Тардокс капсулы 100 мг

Бір капсуланың құрамында белсенді зат ‒ доксициклин (хиклат түрінде), 100 мг, қосымша заттар: альгин қышқылы, магний стеараты, лактоза моногидраты, натрий лаурилсульфаты, жүгері крахмалы, капсула құрамы: индиготин (E 132), титанның қостотығы (E 171), темірдің тотығы (E 172), желатин Сыртқы түрінің, иісінің, дәмінің сипаттамасы Цилиндр пішінді, цилиндр негізінде дөңес келген, күңгірт-жасыл түсті қатты, мөлдір емес, «2» өлшемді желатин капсулалар. Капсуланың ішіндегісі ‒ сары түсті зат

Тардокс препараты доксициклинге сезімтал грамоң және грамтеріс бактериялар, сондай-ақ басқа микроорганизмдер тудыратын әртүрлі инфекцияларды емдеуде клиникалық тиімді. – тыныс алу жолдарының инфекциялары – пневмония және төменгі тыныс алу жолдарының Streptococcus pneumoniae, Haemophilus influenzae, Klebsiella pneumoniae, Moraxella catarrhalis, Mycoplasma pneumoniae сезімтал штаммдарынан туындаған басқа инфекциялары. Созылмалы бронхитті, синуситті емдеу; – несеп шығару жолдарының инфекциялары – Klebsiella species, Enterobacter species, Escherichia coli, Streptococcus faecalis сезімтал штаммдарынан, сондай-ақ басқа микроорганизмдерден туындаған инфекциялар; – Chlamydia trachomatis тудыратын жыныстық жолмен берілетін аурулар, соның ішінде үрпінің, эндоцервикальдің және тікішектің асқынбаған инфекциялары. Ureaplasma urealyticum (T-mycoplasma) тудыратын гонококктық емес уретрит; – Тардокс сонымен қатар Calymmatobacterium granulomatis туындатқан ауруларды емдеуде көрсетілген. Ол сондай-ақ, соз бен мерезді емдеуге арналған балама дәрілік препарат ретінде қолданылады; Доксициклин тетрациклиндер тобындағы антибиотик болғандықтан, ол басқа тетрациклиндерге жауап беретін инфекцияларды емдеуде тиімді болады деп болжау керек, мысалы: – көз инфекциялары – Тардокс трахоманы емдеуде көрсетілген, дегенмен қоздырғыштың элиминациясына қол жеткізу әрдайым мүмкін емес, мұны иммунофлуоресценттік зерттеу нәтижелері дәлелдейді. Конъюнктивитті емдеуді тек доксициклинмен немесе доксициклинді жергілікті қолданылатын препараттармен бірге қолдану арқылы жүргізуге болады; – риккетсиозды инфекциялар, мысалы, жартасты таулардың таңдақты қызбасы, сүзектер, Ку -қызбасы, Сoxiella endocarditis; – басқа инфекциялар: пситтакоз, бруцеллез (стрептомицинмен біріктірілімде), тырысқақ, оба, бит және кене арқылы қайталанатын қызба, соның ішінде Лайм-боррелиоз ауруының 1 және 2 сатысы, лептоспироз, туляремия, хлорохинге төзімді тропикалық безгек, ішектің жедел амебиазында доксициклин амебицидтік препараттарға пайдалы толықтырма болуы мүмкін, Bacteroides species, Listeria species және Bacillus anthracis сезімтал штаммдарынан туындаған инфекциялар. Тардокс – лептоспирозды, газ гангренасын және сіреспені емдеуге арналған балама препарат. Тардокс келесі аурулар кезінде профилактика ретінде көрсетілген: бөртпесүзек, Escherichia coli штаммдарынан туындаған саяхатшылардың диареясы, лептоспироз, безгек және тырысқақ

