Розулип® таблетки 10 мг

Бір таблетканың құрамында белсенді зат - 5 мг розувастатин (5,34 мг мырыш розувастатиніне баламалы), Бір таблетканың құрамында белсенді зат - 10 мг розувастатин (10,68 мг мырыш розувастатиніне баламалы), Бір таблетканың құрамында белсенді зат - 20 мг розувастатин (21,36 мг мырыш розувастатиніне баламалы), қосымша заттар: Лудипресс (лактоза моногидраты, повидон, кросповидон), кросповидон (ХL10), магний стеараты, Оpadry II ақ 85F 18422 (поливинил спирті, титанның қостотығы (Е 171), макрогол 3350, тальк). Сыртқы түрінің, иісінің, дәмінің сипаттамасы Розулип, қабықпен қапталған 5 мг таблеткалар: Ақ немесе ақ дерлік түсті, дөңгелек, аздап екі жағы дөңес, иіссіз немесе иіссіз дерлік, бір жағында Е әрпі және екінші жағында 591 нөмірі бедерленген, қабықпен қапталған таблеткалар. Розулип, қабықпен қапталған 10 мг таблеткалар: Ақ немесе ақ дерлік түсті, дөңгелек, аздап екі жағы дөңес, иіссіз немесе иіссіз дерлік, бір жағында Е әрпі және екінші жағында 592 нөмірі бедерленген, қабықпен қапталған таблеткалар. Розулип, қабықпен қапталған 20 мг таблеткалар: Ақ немесе ақ дерлік түсті, дөңгелек, аздап екі жағы дөңес, иіссіз немесе иіссіз дерлік, бір жағында Е әрпі және 593 нөмірі бедерленген, қабықпен қапталған таблеткалар.

Гиперхолестеринемия емінде - ересектерде, жасөспірімдерде, 6 жастан асқан және одан үлкен балаларда алғашқы гиперхолестеринемияда (отбасылық гетерозиготалы гиперхолестеринемияны қоса, ІІа типі) немесе аралас дислипидемияда (IIb типі) диета және басқа дәрі-дәрмектік емес емдеу әдістері (мысалы, дене жаттығулары, дене салмағын түсіру) жеткіліксіз болған кезде диетаға қосымша ретінде - ересектерде, жасөспірімдерде, 6 жастан асқан және одан үлкен балаларда отбасылық гомозиготалы гиперхолестеринемияда диетаға және липид төмендететін басқа да емге (мысалы, ТТЛП-аферез) қосымша ретінде немесе осындай ем пациентке сай келмеген жағдайларда Жүрек-қантамыр ауруларының профилактикасында - басқа қауіп факторларын түзетуге/емдеуге қосымша ретінде жүрек-қантамыр оқиғаларының туындау қаупі жоғары ересек пациенттерде жүрек-қантамыр асқынуларының профилактикасында.

Әсер ету механизмі Розувастатин 3-гидрокси-3-метилглутарилкоэнзим А-ны холестериннің ізашары - мевалонатқа айналдыратын фермент – ГМГ-КоА редуктазаның cелективті бәсекелес тежегіші болып табылады. Розувастатиннің негізгі әсер ету нысанасы бауыр болып табылады, онда холестерин (ХС) синтезі жүзеге асады. Розувастатин бауыр жасушаларының беткейінде ТТЛП-рецепторларының санын арттырып, тығыздығы төмен липопротеиндер (ТТЛП) қармалуы мен катаболизмін жақсартады, сондай-ақ ол ТӨТЛП синтезін тежеп, сол арқылы ТӨТЛП және ТТЛП жалпы санын азайтады. Фармакодинамикалық әсерлері Розулип ТТЛП-холестериннің (ТТЛП-ХС), жалпы холестериннің, триглицеридтердің (ТГ) жоғары мөлшерін азайтады, тығыздығы жоғары липопротеиндер холестерині (ТЖЛП-ХС) мөлшерін артады, сондай-ақ аполипопротеин В (АпоВ), ТЖЛП емес-ХС, ТӨТЛП-ХС, ТӨТЛП-ТГ мөлшерін төмендетеді және аполипопротеин А-І (АпоА-І) деңгейін арттырады, ТТЛП-ХС/ТЖЛП-ХС, жалпы ХС/ТЖЛП-ХС және ТЖЛП емес-ХС/ТЖЛП-ХС арақатынасын және АпoВ/АпoA-І арақатынасын төмендетеді. 3-кесте. Алғашқы гиперхолестеринемиясы (IIa және IIb типі) бар пациенттерде дозаға тәуелділік (бастапқы деңгейден түзетілген орташа пайыздық өзгеріс) Доза — Мөлшер — ТТЛП-ХС — Жалпы холестерин — ТЖЛП-ХС — Тригли-церид — ТЖЛП емес - ХС — АпоВ — АпоА-I Плацебо — 13 — –7 — –5 — 3 — –3 — –7 — –3 — 0 5 — 17 — –45 — –33 — 13 — –35 — –44 — –38 — 4 10 — 17 — –52 — –36 — 14 — –10 — –48 — –42 — 4 20 — 17 — –55 — –40 — 8 — –23 — –51 — –46 — 5 40 — 18 — –63 — –46 — 10 — –28 — –60 — –54 — 0 Емдік әсер Розулип препаратымен емді бастағаннан кейін бір апта ішінде пайда болады және 2 апта емдеуден кейін ең жоғары ықтимал әсердің 90%-на қол жеткізіледі. Ең жоғары емдік әсер, әдетте, 4-аптаға қарай туындайды және жүйелі түрде қабылдау кезінде сақталады. Клиникалық тиімділігі және қауіпсіздігі Розулип нәсіліне, жынысына немесе жасына байланыссыз гипертриглицеридемиясы бар немесе онсыз ересек пациенттерде және пациенттердің ерекше топтары, мысалы, қант диабетіне шалдыққан немесе отбасылық гиперхолестеринемиясы бар пациенттер үшін тиімді. Зерттеулердің III фазасының біріктірілген деректеріне сәйкес, Розулип препараты Атеросклерозды зерттеу жөніндегі еуропалық қоғамның (EAS; 1998) мақсатты бағдарлары болып табылатын IIa және IIb типті (ТТЛП-ХС орташа бастапқы мәні 4,8 ммоль/л жуық) гиперхолестеринемиясы бар пациенттердің көпшілігін емдегенде тиімділігін көрсетті. 10 мг дозасындағы препаратпен ем алған пациенттердің 80%-ға жуығы ТТЛП-ХС деңгейлері үшін (< 3 ммоль/л) EAS мақсатты көрсеткіштеріне жетті. Отбасылық гетерозиготалы гиперхолестеринемиясы бар 435 пациент қатысқан ірі зерттеуде пациенттер Розулип препаратын 20 мг-ден 80 мг-ге дейінгі дозада күшейтілген титрлеу режимінде қабылдаған. Барлық дозалар липидтердің параметрлеріне және мақсатты көрсеткіштерге жетуге арналған емге жағымды әсер ететінін көрсетті. Күн сайынғы 40 мг дозасына дейін (12 апта емдеу) титрлеуден кейін ТТЛП-ХС деңгейі 53%-ға төмендеді. Пациенттердің 33%-ы ТТЛП-ХС деңгейлері үшін (< 3 ммоль/л) EAS басшылығымен регламенттелетін көрсеткіштерге жетті. Күшейтілген титрлеумен ашық зерттеу аясында 42 пациентте (балалық жастағы 8 пациентті қоса) 20 мг-ден 40 мг-ге дейінгі дозадағы Розулип препаратына қайтарылған жауаптың бағалауы жүргізілген. Жалпы популяцияда ТТЛП-ХС деңгейінің орташа төмендеуі 22%-ды құрады. Пациенттердің шектеулі санына жүргізілген клиникалық зерттеулер барысында Розулип препараты фенофибратпен біріктірілімде пайдаланылған кезде триглициридтер деңгейін төмендетуде және ниацинмен біріктірілімде ТЖЛП-ХС деңгейлерін жоғарылатуда қосымша тиімділікті көрсетті. Мультиорталықты салыстырмалы жасырын плацебо-бақыланатын клиникалық зерттеуде (METEOR) жүректің ишемиялық ауруының даму қаупі төмен (Фрамингем қауіп шкаласы бойынша 10 жыл бойы < 10% анықталады), ТТЛП-ХС орташа деңгейі 