Тармицин таблетки 200 мг

Бір таблетканың құрамында белсенді зат – 200 мг эритромицин, қосымша заттар: күріш крахмалы, натрий крахмалгликолаты (А типі), желатин, полисорбат 80, тальк, магний стеараты, картоп крахмалы, қабықтың құрамы: эудрагит L 30 D 55 (полиакрил шайыры), триэтилцитрат, тальк Сыртқы түрінің, иісінің, дәмінің сипаттамасы Қабықпен қапталған, ақ түсті крем реңкті дерлік, дөңгелек, екі беті дөңес, шеттері үгілмеген, шытынамаған таблеткалар

Сезімтал микроорганизмдер туындатқан инфекциялық аурулар: – жоғарғы тыныс алу жолдарының инфекциялары – тонзиллит, паратонзиллярлық абсцесс, фарингит, ларингит, синусит, тұмау немесе суық тию аясында салдарлық бактериялық инфекция; – төменгі тыныс алу жолдарының инфекциялары – трахеит, жедел бронхит немесе созылмалы бронхит асқынуы, пневмония (бөліктік бронхопневмония, атипиялы пневмония), бронхоэктаздар, легионеллез; – ортаңғы және сыртқы құлақ инфекциялары – құлақ қалқанының, дабыл жарғағы бар немесе жоқ сыртқы есту жолының қабынуын қамтитын отит; – ауыз қуысының инфекциялары – гингивит, Симановский-Плаут-Венсан ангинасы; – көз инфекциялары – блефарит; – тері мен жұмсақ тіндер инфекциялары – фурункулдар, карбункулдар, дәнекер тіннің қабынуы, тілме қабынуы; – асқорыту жолының инфекциялары – холецистит, стафилококтық энтероколит; – емдік және диагностикалық емшаралар (соның ішінде ішекті операцияға дайындау, стоматологиялық араласымдар, эндоскопия, жүрек ақаулары бар науқастарда) кезінде инфекциялық асқынулардың профилактикасы; – басқа инфекциялар: остеомиелит, уретрит, гонорея, ерте байқалатын мерез, венерологиялық лимфогранулема, дифтерия, жәншау

ATХ коды J01FA01 Әсер ету механизмі Эритромицин макролидті антибиотиктер тобына жатады. Бактериостатикалық әсері бар, оның механизмі рибосоманың 50S қосалқы бірлігімен байланысу арқылы бактерия жасушаларындағы ақуыздар биосинтезін бөгеуге негізделген. Фармакодинамикалық әсерлері In vitro жағдайында эритромицин төменде аталғандарға әсер етеді: грамоң бактериялар Listeria monocytogenes, Corynebacterium diphtheriae, Staphylococcus spp., Streptococcus spp. (оның ішінде Enterococcus spp.) грамтеріс бактериялар Neisseria meningitidis, Neisseria gonorrhoeae, Legionella pneumophila, Moraxella catarrhalis, Bordetella pertussis, Campylobacter spp., Mycoplasma pneumoniae, Ureaplasma urealyticum, Treponema pallidum, Chlamydia spp., Clostridium spp. Haemophilus influenzae штамдарының көбісінің эрадикациясы эритромициннің концентрациялары жоғары болған кезде ғана байқалады. Эритромицин зең, вирустар, ашытқы саңырауқұлақтары туындатқан инфекцияларды емдеу кезінде нәтиже бермейді

