Танафил-10, Танафил-20 таблетки 20 мг

Бір таблетканың құрамында белсенді зат - тадалафил 10,00 мг және 20,00 мг қосымша заттар: микрокристалды целлюлоза (РН 101), лактоза моногидраты, натрий кроскармеллозасы, гидроксипропилцеллюлоза, 2-пропанол*, дихлорметан*, микрокристалды целлюлоза (РН 102), натрий лаурилсульфаты, магний стеараты қабығы: Опадри® сары 03F520550# (10 мг доза үшін), Опадри® көгілдір 03F505180## (20 мг доза үшін), 2-пропанол*, дихлорметан* # Құрамы: гипромеллоза, титанның қостотығы (Е171), полиэтиленгликоль/макрогол, индигокармин негізіндегі алюминий лагы (Е132) ## Құрамы: гипромеллоза, титанның қостотығы (E171), полиэтиленгликоль/макрогол, темірдің сары тотығы (E172) * дайын өнімде болмайды Сыртқы түрінің, иісінің, дәмінің сипаттамасы Ромб пішінді, екі беті дөңес, екі жағы тегіс, сары түсті үлбірлі қабықпен қапталған таблеткалар (10 мг доза үшін). Ромб пішінді, екі беті дөңес, екі жағы тегіс, көк түсті үлбірлі қабықпен қапталған таблеткалар (20 мг доза үшін).

• ер жынысты ересек пациенттерде эректильді дисфункцияны емдеу. Эректильді дисфункцияны емдегенде тадалафилдің әсері білінуі үшін сексуалдық стимуляция қажет. Препарат әйел адамдарға қолдануға арналмаған.

Әсер ету механизмі Тадалафил циклді гуанозин монофосфатының (цГМФ) 5 типті спецификалық фосфодиэстеразаның (ФДЭ5) қайтымды селективті тежегіші болып табылады. Сексуалдық қозу азот тотығының жергілікті шығарылуын туындатқанда, ФДЭ-5 тадалафилмен тежелуі жыныс мүшесінің кавернозды денесінде цГМФ деңгейінің жоғарылауына әкеледі. Артериялардың тегіс бұлшықеттерін босаңсыту және жыныс мүшесі тіндеріне қан ағымы осының салдары болып табылады, бұл эрекцияны тудырады. Препарат сексуалдық стимуляция болмағанда әсер бермейді. Фармакодинамикалық әсерлер Іn vitro зерттеулер сондай-ақ ФДЭ-5 бұл кавернозды дененің тегіс бұлшықеттерінде, ішкі ағзалардың тегіс тамырлы бұлшықеттерінде, қаңқа бұлшықеттерінде, тромбоциттерде, бүйректе, өкпеде және мишықта кездесетін фермент болып табылатынын көрсетті. Тадалафилдің ФДЭ-5-ке әсері басқа фосфодиэстеразаларға қарағанда күшті. Тадалафил жүрекке, миға, қантамырларға, бауырға және басқа ағзаларға шоғырланған ФДЭ-1, ФДЭ-2, ФДЭ-4-ке қарағанда ФДЭ-5-ке қатысты 10 000 есе тиімдірек болып табылады. Тадалафил жүрек пен қантамырларда кездесетін фермент ФДЭ-3-ке қарағанда ФДЭ-5-ті 10000 есе белсендірек бөгейді. ФДЭ-3-пен салыстырғанда ФДЭ-5-ке қатысты бұл селективтілігі өте маңызды, себебі ФДЭ-3 жүрек бұлшықетінің жиырылуына қатысатын фермент болып табылады. Сонымен қатар, тадалафил көздің тор қабығында орналасқан және фотоберілуге жауап беретін фермент ФДЭ-6-ға қарағанда, ФДЭ-5-ке қатысты шамамен 700 есе белсенді болып табылады. Тадалафил сондай-ақ, ФДЭ-10 арқылы ФДЭ-7-ге оның әсерімен салыстырғанда ФДЭ-5-ке 10 000 есе күшті әсер етеді. Клиникалық тиімділігі мен қауіпсіздігі Организмнің препаратқа жауап беру ұзақтығын анықтау үшін үш клиникалық зерттеу жүргізілді, оның барысында 1054 пациент препаратты үйде қабылдады. Плацебомен салыстырғанда тадалафил эректильді функцияның статистикалық маңызды жақсарғанын және қабылдағаннан кейін 36 сағатқа дейінгі кезеңде толық жыныстық қатынас жасау мүмкіндігін, сондай-ақ пациенттердің препаратты қабылдағаннан кейін 16 минуттан соң толық жыныстық қатынас үшін эрекцияға қол жеткізу және ұстап тұру қабілетін көрсетті Дені сау адамдардағы Тадалафил дені сау адамдарда систолалық және диастолалық қысымның плацебомен салыстырғанда жатқан (орташа ең жоғары төмендеу сәйкесінше 1,6/0,8 мм сын.