Октрид раствор 100 мкг/мл

1 мл ерітіндінің құрамында белсенді зат - октреотид ацетаты (октреотидке баламалы) - 0.100 мг/мл, қосымша заттар: мұзды сірке қышқылы, натрий ацетатының тригидраты, натрий хлориді, инъекцияға арналған су Сыртқы түрінің, иісінің, дәмінің сипаттамасы Мөлдір түссіз ерітінді

- акромегалия (хирургиялық емдеуден немесе сәулелік терапиядан жеткілікті әсер болмаған кезде ауру симптомдарын бақылау және плазмадағы өсу гормоны мен инсулинге ұқсас өсу факторы деңгейлерін төмендету үшін; операциядан бас тартқан кезде немесе оған қарсы көрсетілімдер болған кезде, сәулелік терапия курстары арасындағы аралық кезеңде, оның әсері толық дамығанға дейін) -асқазан-ішек жолының (АІЖ) және ұйқы безінің эндокриндік ісіктері симптомдарын жеңілдету: - карциноидты синдромның болуымен карциноидты ісіктер - ВИПомалар (вазобелсенді интестинальді пептидтің аса жоғары өндірілуімен сипатталатын ісіктер) - глюкагономдар - гастриномалар/Золлингер-Эллисон синдромы - әдетте протонды помпа тежегіштерімен немесе гистаминді H2-рецепторларының блокаторларымен біріктірілімде - инсулиномалар (операция алдындағы кезеңде гипогликемияны бақылау үшін, сондай-ақ демеуші терапия үшін) - өсу гормонының рилизинг-факторын шамадан тыс өндіретін ісіктер Октрид препараты ісікке қарсы препарат болып табылмайды және оны қолдану пациенттердің осы санатын сауығуға алып келмейді. - ұйқы безіне операция жасағаннан кейінгі асқынулардың алдын алу - бауыр циррозымен ауыратын науқастарда өңеш пен асқазан веналарының варикозды кеңеюі (қан кетуді тоқтату және қайталанудың алдын алу). Октрид препаратын спецификалық емдік шаралармен, мысалы, эндоскопиялық склероздайтын терапиямен бірге қолданады. Дәрілік препаратты қолданудың басталуына дейінгі қажетті мәліметтер тізбесі

Әсер ету механизмі Октрид - соматостатиннің табиғи гормонының туындысы болып табылатын және оған ұқсас фармакологиялық әсері бар, бірақ әсер ету ұзақтығы едәуір ұзағырақ синтетикалық октапептид. Препарат өсу гормонының (ӨГ), сондай-ақ гастро-энтеро-панкреатиттік эндокриндік жүйеде өндірілетін пептидтердің патологиялық жоғарылаған секрециясын басады. Жануарларда октреотид соматостатинге қарағанда ӨГ, глюкагон және инсулин секрециясының неғұрлым күшті тежегіші болып табылады, ӨГжәне глюкагон супрессиясы үшін үлкен селективтілікке ие. Сыналатын сау адамдарда октреотид тежейді: - физикалық жүктемеден және инсулиннен туындаған, аргининмен және гипогликемиямен стимуляцияланатын ӨГ секрециясын; - инсулиннің, глюкагонның, гастриннің және гастроэнтеропанкреатиттік (ГЭП) эндокриндік жүйенің басқа пептидтерінің постпрандиальды секрециясын және аргинин стимуляциялайтын инсулин мен глюкагон секрециясын; - тиролиберин (ТТР, «TRH») стимуляциялайтын тиреотропты гормонның секрециясын (ТТГ, «TSH»). Соматостатиннен айырмашылығы, октреотид инсулинге қарағанда ӨГ секрециясын тежейді және оны енгізу гормондардың