Дозалау режимі Дозалау режимі инфекция ауырлығына, инфекция қоздырғышының сезімталдығына, пациенттің халіне, жасына және дене салмағына байланысты. Ересектер және 8 жастан асқан балалар Әдетте тәулігіне 1 г-ден 2 г-ге дейін бірнеше рет бөліп қабылданады. Ауыр инфекциялар кезінде дозаны тәулігіне 4 г дейін көбейтуге болады. 6-дан 8 жасқа дейінгі балалар Әдетте 1кг дене салмағына шаққанда тәулігіне 30-50 мг дозада 2-4 бөліп қабылданады. Ауыр инфекциялар кезінде дозасын екі есе арттырып, әр 6 сағат сайын қолдану қажет. Таблеткалар түріндегі Тармицин дәрілік препаратын 6 жастан асқан балаларға қолдануға болады, олар таблетканы жұта алған жағдайда. Егде жастағы пациенттер Дозасын өзгертудің қажеті жоқ. Алайда бұл жас тобында бауыр немесе өт жолдары функциясының жиі нашарлауына байланысты сақ болу ұсынылады. Қабылдау уақытының көрсетілуімен қолдану жиілігі Инфекцияның ауырлығы мен түріне байланысты. Тармицин препаратын симптомдар басылғаннан кейін тағы кем дегенде 2-3 күн қабылдау қажет. А тобының стрептококтары туындатқан инфекциялар кезінде кем дегенде емді 10 күн жалғастыру қажет. Дәрілік препараттың бір немесе бірнеше дозасын өткізіп алу кезіндегі қажетті шаралар Егер препарат нақты белгіленген уақытта қабылданбаса, оны мүмкіндігінше тезірек (егер препаратты кезекті қабылдауға дейінгі уақыт әлі көп болса) қабылдау немесе дәрігердің тағайындауларына сәйкес препаратты қабылдауды жалғастыру қажет. Өткізіп алған дозаны толтыру мақсатында екі есе дозаны қабылдауға болмайды Қолдану тәсілі Ішке қабылдауға арналған препарат. Таблеткаларды қайнатып салқындатылған судың аз мөлшерімен тамақ ішер алдында немесе тамақпен бірге ішуге болады

– эритромицинге, басқа макролидтерге немесе препараттың басқа компоненттеріне жоғары сезімталдық; – астемизолды, терфенадинді, цизапридті, пимозидті, эрготаминді немесе дигидроэрготаминді бір уақытта қабылдау; – 6 жасқа дейінгі балалар; – есту қабілетінің айтарлықтай төмендеуі; – эритромицинді анамнезінде QT аралығы ұзарған (QT аралығының туа біткен немесе анықталған жүре пайда болған ұзаруы) немесе қарыншаның «пируэт» типті тахикардиясына (torsades de pointes) қоса, жүректің вентрикулярлық аритмиясы бар пациенттерде қолданбау керек; – эритромицинді электролит бұзылыстары бар пациенттерге (QT аралығының ұзаруы қаупіне байланысты гипокалиемия, гипомагниемия) тағайындауға болмайды; – эритромицинді ломитапид қабылдаған пациенттерге тағайындауға болмайды (холестерин мен триглицеридтер сияқты қандағы май мөлшерінің көбеюін төмендету үшін қолданылады). Бұл дәрі-дәрмекті эритромицинмен бір уақытта қабылдау бауыр жасушалары өндіретін ферменттер деңгейінің жоғарылауына әкелуі мүмкін (трансаминазалар), ол бауырдың жүктеме жағдайында тұрғанын және бауыр проблемаларына әкелуі мүмкін екенін көрсетеді.

