Пролиа® раствор 60 мг/мл

Бір мл ерітіндінің құрамында белсенді зат - 60 мг денозумаб қосымша заттар - сорбитол (E420), мұзды сірке қышқылы*, полисорбат 20, натрий гидроксиді*, инъекцияға арналған су бар. * Сірке қышқылы натрий гидроксидімен араласқан кезде ацетат буфері пайда болады. Сыртқы түрінің, иісінің, дәмінің сипаттамасы Қосылыстардан іс жүзінде бос, түссізден ашық-сары түске дейінгі мөлдір ерітінді, ішінде жартылай мөлдірден ақ түске дейін бөлшектердің қалдық іздері болуы мүмкін.

- Постменопаузалық остеопорозды және сыну қаупі жоғары болған кезде ерлердегі остеопорозды емдеу. Постменопаузадағы әйелдерде Пролиа® препараты вертебральді, вертебральді емес және ортан жілік сынықтарының қаупін айтарлықтай төмендетеді. - Сүйектің сыну қаупі жоғарылаған кезде гормон-депривациялық ем алатын қуықасты безінің обыры бар ерлерде сүйек массасының жоғалуын емдеу. Гормон-депривациялық ем алатын қуықасты безінің обыры бар ерлерде Пролиа® препараты вертебральді сыну қаупін едәуір төмендетеді. - Сүйектің сыну қаупі жоғары ересек пациенттердегі жүйелі глюкокортикоидтармен ұзақ мерзімді еммен байланысты сүйек массасының жоғалуын емдеу.

Әсер ету механизмі Денозумаб - бұл толық адами моноклональді антидене (IgG2), оның RANKL (RANK рецепторына лиганд) үшін аффинділігі жоғары және өзгешелігі бар, осылайша ол остеокласттар мен олардың алдынғыларының бетіндегі осы RANK рецепторларының іске қосылуын тежейді. RANK лигандының RANK рецепторымен байланысуының алдын-алу остеокласттардың жетілуін, әрекет етуін және өміршеңдігін тежейді, бұл кортикальды және кеуекті сүйек қабаттарында сүйектің резорбциясын азайтады. Фармакодинамикалық әсерлері Пролиа препаратымен ем сүйек тіндерінің - сарысудағы 1-типті С-телопептидтердің (CTX) резорбция маркері көрсеткіштерінің 3 күн ішінде минималды көрсеткіштерге (85%-ға төмендеуіне) жете отырып, сүйек тіндерінің қалпына келу жылдамдығының тез төмендеуіне алып келді, ал CTX-ның төмендеген концентрациясы препараты енгізу аралығында сақталды. Әрбір осындай кезеңнің соңында CTX концентрациясының төмендеу дәрежесі аздап әлсіріп отырды: CTX максималды≥ 87%-дан шамамен ≥ 45%-ға дейін (45-80% аралығында) төмендеді, бұл препараттың сарысудағы концентрациясының төмендеуі кезінде сүйек метаболизміне қатысты Пролиа препараты әсерінің қайтымдылығын көрсетеді. Осы әсерлер емдеу курсының бүкіл кезеңінде байқалды. Сүйек резорбциясы маркерлерінің концентрациясы әдетте ем басталғанға дейін, препараттың соңғы дозасынан кейін 9 ай ішінде байқалған бастапқы мәндерге жетті. Препаратпен емді жаңартқаннан кейін CTX концентрациясының төмендеу дәрежесі денозумабпен емдеу курсының басындағы CTX концентрациясының төмендеу дәрежесіне ұқсас болды. Иммуногенділігі Клиникалық зерттеулерде денозумабты қолдану кезінде бейтараптандырушы антиденелердің түзілуі байқалған жоқ. Сезімтал иммундық талдау әдісін қолданған кезде денозумабты 5 жылға дейінгі уақыт кезеңі ішінде қабылдаған пациенттердің 1%-дан азында фармакокинетикалық, уыттылық немесе клиникалық жауап өлшемдерінің өзгеру белгілерінсіз бейтараптандырмайтын байланыстырушы антиденелердің анықталғаны көрсетілді. Клиникалық тиімділігі және қауіпсіздігі Остеопорозы бар постменопаузадағы әйелдер үшін клиникалық тиімділігі және қауіпсіздігі Бел омыртқасындағы немесе ортан жілік буыны аймағындағы T-өлшемі бойынша сүйектің минералды тығыздығының (СMТ) бастапқы мәні - 2,5 мен -4.0 аралығындағы постменопаузадағы әйелдерге 3 жыл бойы 6 айда бір рет тағайындау сұлбасы бойынша енгізген кезде Пролиа препаратының тиімділігі мен қауіпсіздігі туралы зерттеу жүргізілді (60 жастан 91 жасқа дейінгі 7808 әйел; олардың 23,6%-ында вертебральді сыну жиі кездеседі); бұл ретте сынудың орташа абсолюттік 10 жылдық ықтималдылығы ірі остеопоротикалық сыну үшін 18,60% (децильдер: 7.9–32.4%) және ортан жіліктің сынуы үшін 7.22% (децильдер: 1.4–14.9%) құрады. Зерттеуге сүйек тініне әсер етуі мүмкін басқа аурулары бар немесе ем қабылдап жүрген әйелдер қатысқан жоқ. Әйелдер күнделікті кальций қоспаларын (кем дегенде 1000 мг) және D дәруменін (кем дегенде 400 ХБ) қабылдап отырды. Вертебральды сынықтарға әсері Пролиа препараты бір, екі және үш жылдан кейін жаңа вертебральді сынықтар қаупін едәуір төмендетті (p <0.0001) (2-кестені қараңыз). 2-кесте. Пролиа препаратының жаңа вертебральді сынықтар қаупіне әсері Сынықтары бар әйелдердің үлесі (%) — Қауіптің абсолютті төмендеуі (%) (95 % СИ) — Қауіптің салыстырмалы төмендеуі (%) (95 % СИ) Плацебо n = 3906 — Пролиа n = 3902 0–1 жыл — 2,2 — 0,9 — 1,4 (0,8; 1,9) — 61 (42; 74)** 0–2 жыл — 5,0 — 1,4 — 3,5 (2,7; 4,3) — 71 (61; 79)** 0–3 жыл — 7,2 — 2,3 — 4,8 (3,9; 5,8) — 68 (59, 74)* *p < 0,0001; ** p < 0,0001 — алдын-ала талдау. Ортан жілік сүйектерінің сынуына әсері Пролиа препараты 3 жыл ішінде ортан жіліктің салыстырмалы сыну қаупін 40%-ға төмендеткенін (абсолюттік қауіпті 0,5%-ға төмендеткенін) көрсетті (p <0.05). Ортан жілік сүйектерінің сыну жиілігі плацебо тобында 1,2% құраған болса, 3 жылдан кейін Пролиа препаратымен емдеу тобында 0,7% құрады. Ретроспективті талдау деректері бойынша Пролиа препаратымен емделген 75 жастан асқан әйелдерде салыстырмалы қауіптің 62%-ға төмендеуі (абсолютті қауіптің 1,4%-ға төмендеуі, p <0.01) байқалды. Барлық клиникалық сынықтарға әсер ету Пролиа препараты сынықтардың барлық түрін/тобын айтарлықтай төмендеткенін көрсетті (3-кестені қараңыз). 