рикошеттік гиперсекрециясымен (яғни, акромегалияға шалдыққан пациенттерде ӨГ) бірге жүрмейді. Акромегалиямен ауыратын пациенттерде октреотид қан плазмасындағы ӨГ және ИПФР-1 концентрациясын төмендетеді. ӨГ концентрациясының клиникалық мәнді төмендеуі (50% және одан да көп) пациенттердің 90% - ында байқалады; плазмадағы өсу гормонының деңгейін қалыпқа келтіруге (5 нг/мл-ден аз) пациенттердің шамамен жартысында қол жеткізіледі. Акромегалиямен ауыратын пациенттердің көпшілігінде октреотид бас ауыруы, терінің және жұмсақ тіндердің ісінуі, терлеудің жоғарылауы, буындардың ауырсынуы және парестезия сияқты симптомдардың айқындылығын айтарлықтай төмендетеді. Гипофиздің үлкен өлшемді аденомасында октреотид емдеу ісік мөлшерінің біршама төмендеуіне әкелуі мүмкін. Эндокриндік жүйенің ГЭП функционалдық ісіктері бар пациенттерде октреотид оның әртүрлі эндокриндік әсеріне байланысты бірқатар клиникалық белгілерге әсер етеді. Алдыңғы терапияға қарамастан, қалған ісік симптомдары бар пациенттерде клиникалық және симптоматикалық әсер байқалады, оған бауыр артерияларының хирургиясы, эмболизациясы және әртүрлі химиотерапия, мысалы, стрептозотоцин және 5-флуороурацил кіруі мүмкін. Октреотид ісіктің әртүрлі түрлеріне әсері Карциноидты ісіктер Карциноидты ісіктерде октреотид қолдану қан кернеуі сезімі және диарея сияқты симптомдардың айқындылығының төмендеуіне әкеледі. Кейбір жағдайларда бұл плазмадағы серотонин концентрациясының төмендеуімен және 5-гидроксииндолсірке қышқылының несеппен шығарылуымен бірге жүреді. Егер 1 апта бойы октреотид емдеу тиімді болмаса, емдеуді жалғастырмау керек. ВИПомалар Бұл ісіктер вазобелсенді интестинальды пептидтің аса жоғары өндірілуімен сипатталады (ВИПомалар). Көп жағдайда ауыр секреторлық диареямен сипатталатын жағдайды октреотид терапиясы арқылы жақсартуға болады, содан кейін өмір сүру сапасы жақсарады. Сонымен қатар, электролит теңгерімінің қатар жүретін бұзылыстарының азаюы байқалады, мысалы, гипокалиемия, су-электролит теңгерімін қалыпқа келтіру үшін энтеральдық және парентеральды қоспаларды қолдануды тоқтатуға мүмкіндік береді. Кейбір пациенттерде ісіктің үдеуінің баяулауы немесе тоқтауы және тіпті оның мөлшерінің кішіреюі байқалады, әсіресе бауырдағы метастаздар. Клиникалық жақсару әдетте плазмадағы вазобелсенді интестинальды пептид (ВИП) концентрациясының азаюымен (қалыпты мәндерге дейін) қатар жүреді. Глюкагономдар Глюкагономдар кезінде октреотид қолдану көп жағдайда некроздаушы жылжымалы бөртпелердің айтарлықтай азаюына әкеледі. Октреотид көбінесе глюкагономдар кезінде байқалатын қант диабетінің айқындылығына айтарлықтай әсер етпейді және әдетте инсулинді немесе қантты төмендететін пероральді препараттарды тұтынудың төмендеуіне әкелмейді. Диареяға шалдыққан пациенттерде октреотид оның азаюын тудырады, бұл дене салмағының жоғарылауымен бірге жүреді. Октреотид қолданғанда плазмадағы