4,0 ммоль/л (154,5 мг/дл), бірақ субклиникалық (күретамырдың интималық-медиалдық қабатының қалыңдығы бойынша анықталатын) атеросклерозы бар, 45-тен 70 жасқа дейінгі 984 пациент розувастатинді күніне бір рет 40 мг-ге дейінгі дозада қабылдайтын топқа және 2 жыл бойы плацебо қабылдайтын топқа рандомизацияланған. Розувастатин плацебомен салыстырғанда – 0,0145 мм/жыл (СА 95% – 0,0196, – 0,0093; Р < 0,0001) мәніне күретамырдың 12 аймағының интима-медиа кешені қалыңдығының барынша үдеу жылдамдығын айтарлықтай баяулатқан. Бастапқы деңгеймен салыстырғандағы өзгеріс плацебо тобындағы + 0,0131 мм/жыл (1,12%/жыл (p < 0,0001)) үдеуге қарағанда розувастатин тобында – 0,0014 мм/жыл (– 0,12%/жыл, бұл болмашы мән болып табылады) құрады. Қазіргі кезде интима-медиа кешені қалыңдығының азаюы мен жүрек-қантамыр ауруларының туындау қаупінің төмендеуі арасында тікелей өзара байланыс анықталған жоқ. METEOR зерттеуінің аясында зерттелетін популяция жүректің ишемиялық ауруымен ауыру қаупі төмен аймақта орналасқан және 40 мг дозасындағы Розулип препаратымен емдеу үшін мақсатты популяция болып табылмайды. 40 мг дозасы жүрек-қантамыр ауруларының қаупі жоғары болған кезде ауыр гиперхолестеринемиясы бар пациенттерге ғана тағайындалуы керек. Статиндерді бастапқы профилактикада пайдалануды негіздеу үшін розувастатин бағалауын интервенциялық зерттеу (JUPITER) аясында 17 802 ер (≥ 50 жас) мен әйелде (≥ 60 жас) атеросклероз аясында жүрек-қантамыр ауруларының негізгі құбылыстарының туындауына тигізетін розувастатин әсері бағаланды. Зерттеуге қатысушылар кездейсоқ ретпен плацебо қабылдайтын топқа (n = 8901) және күніне бір рет 20 мг розувастатин қабылдайтын топқа (n = 8901) бөлініп, бұл пациенттер топтарына орта есеппен 2 жыл бақылау жүргізілді. Плацебо қабылдайтын топпен салыстырғанда розувастатин қолданатын топта ТТЛП холестеринінің концентрациясы 45%-ға (p < 0,001) төмен болған. Жоғары қауіп пен Фрэмингем бойынша > 20% базалық қауіп көрсеткіші бар (1558 субъект) пациенттердің шағын тобын ретроспективтік талдауда плацебомен салыстырғанда розувастатинмен емдеген кезде жүрек-қантамыр ауруларынан, инсульттен және миокард инфарктісінен (р = 0,028) өлім-жітімнің біріктірілген соңғы нүктесіне жетудің айтарлықтай төмендегені көрсетілді. Қауіптің оқиғалар жиілігіне қатысты абсолютті төмендеуі 1000 пациент-жылға 8,8 құрады. Жалпы өлім-жітім осы жоғары қауіп тобында өзгеріссіз қалды (p = 0,193). Жоғары қауіп (барлығы 9302 пациент) пен SCORE шкаласы (өлімге әкелетін жүрек-қантамыр ауруларының қаупін 10 жыл бойы бағалау үшін әзірленген шкала) бойынша ≥ 5% базалық қауіп көрсеткіші бар (65 жастан асқан субъектілерді енгізу үшін кеңейтілген) пациенттердің шағын тобын ретроспективтік талдауда плацебомен салыстырғанда розувастатинмен емдеген кезде жүрек-қантамыр ауруларынан, инсульттен және миокард инфарктісінен (р = 0,0003) өлім-жітімнің біріктірілген соңғы нүктесінің айтарлықтай төмендегені көрсетілді. Қауіптің оқиғалар жиілігіне қатысты абсолютті төмендеуі 1000 пациент-жылға 5,1 құрады. Жалпы өлім-жітім осы жоғары қауіп тобында өзгеріссіз қалды (p = 0,076). JUPITER зерттеуінің аясында розувастатин қабылдайтын топтың 6,6% субъекті және плацебо қабылдайтын топтың 6,2% субъекті жағымсыз құбылыстардың дамуына байланысты емдеуді тоқтатты. Емдеуді тоқтатуға әкелген ең кең таралған жағымсыз құбылыстар мыналар болды: миалгия (розувастатин тобында 0,3%, плацебо тобында 0,2%), іштің ауыруы (розувастатин тобында 0,03%, плацебо тобында 0,02%) және бөртпе (розувастатин тобында 0,02%, плацебо тобында 0,03%). Саны жағынан плацебодан астам немесе оған тең, емдеуді тоқтатуға әкелген ең кең таралған жағымсыз құбылыстар мыналар болды: несеп шығару жолдарының инфекциялары (розувастатин тобында 8,7%, плацебо тобында 8,6%), ринофарингит (розувастатин тобында 7,6%, плацебо тобында 7,2%), арқаның ауыруы (розувастатин тобында 7,6%, плацебо тобында 6,9%) және миалгия (розувастатин тобында 7,6%, плацебо тобында 6,6%). Балалар Розувастатинді одан кейінгі 40 апталық (n = 173, 96 ер жынысты және 77 әйел жынысты) титрлеу фазасымен жалғасатын салыстырмалы жасырын рандомизацияланған көпорталықты плацебо-бақыланатын 12 апталық зерттеуде (n = 176, 97 ер жынысты және 79 әйел жынысты) отбасылық гетерозиготалы гиперхолестеринемиясы бар 10-нан 17 жасқа дейінгі (II–V Таннер шкаласы, әйел жынысы, алғашқы етеккір басталғаннан кейін 1 жылдан кем емес жастағы) пациенттер 5, 10 немесе 20 мг дозаларында розувастатин немесе 12 апта бойы күн сайын плацебо қабылдаған, одан кейін бәрі 40 апта бойы күн сайын розувастатин қабылдаған. Зерттеуге қосу сәтінде 30%-ға жуық пациенттің жас шамасы 10-нан 13 жасқа дейінгі аралықта болған және шамамен 17, 18, 40 және 25% тиісінше Таннердің II, III, IV және V шкаласына сәйкес келген. ТТЛП-ХС деңгейлері плацебо қабылдаған кездегі 0,7%-бен салыстырғанда 5, 10 және 20 мг дозаларындағы розувастатинді қабылдаған кезде тиісінше 38,3, 44,6 және 50,0%-ға төмендеген. Күніне бір рет 20 мг дозасына жету үшін 40 апталық ашық титрлеу аяқталған соң 173 пациенттің 70-сі (40,5%) 2,8 ммоль/л-ден кем ТТЛП-ХС деңгейіне жеткен. Зерттелетін препаратты 52 апта қабылдағаннан кейін оның бойға, салмаққа, дене массасының индексіне және жыныстық жетілуге ешқандай әсері анықталмаған. Бұл зерттеу (n = 176) сирек жағымсыз реакцияларды салыстыру үшін жарамады. Сонымен қатар розувастатин зерттеуі отбасылық гетерозиготалы гиперхолестеринемиясы бар, 6-дан 17 жасқа дейінгі (88 ер жынысты және 110 әйел жынысты пациент, Таннер бойынша сатысы < II–V) 198 бала қатысқан мақсатты көрсеткіштер таңдалғанша титрлеудің ашық 2 жылдық зерттеу аясында жүргізілген. Барлық пациенттер үшін розувастатиннің бастапқы дозасы 5 мг құраған. 