Әсіресе жас пациенттерде және сколиозы бар пациенттерде визуализациялау әдісін ескеру керек. Қолданар алдында дәрілік препаратты дайындау жөніндегі нұсқаулық • Нусинерсен препаратын дайындау және енгізу асептикалық жағдайларда жүзеге асырылуы тиіс. • Қолданар алдында ерітіндінің күйін көзбен шолып бағалау қажет. Көрінетін бөлшектері жоқ мөлдір және түссіз ерітіндіні ғана пайдалануға болады. Сыртқы сүзгілерді пайдалану қажет емес. • Енгізер алдында құтыны тоңазытқыштан шығарып, сыртқы жылу көздерін пайдаланбай бөлме температурасына дейін жылыту керек. • Егер құты ашылмаған болса және ерітінді пайдаланылмаса, құтыны тоңазытқышқа қайта салып тастауға болады. Тоңазытқыштан және картон қорапшадан шығарғаннан кейін құтыны 25 ºС-ден аспайтын температурада 30 сағаттан артық емес уақытқа сақтауға болады. • Тікелей қолданар алдында пластик қақпағын шешіп тастап, препараттың тиісті көлемін алу үшін шприц инесі қысқыш қалпақшаның ортасы арқылы құтыға салынады. Ерітіндіні сұйылту қажет емес. Егер шприцке жиналған ерітінді 6 сағат ішінде қолданылмаса, оны утилизациялау керек. • Пайдаланылмаған препаратты немесе онымен байланысты қалдықтарды белгіленген талаптарға сәйкес кәдеге жарату қажет. Емдеу ұзақтығы Бұл дәрілік препарат үшін ұзақ уақыт емдеудің тиімділігі туралы ақпарат жоқ. Емдеуді жалғастыру қажеттілігі пациенттің клиникалық көрінісіне және емдеуге жауабына байланысты жүйелі түрде қайта қаралып, жеке негізде талдануы керек. Дәрілік препараттың бір немесе бірнеше дозасын өткізіп алу кезіндегі қажетті шаралар Нусинерсен препаратының дозасын өткізіп алған жағдайда, мүмкіндігінше тезірек Нусинерсен препаратының инъекциясын алу үшін емдеуші дәрігермен кеңесу қажет. Дәрілік препаратты қолдану тәсілін түсіндіру үшін медициналық қызметкер кеңесіне жүгіну жөніндегі кеңестер Егер Сізде Нусинерсен препаратын қалай енгізу туралы қандай да сұрақтарыңыз болса, оларды өз емдеуші дәрігеріңізге қойыңыз.

Нусинерсенге немесе осы дәрілік препараттың кез келген компоненттеріне аса жоғары сезімталдық.

Барлық дәрілік препараттар сияқты, бұл препарат жағымсыз реакцияларды тудыруы мүмкін, бірақ олар бәрінде бола бермейді. Бел пункциясымен байланысты жағымсыз реакциялар Нусинерсен препаратын енгізгенде немесе одан кейін туындауы мүмкін. Бұл реакциялардың көпшілігі емшарадан кейін 72 сағат ішінде байқалды. Өте жиі • арқаның ауыруы • бас ауыруы • құсу Жиілігі белгісіз (қолда бар деректер негізінде бағалау мүмкін емес) • бел пункциясымен байланысты ауыр инфекциялар (мысалы, менингит) • гидроцефалия (мидың айналасына артық сұйықтықтың жиналуы) • инфекциялық емес менингит (жұлын мен мидың айналасындағы жарғақшаның қабынуы, ол мойын аймағының құрысуы, бас ауыру, қызба, жүрек айну және құсу түрінде көрінуі мүмкін) • аса жоғары сезімталдық (беттің, еріннің немесе тілдің ісінуін, бөртпені немесе қышынуды қамтитын аллергиялық немесе аллергияға ұқсас реакция). • арахноидит (ми мен жұлынды қоршап тұрған қабықтың қабынуы), ол белдің ауыруын немесе аяқтың ауыруын, ұйып қалуын немесе әлсіреуін туындатуы мүмкін. Жағымсыз дәрілік реакциялар туындағанда медициналық қызметкерге, фармацевтикалық қызметкерге немесе, дәрілік препараттардың тиімсіздігі туралы хабарламаларды қоса, дәрілік препараттарға болатын жағымсыз реакциялар (әсерлер) жөніндегі ақпараттық деректер базасына тікелей хабарласу керек Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

Жағымсыз реакциялармен бірге байқалатын артық дозалану жағдайлары туралы хабарланған жоқ. Нусинерсен препаратымен артық дозалану жағдайында пациент немесе оның өкілі жағымсыз реакциялардың дамитынын көрсететін кез келген белгілер немесе симптомдар пайда болған кезде медициналық көмекке жүгінуі керек.

