Тиромак таблетки 150 мкг

Бір таблетканың құрамында белсенді зат - 0,025 мг, 0,050 мг, 0,075 мг, 0,100 мг, 0,125 мг және 0,150 мг натрий левотироксині қосымша заттар: микрокристалды целлюлоза (PH 105), микрокристалды целлюлоза (PH 102), кремнийдің қостотығы, натрий кроскармеллозасы, FD & C сары № 6 алюминий лак, FD & C қызыл №40 алюминий лак, FD & C көк № 2 алюминий лак, натрий стеарил фумараты. Сыртқы түрінің, иісінің, дәмінің сипаттамасы Дөңгелек пішінді, бір жағында «М56» өрнегі және екінші жағында сызығы бар қызғылт-сары түсті таблеткалар (25 мкг доза үшін). Дөңгелек пішінді, бір жағында «М57» өрнегі және екінші жағында сызығы бар ақ немесе ақ дерлік түсті таблеткалар (50 мкг доза үшін). Дөңгелек пішінді бір жағында «М58» өрнегі және екінші жағында сызығы бар күлгін түсті таблеткалар (75 мкг доза үшін). Дөңгелек пішінді бір жағында «М60» өрнегі және екінші жағында сызығы бар сары түсті таблеткалар (100 мкг доза үшін). Дөңгелек пішінді, бір жағында «М62» өрнегі және екінші жағында сызығы бар қоңыр түсті таблеткалар (125 мкг доза үшін). Дөңгелек пішінді, бір жағында «М64» өрнегі және екінші жағында сызығы бар көк түсті таблеткалар (150 мкг доза үшін).

- кез келген этиологиядағы гипотиреоз кезінде тиреоидты гормондарды алмастыру - эутиреоидты зобты алып тастаудан кейін зобтың қайталану профилактикасы - эутиреоидты қатерсіз зоб - эутиреоз күйіне жеткен соң гипертиреозды тиреостатиктермен емдеу аясындағы адъювантты ем - қалқанша бездің қатерлі жаңа түзілімдерінде супрессиялық және орын басу емі, негізінен, тиреоидэктомиядан кейін - қалқанша безінің супрессиясымен тест

Әсер ету механизмі Тиромак препаратының құрамына кіретін синтетикалық левотироксин, өз әсері бойынша, ең алдымен, қалқанша без өндіретін табиғи тиреоидты гормонмен бірдей. Организм үшін эндогенді және экзогенді левотироксин арасында айырмашылықтар жоқ. Фармакодинамикалық әсерлері Негізінен, бауырда және бүйректе лиотиронинге (T3) жартылай айналудан кейін, әрі организм жасушаларына түскен соң тиреоидты гормондар T3 рецепторларының белсенуі көмегімен даму, өсу және метаболизмге ықпал етіп, спецификалық әсерлер туындатады. Клиникалық тиімділігі және қауіпсіздігі Тиреоидты гормондарды алмастыру метаболизм үдерістерінің қалыпқа түсуіне әкеледі. Мысалы, левотироксин қабылдау гипотиреоз себеп болатын холестериннің жоғары деңгейінің едәуір төмендеуіне әкеледі

Дозалау режимі Жеке тәуліктік доза зертханалық диагностиканың және клиникалық тексерудің нәтижелері бойынша белгіленеді. Қажет болса, таблетканы тең дозаларда екі бөлікке бөлуге болады. Егер қалқанша бездің қалдық функциясы сақталса, орын басу емі үшін төменірек дозасы жеткілікті болуы мүмкін. Егде жастағы пациенттерде, жүректің ишемиялық аурулары және ауыр немесе созылмалы гипотиреоз бар пациенттерде тиреоидты гормондармен емдеуді айрықша абайлап бастау керек (мысалы, емдеуді төменірек дозадан бастау және тиреоидты гормондар деңгейін жиі тексеріп, оны едәуір аралықтармен баяу арттыру