Силгра таблетки 100 мг

Бір таблетканың құрамында белсенді зат - силденафил цитраты (силденафилге баламалы) 140.48 мг (100.000 мг) қосымша заттар: гидроксипропилцеллюлоза, натрий кроскармеллозасы, микрокристалды целлюлоза, коллоидты кремнийдің қостотығы, магний стеараты, натрий крахмалы гликоляты Қабығының құрамы Wincoat WT 7536 көк * Жылтыратуға арналған құрамы Winpolish WT-PSH-5103 ақ** *Wincoat WT 7536 көк: гидроксипропилметилцеллюлоза, полиэтиленгликоль 3350, титанның қостотығы (Е171), тальк, алюминиймен индигокармин (Е132). **Winpolish WT-PSH-5103 ақ: гидроксипропилметилцеллюлоза, полиэтиленгликоль, тальк, глицерин. Сыртқы түрінің, иісінің дәмінің сипаттамасы Ромб тәрізді пішінді, екі жақ беті тегіс, көк түсті үлбірлі қабықпен қапталған таблеткалар (100 мг доза үшін).

• еркектерде жыныс мүшесінің қанағаттандырарлық жыныстық қатынас үшін жеткілікті эрекцияға жету және оны сақтау қабілетсіздігімен байқалатын эректильді функцияның бұзылуын емдеу үшін. Силгра препаратының әсері тиімді болу үшін сексуалды стимуляция қажет.

ATХ коды G04BE03 • Силденафил эректильді дисфункцияны емдеу үшін қолданылады. Табиғи жағдайларда, яғни сексуалдық стимуляция кезінде ол жыныс мүшесіне қанның ағып келуін арттыру арқылы, бұзылған эректильді функцияны қалпына келтіреді. Әсер ету механизмі • Жыныс мүшесінің эрекциясының физиологиялық механизмі сексуалдық стимуляция кезінде қуысты денелерде азот тотығының (NO) босап шығуын қамтиды. Азот тотығы гуанилатциклаза ферментін белсендіреді, бұл циклдық гуанозинмонофосфат (цГМФ) деңгейлерінің жоғарылауына, артынша қуысты денелерде тегіс бұлшықеттердің босаңсуына және қан ағымының артуына алып келеді. • Силденафил қуысты денелердегі цГМФ ыдырауына жауап беретін цГМФ- спецификалық 5-типті фосфодиэстеразаның (ФДЭ-5) күшті және селективті тежегіші болып табылады. Силденафил эрекцияға шеткері әсер береді. Силденафил адамның оқшау қуысты денесіне тікелей босаңсытқыш әсер бермейді, бірақ аталған тінге NO босаңсытатын әсерін едәуір күшейтеді. Сексуальдық стимуляция кезінде орын алатын NО/цГМФ метаболизмдік жолын белсендірген кезде силденафилдің ФДЭ-5 тежеуі қуысты денелердегі цГМФ деңгейлерінің жоғарылауына алып келеді. Сондықтан силденафил қажетті фармакологиялық әсерін танытуы үшін, сексуалдық стимуляция қажет. • Фармакодинамикалық әсерлері In vitro зерттеулер Силденафил эрекция үдерісін реттеуге қатысатын ФДЭ-5-ке селективті әсер береді. Силденафилдің ФДЭ-5-ке әсері, басқа белгілі фосфодиэстеразаларға әсерінен күштірек. Силденафилдің бұл әсері көздің торқабығындағы фотоөзгеріс үдерістеріне қатысатын ФДЭ-6-ға әсерінен 10 есе күштірек. Ұсынылған ең жоғары дозаларын қолданғанда силденафилдің ФДЭ-5-ке селективтілігі оның ФДЭ1-ге селективтілігінен 80 есе, ФДЭ-2, ФДЭ- 3, ФДЭ- 4, ФДЭ- 7, ФДЭ-8, ФДЭ-9, ФДЭ-10 және ФДЭ-11-ге селективтілігінен - 700 еседан артық жоғары. Атап айтқанда, силденафилдің ФДЭ-5-ке селективтілігі оның жүректің жиырылуының реттелуіне қатысатын фосфодиэстеразаның цАМФ-спецификалық изоформасы - ФДЭ-3-ке селективтілігінен 4 000 есе жоғары. Клиникалық тиімділігі мен қауіпсіздігі Препараттың, силденафил сексуалдық стимуляцияға жауап ретінде эрекцияның туындауына алып келуі мүмкін дозасын қабылдағаннан кейінгі уақыт аралығын бағалау үшін екі клиникалық зерттеу арнайы әзірленді. Силденафилді аш қарынға қабылдаған пациенттер қатысқан клиникалық зерттеулерде, жыныс мүшесінің плетизмографиясын (RigiScan) жүргізу кезінде силденафилді қабылдағаннан кейін 60 % (жыныстық қатынасты жүзеге асыру үшін жеткілікті) сіресуімен эрекцияға жеткен пациенттерде эрекция басталғанға дейінгі уақыттың медианасы 25 минутты (12-37 минут мәндерінің диапазонында) құрады. RigiScan пайдаланылған бөлек бір зерттеуде силденафил қабылдағаннан кейін 4-5 сағаттан кейін әлі де, сексуалдық стимуляцияға жауап ретінде эрекция тудыруға қабілетті болды. Силденафил артериялық қысымның жеңіл және өтпелі төмендеуін тудырады, ол көп жағдайда клиникалық әсерлерімен қатар жүрмейді. Силденафилді 100 мг дозада қабылдағаннан кейін шалқадан жатқан қалыптағы систолалық артериялық қысымның орташа ең жоғары төмендеуі 8,4 мм с.б. құрады. Шалқадан жатқан қалыптағы диастолалық артериялық қысымның тиісінше өзгеруі 5,5 мм с.