бағ. құрайды) және тұрған (орташа ең жоғары төмендеу сәйкесінше 0,2/4,6 мм сын.бағ. құрайды) жағдайында елеулі өзгеріс тудырмайды. Тадалафил жүректің жиырылу жиілігінің айтарлықтай өзгеруін тудырмайды. Тадалафилдің көру қабілетіне әсерін зерттеу оның Фарнсворт-Манселлдің 100 реңкті сынағында анықталған түстерді тануда (көк/жасыл) өзгерістер тудырмайтынын көрсетті. Бұл тұжырым тадалафилдің ФДЭ-6-мен салыстырғанда ФДЭ-5-пен төмен тектестікке сәйкес келеді. Түсті көрудің өзгеруі туралы хабарламалар барлық клиникалық сынақтарда сирек (<0,1%) болды. Препаратты 10 мг (бір 6 айлық зерттеу) және 20 мг (бір 6 айлық және бір 9 айлық зерттеу) препаратын күнделікті қабылдаудың сперматогенезге ықтимал әсерін бағалау мақсатында еркек пациенттерде үш зерттеу жүргізілді. Осы зерттеулердің екеуінде тадалафилмен емдеумен байланысты сперматозоидтар санының азаюы және олардың клиникалық маңызы аз концентрациясы байқалды. Бұл әсерлер ұтқырлық, морфология және ФСГ сияқты басқа параметрлердің өзгеруіне байланысты болмады. Тадалафилдің 2-ден 100 мг дейінгі дозалардағы тиімділігі әр түрлі ауырлық дәрежесіндегі (жеңіл, орташа, ауыр) эректильді дисфункциясы бар пациенттерді, этиологиясын, жасын (21 жастан 86 жасқа дейін) және этностық топтарын қоса алғанда, 3250 пациенттің қатысуымен 16 клиникалық зерттеуде бағаланды. Пациенттердің көпшілігі кем дегенде 1 жыл бойы эректильді дисфункцияның болғанын хабарлады. Жалпы популяциядағы тиімділіктің алғашқы зерттеулерінде пациенттердің 81%-ы препараттың эрекцияны жақсартқанын, ал плацебо қабылдаған кезде мұндай пациенттердің 35% болғанын хабарлады. Сонымен қатар, барлық ауырлық дәрежесіндегі эректильді дисфункциясы бар пациенттер препаратты қабылдау кезінде эрекцияның жақсарғанын атап өтті (плацебо қабылдаған топтағы 45%, 42% және 19% салыстырғанда, сәйкесінше, 86%, 83% және 72% жеңіл, орташа және ауыр түрінде). Тиімділік бойынша алғашқы зерттеулерде плацебо қабылдаған топтағы 32% салыстырғанда, препаратты қабылдаған пациенттерде жыныстық қатынасқа түсу әрекеттерінің 75% сәтті болды. Жұлынның зақымдануы нәтижесінде дамыған эректильді дисфункциясы бар 186 пациентке (142 - тадалафил және 44 - плацебо қабылдады) жүргізілген 12 апталық зерттеуде тадалафил эректильді функцияны едәуір жақсартты, бұл тадалафилді 10 немесе 20 мг қабылдаған адамдарда сәтті әрекеттердің орташа үлесінің (қажет болған жағдайда икемді дозалау режимі) плацебо тобындағы 17%-бен салыстырғанда 48%-ға өсуіне әкелді. Балалар Дюшен бұлшықет дистрофиясына (ДБД) шалдыққан балалардың қатысуымен бір ғана зерттеу жүргізілді, онда препараттың тиімділігі туралы ешқандай дәлел жоқ. Тадалафилді рандомизацияланған салыстырмалы жасырын плацебо-бақыланатын зерттеуге 3 қатарлас топта ДБД-мен ауыратын және бір мезгілде кортикостероидтармен ем алатын 7 жастан 14 жасқа дейінгі 331 бала қатысты. Зерттеуге 48 апталық салыстырмалы жасырын кезең кірді, оның барысында пациенттер 0,3 мг/кг немесе 0,6 мг/кг немесе плацебо дозасында тадалафилді күнделікті қабылдауға рандомизацияланды. Зерттеуде тадалафилдің тиімділігі көрсетілмеді, ол қозғалу қабілетінің төмендеуінің баяулауында көрінуі керек еді, бұл 6 минут (6MWD) ішінде қашықтықты бағалайтын бастапқы соңғы нүкте бойынша өлшенді: ең аз квадраттар