Тивортин раствор 42 мг/мл

Бір мл препараттың құрамында белсенді зат – аргинин гидрохлориді, 42 мг; қосымша зат – инъекцияға арналған су. Сыртқы түрінің, иісінің, дәмінің сипаттамасы Мөлдір түссіз немесе сәл сарғыштау-қоңыр ерітінді.

Келесі аурулардың кешенді емінің құрамында: • шеткері қантамырлардың, соның ішінде мезгіл-мезгіл ақсақтық көріністерімен жүретін атеросклерозда • өкпе гипертензиясында

Аргинин (α-амино-δ-гуанидиновалериан қышқылы) – амин қышқылы, шартты түрде алмастырылмайтын амин қышқылдары класына жатады және организмнің өмірлік маңызды көптеген функциясының жан-жақты жасушалық реттегіші болып табылады, организм қатер шегіне күйге жеткенде маңызды протекторлық әсері байқалады. Тивортин антигипоксиялық, жарғақша тұрақтандыратын, цитопротекторлық, антиоксиданттық, антирадикалдық, уытсыздандырғыштық белсенділігін көрсетеді, өзін аралық алмасу және энергиямен қамтамасыз ету процестерінің белсенді реттегіші ретінде танытып, организмде гормондық теңгерімді ұстап тұруда белгілі бір рөл атқарады. Аргинин қанда инсулиннің, глюкагоннның, соматотропты гормон мен пролактиннің мөлшерін арттыратыны, пролин, полиамин, агматин синтезіне қатысатыны, фибринолиз, сперматогенез процестеріне қосылып, жарғақшалық деполяризациялаушы әсер ететіні белгілі. Аргинин бауырдағы мочевина синтезінің циклінде негізгі субстраттардың бірі болып табылады. Препараттың гипоаммониялық әсері аммиактың мочевинаға айналуын белсенділендіру жолымен жүзеге асырылады. Антиоксиданттық, антигипоксиялық және жарғақша тұрақтандыратын белсенділігінің арқасында гепатопротекторлық әсерін байқатады, гепатоциттерде энергиямен қамту үдерістеріне оң ықпал етеді. Тивортин эндотелиоциттерде азот тотығы синтезін катализдейтін фермент – NO-синтаза үшін субстрат болып табылады. Препарат гуанилатциклазаны белсенділендіреді және тамыр эндотелийінде циклдік гуанозинмонофосфат (цГМФ) деңгейін жоғарылатады, тамырлар эндотелийіне лейкоциттер және тромбоциттердің белсенділігі мен адгезиясын азайтады, VCAM-1 және МСР-1 адгезия протеиндерінің синтезін басады, осылайша атеросклероздық түйіндақтар түзілуі мен дамуының алдын алады. Тамыр қабырғаларының тегіс миоциттері пролиферациясы мен көшуінің вазоконстрикторы және стимуляторы болып саналатын эндотелин-1 синтезін бәсеңдетеді. Тивортин оксидативті стресстің эндогенді стимуляторы асимметриялық диметиларгининнің синтезін де басады. Препарат Т-жасушаларын өндіретін айыршабез қызметін стимуляциялайды, дене жүктемесі кезінде қанда глюкоза мөлшерін реттейді. Қышқыл түзуші әсері байқалады және қышқылдық-сілтілік тепе-теңдікті түзетуге ықпал етеді.

Дозалау режимі Ересектерге Препараттың тәуліктік дозасы – 100 мл ерітінді. Орталық және шеткері қантамырлардағы қанайналымның ауыр бұзылулары, айқын гипоксия құбылыстары кезінде препараттың дозасын тәулігіне 200 мл дейін арттыруға болады. Енгізу әдісі мен жолы Препарат алғашқы 10–15 минут ішінде вена ішіне минутына 10 тамшы жылдамдықпен тамшылатып енгізіледі, содан соң енгізу жылдамдығын минутына 30 тамшыға дейін арттыруға болады. Инфузиялық ерітіндіні енгізудің ең жоғары жылдамдығы сағатына 20 ммольден аспауы тиіс.

