Фенотерикс аэрозоль 100 мкг/дозу

Бір ингаляциялық дозаның құрамында белсенді зат - 100 мкг фенотерол гидробромиді (микрондалған) қосымша заттар: сусыз лимон қышқылы, сусыз этанол, тазартылған су, гидрофторалкан (HFA) 134a. Сыртқы түрінің, иісінің, дәмінің сипаттамасы Мөлдір түссіз ерітінді.

– бронх демікпеcінің жедел ұстамаларын симптоматикалық емдеу – дене жүктемесінен болатын бронх демікпесі ұстамаларының профилактикасы – аллергиялық және аллергиялық емес бронх демікпеcін және/немесе тыныс жолдарының қайтымды обструкциясымен қатар жүретін басқа ауруларды, мысалы, өкпе эмфиземасымен немесе онсыз созылмалы обструкциялық бронхитті симптоматикалық емдеу Ескертпе Ұзақ уақыт емдеу қажет болса, қабынуға қарсы қатарлас ем тағайындау керек.

Нұсқаулықта көрсетілмеген.

Дозалау режимі Препаратты дозалау режимі аурудың түріне және ауырлығына байланысты. Егер басқаша көрсетілмесе, ересектер мен 6 жастан үлкен балалар үшін дәрілік затты дозалаудың келесі режимдері ұсынылады: • Бронх тегіс бұлшықеттерінің кенеттен туындаған түйілуін және ентігу ұстамасын басу үшін препараттың бір реттік ингаляциясын (100 мкг фенотерол гидробромиді) жасауға кеңес беріледі. Әдетте, жедел ентігу ұстамасында дем алуды тез жеңілдету үшін бір ингаляция жеткілікті. Бірінші ингаляциядан кейін 5 минут ішінде жай-күйдің елеулі жақсаруы болмаса, екінші ингаляцияны жасауға болады. Егер екінші ингаляциядан кейін ауыр ентігу ұстамасы басылмаса, қосымша ингаляциялар жасау қажеттілігі туындауы мүмкін. Осындай жағдайларда пациенттер кідіріссіз медициналық жәрдемге жүгінуі тиіс. •β2-симпатомиметиктермен ұзақ уақыт емдеу қажеттілігі туындаған жағдайларда препараттың ұсынылған дозасы тәулігіне 3-4 рет 1-2 ингаляция құрайды. Ингаляция жасау уақыты және препарат дозасы ентігу жиілігі мен ауырлығына сәйкес әркімге жеке таңдалуы дұрыс (симптомдық-бағдарлы ем). Атап айтқанда, бронх демікпесінде осылай емдеу қабынуға қарсы ұзаққа созылатын еммен қатар жүруі тиіс. Ингаляциялар арасындағы үзіліс 3 сағаттан кем болмауы тиіс. Препараттың жалпы тәуліктік дозасы 8 ингаляциядан аспауы тиіс, ал ең жоғары бір реттік доза 4 ингаляциядан аспауы тиіс, өйткені препаратты жоғарырақ дозаларда пайдаланғанда, әдетте, қосымша емдік әсері білінбейді, алайда, ауыр жағымсыз реакциялар дамуы мүмкін. •Дене жүктемесінен болатын бронх демікпесі ұстамаларының мақсатты профилактикасы үшін немесе аллергенмен болжамды жанасу кезінде көзделген дене жүктемесінен/аллергенмен жанасудан 10-15 минут бұрын 1-2 ингаляция жасауға кеңес беріледі. Балалар жасындағы пациенттер Егер басқаша көзделмесе, 4-6 жас аралығындағы балалар үшін дәрілік затты дозалаудың келесі режимдері ұсынылады: •Бронх тегіс бұлшықеттерінің кенеттен туындаған түйілуін және ентігу ұстамасын басу үшін препараттың бір реттік (100 мкг фенотерол гидробромиді) ингаляциясын жасауға кеңес беріледі. •Ұзақ емдеу қажеттілігі туындайтын жағдайларда немесе ұстамалар профилактикасында препараттың ұсынылған дозасы тәулігіне 4 рет 1 ингаляция (100 мкг фенотерол гидробромиді) құрайды. Ингаляция жасау уақыты және препарат дозасы ентігу жиілігі мен ауырлығына сәйкес әркімге жеке таңдалуы дұрыс (симптомдық-бағдарлы ем). Атап айтқанда, бронх демікпесінде осылай емдеу қабынуға қарсы ұзаққа созылатын еммен қатар жүруі тиіс. Ингаляциялар арасындағы үзіліс 3 сағаттан кем болмауы тиіс. Препараттың жалпы тәуліктік дозасы 4 ингаляциядан аспауы тиіс, ал ең жоғары бір реттік доза 2 ингаляциядан аспауы тиіс, өйткені препаратты жоғарырақ дозаларда пайдаланғанда, әдетте, қосымша емдік әсері білінбейді, алайда, ауыр жағымсыз реакциялар дамуы мүмкін. •Дене жүктемесінен болатын бронх демікпесі ұстамаларының мақсатты профилактикасы үшін немесе аллергенмен болжамды жанасу кезінде көзделген дене жүктемесінен/аллергенмен жанасудан 10-15 минут бұрын 1-2 ингаляция (100 мкг фенотерол гидробромиді) жасауға кеңес беріледі. Препарат 4 жасқа толмаған балаларда пайдалануға сай келмейді. Препаратпен емге қатысты айрықша нұсқаулар Бронх демікпесін емдеуді, аурудың ауырлық дәрежесіне