глюкагон концентрациясының тез төмендеуі байқалады, алайда ұзақ емдегенде бұл әсер сақталмайды, дегенмен симптомдар жақсара береді. Гастриномалар/Золлингер-Эллисон синдромы Протонды сорғы тежегіштерін немесе H2-рецепторларының антагонистерін қолдану арқылы терапия асқазан сөлінің ұзақ уақыт стимуляцияланатын гастринмен гиперсекрециясына байланысты қайталанатын пептидтік ойықжараны басқаратындығына қарамастан, мұндай бақылау жеткіліксіз болуы мүмкін. Гастринома / Золлингер-Эллисон синдромы кезінде монотерапия ретінде немесе протонды сорғы тежегіштерімен немесе H2-рецепторлардың блокаторларымен біріктіріліп қолданылатын октреотид асқазандағы қышқыл өндірісін төмендетуі және клиникалық жақсаруға, оның ішінде диареяға қатысты 50% жағдайда әкелуі мүмкін. Пептидтердің ісікті өндіруіне, мысалы, қанның кернеуіне байланысты басқа симптомдардың айқындылығы төмендейді. Кейбір жағдайларда плазмадағы гастрин концентрациясының төмендеуі байқалады. Инсулиномалар Инсулиномалары бар пациенттерде октреотид қандағы иммунореактивті инсулин деңгейін төмендетеді (бұл әсер қысқа мерзімді болуы мүмкін - шамамен 2 сағат). Операция жасауға болатын ісіктері бар пациенттерде октреотид операция алдындағы кезеңде нормогликемияны қалпына келтіруді және қолдауды қамтамасыз етуі мүмкін. Операция жасауға болмайтын қатерсіз және қатерлі ісіктері бар пациенттерде гликемияны бақылау қандағы инсулин деңгейін бір мезгілде ұзақ төмендетпей жақсаруы мүмкін. Өсу гормонының рилизинг-факторының (ӨГРФ) аса жоғары өндірілуімен сипатталатын ісіктер Бұл сирек ісіктер өсу гормонының рилизинг-факторының жеке немесе басқа белсенді пептидтермен бірге өндірілуімен сипатталады. Өсу гормонының (соматолибериномалар) рилизинг-факторын аса жоғары өндіретін, сирек кездесетін ісіктері бар пациенттерде октреотид акромегалия симптомдарының айқындылығын азайтады. Бұл өсу гормонының және өсу гормонының рилизинг-факторының секрециясын басумен байланысты. Болашақта гипофиздің гипертрофиясы кішіреюі мүмкін. Ұйқы безіне операция жасағаннан кейінгі асқынулардың алдын алу үшін Ұйқы безіне операция жасалатын пациенттерде операция кезінде және одан кейін октреотид қолдану операциядан кейінгі типтік асқынулардың жиілігін төмендетеді (мысалы, панкреатиттік жыланкөздер, абсцесс, сепсис, операциядан кейінгі жедел панкреатит). Өңеш пен асқазанның варикозды кеңейген веналарынан қан кету кезінде Клиникалық зерттеудің деректері бойынша бауыр циррозымен қатар жүретін өңеш пен асқазанның варикозды кеңейген веналарынан қан кету кезінде октреотид склероздаушы еммен біріктіріп қолдану қан кетуді неғұрлым тиімді тоқтатуға және ерте қайта қан кетуге, трансфузиялар көлемінің азаюына және 5 күндік тірі қалудың жақсаруына әкеледі. Октреотид нақты әсер ету механизмі орнатылмағанына қарамастан, препарат ВИП және глюкагон сияқты вазобелсенді гормондарды басу арқылы ағзаның қанағымын азайтады деп болжанады.