ұсынылады). Тәжірибе бойынша, дене салмағы төмен пациенттерде де, ірі түйінді зобпен пациенттерде де препараттың төменірек дозалары жеткілікті болады. T4 немесе fT4 деңгейі кейбір пациенттерде жоғары болуы мүмкін екендіктен, емдеу режимін қадағалау үшін қан сарысуында ТТГ концентрациясын анықтау ең дұрысы болады. Көрсетілім — Доза (натрий левотироксині мкг/ тәулігіне) Гипотиреоз Ересектер (2-4 апта аралықтармен 25-50 мкг арттыру) — Басында Одан кейін — 25 50 100 200 Зобтың қайталану профилактикасы — 75 200 Эутиреоидты қатерсіз зоб — 75 200 Гипертиреоз кезінде тиреостатикалық ем жүргізу аясындағы адъювантты ем — 50 100 Қалқанша бездің қатерлі жаңа түзілімі себебімен жасалатын тиреоидэктомиядан кейін — 150 300 Қалқанша бездің супрессиялық сцинтиграфиясы — 200 (сцинтиграфия өткізуге дейін 14 күн бойы) Пациенттердің ерекше топтары Егде жастағы пациенттер Жекелеген жағдайларда егде жастағы пациенттерде, мысалы, жүрек ауруларымен пациенттерде ТТГ деңгейін жүйелі анықтаумен натрий левотироксині дозасын біртіндеп төмендетуге ден қою керек. Балалар және жасөспірімдер (50 мкг доза үшін) Левотироксинмен жылдам алмастыру қажет болатын туа біткен гипотиреоз бар жаңа туған нәрестелер мен сәбилер үшін алғашқы 3 айда қолдануға ұсынылатын натрий левотироксинінің бастапқы дозасы тәулігіне кг дене салмағына 10-15 мкг құрайды. Әріқарай дозаны, клиникалық деректерге сүйеніп, сондай-ақ тиреоидты гормондар мен ТТГ деңгейін әркімде жеке түзету керек. Жүре пайда болған гипотиреоз бар балаларға ұсынылған левотироксиннің бастапқы дозасы тәулігіне 12,5-50 мкг құрайды. Клиникалық деректерге, сондай-ақ тиреоидты гормондар мен ТТГ деңгейіне сүйеніп, дозаны біртіндеп 2-4 апта аралықпен орын басу еміне қажетті толық дозаға жететін сәтке дейін арттыру керек. Енгізу әдісі және жолы Толық тәуліктік дозасын сұйықтықпен іше отырып, аш қарынға ішке қабылдайды; препаратты таңғы астан, кем дегенде, жарты сағат бұрын таңертең қабылдайды. Сәбилерге толық тәуліктік дозаны сол күні бойғы алғашқы ас ішуден, кем дегенде, жарты сағат бұрын береді. Таблеткаларды суспензия түрінде де қолдануға болады. Таблеткаларды судың аздаған мөлшерінде (10-15 мл) алдын ала еріту, ал тек жаңадан дайындалуы тиіс алынған суспензияны, оған сұйықтықтың тағы аздаған мөлшерін (5-10 мл) қосып, балаға беру керек. Қолдану ұзақтығы Гипотиреозда және қалқанша бездің қатерлі жаңа түзілімі себебінен жасалған тиреоидэктомиядан кейін, әдетте, бүкіл өмір бойы. Эутиреоидты зобта және зобтың қайталану профилактикасы үшін - бірнеше айдан немесе жылдан бастап бүкіл өмір бойы қолдануға дейін. Гипертиреоз кезіндегі адъювантты емде тиреостатикалық емнің ұзақтығына байланысты. Эутиреоидты зобтың емдеу ұзақтығы 6 айдан екі жылға дейін созылуы тиіс. Егер осы уақыт бойына Тиромак препаратымен ем көзделген нәтижеге әкелмесе, басқа емдеу нұсқаларын қарастыру керек. Қалқанша без супрессиясымен тест Қалқанша без супрессиясымен тест өткізгенде 14 күн бойы 150-200 мкг натрий левотироксинін күнделікті қабылдайды.