3-кесте. Пролиа препаратының 3 жыл ішінде клиникалық сынықтардың туындау қауіпіне әсері Сынықтары бар әйелдердің үлесі (%)+ — Қауіптің абсолютті төмендеуі (%) (95 % СИ) — Қауіптің салыстырмалы төмендеуі (%) (95 % СИ) Плацебо n = 3906 — Пролиа n = 3902 Кез-келген клиникалық сынық1 — 10,2 — 7,2 — 2,9 (1,6; 4,2) — 30 (19; 41)*** Клиникалық вертебральді сынық — 2,6 — 0,8 — 1,8 (1,2; 2,4) — 69 (53; 80)*** Вертебральді емес сынық2 — 8,0 — 6,5 — 1,5 (0,3; 2,7) — 20 (5; 33)** Ірі вертебральді емес сынық 3 — 6,4 — 5,2 — 1,2 (0,1; 2,2) — 20 (3, 34)* Ірі остеопороздық сынық4 — 8,0 — 5,3 — 2,7 (1,6; 3,9) — 35 (22; 45)*** * p ≤ 0,05; ** p = 0,0106 (бірнеше салыстыру есебіне енгізілген екінші қайтара ақырғы нүкте); ***p ≤ 0,0001. + Каплан-Мейердің бағалауына негізделген оқиғалар жиілігі 3 жыл. 1 Клиникалық вертебральді және вертебральді емес сынықтарды қамтиды. 2 Омыртқалар, бас сүйек, бет, төменгі жақ, алақан сүйектері мен аяқ-қол саусақтарының бақайшықтарын қоспайды. 3 Ортан жілік, ортан жіліктің дистальды бөлігі, жіліншік сүйегі, қабырға, иық сүйегінің проксимальді бөлігі, білек және санды қамтиды. 4 ДДҰ анықтаған ортан жілік, білек және иық сүйектерінің клиникалық вертебральді сынықтары кіреді. Пролиа препаратымен емделген кезде ортан жілік мойнының бастапқы СMТ көрсеткіші ≤ -2,5 болған әйелдерде вертебральді емес сынықтар қаупінің төмендеуі байқалды (салыстырмалы қауіп 35%-ға төмендеді, абсолютті қауіп 4,1%-ға төмендеді, p <0.001, алдын-ала талдау). Пролиа препаратын 3 жылдан артық қабылдау кезінде жаңа вертебральді сынықтар, ортан жілік сүйегі мен вертебральді емес сынықтар қаупінің төмендеуі ірі остеопороздық сынықтардың 10 жылдық болжамына қарамастан тұрақты болып қала берді. Сүйектің минералды тығыздығына әсері (СМТ) Плацебомен салыстырғанда Пролиа препараты емдеу басталғаннан кейін бір, екі және үш жылдан соң барлық анатомиялық аймақтардағы СMТ-ны едәуір арттырды. 3 жыл ішінде Пролиа препараты СMТ-ны бел омыртқасында 9,2%-ға, ортан жілік буынында 6,0%-ға, ортан жілік мойны аумағында 4,8%-ға, ортан жілік сүйегінің ұршығында 7,9%-ға, білек сүйегінің дистальды үштен бір бөлігінде 3,5%-ға, бүкіл денеде 4,1%-ға арттырды (барлығы: p <0,0001). Пролиа препаратын доғару әсерін зерттейтін клиникалық зерттеулерде СMТ шамамен емдеуге дейінгі деңгейіне оралды және соңғы дозаны қабылдағаннан кейін 18 ай ішінде плацебо деңгейінен жоғары болды. Бұл деректер дәрілік заттың әсерін сақтап қалу үшін Пролиа препаратымен қосымша емнің қажет екенін көрсетеді. Пролиа препаратымен емді қайта бастау Пролиа препаратын алғашқы енгізу кезінде байқалғанға ұқсас СМТ деңгейінің жоғарылауына әкелді. Постменопаузалық остеопорозды емдеудің ашық кеңейтілген зерттеуі Жалпы алғанда жоғарыда сипатталған базалық зерттеу кезінде зерттеліп отырған дәрілік препараттың бір ғана дозасын жіберіп алған және 36-айда зерттеуді аяқтаған 4550 әйел (Пролиа препаратымен емделу тобында 2343 және плацебо тобында 2207) Пролиа препаратының ұзақ мерзімді тиімділігі мен қауіпсіздігін бағалау жөніндегі емді жалғастырудың 7 жылдық көп ұлттық көп орталықты ашық салыстырмалы емес зерттеуіне қатысуға келісті. Емді ұзарту зерттеуі кезінде барлық әйел әр 6 ай сайын Пролиа препаратын 60 мг дозада және күнделікті кальций (кем дегенде 1г) және D дәруменін (кем дегенде 400 ХБ) қабылдап отыруға тиіс болды. Жалпы алғанда 2626 пациент емді ұзарту зерттеуін аяқтады (емді ұзарту зерттеуіне қатысқан әйелдердің 58%, яғни негізгі зерттеуге қосылған әйелдердің 34%). Пролианы 10 жыл қабылдаған пациенттерде СMТ бастапқы базалық зерттеу деңгейімен салыстырғанда бел омыртқасында 21,7%-ға, ортан жілік буынында 9,2%-ға, ортан жілік мойны аумағында 9,0%-ға, ортан жілік сүйегінің ұршығында 13,0%-ға және білек сүйегінің дистальды үштен бір бөлігінде 2,8%-ға артты. Зерттеу соңында бел омыртқасы аумағындағы СMТ-дің орташа Т-көрсеткіші 10 жыл емделген пациенттерде –1,3 болды. Сыну жиілігі ақырғы қауіпсіздік нүктесі болды, бірақ емді ерте аяқтаған пациенттердің көптігі мен ашық зерттеу дизайнына байланысты сынудың алдын-алу тиімділігін бағалау мүмкін болмады. Денозумабпен 10 жыл емделген пациенттерде жаңа вертебральді сынықтар мен вертебральді емес сынықтардың жалпы көрсеткіші сәйкесінше 6,8% және 13,1% болды (n = 1278). Зерттеуді қандай да бір себептермен аяқтамаған пациенттерде емдеу кезінде сынықтардың анағұрлым көп