6-дан 9 жасқа дейінгі пациенттер (n = 64) розувастатинді күніне бір рет 10 мг ең жоғары дозасына дейін, ал 10-нан 17 жасқа дейінгі пациенттер (n = 134) күніне бір рет 20 мг ең жоғары дозасына дейін қабылдай алды. Розувастатинмен 24 ай емдегеннен кейін ТТЛП-ХС концентрациясы төмендеуінің (ең аз квадраттар әдісімен (ЕАКӘ) алынған) орташа пайыздық мәні бастапқы мәнмен салыстырғанда 43%-ды құрады (бастапқы деңгей: 236 мг/дл, 24-ші ай: 133 мг/дл). Әр жастық топ үшін ТТЛП-ХС концентрациясы төмендеуінің (ЕАКӘ кезінде алынған) орташа пайыздық мәні бастапқы мәнмен салыстырғанда 43%-ды құрады (бастапқы деңгей: 234 мг/дл, 24-ші ай: 124 мг/дл), – 45% (бастапқы деңгей: 234 мг/дл, 24-ай: 124 мг/дл) және – 35% (бастапқы деңгей: 241 мг/дл, 24-ші ай: 153 мг/дл) тиісінше 6-дан 10 жасқа дейінгі, 10-нан 14 жасқа дейінгі және 14-тен 18 жасқа дейінгі жастық топтарда. 5, 10 және 20 мг дозасындағы розувастатин мынадай екіншілік липидтік және липопротеиндік өзгермелілер үшін де бастапқы деңгейден статистикалық тұрғыдан маңызды орташа өзгерістерге жеткен: ТЖЛП-ХС, жалпы холестерин, ТЖЛП емес-ХС, ТТЛП-ХС/ТТЛП-ХС, жалпы холестерин/ТЖЛП-ХС, жалпы триглицерид/ТЖЛП-ХС, ТЖЛП емес-ХС/ТЖЛП-ХС, АпоB, АпоB/Апо-I. Бұл өзгерістер липидтік реакцияларды жақсартуға бағытталған және 2 жыл бойы сақталған. Зерттелетін препаратты 24 ай қабылдағаннан кейін оның бойға, салмаққа, дене массасының индексіне және жыныстық жетілуге әсері анықталмаған. Рандомизацияланған, салыстырмалы жасырын, мультиорталықты айқаспалы плацебо-бақыланатын зерттеу аясында отбасылық гомозиготалы гиперхолестеринемияға шалдыққан 14 бала мен жасөспірімнің қатысуымен (6-дан 17 жасқа дейінгі) плацебомен салыстырғандағы күніне бір рет 20 мг дозасындағы розувастатин сынағы жүргізілді. Зерттеу пациенттер 10 мг дозасында розувастатин қабылдаған диетаның белсенді 4 апталық кіріспе фазасын, оған дейінгі немесе одан кейінгі 6 апталық плацебо қабылдау кезеңімен 20 мг дозасында розувастатинмен емдеудің 6 апталық кезеңінен тұратын айқаспалы фазаны, барлық пациенттер 20 мг-ден розувастатин қабылдаған 12 апталық демеуші сатыны қамтыған. Эзетимибпен немесе аферезбен емдеу зерттеуіне енгізілген пациенттер бүкіл зерттеу бойы розувастатин зерттеуіне қатысуды жалғастырды. Плацебомен салыстырғанда 20 мг дозасындағы розувастатинмен 6 апта емдегеннен кейін ТТЛП-ХС деңгейінің статистикалық тұрғыдан маңызды (р = 0,005) төмендеуі (22,3%, 85,4 мг/дл немесе 2,2 ммоль/л) байқалған. Сондай-ақ жалпы холестерин (20,1%, p = 0,003), ТЖЛП емес-ХС (22,9%, p = 0,003) және АпоB (17,1%, p =0,024) деңгейлерінің статистикалық тұрғыдан маңызды төмендеуі байқалған. Сонымен қатар плацебомен салыстырғанда 20 мг дозасындағы розувастатинмен 6 апта емдегеннен кейін тетраглициридтер, ТТЛП-ХС/ТЖЛП-ХС, жалпы холестерин/ТЖЛП-ХС, ТЖЛП емес-ХС/ТЖЛП-ХС және АпоB/АпоA-I деңгейлерінің төмендеуі байқалған. 20 мг дозасындағы розувастатинмен 6 апта емдегеннен кейін және плацебомен 6 апта емдегеннен кейін ТТЛП-ХС деңгейінің төмендеуі үздіксіз емнің 12 аптасы бойы сақталған. Бір пациентте дозаны арттырған соң 40 мг дозасымен 6 апта емдегеннен кейін ТТЛП-ХС (8,0%), жалпы холестерин (6,7%) және ТЖЛП-ХС (7,4%) деңгейлерінің одан әрі төмендеуі байқалған. Осы пациенттердің ішінде 90 апта бойы 20 мг розувастатинмен ем алған 9 пациентте кеңейтілген ашық емдеу кезінде ТТЛП-х деңгейінің төмендеуі –12,1%-дан –21,3%-ға дейінгі диапазонда сақталған. Күшейтілген титрлеумен ашық зерттеуге қатысқан, отбасылық гомозиготалы гиперхолестеринемияға шалдыққан бағаланатын 7 бала мен жасөспірімде (8-ден 17 жасқа дейінгі) ТТЛП-ХС (21,0%), жалпы холестерин (19,2%) және ТЖЛП емес-ХС (21,0%) деңгейінің бастапқы деңгейден төмендеу пайызы 20 мг дозасындағы розувастатинмен 6 апта емдегеннен кейін жоғарыда аталған зерттеуде отбасылық гомозиготалы гиперхолестеринемиясы бар балалар мен жасөспірімдерде бақыланатын мәндерге сәйкес келген. Еуропаның дәрілік заттар жөніндегі агенттігі отбасылық гомозиготалы гиперхолестеринемияны, алғашқы біріктірілген (аралас) дислипидемияны емдеген кезде және жүрек-қантамыр ауруларының профилактикасы кезінде балалық жастағы пациенттердің барлық шағын топтарына розувастатинмен жүргізілген зерттеулердің нәтижелерін ұсынудан бас тартты.

Розулип препаратымен емдеу басталғанға дейін және ем кезінде пациент стандартты гиполипидемиялық диетаны ұстануы тиіс. Дозалау режимі Препарат дозасы ем мақсаттарына және емдеуге берілетін жауапқа қарай әркімге жеке таңдалуы тиіс. Гиперхолестеринемияны емдеу Препарат қабылдай бастаған пациенттер үшін немесе ГМГ-КоА редуктазаның басқа тежегіштерін қабылдаудан көшірілген пациенттер үшін Розулип препаратының ұсынылатын бастапқы дозасы тәулігіне 1 рет 5 немесе 10 мг-ны құрауы тиіс. Бастапқы дозаны таңдағанда холестерин мөлшерінің деңгейін басшылыққа және жүрек-қантамырлық асқынулардың болжамды қаупін назарға алып, сонымен қатар жағымсыз әсерлердің потенциалды даму қаупін бағалау қажет. Қажет болған жағдайда дозаны препаратты 4 апта қабылдағаннан кейін арттыруға болады. Препарат дозасын біртіндеп арттыру керек. 40 мг дозасын қабылдаған кезде жағымсыз әсерлердің дамуы мүмкін екеніне орай, дозаны ең жоғары 40 мг-ге дейін арттыру тек гиперхолестеринемиясы ауыр және жүрек-қантамырлық асқынулар қаупі жоғары (әсіресе, отбасылық гиперхолестеринемиясы бар пациенттерде), 20 мг дозасын қабылдағанда қалаулы емдік нәтижеге жетпеген пациенттерге ғана қарастыруға болады. Препаратты 40 мг дозасында алатын пациенттерді бақылау ұсынылады. Жүрек-қантамыр ауруының даму қаупі жоғары ересек пациенттерде қосымша ем ретінде жүрек-қантамырлық асқынулардың профилактикасы Ұсынылатын доза - тәулігіне бір рет 20 мг. Бұрын препаратты қабылдамаған пациенттерге 40 мг дозаны тағайындау ұсынылмайды. 2-4 апталық емнен кейін және/немесе Розулип дозасын арттырғанда липидтік алмасу көрсеткіштерін бақылау қажет (қажет болса, дозаны түзету талап етіледі). Пациенттердің ерекше топтары Бала жасындағы пациенттер Балаларда тек дәрігердің бақылауымен қолдануға болады. 6 жастан 17 жасқа дейінгі балалар мен жасөспірімдер (Таннер шкаласы < II–V) Отбасылық гетерозиготалы гиперхолестеринемия Отбасылық гетерозиготалы гиперхолестеринемиясы бар балалар мен жасөспірімдер үшін стандартты бастапқы доза 5 мг-ны құрайды. - 6 жастан 9 жасқа дейінгі, отбасылық гетерозиготалы гиперхолестеринемиясы бар балаларда стандартты доза ішке күніне бір рет 5–10 мг-ны құрайды. 