қарай, сатылы жүргізу қажет. Жүйелі медициналық тексерулер өткізу кезінде емге берілетін жауапты бақылап отыру керек. Пациент үшін β2-симпатомиметик, оның ішінде Фенотерикс дозасын дәрігермен кеңесусіз өз бетінше арттыру өміріне қауіпті болуы мүмкін. Дәрігердің ауру ағымын, сондай-ақ тағайындалған бронходилатилатациялық және қабынуға қарсы емнің тиімділігін бағалауы үшін пациентке дәрігер нұсқауларына сәйкес өзінің жай-күйін күнделікті өз бетінше бақылау маңызды. Оны пикфлоуметр көмегімен жеделдетілген дем шығару көлемін анықтай отырып, жүргізуге болады. Енгізу әдісі және жолы Препараттың дұрыс қолданылмауына жол бермеу үшін пациентке ингаляторды дұрыс пайдалану туралы толық нұсқау берілуі тиіс. Ингаляторды пайдалану қағидалары Ингаляторды дұрыс пайдаланудың тиімді емделу үшін шешуші маңызы бар. Ингаляция жасалғанда пациент денесінің қандай қалыпта болғанына қарамастан, ішке дем алғанда баллон түбі жоғары қарай тігінен, ал мүштік төмен бағытталған болуы тиіс. Ингаляторды отырған немесе тұрған күйде пайдалануға кеңес беріледі. Препаратты алғаш қолданар алдында баллон түбіне екі рет басыңыз. Препаратты әр жолы қолданғанда келесі әрекеттерді орындау қажет: 1. Қорғағыш қалпақшасын шешіңіз (1 сурет). 2. Терең дем шығарыңыз. 3. Баллонды ұстап тұрып, 2 суретте көрсетілгендей, мүштікті ерінмен тығыз көмкеріңіз. Осы орайда, баллон түбі жоғары қарай тік бағытталуы тиіс. 4. Бір ингаляция жасау үшін терең дем алыңыз және бір мезгілде баллон түбін күш салып басыңыз. Бірнеше секунд деміңізді іркіңіз, артынан мүштікті ауыздан шығарыңыз және баяу дем шығарыңыз. Егер айқын тыныс алу жеткіліксіздігі салдарынан терең дем алуға мүмкіндік болмаса, тыныс алуды жеңілдету мақсатында және келесі жолы препаратты дұрыс пайдалану мүмкін болу үшін ауыз қуысына алдын ала ингаляция жасауға болады. Егер екінші ингаляция жасау қажеттілігі туындаса, 2-4 әрекетті қайталаңыз. 5. Ингаляторды пайдаланудан кейін қорғағыш қалпақшасын қайта кигізіңіз. Фенотерикс дайындалу («өкпені ашу») және кортикостероидтар, тұз ерітіндісі және кромоглиций қышқылының динатрий тұзы аэрозольдарымен демеуші ем жүргізу үшін алдын ала пайдаланылу керек. Емдеу ұзақтығы аурудың түріне, ауырлығына және ағымына байланысты және оны емдеуші дәрігер әр жағдайда әркімге жеке белгілейді Егер ингалятор 3 күннен артық пайдаланылмаса, препаратты келесі қолданар алдында баллон түбіне бір рет басу қажет. Мүштікті аптасына бір реттен сиретпей тазалау керек. Дәрілік зат жинақталып қалмау және аэрозоль үшін кедергі туындамау үшін мүштіктің таза болуы маңызды. Тазалау үшін алдымен қорғағыш қалпақшасын шешіп, баллонды мүштіктен ажырату, ал артынан дәрілік зат және/немесе ластанудың көрініп тұрған қалдықтары әбден кеткенше мүштікті жылы сумен жуып-шаю керек (3 сурет). Тазалаудан кейін мүштікті сілкіңіз және оның жылыту жүйелерін пайдаланусыз құрғатылуына жағдай жасаңыз. Құрғатылған соң мүштік баллонмен жалғанады және қорғағыш қалпақшасы кигізіледі (4 сурет). Мүштік Фенотериксті пайдалану үшін арнайы жасалған. Мүштікті ингаляцияларға арналған басқа дозаланған аэрозольдермен пайдаланбаңыз. Фенотериксті тек жиынтыққа кіретін мүштікпен ғана пайдалану қажет. Ингаляцияға арналған ерітінді қысымдағы баллонда болады, сондықтан да оны күш салып ашуға болмайды. Дәрілік заты бар баллон мөлдір емес, сондықтан оның қашан бос болатынын айту мүмкін болмайды. Баллон 200 ингаляциялық дозаға есептелген. Тіпті бүкіл дозасын пайдаланудан кейін де баллон ішінде әлі біршама сұйықтық мөлшері болуы мүмкін. Алайда, бұл жағдайда пациент препараттың қажетті мөлшерін ала алмауы мүмкін екендіктен, ингалятор ауыстырылуы тиіс. Баллонда қалған препараттың жуық мөлшерін келесі үлгіде тексеруге болады: баллонды мүштіктен шығарып алыңыз және оны суы бар ыдысқа салыңыз. Препарат мөлшері баллонның суы бар ыдыста орналасуына қарай айқындалады (5 сурет). 3/4- толтырылған 3/4- толтырылған Суреттегі сөздер: пустой – бос; наполненный на – (сан) бөлігіне толтырылған Баллонның суы бар ыдыстағы қалпы қалған препарат мөлшерін шамамен көрсетеді.