болғаны байқалды. Емді ұзарту зерттеуінде жақ сүйегінің остеонекрозының (ЖОН) расталған 13 жағдайы және ортан жіліктің екі атипиялық сыну жағдайы расталды. Остеопорозы бар ерлер үшін клиникалық тиімділігі мен қауіпсіздігі Бір жыл бойы 6 айда бір рет қабылдау сұлбасы бойынша Пролиа препаратының тиімділігі мен қауіпсіздігі 31–84 жас аралығындағы 242 ер адамда зерттелген. ШСЖ<30 мл/ мин/1,73м2 болған пациенттер зерттеуден шығарылды. Барлық ер адамдар күнделікті қосымша кальций (кем дегенде 1000 мг) мен D дәруменін (кем дегенде 800 ХБ) қабылдап отырды. Бел омыртқасындағы СMТ пайыздық өзгерісі оның тиімділігінің негізгі көрсеткіші болды, сынықтарға әсері бағаланған жоқ. Пролиа препаратымен емдеу кезінде плацебомен салыстырғанда 12 айдан соң өлшенген барлық анатомиялық аймақтарда СМТ едәуір артты: бел омыртқасында - 4,8%-ға, ортан жілік буыны аумағында - 2,0%-ға, ортан жілік мойны аумағында - 2,2%-ға, ортан жілік сүйегінің ұршығы аумағында - 2,3%-ға, білектің дистальды үштен бір бөлігі аумағында - 0,9%-ға (барлығы: p <0.05). Пролиамен емдеген бір жыл ішінде бел омыртқасы аумағындағы СMТ ерлердің 94,7% -бастапқы деңгейімен салыстырғанда артқан. Бел омыртқасында, ортан жілік буыны аумағында, ортан жілік мойнында және ортан жілік сүйегінің ұршығында СMТ-нің 6 айдан соң айтарлықтай артқаны байқалды (p <0.0001). Постменопаузадағы әйелдердегі және остеопорозы бар ерлердегі сүйек тінінің гистологиялық зерттеуі Сүйек тініне гистологиялық зерттеу остеопорозы бар немесе сүйек массасы төмен постменопаузадағы 62 әйелге жүргізілді, олар не остеопорозға байланысты емделмеген немесе алендронатпен алдын-ала емделгеннен кейін 1-3 жыл ішінде Пролиа препаратымен ем алған. Зерттеуге 24-айдағы (n = 41) және/немесе 84-айдағы (n = 22) сүйек биопсиясы бар елу тоғыз әйел қатысты, ол постменопаузадағы остеопорозы бар әйелдер үшін емді ұзарту зерттеуіне енгізілді. Сонымен қатар Пролиамен бір жыл емделгеннен кейін остеопорозы бар 17 ер адамның сүйек тінінің гистологиялық зерттеуі жүргізілді. Сүйек тіні биопсиясының нәтижелерін бағалау кезінде сүйек кемігінің минералдану, жетілмеу немесе фиброз белгілерінсіз сүйек тінінің қалыпты сүйек құрылымы мен сапасы анықталды. Постменопаузадағы остеопорозы бар әйелдерге жүргізілген қосымша зерттеулерде гистоморфометрияның нәтижелері уақыт өте келе остеогенездің ояну жиілігімен өлшенетін Пролиа препаратының антирезорбтивті әсерлерінің сақталатыны көрсетілді. Андрогендік депривациямен байланысты сүйек массасының жоғалуы бар пациенттер үшін клиникалық тиімділігі мен қауіпсіздігі Үш жыл бойына 6 айда бір рет қабылдау сұлбасы бойынша қабылдаған кезде Пролиа препаратының тиімділігі мен қауіпсіздігі гистологиялық тұрғыда расталған қуықасты безінің метастазалық емес обыры бар ерлерде зерттелді. Олардың барлығы (48-97 жас аралығындағы 1468 ер адам) гормонды-депривациялық емнен өтті және оларда сүйектің сыну қаупі жоғары болды (жасына байланысты > 70 жаста немесе <70 жаста бел омыртқасында, ортан жілік буынында немесе ортан жілік мойнында СМТ-ның T-өлшемді < -1,0 немесе анамнездегі остеопороздық сынық). Барлық ер адамдар күнделікті қосымша кальций (кем дегенде 1000 мг) мен D дәруменін (кем дегенде 400 ХБ) қабылдап отырды. Пролиа препаратымен 3 жылдық емнен кейін плацебомен салыстырғанда барлық анатомиялық аудандарда СМТ-нің едәуір жоғарылауы байқалды: бел омыртқасында 7,9%-ға, ортан жілік буынында 5,7%-ға, ортан жілік мойнында 4,9%-ға, ортан жілік сүйегінің ұршығында - 6,9%-ға, білектің дистальды үштен бір бөлігінде - 6,9%-ға, бүкіл денеде - 4,7%-ға (барлығы: p <0,0001). Алғашқы дозаны қабылдағаннан кейін бір айдан кейінгі табысты жоспарланған алдын-ала талдау нәтижелері бойынша бел омыртқасында, ортан жілік буынында, ортан жілік мойны мен ортан жілік сүйегінің ұршығында СМТ-нің едәуір жоғарылауы байқалды. Пролиа препаратымен емдеу кезінде жаңа вертебральді сынықтардың салыстырмалы қауіпінің айтарлықтай төмендегені көрсетілді: 1 жылдан кейін – 85%-ға (абсолютті қауіптің төмендеуі 1,6 %-ға), 2 жылдан кейін – 69%-ға (абсолютті қауіптің төмендеуі 2,2 %-ға), 3 жылдан кейін – 62%-ға (абсолютті қауіптің төмендеуі 2,4 %-ға) (барлығы: p <0,01). Ароматаза тежегіштерімен адъювантты еммен байланысты сүйек тінін жоғалтқан пациенттер үшін клиникалық тиімділігі және қауіпсіздігі Екі жыл бойына 6 айда бір рет қабылдау сұлбасы бойынша қабылдаған кезде Пролиа препаратының тиімділігі мен қауіпсіздігі сүт безінің метастазалық емес обыры бар және бел омыртқасындандағы, ортан жілік буыны немесе ортан жілік мойны аумағындағы СМТ T-өлшемінің бастапқы көрсеткіштері –1.0-ден -2,5 дейінгі әйелдерде (35–84 жас аралығындағы 252 әйел) зерттелді. Барлық әйелдер күнделікті қосымша кальций (кем дегенде 1000 мг) мен D дәруменін (кем дегенде 400 ХБ) қабылдап отырды. Бел омыртқасындағы СМТ пайыздық өзгерісі негізгі тиімділік көрсеткіші болды, сынықтардың әсері