б. құрады. Артериялық қысымның бұл төмендеуі силденафилдің тамырды кеңейтетін әсерлеріне сәйкес келеді, бұл қантамырлардың тегіс бұлшықеттеріндегі цГМФ деңгейлерінің жоғарылауының арқасында болуы ықтимал. Дені сау еріктілерде силденафилді 100 мг дейінгі дозаларда бір рет қабылдау электрокардиограммада (ЭКГ) клиникалық тұрғыдан маңызды өзгерістерді тудырмады. Жүректің ишемиялық ауруының (ЖИА) ауыр түрі (кем дегенде бір коронарлық артерияның стенозы > 70 %) бар 14 пациентте силденафилдің 100 мг бір пероральді дозасының гемодинамикалық әсерлерін зерттеуде тыныштық күйіндегі орташа систолалық және диастолалық артериялық қысым бастапқы деңгейге қатысты сәйкесінше 7% және 6%-ға төмендеді. Өкпенің орташа систолалық артериялық қысымы 9%-ға төмендеді. Силденафил жүректің лықсыту көрсеткіштеріне әсер етпеді және стенозды коронарлық артериялар бойындағы қан ағымын бұзбады. Жүктемемен ЭКГ плацебо-бақыланатын салыстырмалы жасырын зерттеуде, тұрақты жүрек қыспасына қарсы дәрілік заттарды (нитраттарды қоспағанда) тұрақты түрде қабылдаған, эректильді дисфункциясы және созылмалы тұрақты стенокардиясы бар 144 пациентті бағалау жүргізілді. Силденафил және плацебо топтары арасында шектеулі стенокардия туындағанға дейінгі уақыттың ешқандай клиникалық маңызды айырмашылықтары анықталмады. Фарнсворт-Манселлдің 100-реңктік тестісін жүргізгенде препаратты 100 мг дозада қабылдағаннан кейін 1 сағаттан соң кейбір пациенттерде түстерді (көгілдір/жасыл) ажырату қабілетінің жеңіл және уақытша айырмашылықтары анықталды, және барлық әсерлері препаратты қолданғаннан кейін 2 сағаттан соң толығымен жойылды. Түстерді танудағы бұл өзгерістің ықтимал механизмі көздің торқабығындағы реакциялардың фотоөзгерту каскадына қатысатын FDE-6 тежелуімен байланысты. Силденафил көру өткірлігіне немесе контрастылық сезімталдыққа әсер етпейді. Жас шамасына байланысты бастапқы макулярлық дистрофиясы (n=9) тіркелген пациенттердегі плацебо-бақыланатын шағын зерттеуде силденафилді (бір реттік 100 мг дозада) қолдану көру қабілетіне (көру жітілігі, Амслер торы, бағдаршамның түстерін ажыратуды модельдеу, Хамфри периметрі және фотостресс) тексеру жүргізудің нәтижелерінде елеулі өзгерістер тудырмады. Силденафилді бір реттік 100 мг дозада қабылдағаннан кейін, дені сау еріктілерде сперматозоидтардың қозғалғыштығына немесе олардың морфологиясына препараттың әсері анықталған жоқ (4.6 бөлімін қараңыз). Клиникалық зерттеулер туралы қосымша ақпарат Клиникалық зерттеулер барысында силденафил 19-87 жас аралығындағы 8000-нан астам пациентте қолданылды. Зерттеулерде пациенттердің келесі топтары ұсынылды: егде жастағы пациенттер (19,9 %), артериялық гипертензиясы (30,9 %), қант диабеті (20,3 %), жүректің ишемиялық ауруы (5,8 %), гиперлипидемия (19,8 %), жұлынның зақымдануы (0,6 %), депрессия (5,2 %), қуықасты безінің трансуретральды резекциясы (3,7 %) және радикалды простатэктомия (3,3%) бар пациенттер. Пациенттердің келесі топтары жеткілікті дәрежеде болмаған немесе клиникалық зерттеулерге енгізілмеген: жамбас ағзаларына жасалған операциядан кейінгі пациенттер, сәулемен емдеуден кейінгі пациенттер, бүйрек немесе бауыр жеткіліксіздігінің ауыр дәрежесімен пациенттер, сондай-ақ, белгілі бір жүрек-қантамыр аурулары бар пациенттер (4.3 бөлімін қараңыз). Препараттың бекітілген дозасы қолданылған зерттеулерде терапия салдарынан эрекцияның жақсарғаны туралы хабарлаған пациенттердің үлесі плацебо тобындағы 25%-бен салыстырғанда 62% (25 мг), 74% (50 мг) және 82% (100 мг) құрады. Бақыланатын клиникалық зерттеулерде силденафилдің салдарынан терапияны тоқтату жиілігі көп емес және плацебо тобымен салыстырымды болды. Осы зерттеулердің барлығында силденафилді қабылдағаннан кейін жақсарғаны туралы хабарлаған пациенттердің үлесі мынадай болды: психогенді эректильді дисфункция (84%), аралас эректильді дисфункция (77%), органикалық эректильді дисфункция (68%), егде жастағы пациенттер (67%), қант диабеті (59%), жүректің ишемиялық ауруы (69%), артериялық гипертензия (68%), ТУРП (61%), радикалды простатэктомия (43%), жұлынның зақымдануы (83%), депрессиялық күй (75 %). Силденафилдің қауіпсіздігі мен тиімділігі ұзақмерзімді зерттеулердің деректерімен расталды. Балалар жасындағы пациенттер Еуропаның Дәрілік заттар жөніндегі агенттігі балалар жасындағы пациенттердің барлық қосалқы топтарында эректильді дисфункцияны емдеу үшін силденафилді зерттеулер нәтижелерін беру міндеттемесін орындауды талап ету құқығынан бас тартты. Препаратты балаларда қолдану жөнінде ақпарат алу үшін 4.2 бөлімін қараңыз.