Дозалау режимі Акромегалия кезінде препаратты бастапқыда 8 немесе 12 сағат аралықпен тері астына 0,05-0,1 мг-ден енгізеді. Бұдан әрі дозаны іріктеу қандағы өсу гормонының концентрациясын және инсулинге ұқсас өсу факторын ай сайын анықтауға (нысаналы мәні: ӨГ < 2,5нг/мл; ИӨФ-1 қалып шегінде), клиникалық симптомдар мен препараттың жағымдылығын талдауға негізделуі тиіс. Пациенттердің көпшілігінде оңтайлы тәуліктік доза 0,2-0,3 мг құрайды. Күніне 1,5 мг құрайтын ең жоғары дозадан асырмау керек. Октрид препаратының тұрақты дозасын қабылдайтын пациенттерде өсу гормонының деңгейін бағалауды әрбір 6 ай сайын жүргізген жөн. Егер Октрид препаратымен бір ай емдеуден кейін өсу гормоны деңгейінің жеткілікті төмендеуі және аурудың клиникалық көрінісінің жақсаруы байқалмаса, терапияны тоқтату керек. АІЖ және ұйқы безінің эндокриндік ісіктері кезінде препаратты тері астына (т/а) бастапқы дозада тәулігіне 1-2 рет 0,05 мг-ден енгізеді. Одан әрі қол жеткізілген клиникалық әсерге, ісік өндіретін гормондар деңгейіне әсеріне (карциноидты ісіктер жағдайында - 5-гидроксииндолсірке қышқылының несеппен бөлінуіне әсері) және көтерімділігіне байланысты препарат дозасын біртіндеп тәулігіне 3 рет 0,1-0,2 мг дейін арттыруға болады. Ерекше жағдайларда жоғары дозалар қажет болуы мүмкін. Препараттың демеуші дозаларын жеке таңдау керек. Егер емдеудің қажетті әсері 1 аптадан кейін байқалмаса, онда терапияны тоқтату ұсынылады. Асқынулардың алдын алу үшін ұйқы безіне операция жасалғаннан кейін операция күнінен бастап (лапаротомияға дейін кемінде 1 сағат бұрын) қатарынан 7 күн бойы тәулігіне 3 рет 0,1 мг-ден т/а енгізеді. Өңеш пен асқазанның варикозды кеңейген веналарынан қан кету кезінде препаратты ең көп дегенде 5 күн бойы в/і үздіксіз инфузия жолымен 0,025 мг/сағ дозада енгізеді. Пациенттердің ерекше топтары Егде жастағы пациенттер Қазіргі уақытта егде жастағы адамдарда Октрид препаратының жағымдылығының төмендегенін және олар үшін дозалау режимін өзгерту талап етілетінін көрсететін деректер жоқ. Бала жастағы пациенттер Октрид препаратын балаларға қолдану тәжірибесі шектеулі. Бауыр жеткіліксіздігі бар пациенттер Бауыр циррозы бар пациенттерде демеуші дозалауды түзету қажеттілігін негіздей отырып, препараттың жартылай шығарылу кезеңі ұлғаюы мүмкін. Октрид препараты бауыр циррозы және өңеш пен асқазанның варикозды-кеңейген веналарынан қан кетуі бар пациенттерге 5 күн бойы 0,050 мг/сағ дейінгі дозаларда үздіксіз в/і инфузия жолымен енгізу кезінде жақсы көтерімді болды. Бүйрек жеткіліксіздігі бар пациенттер Бүйрек функциясының бұзылуы тері астына инъекция түрінде енгізілетін октреотидтің жиынтық әсеріне (AUC) әсер етпейді, сондықтан Октрид препаратының дозасын түзету қажет емес. Ескертпе. Октрид препаратын тері астына өз бетінше енгізетін пациенттер дәрігерден немесе медицина қызметкерінен егжей-тегжейлі нұсқаулар алуы керек. Енгізер алдында ерітіндінің температурасы бөлме температурасымен бірдей болуы тиіс, бұл енгізу орнындағы жағымсыз сезімдерді азайтуға ықпал етеді. Препаратты қысқа уақыт аралығымен бір жерге енгізуге болмайды. Ампулаларды тікелей қолданар алдында ашу керек, бұл ретте ерітіндінің пайдаланылмаған бөлігін утилизациялау қажет. Асқазан-ішек жолы (АІЖ) тарапынан жағымсыз әсерлерді, егер Октрид препаратын тері астына инъекциялауды ас ішуден бұрын немесе әлдеқайда кешірек, яғни инъекцияны тамақ ішу арасында немесе ұйықтар алдында енгізу арқылы азайтуға болады. Дәрілік препаратты қолдану тәсілін түсіндіру үшін медицина қызметкерінен кеңес алуға жүгіну бойынша ұсынымдар Қолданар алдында емдеуші дәрігермен міндетті түрде кеңесу қажет. Емдеуші дәрігерге не қабылдап жатқаныңыз, жақында қабылдағаныңыз немесе басқа препараттарды қабылдауды бастауыңыз мүмкін екенін айтыңыз.