бағаланған жоқ. Пролиа препаратымен екі жылдық емдеуден кейін плацебомен салыстырғанда барлық анатомиялық аудандарда СМТ-нің едәуір жоғарылағаны анықталды: бел омыртқасында - 7,6%, ортан жілік буынында - 4,7%, ортан жілік мойнында - 3,6%, ортан жілік сүйегінің ұршығында - 5,9%, білектің дистальды үштен бір бөлігінде - 6,1%, бүкіл денеде - 4,2% (барлығы: p <0.0001). Жүйелі глюкокортикоидты еммен байланысты сүйек тінінің жоғалуын емдеу Пролиа препаратының тиімділігі мен қауіпсіздігі 20 жастан 94 жасқа дейін күнделікті преднизонды ≥ 7,5 мг (немесе соған балама) дозада ішке қабылдаған 795 пациентте бағаланды (оның ішінде 70%-ы әйелдер және 30%-ы ерлер). Зерттеуге пациенттердің екі қосалқы тобы қатысты: глюкокортикоидтармен емді жалғастырушылар (зерттеуге қосылғанға дейін кемінде 3 ай преднизонның ≥ 7,5 мг тәуліктік дозасын немесе соған балама дозаны қабылдаған; n = 505) және глюкокортикоидтармен емді бастаушылар (зерттеуге қосылғанға дейін 3 айдан аз преднизонның ≥ 7,5 мг немесе тәуліктік дозаны немесе соған балама дозаны қабылдаған; n = 290). Пациенттер топтарға бөлінді (1:1): 2 жыл бойы 6 айда бір рет тері астына 60 мг доза енгізілетін Пролиа тобы және күніне бір рет ішке 5 мг доза (белсенді бақылау) енгізілетін ризедронат тобы. Пациенттер күнделікті қосымша кальций (кем дегенде 1000 мг) мен D дәруменін (кем дегенде 800 ХБ) қабылдап отырды. Сүйек тінінің минералды тығыздығына әсері (СМТ) Глюкокортикоидтармен емді жалғастырған қосалқы топта Пролиа препаратымен емдеу кезінде бір жылдан кейін ризедронатпен еммен салыстырғанда бел омыртқасының СМТ-ң артқаны көрсетілді (Пролиа препараты тобы - 3,6%-ға, ризедронат тобы - 2,0%-ға; p <0.001) және 2 жылдан кейін (Пролиа препараты тобы - 4,5%-ға, ризедронат тобы - 2,2%-ға; p <0.001). Глюкокортикоидтармен ем бастаған қосалқы топта Пролиа препаратымен ем кезінде бір жылдан кейін ризедронатпен еммен салыстырғанда бел омыртқасының СМТ-ң артқаны көрсетілді (Пролиа препараты тобы - 3,1%-ға, ризедронат тобы - 0,8%-ға; p <0.001) және 2 жылдан кейін (Пролиа препараты тобы - 4,6%-ға, ризедронат тобы - 1,5%-ға; p <0.001). Сонымен қатар, Пролиа препаратымен емдеу кезінде ортан жілік буынында, ортан жілік мойнында және ортан жілік сүйегінің ұршығында ризедронат тобына қарағанда СМТ-нің бастапқы деңгейден артуының орташа үлесі өте маңызды болды. Зерттеу кезінде сынықтардың анатомиялық оқшаулануындағы айырмашылық зерттелген жоқ. Бір жылдан кейін рентген арқылы расталған жаңа вертебральді сынықтардың жиілігі денозумаб тобында 2,7% құраған болса, ризедронат тобында 3,2% құрады. Вертебральді емес сынықтар жиілігі денозумаб тобында 4,3% құраған болса, ризедронат тобында 2,5% құрады. 2 жылдан кейін көрсеткіштер сәйкесінше: рентген арқылы расталған жаңа вертебральді сынықтар үшін 5,8%-бен салыстырғанда 4,1%; вертебральді емес сынықтар үшін 5.3%-бен салыстырғанда 3.8% құрады. Сынықтардың көп бөлігі глюкокортикоидпен емді жалғастырған қосалқы топта пайда болды. Балалар Жетілмей қалған остеогенезі бар 2-ден 17 жасқа дейінгі балалардың қатысуымен препараттың тиімділігін, қауіпсіздігін және фармакокинетикасын бағалау мақсатында 3 фазадағы салыстырмалы емес зерттеу жүргізілді, олардың ішінде пациенттердің 52,3%-ер жынысты және пациенттердің 88,2%-ы еуропалық нәсілден болды. Барлығы 153 пациент бастапқыда денозумабты 36 ай ішінде әр 6 ай сайын 1 мг/кг дозада (мүмкін болатын ең жоғары 60 мг дозамен) тері астына (т/а) қабылдады. Алпыс пациент препаратты 3 ай сайын қолдануға көшті. Препаратты әр 3 ай сайын қолданудан кейінгі 12-ші айда ең кіші квадраттар әдісімен есептелген бел бөліміндегі Z‑критерий бойынша ЕТБК орташа мәнінің стандартты қатесінің (SE) айырмасы, бастапқы мәнімен салыстырғанда, 1,01 (0,12) құрады. Препаратты әр 6 ай сайын қолдану кезінде байқалатын ең көп жиі жағымсыз құбылыстар артралгия (45,8%), аяқ-қол ауыруы (37,9%), арқаның ауыруы (32,7%) және гиперкальциурия (32,0%) болды. Гиперкальциемия препаратты әр 6 ай сайын (19%) және әр 3 ай сайын (36,7%) қолдану кезінде байқалды. Гиперкальциемияның күрделі жағымсыз құбылыстары (13,3%) препаратты әр 3 ай сайын қолдану кезінде байқалды. Кеңейтілген зерттеу барысында (n = 75) гиперкальциемияның күрделі жағымсыз құбылыстары (18,5 %) препаратты әр 3 ай сайын қолдану кезінде байқалды. Бұл зерттеулер гиперкальциемиямен байланысты өмірге қатерлі жай-күйлердің дамуы мен ауруханаға түсу салдарынан мерзіміне дейін тоқтатылды (4.2 бөлімін қараңыз). Еуропалық дәрілік заттар жөніндегі агенттік жыныс гормондарымен гормондепривациялық емге байланысты сүйек тінін жоғалтуды емдеу кезіндегі педиатриялық қауымның барлық қосалқы топтарында және остеопорозды емдеу үшін педиатриялық қауымның 2 жасқа дейінгі қосалқы топтарының бәрінде Пролиа препаратын зерттеу нәтижелерін ұсыну міндеттемесін кейінге қалдырды. Препаратты балаларға қолдану жөніндегі ақпаратты 4.2 бөлімінен қараңыз.