Жүйелі қолдануға арналған бактерияға қарсы препараттар. Тетрациклиндер. Доксициклин. АТХ коды J01AA02 Әсер ету механизмі Доксициклин – кең спектрлі әсер ететін тетрациклиндер тобына жататын синтетикалық антибиотик. Доксициклиннің бактериостаздық әсер ету механизмі ақуыз синтезін рибосомалық деңгейде тежеумен жүзеге асады. Доксициклин грамтеріс және грамоң бактерияларға, сондай-ақ басқа микроорганизмдерге қатысты кең спектрлі әсерге ие. Басқа тетрациклиндерге айқаспалы төзімділік өте жиі байқалады. Доксициклиннің майды еріткіштігі жоғары және кальцийге жақындығы төмен. Ол адамның қалыпты сарысуында өте тұрақты. Доксициклин эпианггидро түріне дейін ыдырамайды

Тардокс препаратын әрдайым дәрігердің нұсқауларына сәйкес қолдану керек. Күмән болған жағдайда дәрігерге қаралу қажет. Дозалау режимі • Ересектер • Бірінші тәулікте 200 мг доксициклин бір реттік дозада немесе 2 қабылдауға бөлінген дозада тағайындалады: әр 12 сағат сайын 100 мг, содан кейін демеуші дозаға ауысады: тәулігіне 100 мг. • Ауыр инфекциялар кезінде (әсіресе несеп шығару жолдарының созылмалы инфекциялары) емдеудің барлық кезеңінде тәулігіне 200 мг тағайындайды. • Кейбір аурулар кезінде ұсынылған дозалар – жыныстық жолмен берілетін аурулар: 7 күн бойы тәулігіне екі рет (әр 12 сағат сайын) 100 мг – келесі инфекциялар кезінде ұсынылады: үрпінің, эндоцервикальдің немесе тікішектің Chlamydia trachomatis тудырған асқынбаған инфекциясы; Ureaplasma urealyticum тудырған гонококктық емес уретрит; – гонококктық асқынбаған инфекциялар (ерлердегі аноректальдік инфекциялардан басқа): Цефтриаксон препаратымен (бұлшықет ішіне) біріктірілімде 7 күн бойы тәулігіне екі рет (әр 12 сағат сайын) 100 мг; – Chlamydia trachomatis немесе Neisseria gonorrhoeae тудырған жедел эпидидимо-орхит: Цефтриаксон препаратымен (бұлшықет ішіне) біріктірілімде 10 күн бойы тәулігіне екі рет 100 мг; – алғашқы және салдарлық мерез (пенициллинге сезімталдығы жоғары пациенттерде (жүкті емес)): балама ем ретінде күніне екі рет 14 күн бойы тәулігіне 100 мг-ден; – биттерден немесе кенелерден берілетін қайталанатын қызба және биттерден берілетін сүзек: ауырлық дәрежесіне байланысты бір реттік доза 100 мг немесе 200 мг; – ерте Лайм-боррелиоз: (1 және 2-кезең): клиникалық белгілерге, симптомдарға және пациенттің реакциясына байланысты 10-30 күн бойы тәулігіне екі рет 100 мг; – хлорохинге төзімді безгек (P. Falciparum): 7 күн бойы тәулігіне 200 мг (доксициклинді хининмен біріктірілімде тағайындау керек, әртүрлі аймақтарда хининнің дозасы бойынша ұсынымдар әртүрлі); – лептоспироз: 7 күн бойы күніне екі рет 100 мг. Профилактикалық қолдану кезіндегі доза – безгек: тәулігіне бір рет 100 мг (ересектерде) безгектің эндемиялық аймақтарына жоспарланған сапардан 1-2 күн бұрын, содан кейін сапар кезінде күн сайын және оралғаннан кейін 4 апта бойы; – ересектердегі тырысқақты емдеу және селективті профилактикасы үшін 300 мг бір реттік дозада; – сүзек:сүзектің алдын алу үшін: аптасына бір рет 200 мг бір реттік