Дозалану режимі Ұсынылатын дозасы сексуалдық белсенділікке дейін шамамен бір сағат бұрын 50 мг құрайды. Тиімділігі мен жағымылығына байланысты дозасын 100 мг-ге дейін арттыруға немесе 25 мг-ге дейін азайтуға болады. Ең жоғары ұсынылатын дозасы - 100 мг. Қабылдаудың ұсынылатын ең көп жиілігі - күніне бір рет. Егер силденафил тамақтану кезінде қабылданса, белсенділіктің басталуы аш қарындағы жағдаймен салыстырғанда кешеуілдеуі мүмкін. Балалар Силденафил балалар мен 18 жасқа дейінгі жасөспірімдерде қолдануға арналмаған. Егде жастағы пациенттер Егде жастағы (≥ 65 жас) пациенттерде дозасын түзету қажет емес. Бауыр жеткіліксіздігі бар пациенттер Бауыр жеткіліксіздігі (мысалы, циррозы) бар пациенттерде силденафилдің клиренсі төмендейтіндігіне байланысты, препаратты 25 мг дозада қолдану мүмкіндігін қарастыру керек, бірақ қажет болған жағдайда, дозаны біртіндеп 50 мг және 100 мг дейін арттыруға болады. Бүйрек жеткіліксіздігі бар пациенттер Бүйректің ауырлығы жеңіл және орташа дәрежелі жеткіліксіздігі (креатинин клиренсі 30-80 мл/мин) кезінде дозасын түзету қажет емес. Бүйректің ауыр дәрежелі жеткіліксіздігі бар (креатинин клиренсі < 30 мл/мин) пациенттерде силденафилдің клиренсі төмендейтіндігіне байланысты, 25 мг дозада қолдану мүмкіндігін қарастыру керек. Препараттың тиімділігі мен жағымдылығына қарай, оның дозасын біртіндеп 50 мг және 100 мг дейін арттыруға болады. Басқа дәрілік препараттарды қабылдап жүрген пациенттерде пайдалану Силденафилмен бір мезгілде қабылдау ұсынылмайтын ритонавирді қоспағанда, CYP3A4 тежегіштерімен қатарлас ем қабылдап жүрген пациенттер үшін бастапқы 25 мг дозасын қарастыру керек. Альфа-адреноблокаторлармен ем қабылдап жүрген пациенттерде постуральді гипотензияның дамуы мүмкіндігін барынша азайту үшін, пациенттер силденафилмен емдеу басталғанға дейін альфа-адреноблокаторлармен емдеуге тұрақтандырылуы тиіс. Бұдан өзге, силденафилді 25 мг дозада қабылдауды бастау мүмкіндігін қарастырған жөн. Енгізу әдісі және жолы Ішке қолдануға арналған. Дәрілік препаратты қолдану тәсілін түсіну үшін медицина қызметкерінен кеңес алуға бару жөнінде нұсқаулар Сізде осы дәрілік препаратты қолдану жөнінде қандай-да бір қосымша сұрақтар туындаған жағдайда, өз дәрігеріңізге жүгініңіз.