- октреотидке немесе қосымша заттардың кез келгеніне аса жоғары сезімталдық

Өте жиі - гипергликемия - бас ауыруы - диарея, іш аумағының ауыруы, жүрек айну, метеоризм, іш қату - холелитиаз -инъекция орнындағы реакциялар (10-30% дозасына және инъекциялар арасындағы аралыққа байланысты мысалы, ауырсыну, парестезия, эритема) Жиі - гипотериоз, қалқанша безінің дисфункциясы (TТГ концентрациясының төмендеуі, T4 жалпы және бос гормон концентрациясының төмендеуі) - гипогликемия, глюкозаға жағымдылықтың бұзылуы, тәбеттің төмендеуі - бас айналу - брадикардия - ентігу - диспепсия, құсу, іштің кебуі, стеаторея, нәжістің түсінің өзгеруі - трансаминазалардың жоғары деңгейі, гипербилирубинемия, холецистит - қышыну, терідегі бөртпе, шаштың түсуі - астения Жиі емес: - сусыздану - тахикардия - жедел панкреатит Белгісіз - тромбоцитопения - аса жоғары сезімталдық реакциялары (анафилаксиялық реакцияларды қоса) - аритмия - сілтілік фосфатаза деңгейінің жоғарылауы, гамма-глутамилтрансфераза деңгейінің жоғарылауы, сарғаю, холестаз, холестаздық сарғаю, холестаздық гепатит, холестазсыз жедел гепатит - есекжем Жағымсыз дәрілік реакциялар туындағанда медициналық қызметкерге, фармацевтикалық қызметкерге немесе, дәрілік препараттардың тиімсіздігі туралы хабарламаларды қоса, дәрілік препараттарға болатын жағымсыз реакциялар (әсерлер) жөніндегі ақпараттық деректер базасына тікелей хабарласу керек Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

Симптомдары Жүректің жүйесіз соғуы, төмен қан қысымы, жүректің тоқтап қалуы, ми гипоксиясы, іштің жоғарғы бөлігінің қатты ауыруы, гепатитті стеатоз, жүрек айну, тәбеттің жоғалуы, диарея, әлсіздік, шаршау, энергияның жеткіліксіздігі, салмақ жоғалту, жайсыздық, қандағы сүт қышқылының жоғары деңгейі және жүрек ырғағының бұзылуы. Емі Симптоматикалық

Жалпы Өсу гормонын (ӨГ) секрециялайтын гипофиз ісіктері кезінде Октрид препаратын қабылдаған пациенттерді мұқият бақылау қажет, өйткені көру аймағының тарылуы сияқты ауыр асқынулардың дамуымен ісіктер көлемінің ұлғаюы мүмкін. Мұндай жағдайларда емдеудің басқа әдістерін қолдану қажеттілігін қарастырған жөн. Акромегалиясы бар пациенттерде ӨГ деңгейін төмендетудің және инсулин тәрізді өсу факторының 1 (ИӨФ-1) концентрациясын қалыпқа келтірудің терапиялық пайдасы фертильділікті қалпына келтіруі мүмкін. Бала туу жасындағы әйел пациенттер октреотидпен емдеу кезінде контрацепцияның талапқа сай шараларын қолдану қажеттілігі туралы хабардар болуы тиіс. Октрид препаратымен ұзақ емделетін пациенттерде қалқанша безінің функциясына бақылау жүргізу керек. Октреотидпен емдеу кезінде бауыр функциясын зерттеу қажет. Глюкоза метаболизмі Октреотидпен емдеу аясында инсулиномалары бар пациенттерде гипогликемияның айқындылығы мен ұзақтығының артуы байқалуы мүмкін (бұл инсулин секрециясына қарағанда ӨГ және глюкагон секрециясына неғұрлым