Флуконазол-Здоровье капсулы 150 мг

Бір капсуланың құрамында белсенді зат: 100 % затқа шаққанда 150 мг флуконазол; қосымша заттар: лактоза моногидраты, 130.5 мг, картоп крахмалы, төмен молекулярлы медициналық поливинилпирролидон, кальций стеараты; қабықтың құрамы: титанның қостотығы Е171, желатин, күн батар түстес сары Е110, бриллиантты көк Е133, хинолинді сары Е104. Сыртқы түрінің, иісінің, дәмінің сипаттамасы Мөлдір емес жасыл түсті корпусы және қақпағы бар № 1 қатты желатинді капсулалар. Капсулаға кәсіпорынның тауарлық белгісін жапсыруға рұқсат етіледі. Капсуланың ішіндегісі – сарғыш реңді ақ түсті ұнтақ. Ұнтақ бөлшектерінің агломераттарының болуына жол беріледі.

Ересек пациенттерде мыналарды емдеу мақсатында қолданылады: • криптококкты менингит • кокцидиоидомикоз • инвазивті кандидоз • шырышты кандидоз, оның ішінде ауыз жұтқыншақ, өңеш кандидозы; кандидурия, созылмалы тері-шырыш кандидозы • ауыз қуысының жеткіліксіз гигиенасында немесе жергілікті емдеу жеткіліксіз болғандағы тіс протезін пайдалануға байланысты ауыз қуысының созылмалы атрофиялық кандидозы • жедел немесе қайталанған қынаптық кандидоз, жергілікті емдеу мүмкін болмағанда • кандидоздық баланит, жергілікті ем қолданылмайтын болғанда • дерматомикоздар, табан, аяқ, дене микоздарын қоса, түрлі-түсті теміреткі және тері кандидоздары, жүйелі емдеу көрсетілген кезде • тырнақ дерматофитиясы (онихомикоз), басқа препараттарды қолдануға болмайтын кезде Ересек пациенттерде профилактика мақсатында қолданылады: • қайталанулар қаупі жоғары пациенттерде криптококкты менингит қайталанулары • қайталану қаупі жоғары АИТВ инфекциясын жұқтырған пациенттерде ауыз жұтқыншақ және өңеш кандидозының қайталанулары • қынаптық кандидоздың қайталану жиілігін (жылына 4 немесе одан көп эпизодтар) азайту • ұзаққа созылатын нейтропениясы бар пациенттердегі кандидоздық инфекциялар профилактикасы (мысалы, химиялық емнен өтетін гематологиялық қатерлі жаңа түзілімдері бар пациенттерде немесе гемопоэздік діңді жасушалар трансплантациясы жасалған пациенттерде). Емдеу бактериологиялық және басқа зертханалық зерттеулердің нәтижелерін алғанға дейін тағайындалуы мүмкін, алайда, бұл нәтижелер белгілі бола салысымен, инфекцияға қарсы емді алынған нәтижелерге сәйкес түзету керек.

Әсер ету механизмі Препараттың әсер ету механизмі зеңдерде эргостерин синтезінің P450 цитохромы арқылы жүретін маңызды сатысының тежелуіне - 14-альфа-ланостеролдың деметилденуіне байланысты болады, бұл зеңдік жасушалар жарғақшасында эргостериннің жоғалуына әкеледі. Фармакодинамикалық әсерлері Флуконазол-Здоровье - бұл триазолдық зеңге қарсы дәрі. Препараттың әсер ету механизмі P450 цитохромы арқылы зеңдердегі эргостерин синтезінің маңызды кезеңін - 14-альфа-ланостеролдың деметилденуін тежеуге байланысты, бұл зең жасушаларының жарғақшасындағы эргостериннің жоғалуына әкеледі. Флуконазол зеңдердің P450 цитохромы үшін өте жоғары іріктеуге ие болғандықтан, сүтқоректілердің организмінде бұл ферменттерді іс жүзінде бәсеңдетпейді. Антиандрогендік белсенділігі жоқ. Флуконазол (күніне 50 мг, 28 күнге дейін) еркектерде плазмадағы тестостерон концентрациясына немесе бала туу жасындағы әйелдердегі стероидтар құрамына ықпал еткен жоқ; күніне 200-400 мг дозалар диапазонында стероидтардың эндогендік деңгейлеріне немесе дені сау ерікті еркектердегі АКТГ стимуляциясына клиникалық маңызды ықпалын тигізген жоқ. Бір мезгілде қолдану кезінде флуконазолды 50 мг дозада ішке бір рет немесе қайталап қабылдау антипирин метаболизміне ықпал еткен жоқ. Микробқа қарсы in vitro белсенділігі In vitro тәжірибелерінде флуконазол