әдісімен (ЕАКӘ) есептелген 48 аптадағы 6MWD орташа өзгерісі (MNC) 0,3 мг/кг (p = 0,307) дозада тадалафил тобындағы -64,7 м-мен салыстырғанда плацебо тобында -51,0 метр (м) және 0,6 мг/кг (p = 0,538) дозада тадалафил тобында -59,1 метрді құрады. Сонымен қатар, зерттеу аясында жүргізілген қайталама талдаулардың ешқайсысында препараттың тиімділігі туралы дәлелдер алынған жоқ. Осы зерттеудегі қауіпсіздіктің жалпы нәтижелері жалпы алғанда тадалафилдің белгілі қауіпсіздік бейінімен және кортикостероидтар алатын ДБД бар педиатриялық пациенттерде күтілетін жағымсыз құбылыстардың бейінімен келісілді. Еуропалық дәрілік заттардың айналымын бақылау агенттігі фармацевтикалық компанияларды балалар популяциясының барлық кіші топтарында эректильді дисфункцияны емдеу туралы зерттеу нәтижелерін ұсыну міндетінен босатты. Педиатрияда қолдану туралы ақпарат алу үшін 4.2 бөлімін қараңыз.

Дозалау режимі Ересек еркектер Болжамды сексуалдық белсенділік алдындағы әдеттегі ұсынылатын доза, тамақ ішуге қарамай, 10 мг құрайды. Егер 10 мг тадалафил қабылдау қажетті реакция бермесе, онда дозасы 20 мг-ға дейін арттырылуы мүмкін. Препаратты болжамды сексуалдық белсенділіктен ең кемінде 30 минут бұрын қабылдаған жөн. Препаратты ұсынылған дозада қабылдаудың ең жоғары жиілігі – тәулігіне бір рет. Тадалафил 10 мг дозада болжамды сексуалдық белсенділік алдында қабылдауға арналған және үздіксіз күн сайын қолдануға ұсынылмаған. Препаратты жиі (яғни аптасына екі реттен жиі емес) қабылдау күтілетін пациенттер үшін, пациенттің таңдауына және емдеуші дәрігердің таңдауына сәйкес, тәулігіне өте аз дозада бір реттік жиілікпен қабылдаудың қолайлы сызбасы құрастырылуы мүмкін. Мұндай пациенттер үшін тәулігіне шамамен белгілі бір уақытта бір рет 5 мг доза ұсынылады. Препаратты күнделікті қабылдауды жалғастырудың орындылығына тұрақты бағалау жүргізу қажет. Пациенттердің ерекше топтары Егде жастағы еркектер Егде жастағы пациенттер үшін дозаны түзету қажет емес. Бүйрек функциясының жеткіліксіздігі бар еркектер Бүйрек функциясының жеңіл және орташа жеткіліксіздігі бар пациенттер үшін дозаны түзету қажет емес. Бүйрек функциясының ауыр жеткіліксіздігі бар пациенттер үшін ұсынылатын препараттың ең жоғары дозасы 10 мг құрайды. Ауыр бүйрек жеткіліксіздігі бар пациенттерге тадалафилді күнделікті қабылдау ұсынылмайды. Бауыр функциясының жеткіліксіздігі бар еркектер Эректильді дисфункцияны емдеу үшін препараттың ұсынылатын дозасы, тамақ ішуге қарамай, болжамды сексуалдық белсенділік алдында 10 мг құрайды. Бауыр функциясының ауыр бұзылулары бар (Чайлд-Пью шкаласы бойынша С класы) пациенттерде препаратты қолданудың қауіпсіздігі жөніндегі клиникалық деректер шектеулі. Осы препаратты тағайындаған жағдайда, дәрігер оның пайдасы мен қаупінің арақатынасын мұқият жекелей бағалауға сүйене отырып тағайындауы тиіс. Бауыр функциясының жеткіліксіздігі бар пациенттерде тадалафилді 10 мг-ден асатын дозаларда қабылдау жөнінде деректер жоқ. Диабеттен зардап шегіп жүрген еркектер Қант диабетімен ауыратын пациенттер үшін дозаны түзету қажет емес. Балалар Препарат балалардағы эректильді дисфункцияны емдеу үшін қолданылмайды. Енгізу әдісі және жолы Препарат пероральді қолданылады. Қабылдау уақыты көрсетілген қолдану жиілігі 10 мг және 20 мг дозадағы Тадалафил болжамды сексуалдық белсенділік алдында қолдануға арналған және күнделікті үздіксіз қолдануға ұсынылмайды.

