Рабемак таблетки 10 мг

Бір таблетканың құрамында белсенді зат - 10 мг немесе 20 мг натрий рабепразолы, қосымша заттар: маннитол, орнын басуы төмен гидроксипропилцеллюлоза L-HPC LH-21, магнийдің ауыр тотығы, повидон (PVP K29/32), натрий гидроксиді, тальк, магний стеараты, қабықтың құрамы: этилцеллюлоза (Аквалон №7 Фарма), магнийдің ауыр тотығы, темірдің (III) сары тотығы (E 172) (20 мг доза үшін), темірдің (III) қызыл тотығы (E 172) (10 мг доза үшін), титанның қостотығы (Е 171), ішекте еритін қабықтың құрамы: метакрил қышқылының кополимері дисперсиясы (Эудрагит L30 D55), триэтилцитрат, тальк. Сыртқы түрінің, иісінің, дәмінің сипаттамасы Екі жақ беті дөңес, дөңгелек пішінді, екі жағы тегіс қызғылт түсті ішекте еритін қабықпен қапталған таблеткалар (10 мг доза үшін). Екі жақ беті дөңес, дөңгелек пішінді, екі жағы тегіс сары түсті ішекте еритін қабықпен қапталған таблеткалар (20 мг доза үшін).

• асқыну сатысындағы он екі елі ішектің ойық жара ауруы • асқыну сатысындағы асқазанның қатерсіз ойық жара ауруы • гастроэзофагеальді рефлюкстік аурудың (ГЭРА) симптоматикалық эрозиялық немесе ойық жаралы түрі • гастроэзофагеальді рефлюкстік ауруды ұзақ мерзімді демеуші емдеу (ГЭРА демеуші ем) • орташадан ауыр дәрежеге дейінгі гастроэзофагеальді рефлюкстік ауруды симптоматикалық емдеу (ГЭРА симптоматикалық ем) • Золлингер-Эллисон синдромы • тиісті бактерияға қарсы дәрілермен біріктірілімде асқазан мен он екі елі ішектің ойық жарасы бар пациенттерде Helicobacter pylori эрадикациясы.

Әсер ету механизмі Рабепразол антисекреторлық препараттар, орнын басатын бензимидазолдер класына жатады, олардың холинолитикалық немесе антигистаминдік қасиеттері жоқ, керісінше, олар Н+/К+-АТФ-аза ферментін (протонды сорғы) тежеу жолымен асқазан секрециясын бәсеңдетеді. Препараттың әсері дозаға байланысты және, стимуляциялаушы факторларға қарамай, асқазанда тұз қышқылының стимуляцияланған секрециясының басылуына әкеледі. Фармакодинамикалық әсерлер Препараттың әсері дозаға байланысты және ынталандырушы факторларға қарамастан асқазандағы тұз қышқылының базальды және ынталандырылған секрециясының тежелуіне әкеледі. Жануарларға жүргізілген зерттеулер көрсеткендей, рабепразол организмге енгізілгеннен кейін плазмадан да, асқазанның шырышты қабығынан да тез жоғалады. Әлсіз негіз бола отырып, натрий рабепразолы барлық дозаларда тез сіңеді және асқазанның париетальды жасушаларының қышқыл ортасында жиналады. Натрий рабепразолы протонизация арқылы белсенді сульфенамидті формаға айналады және салдарынан протонды сорғы цистеинінің қолжетімді молекулаларымен өзара әрекеттеседі. Клиникалық тиімділік және қауіпсіздік Антисекреторлық белсенділігі Ішке 20 мг рабепразолды қабылдағаннан кейін антисекреторлық әсері 1 сағат ішінде дами бастап, 2-4 сағаттан соң ең жоғары шегіне жетеді. Рабепразолдың алғашқы дозасын қабылдағаннан кейін 23 сағаттан соң тамақпен базальді және стимуляцияланған асқазандағы тұз қышқылы секрециясының басылуы, сәйкесінше, 69% және 82% құрайды, және 48 сағатқа дейін созылады. Рабепразолдың тұз қышқылының секрециясына қатысты тежегіш әсері дозаны қайталап қабылдаған кезде біршама артып, 3 күннен кейін тепе-тең жағдайға жетеді. Секреторлық белсенділігі дәрілік препаратты қабылдауды тоқтатқаннан кейін 2-3 күннен соң қалпына келе бастайды. Қан сарысуындағы гастрин деңгейіне әсері Пациенттер 10 немесе 20 мг рабепразол таблеткасын 5 жыл бойы тәулігіне бір рет қабылдаған кезінде емдеудің алғашқы 2-8 аптасында сарысудағы гастрин деңгейі өсті, бұл асқазан сөлі қышқылы секрециясының тежелгенін көрсетеді. Емдеуді жалғастырған кезде сарысудағы гастриннің орташа деңгейінің қосымша жоғарылауы байқалған жоқ. Бұл көрсеткіш емдеуді тоқтатқаннан кейін 1-2 аптадан соң қалыпты диапазонына оралды. Басқа да әсерлері Рабепразолдың ОЖЖ-ге, жүрек-қантамыр және тыныс алу жүйесіне қатысты жүйелік әсері күні бүгінге дейін білінген жоқ. 20 мг дозада 2 апта бойы қолданылған рабепразол қалқанша без функциясына, көмірсудың алмасуына және паратгормонның, кортизолдың, эстрогендердің, тестостеронның, пролактиннің, холецистокининнің, секретиннің, глюкагонның, фолликулстимуляциялайтын гормонның (ФСГ), лютеиндейтін гормонның (ЛГ), рениннің, альдостеронның немесе соматотропты гормонның қан сарысуындағы концентрацияларына ықпалын тигізген жоқ.