клиникалық кең таралған Candida түрлерінің (C. аlbicans, C. parapsilosis, C. tropicalis қоса алғанда) көпшілігіне қатысты зеңге қарсы белсенділік танытады. C. glabrata флуконазолға сезімталдықтың төмендеуін көрсетеді, ал C. krusei және C. auris штамдары флуконазолға төзімді. Флуконазол сонымен қатар Cryptococcus neoformans және Cryptococcus gattii, эндемиялық Blastomyces dermatiditis, Coccidioides immitis, Histoplasma capsulatum және Paracoccidioides brasiliensis түрлеріне қатысты зеңге қарсы белсенділік көрсетеді. Фармакокинетикасы мен фармакодинамикасының байланысы Эксперименттік зерттеулерде флуконазолдың ең төмен тежегіш концентрациясы (ЕТТК) мен тиімділігінің арасындағы үйлесімділік анықталды. Пациенттерде оральді кандидозды және, азырақ дәрежеде, кандидемияны емдеуге қатысты флуконазолдың AUC және дозасының арасында дозаға тәуелділік (1:1 дерлік), сондай-ақ AUC, дозасы және тиімділігі арасында тікелей, бірақ жеткіліксіз үйлесімділік анықталды. Сол сияқты, флуконазолдың жоғарырақ ЕТТК қажет ететін зеңдердің штаммдарына қатысты флуконазолмен емдеудің тиімділігі азырақ. Төзімділігі Candida әр алуан түрлері азольді зеңге қарсы дәрілерге төзімділік дамуының бір немесе одан көп механизмдеріне иеленген. Аталған қасиеттері бар зеңдердің түрлеріне қатысты флуконазолдың жоғарырақ ЕТТК қажет болады, олар клиникада жағымсыз реакциялар тудыруы мүмкін. Сонымен қатар C. albicans-тан өзгешелеу Candida кейбір түрлерінің асқын инфекциялары туралы да хабарланды, олар жиі сезімталдықтың төмендеуін көрсетеді (C. glabrata) немесе флуконазолға төзімді болды (мысалы, C. krusei, C. auris). Мұндай инфекциялар баламалы зеңге қарсы терапияны қажет етуі мүмкін. Клиникалық тиімділігі және қауіпсіздігі Деректер жоқ. Балалар Деректер жоқ.

Дозалау режимі Флуконазолдың тәуліктік дозалары зеңдік инфекцияның сипаты мен ауырлығына байланысты. Препаратты қайталап қолдануды қажет ететін инфекцияларда, емдеуді белсенді зеңдік инфекцияның клиникалық немесе зертханалық белгілері жоғалғанға дейін жалғастыру керек. Емді мезгілінен бұрын тоқтату инфекцияның қайталануына әкеліп соғуы мүмкін. Қолданылуы — Дозалары — Ұзақтығы Криптококкоз — Криптококкты менингитті емдеу — Бастапқы: 1-ші күні 400 мг Кейінгі: Күніне 200-400 мг — Әдетте 6-8 апта. Өмірге қауіп төндіретін инфекцияларды емдеген жағдайда тәуліктік дозаны 800 мг-ге дейін арттыруға болады. Қайталану қаупі жоғары науқастарда криптококктық менингит қайталануының профилактикасы — Күніне 200 мг — Уақыты анықталмаған. Кокцидиоидомикоз — Күніне 200-400 мг — 11-24 ай немесе одан ұзақтау, аурудың ағымына байланысты. Кейбір, әсіресе ми қабыршағының зақымдалуы бар инфекцияларда тәулігіне 800 мг доза қарастырылуы мүмкін. Инвазивті кандидоз — Бастапқы: 1-ші күні 800 мг Кейінгі: Күніне 400 мг — Кандидемияны емдеу ұзақтығы бойынша жалпы нұсқаулар – қан сеппесінің алғашқы теріс нәтижесінен кейін және кандидемия белгілері мен симптомдары жоғалған соң 2 апта. Шырышты кандидоз — Орофарингеальді кандидоз — Бастапқы: 1-ші күні 200-400 мг Кейінгі: Күніне 100-200 мг — 7-21 күн (кандидоз ремиссияға дейін). Иммундық функциясы қатты бұзылған пациенттерде терапияның ұзақ кезеңдерін қолдануға болады. Эзофагеальді кандидоз — Бастапқы: 1-ші күні 200-400 мг Кейінгі: Күніне 100-200 мг — 14-30 күн (кандидоздың ремиссиясына дейін). Иммундық функциясы қатты бұзылған пациенттерде терапияның ұзақ кезеңдерін қолдануға болады. Кандидурия — Күніне 200-400 мг — 7-21 күн. Иммундық жүйе функциясының ауыр бұзылуы бар пациенттерде ұзағырақ емдеу кезеңін пайдалануға болады. Созылмалы атрофиялық кандидоз — Күніне 50 мг — 14 