- әсер ететін затқа немесе қосымша заттардың кез келгеніне аса жоғары сезімталдық - азот тотығының (амилнитрит) донаторлары болып табылатын препараттарды немесе нитраттарды кез келген түрінде бір мезгілде қабылдау - гуанилатциклаза (риоцигуат) стимуляторларымен бір мезгілде қабылдау себебі ықтималды түрде симптоматикалық гипотензияға әкелуі мүмкін - сексуалды белсенділік ұсынылмайтын ер адамдарға (мысалы, тұрақсыз стенокардия немесе ауыр жүрек жеткіліксіздігі сияқты ауыр жүрек-қан тамырлары бұзылыстары бар пациенттер) - көру жүйкесінің алдыңғы артериялық емес ишемиялық нейропатиясы (КЖААИН) салдарынан бір көздің көрмей қалуы, бұл көріністің ФДЭ-5 тежегіштерін қабылдаумен байланысты болуы немесе болмауына байланыссыз - бауырдың ауыр жеткіліксіздігі - артериялық гипотензия (АҚ < 90/50 мм с.б.) - жуырда өткерген миокард инфарктісі - жуырда өткерген инсульт - көз торқабығының тұқым қуалайтын дегенеративті аурулары, мысалы, пигментті ретинит (бұл пациенттердің аз бөлігінде торқабық фосфодиэстеразаларының генетикалық бұзылулары бар)

Жағымсыз құбылыстардың жиілігін анықтау мынадай критерийлерге сәйкес жүргізіледі: өте жиі (≥ 1/10), жиі (≥ 1/100 - < 1/10 дейін), жиі емес (≥ 1/1000 - < 1/100 дейін), сирек (≥ 1/10000 - < 1/1000 дейін), өте сирек (< 1/10000), белгісіз (қолда бар деректердің негізінде бағалау мүмкін емес. Өте жиі - бас ауыруы Жиі - бас айналуы - түстерді ажыратудың бұрмалану (хлоропсия, хроматопсия, цианопсия, эритропсия, ксантопсия), көрудің бұзылуы, анық көрмеу - гиперемия, ысынулар - мұрынның бітелуі - диспепсия, жүрек айнуы Жиі емес - ринит - аса жоғары сезімталдық - ұйқышылдық, гипестезия - көз жасы ағуымен байланысты бұзылулар (көз құрғақтығы, көз жасы бездерінің бұзылуы, көз жасы ағуы) көздің ауыруы, фотофобия, фотопсия, көз тамырларының гиперемиясы, көру қанықтығы, конъюнктивит - кеңістіктегі бағдарсыздық, құлақтағы шуыл - тахикардия, жүрек қағуын сезіну - артериялық гипертензия, артериялық гипотензия - мұрыннан қан кету, мұрынның қосалқы қойнауларының бітелуі - іштің жоғарғы бөлігінің ауыруы, гастроэзофагеальді рефлюкс ауруы, құсу, ауыздың құрғауы - бөртпе - миалгия, аяқ-қолдардың ауыруы - гематурия - кеуде қуысының ауыруы, қатты қажу, ысыну сезімі - жүректің жиырылуын жиілігінің жоғарылауы Сирек - ми қанайналымының жедел бұзылуы, транзиторлық ишемиялық шабуыл, құрысу ұстамасы, құрысу ұстамасының қайталануы, естен тану - көру жүйкесінің алдыңғы артерииттік емес ишемиялық нейропатиясы (КЖААИН), торқабық тамырларының окклюзиясы, көздің торқабығына қан құйылу, атеросклероздық ретинопатия, торқабықтың зақымдануы, глаукома, көру өрісінің ақауы, диплопия, көру жітілігінің төмендеуі, миопия, астенопия, шыны тәрізді денедегі бұлыңғырлану, нұрлы қабықтың зақымдануы, мидриаз, көру аймағында түрлі-түсті шеңберлердің болуы, көрудің бұзылуы, көздің ісінуі, домбығуы, конъюнктивальді гиперемия, көздің тітіркенуі, көзде жайсыздықты сезіну, қабақтың ісінуі, аққабық түсінің өзгеруі - кереңдік - кенеттен жүрек ауруынан өлу, миокард инфарктісі, қарыншалық аритмия, жүрекшелер фибрилляциясы, тұрақсыз стенокардия - тамақтың қысылу сезімі, мұрынның ісінуі, мұрынның шырышты қабығының құрғауы - оральді гипестезия - Стивенс - Джонсон синдромы, уытты эпидермалық некролиз - пенистен қан кету, приапизм, гематоспермия, эрекцияның күшеюі - ашушаңдық Жағымсыз дәрілік реакциялар туындағанда медициналық қызметкерге, фармацевтикалық қызметкерге немесе, дәрілік препараттардың тиімсіздігі туралы хабарламаларды қоса, дәрілік препараттарға болатын жағымсыз реакциялар (әсерлер) жөніндегі ақпараттық деректер базасына тікелей хабарласу керек Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

800 мг дейінгі бір реттік дозасын қолданғанда жағымсыз реакциялары төменірек дозаларында байқалғандармен ұқсас болды, бірақ жиілігі мен ауырлығы арта түсті. 200 мг дозалары тиімділігінің жоғарылауына алып келмеді, бірақ жағымсыз реакциялардың (бас ауыруы, қан тебулер, бас айналуы, диспепсия, мұрын бітелуі, көру қабілетінің бұзылуы) жиілігі арта түсті. Емі Артық дозаланған жағдайда қажеттілігіне қарай стандартты демеу шараларын қабылдау керек. Бүйрек диализі клиренсін жеделдетеді деп күтілмейді, өйткені силденафилдің плазма ақуыздарымен байланысы күшті және несеппен шығарылмайды.