- әсер етуші затқа немесе құрамында тізбеленген қосымша заттардың кез келгеніне жоғары сезімталдық - емделмеген гипертиреоз - емделмеген бүйрек үсті бездерінің жеткіліксіздігі - емделмеген гипофиз жеткіліксіздігі (бұл емдеуді талап ететін бүйрек үсті бездері жеткіліксіздігіне әкеледі) - жедел миокард инфарктісі - жедел миокардит - жедел панкардит - балалар және 18 жасқа дейінгі жасөспірімдер (бояғыштарының болуына орай, 25 мкг, 75 мкг, 100 мкг, 125 мкг және 150 мкг дозалар үшін) Жүктілік кезінде левотироксинді тиреостатикалық дәрілермен бір мезгілде қабылдау қарсы көрсетілімді.

Өте жиі - жүректің жиі соғуы - ұйқысыздық - бас ауыру Жиі - тахикардия - күйгелектік Сирек - идиопатиялық бассүйекішілік гипертензия (әсіресе, балаларда) Белгісіз (қолда бар деректер негізінде жиілігін бағалау мүмкін емес) - аритмия, стенокардия - аса жоғары сезімталдық - бөртпе, есекжем, гипергидроз - мазасыздық күйі - бұлшықет әлсіздігі және бұлшықет құрысулары, левотироксиннің бәсеңдету дозалары аясындағы остеопороз, әсіресе, менопаузадан кейінгі кезеңдегі әйелдерде, көбінесе ұзақ уақыт емдеу кезінде - туылу кезіндегі дене салмағы өте төмен шала туған нәрестелердегі қан кернеулері, коллапс (тамырдың жедел жеткіліксіздігі) - етеккір оралымының бұзылуы - диарея, құсу - салмақ төмендеуі - тремор - ыстыққа шыдай алмау, қызба Жағымсыз дәрілік реакциялар туындағанда медициналық қызметкерге, фармацевтикалық қызметкерге немесе дәрілік препараттар тиімсіздігі туралы хабарламаларды қоса, дәрілік препараттарға жағымсыз реакциялар (әсерлер) жөніндегі ақпараттық дерекқорға тікелей хабарласу керек. Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды ұлттық сараптау орталығы» ШЖҚ РМК http://www.ndda.kz

Артық дозалану көрсеткіші ретінде T3 деңгейінің жоғарылауы T4 немесе сT4 деңгейінің жоғарылауынан нақтырақ болады. Симптомдары Артық дозалану және уыттану жағдайында метаболизмнің орташа немесе едәуір жеделдеуіне тән симптомдар пайда болады. Артық дозалану дәрежесіне байланысты препарат қабылдауды тоқтатуға және бақылау тексеруінен өтуге кеңес беріледі. Адамда уыттану жағдайларында (суицид әрекеттері) 10 мг дейінгі дозаларда левотироксин асқынуларсыз жағымды болады. Егер анамнезінде жүректің ишемиялық ауруы болмаған жағдайда, өмірлік маңызды функцияларының (тыныс алу және қан айналымы) бұзылуы сияқты күрделі асқынулардың даму ықтималдығы аз. Осыған қарамастан, тиреоуытты криз, құрысулар, жүрек жеткіліксіздігі және команың дамуы туралы хабарламалар бар. Анамнезінде левотироксинді көп жыл шамадан тыс қабылдаған пациенттерде жүректен болған кенет өлім жөнінде жекелеген хабарламалар бар. Емдеу Жедел артық дозалану жағдайларында препараттың асқазан-ішек жолынан сіңуін белсендірілген көмірді қабылдау көмегімен азайтуға болады. Емдеу, әдетте, симптоматикалық және демеуші сипатта болады. Ауыр бета-симпатомиметикалық симптомдарды, мысалы, тахикардия, үрейлену, қозу немесе гиперкинезияны бета-блокаторлар қолдану есебінен әлсіретуге болады. Қалқанша без функциясы толығымен бәсеңдеп қалғандықтан, тиреостатиктер қолдану көрсетілмеген. Препаратты өте жоғары дозада (суицид әрекеті) қабылдаған жағдайда плазмаферез жасау мақсатқа сай болады. Левотироксиннің артық дозалануы кезінде ұзақ уақыт қадағалау қажет. Левотироксиннің лиотиронинге біртіндеп айналуына байланысты симптомдар дамуы 6 күнге дейін кідіріспен жүруі мүмкін. Дәрілік препаратты қолдану бойынша сұрақтар туындағанда кеңес алу үшін медициналық қызметкерге хабарласу қажет.

