Пантоспей таблетки 20 мг

Бір таблетканың құрамында белсенді зат – пантопразол (натрий пантопразолы сесквигидраты түрінде) 40 мг, қосымша заттар: сусыз натрий карбонаты, маннитол, натрий кармеллозасы, натрий крахмалының гликоляты А типі, магний стеараты, коллоидты кремнийдің қостотығы қабық: пропиленгликоль, темірдің (III) сары тотығы, титанның қостотығы (Е171), гипромеллоза, триэтилцитрат, метакрил қышқылы және этилакрилат сополимері (1: 1). Сыртқы түрінің, иісінің, дәмінің сипаттамасы Сопақша пішінді, екі беті дөңес, сәл қызғылт сары түсті ішекте еритін қабықпен қапталған таблеткалар.

Пантоспей препараты ересектер мен 12 жастан асқан жасөспірімдерде қолдануға арналған: • рефлюкс-эзофагитті емдеу Пантоспей препараты ересектерге мына жағдайда қолданылады: • Н.pylori тудырған ойық жара ауруы бар пациенттерде қажетті бактерияға қарсы терапиямен біріктірілімде Helicobacter pylori (H. pylori) ойық жара ауруы қоздырғышын толық жою • асқазан мен он екі елі ішектің ойық жара ауруын емдеу • Золлингер-Эллисон синдромын және тұз қышқылының жоғары түзілуімен байланысты басқа патологиялық жай-күйлерді емдеу.

Әсер ету механизмі Пантопразол париетальді жасушаларда протонды помпаны блоктау арқылы асқазандағы тұз қышқылының секрециясын тежейтін орын басқан бензимидазол болып табылады. Асқазанның париетальді жасушаларында пантопразол өзінің белсенді түріне айналады, онда ол H+/K+ АТФаза ферментін тежейді, яғни асқазанда тұз қышқылын өндірудің соңғы сатысында. Тежелу дозаға байланысты және негізгі және ынталандырылған тұз қышқылының секрециясына әсер етеді. Пациенттердің көпшілігінде симптомдар 2 апта ішінде өтеді. Басқа протонды помпа тежегіштері мен H2 рецепторларының тежегіштері сияқты, пантопразолмен емдеу асқазандағы қышқылдықты төмендетеді және қышқылдықты төмендетуге пропорционалды, гастринді арттырады. Гастриннің жоғарылауы қайтымды. Пантопразол жасушалық рецептордан дистальді орналаса отырып ферментпен байланысатындықтан, ол басқа заттармен (ацетилхолин, гистамин, гастрин) көтермелеуге қарамастан тұз қышқылының секрециясын тежеуі мүмкін. Әсер пантопразолдың қалай енетініне байланысты емес, пероральді немесе вена ішіне. Фармакодинамикалық әсерлері Пантопразол қабылдаған кезде ашқарынға гастрин мәні жоғарылайды. Қысқа мерзімді пайдалану кезінде көп жағдайда олар қалыптың жоғарғы шегінен аспайды. Ұзақ емдеу кезінде көп жағдайда гастрин деңгейі екі есе артады. Алайда айтарлықтай өсу тек жекелеген жағдайларда байқалады. Нәтижесінде, ұзақ мерзімді емдеудегі жағдайлардың ең аз санында асқазанда (қарапайымнан аденоматозды гиперплазияға дейін) спецификалық эндокриндік жасушалар санының жеңіл немесе орташа айқын өсуі байқалады. Дегенмен, осы уақытқа дейін жүргізілген зерттеулерге сәйкес, адамдарда жануарларға жүргізілген эксперименттерде табылған карциноидты ізашарлардың (атипті гиперплазия) немесе асқазан карциноидтарының түзілуі байқалмаған (5.3 бөлімін қараңыз). Бір жылдан асатын ұзақ мерзімді пантопразолмен емдеудің әсерін қалқанша безінің жұмыс көрсеткіштері мен жануарларды зерттеу нәтижелері негізінде толығымен жоққа шығаруға болмайды. Антисекреторлық дәрілік заттармен емдеу кезінде қышқыл секрециясының төмендеуіне жауап ретінде сарысулық гастрин жоғарылаған. Асқазанның қышқылдығы төмендегендіктен, CgA да жоғарылаған. CgA деңгейінің жоғарылауы нейроэндокриндік ісіктерді тексеруге кедергі келтіруі мүмкін. Қолда бар жарияланған деректер протонды помпа тежегіштерін қолдануды CgA өлшеуге дейін 5-14 күн бұрын тоқтату керек екенін көрсетеді. Бұл CgA бақылау деңгейіне оралуы үшін қажет, өйткені ППТ қолданғаннан кейін оның деңгейі күрт көтерілуі мүмкін.