дозада; – ересектердегі саяхатшылардың диареясы: сапардың бірінші күнінде 200 мг (бір рет қабылдауда немесе тәулігіне екі рет 100 мг-дан), одан әрі жайсыз ауданда болған кезде тәулігіне бір рет 100 мг-дан (21 күннен аспайды); – лептоспироз: жайсыз ауданда болған кезде аптасына бір рет 200 мг (21 күннен аспайды) және сапар аяқталғаннан кейін бір рет 200 мг. Ең жоғары тәуліктік доза – 300 мг. Препаратты 21 күннен артық профилактикалық қолдану туралы деректер жоқ; – сезімтал Bacillus anthracis штаммдарынан туындаған инфекциялар: Ересектер: 60 күн бойы тәулігіне екі рет 100 мг. • Пациенттердің ерекше топтары • Егде жастағы пациенттер Дозаны өзгертудің қажеті жоқ. Алайда, бұл пациенттердің асқорыту жолы тарапынан жағымсыз әсерлерге аса сезімтал екенін есте ұстау қажет, сондықтан нұсқауларды тиянақты сақтауы тиіс («Арнайы сақтандырулар» бөлімін қараңыз). Бауыр функциясының жеткіліксіздігі бар пациенттер Доксициклинді бауыр функциясының жеткіліксіздігі бар пациенттерге, сондай-ақ гепатоуытты әсері бар препараттарды қолданатын пациенттерге сақтықпен тағайындау керек. Бүйрек функциясының жеткіліксіздігі бар пациенттер Зерттеулер көрсеткендей, доксициклинді әдеттегі ұсынылған дозаларда қолдану бүйрек функциясының жеткіліксіздігі бар пациенттерде антибиотиктің жиналуына әкелмейді. Жартасты таулардың таңдақты қызбасы Тардокс ересектерге арналған бірінші желі препараты болып табылады: Ересектер: әр 12 сағат сайын 100 мг. Пациенттерді температурасы төмендегеннен кейін кем дегенде 3 күн және клиникалық жақсару белгілері пайда болғанға дейін емдеу керек. Емдеудің ең аз курсы 5-7 күнді құрайды. Енгізу әдісі мен жолы Капсулаларды ішке қабылдау керек. Капсулаларды бір стақан сумен ішіп (кем дегенде 100 мл су), бүтіндей жұту қажет. Емдеу ұзақтығы Емнің ұзақтығын дәрігер анықтайды, орташа есеппен 5-10 күн. Көптеген инфекциялар жағдайында, доксициклинді симптомдар басылғаннан кейін тағы 24-тен 48 сағатқа дейін қабылдау қажет. А тобының β-гемолиздік стрептококктары туындатқан инфекцияларда препаратты кемінде 10 күн қабылдау қажет. Дәрілік препараттың бір немесе бірнеше дозасын өткізіп алған кезде қажетті шаралар Егер препарат дәл тағайындалған уақытта қабылданбаса, оны мүмкіндігінше тезірек қабылдау (егер препаратты кезекті қабылдауға дейін уақыт әлі жетерлік көп болса) немесе препаратты жүйелі қабылдауды жалғастыру қажет. Өткізіп алған дозаны толтыру мақсатында қос дозаны қабылдауға болмайды. Дәрілік препаратты қолдану тәсілін түсіндіру үшін медицина қызметкеріне консультацияға жүгіну бойынша ұсынымдар Тардокс препаратын пайдаланар алдында препаратты қолдану тәсілін түсіндіру үшін медицина қызметкерінен кеңес алу ұсынылады

‒ доксициклинге, басқа тетрациклиндерге немесе қосымша заттардың кез келгеніне аса жоғары сезімталдық; ‒ тістердің дамуы кезінде тетрациклиндер тобының дәрілік препараттарын қолдану (жүктілік, балалар); – жүктілік және бала емізу кезеңі; – бауыр функциясының ауыр бұзылыстары; – 18 жасқа дейінгі балалар.