Дозалану режимі Денозумабтың ұсынылатын дозасы 60 мг; бұл санға, ішке немесе иыққа 6 айда бір рет тері астына енгізіледі. Емдеу курсы барысында кальций мен D дәруменінің препараттарын тиісті дозада қосымша қабылдау қажет. Резорбцияға қарсы препараттармен (денозумаб және бисфосфонаттар) остеопорозды оңтайлы емдеу ұзақтығы белгіленбеген. Емді жалғастыру қажеттілігін әр пациент үшін препаратты қабылдай бастағаннан кейін 5 жылдан соң және одан да көп уақыттан соң денозумабты қолданудың пайдасы мен ықтимал қауіпін ескере отырып, жеке-жеке қайта бағалау керек. Пациенттердің ерекше топтары Егде жастағы пациенттер (≥ 65 жас) Егде жастағы пациенттерге дозаны түзету қажет емес. Бүйрек жеткіліксіздігі бар пациенттер Бүйрек жеткіліксіздігі бар пациенттерге препараттың дозасын түзету қажет емес. Ауыр бүйрек жеткіліксіздігі бар (ШСЖ <30 мл/мин) және жүйелі глюкокортикоидтермен ұзақ мерзімді ем алған пациенттерге препаратты қолдану туралы мәліметтер жоқ. Бауыр жеткіліксіздігі бар пациенттер Бауыр жеткіліксіздігі бар пациенттер үшін денозумабтың қауіпсіздігі мен тиімділігі зерттелген жоқ. Балалар Ауыр гиперкальциемияның өршуі қауіпін және сүйектердің өсуін тежегіштеумен тістердің жарып шығуының болмауы болжамдықтарды ескере, Пролиа® препаратын 18 жасқа толмаған балаларға қолдануға ұсынылмайды. Енгізу әдісі және жолы Тері астына енгізіледі. Препараттың енгізілуін инъекция техникасы бойынша үйренген адам жүргізуі керек. Дәрілік препараттың бір немесе бірнеше дозасын өткізіп алған кезде қажетті шаралар Егер Пролиа® препаратының дозасы өткізіп алынса, инъекцияны мүмкіндігінше тезірек жасау керек. Одан әрі инъекцияларды соңғы инъекция күнінен бастап әрбір 6 ай сайын жоспарлау керек. Тоқтату симптомдары қаупінің болуын көрсету Сынықтар қаупін азайту үшін емдеуден барынша пайда алу үшін Пролиа® препаратын емдеуші дәрігер ұсынған кезең ішінде қолдану маңызды. Емделушілерге емдеуші дәрігермен кеңесусіз емдеуді тоқтатуға болмайды. Дәрілік препаратты қолдану тәсілін түсіндіру үшін медицина қызметкеріне консультацияға жүгіну бойынша ұсынымдар Препаратты қолдану туралы сұрақтар туындаған жағдайда емдеуші дәрігерге қатысыңыз.

• Әсер етуші затқа немесе «Дәрілік препараттың құрамы» бөлімінде аталған қосымша заттардың кез келгеніне аса жоғары сезімталдық • Гипокальциемия

Препараттың қауіпсіздігі туралы қысқаша мәлімет Денозумабпен емдеу кезінде ең көп таралған жағымсыз әсерлерге (бұл 10 науқастың біреуінен көбінде байқалды) қаңқа-бұлшықет және аяқ-қол аурулары жатады. Пациенттер денозумаб қабылдаған кезде теріасты-шелмайы қабынуының сирек кездесетін жағдайлары және гипокальциемияның, аса жоғары сезімталдықтың, жақ сүйегі остеонекрозының және ортан жіліктің атипиялық сынуларының сирек кездесетін жағдайлары туралы айтылды. Жағымсыз реакциялар келесідей жіктеледі: өте жиі (≥ 1/10), жиі (≥ 1/100-ден < 1/10 дейін), жиі емес (≥ 1/1000-ден < 1/100 дейін), сирек (≥ 1/10000-ден < 1/1000 дейін), өте сирек (< 1/10000), белгісіз (қолда бар деректер негізінде бағалау мүмкін емес). Хабарламалар жиілігінің әрбір санатында және ағзалар жүйесінің әр класы үшін жағымсыз реакциялар ауырлық дәрежесінің төмендеу тәртібімен көрсетілген. Өте жиі • аяқ-қолдың ауыруы • қаңқа-бұлшықет ауруы1 Жиі • несеп шығару жолдарының инфекциялары • жоғары тыныс жолдарының инфекциялары • ишиас • іш қату • асқазан-ішек айналасындағы жайсыздығы • бөртпе • экзема • алопеция Жиі емес • дивертикулит1 • теріасты-шелмайы қабынуы1 • құлақ инфекциялары • лихеноидты дәрілік дерматит1 Сирек • дәрілік препаратқа аса жоғары сезімталдық1 • анафилаксиялық реакция1 • гипокальциемия1 • жақ сүйегінің остеонекрозы1 • ортан жіліктің атипиялық сынулары1 Өте сирек • аса жоғары сезімталды васкулит Белгісіз • сыртқы есту жолының остеонекрозы2 1«Кейбір жағымсыз реакциялар сипаттамасы» бөлімін қараңыз. 2 «Арнайы сақтандырулар» бөлімін қараңыз. Барлық плацебо бақылаудағы II және III фазадағы зерттеу деректерін біріктірілген талдау кезінде тұмауға ұқсас аурудың дамуы денозумаб тобында 1,2% және плацебо тобында 0,7% болғаны тіркелді. Мұндай теңгерімсіздік деректердің жалпылай талдауында анықталғанымен, стратификацияланған талдау кезінде анықталған жоқ. Кейбір жағымсыз реакциялардың сипаттамасы Гипокальциемия Постменопаузадағы остеопорозы бар әйелдердің ІІІ фазадағы екі плацебо-бақылау зерттеуінде пациенттердің шамамен 0,05 %-да (4050-ден 2-і) Пролиа препаратын енгізгеннен кейін қан сарысуындағы кальций концентрациясы (<1,88 ммоль/л) төмендеді. Гормонды-депривациялық ем қабылдап жүрген пациенттердегі ІІІ фазадағы клиникалық екі плацебо-бақылау зерттеуінде немесе остеопорозы бар ерлердегі ІІІ фазадағы клиникалық плацебо-бақылау зерттеуінде қан сарысуындағы кальций концентрациясының төмендеуі (1,88 ммоль / л-ден төмен) туралы айтылған жоқ. Тіркеуден кейінгі зерттеулерде көбінесе денозумаб қабылдаған гипокальциемияның даму қаупі жоғары пациенттерде ауруханаға түсуге, өмірге қатерлі жай-күйлерге және өліммен аяқталуға алып келген ауыр симптоматикалық гипокальциемияның