айқын тежеуші әсер етумен, сондай-ақ инсулин секрециясына тежеуіш әсерінің ұзақтығы аз болуымен байланысты). Мұндай пациенттерді Октрид препаратымен емдеудің басында, сондай-ақ препарат дозасының әрбір өзгерісінде мұқият бақылау керек. Октрид препаратының аз және жиі дозаларын енгізу арқылы қандағы глюкоза концентрациясының елеулі ауытқуларын төмендетуге болады. I типті қант диабетімен ауыратын пациенттерде Октрид препараты инсулинге деген қажеттілікті төмендетуі мүмкін. Гипокалиемияның дамуы туралы хабарланды. Қант диабеті жоқ немесе инсулин секрециясы ішінара сақталған II типті қант диабеті бар пациенттерде Октрид препаратын енгізу қандағы глюкозаның постпрандиалды жоғарылауына әкелуі мүмкін. Сондықтан глюкозаға төзімділікті мұқият бақылау және диабетке қарсы терапия ұсынылады. Өңеш пен асқазанның варикозды кеңейген веналарынан қан кеткеннен кейін инсулинге тәуелді қант диабетінің даму қаупі артады, сондай-ақ I типті қант диабетімен ауыратын пациенттерде инсулинге қажеттіліктің өзгеруі мүмкін. Сондықтан бұл пациенттерде қандағы глюкоза концентрациясын жүйелі бақылау өте маңызды. Өт шығару жолдары тарапынан бұзылулар Соматостатиннің аналогтары өт қабының жиырылуын тежейді және өт секрециясын азайтады, бұл өт қабының жұмысында бұзылуларға, өт қабында билиарлы сладждың немесе тастардың пайда болуына әкелуі мүмкін. Октрид препаратымен емдеу кезінде осы популяциядағы холелитиаздың даму жиілігі жалпы популяциядағы 5-20% -бен салыстырғанда 15-30%-ға бағаланады. Октридпен емдеу аясында холелитиаз көп жағдайда симптомсыз өтеді. Октрид препаратымен емдеу аясында өт түтіктерінің кеңеюі туралы хабарланды, сондықтан Октрид препаратын тағайындағанға дейін өт қабына бастапқы ультрадыбыстық зерттеу жүргізу және Октрид препаратымен емдеу кезінде 6-12 ай аралығымен өт қабына қайталама ультрадыбыстық зерттеу жүргізу ұсынылады. Панкреатит Октрид т/а қолданудың алғашқы сағаттарында немесе күндерінде дамыған және препаратты тоқтатқаннан кейін жоғалып кеткен жедел панкреатиттің өте сирек жағдайлары туралы хабарланды. Сонымен қатар, Октридті т/а ұзақ уақыт қолданған кезде холелитиазбен байланысты панкреатит жағдайлары байқалды. Жүрек-қантамыр жүйесі тарапынан бұзылулар Соматостатин аналогтарымен терапия аясында жиі жағымсыз құбылыс брадикардия болып табылады. Осыған байланысты бета-блокаторлар, кальций өзекшелерінің блокаторлары сияқты препараттар немесе су-электролит теңгерімін бақылау үшін қолданылатын препараттардың дозасын түзету қажет болуы мүмкін. ЭКГ зерттеулерінің деректеріне сәйкес акромегалия және карциноидты синдромы бар пациенттерде препаратты қолдану аясында QT аралығының ұзаруы, жүректің электр осінің ауытқуы, ерте реполяризация, төмен вольтты ЭКГ түрі, өтпелі аймақтың жылжуы, Р ерте тісшесі және ST сегменті мен Т тісшесінің спецификалық емес өзгерістері байқалды. Пациенттердің осы