• әсер етуші затқа немесе «Қосымша мәліметтер» бөлімінде атап көрсетілген қосымша заттардың кез келгеніне аса жоғары сезімталдық; • құрамында органикалық нитраттардың кез келген түрлері бар препараттарды қабылдау; • сексуалдық белсенділік ұсынылмайтын, жүрек-қантамырлар ауруларына шалдыққан ер адамдарға. Дәрігерлер осындай аурулары бар пациенттерде сексуалдық белсенділік кезінде жүрек-қантамырлар асқынуларының ықтимал қауіптерін ескеруі керек; • тадалафил қабылдау жүрек-қантамырлары аурулары бар пациенттердің келесі тобына қарсы көрсетілім болып табылады: - соңғы 90 күн ішінде миокард инфарктімен ауырған пациенттер, - тұрақсыз стенокардиясы бар болған немесе, жыныстық қатынас кезінде стенокардия ұстамасы пайда болған пациенттер, соңғы 6 ай ішінде Нью-Йорк кардиологиялық ассоциациясының (NYHA) жіктеуі бойынша, жүрек функциясының ІІ және одан жоғары класқа жататын жеткіліксіздігі анықталған пациенттер, - жүрек ырғағының бақыланбайтын бұзылуы, гипотензиясы (АҚ ˂90/50 мм с.б.) немесе бақыланбайтын артериялық гипертензиясы бар пациенттер, - соңғы 6 ай ішінде инсультті бастан кешкен пациенттер; • бұдан бұрын ФДЭ-5 тежегішінің әсерімен байланысты екендігіне-еместігіне тәуелсіз, артериитпен байланысты емес алдыңғы ишемиялық оптикалық нейропатия (NAION) салдарынан бір көзі көрмей қалған пациенттерге қолдануға болмайды; • тадалафилді қоса, ФДЭ-5 тежегіштерін риоцигуат сияқты гуанилатциклаза стимуляторларымен бірге қабылдауға болмайды, өйткені симптоматикалық гипотонияның дамуына потенциалды түрде әкеп соғуы мүмкін.

Жиі - бас ауыру - гиперемия - мұрынның бітелуі - диспепсия - арқаның ауыруы, миалгия, аяқ-қолдың ауыруы Жиі емес - аса жоғары сезімталдық реакциялары - бас айналу - көрудің бұлынғырлануы, көздегі ауыру сияқты сипатталған сезімдер - құлақтағы шуыл - тахикардия, жүрек қағуы - гипотензия, артериялық гипертензия - ентігу, мұрыннан қан кету - іштің ауыруы, құсу, жүректің айнуы, гастро-эзофагеальді рефлюкс - бөртпе - гематурия - ұзаққа созылатын эрекция - кеуденің ауыруы, шеткері ісіну, қажығыштық Сирек - Квинке ісінуі - инсульт (соның ішінде геморрагиялық), естен тану, ми қанайналымының өткінші ишемиялық бұзылуы, бас сақинасы, құрысулар, өтпелі амнезия - көру ауқымының тарылуы, қабақтың ісінуі, конъюнктива гиперемиясы, артериитпен байланысты емес алдыңғы ишемиялық оптикалық нейропатия, торқабық тамырларының окклюзиясы - кенеттен естімей қалу - миокард инфарктісі, тұрақсыз стенокардия, қарыншалық аритмия - есекжем, Стивенс-Джонсон синдромы, эксфолиативті дерматит, гипергидроз (тершеңдік) - приапизм, жыныс мүшесінен қан кету, гематоспермия - беттің ісінуі, жүректен болатын кенет өлім Белгісіз (қолда бар деректер негізінде бағалау мүмкін емес) - орталық серозды хориоретинопатия (ОСХ) Жағымсыз дәрілік реакциялар туындағанда медициналық қызметкерге, фармацевтикалық қызметкерге немесе, дәрілік препараттардың тиімсіздігі туралы хабарламаларды қоса, дәрілік препараттарға болатын жағымсыз реакциялар (әсерлер) жөніндегі ақпараттық деректер базасына тікелей хабарласу керек Қазақстан Республикасы Денсаулық сақтау министрлігі Медициналық және фармацевтикалық бақылау комитетінің «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

Препарат артық дозаланған жағдайда қажет болғанда стандартты демеуші шаралар қабылдануы тиіс. Гемодиализ тадалафилдің шығарылуын іс жүзінде тездетпейді. Дәрілік препаратты қолдану әдісін түсіндіріп беру үшін медициналық қызметкерден кеңес алу жөніндегі ұсынымдар Препаратты қолдануға қатысты сұрақтар туындаған жағдайда емдеуші дәрігеріңізге қаралыңыз.