- әсер етуші затқа немесе қосымша заттардың кез келгеніне аса жоғары сезімталдық - гипертрофиялық обструкциялық кардиомиопатия - тахиаритмия

Жағымсыз құбылыстар жиілігін белгілеу келесі критерийлерге сәйкес жүргізіледі: өте жиі (≥ 1/10); жиі (≥ 1/100-ден < 1/10 дейін); жиі емес (≥ 1/1000-нан < 1/100 дейін); сирек (≥ 1/10000-нан < 1/1000 дейін); өте сирек (< 1/10000); белгісіз (қолда бар деректер негізінде бағалау мүмкін емес). Жиі: – тремор, бас айналу – жөтел – жүрек айну – қатты терлеу Жиі емес: – гипокалиемия (ауыр жағдайларды қоса) – психика өзгеруі, қозу – аритмия, стенокардия, қарыншалық экстрасистолия – парадоксты бронх түйілуі – құсу, қыжыл – қышыну – бұлшықеттер түйілуі – несеп шығарудың бұзылуы – артериялық қысымның төмендеуі немесе жоғарылауы Сирек: – гиперкалиемия (гипокалиемия ксантин туындыларын (мысалы, теофиллин), кортикостероидтар мен диуретиктерді бір мезгілде қабылдап жүрген бронх демікпесінің ауыр түрі бар пациенттерде едәуір дәрежеде ерекше білінуі мүмкін. Бұдан бөлек, гипоксия кезінде гипокалиемияның жүрек ырғағына әсерінің күшеюі болуы мүмкін) Белгісіз: – аса жоғары сезімталдық реакциялары (мысалы, қышыну, бөртпе, пурпура, тромбоцитопения, бет ісінуі). – күйгелектік (ашушаңдық, аса жоғары белсенділік, ұйқының бұзылуы, елестеулер пайда болуы мүмкін. Бұл реакциялар, ең алдымен, 12 жасқа дейінгі балаларда байқалды) – бас ауыру – тахикардия, пальпитация, миокард ишемиясы – тамақтың тітіркенуі – есекжем, тері реакциялары (экзантема) – бұлшықеттер әлсіздігі, миалгия. Жағымсыз дәрілік реакциялар туындағанда медициналық қызметкерге, фармацевтикалық қызметкерге немесе дәрілік препараттар тиімсіздігі туралы хабарламаларды қоса, дәрілік препараттарға болатын жағымсыз реакциялар (әсерлер) бойынша ақпараттық дерекқорға тікелей хабарласу керек: Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