санатында жүрек аурулары болғандықтан, октреотидті қолдану мен осы жағымсыз құбылыстардың дамуы арасындағы себеп-салдарлық байланыс анықталған жоқ. Атриовентрикулярлық блокадалар (толық атриовентрикулярлық блокаданы қоса алғанда) үздіксіз инфузияның жоғары дозаларын (100 мкг/сағ) алған пациенттерде және вена ішіне болюстік октреотидті (кейіннен 50 мкг/сағ үздіксіз инфузиямен 50 мкг болюс) қабылдаған пациенттерде тіркелді. Сондықтан ең жоғары дозаны сағатына 50 мкг-ден асырмау керек. Октреотидтің жоғары дозаларын вена ішіне қабылдайтын пациенттер тиісті бақылауда болуы тиіс. АІЖ және ұйқы безінің эндокриндік ісіктері АІЖ және ұйқы безінің эндокриндік ісіктерін Октрид препаратымен емдеу кезінде сирек жағдайларда аурудың жедел симптомдарының кенеттен қайталануымен Октрид препаратымен симптоматикалық бақылаудың жоғалуы орын алуы мүмкін. Аса жоғары сезімталдық реакциялары Аса жоғары сезімталдық пен аллергиялық реакциялар туралы маркетингтен кейінгі хабарламалар болды. Олар тері реакцияларымен көбірек байланысты болды; сирек жағдайларда ауыз қуысының шырышты қабаты мен тыныс жолдары зақымданды. Анафилаксиялық шоктың дамуы туралы жеке хабарламалар болды. Басқа өзара әрекеттесулер Кейбір пациенттерде октереотид қабылдау аясында В12 дәрумені деңгейінің төмендеуі және Шилинг тесті көрсеткіштерінің қалыптан ауытқуы байқалған. Анамнезінде В12 дәрумені тапшылығы бар пациенттерде Октрид препаратын қолданғанда оның концентрациясын бақылау ұсынылады. Октрид препаратымен ұзақ емделетін пациенттерде қалқанша безінің функциясына бақылау жүргізу керек. Кейбір пациенттерде октреотид майлардың сіңірілуін өзгертуі мүмкін. Нәжіспен майлардың шығуы артуы мүмкін. Дегенмен, осы уақытқа дейін октреотидпен ұзақ емдеу, сіңірілудің бұзылуы (мальабсорбция) салдарынан қоректік заттар тапшылығының дамуына әкелуі мүмкін екендігі туралы дәлелдер жоқ. Акромегалиясы бар пациенттерде өсу гормоны (ӨГ) деңгейін төмендетудің және инсулин тәрізді өсу факторының 1 (ИӨФ-1) концентрациясын қалыпқа келтірудің терапиялық пайдасы фертильділікті қалпына келтіруі мүмкін. Бала туу жасындағы пациент әйелдер көрсетілімдер бойынша октреотидпен емдеу кезінде контрацепцияның талапқа сай шараларын қолдану қажеттігі туралы хабардар болуы тиіс. Бұл дәрілік препараттың құрамында дозаның бір бірлігінде 1 ммольден (23 мг) аз натрий бар, яғни құрамында натрий жоқ. Арнайы сақтандырулар Жүктілік Жүкті әйелдер арасында талапқа сай және қатаң бақыланатын зерттеулер жоқ. Акромегалиямен ауыратын пациенттерде жүктілік кезінде шектеулі әсер ету туралы мәліметтер бар, ал жағдайлардың жартысында жүктіліктің нәтижесі белгісіз. Әйелдердің көпшілігі октреотидтің әсеріне жүктіліктің бірінші триместрінде тері астына инъекция түрінде Октрид препаратының тәулігіне 100-ден 300 мкг-ға дейінгі дозалары шегінде ұшыраған. Белгілі нәтижемен шамамен үштен екі