Эректильді дисфункцияны диагностикалау, олардың ықтимал себептерін анықтау үшін ауру тарихын зерттеу және фармакологиялық емдеудің мүмкіншіліктерін қарастырғанға дейін медициналық тексеру жүргізу қажет. Жүрек-қан тамырлары ауруларының қауіп факторлары Эректильді дисфункцияны емдеуді бастамас бұрын, емдеуші дәрігер пациенттерінің жүрек-қан тамырлары жағдайын бағалауы керек, өйткені сексуалды белсенділікпен байланысты жүрек асқынуларының белгілі бір қауіптілік дәрежесі бар. Силденафил қан қысымын шамалы немесе уақытша төмендетуге әкелетін тамыр кеңітететін әсерге ие. Силденафилді тағайындамас бұрын дәрігерлер силденафилдің тамыр кеңітетін әсерінің белгілі бір негізгі аурулары бар пациенттердің жағдайына, әсіресе олардың жыныстық белсенділігімен байланысты жағымсыз салдарының ықтималдығын мұқият тексеруі керек. Тамыр кеңітетін дәрілерге жоғары сезімталдық тобына сол жақ қарыншаның шығыс бөлігінің тарылуы бар пациенттер (мысалы, аорта қақпақшасының стенозы, гипертрофиялық обструктивті кардиомиопатия), сондай-ақ қан қысымын автономды бақылаудың бұзылуының ауыр дәрежесі түрінде көрінетін көпжүйелік атрофияның сирек синдромы бар пациенттер жатады. Силденафил нитраттардың гипотензиялық әсерін күшейтеді. Тіркеуден кейінгі кезең барысында миокард инфарктісін, тұрақсыз стенокардияны, кенеттен жүрек өлімін, қарыншалық аритмияны, цереброваскулярлық қан кетуді, транзиторлық ишемиялық шабуылды, артериялық гипертензияны және силденафилді қолдану кезіндегі артериялық гипотензияны қоса алғанда, елеулі жүрек-қан тамырлары асқынулары жағдайлары тіркелді. Бұл пациенттердің көпшілігінде жүрек-қан тамырлары ауруларының алдын-ала қауіп факторлары болған жоқ. Бұл құбылыстардың көпшілігі жыныстық қатынас кезінде немесе одан кейін көп ұзамай тіркелді, сонымен қатар силденафилді сексуалды белсенділіксіз қабылдағаннан кейін көп ұзамай бірнеше құбылыс тіркелді. Бұл құбылыстардың силденафилді қабылдаумен, сексуалды белсенділікпен, жүрек-қантамыр ауруымен, осы факторлардың бірігуімен немесе басқа факторлармен тікелей байланысты екенін анықтау мүмкін емес. Приапизм Эректильді дисфункциясы бар пациенттерді емдеуге арналған дәрілерді, оның ішінде силденафилді жыныс мүшесінің анатомиялық деформациясы бар адамдарға (ангуляция, кавернозды фиброз немесе Пейрони ауруы сияқты) немесе приапизмнің дамуына ықпал ететін жағдайлары бар пациенттерге (орақ тәрізді-жасушалық анемия, көптеген миелома немесе лейкемия сияқты) сақтықпен тағайындау керек. Силденафилді тіркеуден кейін қабылдау кезеңінде ұзартылған эрекция және приапизм жағдайлары туралы хабарланған. Егер эрекция 4 сағаттан артық созылса, пациенттер дереу медициналық көмекке жүгінуі тиіс. Шұғыл емдеу болмаған кезде приапизм пенис тіндерінің зақымдануына және потенцияның қайтымсыз жоғалуына әкелуі мүмкін. ФДЭ-5 басқа тежегіштерімен немесе эректильді дисфункция кезінде емдеуге арналған басқа да дәрілермен бір мезгілде қолдану Силденафилді ФДЭ-5 басқа тежегіштерімен немесе эректильді дисфункция кезінде емдеуге арналған басқа да препараттармен бір мезгілде қолданудың қауіпсіздігі мен тиімділігі зерттелмеген. Сондықтан мұндай біріктірілімді қолдану ұсынылмайды. Көру қабілетіне әсері Силденафил мен ФДЭ-5 басқа да тежегіштерін қабылдаумен байланысты көру қабілеті бұзылған, атап айтқанда, сирек ауру – көру жүйкесінің артерииттік емес алдыңғы ишемиялық нейропатиясы туындаған жағдайлар болды. Көру өткірлігінде кез келген ақаулар туындаған жағдайда силденафилді қабылдауды тоқтату және дәрігерге жүгіну қажет. Ритонавирмен бір мезгілде қолдану Силденафилді ритонавирмен бір мезгілде қолдану ұсынылмайды. Альфа-адренорецепторлардың блокаторларымен бір мезгілде қабылдау Альфа-адренорецепторлар блокаторлары тобының препаратын қабылдап жүрген пациенттерге силденафилді сақтықпен қолдану ұсынылады, өйткені оларды бір мезгілде пайдалану кейбір сезімтал пациенттерде