Танафилмен емдеуді бастар алдында - дәрілік препараттардың көмегімен емдеу жөнінде шешім қабылдағанға дейін эректильді дисфункцияны және ықтимал негізгі себептерін анықтау үшін пациенттің ауру тарихын зерттеу және физикалық тексеру жүргізу қажет; - эректильді дисфункцияның кез келген емін бастағанға дейін пациенттің жүрек-қантамыр жүйесінің жағдайына баға беру қажет, өйткені сексуалдық белсенділікпен байланысты жүрек-қантамыр жүйесі тарапынан асқынулардың пайда болуының белгілі бір қаупі бар. Тадалафилдің қантамырларды кеңейтетін қасиеттері бар, соның нәтижесінде артериялық қысымның жеңіл және өткінші төмендеуін туындатады және осылайша нитраттардың гипотензиялық әсерін күшейтеді; - эректильді дисфункцияға баға беруге тиісінше медициналық тексеру жүргізуден кейін потенциалды себептерін және тиісті емдеу әдістерін анықтау қамтылуы тиіс. Жамбас ағзаларына немесе жүйкені сақтамайтын радикальді простатэктомия операциясын бастан кешкен пациенттерде препаратың тиімділігі зерттелген жоқ; Жүрек-қантамыр аурулары - маркетингтен кейінгі бақылау аясында және/немесе клиникалық сынақтар барысында миокард инфарктісін, жүректен болатын кенет өлімді, тұрақсыз стенокардияны, қарыншалық аритмияны, инсультті, ми қан айналымының өткінші бұзылуларын, кеуденің ауыруын, жүректің қағуын және тахикардияны қоса, күрделі жүрек-қантамыр асқынулары тіркелді. Осы асқынулар тіркелген пациенттердің көбісі жүрек-қантамыр ауруларының даму қаупі бар топқа жатты. Дегенмен, осы оқиғалардың жүрек-қантамыр ауруларының қатар жүруімен, препаратты қабылдаумен, сексуалдық белсенділікпен, немесе осы немесе басқа да факторлардың біріктірілімімен тікелей байланысты екендігін-еместігін жоғары дәрежеде сенімді түрде анықтау мүмкін емес. Альфа-блокаторларды қабылдау аясында препаратты қабылдау кейбір пациенттерде симптоматикалық гипотензияға әкелуі мүмкін. Тадалафил мен доксазозинді біріктіру ұсынылмайды; Көру - Препаратты және ФДЭ-5 басқа да тежегіштерін қабылдаумен байланысты орталық серозды хориоретинопатияны (ОСХ) қоса, көрудің бұзылулары және артериитпен байланысты емес алдыңғы ишемиялық оптикалық нейропатия (NAION) жағдайлары тіркелді. ОСХ жағдайларының көпшілігі тадалафилді тоқтатқаннан кейін өздігінен басылған. NAION қатысты алғанда, пациенттер көзінің көруі кенеттен бұзылған жағдайда, ол препаратты қабылдауды тоқтатуы және дереу дәрігерге қаралуы керек екендігінен хабардар болуы тиіс. Есту қабілетінің төмендеуі немесе кенеттен жоғалуы - препаратты қолданғаннан кейін естуден кенет айырылу жағдайлары тіркелді. Кейбір жағдайларда қауіп факторлары бар (мысалы, жасы, қант диабеті, гипертония және анамнездегі мұның алдында естуден айырылу жағдайлары) болса да, пациенттерге препаратты қабылдауды тоқтатуға және естуі күрт нашарлаған немесе