Дозалау режимі Ересектер/егде жастағы пациенттер Он екі елі ішектің ойық жарасы және асқыну сатысындағы асқазанның қатерсіз ойық жаралы ауруы Таңертең күніне 1 рет 20 мг ішке қабылдау ұсынылады. Асқыну сатысындағы он екі елі ішектің ойық жаралы ауруы болған кезде, пациенттердің көпшілігінде ойық жараның жазылуы 4 апта ішінде болады. Алайда, кейбір пациенттер ойық жараның толық жазылуына қол жеткізу үшін тағы 4 апта емдеуді қажет етуі мүмкін. Асқыну сатысында асқазанның қатерсіз ойық жаралы ауруы бар пациенттердің көпшілігінде жазылу 6 апта ішінде басталады. Алайда, пациенттердің аз мөлшеріне ойық жараның толық жазылуына қол жеткізу үшін тағы 6 апта емдеу қажет болуы мүмкін. Гастроэзофагеальді рефлюкс ауруының (ГЭРА) эрозиялық немесе ойық жаралы түрі Ұсынылатын дозасы - күніне 1 рет 20 мг, ішке. Емдеу ұзақтығы 4-8 аптаны құрайды. Гастроэзофагеальді рефлюкстік ауруды ұзақ мерзімді демеуші емдеу (ГЭРА демеуші ем) Ұсынылатын доза пациенттің емдеуге реакциясына байланысты күніне 1 рет 10 - 20 мг. Орташадан ауыр дәрежеге дейінгі гастроэзофагеальді рефлюкстік ауруды симптоматикалық емдеу (симптоматикалық ГЭРА) Эзофагиті жоқ ГЭРА бар пациенттерде ішке күніне 1 рет 10 мг қабылдау ұсынылады. 4 апта емдеуден кейін емге жауап болмаған жағдайда пациентке қосымша тексеру жүргізу қажет. Симптомдар басылғаннан кейін, олардың кейіннен туындауына жол бермеу үшін препаратты қажетіне қарай ішке күніне бір рет 10 мг дозада қабылдаған жөн. Золлингер-Эллисон синдромы Тағайындалған доза клиникалық көрініске байланысты. Ересектерге арналған Рабемак препаратының ұсынылатын бастапқы дозасы күніне 1 рет 60 мг құрайды. Дозаны пациенттің жеке қажеттіліктеріне байланысты тәулігіне 120 мг-ға дейін арттыруға болады. Дозаны күніне 1 рет 100 мг-ға дейін қабылдауға болады. 120 мг доза тағайындалған жағдайда оны 60 мг-ден екі қабылдауға бөлуге болады. Емдеу тиісті клиникалық көрсетілімдер болғанға дейін жүргізіледі. Helicobacter pylori эрадикациясы H. pylori бар пациенттерге эрадикациялық терапия жүргізу керек. Препараттардың келесі біріктірілімі 7 күндік курспен ұсынылады: Рабемак препараты күніне 2 рет 20 мг + кларитромицин 500 мг күніне 2 рет және амоксициллин 1 г күніне 2 рет. Емдеу ұзақтығы 7 күнді құрайды. Егер эрадикация сызбасы препаратты күніне бір рет қабылдауды қажет етсе, тәулік уақыты да, тамақ та натрий рабепразолының белсенділігіне ықпалын тигізбесе де, Рабемак препаратын таңертең, таңғы ас алдында қабылдау қажет. Препаратты қабылдаудың мұндай режимі емдеуді жақсартуға бейімділігін көрсетеді. Пациенттердің ерекше топтары Балалар Рабемак осы жас тобында қолдану тәжірибесінің болмауына байланысты балаларда қолдану үшін ұсынылмайды. Егде жастағы пациенттер Егде жастағы пациенттерге дозаны түзету қажет емес. Бүйрек және бауыр жеткіліксіздігі бар пациенттер Бүйрек жеткіліксіздігі бар пациенттерге дозаны түзету қажет емес. Бауырдың ауыр жеткіліксіздігі бар пациенттерді емдеу сақтықпен жүргізілуі тиіс. Енгізу әдісі мен жолы Ішке қабылдау үшін. Ішекте еритін қабықпен қапталған таблеткаларды шайнауға немесе ұсақтауға болмайды, оны тұтастай жұту қажет. Емдеу ұзақтығы Асқыну сатысындағы он екі елі ішектің ойық жаралы ауруы болған кезде, пациенттердің көпшілігінде ойық жараның жазылуы 4 апта ішінде болады. Алайда, кейбір пациенттер ойық жараның толық жазылуына қол жеткізу үшін тағы 4 апта емдеуді қажет етуі мүмкін. Асқыну сатысында асқазанның қатерсіз ойық жаралы ауруы бар пациенттердің көпшілігінде жазылу 6 апта ішінде басталады. Алайда, пациенттердің аз мөлшеріне ойық жараның толық жазылуына қол жеткізу үшін тағы 6 апта емдеу қажет болуы мүмкін. Гастроэзофагеальді рефлюкс ауруының (ГЭРА) эрозиялық немесе ойық жаралы түрін емдеу ұзақтығы 4 - 8 аптаны құрайды. Золлингер-Эллисон синдромының емі тиісті клиникалық көрсеткіштер болғанға дейін жүргізіледі. Helicobacter pylori эрадикациясын емдеу ұзақтығы 7 күн.