симптоматикалық артериялық гипотензияның туындауына алып келуі мүмкін. Бұл силденафилдің дозасын қабылдағаннан кейін 4 сағат ішінде байқалуы ықтимал. Ортостатикалық артериялық гипотензияның даму қаупін азайту үшін, альфа-адренорецепторлардың блокаторларымен ем қабылдап жүрген пациенттерде силденафилмен емдеуді бастамас бұрын, гемодинамикалық тұрақтылық жағдайына қол жеткізу керек. Силденафилді 25 мг дозасынан бастап қолдану мүмкіндігін қарастыру керек. Бұдан өзге, дәрігерлер пациенттерге ортостаздық артериялық гипотензия симптомдары туындаған жағдайға қатысты нұсқау бергені жөн. Қанның ұюына әсері Адам тромбоциттері пайдаланылған in vitro зерттеулер, силденафил натрий нитропруссидінің антиагрегациялық әсерлерін күшейтетінін көрсетіп отыр. Қан ұюы бұзылған немесе белсенді ойық жарасы бар пациенттерде силденафилді қолданудың қауіпсіздігі туралы мәліметтер жоқ, сондықтан, силденафилді пайдасы/қаупінің арақатынасын мұқият бағалағаннан кейін қолдану керек. Қосымша заттар. Дәрілік препарат құрамында натрий бар, тұзсыз диета ұстанатын адамдарға тағайындағанда сақтықпен қолдану қажет. Әйелдер Силденафил әйелдерде қолданылмайды. Арнайы сақтандырулар Педиатрияда қолдану Балалар мен 18 жасқа дейінгі жасөспірімдерде қолдануға болмайды. Препараттың көлік құралын және қауіптілігі зор механизмдерді басқару қабілетіне әсер ету ерекшеліктері Препарат автокөлік құралдарын басқару немесе қауіптілігі зор механизмдермен жұмыс істеу қабілетіне болар-болмас әсер етуі мүмкін. Бас айналуы және көру қабілетінің бұзылуы сияқты, препараттың жағымсыз әсерлері болуы мүмкіндігіне байланысты, автокөлік құралдарын басқарудың немесе қауіптілігі зор механизмдермен жұмыс істеудің алдында пациенттер, өздерінің организмі силденафилді қабылдауға қандай реакция беретіндігін анықтап алуы керек.

Силденафил әйелдердің қолдануына арналмаған. Жүкті және бала емізетін әйелдерде силденафилді қолдануға тиісті және қатаң бақыланатын зерттеулер жүргізілген жоқ.

In vitro зерттеулер Силденафилдің метаболизміне негізінен, Р450 цитохромының (CYP) 3A4 (негізгі жолы) және 2C9 изоформалары (қосалқы жолы) түрткі болады. Осы себепті, аталған изоферменттердің тежегіштері силденафилдің клиренсін төмендетуі мүмкін, ал ол изоферменттердің индукторлары силденафилдің клиренсін жоғарылатуы мүмкін. In vivo зерттеулер Силденафилді CYP3A4 тежегіштерімен (кетоконазол, эритромицин және циметидин сияқты) бір мезгілде қабылдағанда силденафил клиренсінің төмендегені байқалады. Пациенттердің аталған тобында жағымсыз әсерлердің жиілігі артқаны байқалмайды, дегенмен, силденафилмен емдеуді бастапқы 25 мг дозасында бастау қажет. P450 цитохромының тежегіші болып табылатын АИТВ протеазасы тежегіші тепе-теңдік жағдайындағы (тәулігіне екі рет 500 мг) ритонавирді, силденафилмен (бір реттік 100 мг дозасымен) бір мезгілде қабылдау силденафилдің ең жоғары концентрациясының (Cmax) 300%-ға (4 есе) артуына, сондай-ақ, силденафилдің қан плазмасындағы AUC 1000 %-ға (11 есе) артуына алып келеді. 24 сағаттан соң қан плазмасындағы силденафил деңгейлері, тек силденафилді қабылдағаннан кейінгі шамамен 5 нг/мл-мен салыстырғанда, шамамен 200 нг/мл құрайды. Бұл деректер ритонавирдің P450 цитохромы субстраттарының ауқымды спектріне айқын әсерлерімен сәйкес келеді. Жоғарыда көрсетілген деректерді негізге алсақ, силденафилді ритонавирмен бір мезгілде қолдану ұсынылмайды. Силденафил ритонавирдің фармакокинетикасына әсер етпейді. Силденафилдің ең жоғары дозасы ешбір жағдайда қандай жағдайда да 48 сағат ішінде 25 мг аспауы тиіс. CYP3A4 тежегіші болып табылатын АИТВ протеазасы тежегіші, саквинавирді тепе-теңдік күйінде (тәулігіне 3 рет 1200 мг) қамтамасыз ететін дозада және силденафилмен (бір реттік 100 мг дозада) бір мезгілде қабылдау силденафилдің Cmax 140%-ға артуына, сондай-ақ, силденафилдің AUC 210%-ға артуына алып келеді. Силденафил саквинавирдің