сирек жағдайлары аталды; осы орайда, жағдайлардың көпшілігі емнің басталуынан кейінгі алғашқы апталар ішінде білінді. Ауыр симптоматикалық гипокальцемияның клиникалық көріністерінің мысалдарына QT аралығының ұзаруы, тетания, құрысу ұстамалары және психикалық жәй-күйдің өзгеруі жатады. Денозумаб зерттеулерінде гипокальциемия белгілері ретінде бұлшықеттердің парестезиясы немесе қаттылығы, бұлшықеттердің тітіркенуі, бұлшықеттердің жиырылуы немесе құрысуы болды. Тері инфекциялары III фазадағы клиникалық плацебо-бақылау зерттеулеріндегі тері инфекцияларының өршуі туралы хабарламардың жалпы жиілігі денозумабпен емдеу және плацебо топтарында бірдей болды: Пролиа® препаратымен емдеу тобымен салыстырғанда ([1,5%, 4050-ден 59-ы] остеопорозы бар постменопаузадағы әйелдерде плацебо тобы [1,2%, 4041-ден 50-і]); Пролиа® препаратымен емдеу тобымен салыстырғанда ([0%, 120-дан 0] остеопорозы бар ерлерде плацебо тобы [0,8%, 120-дан 1-і]); Пролиа® препаратымен емдеу тобымен салыстырғанда ([1,4%, 860-тан 12-і] гормонды-депривациялық ем қабылдайтын сүт безінің обыры және қуықасты безінің обыры бар пациенттерде плацебо тобы [1,7%, 845-тен 14-і]). Ауруханаға жатқызуды қажет ететін тері инфекциялары плацебо тобындағы остеопорозы бар постменопаузадағы әйелдердің 0,1%-ында (4041-ден 3-інде) және Пролиа® препаратымен емдеу тобының 0,4%-ында (4050-ден 16-да) байқалды. Бұл көбінесе теріасты шелінің қабыну жағдайлары болды. Тері инфекцияларының ауыр жағдайлары туралы сүт безінің обыры мен қуықасты безі обырының зерттеулерінде плацебо тобында (0,6%, 845-тен 5-і) және Пролиа® препаратымен емдеу тобында (0,6%, 860-тың 5-і) ұқсас жиілікпен тіркелді. Жақ сүйегінің остеонекрозы (ЖОН) ЖОН сирек жағдайлары тіркелді: гормонды-депривациялық ем алған остеопорозы, сүт безінің обыры немесе қуықасты безінің обыры бар клиникалық зерттеулерге қатысқан 23148 ​​қатысушының 16-сында анықталды. Осы ЖОН жағдайларының он үші остеопорозы бар постменопаузадағы әйелдерде пайда болған, олар III фазадағы кеңейтілген клиникалық зерттеуге қатысқан және 10 жылға дейін денозумабпен ем алуды жалғастырған. ЖОН жиілігі денозумабпен емнің 3 жылы ішінде 0,04%; 5 жылы ішінде 0,06%, 10 жылы ішінде 0,44% құрады. Денозумабпен емделу ұзақтығының созылуына орай ЖОН даму қаупі артты. Ортан жіліктің атипиялық сынықтары Денозумаб тобындағы пациенттердегі остеопороздың клиникалық зерттеулерінде ортан жіліктің атипиялық сынықтарының сирек жағдайлары тіркелген. Дивертикулит Гормонды-депривациялық ем алған қуықасты безінің обыры бар пациенттердегі III фазадағы клиникалық плацебо-бақылау зерттеуінде дивертикулиттің өршуі туралы мәліметтерде теңгерімсіздік байқалды (денозумаб қабылдаған топта - 1,2%, плацебо тобында - 0%). Дивертикулиттің өршу жиілігі постменопаузадағы әйелдер немесе остеопорозы бар ерлер, сондай-ақ сүт безінің метастазалық емес обыры бар ароматаза тежегіштерімен ем алатын әйелдер қатысқан зерттеу топтарында ұқсас болды. Препаратпен байланысты аса жоғары сезімталдық реакциялары Тіркеуден кейінгі зерттеулерде Пролиа® препаратын қабылдаған пациенттерде препаратқа байланысты аса жоғары сезімталдық реакциялары, оның ішінде бөртпе, есекжем, беттің ісінуі, эритема және анафилаксиялық реакциялар туралы сирек хабарланды. Қаңқа-бұлшықет ауыруы Тіркеуден кейінгі зерттеулерде Пролиа® препаратын қабылдаған пациенттерде қаңқа-бұлшықет ауыруы, соның ішінде қатты ауырсыну байқалды. Клиникалық зерттеулерде қаңқа-бұлшықет ауыруы денозумабпен ем қабылдаған топта да, плацебо тобында да өте жиі тіркелді. Зерттеуге қатысуды мерзімінен бұрын аяқтауға әкелетін қаңқа-бұлшықет ауруы жиі тіркелген жоқ. Лихеноидты дәрілік дерматит Тіркеуден кейінгі зерттеулер кезінде пациенттерде лихеноидты дәрілік дерматит жағдайлары (мысалы, қызыл тегіс бөртпе сияқты реакциялар) байқалды. Балалар Пролиа® препаратын балаларға (18 жасқа толмаған) қолдануға ұсынылмайды. Ауыр гиперкальциемия туралы хабарланды. Клиникалық зерттеулер кезінде кейбір қатысушыларда бүйректің жедел зақымдануы сияқты асқыну болды. Бүйрек жеткіліксіздігі Клиникалық зерттеулер кезінде ауыр бүйрек жеткіліксіздігі бар (креатинин клиренсі <30 мл/мин) немесе диализдегі пациенттер кальций препараттарын қабылмаған жағдайда оларда гипокальциемияның өршу қауіпі анағұрлым жоғары болғаны анықталды. Кальций препараттары мен D дәруменін ауыр бүйрек жеткіліксіздігі бар немесе диализдегі пациенттерге қабылдау өте маңызды. Жағымсыз дәрілік реакциялар туындағанда медициналық қызметкерге, фармацевтикалық қызметкерге немесе, дәрілік препараттардың тиімсіздігі туралы хабарламаларды қоса, дәрілік препараттарға болатын жағымсыз реакциялар (әсерлер) жөніндегі ақпараттық деректер базасына тікелей хабарласу керек: Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz.

Клиникалық зерттеулер кезінде артық дозалау жағдайлары тіркелген жоқ. Клиникалық зерттеулерде денозумаб әрбір 4 апта сайын 180 мг дейінгі дозада енгізілді (6 айдағы жиынтық дозасы - 1080 мг дейін), бұл жағдайда қосымша жағымсыз реакциялар байқалған жоқ.