- натрий рабепразолына, орын басқан бензимидазолдарға немесе кез келген қосымша заттарға аса жоғары сезімталдық - жүктілік және бала емізу кезеңі

Жиі: - инфекциялар - ұйқысыздық, бас ауыру, бас айналу - жөтел, фарингит, ринит - диарея, құсу, жүректің айнуы, іштің ауыруы, іш қату, метеоризм - фундальді безді полиптер (қатерсіз) - спецификалық емес ауыру, арқаның ауыруы - астения, тұмау тәріздес синдром. Жиі емес: - күйгелектік, ұйқышылдық - бронхит, синусит - диспепсия, ауыздың кеберсуі, кекіру - бөртпе, эритема - миалгия, артралгия, аяқ бұлшықетінің құрысуы - ортан жіліктің, білезік сүйектерінің, омыртқа бағанының сынулары - несеп шығару жолдарының инфекциялары - қалтырау, қызба, кеуденің ауыруы - бауыр ферменттері деңгейінің жоғарылауы Сирек: - тромбоцитопения, нейтропения, лейкопения, лейкоцитоз - аса жоғары сезімталдық (беттің ісінуін, гипотензияны және диспноэны қоса) - анорексия, салмақтың артуы - депрессия - көрудің бұзылуы - гастрит, стоматит, дәмнің бұзылуы - гепатит, сарғаю, бауырлық энцефалопатия (бауыр циррозы бар пациенттерде байқалды) - қышыну, қатты тершеңдік, буллезді бөртпелер - интерстициальді нефрит - тубулоинтерстициальді нефрит (бүйрек жеткіліксіздігіне дейін ықтимал үдеумен) Өте сирек: - көп формалы эритема, уытты эпидермальді некролиз, Стивенс-Джонсон синдромы. Жиілігі белгісіз: - гипонатриемия, гипомагниемия - сананың шатасуы - шеткері ісіну - жүйелік қызыл жегінің баяу өрбитін терілік түрі - гинекомастия - микроскопиялық колит Эритема, буллезді бөртпелер және аса жоғары сезімталдық реакциялары әдетте емдеуді тоқтатқаннан кейін қайтады. Рабемак препаратымен емдеумен байланысты зертханалық көрсеткіштердің маңызды ауытқулары анықталған жоқ. Жағымсыз дәрілік реакциялар туындаған кезде медицина қызметкеріне, фармацевтика қызметкеріне немесе дәрілік препараттардың тиімсіздігі туралы хабарламаларды қоса алғанда, дәрілік препараттарға жағымсыз реакциялар (әсерлер) бойынша тікелей ақпараттық деректер базасына хабарласу керек Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК http:www.ndda.kz