күн. Созылмалы тері-шырыш кандидозы — Күніне 50-100 мг — 28 күнге дейін. Инфекцияның ауырлығына немесе қатар жүретін иммундық дисфункция мен инфекцияға байланысты терапияның ұзақ кезеңдерін қолдануға болады. Қайталану қаупі жоғары АИТВ инфекция жұқтырған пациенттерде ауыз-жұтқыншақ немесе өңеш кандидозы қайталануының профилактикасы — Орофарингеальді кандидоз — Күніне 100-200 мг немесе аптасына 3 рет 200 мг — Иммунитеті созылмалы төмендеген пациенттерде анықталмаған уақыт кезеңі бойы. Эзофагеальді кандидоз — Күніне 100-200 мг немесе аптасына 3 рет 200 мг — Иммунитеті созылмалы төмендеген пациенттерде анықталмаған уақыт кезеңі бойы. Дерматомикоздар — Табан, аяқ, шап, дене микоздары, кандидоздар — Аптасына 1 рет 150 мг немесе күніне 50 мг — 2-4 апта, бірақ аяқтың дерматофитиясын емдеу 6 аптаға дейін терапияны қажет етуі мүмкін. Түрлі-түсті теміреткі — Аптасына 1 рет 300-400 мг Күніне 50 мг — 1-3 апта. 2-4 апта. Онихомикоз — Аптасына 1 рет 150 мг — Емдеуді инфекцияланған тырнақ ауысуына (инфекцияланбаған тырнақтың өсіп шығуына) дейін жалғастыру керек. Саусақтар мен бақайлардың тырнақтары қайтадан өсуі үшін әдетте тиісінше 3-6 ай немесе 6-12 ай қажет. Алайда әртүрлі адамдарда, сондай-ақ жасына қарай өсу жылдамдығы кең ауқымда өзгеруі мүмкін. Ұзақ сақталған созылмалы инфекцияларды табысты емдеуден кейін кейде тырнақ пішінінің өзгеруі байқалады. Генитальді кандидоз — Жедел қынаптық кандидоз, кандидоздық баланит — 150 мг — Бір рет. Қынаптық кандидоздың қайталануын емдеу және алдын-алу (жылына 4 немесе одан да көп эпизодтар) — Әр үш күн сайын150 мг – барлығы 3 доза (1, 4 және 7 күндері), содан соң аптасына бір рет демеуші доза 150 мг. — 6 ай ішінде демеуші дозасын қолданыңыз. Ұзаққа созылған нейтропениясы бар пациенттердегі кандидоздық инфекцияның профилактикасы — Тәулігіне 1 рет 200-400 мг — Дамиды деп күтілген нейтропениядан бірнеше күн бұрын қолданады, және нейтрофилдер саны мм3-де 1000-нан асқаннан кейін емдеуді тағы 7 күн жалғастырады. Балалар 18 жасқа дейінгі балаларға қолдануға болмайды. Егде жастағы пациенттер Дозаны бүйрек функциясының күйіне қарай түзету керек. Бауыр жеткіліксіздігі бар пациенттер Флуконазолды бауыр функциясы бұзылған пациенттерге сақтықпен қолдану керек, өйткені флуконазолды пациенттердің бұл санатына қолдану туралы ақпарат жеткіліксіз. Дозалар мен емдеу ұзақтығы жеке анықталады. Бүйрек жеткіліксіздігі бар пациенттер Флуконазол негізінен несеппен өзгермеген күйде шығарылады. Бүйрек жеткіліксіздігі бар пациенттер үшін бір реттік қабылдауда дозаны өзгерту қажет емес. Флуконазолды қайталап тағайындаған бүйрек жеткіліксіздігі бар пациенттер үшін препарат белгілі бір көрсеткішке ұсынылған дозаға байланысты 50-ден 400 мг-ға дейінгі бастапқы дозада тағайындалады. Бастапқы дозаны қолданғаннан кейін тәуліктік доза кестеге сәйкес анықталады: Креатинин клиренсі, мл/мин — Ұсынылатын дозаның пайызы > 50 — 100 % ≤ 50 (диализсіз) — 50 % Ұдайы диализде болатын науқастар — Әрбір диализден кейін 100 % Тұрақты диализдегі пациенттер әрбір диализден кейін 100 % ұсынылған дозаны алуы тиіс. Диализ жүргізілмеген күні, пациент креатинин клиренсіне байланысты түзетілген дозаны алуы тиіс. Енгізу әдісі мен жолы Ішке қабылдау үшін. Қабылдау уақыты көрсетілген қолдану жиілігі Препаратты тамақтануға байланыссыз тағайындайды, капсулаларды тұтастай жұту керек. Емдеу ұзақтығы Әр адамға жекелей, зең инфекцияларының сипаты мен ауырлығына байланысты. Дәрілік препараттың бір немесе бірнеше дозасын өткізіп алған жағдайда қолданылуы қажет шаралар Деректер жоқ. Тоқтату симптомдары қаупінің болуына нұсқау Деректер жоқ.