Жағымсыз әсерлердің жиілігі мен айқындылығы пациенттің жеке сезімталдығына және препараттың қолданылатын дозасының көлеміне байланысты болады. Жиі ‒ анафилаксиялық шокты, анафилаксияны, анафилактоидты реакцияларды қоса алғанда, аса жоғары сезімталдық реакциялары; ‒ Шенлейн-Генох пурпурасы; ‒ ангиневроздық ісіну; ‒ ентігу; ‒ жүйелі қызылжегінің өршуі; ‒ сарысу құю ауруы; – шеткергі ісінулер; – есекжем; ‒ перикардит; – артериялық гипотензия; – тахикардия; – жүрек айнуы; ‒ құсу. Жиі емес ‒ диспепсия (қыжыл, гастрит). Сирек ‒ қан жасушаларының ыдырауынан туындаған анемия; – тромбоцитопения, нейтропения, эозинофилия; ‒ эозинофилиямен және жүйелі симптомдармен байқалатын дәрілік реакция (DRESS-синдром), Яриш-Герхсгеймер реакциясы; ‒ қалқаншабездің қоңыр-қара түске боялуы, оның функциясына әсер етпейді, тетрациклинді ұзақ уақыт қолданғанда байқалған; ‒ тәбеттің төмендеуі; ‒ бассүйекішілік қатерсіз гипертензия, еңбектің томпаюы; ‒ көру қабілетінің бұзылуы; ‒ қызару ‒ панкреатит; – жалғанжарғақшалы колит; ‒ Clostridium difficile колиті; ‒ өңештің ойықжаралануы; ‒ эзофагит; ‒ энтероколит; ‒ аногенитали аймағындағы қабынбалы зақымданулар (монилиалдардың өсуімен); ‒ дисфагия (жұтыну кезіндегі қиындықтар); ‒ диарея; ‒ глоссит; ‒ гепатоуыттылық, гепатит, бауыр функциясының бұзылуы; ‒ уытты эпидермалық некролиз; – Стивенс-Джонсон синдромы; ‒ көпформалы эритема; ‒ эксфолиативті дерматит; – фотоонихолизис; ‒ терінің түсінің өзгеруі; ‒ артралгия, миалгия. Белгісіз (қолда бар деректердің негізінде бағалау мүмкін емес) – құлақтың шуылдауы; ‒ тістердің боялуы, эмаль гипоплазиясы, ұзақ уақыт қолданғанда байқалады; ‒ қандағы мочевина концентрациясының жоғарылауы. Кейбір пациенттерде Тардокс препаратын қолдану кезінде басқа да жағымсыз әсерлер туындауы мүмкін. Кез келген жоғарыда аталған немесе осы нұсқаулықта аталмаған басқа да жағымсыз құбылыстар пайда болған жағдайда, дәрігерге немесе фармацевтке бұл жөнінде хабарлау қажет. Жағымсыз дәрілік реакциялар туындағанда медициналық қызметкерге, фармацевтикалық қызметкерге немесе, дәрілік препараттардың тиімсіздігі туралы хабарламаларды қоса, дәрілік препараттарға болатын жағымсыз реакциялар (әсерлер) жөніндегі ақпараттық деректер базасына тікелей хабарласу керек Қазақстан Республикасы Денсаулық сақтау министрлігі Медициналық және фармацевтикалық бақылау комитетінің «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

Тетрациклиндермен жедел артық дозалану өте сирек кездеседі. Симптомдары: қызба жағдайы, беттің қызаруы, бас айналу, кейде коллапстың дамуы мүмкін. Емі: препаратты тоқтату, құстыру, асқазанды шаю (естен танбаған пациенттерде), антацидтік препараттарды немесе кальций және магний тұздарын қолдану. Қажет болған жағдайда, симптоматикалық емдеу және өмірлік маңызды функцияларды (пульс, тыныс алу) бақылау. Қаннан препаратты шығару үшін гемодиализ қолдану тиімсіз болып табылады. Препаратты ұсынылғаннан көп дозада қабылданған жағдайда, дереу дәрігерге немесе фармацевтке қаралу қажет.