10 мг-ден астам дозалардың тиімділігі мен қауіпсіздігі пациенттердің бұл тобында зерттелген жоқ. - 10 жастан 17 жасқа дейінгі, отбасылық гетерозиготалы гиперхолестеринемиясы бар балаларда стандартты доза ішке күніне бір рет 5–20 мг-ны құрайды. 20 мг-ден астам дозалардың тиімділігі мен қауіпсіздігі пациенттердің бұл тобында зерттелген жоқ. Титрлеуді емдеу жөніндегі ұсыныстарға сәйкес бала жасындағы пациенттердің емге қайтарылатын жеке жауабына және көтеру қабілетіне қарай жүргізу керек. Балалар мен жасөспірімдер розувастатинді қабылдай бастағанға дейін және емдеу кезінде стандартты гипохолестеринемиялық диетаны ұстануы тиіс. Отбасылық гомозиготалы гиперхолестеринемия 6 жастан 17 жасқа дейінгі, отбасылық гомозиготалы гиперхолестеринемиясы бар балалар мен жасөспірімдер үшін ұсынылған ең жоғары доза ішке күніне бір рет 20 мг-ны құрайды. Ұсынылған бастапқы доза жас шамасына, дене салмағына және бұның алдында статиндерді қабылдауына қарай күніне бір рет 5–10 мг-ды құрайды. Күніне бір рет ең жоғары 20 мг дозасына дейін титрлеуді емдеуге қайтарылатын жеке жауапқа және балалық жастағы пациенттердің көтеру қабілетіне сәйкес жүргізу керек. Балалар мен жасөспірімдер розувастатинді қабылдай бастағанға дейін және розувастатинмен ем кезінде стандартты гипохолестеринемиялық диета ұстануы тиіс. Розувастатиннің 20 мг-ден басқа дозаларын қолдану тәжірибесі осы популяцияда шектеулі. 6 жасқа толмаған балалар 6 жасқа толмаған балаларда қауіпсіздігі мен тиімділігіне зерттеу жүргізілген жоқ, осыған орай, Розулип препараты 6 жасқа толмаған балаларда қабылдауға ұсынылмайды. Егде жастағы пациенттер Дозаны түзету қажет емес. 70 жастан асқан пациенттерге препараттың бастапқы дозасы 5 мг ұсынылады. Бүйрек жеткіліксіздігі бар пациенттер Ауырлығы жеңіл немесе орташа дәрежелі бүйрек жеткіліксіздігі бар пациенттерде дозаны реттеу қажет емес, препараттың бастапқы ұсынылатын дозасы – 5 мг. Бүйрек функциясы орташа бұзылған пациенттерге (креатинин клиренсі 60 мл/мин аз) препараттың 40 мг дозасын қолдануға болмайды. Бүйрек функциясының жеткіліксіздігі айқын пациенттерге (креатинин клиренсі 30 мл/мин аз) Розулип препаратын қолдануға болмайды. Бауыр жеткіліксіздігі бар пациенттер Чайльд-Пью шкаласы бойынша 7 баллдан жоғары субъектілерде розувастатиннің жүйелік әсері байқалған жоқ. Алайда Чайльд-Пью шкаласы бойынша 8 және 9 баллдан жоғары субъектілерде жоғары жүйелік әсері байқалған. Пациенттердің осы тобы үшін бүйрек функциясының бағалауы жүргізілуі керек. Чайльд-Пью шкаласы бойынша 9 баллдан жоғары пациенттерде препаратты қолдану тәжірибесі жоқ. Розулип препаратының белсенді сатыдағы бауыр ауруы бар пациенттерге қарсы көрсетілімі бар. Ерекше популяциялар. Этникалық топтар Жоғары жүйелік әсер азиялық нәсілді пациенттерде байқалған. Азиялық нәсілді пациенттерге ұсынылатын бастапқы дозасы 5 мг-ны құрайды. 40 мг дозасының осы пациенттер тобына қарсы көрсетілімі бар. Генетикалық полиморфизмдер SLCO1B1 (OATP1B1) c.521CC және ABCG2 c.421AA генотиптері бар пациенттер, SLCO1B1 c.521TT және ABCG2 c.421CC-пен салыстырғанда, розувастатин (СКМ) әсерінің артуымен байланысты болады. Генотиптері c.521CC немесе c.421AA пациенттерге Розулип препаратын ең төмен күнделікті дозада күніне 1 рет қабылдау ұсынылады. Миопатияға бейім пациенттер Миопатияның дамуына бейім факторлары бар пациенттерге препаратты 40 мг дозада тағайындаудың қарсы көрсетілімі бар. Осы топ пациенттеріне ұсынылатын бастапқы доза 5 мг-ны құрайды. Қатарлас емдеу Розувастатин түрлі тасымалдағыш ақуыздардың (мысалы, OATP1B1 және BCRP) субстраты болып табылады. Миопатияның (рабдомиолизді қоса) даму қаупі Розулип препаратын тасымалдағыш ақуыздармен өзара әрекеттесу салдарынан қан плазмасындағы розувастатин мөлшерін арттыра алатын дәрілік препараттармен (солардың ішінде циклоспорин және протеаза тежегіштері, ритонавир мен атазанавир, лопинавир және/немесе типанавир біріктірілімдерін қоса) бірге қабылдаған кезде жоғарылайды. Мүмкіндігінше, балама препараттарды қолдануды немесе Розулип препаратымен емді уақытша тоқтатуды қарастырған жөн. Осы дәрілік препараттарды Розулип препаратымен бірге қабылдау сөзсіз орындалуға тиіс болса, осылай бірге емдеудің пайдасы мен қаупін және дозаның түзетілуін тиянақты бағалау қажет. Енгізу әдісі мен жолы Ішке, таблетканы шайнамай және ұсақтамай, сумен ішіп, бүтіндей жұту керек. Ас ішуге байланыссыз тағайындала береді.

- розувастатинге немесе препарат компоненттерінің кез келгеніне жоғары сезімталдық - трансаминазалардың сарысулық белсенділігінің тұрақты жоғарылауын және қан сарысуындағы трансаминазалар белсенділігінің кез келген жоғарылауын қоса, бауырдың белсенді фазадағы аурулары (жоғарғы қалып шегімен салыстырғанда 3 еседен көп) - бүйрек функциясының айқын бұзылулары (креатинин клиренсі 30 мл/мин аз) - миопатиялар - софосбувирді/велпатасвирді/воксилапревирді бір мезгілде қабылдау - циклоспоринді бір мезгілде қабылдау - контрацепцияның талапқа сай әдістерінің болмауы кезінде жүктілік және бала емізу кезеңі - тұқым қуалайтын галактоза көтере алмаушылығы, Lapp (Lapp)-лактаза ферментінің тапшылығы, глюкоза-галактоза мальабсорбциясы бар адамдарда - 6 жасқа дейінгі балалар мен жасөспірімдер 40 мг дозасы үшін: келесідегідей миопатияның және рабдомиолиздің дамуына бейімділік факторлары бар адамдарға қарсы көрсетілген - ауырлығы орташа дәрежелі бүйрек жеткіліксіздігі (креатинин клиренсі 60 мл/мин аз) - гипотиреоз - анамнезінде бұлшықет аурулары, бұлышқеттің туа біткен бұзылыстарына жеке немесе генетикалық бейімділік - анамнезінде ГМГ-КоА-редуктазаның басқа тежегіштерін немесе фибраттар қабылдау аясындағы миоуыттылық - розувастатиннің плазмалық концентрациясының артуына алып келетін жай-күйлер - фибраттарды бір мезгілде қабылдау - азиялық нәсілдегі пациенттер - алкогольді шамадан тыс тұтыну - 17 жасқа дейінгі балалар мен жасөспірімдер.