- Қолданар алдында ерітіндіні қарап шығу керек. Күңгірттенген, қосындылары бар немесе түсі өзгерген ерітіндіні пайдалануға болмайды. - Сілкуге болмайды. - Инъекция орнында жайсыздықты сезінбеу үшін алдын ала толтырылған шприцтің бөлме температурасына дейін (25°C-ге дейін) жылуын күту керек және содан кейін препаратты баяу енгізу керек. - Алдын ала толтырылған шприцтің ішіндегісін толық енгізу керек. Бүкіл пайдаланылмаған дәрілік препаратты немесе оның қалдықтарын талаптарға сәйкес утилизациялау керек. Арнайы сақтандырулар Қадағалануы Биологиялық дәрілік препараттардың бақылануын жақсарту үшін қолданылатын препараттың атауы мен серия нөмірін дәл белгілеу қажет. Кальций және D дәруменін қосымша қабылдау Барлық пациенттер үшін кальций препараттарын және D дәруменін жеткілікті дозада қабылдау өте маңызды. Сақтық шаралары Гипокальциемия Гипокальциемияның өршу қаупі бар пациенттерді анықтап алу маңызды. Емді бастамас бұрын кальций препараттарын және D дәруменін тиісті дозада қабылдау арқылы гипокальциемияны түзетіп алу керек. Алғашқы доза енгізілгеннен кейін екі апта ішінде гипокальциемияның дамуына бейім пациенттерге препараттың әр дозасын енгізбес бұрын кальций концентрациясын бақылау ұсынылады. Емдеу курсы барысында гипокальциемия симптомдары пайда болса, қандағы кальций концентрациясын өлшеу қажет. Гипокальциемияның өршуін білдіретін симптомдар пайда болған жағдайда бұл туралы дәрігерге хабарлап отыру қажеттілігін пациенттерге ескерткен жөн. Тіркеуден кейінгі қадағалау жағдайларында ауыр (ауруханаға түсуге, өмірге қатерлі жай-күйлерге және өліммен аяқталуға алып келген) симптоматикалық гипокальциемияның дамуы туралы хабарламалар алынды. Көптеген жағдайлар ем басталған соң алғашқы бірнеше аптаның ішінде тіркелсе де, олар кешірек мерзімдерде де байқалды. Бірлескен глюкокортикоидты ем гипокальциемияның өршуінің қосымша қауіп факторы болып табылады. Бүйрек жеткіліксіздігі Бүйрек функциясының ауыр бұзылулары бар (креатинин клиренсі < 30 мл/мин) немесе диализдегі пациенттерде гипокальциемияның даму қауіпі жоғарырақ. Гипокальциемияның өршу қауіпі мен паратиреоидтық гормон деңгейінің қатарлас жоғарылау қаупі бүйрек жеткіліксіздігі ушыққан сайын арта түседі. Ауыр жағдайлар және өлімге әкеп соқтырған оқиғалар туралы хабарламалар алынды. Мұндай пациенттерге кальций препараттарының және D дәруменінің тиісті дозаларын тағайындау, сондай-ақ қандағы кальций концентрациясын тұрақты бақылап отыру аса маңызды. Тері инфекциялары Пролиа® препаратын қабылдап жүрген пациенттерде ауруханаға жатуды қажет ететін тері инфекциялары (көбінесе тері астындағы шелдің қабынуы) өршуі мүмкін. Пациенттерге тері астындағы шелдің қабыну симптомдары мен белгілері өршіген жағдайда медициналық жәрдем алуға дереу кірісу керектігі жөнінде нұсқау берген жөн. Жақ сүйегінің остеонекрозы (ЖОН) Остеопорозды емдеу үшін Пролиа® препаратын қабылдап жүрген пациенттерде ЖОН өршуінің сирек жағдайлары тіркелген. Ауыз қуысындағы жұмсақ тіндердің жазылмаған ашық жаралары бар пациенттерге емді бастауды немесе жаңа емдеу курсын кейінге қалдыру керек. Денозумабпен емді бастар алдында жанама қауіп факторлары бар пациенттер стоматологиялық тексеруден өтулері және барлық қажетті стоматологиялық алдын алу ем-шараларын жасауы керек, сонымен қатар денозумабпен емдеудің пайдасы мен қаупінің қатынасына жеке-жеке баға беру талап етіледі. Жеке бір пациенттегі ЖОН-ң өршу қаупіне баға беру үшін келесі қауіп факторларын ескеру қажет: • сүйек тінінің резорбциясын тежеу үшін тағайындалатын дәрілік препараттың белсенділігі (белсенділігі жоғары препараттарды қолданған жағдайда қауіп жоғарырақ), қолдану тәсілі (парентеральді енгізу жағдайында қауіп жоғарырақ) және резорбцияға қарсы емнің жиынтық дозасы; • қатерлі өскіндер, жанама аурулар (мысалы, анемия, коагулопатиялар, инфекциялар), шылым шегу; • жанама ем: кортикостероидтар, химиялық ем, ангиогенездік тежегіштер, бас пен мойын тұсына сәулелік ем; • ауыз қуысы гигиенасының жеткіліксіздігі, пародонт аурулары, тіс протездерінің үйлеспеуі, анамнезде стоматологиялық ауруларының, инвазивтік стоматологиялық емшаралардың (мысалы тіс жұлу) болуы. Денозумабпен емдеу барысында барлық пациенттер ауыз қуысының гигиенасын тиісінше сақтауы, ұдайы стоматологиялық тексеруден өтіп тұруы және тістердің босауы, ауыруы, ісінуі, шырышты қабықтың жазылмайтын зақымдануы немесе бөлінділердің бөлінуі сияқты ауыз қуысымен байланысты кез келген жағымсыз симптомдардың пайда болғаны туралы кідіртпей хабарлап отыруы тиіс. Ем барысында инвазивтік стоматологиялық емшараларды мұқият бағалаудан кейін ғана жүргізу керек және осы емшараларды денозумабты тура енгізер алдында немесе бірден енгізгеннен кейін жүргізу болмайды. ЖОН өршіген пациенттерге ем жүргізу жоспары емдеуші дәрігермен, стоматологпен немесе осы патологияны емдеуде тәжірибесі бар жақсүйек-бет хирургымен бірге әзірленуі тиіс. Бұл жағдай шешілгенше және барлық жағдайда қауіп факторлары мүмкіндігінше жойылғанша емді уақытша тоқтата тұру мүмкіндігін қарастыру керек. Сыртқы есту жолының остеонекрозы Денозумабты қолдану аясында сыртқы есту жолының остеонекрозы жөнінде мәлімдемелер алынды. Сыртқы есту жолы остеонекрозының болжамды өршу қауіпі факторларына стероидтар, химиотерапияны қолдану және/немесе инфекциялар немесе жарақат сияқты жергілікті қауіп факторлары жатады. Құлақтың созылмалы инфекцияларын қоса алғанда, құлақ ауруларының симптомдары бар денозумаб қабылдап жүрген пациенттер