Тиреоидты гормондармен емді бастар алдында келесі аурулар немесе жай-күйлер болмауы немесе ем жүргізілуі тиіс: - жүректің ишемиялық ауруы - стенокардия - гипертония - гипофиз жеткіліксіздігі және/немесе бүйрек үсті бездері қыртысының жеткіліксіздігі - қалқанша без автономиясы Бүйрек үсті бездерінің дисфункциясы жағдайында емдеу левотироксинмен емнің басталуына дейін бүйрек үсті бездерінің жедел жеткіліксіздігін болдырмау үшін талапқа сай орын басу емімен жүргізілуі тиіс. Жүректің ишемиялық ауруы, жүрек жеткіліксіздігі, тахиаритмиялар, өршу фазасынан тыс миокардит, созылмалы гипотиреоз кезінде немесе миокард инфарктісін өткерген пациенттерде фармакологиялық индукцияланған гипертиреоздан тіпті оның жеңіл дәрежесінде де міндетті түрде сақтану қажет. Тиреоидты гормондармен ем жүргізілгенде осы пациенттердің қалқанша без гормондары көрсеткіштеріне жиі бақылау жасалуы тиіс. Екіншілік гипотиреозда қатарлас адренокортикальді жеткіліксіздіктің бар-жоғын тексеру қажет. Осы ауру болғанда, бірінші кезекте, орын басу емін жүргізген жөн (гидрокортизон). Организмді кортикостероидтармен талапқа сай қамтамасыз етусіз тиреоидты гормондармен ем адренокортикальді немесе гипофиздік жеткіліксіздігі бар пациенттерде адиссонды криз тудыруы мүмкін. Бүйрек үсті бездері функциясының жетілмеуі және коллапстың орын алу мүмкіндігі салдарынан туылу кезіндегі дене салмағы өте төмен шала туған нәрестелерде левотироксинмен емнің басында ерекше сақтық шарасын қадағалау керек. Анамнезінде эпилепсия бар пациенттерге левотироксин тағайындалғанда сақ болу керек, өйткені бұл пациенттер ұстамалардың жоғары қаупіне бейім. Қалқанша без автономиясына күмән болған жағдайда тиреотропин-рилизинг-гормон талдауын немесе қалқанша бездің супрессиялық сцинтиграфиясын өткізу ұсынылады. Арнайы сақтандырулар Менопаузадан кейінгі кезеңдегі әйелдерде остеопороз даму қаупі жоғары; сондықтан оларға натрий левотироксинінің дозасын ең төменгі тиімді дозаға жеткенше таңдау (титрлеу) қажет, сондай-ақ қандағы левотироксин концентрациясының физиологиялық деңгейден жоғарылауын болдырмау үшін оларға қалқанша без функциясын жиірек тексеру керек. Тиреоидты гормондарды дене салмағын төмендету үшін қолдануға болмайды. Эутиреоидты алмасу бар пациенттерде қалыпты дозалар дене салмағының төмендеуіне әкелмейді. Жоғарырақ дозалары, әсіресе, дене салмағын төмендетуге арналған кейбір дәрілермен біріктірілімде күрделі немесе тіпті өмірге қатер төндіретін жағымсыз құбылыстар туындауына әкелуі мүмкін. Егер левотироксинмен емдеу режимі белгіленген болса, құрамында тиреоидты гормондар бар басқа дәрілік препаратқа ауысу тек зертханалық талдаулар мен клиникалық деректерді бақылаумен жүргізілуі тиіс. Левотироксин мен қалқанша безге ықпал етуі мүмкін басқа дәрілік препараттарды (мысалы, амиодарон, тирозинкиназа тежегіштері, салицилаттар және фуросемид жоғары дозаларда) бір мезгілде қабылдап жүрген пациенттерде қалқанша без функциясын қадағалау қажет. Диабеттен зардап шегетін пациенттерге және антикоагулянттар қабылдайтын пациенттерге қатысты. Өте сирек жағдайларда севеламер мен левотироксинді бір мезгілде қолдану аясында туындаған гипотиреоз туралы хабарламалар келіп түсті. Сондықтан екі препаратты да қабылдап жүрген пациенттерде ТТГ деңгейін мұқият бақылап отыруға кеңес беріледі. Қосымша заттар Бұл дәрілік препарат құрамында бір таблеткасына 1 ммольден аз натрий (23 мг) бар, яғни шын мәнінде «натрийсіз». Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері Көлік құралдарын басқару және механизмдер қызметін көрсету қабілетіне әсер ету зерттеулері жүргізілмеді.