• әсер етуші затқа немесе қосымша заттардың кез келгеніне аса жоғары сезімталдық • бүйрек функциясының ауыр бұзылулары • гиперхлоремиялық ацидоз • анамнездегі аллергиялық реакциялар • калий жинақтайтын диуретиктерді, оның ішінде спиронолактонды қолдану • миокард инфарктісі (оның ішінде анамнездегі) • лактация кезеңі • балалар мен 18 жасқа дейінгі жасөспірімдер

Жалпы бұзылыстар Жиілігі белгісіз: • гипертермия, ысыну сезімі, дененің сырқырауы. Сүйек-бұлшықет жүйесі Жиілігі белгісіз: • буындардың ауыруы. Ас қорыту жолы Жиілігі белгісіз: • ауыздың құрғауы, жүрек айнуы, құсу. Тері және теріасты шелмайы Жиілігі белгісіз: • гиперемияны, қышыну сезімін, терінің акроцианозға дейінгі бозаруын қоса, енгізу орнындағы өзгерістер. Иммундық жүйе Жиілігі белгісіз: • анафилаксиялық шок, бөртпелерді, есекжемді, ангионевроздық ісінуді қоса, аса жоғары сезімталдық реакциялары. Тыныс алу жүйесі, кеуде қуысы және көкірекорта ағзалары Жиілігі белгісіз: • ентігу. Жүрек-қантамыр жүйесі Жиілігі белгісіз: • артериялық қысымның ауытқулары, жүрек ырғағының өзгеруі, жүрек тұсының ауыруы. Жүйке жүйесі Жиілігі белгісіз: • бас ауыруы, бас айналуы, қорқу сезімі, әлсіздік, құрысулар, тремор, көбіне ұсынылған енгізу жылдамдығын арттырғанда. Зертханалық көрсеткіштер Жиілігі белгісіз: • гиперкалиемия. Жағымсыз дәрілік реакциялар туындағанда медициналық қызметкерге, фармацевтикалық қызметкерге немесе, дәрілік препараттардың тиімсіздігі туралы хабарламаларды қоса, дәрілік препараттарға болатын жағымсыз реакциялар (әсерлер) жөніндегі ақпараттық деректер базасына тікелей хабарласу керек Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

Симптомдары: бүйрек функциясының жеткіліксіздігі, гипогликемия, метаболизмдік ацидоз. Емі: артық дозаланған жағдайда препараттың инфузиясын тоқтату қажет. Физиологиялық реакцияларға мониторинг жүргізу және организмнің өмірлік функцияларын демеп отыру керек. Қажет болған жағдайда сілтілендіретін дәрілер мен диуретиктерді (салуретиктерді), электролиттер ерітінділерін (0,9 % натрий хлориді ерітіндісі), 5 % глюкоза ерітіндісін енгізу. Емі симптоматикалық.

Бүйрек функциясының жеткіліксіздігі бар пациенттерде инфузияны бастар алдында диурезді және қан плазмасындағы калий деңгейін тексеру қажет, өйткені препарат гиперкалиемияның дамуына ықпал етуі мүмкін. Эндокриндік бездер функциясы бұзылған кезде препаратты сақтықпен қолданады. Препарат инсулин секрециясы мен өсу гормонын стимуляциялауы мүмкін. Ауыздың құрғау сезімі пайда болған жағдайда қандағы қант деңгейін тексеру қажет. Электролиттердің алмасуы бұзылғанда, бүйрек аурулары кезінде сақтықпен қолдану керек. Егер препаратты қабылдау аясында астения симптомдары күшейе түссе, емді тоқтатқан жөн. Стенокардиясы бар пациенттерге препаратты сақтықпен қолдану керек. Препараттың көлік құралын және қауіптілігі зор механизмдерді басқару қабілетіне әсер ету ерекшеліктері Автокөлік басқару және басқа механизмдермен жұмыс істеу кезінде сақ болған жөн, өйткені препарат бас айналуын туындатуы мүмкін.

Препарат плацента арқылы өтеді, сондықтан жүктілік кезеңінде оны анасы үшін күтілетін пайдасы шарана үшін ықтимал қаупінен асып түсетін болса ғана қолдануға болады. Препаратты бала емізу кезеңінде қолдануға қатысты деректер жоқ. Лактация кезеңінде қолдану қажет болған жағдайда бала емізуді тоқтату керек.

Тивортин препаратын қолдану кезінде препарат спиронолактонды қабылдап жүрген немесе қабылдаған пациенттерде бауыр функциясының жеткіліксіздігі аясында айқын және тұрақты гиперкалиемияны туындатуы мүмкін екенін ескеру қажет. Осының алдында калий жинақтайтын диуретиктерді қолдану да қандағы калий концентрациясының жоғарылауына ықпал етуі мүмкін. Аминофиллинмен бір мезгілде қолданғанда қандағы инсулин деңгейі жоғарылауы мүмкін. Препарат тиопенталмен үйлесімсіз.

Сақтау мерзімі 2 жыл. Жарамдылық мерзімі өткеннен кейін қолдануға болмайды! Сақтау шарттары 25 °С-ден аспайтын температурада сақтау керек. Балалардың қолы жетпейтін жерде сақтау керек!