Жиі (≥1% – <10%) – АІЖ функциясының бұзылулары (көбінесе препарат көп дозада қабылданған кезде): іштің ауыруы, жүрек айну, құсу, метеоризм, жұмсақ нәжіс немесе іш өту. Жиі емес (≥ 0,1% – <1%) – "бауыр" трансаминазалары белсенділігінің жоғарылауы. Сирек (≥ 0,01% – <0,1%) - терінің аллергиялық реакциялары (есекжем, тері бөртпесі); – бауырішілік холестаз, холестаздық сарғаю – ұзақ емдеу кезінде (2-3 апта). Өте сирек (< 0,01%) – агранулоцитоз; – анафилаксиялық шок; – көпформалы эритема, эпидермистің уыттық-колликвациялық некрозы, Стивенс-Джонсон синдромы; – балалардың спазмдық-гипертрофиялық пилоростенозы; – гепатит, гепатомегалия, бауыр жеткіліксіздігі; – панкреатит; – жалғанжарғақшалы колит; – паренхиматозды нефрит; – бас айналу, сананың шатасу жағдайы, елестеулер. Жекеленген жағдайлар – аритмия (қарынша тахикардиясы, torsades de pointes типті бұзылыс), жүректің қатты соғуы, кеуде тұсының ауыруы; – құлақтағы шуыл, естімей қалу (әсіресе препаратты жоғары дозада қабылданған кезде немесе бауыр және бүйрек жеткіліксіздігі бар пациенттерде, әдетте есту бұзылулары препаратты тоқтатқаннан кейін кетеді); – препаратқа төзімді бактериялар немесе зең туындатқан инфекциялар (ұзақ немесе қайталама емделу курсы кезінде); Белгісіз (қолда бар деректер негізінде бағалау мүмкін емес) – жүректің тоқтауы, қарынша фибриляциясы. Кейбір пациенттерде Тармицин препаратын қолдану кезінде басқа да жағымсыз әсерлер туындауы мүмкін. Кез келген жоғарыда аталған немесе осы нұсқаулықта аталмаған басқа да жағымсыз құбылыстар пайда болған жағдайда, дәрігерге бұл жөнінде хабарлау қажет Жағымсыз дәрілік реакциялар туындағанда медициналық қызметкерге, фармацевтикалық қызметкерге немесе, дәрілік препараттардың тиімсіздігі туралы хабарламаларды қоса, дәрілік препараттарға болатын жағымсыз реакциялар (әсерлер) жөніндегі ақпараттық деректер базасына тікелей хабарласу керек Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

Препаратты ұсынылғаннан артық дозада қабылдаған жағдайда дереу дәрігерге хабарласу керек. Симптомдары: естудің бұзылуы, асқазан-ішектің айқын бұзылыстары (жүрек айну, құсу, іш өту). Емі: препаратты тоқтату, симптоматикалық емдеу, негізгі өмірлік функцияларды мониторингілеу (тыныс алу, пульс, қан қысымы). Эритромицин организмнен перитонеальді диализ және гемодиализ кезінде шығарылмайды.