естімей қалған жағдайда дәрігерге қаралу керектігіне кеңес берген жөн; Бауыр жеткіліксіздігі - бауыр функциясының ауыр жеткіліксіздігі бар (Чайлд-Пью шкаласы бойынша С класы) пациенттердің препаратты бір реттік қабылдауының қауіпсіздігі жөнінде деректер шектеулі. Препаратты тағайындаған жағдайда емдеуші дәрігер жекелей мұқият баға беру арқылы пайдасы мен қаупінің арақатынасын қорытындылауы тиіс; Приапизм және жыныс мүшесінің анатомиялық деформациясы - пациенттер 4 сағатқа және одан көпке созылатын эрекция пайда болған жағдайда дереу медициналық жәрдемге жүгіну керектігінен хабардар болуы тиіс. Приапизмді дер кезінде емдемеу жыныс мүшесі тінінің зақымдануына және потенцияның тұрақты жоғалуына әкеп соғуы мүмкін; - Препаратты жыныс мүшесінің анатомиялық деформациясы бар (мысалы, бұрыштық қисаю, кавернозды фиброзда немесе Пейрони ауруында) пациенттерге немесе приапизмге бейім (мысалы, орақ-жасушалы анемияда, көптеген миеломада немесе лейкемияда) пациенттерде сақтықпен қолданған жөн; CYP3A4 тежегіштерімен біріктіріп қолдану - препаратты күшті әсер ететін CYP3A4 тежегіштерін (ритонавир, саквинавир, кетоконазол, итраконазол және эритромицин) қабылдап жүрген пациенттерге тағайындағанда сақтық танытқан жөн, өйткені осы дәрілік заттарды бір мезгілде қабылдағанда қан плазмасындағы концентрацияларының жоғарылағаны байқалды; Танафил және эректильді дисфункцияны емдеудің басқа әдістерін біріктіру - Препаратты басқа ФДЭ-5 тежегіштерімен және эректильді дисфункцияны емдеудің басқа әдістерімен біріктірудің қауіпсіздігі мен тиімділігі зерттелген жоқ. Пациенттер препаратты осындай біріктіріліммен бірге қабылдауға жол бермеу керектігінен хабардар болуы тиіс; - қолданылмаған дәрілік препарат немесе шығын материалдары жергілікті талаптарға сәйкес утилизациялануы керек. Арнайы сақтандырулар Қосымша заттарға қатысты ерекше нұсқаулар Лактоза Препараттың әр таблетка құрамында 120.00 мг лактоза бар (моногидрат ретінде). Тұқым қуалайтын галактоза жақпаушылығы, Lapp (ЛАПП)-лактаза ферменті тапшылығы, глюкоза-галактоза мальабсорбциясы бар адамдарға қолдануға болмайды. Натрий мөлшері Бұл дәрілік препараттың құрамында дозасына 1 ммольден (20.00 мг) аз натрий бар, яғни іс жүзінде натрий жоқ деп санауға болады. Педиатрияда қолдану Препарат балаларда қолданылмайды. Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері Препарат автомобильді басқару немесе механизмдермен жұмыс жасау қабілетіне аздаған ықпалын тигізуі мүмкін. Клиникалық сынақтарда плацебо және тадалафилді қабылдағанда бас айналу жөніндегі мәлімдемелер жиілігі ұқсас болса да, пациенттер автомобильді басқару немесе механизмдермен жұмыс жасауды бастар алдында олардың препарат реакциясының ерекшеліктері жөнінде білуі тиіс.

Препарат препараты әйелдерге қолдануға арналмаған.