Розулип препаратын қабылдаған кезде туындайтын жағымсыз құбылыстар жалпы жеңіл және уақытша сипатқа ие болады. Жиі - бас ауыру, бас айналу - іш қату, жүрек айну, іштің ауыруы - миалгия - астениялық синдром - қант диабеті Жиі емес - қышыну, бөртпе, есекжем Сирек - тромбоцитопения - ангионевроздық ісінуді қоса алғанда, жоғары сезімталдық реакциялары - миопатия (миозитті қоса алғанда), рабдомиолиз, жегі тәрізді синдром, бұлшықеттердің жыртылуы - бауыр трансаминазалары деңгейінің жоғарылауы, панкреатит Өте сирек - сарғаю, гепатит - полинейропатия - есте сақтау қабілетінің жоғалуы - гематурия - гинекомастия - артралгия Жекеленген жағдайлар - өкпенің интерстициальді аурулары Анықталмаған жиілікте - депрессия - шеткері полинейропатия - ұйқының бұзылысы (ұйқысыздық пен қорқынышты түстерді көруді қоса) - жөтел, ентігу - диарея - иммунитетке байланысты некрозданатын миопатия - Стивенс-Джонсон синдромы, эозинофилиямен және жүйелік белгілерімен дәрілік реакциялар - жыныстық дисфункция - кейде үзілумен асқынған байлам аппараты тарапынан бұзылулар, иммунитетке байланысты некроздық миопатия - шеткергі ісінулер - миастения гравис (жалпы бұлшықеттің әлсіздігін туындататын ауру, кейбір жағдайларда тыныс алу бұлшықеттерінің). - миастенияның көздегі түрі (көз бұлшықеттерінің әлсіздігін туындататын ауру). Егер сіз белсенді жұмыс істегеннен кейін қолыңыздың немесе аяғыңыздың күшейетін әлсіреуін сезінсеңіз, көзіңізге қос көрінсе немесе қабақтарыңыз төмен түссе, жұтыну қиындаса немесе ентігу болса, дәрігерге қаралуыңыз қажет. Розулип қабылдаған пациенттерде протеинурия анықталуы мүмкін. Көптеген жағдайларда протеинурия емдеу процесінде азаяды немесе жоғалып кетеді және бүйректің жедел ауруының туындауын немесе үдеуін білдірмейді. ГМГ-КоА-редуктазаның басқа тежегіштерін қолдану кезіндегідей, жағымсыз әсерлердің туындау жиілігі дозаға тәуелді сипатта болады. Жағымсыз дәрілік реакциялар туындағанда медициналық қызметкерге, фармацевтикалық қызметкерге немесе, дәрілік препараттардың тиімсіздігі туралы хабарламаларды қоса, дәрілік препараттарға болатын жағымсыз реакциялар (әсерлер) жөніндегі ақпараттық деректер базасына тікелей хабарласу керек Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz Қосымша деректер

Розулип қабылдайтын пациенттерде жағымсыз әсерлердің неғұрлым айқын симптомдары байқалуы мүмкін. Емі: препаратпен артық дозалану жағдайында спецификалық емі жоқ. Артық дозаланғанға күдік туындаған жағдайда симптоматикалық емдеуді және демеу ісшараларын бастау керек. Бауыр функциясын және КФК деңгейін бақылау қажет. Гемодиализдің тиімді болу ықтималдығы аз.

Препаратты дәрігердің тағайындауы бойынша қабылдайды. Препаратты тағайындар алдында және препаратпен емдеу кезеңінде дәрігерге келесі жағдайларда хабарлау керек: - бүйрек функциясының бұзылуы - бауыр функциясының бұзылуы - қалқаншабез функциясының бұзылуы - анамнезінде холестерин деңгейін төмендету үшін басқа дәрілік препараттарды қабылдау кезінде бұлшықеттің қайталанатын немесе түсініксіз ауырулары - бұлшықеттің тұрақты әлсіздігі - бұрын Розулип препаратын немесе басқа да ұқсас дәрілік препараттарды қабылдағаннан кейін тері бөртпесі, терінің қабыршықтануы, ауызда күлдіреулердің және / немесе ойық жаралардың пайда болуы секілді реакциялардың болуы - 70-тен жоғары жасты - тыныс алудың бұзылуы (декомпенсацияланған тыныс алу жеткіліксіздігі) - азиялық нәсілді пациент - алкогольді шамадан тыс тұтыну - циклоспорин, эритромицин қабылдау - варфарин, клопидогрел немесе кез-келген басқа антикоагулянтты қабылдау - фибраттар тобындағы дәрілік препараттарды (мысалы, гемфиброзил, фенофибрат) немесе қандағы холестеринді төмендету үшін қолданылатын кез келген басқа препаратты қабылдау (мысалы, эзетимиб) - АИТВ инфекциясын немесе С гепатитін емдеу үшін дәрілік препараттарды бөлек немесе біріктіріп қабылдау (мысалы, ритонавир, лопинавир, атазанавир, софосбувир, воксилапревир, омбитасвир, паритапревир, дасабувир, велпатасвир, гразавир, элбасвир, глекапревир, пибрентасвир) - фузид қышқылы препараттарын соңғы 7 күн ішінде қабылдау - оральді контрацептивтерді қабылдау - регорафениб немесе даролутамидті қабылдау - ағымдағы гормондарды алмастыратын ем Арнайы сақтандырулар Бүйрек функциясына әсері Тест-жолақтар арқылы анықталатын протеинурия, көбінесе тубулярлық протеинурия Розулип препаратының жоғары дозаларын, атап айтқанда, 40 мг дозасын қабылдаған пациенттерде байқалған, алайда көп жағдайда ол уақытша немесе өткінші сипатқа ие болған. Протеинурия бүйректің жедел немесе үдемелі ауруының болжамалы факторы болып табылмайды. Тіркеуден кейінгі кезеңде бүйректің ауыр ауруы оқиғаларының коэффициенті 40 мг-ге тең дозаны қолданған кезде жоғары болады. Препараттың 40 мг дозасын қабылдайтын пациенттерде бүйрек функциясын бағалау қажет. Қаңқа бұлшықеттеріне әсері Розулип препаратымен барлық дозада, әсіресе, > 20 мг дозада ем алған пациенттерде қаңқа бұлшықеттеріне әсері, соның ішінде миалгия, миопатия (миозитті қоса) және сирек жағдайда бүйрек функциясының жедел жеткіліксіздігімен немесе онсыз байқалатын рабдомиолиз туралы хабарланған. Эзетимибті ГМГ–КоА – редуктазаның тежегіштерімен біріктірілімде қабылдаған кезде өте сирек туындайтын рабдомиолиз оқиғалары туралы хабарламалар бар. Осы препараттар топтарының фармакодинамикалық өзара әрекеттесуін ескере отырып, оларды бірге пайдаланғанда ерекше көңіл бөлген жөн. ГМГ–КоА – редуктазаның басқа тежегіштерін қолдану кезіндегідей, тіркеуден кейінгі кезеңде Розулип препаратын қабылдау аясындағы рабдомиолиз оқиғаларының коэффиценті 40 мг-ге тең дозаны қолданған кезде жоғары болады. Розулип препаратын қабылдауды бастамас бұрын нені білу керек Розулип препаратын қабылдамас бұрын өзіңіздің дәрігеріңізбен сөйлесіңіз Егер сізде миастения немесе анамнезде миастения жағдайлары болса (бұлшықеттің жалпы әлсіздігімен білінетін аурулар, соның ішінде кейбір жағдайларда тыныс алу бұлшықеттері) немесе көз миастениясы (көз бұлшықеттерінің әлсіздігі) болса, статиндерді қабылдау кейде жағдайды нашарлатуы немесе миастенияға әкелуі мүмкін. Креатининкиназаны анықтау Қарқынды дене жүктемелерінен кейін немесе алынған нәтижелерді дұрыс емес талдауға әкеле алатын КК жоғарылауының басқа ықтимал себептері бар болған кезде КК өлшемеген жөн. Егер 5–7 күннен кейін КК бастапқы деңгейі айтарлықтай жоғары болса (жоғарғы қалып шегінен 5 есе жоғары), қайта өлшеуді жүргізген жөн. Егер қайталама