Әдейі немесе байқамай артық дозалану жағдайларының шектеулі саны жөнінде мәлімделді. Қабылданған дозаның ең жоғары анықталған мөлшері тәулігіне 2 рет 60 мг-ден немесе тәулігіне бір рет 160 мг-ден асқан жоқ. Әсерлері барынша өте аз білінді, қандай да болсын медициналық араласымсыз өздігінен қайтқан жағымсыз реакциялардың белгілі бейініне сәйкес келді. Емі: спецификалық антидоты жоқ. Рабепразол плазма ақуыздарымен байланысуы жоғары деңгейде болады, сондықтан диализ арқылы жойылуы мүмкін емес. Артық дозаланған жағдайда симптоматикалық және демеуші ем жүргізу қажет. Дәрілік препаратты қолданар алдында қолдану әдісін түсіндіру үшін дәрігерге немесе фармацевтке хабарласыңыз.

Рабемак препаратымен емдеу кезіндегі оң симптоматика асқазанның немесе он екі елі ішек обырының қатерлі жаңа түзілімдерінің болуын жоққа шығармайды, сондықтан Рабемак препаратын қабылдау алдында жаңа түзілімдердің жоқ екеніне көз жеткізу керек. Препаратпен ұзақ уақыт (әсіресе бір жылдан астам) ем қабылдаған пациенттер ұдайы тексеруден өтіп тұруы тиіс. Протонды сорғының басқа тежегіштеріне немесе орнын басатын бензимидазоламдарға аса жоғары сезімталдықтың айқаспалы реакцияларының қаупін жоққа шығаруға болмайды. Пациенттерге Рабемак таблеткасын тұтастай жұту қажеттігін, оларды шайнауға немесе сындыруға және ұсақтауға болмайтындығын ескерту керек. Рабепразолды қабылдаған кезде бүйректің жедел қабынуы пайда болуы мүмкін, оның белгілері мен симптомдары несеп көлемінің төмендеуін немесе несептегі қанның пайда болуын және/немесе қызба, бөртпе және буындардың сіресуі сияқты аса жоғары сезімталдық реакцияларын қамтуы мүмкін. Егер сізде осындай симптомдар пайда болса, бұл туралы дәрігерге хабарлау қажет. Арнайы сақтандырулар Қан дискразиялары (тромбоцитопения және нейтропения жағдайлары) туындағаны жөнінде мәліметтер болды. Көптеген жағдайларда, осы жағдайлардың альтернативті себептерін анықтау мүмкін болмады, әдетте олар асқынулар туындатпады және рабепразол қолдануды тоқтатқаннан кейін басылды. Рабепразолды қолдану барысында бауыр ферменттері белсенділігінің өзгеру жағдайлары болды. Көптеген жағдайларда, осы жағдайлардың альтернативті себептерін анықтау мүмкін болмады, әдетте олар асқынулар туындатпады және рабепразол қолдануды тоқтатқаннан кейін басылды. Бауыр жеткіліксіздігінің жеңіл және орташа дәрежесі бар пациенттерде рабепразолды қабылдағаннан кейін қауіпсіздікке қатысты елеулі проблемалар анықталған жоқ. Бауыр функциясының ауыр бұзылулары бар пациенттерде рабепразолды қолдану туралы клиникалық деректер болмағандықтан, дәрігер мұндай пациенттерге Рабемак препаратын бірінші рет тағайындағанда абай болу керек. Гипомагниемия Клиникалық тұрғыдан айқын және симптомсыз гипомагниемия жағдайлары ең кемінде үш ай бойы ПСТ қабылдаған пациенттерде сирек мәлімделді, жиі – бір жыл емдеуден кейін. Гипомагниемия шаршау, тетания, делирий, құрысулар, бас айналу және қарыншалық аритмия сияқты ауыр жағымсыз құбылыстармен көрініс берді, бірақ айқын симптомдарсыз және байқалмай өтуі мүмкін. Көптеген пациенттерде гипомагниемияны емдеу орнын басу емін жүргізуді және ПСТ қабылдауды тоқтатуды қажет етті. ПСТ ұзақ уақыт немесе дигоксин сияқты кейбір дәрілік препараттармен немесе гипомагниемияны туындатуға қабілетті препараттармен (мысалы, диуретиктер) біріктіріп қабылдап жүрген пациенттерде ПСТ емдеуді бастағанға дейін, сондай-ақ емдеу кезінде ұдайы магний деңгейін бақылап отыру ұсынылады. Clostridium difficile Протонды сорғы тежегіштерімен емдеу Salmonella, Campilobacter және Clostridium difficile туындаған инфекциялар сияқты асқазан-ішектік инфекциялардың даму қаупін арттыруы мүмкін. Бүйрек