Басқа заттардың тадалафилге ықпалы Р450 цитохромының тежегіштері Тадалафилдің метаболизмі негізінен CYP3А4 ферментінің әсер етуімен жүреді. Кетоконазолды (күніне 200 мг дозада), CYP3A4 селективті тежегішін қабылдау, тадалафилмен монотерапия кезіндегі көрсеткіштермен салыстырғанда, тадалафилдің (10 мг) плазмалық концентрациясын (AUC) 2 есе және Cmax 15%-ға арттырады. Кетоконазолды (күніне 400 мг) қабылдау тадалафилдің (20 мг) плазмалық концентрациясын 4 есе және Cmax 22%-ға арттырады. Ритонавир (күніне екі рет 200 мг), CYP3A4, CYP2C9, CYP2C19 және CYP2D6 тежегіштері болып табылатын протеаза тежегіші тадалафилдің (20 мг) плазмалық концентрациясын Cmax өзгертусіз 2 есеге арттырады. Спецификалық өзара әрекеттесулері зерттелмесе де, саквинавир сияқты протеазаның басқа тежегіштер және эритромицин, кларитромицин, итраконазол және грейпфрут шырыны сияқты CYP3A4 басқа тежегіштері тадалафилмен бірге сақтықпен қабылдануы тиіс, өйткені тадалафилдің плазмалық концентрациясының артатындығын күтуге болады. Нәтижесінде жағымсыз реакциялар жиілеуі мүмкін. Тасымалдаушылар Тасымалдаушылардың (мысалы, р-гликопротеиннің) тадалафилдің фармакокинетикасындағы рөлі зерттелген жоқ. Сондықтан тасымалдаушылардың тежелуі арқылы дәрілік өзара әрекеттесудің болуы ықтимал. Р450 цитохромының индукторлары CYP3A4 индукторы рифампицин, жеке қабылдаған кездегі тадалафилдің (10 мг) плазмалық концентрациясымен салыстырғанда, тадалафилдің плазмалық концентрациясын 88%-ға төмендетеді. Плазмалық концентрациясының төмендеуі тадалафилдің тиімділігінің азаюына әкелуі мүмкін, алайда тиімділігінің осындай азаюының айқындылық дәрежесі зерттелген жоқ. CYP3A4 басқа да фенобарбитал, фенитоин және карбамазепин сияқты индукторлары сондай-ақ тадалафилдің плазмалық концентрациясын азайтуы мүмкін. Тадалафилдің басқа дәрілік заттарға ықпалы Нитраттар Тадалафилдің (5, 10 және 20 мг) нитраттардың гипотензиялық әсерін күшейтетіні анықталды. Сондықтан препаратты органикалық нитраттардың кез келген түрін қабылдап жүрген пациенттердің қабылдауына болмайды. Осылайша, егер препаратты кез келген дозада (5 мг - 20 мг) қабылдап жүрген пациенттерде нитраттарды қолдану өмірге қауіп төнген жағдайларда қажет деп саналса, нитраттарды қолдану жөніндегі шешімге дейін препараттың соңғы дозасын қабылдағаннан кейін ең кемінде 48 сағат өтуі тиіс. Мұндай жағдайларда нитраттарды адекватты гемодинамикалық мониторингпен бірге қатаң медициналық бақылаумен ғана қолданған жөн. Гипертензияға қарсы дәрілер (кальций өзекшелерінің блокаторларын қоса) Доксазозинді (күніне 4 және 8 мг) және тадалафилді (тәулігіне бір рет ұдайы қабылданатын 5 мг және бір реттік доза 20 мг) бірге қолдану осы альфа-блокатордың гипотензиялық әсерін едәуір күшейтеді. Осы әсер кем дегенде он екі сағатқа созылады, және естен тануды қоса, әртүрлі симптомдармен көрініс беруі мүмкін. Осы себепті осы препараттарды біріктіру ұсынылмайды. Дәрілердің өзара әрекеттесуіне жүргізілген зерттеулерде жоғарыда сипатталған әсер тадалафилді альфузозинмен немесе тамсулозинмен біріктірген кезде байқалған жоқ. Дегенмен, кез келген альфа-блокаторларды қабылдап жүрген пациенттерде, әсіресе егде жастағыларда тадалафилді қолданғанда сақтық танытқан жөн. Емдеуді ең төмен дозалардан бастап, дозаны сатылап қайта қарастыра отырып бастау керек. Гипертензияға қарсы дәрілік заттарды қабылдап жүрген пациенттерге артериялық қысымның ықтимал төмендеуі жөнінде алдын ала ескерту қажет. Риоцигуат Клиникаға дейінгі зерттеулер ФДЭ-5 тежегіштерін және риоцигуатты біріктіріп қолданғанда жүйелік артериялық қысымды қосымша төмендететін әсер беретінін көрсетті. Клиникалық зерттеулер барысында риоцигуат ФДЭ-5 тежегіштерінің гипотензиялық әсерінің күшейгенін көрсетті. Пациенттердің зерттелген топтарында осындай препараттарды біріктіргенде жағымсыз клиникалық әсерге ешқандай айғақтамалар алынған жоқ. Риоцигуатты ФДЭ-5 тежегіштерімен, тадалафилді қоса, біріктіріп қолдануға болмайды. 