Нусинерсен препаратымен жасалған бел пункциясынан кейін жағымсыз реакциялардың туындау қаупі бар, атап айтқанда – бас ауыруы, құсу және арқаның ауыруы. Сондай-ақ, препаратты осы әдіспен енгізгенде балалар мен сколиозы бар пациенттерде (омыртқа бағанасының бұратылуы және қисаюы) қиындықтар туындауы мүмкін. Нусинерсен препараты сияқты топтағы басқа препараттар басқа препараттар қанның ұюына ықпал ететін қан жасушаларына әсер етті. Нусинерсен препаратын енгізер алдында емдеуші дәрігер қанның ұюына талдау жүргізу қажеттілігі туралы шешім қабылдауы мүмкін. Бұл емшара Нусинерсен препаратын әр енгізер алдында қажет болмайды. Нусинерсен препараты сияқты, дәл осы дәрілік препараттар тобына жататын басқа препараттар да бүйрекке әсер етеді. Нусинерсен препаратын енгізер алдында емдеуші дәрігер бүйрек функциясы бұзылуының жоқтығына көз жеткізу үшін несеп талдауын жүргізу қажеттілігі туралы шешім қабылдауы мүмкін. Бұл емшара Нусинерсен препаратын әр енгізер алдында қажет болмайды. Нусинерсен препаратын енгізгеннен кейін гидроцефалия жағдайлары (ми кеңістігінде сұйықтықтың артық жиналуы) туралы хабарламалардың азғантай саны алынды. Кейбір пациенттерге гидроцефалияны емдеу үшін вентрикуло-перитонеальді шунт имплантацияланды. Егер бас өлшемінің үлкеюі, сананың бәсеңдеуі, жүректің үздіксіз айнуы, құсу, бас ауыру немесе мазасыздықты туындататын басқа симптомдар сияқты өзгерістер байқалса, уақтылы емделу үшін емдеуші дәрігерге хабарлаңыз. Вентрикуло-перитонеальді шунт болған кезде Нусинерсен препаратымен емдеуді жалғастырудың артықшылықтары мен қауіптері қазіргі таңда белгісіз. Емдеуші дәрігерге барлық қабылданатын дәрілік препараттар туралы, сондай-ақ бұрын қабылданған немесе алдағы уақытта қабылдануы мүмкін дәрілік препараттар туралы хабарлаңыз. Арнайы сақтандырулар Натрий мөлшері Натрийдің мөлшері көлемі 5 мл препараттың бір құтысына шаққанда 1 ммольден (23 мг) азды құрайды, яғни іс жүзінде препараттың құрамында натрий жоқ. Калий мөлшері Калийдің мөлшері көлемі 5 мл препараттың бір құтысына шаққанда 1 ммольден (39 мг) азды құрайды, яғни іс жүзінде препараттың құрамында калий жоқ. Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері Нусинерсен көлік құралдарын басқару және механизмдермен жұмыс істеу қабілетіне әсер етпейді немесе елеусіз әсер етеді.

Жүктілік кезінде әйелдерде нусинерсенді қолданғаны туралы деректер жоқ. Жануарларға жүргізілген зерттеулер ұрпақ өрбіту функциясына тікелей немесе жанама зиянды әсерін анықтаған жоқ. Сақтық шарасы ретінде жүктілік кезінде нусинерсенді қолданбау ұсынылады. Бала емізу кезеңінде әйелдерде нусинерсенді қолданғаны туралы деректер жоқ. Жаңа туған нәрестелер/сәбилер үшін қаупін жоққа шығаруға болмайды. Бала емізуді тоқтату немесе нусинерсенмен емді тоқтату/үзу туралы шешім бала үшін емшек емудің артықшылығын және әйел үшін емнің артықшылығын ескере отырып қабылдануы тиіс.

Дәрілік өзара әрекеттесулер зерттеулері жүргізілген жоқ. In vitro зерттеулер нусинерсеннің CYP450 арқылы метаболизмнің индукторы немесе тежегіші емес екенін көрсетті. Іn vitro зерттеулер басқа дәрілік препараттардың нусинерсенмен, плазма ақуыздарымен бәсекелесе байланысуы немесе тасымалдағыштардың тежелуі түрткі болатын өзара әрекеттесулерінің ықтималдығы төмен екендігін көрсетіп отыр.

Сақтау мерзімі 2 жыл Жарамдылық мерзімі өткеннен кейін қолдануға болмайды. Сақтау шарттары Жарықтан қорғау үшін түпнұсқалық қаптамасында (картон қорапшада) тоңазытқышта 2–8°C температурада сақтау керек. Мұздатып қатыруға болмайды. Балалардың қолы жетпейтін жерде сақтау керек! Түпнұсқалық қаптамасында (картон қорапшада) 30 °C-ден аспайтын температурада 14 күннен артық емес уақытқа сақтауға жол беріледі. Осы 14 күн ішінде пайдаланылмаған жағдайда 2-8 °C температурада қайта сақтауға жол берілмейді.