Жүктілік және лактация кезінде тиреоидты гормондармен емді тоқтатуға болмайды. Ана мен шарананың денсаулығын барынша қамтамасыз ету үшін қалқанша без гормондарының деңгейі қалып шегінде қалғаны маңызды. Жүктілік кезінде кеңінен қолданылуына қарамастан, осы сәтке дейін левотироксиннің жүктілік ағымына немесе шарана/жаңа туған нәресте денсаулығына жағымсыз әсерлерінің болуы туралы мәліметтер жоқ. Тіпті левотироксинді жоғары дозада қолданған жағдайдың өзінде тиреоидты гормондар емізулі балаларда гипертиреоз дамуы немесе ТТГ секрециясын бәсеңдету үшін жеткілікті емес мөлшерлерде ана сүтіне түседі. Эстроген арқасында жүктілік кезінде левотироксинге қажеттілік артуы мүмкін. Сол себепті жүктілік кезінде қалқанша без функциясын бақылап отыру, ал қажет болған жағдайда, тиреоидты гормон дозасын түзету керек. Жүктілік кезінде гипертиреозды тиреостатиктермен емдеуде левотироксинді адъювантты ем ретінде қолдану қарсы көрсетілімді. Левотироксинді қосымша қабылдағанда тиреостатиктер дозасын арттыру қажет болуы мүмкін. Левотироксиннен өзгешелігі, тиреостатиктер әсер ететін дозаларында плаценталық бөгеттен өтуі мүмкін. Бұл шаранада гипотиреозға әкелуі мүмкін. Сол себепті гипертиреоз бар жүкті әйелдерде тиреостатикалық дәрілерді монотерапия ретінде және төмен дозаларда қолдану керек. Жүктілік және лактация кезінде қалқанша без супрессиясымен тест өткізуге болмайды.