Доксициклинмен емдеуді бастар алдында бөлінген қоздырғыштың сезімталдығын айқындау қажет. Емдеуді микроорганизмнің сезімталдық нәтижесі алынғанша бастауға болады. Антибиотикограмма алынған соң препаратты тиісінше ауыстыру қажет болуы мүмкін. Капсулаларды бір стақан сумен ішіп (кем дегенде 100 мл су), бүтіндей жұту қажет. Тамақтың немесе ішектің тітіркену мүмкіндігін болдырмау үшін, капсулаларды ұйықтаудан кемінде 30 мин бұрын отырып немесе тік тұрып қабылдау қажет (пациенттің капсуланы қабылдағаннан кейін бірден жатып қалмауы маңызды). Асқорыту жолы тарапынан перманентті жағымсыз әсерлер байқалатын пациенттерге препаратты тамақтану кезінде немесе сүтпен бірге қабылдауды ұсынуға болады. Тамақтану кезінде немесе сүтпен бірге доксициклинді қолдану асқорыту жолы тарапынан жағымсыз әсерлердің пайда болуын азайтады және оның сіңуіне елеулі әсер етпейді. Дозалау режимі клиникалық және микробиологиялық диагнозға, пациенттің жалпы жағдайына, оның жасы мен дене салмағына байланысты. Арнайы сақтандырулар Балаларда қолдану Доксициклин басқа тетрациклиндерге қарағанда аз дәрежеде барлық сүйек тіндерінде кальциймен берік кешенді қосылыстар түзеді. Алайда, оны тістердің дамуы кезеңінде қолдану (жүктіліктің соңғы триместрі, перинатальдық кезең, ерте балалық шақ) тістердің боялуына және зақымдануына әкелуі мүмкін. Тістердің дамуы кезінде тетрациклиндер тобынан дәрілік препараттарды қолдану (жүктілік, нәресте және 12 жасқа дейінгі балалар) тістердің сары-сұр-қоңыр түске қайтымсыз боялуына әкелуі мүмкін. Бұл реакция аталған дәрілік препараттарды ұзақ уақыт қолданғанда жиірек кездеседі, бірақ оның қайталанатын қысқа емдеу курстарынан кейін де туындаған жағдайлары байқалған. Сонымен қатар, эмаль гипоплазиясы жағдайлары туралы да хабарланған. Тетрациклиндер тобының басқа антибиотиктері сияқты, доксициклин, сүйек тінінде кальциймен тұрақты кешендерді түзеді. Тетрациклин ішке, әр 6 сағат сайын кг дене салмағына шаққанда 25 мг дозада тағайындалған шала туылған балаларда, кіші жіліншіктің өсу жылдамдығының азайғаны байқалған. Бұл реакция препаратты тоқтатқаннан кейін қайтымды болды. Препаратты балалар мен 18 жасқа дейінгі жасөспірімдерге қолдануға болмайды. Бауыр функциясы бұзылған пациенттердің қолдануы Доксициклинді бауыр функциясының жеткіліксіздігі бар немесе басқа да гепатоуытты препараттарды қабылдайтын пациенттерде сақтықпен қолдану қажет. Доксициклинді қоса, тетрациклиндерді пероральді немесе парентеральді қабылдаумен байланысты бауыр функциясының бұзылулары өте сирек хабарланды. Бүйрек функциясы бұзылған пациенттердің қолдануы Доксициклиннің бүйрек арқылы экскрециясы бүйрек функциясы қалыпты адамдарда 72 сағатта шамамен 40%-ды құрайды. Бұл диапазон бүйрек функциясының ауыр жеткіліксіздігі бар (креатинин клиренсі 10 мл/мин аз) адамдарда 72 сағатта 1-5%-ға дейін төмендеуі мүмкін. Зерттеулер бүйрек функциясы қалыпты және бұзылған адамдарда қан сарысуындағы доксициклиннің жартылай шығарылу кезеңінде айтарлықтай айырмашылықты анықтаған жоқ. Гемодиализ препараттың қан сарысуынан жартылай шығарылу кезеңіне ықпал етпейді. Тетрациклиндердің антианаболизмдік әсері қандағы мочевина деңгейінің жоғарылауына әкелуі мүмкін. Антианаболизмдік әсер бүйрек функциясы бұзылған пациенттерде доксициклинді қолданғанда байқалмады. Фотосенсибилизация Тетрациклиндер, соның ішінде доксициклин жарыққа жоғары сезімталдықты тудыруы мүмкін. Емделу кезінде, фотодерматоздардың даму қауіптілігіне байланысты, күн астында қалудан немесе жасанды УК-сәулелену (солярий) әсерінен аулақ болу қажет. Пациенттерге осындай реакциялардың дамуы мүмкін екенін ескерту қажет, ал тері эритемасының алғашқы симптомдары білінген жағдайда препаратты қабылдауды дереу тоқтату қажет. Микрофлора Доксициклинмен емделу кезінде төзімді микроорганизмдер, мысалы, Candida шамадан тыс өсуі мүмкін. Егер төзімді микроорганизмдермен инфекциялану орын алса, доксициклинді қабылдауды тоқтатып, тиісті емдеуді бастау қажет. Доксициклинді қоса алғанда, бактерияға қарсы