Эритромицинмен емдеуді бастамас бұрын, бөлінген қоздырғыштың сезімталдығын анықтау қажет. Микроорганизм сезімталдығының нәтижесі алынғанға дейін емдеуді бастауға болады. Антибиотикограмма алынғаннан кейін препаратты ауыстыру қажет болуы мүмкін. Тармицин дәрілік затын қолданар алдында пациенттің толық аллергологиялық анамнезін, соның ішінде эритромицинге, басқа да макролидтерге деген жоғары сезімталдық реакциясына қатысты мәліметтерді жинау қажет. Егер Тармицин дәрілік затын қолданудың нәтижесінде жоғары сезімталдық реакциясы туындаса, оны қабылдауды дереу тоқтатып, симптомдық емдеуді бастау қажет. Бауыр функциясы бұзылған пациенттерге немесе бауырға уытты әсер етуі мүмкін препараттарды бір уақытта қабылдап жүргендерге эритромицинді тағайындаған кезде сақ болған жөн. Эритромицинмен ұзақ уақыт емдеу кезінде бауырдың функциялық сынамаларын алу көрсетілген. Тармицин 200 мг, ішекте еритін қабықпен қапталған таблеткалар, дәрілік препаратының құрамында бір таблеткаға 1 ммольден (23 мг) аз натрий бар, бұл дегеніміз, дәрілік препарат «натрийсіз» деп саналады. Арнайы сақтандырулар Жүрек-қантамырлық оқиғалар Эритромицинді қоса, макролидтермен емдеу кезінде жүрек аритмиясымен және қарыншаның «пируэт» типті тахикардиясымен (torsades de pointes) қатар көрінетін, миокард реполяризациясы мен QT аралығының ұзарғаны байқалды. Өліммен аяқталу жағдайлары хабарланған жоқ. Төменде аталған пациенттер эритромицинді абайлап қабылдауы тиіс: •жүректің ишемиялық ауруы, жүректің ауыр жеткіліксіздігі, өткізгіштіктің бұзылулары немесе клиникалық тұрғыдан маңызды брадикардиясы бар пациенттер; •QT ұзаруын туындатуы мүмкін басқа дәрілік препараттарды бір уақытта қабылдап жүрген пациенттер; •гипомагниемия сияқты электролиттік теңгерімнің бұзылулары бар пациенттер. Эритромицинді гипокалиемиямен ауыратын пациенттерге қолдануға болмайды; Эритромицинді қоса, макролидтерді қолданудың салдарынан жүрек-қантамыр ауруларынан дамитын аритмияның, миокард инфарктісінің және өлім-жітімнің сирек қысқа мерзімді қаупі анықталды. Бұл нәтижелерді қарастыру эритромицинді тағайындағанда емдеудің артықшылықтарымен теңдестірілуі керек. Мерезге шалдыққан жүкті әйелдерге тағайындалатын эритромицин шарана үшін емдік концентрацияларды қамтамасыз етпейді, сол себепті бала туғаннан кейін оған бірден пенициллин тағайындау ұсынылады. Myasthenia gravis ауруына шалдыққан пациенттерде қолданылатын эритромицин ауру симптомдарын күшейтуі мүмкін. Бактерияға қарсы кең спектрлі әсері бар антибиотиктер (мысалы, макролидтер, жартылай синтетикалық пенициллиндер, цефалоспориндер) кейде жалғанжарғақшалы колитті туындатуы мүмкін. Ішектегі қалыпты бактериялық флораның бұзылуы Clostridium difficile таяқшасының дамуына ықпал етеді. Оның уыты жалғанжарғақшалы колиттің клиникалық симптомдарын туындатады. Сол себепті антибиотикпен емделу кезінде немесе емделуді тоқтатқаннан кейін бірден пациенттің іші өтсе, ол өз бетінше емделмей, дәрігерге қаралуға тиіс. Егер жалғанжарғақшалы колит диагнозы расталса, дереу антибиотикті қабылдауды тоқтатып, тиісті емдеу шараларын бастау қажет. Жеңілірек жағдайларда әдетте препарат қабылдауды тоқтату жеткілікті болады, ауырлау жағдайларда ішке метронидазол немесе ванкомицин тағайындау қажет. Ішектің перистальтикасын тежейтін препараттарды немесе іш өтуді тоқтату әсері бар басқа да дәрілерді қабылдауға болмайды. Антибиотиктерді ұзақ уақыт қолдану төзімді бактериялар мен зеңдердің шамадан тыс дамуын туындатуы мүмкін. Эритромицинмен емдеу кезінде жаңа зең немесе бактериялық инфекциялар пайда болған жағдайда, антибиотик қабылдауды дереу тоқтатып, тиісті емдеуді бастаған жөн. Бір уақытта эритромицин мен ловастатин қабылдайтын ауыр науқастарда рабдомиолиз жағдайлары (көлденең жолақты бұлшықет некрозы) байқалды. Эритромицин несептегі катехоламиндер деңгейін флюорометриялық әдіспен анықтау нәтижесін бұрмалауы мүмкін.

Туа біткен ақаулар қаупіне қатысты зерттеулерден алынған ақпарат қарама-қайшы нәтижелер берді, бірақ кейбір зерттеулерінде жүктіліктің ерте мерзімінде Тармицинді қолданғаннан кейін жүрек ақаулары туралы хабарланды. Эритромицин плаценталық бөгеттен өтеді және ана сүтіне енеді. Препарат аса қажеттілік болған кезде ғана жүкті және емізетін әйелдерге тағайындалуы мүмкін. Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері. Препараттың автокөлікті басқару және механикалық құрылғыларға қызмет көрсету қабілетіне тигізетін әсері жөніндегі деректер жоқ, бірақ бас айналу, елестеулер сияқты жағымсыз әсерлердің даму ықтималдығын ескере отырып, препаратты қабылдау кезеңінде сақтық танытқан жөн