Диабетке қарсы дәрілер Левотироксин қандағы глюкоза деңгейін төмендетумен жүзеге асатын диабетке қарсы препараттар (мысалы, метформин, глимепирид, глибенкламид және инсулин) әсерін әлсіретуі мүмкін. Сондықтан қант диабетінен зардап шегіп жүрген тұлғаларда, негізінен, тиреоидты гормондармен емнің басында және соңында қандағы глюкоза деңгейін жүйелі тексеру керек. Қажет болған жағдайда қантты төмендететін дәрілік зат дозасын түзету қажет. Кумарин туындылары Левотироксин кумарин туындыларының әсерін, оларды плазма ақуыздарымен байланысқан бөліктерінен ығыстыра отырып, күшейтуі мүмкін. Сол себепті левотироксин мен кумарин туындыларын бір мезгілде қабылдап жүрген тұлғаларда қанның ұюын жүйелі тексеру, ал қажет болған жағдайда антикоагулянт дозасын түзету (дозаны азайту) керек. Йон алмастыратын шайырлар Колестирамин, колестипол немесе полистиренді сульфон қышқылының кальций және натрий тұзы сияқты йон алмастыратын шайырлар асқазан-ішек жолында тиреоидты гормондарды байланыстыру жолымен левотироксин сіңуін басады; сондықтан оларды Тиромак қабылдаудан кейін 4-5 сағаттан соң қолдану керек. Өт қышқылын байланыстыратын дәрілер Колесевелам левотироксинді байланыстырады және сол арқылы асқазан-ішек жолында левотироксин сіңуін төмендетеді. Левотироксинді колесевелам қабылдаудан, кем дегенде, 4 сағат бұрын қабылдағанда ешқандай өзара әрекеттесу байқалмады. Сондықтан Тиромак колесевелам қабылдаудан, кем дегенде, 4 сағат бұрын қабылдану керек. Құрамында алюминий бар антацидті препараттар, сондай-ақ құрамында темір бар және құрамында кальций бар препараттар Левотироксин сіңуі құрамында алюминий бар антацидті дәрілерді (антацидті препараттар, сукральфат), құрамында темір бар дәрілік заттарды және құрамында кальций бар дәрілік заттарды бір мезгілде қолданған жағдайда азаюы мүмкін. Сондықтан Тиромак аталған дәрілерді қабылдаудан, кем дегенде, екі сағат бұрын қабылдану керек. Севеламер және лантан карбонаты: Севеламер және лантан карбонаты, болжамды түрде, левотироксин биожетімділігін төмендетуі мүмкін. Пропилтиоурацил, глюкокортикоидтар және бета-блокаторлар (әсіресе, пропранолол) Аталған заттар T4-тің T3-ке айналуын бәсеңдетеді және плазмада Т3 концентрациясының төмендеуіне әкелуі мүмкін. Амиодарон және йодталған рентген контрастылы заттар Амиодарон мен йодталған рентген контрастылы заттар, оларда йод мөлшерінің жоғары болуы салдарынан, гипертиреоз да гипотиреоз да тудыруы мүмкін. Болуы мүмкін, бірақ автономиясы диагностикаланбаған түйінді зобта ерекше сақ болу талап етіледі. Амиодарон T4-тің T3-ке айналуын тежейді, соның салдарынан плазмада Т3 концентрациясының төмендеуі және ТТГ жоғарылауы туындайды. Амиодаронның қалқанша без функциясына әсер етуіне байланысты Тиромак препаратының дозасын түзету қажеттілігі туындауы мүмкін. Салицилаттар, дикумарол, фуросемид, клофибрат Салицилаттар (әсіресе, 2,0 г/тәуліктен асып кететін дозаларда), дикумарол, жоғары дозалардағы (250 мг) фуросемид, клофибрат және басқа заттар плазма ақуыздарымен байланысқан бөліктерінен левотироксинді ығыстыруы мүмкін. Бұл бос тиреоидты гормондар деңгейінің бастапқы өткінші артуына әкелуі мүмкін, соның артынша тиреоидты гормондардың жалпы деңгейі төмендейді. Құрамында эстроген бар контрацептивтер, менопаузадан кейінгі кезеңде гормонды алмастыру еміне арналған дәрілік заттар Құрамында эстроген бар контрацептивтерді немесе менопаузадан кейін гормон алмастыру емін қолдану аясында левотироксинге қажеттілік артуы мүмкін. Левотироксин байланысуы жоғарылауы мүмкін, бұл диагностикада және емдеуде қателіктерге әкелуі мүмкін. Сертралин, хлорокин/прогуанил