5-альфа-редуктаза тежегіштері Қуықасты безінің аденомасын симптоматикалық емдегенде 5 мг тадалафилді және 5 мг финастеридті бір мезгілде қолдануды плацебо және 5 мг финастеридті қабылдаумен салыстыратын клиникалық сынақтарда қандай да болсын жағымсыз реакциялардың басталғаны білінген жоқ. Дегенмен, тадалафилді және 5-альфа-редуктаза тежегіштерін бірге қолданудың салдарына қатысты дәрілік заттардың өзара әрекеттесуіне формальді зерттеу жүргізілмесе де, тадалафилді және 5-альфа-редуктаза тежегіштерін қатар тағайындағанда сақтық танытқан жөн. CYP1A2 субстраттары (мысалы, теофиллин) Дәрілік заттардың өзара әрекеттесуіне жүргізілген клиникалық зерттеулер барысында 10 мг тадалафилді теофиллинмен (фосфодиэстеразаның селективті емес тежегіші) бір мезгілде қолданғанда ешқандай фармакокинетикалық өзара әрекеттесулер байқалған жоқ. Жалғыз ғана фармакодинамикалық әсер жүректің жиырылу жиілігінің аздап артуы (минутына 3,5 соғу) болды. Осы әсер мардымсыз болып табылса да және осы зерттеуде клиникалық маңызы болмаса да, осы дәрілік заттарды бірге тағайындаған кезде мұны ескерген жөн. Этинилэстрадиол және тербуталин Тадалафилді пероральді түрде қабылдағанда этинилэстрадиолдың биожетімділігін арттыратын қабілетін көрсетті; осындай артудың клиникалық салдары анықталмаса да, осындай артуды тербуталинді пероральді түрде енгізген кезде күтуге болады. Алкоголь Тадалафилді (10 мг немесе 20 мг) бір мезгілде қабылдау алкогольдің концентрациясын арттырмайды (қандағы ең жоғары орташа концентрациясы 0,08%). Бұдан басқа, алкогольмен бірге енгізгеннен кейін 3 сағаттан соң тадалафилдің концентрациясында ешқандай өзгерулер байқалған жоқ. Алкогольді оның сіңу жылдамдығын барынша арттыратындай етіп (түнгі ашығудан кейін және алкоголь қабылдағаннан кейін 2 сағат бойы тамақ ішпей) енгізді. Тадалафил (20 мг) препараты алкогольдің әсерінен қан қысымының орташа төмендеуін арттырмайды (0,7 г/кг, ол салмағы 80 кг еркектің 180 мл 40% спиртті [арақ] қабылдауына ұқсас), бірақ бірқатар пациенттерде постуральді бас айналу және ортостаздық гипотензия байқалды. Тадалафилді алкогольдің өте төмен дозаларымен (0,6 г/кг) бірге енгізгенде гипотензия байқалған жоқ және бас айналу бір алкогольдің өзін қабылдаған кездегі жиілікте байқалды. Алкогольдің когнитивтік функцияларға ықпалы тадалафилді (10 мг) қабылдаған кезде өзгерген жоқ. P450 цитохромы-ферменттерімен метаболизденетін препараттар Тадалафил Р450 цитохромының изоформаларымен метаболизденетін дәрілік заттардың клиникалық тұрғыдан маңызды тежелуін және клиренсінің индукциясын туындатпайды. Зерттеулер тадалафилдің CYP3A4, CYP1A2, CYP2D6, CYP2E1, CYP2C9 және CYP2C19 қоса, Р450 цитохромы изоформаларын тежемейтінін және индукцияламайтынын айғақтады. CYP2C9 субстраттары (мысалы, R-варфарин) Тадалафил (10 мг және 20 мг) S-варфариннің немесе R-варфариннің (CYP2C9 субстраты) экспозициясына (AUC) клиникалық тұрғыдан маңызды ықпалы болған жоқ және варфаринмен индукцияланған протромбин уақытының өзгеруіне ықпалын тигізген жоқ. Аспирин Тадалафил (10 мг және 20 мг) ацетилсалицил қышқылының әсерін туындайтын қан кету ұзақтығын арттырмайды. Диабетке қарсы дәрілік заттар Диабетке қарсы дәрілік заттармен өзара әрекеттесуіне арнайы зерттеулер жүргізілген жоқ.

Сақтау мерзімі 3 жыл. Жарамдылық мерзімі өткеннен кейін қолдануға болмайды. Сақтау шарттары Құрғақ, жарықтан қорғалған жерде, 25°С-ден аспайтын температурада сақтау керек. Балалардың қолы жетпейтін жерде сақтау керек.