тест КК бастапқы деңгейін (жоғарғы қалып шегімен салыстырғанда 5 еседен астам жоғары) растаса, емді бастамаған жөн. Розулип препаратын, ГМГ–КоА – редуктазаның басқа тежегіштері секілді, миопатияға/рабдомиолизге бейім пациенттерге сақтықпен тағайындау керек. Бейімдеуші факторлар бүйрек функциясының бұзылуы, гипотиреоз, бұлшықеттің туа біткен бұзылыстарына жеке немесе генетикалық бейімділік, анамнезіндегі ГМГ–КоА – редуктазаның басқа тежегіштерін немесе фибраттарды пайдаланған кездегі бұлшықеттік уыттылық, алкогольді қабылдау, > 70 жас шамасы, розувастатин плазмалық концентрациясының артуын туындататын жай-күйлер, фибраттардың қатар қолданылуы болып табылады. Бұндай пациенттерде препаратпен емді пайдасы мен қаупін бағалау негізінде қарастыру керек, клиникалық мониторинг жүргізу ұсынылады. Егер КК мәндері бастапқы деңгейде жоғарғы қалып шегінен 5 есе жоғары болса, емдеуді бастамаған жөн. Бұлшықеттердің ауыруы, бұлшықет әлсіздігі немесе түйілуі, әсіресе, дімкәстікпен және қызбамен бірге кенет туындаған жағдайда дереу дәрігерге жүгіну қажет екенін пациентке хабарлау керек. Бұндай пациенттерде КК деңгейінің мониторингін жүргізу керек. Егер КК деңгейі айтарлықтай (жоғарғы қалып шегімен салыстырғанда 5 еседен астам) жоғарыласа немесе бұлшықеттер тарапынан симптомдар айқын білінсе және күнделікті жайсыздық тудырса (тіпті, КФК деңгейі жоғарғы қалып шегімен салыстырғанда 5 есе аз болса да), ем тоқтатылуы тиіс. Егер симптомдар кетіп, КК деңгейі қалпына келсе, Розулип препаратын немесе ГМГ-КоА-редуктазаның басқа тежегіштерін аздау дозаларда және пациентті мұқият бақылағанда қайта тағайындау мәселесін қарастырған жөн. Симптомдар болмаған кезде дағдылы КК бақылауы мақсатқа сай келмейді. Емделу кезінде немесе статиндер, соның ішінде розувастатин қабылдауды тоқтатқанда қан сарысуында КК деңгейінің жоғарылауы және проксимальді бұлшықеттердің тұрақты әлсіздігі түрінде клиникалық көрініс беретін иммунитетке байланысты некроздаушы миопатияның өте сирек оқиғалары болған. Бұлшықет және жүйке жүйелеріне қосымша зерттеулер, серологиялық зерттеулер жүргізу, сондай-ақ иммунодепрессиялық дәрілермен емдеу қажет болуы мүмкін. Розулип препаратын қабылдау және қатарлас ем кезінде қаңқа бұлшықеттеріне әсердің арту белгілері байқалмаған. Алайда ГМГ-КоА-редуктазаның басқа тежегіштерін гемфиброзил, циклоспорин, никотин қышқылы, зеңге қарсы азолды дәрілер, протеаза тежегіштері және макролидті антибиотиктер қамтылатын фибрин қышқылының туындыларымен біріктіріп қабылдаған пациенттерде миозит және миопатия оқиғалары санының көбейгені хабарланған. Гемфиброзил ГМГ-КоА-редуктазаның кейбір тежегіштерімен бірге тағайындалған кезде миопатияның туындау қаупін арттырады. Осылайша, Розулип препараты мен гемфиброзилді бір мезгілде тағайындау ұсынылмайды. Розулип препараты мен фибраттарды немесе ниацинді бірге қолданған кезде болжамды пайдасы мен қаупінің арақатынасы тиянақты таразылануы тиіс. 40 мг дозадағы розувастатинді фибраттармен қатар қолданған кезде қарсы көрсетілімі бар. Розулип препаратын жүйелік әсері бар фузид қышқылының препараттарымен бірге қабылдау немесе осындай препараттармен емдеу тоқтатылғаннан кейін 7 күн ішінде қарсы көрсетілген. Жүйелік әсері бар фузид қышқылының препараттарымен емдеу қажетті деп танылған пациенттерде статиндермен емдеу фузид қышқылымен ем уақытында тоқтатылуы тиіс. Фузид қышқылы мен статиндер біріктірілімін қабылдаған пациенттерде рабдомиолиз оқиғалары (өліммен аяқталған бірнеше оқиғаны қоса) тіркелген. Бұлшықет әлсіздігі, ауырсыну немесе ауыртатын сезімталдық симптомдары туындағанда пациенттерге дереу дәрігерге қаралу ұсынылады. Статиндермен емдеуді фузид қышқылының соңғы дозасын қабылдаған соң жеті күннен кейін жаңартуға болады. Жүйелік әсері бар фузид қышқылымен ұзақ емдеу талап етілетін айрықша жағдайларда, мысалы, ауыр инфекцияларды емдеу үшін, Розулип препараты мен фузид қышқылын бірге қабылдау қажеттілігін әрбір жеке жағдайда және мұқият медициналық бақылаумен қарастырған жөн. Розулип препаратын миопатияны бағамдайтын немесе рабдомиолизге қатысты салдарлы болып табылатын (мысалы, сепсис, гипотония, ауыр операция, жарақат, ауыр метаболизмдік, эндокриндік және электролиттік бұзылыстар немесе бақыланбайтын құрысулар) бүйрек функциясы жеткіліксіздігінің дамуына итермелейтін шұғыл ауыр аурулары бар пациенттерге қабылдауға болмайды. Тері тарапынан ауыр жағымсыз реакциялар Розувастатинді қолдану кезінде Стивенс-Джонсон синдромын (SJS) және эозинофилиямен және жүйелік симптомдармен (drug reaction with eosinophilia and systemic symptoms (DRESS)) өмірге қауіпті болуы немесе өліммен аяқталуы мүмкін дәрілік реакцияларды қоса алғанда, ауыр дәрежедегі терінің жағымсыз реакциялары тіркелді. Розулип препаратын тағайындау кезінде пациенттер кейіннен осы пациенттерді мұқият қадағалай отырып, терінің ауыр жағымсыз реакцияларының белгілері мен симптомдары туралы хабардар етілуі тиіс. Стивенс-Джонсон синдромы, әдетте, денеде қызғылт дөңгелек дақтардың пайда болуымен көбінесе ортасында күлдіреулердің болуымен, терінің қабыршықтануымен, ауызда, тамақта, мұрын жолдарында, жыныс мүшелерінде және көздерде жаралар пайда болуымен сипатталады. Терідегі бұл ауыр бөртпелерден бұрын қызба мен тұмауға ұқсас белгілер болуы мүмкін. DRESS синдромы немесе дәрілік препаратқа аса жоғары сезімталдық синдромы кең таралған бөртпенің пайда болуымен, дене қызуының жоғарылауымен және лимфа түйіндерінің ұлғаюымен сипатталады. Осындай жағымсыз реакцияларды көрсететін белгілер мен симптомдар пайда болған кезде Розулип препаратын дереу тоқтатып, баламалы емді тағайындау қажет. Егер пациентте Стивенс-Джонсон синдромы немесе Розулип қолданған кезде эозинофилиямен және жүйелік симптомдармен дәрілік реакция секілді күрделі жағымсыз реакция дамыған болса, аталған пациентте Розулип препаратымен емдеуді тұрақты негізде тоқтату керек. Бауырға тигізетін әсері ГМГ-КоА-редуктазаның басқа тежегіштерінен туындайтын жағдайда секілді, алкогольді шамадан тыс қабылдайтын және/немесе анамнезінде бауыр аурулары бар пациенттер Розулип препаратын сақтықпен қабылдауы тиіс. Емді бастағанға дейін және емді бастаған соң 3 айдан кейін бауыр функциясы көрсеткіштерін анықтау ұсынылады. Егер қан сарысуындағы трансаминазалар белсенділігінің деңгейі жоғарғы қалып шегінен 3 еседен астам болса, Розулип препаратын қабылдауды тоқтату немесе оның дозасын азайту керек. Бауыр функциясының ауыр