Аталған заттар левотироксин тиімділігін төмендетеді және қан плазмасында ТТГ деңгейін арттырады. Фермент-индукциялайтын дәрілік препараттар Барбитураттар, рифампицин, карбамазепин, фенитоин және басқа да бауыр ферменттерін белсендіруге қабілетті дәрілік заттар левотироксиннің бауыр клиренсін арттыруы және оның плазмадағы деңгейінің төмендеуіне әкелуі мүмкін. Протон сорғысының тежегіштері (ПСТ) ПСТ-мен бір мезгілде қолдану ПСТ әсерінен асқазанның рН жоғарылауына байланысты қалқанша без гормондарының сіңуінің төмендеуіне әкелуі мүмкін. Қатарлас емдеу кезінде қалқанша безінің қызметін жүйелі бақылау және клиникалық бақылау ұсынылады. Қалқанша безінің гормондарының дозасын арттыру қажет болуы мүмкін. ПСТ-мен емдеуді тоқтатқанда да сақ болу керек. Протеаза тежегіштері Лопинавир/ритонавирмен бірге қолданғанда левотироксиннің емдік әсерінің төмендеуі туралы хабарламалар бар. Сондықтан бір мезгілде левотироксин және протеаза тежегіштерін қабылдап жүрген пациенттердің клиникалық симптомдарына және қалқанша без функциясына мұқият бақылау жүргізу қажет. Левотироксин алатын пациенттерде, ең болмағанда, ритонавирмен емдеу басталған бірінші ай ішінде және/немесе емдеу аяқталған соң тиреотропты гормон (ТТГ) деңгейіне мониторинг өткізу керек. Тирозинкиназа тежегіштері Тирозинкиназа тежегіштері (иматиниб, сунитиниб, сорафениб, мотесаниб) левотироксин тиімділігін төмендетуі мүмкін. Сондықтан левотироксин мен тирозинкиназа тежегіштерін бір мезгілде қабылдап жүрген пациенттердің клиникалық симптомдарын және қалқанша без функциясының көрсеткіштерін мұқият қадағалау қажет. Левотироксин дозасын түзету қажеттілігі туындауы мүмкін. Соя өнімдері Соя өнімдері левотироксиннің ішекте сіңуін азайтуы мүмкін. Соя өнімдерінен құралған диетада және туа біткен гипотиреоз себебімен левотироксин қабылдап жүрген балалар плазмасында ТТГ деңгейінің артуы мәлімделді. Плазмада T4 пен ТТГ қалыптағы деңгейіне жету үшін левотироксиннің әдеттен тыс жоғары дозалары қажет болуы мүмкін. Соя өнімдерінен тұратын диета кезінде және оны тоқтатудан кейін плазмада T4 және ТТГ деңгейіне мұқият бақылау жүргізу қажет; левотироксин дозасын түзету қажеттілігі туындауы мүмкін. Лабораториялық зерттеулер нәтижелеріне әсері Биотин биотин/стрептавидиннің өзара әрекеттесуіне негізделген қалқанша безінің сынақ нәтижелеріне кедергі келтіруі мүмкін, бұл жалған төмен немесе жалған жоғары сынақ нәтижелеріне әкеледі. Биотиннің жоғары дозаларымен араласу қаупі артады. Зертханалық зерттеулердің нәтижелерін интерпретациялау кезінде биотиннің ықтимал өзара әрекеттесуін, әсіресе клиникалық көрініспен келіспеушілік жағдайында ескеру қажет. Құрамында биотин бар препараттарды қабылдап жүрген пациенттер үшін зертхана қызметкерлерін қалқанша безінің қызметіне тест жүргізудің ең жақсы уақыты туралы хабардар ету керек. Бар болса, биотинге сезімтал емес альтернативті сынақтарды қолдану керек. Р-450 цитохромын индукциялайтын дәрілердің әсері Құрамында шәйқурайы (Hypericum perforatum L.) бар тағамдар сияқты ферменттерді индукциялайтын дәрілер левотироксиннің бауыр клиренсін жоғарылатуы мүмкін, бұл қан сарысуындағы қалқанша безінің гормонының концентрациясының төмендеуіне әкеледі. Сондықтан, бұл препараттар бір мезгілде енгізілсе қалқанша безді орын басатын емді алатын пациенттерге қалқанша безінің гормондарының дозасын арттыру қажет болуы мүмкін.

Сақтау мерзімі 2 жыл Жарамдылық мерзімі өткеннен кейін қолдануға болмайды. Сақтау шарттары Құрғақ, жарықтан қорғалған жерде 25 С-ден аспайтын температурада сақтау керек. Балалардың қолы жетпейтін жерде сақтау керек!