Дозалау режимі Пантоспей препаратын осы нұсқаулықта (қосымша парақта) сипатталғандай немесе сіздің емдеуші дәрігеріңіз тағайындағандай қабылдаңыз. 12 жастан асқан балалар мен ересектердегі рефлюкс- эзофагит Ұсынылатын доза күніне 40 мг Пантоспей препаратының бір таблеткасын құрайды. Жекелеген жағдайларда доза арттырылуы мүмкін (күніне 40 мг-ден 2 таблеткаға дейін), әсіресе басқа емге реакция байқалмаған кезде. Рефлюкс- эзофагитін емдеу үшін әдетте 4 апта қажет. Егер бұл жеткіліксіз болса, емдеу, әдетте келесі 4 аптада жалғасады. Ересектерде H. pylori ойық жара ауруының қоздырғышын екі тиісті антибиотикпен біріктіріп толық жою H. pylori тудырған асқазан мен он екі елі ішектің ойық жарасы бар пациенттерде қоздырғышты жою препараттардың біріктірілімімен жүзеге асырылады. Емді бактериялардың антибиотиктерге төзімділігіне, сондай-ақ бактерияға қарсы препараттарды дұрыс пайдалану мен тағайындауға қатысты ресми жергілікті нұсқаулықтарды (мысалы, ұлттық нұсқаулар) ескере отырып жүргізу керек. Препаратқа сезімталдыққа байланысты H. pylori жою үшін келесі біріктірілімдер ұсынылуы мүмкін: a) Пантоспей 40 мг тәулігіне 2 рет + амоксициллин 1000 мг тәулігіне 2 рет + кларитромицин 500 мг тәулігіне 2 рет. б) Пантоспей 40 мг тәулігіне 2 рет + метронидазол 400-500 мг (немесе 500 мг тинидазол) тәулігіне 2 рет + кларитромицин 250-500 мг тәулігіне 2 рет. в) Пантоспей 40 мг тәулігіне 2 рет + амоксициллин 1000 мг тәулігіне 2 рет + метронидазол 400-500 мг (немесе 500 мг тинидазол) тәулігіне 2 рет. H. pylori бактериясын жою үшін біріктірілген емде Пантоспейдің екінші таблеткасын кешкі астан 1 сағат бұрын қабылдау керек. Емдеу ұзақтығы әдетте 7 күнді құрайды, қажет болған жағдайда дәрігер емдеу ұзақтығын екі аптаға дейін арттыруы мүмкін Егер ойық жараларды емдеу үшін пантопразолмен одан әрі емдеу ұсынылса, он екі елі ішек пен асқазанның ойық жарасын емдеуге арналған ұсыныстарды қарастырған жөн. Егер одан әрі емдеу қажет болмаса және H.Pylori теріс тестінде тек бір Пантоспей препаратымен емдеу бойынша төменде келтірілген нұсқауларды пайдалану қажет. Ересектерде асқазанның ойық жарасын емдеу Ұсынылатын доза күніне 40 мг Пантоспейдің бір таблеткасын құрайды. Жекелеген жағдайларда доза арттырылуы мүмкін (күніне 2 таблеткаға дейін), әсіресе емдеудің басқа түріне клиникалық жақсару болмаған жағдайда. Асқазанның ойық жарасын емдеу үшін әдетте 4 апта қажет. Егер бұл жеткіліксіз болса, емдеуге әдетте келесі 4 апта ішінде қол жеткізіледі. Ересектерде он екі елі ішектің ойық жарасын емдеу Ұсынылатын доза күніне 40 мг Пантоспей бір таблеткасын құрайды. Жекелеген