барлық дерлік заттарды қолданғанда жалғанжарғақшалы колиттің дамығаны туралы хабарламалар түсті. Бұл асқынудың ауырлығы жеңілден өмірге қауіп төндіретінге дейін ауытқыды. Бұл диагнозды бактерияға қарсы препараттарды қолдану салдарынан болған диарея бойынша жүгінетін пациенттерде қарастыру қажет. Бактерияға қарсы препараттармен емдеу жуан ішектің қалыпты флорасын өзгертеді, бұл Clostridium difficile қоса, сезімтал емес микроорганизмдердің шамадан тыс өсуіне әкеледі. Clostridium difficile туындатқан диарея жағдайлары бактерияға қарсы барлық дерлік препараттарды қолданғанда хабарланады. Диарея жеңіл түрден өмірге қауіп төндіретін түрге дейін өзгеруі мүмкін. Бактерияға қарсы препараттарды қабылдайтын пациенттерді мұқият бақылау керек, өйткені Clostridium difficile туындатқан диарея бактерияға қарсы препараттарды қабылдағаннан кейін екі ай ішінде туындауы мүмкін. Жалғанжарғақшалы колит диагнозы қойылған жағдайда антибиотик қабылдауды дереу тоқтату және тиісті емдеуді бастау қажет. Жеңілірек жағдайларда, әдетте, препаратты тоқтату жеткілікті, ауырлау жағдайларда – ішке метронидазол немесе ванкомицин тағайындау қажет. Ішектің перистальтикасын тежейтін препараттарды немесе бекітуші әсері бар басқа да дәрілерді қабылдауға болмайды. Эзофагит Доксициклинді қоса, тетрациклиндер класындағы препараттардың капсула немесе таблетка түрлерін қолданған пациенттерде эзофагит және өңеш ойықжарасы жағдайлары тіркелген. Бұл пациенттердің көп бөлігі препаратты тікелей ұйықтар алдында немесе сұйықтықтың жеткіліксіз мөлшерімен қабылдады. Порфирия Порфирияның сирек туындау жағдайлары тетрациклиндер қабылдаған пациенттерде байқалды. Венерологиялық ауруларды емдеу Венерологиялық аурулары бар және бір мезгілде өтетін мерезге күдік тудыратын пациенттерге ем басталғанша күңгірт көру өрісіне микроскопиялық зерттеу жүргізу қажет, ал серологиялық қан зерттеуін (РВ) кемінде 4 ай бойы ай сайын жүргізу қажет. Жеңіл бассүйекішілік гипертензия Доксициклинді қоса, тетрациклиндерді қолданумен бассүйекішілік гипертензия жағдайлары (БІГ, мидың жалған ісігі) байланысты болды. БІГ клиникалық көріністері мыналарды қамтиды: бас ауыру, көрудің бұлыңғырлануы, диплопия, көрмей қалу және көру жүйкесі дискісінің ісінуі (көз түбін тексергенде). Анамнезінде артық салмағы немесе БІГ бар, бала көтеретін жастағы әйелдерде тетрациклиндермен байланысты БІГ даму қаупі жоғары. Изотретиноин мен доксициклинді бір мезгілде қолданбау керек, өйткені изотретиноин мидың жалған ісігін туындатуы мүмкін. БІГ, әдетте, емдеуді тоқтатқаннан кейін басылғанымен, көрмей қалу ықтималдығы бар. Егер емдеу кезінде көрудің бұзылуы туындаса, офтальмологиялық тексеру жүргізу керек. Бассүйекішілік қысым препаратты қабылдауды тоқтатқаннан кейін бірнеше апта бойы жоғары болып қалуы мүмкін болғандықтан, пациенттер жағдай тұрақтанғанға дейін бақылануы керек. Емдік дозаларды қабылдағанда емшек еметін балаларда еңбектің томпаю жағдайлары, ал балалар мен ересектерде емдеуді тоқтатқан соң басылған бассүйекішілік қысымның орташа айқын жоғарылауы жөнінде хабарламалар бар. Бета-гемолиздік стрептококк А тобының бета-гемолиздік стрептококтары туындатқан инфекциялар кезінде емді кемінде 10 күн жалғастыру керек. Миастения гравис Тетрациклиндер тобындағы препараттар шамалы нейробұлшықеттік блокаданы туындатуы мүмкін, сондықтан миастения гравис бар пациенттерде доксициклинді сақтықпен қолдану қажет. Жүйелі қызылжегі Тетрациклиндер жүйелі қызылжегінің өршуін туындатуы мүмкін. Метоксифлуран Метоксифлуранды