• флуконазолға, препараттың басқа компоненттеріне, құрылымы флуконазолға ұқсас азольді заттарға жоғары сезімталдық • тәулігіне 400 мг және одан көбірек дозада ұзақ қолдану аясында терфенадинді бір мезгілде қабылдау • QT аралығын ұзартатын немесе Р450 цитохромының (CYP3A4 изоферменті) қатысуымен метаболизденетін цизаприд, астемизол, эритромицин, пимозид, амиодарон, хинидин сияқты дәрілік препараттарды бір мезгілде қабылдау • жүктілік және лактация кезеңі • 18 жасқа дейінгі балалар мен жасөспірімдер • тұқым қуалайтын галактоза жақпаушылығы, Lapp (ЛАПП)-лактаза ферментінің жеткіліксіздігі, глюкоза-галактоза мальабсорбциясы

Жиі • бас ауыруы • іштің ауыруы, диарея, жүректің айнуы, құсу • сілтілік фосфатаза деңгейінің, сарысулық аминотрансфераза (АЛТ және АСТ) деңгейінің клиникалық тұрғыдан маңызды жоғарылауы • тері бөртпесі Жиі емес • ұйқысыздық, ұйқышылдық, жалпы әлсіздік, қатты қажығыштық • бас айналу • парестезиялар, құрысулар • астения, гипертермия • вертиго • тәбеттің нашарлауы • ауыз қуысының шырышты қабығының құрғауы, дәмнің өзгеруі, диспепсия, метеоризм, іш қату • холестаз, сарғаю, қан плазмасындағы жалпы билирубиннің клиникалық тұрғыдан маңызды жоғарылауы • анемия • миалгия • қатты терлеу, дәрі-дәрмектік дерматит, есекжем, қышу Сирек • «пируэт» типті аритмия, QT аралығының ұзаруы • тремор • агранулоцитоз, лейкопения, нейтропения, тромбоцитопения • гипертриглицеридемия, гиперхолестеринемия, гипокалиемия • бауыр функциясының бұзылулары, гепатоцеллюлярлы некроз, гепатит, бауырдың зақымдануы • алопеция • эксфолиативті дерматит, уытты эпидермальды некролиз (Лайелл синдромы), көп формалы экссудативті эритема (соның ішінде Стивенс-Джонсон синдромы), жедел жайылған экзантематозды пустулезді бөртпе, ангионевроздық ісіну, бет ісінуі Жиілігі белгісіз (қолда бар деректер негізінде анықтау мүмкін емес) • эозинофилия және жүйелік белгілері бар дәрілік реакциялар (DRESS) Жағымсыз дәрілік реакциялар туындағанда медициналық қызметкерге, фармацевтикалық қызметкерге немесе, дәрілік препараттардың тиімсіздігі туралы хабарламаларды қоса, дәрілік препараттарға болатын жағымсыз реакциялар (әсерлер) жөніндегі ақпараттық деректер базасына тікелей хабарласу керек Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

Симптомдары: елестеулер және параноидальді мінез-құлық. Емі: симптоматикалық ем (асқазанды шаю, демеуші ем). Флуконазол елеулі дәрежеде несеппен шығарылады; жеделтетілген диурез препараттың шығарылуын жылдамдатуы мүмкін. 3 сағатқа созылған гемодиализ сеансы флуконазолдың қан плазмасындағы деңгейін шамамен 50 % төмендетеді.