жағдайларда доза арттырылуы мүмкін (күніне 2 таблеткаға дейін), әсіресе емдеудің басқа түріне клиникалық жақсару болмаған жағдайда. Он екі елі ішектің ойық жарасын емдеу үшін әдетте 2 апта қажет. Егер бұл жеткіліксіз болса, емдеуге әдетте келесі 2 апта ішінде қол жеткізіледі. Золлингер-Эллисон синдромы және асқазанда қышқылдың жоғары өндірілуімен қатар жүретін ересектердегі басқа аурулар Золлингер-Эллисон синдромы және асқазанда қышқылдың жоғары өндірілуімен басқа аурулары бар пациенттерді ұзақ мерзімді емдеген кезде Пантоспей препаратын 80 мг дозада қабылдау ұсынылады (Пантоспей 40 мг 2 таблетка). Болашақта, қажет болған жағдайда, дәрігер дозаны жоғарылатуы немесе төмендетуі мүмкін (клиникалық әсеріне байланысты). Тәулігіне 80 мг-ден жоғары дозаларда дозаны күніне екі қабылдауға бөлу керек. Пантопразол дозасының 160 мг-ден жоғары уақытша жоғарылауы мүмкін, бірақ ол қышқылдықты бақылау үшін талап етілгеннен ұзаққа созылмауы тиіс. Золлингер-Эллисон синдромын және асқазанда қышқылдың жоғары бөлінуі бар басқа ауруларды емдеу ұзақтығы шектеулі емес және оны дәрігер жеке таңдайды. Пациенттердің ерекше топтары Балалар: Пантоспей препараты қауіпсіздік пен тиімділік бойынша деректердің болмауына байланысты 12 жасқа толмаған балаларға ұсынылмайды. Егде жастағы пациенттер: дозаны түзету қажет емес. Бауыр жеткіліксіздігі бар пациенттер: бауырдың ауыр жеткіліксіздігі бар пациенттерде Пантоспей 20 мг препаратының тәуліктік дозасынан асыру ұсынылмайды. Пантопразолмен біріктірілген емнің тиімділігі мен қауіпсіздігі туралы деректердің болмауына байланысты Пантоспей препараты бауырдың орташа және ауыр жеткіліксіздігі кезінде H. pylori бактериясын жою үшін біріктірілген ем құрамында қолданылмауы тиіс, пантопразолмен біріктірілген емнің тиімділігі мен қауіпсіздігі туралы деректердің болмауына байланысты. Бүйрек жеткіліксіздігі бар пациенттер: бүйрек жеткіліксіздігі бар пациенттерде дозаны түзету қажет емес. Біріктірілген ем кезінде пантопразолдың тиімділігі мен қауіпсіздігі бойынша деректердің болмауына байланысты Пантоспей препаратын бүйрек жеткіліксіздігі бар пациенттерде H. pylori бактериясын жою үшін біріктірілген терапияда қолдануға болмайды. Енгізу әдісі мен жолы Пантоспей таблеткаларын ішке, тамақтанудан бір сағат бұрын, аз мөлшердегі сумен қабылдау керек. Таблеткаларды шайнауға немесе ұнтақтауға болмайды. Тоқтату симптомдары қаупінің болуын көрсету Қатысты емес Дәрілік препаратты қолдану тәсілін түсіндіру үшін медицина қызметкеріне кеңес алуға жүгіну бойынша ұсынымдар Пантоспей препаратын қолдану дәрігердің тағайындауы бойынша жүргізілуі керек.