жеткіліксіздігі Рабепразол қабылдаған пациенттерде жедел тубулоинтерстициальді нефрит (ЖТИН) байқалды, ол емдеудің кез келген кезеңінде рабепразолмен емдеу кезінде дамуы мүмкін. Жедел тубулоинтерстициальді нефрит бүйрек жеткіліксіздігіне дейін өршуі мүмкін. Егер жедел тубулоинтерстициальді нефритке күдік туындаса, рабепразолды қабылдауды дереу тоқтатып, тиісті емдеуді бастау керек. Сынулар ПСТ жоғары дозаларда және ұзақ уақыт (жыл бойы және одан көбірек) қолдану ортан жілік мойнының, білезік сүйектерінің немесе омыртқаның остеопороздық сынуларының даму қаупін, әсіресе егде жастағы пациенттерде 10-40%-ға арттыруы мүмкін. Ішінара бұл жоғарылау басқа қауіп факторларымен байланысты болуы мүмкін. Остеопороздың даму қаупі бар пациенттер іс жүзіндегі клиникалық нұсқауларға сәйкес емнен өтуі тиіс, олар D дәруменін және кальцийді қажетті мөлшерде алуы керек. Рабепразолды басқа дәрілік препараттармен қатар қолдану Метотрексатты жоғары дозада енгізген кезде кейбір пациенттерде Рабемак препаратын уақытша тоқтату туралы мәселе қарастырылуы мүмкін. Атазанавирді Рабемак препаратымен бір мезгілде қолдану ұсынылмайды. B12 дәруменінің сіңуіне ықпалы Рабемак препараты, гипо- немесе ахлоргидриямен байланысты, асқазанда тұз қышқылының секрециясын бөгейтін барлық дәрілік препараттар сияқты, B12 дәруменінің (цианокобаламин) сіңуін азайтуы мүмкін. Мұны ұзақ уақыт емдегенде немесе организмінде дәрумендер қоры төмендеген немесе B12 дәрумені сіңуінің төмендеу қаупінің факторлары бар пациенттерде тиісті клиникалық симптомдар пайда болғанда ескерген жөн. Жеделге жуық терінің қызыл жегісі (ЖЖТҚЖ) Протонды сорғы тежегіштері ЖЖТҚЖ дамуының өте сирек жағдайларын туындатуы мүмкін. Теріде (әсіресе ашық, күннен қорғалмаған жерлерде) өзгерулер пайда болғанда және егер олар сондай-ақ артралгиялармен қатар жүрсе, пациент Рабемак препаратын қабылдауды тоқтатуға қатысты мәселені шешу үшін дәрігерге дереу қаралуы тиіс. Протонды сорғы тежегіштерін қабылдаған кезде ЖЖТҚЖ симптомдарының пайда болуы осы топтың басқа препараттарын қабылдаған кезде ЖЖТҚЖ даму қаупін арттыруы мүмкін. Зертханалық зерттеу нәтижелеріне әсері ПСТ қолдану асқазан сөлінің қышқылдығының төмендеуіне әкеледі, бұл қан сарысуындағы хромогранин А (CgA) мөлшерінің артуына әкелуі мүмкін. Хромогранин А (CgA) жоғары деңгейі нейроэндокринді ісіктерді анықтау мақсатында диагностикалық тексеру жүргізу кезінде талдау нәтижелерін бұрмалауы мүмкін. Бұған жол бермеу үшін қан сарысуында хромогранин А деңгейін өлшеуге дейін кем дегенде бес күн бұрын ПСТ қолдануды тоқтату керек. Егер CgA және гастрин деңгейі бастапқы өлшемнен кейін қалыпты мәндерге оралмаса, хромогранин деңгейін анықтауды ПСТ қабылдау тоқтатылғаннан кейін 14 күннен кейін қайта жүргізу қажет. Балаларда қолдану Рабемакты балаларға тағайындау ұсынылмайды, өйткені препаратты осы жас тобына қолдану тәжірибесі жоқ. Жүктілік Жүктілік кезінде рабепразолды қолдану қауіпсіздігі бойынша деректер жоқ. Жүктілік кезінде Рабемак препаратын қолдануға болмайды. Бала емізу Әйелдердің емшек сүтіне натрий рабепразолының түсуі мүмкін екендігі анықталған жоқ, ал бала емізетін әйелдердің қатысуымен зерттеулер жүргізілмеді. Бала емізу кезеңінде препаратты қолдану қарсы көрсетілімде. Көлік құралын немесе қауіптілігі зор механизмдерді басқару қабілетіне препараттың ықпал ету ерекшеліктері Натрий рабепразолының фармакодинамикалық қасиеттері және оның жағымсыз әсерлерінің бейіні препараттың автокөлік жүргізу және қауіптілігі зор механизмдерді басқару қабілетіне әсер ету ықтималдығы аз екенін көрсетеді. Алайда, ұйқышылдық пайда болған жағдайда, осы қызмет түрлерінен аулақ болу керек.