Соңғы уақытта қабылдап жүрген барлық дәрілік препараттар, тіпті рецептісіз босатылатын препараттар жөнінде дәрігерге хабарлау қажет. Эритромициннің биотрансформациясы көбінесе бауырда жүреді, бұл үрдіске Р-450 цитохромына тәуелді болатын монооксигеназалар жүйесі қатысады. Эритромицин (ферменттік тежегіш) ферменттердің белсенділігін төмендетеді, осының нәтижесінде онымен бір уақытта қабылданатын препараттардың (мысалы, мизоластин, бромкриптин, гексобарбитал, мидазолам, такролимус, триазолам, вальпроат қышқылы, рифабутин, зопиклон) метаболизмін өзгертуі мүмкін. Эритромицин Р-450 цитохромының белсенділігіне әсер ете отырып, төменде аталған препараттармен өзара фармакокинетикалық әрекеттеседі: – теофиллинмен, сарысудағы концентрациясының артуына көмектеседі, бұл оның уыттылығының артуын туындатады; осы екі препарат бір уақытта қабылданған жағдайда, теофиллин дозасын азайтып, оның сарысудағы деңгейін қадағалау қажет; – дигоксинмен, оның сіңуін және сарысудағы концентрациясын арттырады; – циклоспоринмен, оның концентрациясын арттырады және оның нефроуыттылығын күшейтеді; – карбамазепинмен, эритромицин оның бауырдағы метаболизмін төмендетуі мүмкін. Осы екі препарат бір уақытта қабылданған жағдайда, карбамазепиннің дозасын 50%-ға дейін азайту қажет болуы мүмкін; – фенитоинмен, альфентанилмен, метилпреднизолмен немесе бензодиазепиндермен, олардың уыттылығын күшейтуі мүмкін; – I топқа жататын аритмияға қарсы препараттармен (дизопирамид, хинидин, прокаинамид), эритромицинмен бір уақытта емделген кезде QT аралығының ұзаруы дамып, қарынша тахикардиясының туындау қаупі бар; – цизапридпен, қан сарысуындағы цизаприд концентрациясының артуын туындатады, бұл өз алдына ЭКГ-дағы QT аралығының ұзаруын және жүрек қарыншасы ырғағының бұзылуын туындатуы мүмкін; – терфенадинмен және астемизолмен, олардың қандағы деңгейін арттырады, бұл жүрек ырғағының ауыр бұзылуларының себебі болуы мүмкін. Сондықтан эритромицинді астемизолмен немесе терфенадинмен бір уақытта қолдануға болмайды. Бұдан басқа, төмендегілермен эритромицинді бір уақытта қабылдау: – пероральді контрацепциялық дәрілермен, олардың тиімділігін төмендетіп, бауырға уытты әсердің даму қаупін арттырады; – қанның ұйығыштығын төмендететін препараттармен (мысалы, варфарин, аценокумарол), әсіресе егде жастағы пациенттерде протромбин уақытын ұзартып, қан кету қаупін арттыруы мүмкін. Эритромицин қанның ұйығыштығын азайтатын басқа препараттармен бір уақытта қабылданған кезде протромбин уақытын үнемі қадағалап отыру қажет; – эрготаминмен немесе дигидроэрготаминмен, қантамырлардың түйілуі түрінде байқалатын жедел уыттылықты туындатуы мүмкін; – колхицинмен бірге қолданылатын эритромицин, оның уыттылығын арттыруы мүмкін; – эритромицинді қанның ұйығыштығын төмендететін препараттармен (мысалы, варфарин, ривароксабан) бір уақытта қабылдау қан кету қаупі артуы мүмкін; – инъекция немесе ингаляция арқылы пероральді енгізілетін кортикостероидтар (организмнің иммундық жүйесін басу үшін қолданылады, бұл көптеген ауруларды емдеуде пайдалы); – гидроксихлорохин немесе хлорохинин (ревматоидтық артритті қоса, ауруларды емдеу үшін немесе безгекті емдеу немесе профилактикасы үшін қолданылады). Бұл дәрі-дәрмектерді эритромицинмен бір уақытта қабылдау жүрек ырғағының бұзылу ықтималдығын және жүрекке әсер ететін басқа да ауыр жағымсыз әсерлерді арттыруы мүмкін.

Сақтау мерзімі 3 жыл Жарамдылық мерзімі өткеннен кейін пайдалануға болмайды Сақтау шарттары Түпнұсқалық қаптамасында, ылғалдан және жарықтан қорғалған жерде, 25°C-ден аспайтын температурада сақтау керек. Балалардың қолы жетпейтін жерде сақтау керек!