• белсенді затқа, басқа орын басқан бензимидазолдарға немесе препараттың қосымша заттарының кез келгеніне жоғары сезімталдық • биожетімділігінің едәуір төмендеуінің арқасында сіңірілуі қышқылды асқазанішілік рН байланысты болатын АИТВ протеаза тежегіштерімен бір мезгілде қолдану, мысалы, атазанавир, нелфинавир • 12 жасқа дейінгі балалар • жүктілік және лактация кезеңі.

Жиі • фундальді бездер полиптері (асқазан түбінің және жоғарғы бөлігінің шырышты қабығында болатын қатерсіз, жақсы шектелген, дөңгелектелген, тегіс, жылтыр, бозғылт- қызғылт түсті жылтыр түзілімдер ) Жиі емес • бас ауыруы, бас айналу, ұйқының бұзылуы • диарея (сұйық нәжіс), жүрек айну / құсу, метеоризм және іштің кебуі, іш қату, ауыздың құрғауы, іштің ауыруы және жайсыздық • бауыр ферменттерінің жоғарылауы (трансаминазалар, гамма-глутамилтрансфераза) • бөртпе / экзантема/бөртпелер, қышыну • сүйектің сынуы (жамбас, білезік және омыртқа) • астения (әлсіздікпен, психикалық және физикалық шаршаумен қатар жүретін патологиялық жағдай), қажу және дімкәстік Сирек -агранулоцитоз (қанда гранулоциттердің (түйіршікті лейкоциттер) толық немесе толық дерлік болмауымен сипатталатын синдром) -аса жоғары сезімталдық (анафилаксиялық реакциялар мен анафилаксиялық шокты қоса) • гиперлипидемия, липидтер деңгейінің жоғарылауы (триглицеридтер, холестерин) • салмақтың өзгеруі • депрессия (және онымен байланысты барлық асқынулар) • дәм сезудің бұзылуы • көру қабілетінің бұзылуы/ бұлыңғыр көру • билирубиннің жоғарылауы (өт пигменті) • терінің тез өршитін, қатты қышитын, бозғылт -қызғылт күлдіреуіктері, күйіктен болатын күлдіреуіктерге ұқсас (есекжем), терінің терең қабаттарының және тері астындағы тіндердің тығыз, асимметриялы, ауыртпалықсыз ісінуі (ангионевроздық ісіну) • буындардың ауыруы (артралгия), бұлшықеттердің ауыруы (миалгия) • сүт бездерінің ауырсынып ұлғаюы және қатаюы (гинекомастия) • дене температурасының жоғарылауы, шеткері ісінулер немесе жайылған ісінулер Өте сирек • тромбоцитопения (қандағы тромбоциттер санының төмендеуі), лейкопения (қандағы лейкоциттер санының төмендеуі), панцитопения (қан жасушаларының барлық үш негізгі типтері санының азаюы: эритроциттер, лейкоциттер және тромбоциттер) • кеңістікте бағдарлау қабілетінен айрылу (және онымен байланысты асқынулар) Белгісіз (қолда бар деректер негізінде бағалау мүмкін емес) • натрий деңгейінің төмендеуі (гипонатриемия), магний деңгейінің төмендеуі (гипомагниемия), кальций деңгейінің төмендеуі (гипокальциемия), калий деңгейінің төмендеуі (гипокалиемия) • елестеулер, сананың шатасуы (әсіресе осы жағдайларға бейім пациенттерде немесе егер олар емдеу басталғанға дейін байқалса, осы симптомдардың нашарлауы) • ашыту, шаншу, тітіркену (парестезия) түріндегі сезімталдық бұзылыстары • ұзақ уақыт бойы сулы, сұйық нәжіспен көрініс беретін жуан ішектің қабыну ауруы (микроскопиялық колит) • гепатоцеллюлярлық жарақат (бауыр жарақаты), сарғаю, гепатоцеллюлярлық жеткіліксіздік (бауыр жасушаларының зақымдануы, әдетте олардың жаппай некрозымен сипатталады және бауыр жеткіліксіздігінің ауыр түрлерімен көрініс береді) • теріде және шырышты қабықтарда бөртпелермен жедел уытты-аллергиялық ауру (Стивенс-Джонсон синдромы), ауыр аллергиялық, көбінесе дәрілік, ашық қызыл күлдіреуіктерге айналатын терідегі үлкен жалпақ күлдіреуіктердің дамуымен дерматит (Лайелл синдромы), жедел өздігінен жазылатын тері ауруы (көп формалы эритема), терінің күн сәулесіне реакциясы (фотосенсибилизация), қызыл жегінің терідегі жеделге жуық түрі, эозинофилиямен және жүйелік белгілермен симптомдармен дәрілік реакция (DRESS- синдром) • бұлшықеттің түйілуі • кейде бүйрек жеткіліксіздігінің дамуымен бүйрек функциясының төмендеуіне әкелетін бүйректің зақымдануы (тубулоинтерстициальді нефрит). Жағымсыз дәрілік реакциялар туындаған кезде медицина қызметкеріне, фармацевтика қызметкеріне немесе дәрілік препараттардың тиімсіздігі туралы хабарламаны қоса, дәрілік препараттарға жағымсыз реакциялар (әсерлер) бойынша ақпараттық деректер базасына тікелей жүгіну қажет (жағымсыз реакциялар бойынша ақпараттық деректер базасын көрсету) Қазақстан Республикасы Денсаулық сақтау министрлігі Медициналық және фармацевтикалық бақылау комитетінің «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

240 мг-ға дейінгі дозалар 2 минут ішінде вена ішіне енгізіліп, көтерімділігі жақсы болды. Пантопразол плазма ақуыздарымен қарқынды байланысатындықтан, гемодиализ кезінде шығарылуы қиын. Артық дозалану жағдайында уыттанудың клиникалық көріністері болған кезде спецификалық ем қажет емес және тек симптоматикалық және демеуші ем жүргізіледі.

Бауыр жеткіліксіздігі: бауырдың ауыр жеткіліксіздігінде, емдеу кезеңінде бауыр ферменттері деңгейінің жоғарылауы мүмкін, әсіресе пантопразолды ұзақ уақыт қолданғанда. Арнайы ескертулер Асқазан-ішек жаңа түзілімдері: егер Сізде кез-келген үрейлі симптомдар пайда болса (мысалы, әдейілеп емес айқын салмақ жоғалту, қайталанатын құсу, жұтынудың бұзылуы (дисфагия), қан аралас құсу, қан аздық (анемия) немесе нәжістегі қан (мелена), сондай-ақ асқазан ойық жарасына күдік болса немесе бұрыннан ойық жарасы болса, қатерлі ісіктің дамуын жоққа шығару үшін шұғыл түрде дәрігерге қаралу керек, өйткені пантопразолмен емдеу симптоматиканы тегістеп, дұрыс диагноздың кеш қойылуына әкелуі мүмкін. Егер тиісті емге қарамастан симптомдар сақталса, әрі қарай тексеру жүргізу қажет. Басқа препараттармен бір мезгілде қолдану: Пантоспей препаратын басқа препараттармен біріктіріп қолданғанда, осы препараттарды медициналық қолдану жөніндегі нұсқаулығында бар нұсқауларды ұстану қажет. АИТВ протеаза тежегіштерімен бір мезгілде қолдану: Пантоспей препаратын сіңуі асқазанішілік рН деңгейіне байланысты болатын АИТВ протеаза тежегіштерімен (атазанавир) бір мезгілде қолдану ұсынылмайды, өйткені АИТВ-ға қарсы препараттардың (атазанавирдің) тиімділігі төмендеуі мүмкін. В12 дәруменінің сіңуіне әсері: Золлингер-Эллисон синдромы бар пациенттерде және тұз қышқылының жоғары өндірілуімен қатар жүретін басқа патологиялық жай-күйлерді ұзақ уақыт емдегенде, пантопразол, асқазан секрециясын басатын басқа препараттар (антисекреторлық препараттар) сияқты, гипохлоргидрияға (асқазан қышқылының төмендеуі) немесе ахлоргидрияға (асқазан қуысында бос тұз қышқылының болмауы) байланысты В12 дәруменінің (цианокобаламин) сіңуін төмендетуі мүмкін. Бұл ұзақ мерзімді емдеу кезінде немесе В 12 дәруменінің сіңуін төмендету бойынша қоры аз немесе қауіп факторлары бар пациенттерде тиісті клиникалық симптомдар болған кезде ескерілуі керек. Ұзақ емдеу: ұзақ емдеу кезінде (әсіресе 1 жылдан астам) дәрігердің тұрақты бақылауы қажет. Бактериялардан туындаған асқазан-ішек инфекциясы: Пантоспей препаратымен емдеген кезде, Salmonella және Campylobacter немесе Clostridium difficile сияқты бактериялар тудыратын асқазан-ішек жолдарының инфекциялық аурулары дамуы мүмкін. Магний деңгейінің төмендеуі (гипомагниемия): пантопразол тобының препараттарын кем дегенде 3 ай, көбінесе бір жыл бойы қабылдаған пациенттерде қажу, тетания (минералды заттардың тапшылығынан туындаған және аяқ-қол, дыбыс байламдарының бұлшықеттерінің, беттің шайнау және мимикалық бұлшықеттерінің ауырсынуымен көрініс беретін жағдай) сияқты күрделі көріністермен қандағы магний деңгейінің айқын төмендеуі, құрысулар, сананың бұлыңғырлануымен, зейін қоюдың, қабылдаудың, ойлаудың, эмоциялардың (делирий) бұзылуымен психикалық бұзылыстар, бас айналу және жүрек ырғағының бұзылуы (қарыншалық аритмия) байқалды, олар білінбей пайда болуы мүмкін және уақтылы танылмауы мүмкін. Гипомагниемия гипокальциемияға (қандағы кальций мөлшерінің төмендеуі) және/немесе гипокалиемияға (қандағы калий деңгейінің төмендеуі) әкелуі мүмкін. Магнийдің орын басу емінен немесе протонды помпа тежегіштерімен емдеуді тоқтатқаннан кейін пациенттердің көпшілігінде жағдайлары жақсарды. Ұзақ мерзімді емдеу жоспарланған пациенттерде немесе протонды помпа тежегіштерін дигоксинмен немесе гипомагниемияны тудыруы мүмкін басқа препараттармен (мысалы, несеп айдайтын) қабылдайтын пациенттерде Пантоспей препаратымен емдеуді бастамас бұрын және емдеу кезінде мезгіл-мезгіл қандағы магний деңгейін анықтау қажет. Жамбас, білезік және омыртқа сынықтарының даму қаупі: пантопразолмен ұзақ уақыт емдегенде (1 жылдан астам) пациенттерде жамбас, білезік және омыртқа сыну жағдайлары аздап жиілеуі мүмкін, әдетте егде жастағы адамдарда, өйткені олардың сүйектерінде кальций мөлшерінің азаюы (остеопороз) жиі кездеседі. Алайда, бұл жағдайлардың жиілеуі басқа қауіп факторларына байланысты болуы мүмкін. Пантоспей препаратын ұзақ уақыт қолданған кезде остеопороздың даму қаупі бар пациенттер (сүйек тіні тығыздығының төмендеуімен және оның құрылымының бұзылуымен сипатталатын қаңқа ауруы) клиникалық ұсыныстарға сәйкес медициналық көмек алып, D дәрумені мен кальцийді жеткілікті мөлшерде қабылдауы керек. Терідегі