бұзылыстары (негізінен трансаминазалар деңгейінің жоғарылауын қоса) оқиғаларын анықтау жиілігі 40 мг дозасын қабылдаған кезде жоғары болады. Гипотиреоз немесе нефроздық синдром салдарынан болған гиперхолестеринемиясы бар пациенттерде негізгі ауруларды емдеу Розулип препаратымен емдеу басталғанға дейін жүргізілуі тиіс. Этникалық топтар Розувастатиннің моңғол тектес нәсілге әсері еуропеоидтық нәсілге қарағанда жоғары екендігі туралы деректер бар. Протеаза тежегіштері Розувастатиннің жоғары жүйелік әсері оны ритонавирмен біріктірілімде түрлі протеаза тежегіштерімен бір мезгілде қабылдайтын пациенттерде байқалады. Розулип препаратын АИТВ-на шалдыққан, протеаза тежегіштерін қабылдайтын пациенттерге тағайындаған кезде липидтер деңгейінің төмендеуінен болатын пайданы да, бастапқы кезде және Розулип препаратының дозаларын титрлеген кезде қан плазмасындағы розувастатин концентрациясының жоғарылауы үшін туындайтын потенциалды да ескерген жөн. Розулип препаратының дозасына түзету жүргізілмегенге дейін протеаза тежегіштерін қатар қабылдау ұсынылмайды. Лактоза жақпаушылығы Lapp (ЛАПП)-лактаза тапшылығы немесе глюкоза және галактоза мальабсорбциясы секілді сирек кездесетін тұқым қуалайтын аурулары бар пациенттерге Розулип қабылдауға болмайды. Өкпенің интерстициальді ауруы Статиндер қолданылғанда, әсіресе, ем ұзақ уақыт жүргізілгенде өкпенің интерстициальді ауруларының бір реттік оқиғалары туралы хабарланған. Сипатталған белгілерге ентігуді, құрғақ жөтелді және жағдайдың жалпы нашарлауын (шаршау, салмақ жоғалту және қызба) жатқызуға болады. Егер пациентте өкпенің интерстициальді ауруларының дамуына күдіктер бар болса, статиндермен емдеуді тоқтату керек. 2-типті қант диабеті Кейбір деректер класс ретінде статиндер қандағы глюкоза деңгейін жоғарылатынын және кейбір пациенттерде болашақта диабеттің даму қаупін арттыратынын, диабетті емдеуге бастамашылық жасалмаса, гипергликемия туындауы мүмкін екенін көрсетеді. Алайда статиндермен емдеген кездегі қантамыр аурулары қаупінің азаюы глюкоза деңгейінің жоғарылау қауіпінен жоғары, сондықтан статиндермен емдеуді тоқтатуға себеп болып табылмайды. Ашқарынға қандағы глюкоза деңгейі 5,6 – 6,9 ммоль/л пациенттерде розувастатинмен емдеу қант диабетіне шалдығу қаупінің жоғарылауымен байланыстырылды. Педиатриялық практикада қолдану Розувастатин қабылдайтын 6-дан 17 жасқа дейінгі балалардың ұзындыққа өсуін (бой), дене массасын, ДМИ (дене массасының индексін) және екіншілік жыныстық жетілу сипаттамаларын Таннер шкаласы бойынша бағалау екі жылдық кезеңмен шектеледі. Препаратты екі жыл қабылдағаннан кейін оның бойға, салмаққа, ДМИ және жыныстық дамуға әсері анықталған жоқ.

Розулип препараты әйелдерге жүктілік кезінде және бала емізу кезеңінде қарсы көрсетілімді. Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері Көлік басқарғанда немесе механизмдермен жұмыс істегенде емделу кезінде бас айналудың мүмкін екенін ескеру керек.

Басқа дәрілік препараттардың розувастатиннің бір мезгілде қолданғандағы әсеріне ықпалы Ақуыз транспортерлерінің тежегіштері Розувастатин OATP1B1 бауырдың қармау транспортері мен BCRP эффлюксті транспортерін қоса, ақуыздың белгілі бір транспортерлеріне арналған субстратты білдіреді. Розулип препараты мен осы ақуыз транспортерлерінің тежегіштері болып табылатын дәрілік препараттарды бір мезгілде қабылдау қан плазмасында розувастатин концентрацияларының жоғарылауын және миопатия даму қаупінің артуын туындатуы мүмкін. Циклоспорин Бірге қолдану қан плазмасындағы розувастатин концентрациясының 7 есе жоғарылауын туындатады және циклоспориннің плазмалық концентрациясына әсер етпейді. Розулип препараты циклоспорин қабылдайтын пациенттерге қарсы көрсетілімді. Протеаза тежегіштері Нақты өзара әрекеттесу механизмі белгісіз болғанына қарамастан, протеаза тежегіштерін бірге қабылдау розувастатин экспозициясының елеулі мөлшерде артуын туындатады. Розувастатин әсерінің болжамды артуы негізінде Розулип препаратының дозасын мұқият таңдағаннан кейін ғана Розулип препараты мен протеаза тежегіштерінің кейбір біріктірілімдерін бірге қабылдауға болады. Гемфиброзил және басқа гиполипидемиялық препараттар Розулип препараты мен гемфиброзилді бірге қабылдау розувастатиннің Cmax және AUC екі есе артуын туындатқан. Алынған деректер негізінде, фенофибратпен ешқандай клиникалық релевантты өзара әрекеттесу күтілмейді, алайда фармакодинамикалық өзара әрекеттесу орын алуы мүмкін. Гемфиброзил, фенофибрат, басқа фибраттар мен ниациннің (никотин қышқылының) гиполипидемиялық дозалары (> немесе 1 г/күн тең) ГМГ-КоА-редуктазаның тежегіштерімен бірге қабылданғанда миопатияның пайда болу қаупін арттырады, бұның себебі олар бөлек қабылданса, миопатия тудыра алатыны болуы мүмкін. 40 мг дозадағы розувастатин фибраттарды қатар қолданған кезде қарсы көрсетілімді болады. Сонда да осылай бірге қабылдауды қажет ететін пациенттер үшін розувастатиннің бастапқы дозасы 5 мг-ны құрауы тиіс. Эзетимиб 10 мг дозадағы Розулип препараты мен 10 мг эзетимибті бірге қабылдау гиперхолестеринемиясы бар пациенттерде розувастатиннің AUC 1,2 есе артуын туындатқан. Жағымсыз әсерлердің туындауы тұрғысынан Розулип препараты мен эзетинимиб арасындағы фармакодинамикалық өзара әрекеттесуді жоққа шығаруға болмайды. Антацидтер Розулип препараты мен құрамында алюминий мен магний гидроксиді бар антацидтер суспензияларын бір мезгілде қолдану розувастатиннің плазмалық концентрациясын шамамен 50%-ға төмендетеді. Осы әсер, егер антацидтер розувастатин қабылдағаннан кейін 2 сағаттан соң қолданылса, аздап білінеді. Эритромицин Розулип препараты мен эритромицинді бір мезгілде қолдану розувастатиннің AUC (0 – t) 20%-ға және розувастатиннің Сmax 30%-ға азаюын туындатады. Бұндай өзара әрекеттесу эритромицинді қабылдаумен туындайтын ішек моторикасының күшеюі нәтижесінде пайда болуы мүмкін. Р450 цитохромының ферменттері Розувастатин Р450 цитохромы ферменттерінің тежегіші де, индукторы да болып табылмайды. Бұған қоса, розувастатин бұл ферменттер үшін әлсіз субстрат болып табылады. Осылайша, Р450 цитохромының метаболизмімен байланысты өзара әрекеттесу күтілмейді. Розувастатин, флуконазол (CYP2C9 және CYP3А4 тежегіші) және кетоконазол (CYP2А6 CYP3А4 тежегіші) арасында клиникалық маңызды өзара әрекеттесу байқалған жоқ. Тикагрелор Тикагрелор розувастатиннің бүйрек арқылы шығарылуына әсер етуі мүмкін, бұл розувастатиннің жиналу қаупін арттырады. Бұл әсердің