фармакокинетикасына әсер етпейді. Кетоконазол және итраконазол сияқты CYP3A4 күштірек тежегіштерінің әсері анағұрлым айқын болады деп шамаланады. Силденафилді 100 мг дозада бір рет, CYP3A4 орташа тежегіші эритромицинмен тепе-теңдік жағдайында (5 күн бойы тәулігіне екі рет 500 мг), бірге қабылдаған кезде силденафилдің жүйелі әсерінің 182%-ға артқаны байқалады. Азитромицин (3 күн бойы тәулігіне 500 мг дозада), силденафилдің немесе оның негізгі айналымдағы метаболитінің AUC, Cmax, Tmax көрсеткіштеріне, элиминация жылдамдығының тұрақтылығына немесе кейінгі жартылай шығарылу кезеңіне әсер етпейді. Р450 цитохромының тежегіші және CYP3A4 спецификалық емес тежегіші болып табылатын циметидинді (800 мг) дені сау еріктілерде силденафилмен (50 мг дозадағы) бір мезгілде қолдану, қан плазмасындағы силденафил концентрациясының 56%-ға артуын тудырады. Грейпфрут шырыны силденафилдің ішек жақтауындағы CYP3A4 арқылы жүретін метаболизмінің әлсіз тежегіші болып табылады және қан плазмасындағы деңгейлерінің орташа жоғарылауын тудыруы мүмкін. Антацидтік дәріні (магний гидроксидін/алюминий гидроксидін) бір рет қабылдау силденафилдің биожетімділігіне әсер етпейді. Барлық дәрілік препараттармен өзара әрекеттесулеріне арнайы зерттеулер жүргізілмесе де, популяциялық фармакокинетикалық талдау, CYP2C9 тежегіштері (толбутамид, варфарин, фенитоин), CYP2D6 тежегіштері (серотонинді кері қармайтын селективті тежегіштер, трициклдық антидепрессанттар), тиазидтік және тиазид тәрізді диуретиктер, ілмектік және калий жинақтаушы диуретиктер, ангиотензин өзгертуші фермент тежегіштері (АӨФ), кальций өзекшелерінің блокаторлары, бета-адренергиялық рецепторлардың блокаторлары және CYP450 метаболизмдік белсенділік индукторлары (рифампицин, барбитураттар) силденафил фармакокинетикасына әсер етпейтініні көрсетті. Дені сау ерікті ерлердің қатысуымен жүргізілген зерттеуде эндотелин антагонисі, тепе-теңдік жағдайындағы (тәулігіне екі рет 125 мг) бозентанды (CYP3A4, CYP2C9 және шамасы, CYP2C19 орташа индукторы) тепе-теңдік жағдайындағы (тәулігіне үш рет 80 мг) силденафилмен бір мезгілде қолдану силденафил үшін AUC және Cmax мәндерінің сәйкесінше 62,6% және 55,4%-ға төмендеуіне алып келеді. Осылайша, рифампицин сияқты CYP 3A4 күшті индукторларымен бір мезгілде қолдану, қан плазмасындағы силденафил концентрациясының анағұрлым айқын төмендеуіне түрткі болады деп шамаланады. Никорандил - бұл кальций өзекшелерінің активаторы мен нитраттың гибриді. Нитраттық компонентіне байланысты, силденафилмен елеулі өзара әрекеттестікке түсуі мүмкін. ФДЭ-5 басқа тежегіштерімен немесе эректильді дисфункция кезінде емдеуге арналған басқа әдістермен бір мезгілде қолдану Силденафилді ФДЭ-5 басқа тежегіштерімен немесе құрамында силденафил бар, өкпе артериясының гипертензиясын (ӨАГ) емдеуге арналған басқа препараттармен немесе эректильді дисфункцияны емдеуге арналған басқа препараттармен біріктіріп қолданудың қауіпсіздігі мен тиімділігі зерттелмеген. Соған байланысты, мұндай препараттардың мұндай біріктірілімін пайдалану ұсынылмайды. Никорандил калий өзекшелері активаторының және нитраттың гибриді. Нитраттық компонентінің есебінен ол силденафилмен елеулі өзара әрекеттесуге қабілетті болуы ықтимал. Силденафилдің басқа дәрілік заттарға әсері In vitro зерттеулер Силденафил Р450 цитохромының 1А2, 2С9, 2С19, 2D6, 2Е1 және 3А4 изоформаларының (IC50> 150 мкМ) әлсіз тежегіші болып табылады. Препараттың ұсынылған дозаларын қабылдағаннан кейін силденафилдің қан плазмасындағы ең жоғары концентрациясы шамамен 1 мкМ құрайтын болғандықтан, силденафилдің осы изоферменттер субстраттарының клиренсін өзгерту ықтималдығы аз. Силденафилдің теофиллин немесе дипиридамол сияқты фосфодиэстеразаның спецификалық емес тежегіштерімен өзара әрекеттесуі туралы деректер жоқ. In vivo зерттеулер Силденафилдің NO/цГМФ дабыл жолына белгілі әсеріне сәйкес, силденафил