Нұсқаулықта көрсетілмеген.

Асқазан сөлі қышқылының секрециясын тежеумен байланысты өзара әрекеттесулер Рабепразол асқазан сөлінің қышқылы секрециясының айқын және ұзақ бәсеңдетуші әсер етеді. Сіңірілуі рН деңгейіне тәуелді болатын дәрілік заттармен өзара әрекеттесуге түсуі мүмкін. Атап айтқанда, рабепразол кетоконазолдың ең төменгі деңгейінің 30%-ға төмендеуіне және дені сау адамдарда дигоксиннің тиісті көрсеткішінің 22% - ға жоғарылауына ықпал етеді, сондықтан рабепразолды дигоксинмен, кетоконазолмен немесе рН-ға тәуелді сіңірілетін басқа дәрілік препараттармен бір мезгілде қабылдайтын пациенттерге дозаны түзету үшін бақылау қажет болуы мүмкін. Атазанавирмен өзара әрекеттесулері Атазанавир 300 мг/ритонавир 100 мг және омепразол (күніне бір рет 40 мг-ден) немесе 400 мг атазанавирді лансопразолмен (күніне бір рет 60 мг-ден) бірге бір мезгілде қабылдаған дені сау еріктілерде атазанавирдің әсер ету деңгейінің едәуір төмендегені анықталды. Атазанавирдің сіңу деңгейі ортаның рН шамасына байланысты. Осы препараттарды рабепразолмен бір мезгілде қабылдау зерттелмесе де, протонды сорғының басқа тежегіштері үшін де ұқсас нәтижелерді жорамалдауға болды. Осыған байланысты атазанавирмен емдегенде рабепразолды қоса, ПСТ (протонды сорғы тежегіштері) қабылдауға болмайды. Антацидтермен өзара әрекеттесулері Антацидтерді рабепразолмен бір мезгілде қабылдағанда алюминий гидроксиді немесе магний гидроксиді гелімен клиникалық маңызды өзара әрекеттесулер анықталмады. Метотрексат ПСТ және метотрексатты бір мезгілде енгізу (ең алдымен жоғары дозада) қан сарысуындағы метотрексат және/немесе оның гидроксиметотрексат метаболитінің деңгейін жоғарылатып, олардың жартылай шығарылу кезеңін арттыруы мүмкін.

Сақтау мерзімі 2 жыл (пішінді ұяшықсыз қаптамада), 3 жыл (пішінді ұяшықты қаптамада). Жарамдылық мерзімі өткеннен кейін қолдануға болмайды. Сақтау шарттары Құрғақ, жарықтан қорғалған жерде 25 °C-ден аспайтын температурада сақтау керек. Балалардың қолы жетпейтін жерде сақтау керек!