жеделге жуық қызыл жегі (ТЖЖҚЖ): пантопразолмен препараттар қабылдаған пациенттерде жүйелі қызыл жегі (ТЖЖҚЖ) даму жағдайлары сирек байқалды. Зақымданулар туындаған кезде, әсіресе терінің күн сәулесі түсетін жерлерінде және егер олар артралгиямен қатар жүрсе (қабыну процестерінсіз буындардағы ауырсыну және/немесе қозғалғыштығының өзгеруі), пациент Пантоспей препаратын қабылдауды дереу тоқтатып, дәрігерге қаралуы керек. Протонды помпа тежегіштерімен алдыңғы емдеуден кейін ТЖЖҚЖ басқа протонды помпа тежегіштерімен ТЖЖҚЖ қаупін арттыруы мүмкін. Зертханалық зерттеулердің нәтижелеріне әсері: тез ұлғайып келе жатқан (нейроэндокриндік) ісіктерге тексеру жүргізген кезде Пантоспей препаратымен емдеуді тексеру жүргізілгенге дейін кемінде 5 күн бұрын тоқтату керек және кейде Пантоспей препаратының тексеру көрсеткіштеріне әсеріне байланысты оларды пантопразолмен емдеуді тоқтатқаннан кейін 14 күннен кейін қайталауға тура келеді. Қосымша заттар Препараттағы натрийдің жалпы мөлшері Пантоспей препаратының құрамында сусыз натрий карбонаты, натрий кармеллозасы және натрий крахмалының гликоляты А типі бар, бұл бір таблеткаға 1 ммоль-ден аз натрийді (23 мг) құрайды, яғни іс жүзінде натрий жоқ. Бұл ақпаратты натрийді қабылдау шектелген диетадағы пациенттер ескеруі қажет. Маннитол Пантоспей препаратының құрамында бір таблеткаға маннитол (141,0 мг) бар, ол осы қосымша заттың рұқсат етілген шегінен (10 г) аспайды. Пропиленгликоль Пантоспей препаратының құрамында бір таблеткаға пропиленгликоль (2,2 мг) бар. Пантоспей препаратын қолданған кезде абай болу керек, өйткені пропиленгликоль алкогольдің әсеріне ұқсас әсер тудыруы мүмкін. Педиатрияда қолдану: қауіпсіздік пен тиімділік туралы мәліметтер жеткіліксіз болғандықтан, 12 жасқа дейінгі балалар мен жасөспірімдерде Пантоспей препаратын қолдану ұсынылмайды. Жүктілік: жүктілік кезінде пантопразолды қолдану туралы талапқа сай деректер жоқ. Сақтық шарасы ретінде жүктілік кезінде Пантоспей препаратын қолданудан аулақ болған жөн. Лактация: жануарларға жүргізілген зерттеулер пантопразолдың емшек сүтіне енетінін көрсетті. Пантопразолдың емшек сүтімен бөлінуі туралы мәліметтер жоқ, алайда адамның емшек сүтіне енуі туралы хабарланған. Жаңа туған нәрестелер/емшек сүтімен қоректенетін сәбилер үшін қауіпті жоққа шығаруға болмайтындықтан, емшек сүтімен емізуді тоқтату немесе Пантоспей препаратымен емдеуді жалғастыру / тоқтату туралы шешім бала үшін емшек сүтімен емізудің пайдасын және әйелдерде Пантоспей препаратын қолданумен емнің пайдасын ескере отырып қабылдануы керек. Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері Пантоспей автокөлікті, көлік құралын басқару немесе механизмдермен жұмыс істеу қабілетіне әсер етпейді немесе елеусіз әсер етеді. Бас айналу және көру қабілетінің бұзылуы сияқты жағымсыз реакциялар орын алуы мүмкін. Мұндай жағдайларда көлік құралын басқарудан және механизмдермен жұмыс жасаудан бас тарту керек.

Нұсқаулықта көрсетілмеген.