Симптомдары Артық дозалану дәрежесіне қарай β2-адреномиметиктерге тән келесі типтік жағымсыз реакциялар: қан кернеуі, ұйқышылдық, бас ауыру, тахикардия, пальпитация, аритмия, артериялық гипотензия, оның ішінде шок күйінің дамуы, артериялық қысым көтерілуі, үрей, кеуде қуысының ауыруы, қозу, экстрасистолия және айқын тремор, әсіресе, қол саусақтарының, сондай-ақ бүкіл дененің дірілі болуы мүмкін. Гипергликемия, гиперлипидемия және гиперкетонемия дамуы мүмкін. Фенотеролды қолдануға бекітілген көрсетілімдер бойынша ұсынылған мөлшерінен артық дозаларда қолдану кезінде метаболизмдік ацидоз және гипокалиемия дамыған жағдайлар тіркелді. Жүрек айну мен құсуды қоса, асқазан-ішек жолы тарапынан бұзылулар, әсіресе, ішке қабылдағанда артық дозалану кезінде дамуы мүмкін. Емдеу Фенотерикс қолдануды тоқтату қажет. Қышқыл-сілті теңгеріміне және қандағы электролиттерге мониторинг өткізу керек. β2-симпатомиметиктермен артық дозалануды емдеу көбінесе симптоматикалық. Фенотерол әсерлерін β-рецепторлар блокаторларын пайдаланумен басуға болады. Алайда, бронх демікпесі бар пациенттерде ауыр бронх түйілуінің даму қаупін ескеру қажет, бұл препарат дозасын мұқият таңдауды талап етеді. Бұл кардиоселективті β-адреноблокаторлар деп аталатындарға да қатысты. Электрокардиографиялық зерттеу жүргізу жолымен жүрек қызметіне мониторинг өткізу ұсынылады.

