Фаспик препаратын қабылдар алдында өзіңіздің дәрігеріңізге немесе фармацевтке хабарлаңыз, егер:
• Сіз циклооксигеназа-2 селективті тежегіштерін қоса, басқа ҚҚСП қабылдап жүрсеңіз;
• Сіз ойық жаралар немесе қан кету қаупін арттыратын басқа препараттарды, мысалы, кортикостероидтар, варфарин сияқты антикоагулянттарды, антиагреганттар және серотонинді кері қармайтын селективті тежегіштерді, мысалы, аспиринді қабылдап жүрсеңіз;
• Сізде бронх демікпесі немесе аллергиялық аурулар (немесе бұрын болған болса) болса;
• Сізде артериялық гипертензия (гипертония) және/немесе жүрек жеткіліксіздігі, жүректің ишемиялық ауруы болса;
• Сізде шеткері артерия аурулары және/немесе цереброваскулярлық аурулар болса;
• Сізде қанның ұюымен проблемалар немесе бауыр немесе бүйрек функциясының төмендеуі болса;
• Сізде жүйелі қызыл жегі немесе дәнекер тінінің аралас ауруы болса;
• Сізде қант диабеті болса;
• Сізде холестерин деңгейі жоғары болса;
• Сізде ойық жаралы колит, Крон ауруы болса;
• Сізде кейбір қанттардың жақпаушылығы болса;
• Сіз темекі шегетін болсаңыз;
• Сіз жүкті немесе бала емізетін болсаңыз, жүкті болуыңыз мүмкін деп ойласаңыз немесе балалы болуды жоспарлап жүрсеңіз. Егер сіз жүктіліктің соңғы 3 айында болсаңыз, Фаспик препаратын пайдаланбаңыз. Жүктіліктің алғашқы 6 айында Фаспик препаратын нақты қажеттіліксіз және оның простагландин синтезіне әсеріне байланысты Сіздің дәрігеріңіздің ұсынымынсыз пайдаланбаған жөн. Егер Сізге осы кезеңде емдеу қажет болса, ең төмен дозаны мүмкіндігінше қысқа уақыт ішінде пайдалану керек. Фаспик препаратының пероральді түрлері (мысалы, таблеткалар) Сіздің болашақ балаңызда жағымсыз әсерлерді туындатуы мүмкін;
• Сізде инфекция болса. Бұл препарат қызба және ауыру сияқты инфекция белгілерін жасыруы мүмкін. Нәтижесінде инфекцияны талапқа сай емдеуді тағайындау кешеуілдеуі мүмкін, бұл асқынулардың даму қаупін арттыруы мүмкін. Бұл бактериялық пневмония, сондай-ақ желшешек аясында терінің бактериялық инфекциясы кезінде байқалды. Егер Сіз инфекциялық ауру кезінде Фаспик қабылдасаңыз және симптомдардың сақталуын немесе нашарлауын байқасаңыз, дереу дәрігердің кеңесіне жүгіну керек.
Арнайы ескертулер
Тыныс алумен проблемаларды, бет пен мойын аймағының ісінуін (ангионевроздық ісіну), ибупрофенді қабылдаған кезде кеуденің ауыруын қоса, бұл дәріге аллергиялық реакцияның белгілері туралы хабарланды. Егер Сіз осы белгілердің қандай да бірін байқасаңыз, Фаспик препаратын қабылдауды дереу тоқтатыңыз және дереу дәрігерге немесе жедел медициналық көмекке жүгініңіз.
Жағымсыз реакциялардың даму қаупін азайту үшін ибупрофенді ең төмен тиімді дозада және симптомдарды жеңілдету үшін қажет ең қысқа мерзімде қабылдау керек.
Егде жастағы адамдарда ҚҚСП қабылдағаннан кейін жағымсыз реакциялардың, әсіресе өлімге әкелуі мүмкін қан кету немесе асқазан-ішек ойық жарасының тесілуі сияқты реакциялардың жиілігі артады.
Тыныс алу жүйесіне әсері: бронх демікпесі немесе аллергиялық аурулары асқыну сатысында немесе анамнезінде бар пациенттерде бронх түйілуінің дамуы мүмкін.
Басқа ҚҚСП: циклооксигеназа-2 селективті тежегіштерін қоса, ибупрофенді басқа ҚҚСП бір мезгілде қолданудан аулақ болу керек.
Жүйелі қызыл жегі және дәнекер тіннің аралас ауруы: жүйелі қызыл жегі немесе дәнекер тіннің аралас ауруы бар пациенттерде асептикалық менингиттің даму қаупі жоғары.
Бүйрекке әсері: бүйрек жеткіліксіздігінің дамуымен бүйрек функциясының нашарлауы мүмкін.
Дегидратациясы бар балалар мен жасөспірімдерде бүйрек жеткіліксіздігінің даму қаупі бар.
Бүйректің тубулярлы ацидозы және гипокалиемия жедел артық дозаланғанда және ибупрофен препараттарын ұзақ уақыт бойы жоғары дозада (әдетте 4 аптадан астам) қабылдайтын пациенттерде, соның ішінде ұсынылатын тәуліктік дозадан асатын дозаларда пайда болуы мүмкін.
Бауырға әсері: бауыр функциясының бұзылуы мүмкін.
Жүрек-қантамыр жүйесіне және ми қан айналымына әсері: анамнезінде артериялық гипертензиясы және/немесе жүрек жеткіліксіздігі бар пациенттерге (дәрігермен кеңесу қажет) препаратты қабылдауды сақтықпен бастау керек, өйткені ҚҚСП қабылдаумен байланысты сұйықтықтың іркілуі, артериялық гипертензия және ісіну туралы хабарланған.