нитраттардың гипотензиялық әсерін күшейтуге қабілетті. Сондықтан оны азот тотығының донаторларымен (мысалы, амилнитритпен) немесе нитраттардың кез келген түрімен бір мезгілде қолдануға болмайды. Риоцигуат Риоцигуат ФДЭ-5 тежегіштерінің гипотензиялық әсерін күшейткен. Зерттелген популяцияда мұндай біріктірілімді қолдану кезіндегі жағымды клиникалық әсері туралы деректер болмаған. Риоцигуатты ФДЭ-5 тежегіштерімен, оның ішінде силденафилмен бір мезгілде қолдануға болмайды. Альфа-адренорецепторлардың блокаторларымен ем қабылдап жүрген пациенттерде силденафилді бір мезгілде қолдану, кейбір сезімтал пациенттерде симптоматикалық артериялық гипотензияның туындауына алып келуі мүмкін. Негізінен бұл, силденафилдің дозасын қабылдағаннан кейін 4 сағат ішінде байқалуы мүмкін. Дәрілік препараттардың өзара әрекеттесулеріне жүргізілген арнайы үш зерттеудің барысында альфа-блокатор доксазозин (4 мг және 8 мг) мен силденафил (25 мг, 50 мг немесе 100 мг) қуықасты безінің қатерсіз гиперплазиясы (ҚБҚГ) бар, доксазозинмен емдеудің көмегімен тұрақтандырылған пациенттерде бір мезгілде қолданылды. Пациенттердің зерттеудегі бұл топтарында шалқадан жатқан қалыптағы артериялық қысымның қосымша 7/7 мм с.б., 9/5 мм с.б.. және 8/4 мм с.б. орташа төмендеуі байқалды, ал тұрған қалыптағы артериялық қысымның қосымша орташа төмендеуі сәйкесінше 6/6 мм с.б., 11/4 мм с.б. және 4/5 мм с.б. құрады. Доксазозинмен емдеудің көмегімен тұрақтандырылған пациенттерде силденафил мен альфа- блокатор доксазозинді бір мезгілде қолданғанда, ортостаздық артериялық гипотензия, бас айналуы және естен тану емес, бірақ естен тану алдындағы жай-күй туындаған сирек жағдайлар туралы хабарланды. Силденафилді (50 мг дозада) CYP2C9 арқылы метаболизденетін толбутамидпен (250 мг дозада) немесе варфаринмен (40 мг дозада) бір мезгілде қолданғанда, өзара әрекеттесулері анықталмады. Силденафил (50 мг дозада) ацетилсалицил қышқылын (150 мг дозада) қабылдаудан туындаған қан кету уақытының ұзаруына ықпал етпейді. Қандағы алкоголдің орташа ең жоғары деңгейлері 80 мг/дл болған кезде, силденафил (50 мг дозада) дені сау еріктілерде алкогольдің гипотензиялық әсерінің күшеюіне ықпал етпейді. Гипотензиялық дәрілік препараттардың келесі кластары: диуретиктер, бета-блокаторлар, АӨФ тежегіштері, ангиотензин II антагонистері, гипертензияға қарсы, тамырды кеңейтетін дәрілік заттар және гипертензияға қарсы, орталықтық әсері бар дәрілік заттар, адренергиялық нейрондардың блокаторлары, кальций өзекшелерінің блокаторлары және альфа-адренорецепторлардың блокаторлары - плацебо қабылдайтын пациенттермен салыстырғанда, силденафилді қабылдап жүрген пациенттердегі жағымсыз әсерлерінің бейініндегі айырмашылықтарға ықпалын тигізбеді. Дәрілік заттардың өзара әрекеттесулеріне жүргізілген, барысында 100 мг дозадағы силденафил артериялық гипертензиясы бар пациенттерде амлодипинмен бір мезгілде қолданылған арнайы зерттеулерде, шалқадан жатқан қалыптағы систолалық артериялық қысымның қосымша төмендеуі 8 мм. с.б. құрады. Шалқадан жатқан қалыптағы диастолалық артериялық қысымның тиісінше қосымша төмендеуі 7 мм. с.б. құрады. Артериялық қысымның бұл қосымша төмендеулері шамалары жағынан, силденафилді дені сау еріктілерде монотерапия ретінде пайдаланған кезде байқалғандармен ұқсас болды. Силденафил (100 мг дозада) АИТВ протеазасының тежегіштері, CYP3A4 субстраттары болып табылатын саквинавир мен ритонавирдің тепе тең күйінің фармакокинетикасына әсер етпейді. Дені сау ерікті ерлерде бозентанмен бір мезгілде қолданғанда силденафил тепе-теңдік жағдайда (тәулігіне үш рет 80 мг) бозентанның AUC пен Cmax (тәулігіне екі рет 125 мг) сәйкесінше 49,8 % және 42 %-ға жоғарылауын тудырады.

Сақтау мерзімі 3 жыл Жарамдылық мерзімі өткеннен кейін қолдануға болмайды! Сақтау шарттары 25 ºС-ден аспайтын температурада сақтау керек. Балалардың қолы жетпейтін жерде сақтау керек!