Фенотерикс келесі жағдайларда тек пайда/қауіп арақатынасын мұқият бағалаудан кейін пайдаланылу керек: • жүректің ауыр аурулары, әсіресе, таяуда өткерілген миокард инфарктісі және жүректің ишемиялық ауруы; • жүрек гликозидтерін бір мезгілде қабылдау; • ауыр және емделмеген артериялық гипертензия; • аневризма; • гипертиреоз; • декомпенсацияланған қант диабеті; • феохромоцитома. Пайда/қауіп арақатынасын мұқият бағалау, әсіресе, препаратты ұсынылған дозалар диапазонынан ең жоғары дозада пайдалану кезінде жүргізілу керек. Арнайы сақтандырулар Парадоксты бронх түйілуі Басқа ингаляциялық дәрілік заттар қолданылған жағдайдағы сияқты, Фенотерикс парадоксты, оның ішінде пациент өміріне қатер төндіретін бронх түйілуін тудыруы мүмкін. Парадоксты бронх түйілуінің дамуында препаратты пайдалануды кідіріссіз тоқтату және баламалы ем тағайындау қажет. Жүрек-қантамыр жүйесіне әсері Фенотерикс қатарына жататын симпатомиметикалық дәрілік заттарды қолдану кезінде жүрек-қантамыр жүйесі тарапынан жағымсыз реакциялар дамуы мүмкін. Маркетингтен кейінгі кезеңде алынған мәліметтер және әдебиет деректері бойынша β2-агонистер қолданумен байланысты миокард ишемиясы дамыған жағдайлар болды. Фенотерикспен ем алып жүрген жүректің ауыр аурулары бар пациенттер (мысалы, жүректің ишемиялық ауруы, аритмия немесе жүректің ауыр жеткіліксіздігі) кеуде қуысының ауыруы немесе жүрек ауруының ауырлығын арттыратын басқа белгілер туындағанда дәрігермен кеңесуі қажет екенінен хабардар болуы тиіс. Олардың туындау себептері тыныс алу жүйесінің бұзылуларымен де, жүрек тарапынан болатын бұзылулармен де байланысты болуы мүмкін екеніне байланысты, ентігу және кеуде қуысының ауыруы сияқты симптомдарға ерекше көңіл бөлу қажет. Гипокалиемия β2-агонистермен ем ықтималды ауыр гипокалиемия дамуына себеп болуы мүмкін. Ксантин туындыларын, глюкокортикостероидтар мен диуретиктерді бір мезгілде қабылдау кезінде гипокалиемия күшеюі мүмкін екендіктен, ауыр дәрежедегі бронх демікпесін емдегенде ерекше сақ болу керек. Бұдан бөлек, гипоксия кезінде гипокалиемияның жүрек ырғағына әсері күшеюі мүмкін. Дигоксинмен ем алып жүрген пациенттерде гипокалиемия кезінде аритмияның даму қаупі артуы мүмкін. Осыған ұқсас оқиғаларда қан сарысуында калий деңгейін мониторингтеуге кеңес беріледі. Жедел үдемелі ентігу Жедел, жылдам үдейтін ентігу жағдайларында пациенттерге кідіріссіз дәрігерге қаралу қажет. Бронх демікпесі симптомдарының күшеюі, қолдану жиілігі, қабынуға қарсы ем Қабынуға қарсы емді жүйелі қабылдап жүрген пациенттер тіпті ауру симптомдары азайған және Фенотерикс пайдалану қажеттілігі жоқ жағдайларда да қабынуға қарсы препараттар қабылдауды жалғастыру керек. Егер бұрын препаратты тиімді дозалау режимі ауру симптомдарының жеңілдеуін қамтамасыз етпесе, пациент дереу дәрігермен кеңесу керек, өйткені бұл бронх демікпесі ауырлығының арту белгісі болуы мүмкін және емді қайта бағалауды талап етеді. Қысқа әсер ететін β-агонистерді шектен тыс пайдалану негізгі аурудың үдеуін бүркемелеуі және бронх демікпесін бақылаудың нашарлауына ықпал етуі мүмкін, бұл бронх демікпесінің ауыр өршулері мен өлімге ұшырау қаупінің артуымен қатар жүреді. Дене жаттығулары алдында профилактикалық қабылдау жағдайларын қоспағанда, фенотеролды «қажетіне қарай» аптасына 2 реттен көп пайдаланып жүрген пациенттер емді тиісінше түзету үшін қайта тексеруден өтуі тиіс, өйткені осындай пациенттерде фенотеролды шамадан тыс пайдалану қаупі бар. Симпатомиметиктермен немесе антихолинергиялық бронходилататорлармен бір мезгілде қолдану Фенотериксті басқа симпатомиметикалық бронходилататорлармен бір мезгілде тек мұқият медициналық қадағалаумен ғана қолдануға болады. Антихолинергиялық бронходилататорларды Фенотерикспен бір мезгілде пайдалануға болады. Қосымша ақпарат Балалар аталған препаратты тек ересектердің қадағалауымен және дәрігердің тағайындауы бойынша пайдалануы тиіс. Препаратты жоғары дозаларда қолдану кезінде қандағы глюкоза деңгейінің арту қаупімен байланысты, қант диабеті бар пациенттерде қандағы глюкоза деңгейін мұқият бақылап отыру қажет. Бауыр және бүйрек жеткіліксіздігі бар пациенттердегі фенотерол фармакокинетикасы жөнінде деректер болмағандықтан, препаратты осындай пациенттерде пайдалану кезінде сақ болу қажет. Спортшылар Фенотериксті қолдану кезінде допингке өткізілген тестілер оң нәтижелер беруі мүмкін. Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері Препараттың автокөлік жүргізу және механизмдерді басқару қабілетіне әсер ету зерттеулері жүргізілмеген. Дегенмен де, Фенотерикс қолдану кезінде пациенттер жағымсыз реакциялар, мысалы, бас айналу туындауы мүмкін екенінен хабардар болуы тиіс: Сондықтан препаратты қолдану кезінде пациенттерге автокөлік жүргізу және механизмдерді басқару кезінде сақтық шарасын қадағалау қажет.