Клиникалық зерттеулер ибупрофенді, әсіресе жоғары дозаларда (тәулігіне 2400 мг) қолдану артериялық тромбоздық асқынулардың (мысалы, миокард инфарктісі немесе инсульт) даму қаупінің елеусіз жоғарылауымен байланысты болуы мүмкін екенін көрсетеді. Эпидемиологиялық зерттеулер ибупрофеннің төмен дозаларын (мысалы, тәулігіне < 1200 мг) қабылдау артериялық тромбоздық асқынулардың даму қаупінің жоғарылауымен байланысты екенін көрсетпейді.
Бақыланбайтын артериялық гипертензиясы, (NYHA бойынша II-III класс) іркілісті жүрек жеткіліксіздігі, жүректің анықталған ишемиялық ауруы, шеткері артерия аурулары және/немесе цереброваскулярлық аурулары бар пациенттерге ибупрофенді жоғары дозалардан (тәулігіне 2400 мг) аулақ бола отырып, пайда-қауіп арақатынасын мұқият бағалағаннан кейін ғана тағайындау керек.
Ибупрофенмен ұзақ емді бастағанға дейін, әсіресе жоғары дозаларда (тәулігіне ≥ 2400 мг), жүрек-қантамырлар асқынулары даму қаупі бар пациенттерде (мысалы, гипертензия, гиперлипидемия, қант диабеті, шылым шегу) пайда-қауіп арақатынасына мұқият бағалау жүргізу қажет.
Асқазан-ішек жолына әсері: ҚҚСП осы аурулардың ықтимал асқынуына байланысты анамнезінде асқазан-ішек жолының аурулары бар пациенттерге (ойық жаралы колит, Крон ауруы) сақтықпен тағайындау керек.
Емдеудің кез келген кезеңінде ҚҚСП қабылдау, ескерту симптомдары немесе анамнезінде асқазан-ішек жолы тарапынан жағымсыз реакциялары болған немесе болмаған жағдайда кейде өліммен аяқталуы мүмкін асқазан-ішектен қан кетуге, ойық жаралануға немесе тесілуге әкелуі мүмкін.
Анамнезінде ойық жарасы, әсіресе қан кетумен немесе тесілумен асқынған ойық жарасы бар пациенттерде және егде жастағы пациенттерде ҚҚСП дозасын арттырған кезде асқазан-ішектен қан кету, ойық жара немесе тесілу қаупі артады. Мұндай пациенттерге препаратты қабылдауды ең төменгі дозадан бастауы керек.
Анамнезінде АІЖ уытты зақымдануы бар пациенттерге, атап айтқанда егде жастағы пациенттерге, әсіресе емдеудің бастапқы кезеңдерінде іш қуысы ағзалары тарапынан кез келген ерекше симптомдары (әсіресе асқазан-ішектен қан кету туралы) туралы хабарлау керек.
Пероральді кортикостероидтар, антикоагулянттар мысалы, варфарин, серотонинді кері қармайтын селективті тежегіштер немесе антитромбоциттік дәрілер, мысалы, аспирин ойық жара немесе қан кету қаупін арттыруы мүмкін препараттарды бірге сақтықпен қабылдау керек.
Ибупрофен қабылдайтын пациенттерде асқазан-ішектен қан кету немесе ойық жаралар пайда болған кезде, препаратты қабылдауды тоқтату керек.
Терінің ауыр жағымсыз реакциялары (тыртықтар): эксфолиативті дерматит, көпформалы эритема, Стивенс-Джонсон синдромы (SJS), уытты эпидермиялық некролиз (TEN) және эозинофилиямен және жүйелік симптомдармен дәрілік реакция (DRESS синдромы) сияқты терінің ауыр жағымсыз реакциялары (тыртықтар) және өмірге қауіп төндіретін немесе өлімге әкелуі мүмкін жедел жайылған экзантематозды пустулез (AGEP) ибупрофенді қолданумен тіркелген, бұл реакциялардың көпшілігі бірінші айдың ішінде дамыды.
Осы реакцияларды көрсететін белгілер мен симптомдар пайда болған кезде, ибупрофенді қабылдауды дереу тоқтатып, баламалы емдеуді (қажет болған жағдайда) қарастыру керек.
Жасырын инфекциялар симптомдарының бүркемеленуі: Фаспик препаратын қолдану инфекциялық аурудың симптомдарын бүркемелеуі мүмкін, бұл тиісті емдеуді бастаудың кешеуілдеуіне әкелуі мүмкін және осылайша аурудың ағымын қиындатады. Бұл жағдай бактериялық ауруханадан тыс пневмония және желшешектің бактериялық асқынуларында байқалады. Инфекциялық ауру кезінде бұл препаратты қолданған кезде ауыруды жеңілдету немесе дене температурасын төмендету үшін инфекциялық аурудың мониторингін жүргізу ұсынылады. Медициналық мекемеден тыс емдеу жағдайында, егер симптомдар сақталса немесе күшейсе, пациент дәрігерге қаралуы тиіс.
Қосымша заттар: Фаспик құрамында бір реттік дозада 16,7 мг сукроза бар, сирек кездесетін тұқым қуалайтын фруктоза жақпаушылығы, глюкоза-галактоза мальабсорбциясы немесе сахараза-изомальтаза тапшылығы бар пациенттер бұл препаратты қабылдамауы керек.
Фаспик бір реттік доза құрамында 82,98 мг натрий бар, бұл ересектер үшін (2 г) ДДҰ ұсынған ең жоғары тәуліктік тұтынудың 4,15% баламалы. Мұны натрийдің түсуі шектелген диетадағы пациенттер ескеруі керек.
Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері
Фаспик көлік құралдары мен қауіптілігі зор механизмдерді басқару қабілетіне әсер етпейді.