жағдайда әйелдер жүктілік кезінде октреотидпен емдеуді жалғастыруды жөн көрді. Көптеген жағдайларда сау нәрестелердің дүниеге келуі белгілі нәтижемен байқалды, алайда бірінші триместрде сондай-ақ, өздігінен түсік түсу және бірнеше жасанды түсік түсу орын алды. Октреотидті қолданумен байланысты туа біткен ауытқулар немесе ақаулар жағдайлары жүктіліктің нәтижесі туралы хабарламалар аясында болған жоқ. Октрид препараты жүкті әйелдерге абсолютті көрсетілім бойынша ерекше жағдайларда ғана тағайындалуы тиіс. Бала емізу Октреотидтің емшек сүтіне бөлінетін-бөлінбейтіні белгісіз. Пациенттердің Октрид препаратымен емдеу кезінде бала емізбегені жөн. Педиатрияда қолдану Октрид препаратын балаларға қолдану тәжірибесі шектеулі. Фертильділік Октрид препаратының адамның фертильділігіне әсер ететіні белгісіз. Препараттың көлік құралын және қауіптілігі зор механизмдерді басқару қабілетіне әсер ету ерекшеліктері Октрид препараты көлік құралын басқару қабілетіне әсер етпейді. Октрид препаратымен емдеу кезінде пациенттерге бас айналудың, шаршаудың/ әлсіздіктің немесе бас ауырудың туындау мүмкіндігін ескере отырып, автокөліктерді жүргізу және пайдалану кезінде сақ болуды ұсынған жөн.

Нұсқаулықта көрсетілмеген.

Фармакокинетикалық өзара әрекеттесу Октрид препаратын бір мезгілде қолданғанда бета-блокаторлардың, кальций өзекшелерінің блокаторларының немесе су-электролит теңгерімін бақылауға арналған препараттардың дозаларын түзету қажет. Октрид препаратын бір мезгілде қолданғанда инсулин мен диабетке қарсы дәрілік заттардың дозаларын түзету ұсынылады. Октрид препараты циклоспориннің ішекте сіңуін азайтады және циметидиннің ішекте сіңуін баяулатады. Октреотид пен бромокриптинді бір мезгілде қолдану бромокриптиннің биожетімділігін арттырады. Соматостатин аналогтары өсу гормонының супрессиясына байланысты болуы мүмкін Р450 цитохромының қатысуымен метаболизденетін заттардың метаболизмдік клиренсін төмендетуі мүмкін екендігі туралы шектеулі деректер бар. Октреотидте осы әсердің болу мүмкіндігін жоққа шығаруға болмайтындықтан, СУР3А4 жолымен метаболизденетін және емдік әсерінің ауқымы тар (мысалы: хинидин, терфенадин) басқа дәрілік заттарды тағайындау кезінде сақ болу керек. Соматостатин аналогтарымен (пептидтік рецепторлық радионуклидтік терапия, ПРРТ)байланысты радиофармацевтикалық препараттарды бірге қолдану Соматостатин және оның аналогтары (мысалы, октреотид) соматостатин рецепторларымен селективті байланысады, және сондықтан тиісті радиофармпрепараттардың тиімділігін нашарлатуы мүмкін (мысалы, (177Lu)-оксодотреотид). Сондықтан Октридті ПРРТ қолданғанға дейін 24 сағат бұрын енгізуге болмайды.

Сақтау мерзімі 3 жыл Жарамдылық мерзімі өткеннен кейін қолдануға болмайды! Сақтау шарттары Жарықтан қорғалған жерде, 2°С-ден 8°С-ге дейінгі температурада cақтау керек. Балалардың қолы жетпейтін жерде сақтау керек!