механизмі белгісіз болса да, кейбір жағдайларда тикагрелор мен розувастатинді бірге қолдану бүйрек функциясының нашарлауына, КФК белсенділігінің жоғарылауына және рабдомиолизге әкелді. Розувастатин дозасын түзетуді қажет ететін өзара әрекеттесулер Егер Розулип препараты мен оның әсерін күшейтетін басқа дәрілік препараттарды бірге қабылдау қажет болса, Розулип препаратының дозасын түзету қажет. Егер Розулип препаратының әсері екі есе немесе одан жоғары күшейеді деп күтілсе, оның бастапқы дозасы күніне бір рет 5 мг-ны құрауы тиіс. Розулип препаратының ең жоғары күн сайынғы дозасы розувастатиннің болжамды әсері өзара әрекеттеспейтін дәрілік препараттарсыз қабылданатын 40 мг дозасының әсерінен аспайтындай түзетілуі керек, мысалы, гемфиброзилмен біріктірілімдегі Розулип препаратының 20 мг дозасы (артуы 1,9 есе) және атазанавирмен/ритонавирмен біріктірілімдегі Розулип препаратының 10 мг дозасы (жоғарылауы 3,1 есе). Егер AUC розувастатиннің 2 еседен аз артуы байқалса, препараттың бастапқы дозасын азайтудың қажеті жоқ, бірақ Розулип препаратының дозасын 20 мг-ден жоғары арттырған кезде сақ болу керек. 1-кесте. Бірге қолданған кезде дәрілік препараттардың розувастатин әсеріне тигізетін ықпалы (AUC; шамасының кему тәртібімен) Өзара әрекеттесетін дәрілік препараттарды дозалау схемасы — Розувастатиннің дозалау схемасы — Розувастатиннің AUC* өзгерістері Розувастатиннің AUC екі есе немесе одан да көп артуы Софосбувир/велпатасвир/воксилапревир (400 мг-100 мг-100 мг) + воксилапревир (100 мг) күніне 1 рет 15 күн бойы — 10 мг, бір реттік доза — 7.4 есе Циклоспорин 75 мг, күніне 2 рет, 200 мг күніне 2 рет дейін, 6 ай — 10 мг, күніне 1 рет, 10 күн — 7.1 есе Даролутамид 600 мг күніне 2 рет, 5 күн — 5 мг, бір реттік доза — 5.2 есе Регорафениб 160 мг, күніне 1 рет, 14 күн — 5 мг, бір реттік доза — 3.8 есе Атазанавир 300 мг/ритонавир 100 мг күніне 1 рет, 8 күн — 10 мг, бір реттік доза — 3.1 есе Велпатасвир 100 мг күніне 1 рет — 10 мг, бір реттік доза — 2.7 есе Омбитасвир 25 мг/паритапревир 150 мг/ритонавир 100 мг, күніне 1 рет /дасабувир 400 мг күніне 2 рет, 14 күн — 5 мг, бір реттік доза — 2.6 есе Гразопревир 200 мг/эльбасвир 50 мг күніне 1 рет, 11 күн — 10 мг, бір реттік доза — 2.3 есе Глекапревир 400 мг /пибрентасвир 120 мг күніне 1 рет, 7 күн — 5 мг, күніне 1 рет, 7 күн — 2.2 есе Лопинавир 400 мг /ритонавир 100 мг күніне 2 рет, 17 күн — 20 мг күніне 1 рет, 7 күн — 2.1 есе Клопидогрелдің жүктеме дозасы 300 мг, содан кейін 24 сағаттан кейін 75 мг — 20 мг, бір реттік доза — 2 есе Терифлуномид — - — 2,5 есе ↑ Капматиниб 400 мг күніне 2 рет — 10 мг бір реттік доза — 2,1 есе ↑ Фостаматиниб 100 мг күніне 2 рет — 20 мг, бір реттік доза — 2- есе ↑ Розувастатиннің AUC 2 еседен аз артуы Элтромбопаг 75 мг, күніне 1 рет, 5 күн — 10 мг, бір реттік доза — 1.6 есе Фебуксостат 120 мг күніне 1 рет — 10 мг, бір реттік доза — 1,9- есе ↑ Гемфиброзил 600 мг күніне 2 рет, 7 күн — 80 мг, бір реттік доза — 1.9 есе Дарунавир 600 мг/ритонавир 100 мг күніне 2 рет, 7 күн — 10 мг күніне 1 рет, 7 күн — 1.5 есе Типранавир 500 мг/ритонавир 200 мг күніне 2 рет, 11 күн — 10 мг, бір реттік доза — 1.4 есе Дронедарон 400 мг күніне 1 рет, 5 күн — Қолжетімсіз — 1.4 есе Итраконазол 200 мг, күніне 1 рет, 5 күн — 10 мг, бір реттік доза — 1.4 есе ** Эзетимиб 10 мг күніне 1 рет, 14 күн — 10 мг, күніне 1 рет, 14 күн — 1.2 есе ** Розувастатиннің AUC төмендеуі Эритромицин 500 мг күніне 4 рет, 7 күн — 80 мг, бір реттік доза — 20 % Баикалин 50 мг күніне 3 рет, 14 күн — 20 мг, бір реттік доза — 47 % * X-еселік өзгеріс түрінде берілген деректер розувастатинді басқа препараттармен бірге қабылдау және жалғыз розувастатинді ғана қабылдау арасындағы қарапайым арақатынас болып табылады. % өзгеріс түрінде берілген деректер жалғыз розувастатинді ғана қабылдауға қатысты пайыздық айырмашылық болып табылады. Арту – «­» ретінде, кему – «» ретінде ** Розулип препаратының түрлі дозалары кезіндегі өзара әрекеттесуге қатысты бірнеше зерттеу жүргізілген, кестеде ең маңызды арақатынастар берілген. AUC — фармокинетикалық қисық астындағы аудан; Бір мезгілде қолданған кезде мынадай дәрілік препараттар/біріктірілімдер AUC розувастатиннің арақатынасына клиникалық маңызды әсер еткен жоқ: Алеглитазар 7 күн ішінде 0.3 мг; Фенофибрат 7 күн ішінде 67 мг күніне 3 рет; Флуконазол 200 мг күніне 1 рет; Фосампренавир 700 мг/ритонавир 100 мг күніне 2 рет 8 күн ішінде; Кетоконазол 200 мг күніне 2 рет 7 күн ішінде; Рифампин 450 мг күніне 1 рет 7 күн ішінде; Силимарин 140 мг күніне 3 рет 5 күн ішінде. Розувастатиннің бірге қолданылатын дәрілік препараттарға тигізетін әсері К дәруменінің антагонистері ГМГ-КоА-редуктазаның басқа тежегіштерімен туындайтын жағдайда секілді, К дәруменінің антагонистерін (мысалы, варфаринді немесе кумарин қатарындағы басқа антикоагулянт) бір мезгілде қабылдайтын пациенттерде Розулип препаратымен емді бастау немесе оның дозасын арттыру протромбин уақытының халықаралық қалыптасқан қатынасының (ХҚҚ) көбеюін туындатуы мүмкін. Розувастатинді тоқтату немесе препарат дозасын азайту ХҚҚ азаюын туындатуы мүмкін. Мұндай жағдайларда ХҚҚ мониторингін жүргізу ұсынылады. Пероральді контрацептивтер/гормон орын басу емі Розувастатин мен пероральді контрацептивтерді бір мезгілде қолдану этинилэстрадиолдың AUC және норгестрилдің AUC тиісінше 26%-ға және 34%-ға арттырады. Плазмалық концентрацияның осылай артатынын пероральді контрацептивтерді таңдаған кезде ескеру қажет. Мұндай біріктірілімді пациенттер жақсы көтергені туралы деректер бар. Дигоксин Розувастатиннің дигоксинмен клиникалық маңызды өзара әрекеттесуі күтілмейді. Фузид қышқылы Розувастатин мен фузид қышқылының өзара әрекеттесуі туралы деректер жоқ. Миопатия қаупі, рабдомиолизді қоса, жүйелік әсері бар фузид қышқылының препараттарын статиндермен бір мезгілде қабылдаған кезде арта алады. Осы өзара әрекеттесу (фармакодинамикалық немесе фармакокинетикалық немесе екеуі бірдей) механизмі қазіргі кезде белгісіз. Бұл біріктірілімді қабылдаған пациенттерде рабдомиолиз (өліммен аяқталған бірнеше оқиғаны қоса) туралы хабарламалар тіркелген. Егер жүйелік әсері бар фузид қышқылымен емдеу қажет болса, Розулип препаратымен емдеу фузид қышқылымен ем уақытында тоқтатылуы тиіс.

Сақтау мерзімі 3 жыл Жарамдылық мерзімі өткеннен кейін пайдалануға болмайды. Сақтау шарттары 30 °С- ден аспайтын температурада сақтау керек. Балалардың қолы жетпейтін жерде сақтау керек!