тетрациклиндермен бір мезгілде қолдану өліммен аяқталатын нефроуыттылыққа әкеледі. Доксициклинді метоксифлуранмен бірге қолданғанда сақтық таныту керек. Доксициклин қандағы Plasmodium falciparum штамдарының жыныссыз түрлерін айтарлықтай, бірақ толық емес тежейді. Доксициклин P. falciparum жыныстық түрлерін қандағы гаметоциттер сатысында тежемейді. Профилактикалық емдеудің толық курсын алған пациенттер масалардан жұқтырған инфекцияны эндемиялық аудандардан тыс жерлерге таратуы мүмкін. Яриш-Герхсгеймер реакциясы Спирохеталар туындатқан инфекциялары бар кейбір пациенттерде доксициклинмен емдеуді бастағаннан кейін көп ұзамай Яриш-Герхсгеймер реакциясы туындауы мүмкін. Пациенттерді бұл спирохетозды инфекциялар антибиотикотерапиясының әдетте өзін-өзі шектейтін салдары екеніне сендіру керек. Таблеткалар немесе капсулалар түріндегі тетрациклиндер тобы препараттарын (доксициклинді қоса) қабылдайтын пациенттерде өңештің қабынуы және ойықжаралануы жөнінде хабарламалар бар. Көп жағдайларда, пациенттер препаратты тура төсекке жатар алдында қабылдаған немесе препаратты тым аз мөлшердегі сұйықтықпен ішкен. Өңештің эрозиялы-ойықжаралы зақымдануының дамуын болдырмау үшін көп мөлшердегі сумен (200-300 мл) ішуге кеңес беріледі. Тардокс препаратының құрамында 100 мг лактоза моногидраты бар. Тардокс препаратын тұқым қуалайтын галактоза жақпаушылығы, Lapp-лактаза ферментінің тапшылығы, глюкоза-галактоза мальабсорбциясы бар пациенттерге қолдануға болмайды. Тардокс препаратының құрамында бір капсулаға 1 ммольден (23 мг) аз натрий бар, бұл дәрілік препарат «құрамында натрий жоқ» деп саналады. Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері Сақ болу керек. Жекелеген жағдайларда автокөлік басқару кезінде қауіпсіздікке әсер етуі мүмкін көрудің өткінші бұзылулары байқалған

Нұсқаулықта көрсетілмеген.

Соңғы уақытта қабылданып жүрген, тіпті рецептісіз босатылатын барлық дәрілік заттар жөнінде дәрігерге хабарлау қажет. Доксициклин мен варфаринді бір мезгілде қабылдайтын пациенттерде протромбин индексінің ұзаруы байқалуы мүмкін. Тетрациклиндер қан плазмасындағы протромбин деңгейін төмендетеді және жанама антикоагулянттардың әсерін күшейтеді, сондықтан антикоагулянттардың дозасын азайту қажет болуы мүмкін. Доксициклинді бактериостатикалық әсері бар препарат ретінде, бактерицидтік әсері бар препарат ретінде пенициллинмен бір мезгілде қолданудан аулақ болған жөн. Құрамында алюминий, кальций, магнийдің көпвалентті иондары бар антацидтік препараттар, сондай-ақ құрамында темір, мырыш немесе висмут иондары бар препараттар доксициклиннің сіңуін төмендетеді. Барбитураттар, карбамазепин, фенитоин, алкоголь доксициклиннің жартылай шығарылу кезеңін қысқартады. Доксициклин пероральді контрацепцияның тиімділігін төмендетеді және құрамында эстроген бар пероральді контрацептивтерді қабылдау кезінде «серпінді» қан кету жиілігін арттырады. Доксициклин метоксифлуранның нефроуытты әсерін күшейтеді, сондықтан доксициклинді қабылдайтын пациенттерде метоксифлуранмен жалпы анестезия жүргізбеу керек. Тетрациклиндер мен метоксифлуранды қолдану бүйректің өлімге әкелетін уыттылығына әкеледі. Флюорисцентті тест жүргізу кезінде доксициклинді қолданатын пациенттерде несептегі катехоламиндер деңгейінің жалған жоғарылауы байқалуы мүмкін.

Сақтау мерзімі 4 жыл Жарамдылық мерзімі өткеннен кейін қолдануға болмайды! Сақтау шарттары Құрғақ, жарықтан қорғалған жерде 25С-ден аспайтын температурада сақтау керек. Балалардың қолы жетпейтін жерде сақтау керек!