үшін сыртқы есту жолы остеонекрозының өршу қауіпін қарастыру керек. Ортан жіліктің атипиялық сынықтары Денозумаб қабылдап жүрген пациенттерде ортан жіліктің атипиялық сыну жағдайлары тіркелген. Ортан жіліктің атипиялық сынықтары шағын жарақаттар кезінде немесе жарақат болмаған кезде ортан жіліктің ұршық астындағы немесе диафизарлық проксимальді бөлігінде болуы мүмкін. Рентгенологиялық суреттерде бұндай сынықтардың өзіне тән белгілері болады. Ортан жіліктің атипиялық сынықтары белгілі бір жанама аурулары мен жәй-күйлері (мысалы, D дәруменінің тапшылығы, ревматоидты артрит, гипофосфатазия) бар пациенттерде және кейбір дәрілік препараттарды (мысалы, бисфосфонаттарды, глюкокортикоидтарды, протондық помпа тежегіштерін) қабылдаған пациенттерде де байқалды. Мұндай жағдайлар резорбцияға қарсы ем болмаған кезде де туындаған. Бисфосфонаттарды қабылдауға байланысты осыған ұқсас сынықтар көбінесе екіжақты болады, сондықтан денозумабпен ем қабылдап жүрген пациенттерде ортан жіліктің сынуы анықталған жағдайда ортан жіліктің қарама-қарсы жағын тексеру қажет. Ортан жіліктің атипиялық сынуына күдік туғанда пациент үшін пайда мен қауіп қатынасына жеке-жеке берілген бағалауды ескере отырып, денозумабпен емді тоқтату мәселесін қарастырған жөн. Денозумабпен емделген кезде ортан жіліктің айналасындағы, ортан жілік сүйектеріндегі немесе шаптың айналасындағы жаңа немесе әдеттен тыс ауыру жағдайлары туралы мәлімдеу қажеттігін пациенттерге алдын ала ескерту керек. Осындай симптомдары бар пациенттерді ортан жіліктің ішінара (жарықтар) сынуына қатысты тексеруден өткізу қажет. Резорбцияға қарсы ұзақ емдеу Резорбцияға қарсы ұзақ мерзімді ем (денозумабпен де, бисфосфонаттармен де) сүйектің қалпына келу процесінің айқын басылуы салдарынан жақ сүйегінің остеонекрозы және ортан жіліктің атипиялық сынуы сияқты асқынулардың өршу қауіпінің ұлғаюына жағдай жасауы мүмкін. Құрамында денозумаб бар басқа дәрілік препараттарды қатар қолдану Денозумабпен емделіп жүрген пациенттер құрамында денозумаб бар басқа дәрілік препараттарды қабылдамауы тиіс (сүйекке тараған ауқымды ісіктері бар ересек адамдардағы сүйек тіндері тарапынан асқынуларға жол бермеу үшін). Балалардағы гиперкальциемия Пролиа® препаратын балаларға (18 жасқа толмаған) қолдануға болмайды. Ауыр гиперкальциемия жағдайлары хабарланды. Клиникалық сынақтарда кейбір қатысушыларда асқыну ретінде бүйректің жедел зақымдануы болды. Қосымша заттарға қатысты арнайы нұсқаулар Бұл дәрілік препараттың құрамында 1 мл ерітіндіге 47 мг сорбитол (Е420) бар. Құрамында сорбитол (Е420) (немесе фруктоза) бар препараттарды қатар қабылдаудың аддитивті әсерін, сондай-ақ сорбитолдың (Е420) (немесе фруктозаның) тамақпен бірге түсуін ескеру қажет. Тұқым қуалайтын фруктоза жақпаушылығы бар пациенттерге бұл препаратты қабылдауға болмайды. Бұл препараттың 1 дозасының құрамында 1 ммольден азырақ натрий (23 мг) бар, яғни оны натрийсіз деп есептеуге болады. Үйлесімсіздік Үйлесімділігін зерттеу жөніндегі деректер болмағандықтан, бұл препаратты басқа дәрілік заттармен бірге қолдануға болмайды. Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері Пролиа® препараты көлік құралдарын және механизмдерді басқару қабілетіне әсер етпейді немесе мүлдем әсер етпейді деуге болады.

Жүктілік кезінде денозумабты қолдану жөніндегі деректер жоқ немесе шектеулі. Пролиа® препаратын жүкті және ұрпақ өрбітетін жастағы контрацептив пайдаланбайтын әйелдердің қабылдамағаны жөн. Әйелдерге Пролиа® препаратымен емдеудің барлық курсы бойына және емдеу аяқталғаннан кейін кемінде 5 ай бойы бала көтеруден сақтанған жөн. Пролиа® препаратының кез келген әсерінің жүктіліктің II-ші және III-ші триместрі кезінде айқынырақ болуы ықтимал, өйткені моноклональді антиденелер плацента арқылы өтіп, олардың өту дәрежесі жүктілік мерзімінің өсуіне қарай арта түседі, яғни антиденелердің ең жоғары мөлшері III-ші триместрде белгіленді. Денозумабтың емшек сүтімен бөлініп шығатыны, не шықпайтыны белгісіз. Бала емізуді тоқтату немесе Пролиа® препаратын қабылдамау туралы шешімді нәресте үшін емшек сүтінің пайдасы мен анасы үшін Пролиа® препаратымен емдеудің пайдасын ескере отырып, шешім қабылдау керек.

Дәрілік заттармен өзара әрекеттесу зерттеуінде денозумаб Р450 3А4 цитохромының CYP3A4 изоферментімен метаболизденетін мидазоламның фармакокинетикалық параметрлеріне әсер еткен жоқ. Бұл денозумабтың CYP3A4 қатысуымен метаболизденетін дәрілік заттардың фармакокинетикалық параметрлеріне әсер етпейтінін білдіреді. Денозумабты эстрогендермен алмастырғыш гормонды еммен бірге қолдану туралы клиникалық деректер жоқ, алайда бұндай фармакодинамикалық өзара әрекеттесу болжамы төмен болып саналады. Клиникалық зерттеу деректері бойынша остеопорозы бар постменопаузадағы әйелдерге басқа препаратқа (алендронаттан денозумабқа) ауысу кезінде алендронатпен жүргізілген алдыңғы ем денозумабтың фармакокинетикасы мен фармакодинамикасына әсер еткен жоқ.

Сақтау мерзімі 3 жыл. Жарамдылық мерзімі өткеннен кейін қолдануға болмайды! Сақтау шарттары 2 °C-ден 8 °C-ге дейінгі температурада сақтау керек. Мұздатып қатыруға болмайды. Алдын ала толтырылған шприцті жарықтан қорғау үшін түпнұсқалық қаптамасында сақтау керек.. Шайқауға болмайды. Тоңазытқыштан шығарып алған соң препаратты бөлме температурасында (25 °С-ден аспайтын) түпнұсқалық картон қорапшада 30 күннен асырмай сақтау керек. Препарат 30 күн ішінде пайдаланылуы тиіс. Балалардың қолы жетпейтін жерде сақтау керек!