Фенотерол плаценталық бөгет арқылы өтеді. Жануарларға жүргізілген зерттеулерде эмбрионға теріс әсері анықталмауына қарамастан, жүктілік кезеңінде, әсіресе, жүктіліктің алғашқы үш айының ішінде фенотеролды тек пайда/қауіп арақатынасын мұқият бағалаудан кейін ғана пайдалану қажет. Фенотеролды ингаляциялық қолдану кезінде токолитикалық әсерінің даму ықтималдығы аз, алайда, осы әсерін толығымен жоққа шығаруға болмайды. Фенотеролдың жаңа туған нәрестелерге теріс әсерін көрсететіні белгісіз. Фенотеролдың емшек сүтімен бөлінуіне байланысты, фенотеролды бала емізу кезеңіндегі әйелдерде тек пайда/қауіп арақатынасын мұқият бағалаудан кейін ғана пайдалануға кеңес беріледі. Қосымша заттар Препарат құрамында бір ингаляцияда 11,6 мг алкоголь (этанол) бар. Әр ингаляцияда алкоголь (этанол) мөлшері 1 мл мөлшерден аз сыраға немесе 1 мл шарапқа баламалы. Препараттағы аздаған алкоголь мөлшері қандай да бір мәнді әсерлер тудырмайды.

Басқа β2-адреномиметиктермен, метилксантиндермен (мысалы, теофиллин), холинергияға қарсы дәрілермен және кортикостероидтармен бір мезгілде қолдану кезінде Фенотерикс әсері күшеюі мүмкін. Фенотериксті басқа β2-адреномиметиктермен, метилксантиндермен (мысалы, теофиллин) немесе жүйелі әсер ететін антихолинергиялық дәрілермен (мысалы, құрамында пирензепин бар препараттар) бір мезгілде қолдану кезінде жағымсыз реакциялар (мысалы, тахикардия, аритмия) айқындылығы күшеюі мүмкін. β2-агонистер қабылдаумен байланысты гипокалиемия ксантин туындыларын, кортикостероидтар мен диуретиктерді бір мезгілде пайдалану кезінде күшеюі мүмкін. Атап айтқанда, бұл тыныс жолдарының айқын обструкциясы бар пациенттерде ескерілуі қажет. Осындай жағдайларда, әсіресе, диуретиктермен және жүрек гликозидтерімен бірге қолдану кезінде қандағы электролиттер деңгейін бақылап отыру қажет. Фенотерикс пен β-рецепторлар блокаторларын бір мезгілде қолдану кезінде препараттар тиімділігінің өзара төмендеуі білінеді, осы орайда, β-рецепторлар блокаторларын пайдалану бронх демікпесі бар пациенттерде ауыр бронх түйілуінің даму қаупімен байланысты болуы мүмкін. Бұдан бөлек, Фенотерикспен бір мезгілде қолдану кезінде диабетке қарсы дәрілердің гипогликемиялық әсері төмендеуі мүмкін. Алайда, әдетте, осы әсері жүйелі енгізу жолымен (таблеткалар немесе инъекция/инфузия) пайдаланылатын жоғары дозаларда қолдану кезінде білінеді. Фенотериксті моноаминоксидаза тежегіштерімен немесе трициклды антидепрессанттармен біріктіріп қолданғанда фенотеролдың жүрек-қантамыр жүйесіне әсерінің күшеюі білінуі мүмкін. Галотан, метоксифлуран немесе энфлуран сияқты құрамында галоген бар анестетиктерді пайдаланғанда Фенотерикспен ем алып жүрген пациенттерде жүрек ырғағының ауыр бұзылуларының дамуы және артериялық қысым төмендеуінің қаупі артуы мүмкін. Егер құрамында галоген бар анестетиктерді пайдаланумен анестезия жасау жоспарланса, фенотеролды анестезия басталуына дейін, кем дегенде, 6 сағат пайдалануға болмайды.

Сақтау мерзімі 3 жыл Жарамдылық мерзімі өткеннен кейін қолдануға болмайды. Сақтау шарттары Жарықтан қорғалған жерде, 25°C-ден аспайтын температурада сақтау керек. Мұздатып қатыруға болмайды. Балалардың қолы жетпейтін жерде сақтау керек!