Асқазанның рН-на тәуелді сіңірілетін дәрілік заттар: асқазан қышқылының секрециясының терең және ұзақ уақыт басылуына байланысты Пантоспей препараты биологиялық қолжетімділігі асқазан ортасының рН көрсеткішіне тәуелді кейбір дәрілік заттардың, мысалы, кетоконазол, итраконазол, позаконазол сияқты зеңге қарсы препараттардың және эрлотиниб сияқты дәрілік заттардың әсерін төмендетуі мүмкін. АИТВ протеаза тежегіштері Пантопразолды сіңуі асқазанның қышқылдық рН-на байланысты болатын атазанавирмен және басқа АИТВ протеаза тежегіштерімен бірге қолдану олардың биожетімділігінің айтарлықтай төмендеуіне әкелуі мүмкін. Егер АИТВ протеаза тежегіштерінің протонды помпа тежегіштерімен біріктірілімі өте қажет болса, мұқият клиникалық мониторинг ұсынылады (мысалы, вирустық жүктеме). Пантопразолдың дозасын тәулігіне 20 мг-ден асырмау керек. АИТВ протеаза тежегішінің дозасын түзетуге болады. Қанның ұюын төмендететін препараттар (фенпрокумон және варфарин): қанның ұюын төмендететін препараттармен (варфарин, фенпрокумон) бір мезгілде қолданғанда қанның ұюының зертханалық көрсеткіштері төмендеуі мүмкін (халықаралық қалыптасқан қатынас (ХҚҚ) және протромбин уақыты) және қатты қан кету дамуы мүмкін (тіпті өлімге әкелетін). Варфаринмен немесе фенпрокумонмен пантопразол қабылдайтын пациенттер ХҚҚ және протромбин уақытының жоғарылау қаупіне байланысты медициналық бақылауда болуы керек. Метотрексат: Пантоспей препараты метотрексаттың (обыр немесе псориазды емдеуге арналған препарат) әсерін күшейтуі мүмкін, сондықтан метотрексаттың үлкен дозаларын (мысалы, 300 мг) тағайындаған кезде дәрігер Пантоспей препаратын қабылдауды тоқтатуы мүмкін. Басқа өзара әрекеттесулерді зерттеу: осы ферменттік жүйелермен (карбамазепин, диазепам, глибенкламид, нифедипин және құрамында левоноргестрел мен этинилэстрадиол бар оральді контрацептивтер) метаболизденетін дәрілік препараттардың өзара әрекеттесуінің зерттеулері клиникалық маңызды өзара әрекеттесулерді анықтаған жоқ. Пантопразолдың сол ферменттік жүйе арқылы метаболизденетін басқа дәрілік препараттармен немесе қосылыстармен өзара әрекеттесуін жоққа шығаруға болмайды. Бірқатар өзара әрекеттесу зерттеулерінің нәтижелері пантопразолдың CYP1A2 (кофеин, теофиллин сияқты), CYP2C9 (пироксикам, диклофенак, напроксен сияқты), CYP2D6 (метопролол сияқты), CYP2E1 (этанол сияқты) метаболизденетін белсенді заттардың метаболизміне әсер етпейтінін немесе р-гликопротеинмен байланысты дигоксиннің сіңуіне кедергі келтірмейтінін көрсетеді. Бір мезгілде қабылданған антацидтермен өзара әрекеттесу болған жоқ (асқазандағы тұз қышқылын бейтараптандыратын препараттар тобы). Пантопразолды тиісті антибиотиктермен (кларитромицин, метронидазол, амоксициллин) бір мезгілде қолданған кезде өзара әрекеттесу зерттеулері жүргізілді. Ешқандай клиникалық маңызды өзара әрекеттесулер анықталған жоқ. Пантоспей препаратының әсерін күшейтетін немесе төмендететін препараттар: флувоксамин Пантоспей препаратының әсерін күшейтуі мүмкін, ал рифампицин мен шайқурай препараттары (шілтерленген шайқурай) оның әсерін әлсіретуі мүмкін. Пантопразолдың жоғары дозаларымен ұзақ емделетін пациенттерде немесе бауыр жеткіліксіздігі бар пациенттерде пантопразол дозасын азайтуды қарастыру керек.

Сақтау мерзімі 3 жыл Жарамдылық мерзімі өткеннен кейін қолдануға болмайды Сақтау шарттары 25 ºС-ден аспайтын температурада сақтау керек. Балалардың қолы жетпейтін жерде сақтау керек!