Деректер жоқ. Арнайы сақтандырулар Дерматофитиялар. Балалардағы дерматофитияны емдеген кезде флуконазол тиімділігі жағынан гризеофульвиннен асқан жоқ. Сондықтан флуконазолды балалардағы дерматофитияны емдеуге қолдану ұсынылмайды. Криптококкоз. Флуконазолдың басқалай орналасқан криптококкозды (мысалы, өкпе криптококкозын және тері криптококкозын) емдеудегі тиімділігіне дәлелдер жеткіліксіз, сондықтан мұндай ауруларды емдеу үшін дозалау режимдері жөніндегі ұсыныстар жоқ. Терең эндемиялық микоздар. Флуконазолдың паракокцидиоидомикоз, гистоплазмоз және тері-лимфалық споротрихоз сияқты эндемиялық микоздардың басқа түрлерін емдеуге тиімділігінің дәлелдері жеткіліксіз, сондықтан мұндай ауруларды емдеу үшін дозалау режимдері жөніндегі ұсыныстар жоқ. Кандидоз. Зерттеулер C. albicans-тен ерекшеленетін Candida штамдарының инфекцияларының басымдылығын көрсетті. Олар көбінесе флуконазолға тұрақтылықты (мысалы, C. krusei және C. auris) немесе сезімталдықтың төмендеуін (C. glabrata) көрсетеді. Мұндай инфекциялар флуконазолмен тиімсіз емдеу кезінде зеңге қарсы баламалы терапияны қажет етуі мүмкін. Дәрігерлерге әр түрлі Candida түрлерінің флуконазолға төзімділігінің таралуын ескеру ұсынылады. Бүйрек жүйесі. Бүйрек функциясы бұзылған пациенттерде препаратты сақтықпен қолдану керек. Гепатобилиарлық жүйе. Бауыр функциясы бұзылған пациенттерде препаратты сақтықпен тағайындау керек. Флуконазолды қолдану сирек жағдайларда әсіресе негізгі аурулары ауыр күйдегі пациенттерде өлімге ұшыратуды қоса, ауыр гепатоуыттылықтың дамуымен байланысты. Гепатоуыттылықтың дамуы флуконазолды қолданумен байланысты болған жағдайларда, оның препараттың жалпы тәуліктік дозасына, емнің ұзақтығына, пациенттің жасына және жынысына байланыстылығы белгіленбеген. Әдетте флуконазолдан туындаған гепатоуыттылық қайтымды болады, ал оның көріністері емді тоқтатқаннан кейін жойылады. Флуконазолды қолданған кезде бауырдың функционалдық сынамаларының нәтижесінде ауытқулар байқалған пациенттерді бауырдың бұдан да ауыр зақымдалуының дамуына қатысты мұқият бақылауға алу керек. Бауырға күрделі ықпалын білдіретін сиптомдар (айқын астения, анорексия, тәбеттің болмауы, ұдайы жүрек айнуы, құсу және сарғаю) туралы пациентке мәлімделуі тиіс. Мұндай жағдайда флуконазолды қолдануды дереу тоқтатып, дәрігермен кеңесу қажет. Жүрек-қантамыр жүйесі. Кейбір азолдар, оның ішінде флуконазол, ЭКГ-де QТ аралығының ұзаруымен астасады. Флуконазолды қолданған кезде QТ аралығы ұзаруының және «пируэт» типті пароксизмальді қарыншалық тахикардияның өте сирек жағдайлары туралы хабарланған. Мұндай хабарламалар жүректің құрылымдық аурулары, электролиттік алмасудың бұзылуы және QТ аралығына ықпал ететін басқа дәрілік заттарды бір мезгілде қолдану сияқты көптеген факторлардың бірігуі кезінде науқасы ауыр пациенттерге қатысты болды. Флуконазолды аритмияның даму қаупі бар пациенттерге сақтықпен қолдану керек. QТ аралығын ұзартатын және Р450 цитохромының СYР3А4 ферментінің көмегімен метаболизденетін дәрілік заттармен бір мезгілде қолдануға болмайды. Дерматологиялық реакциялар. Флуконазолды қолдану кезінде эозинофилиямен және жүйелік көріністермен дәрілік реакцияның (DRESS) дамуы туралы хабарланды. Флуконазолды қолдану аясында Стивенс-Джонсон синдромы және уытты эпидермалық некролиз сияқты эксфолиативтік тері реакцияларының дамуы туралы сирек хабарлар бар. АИТВ-инфекциясын жұқтырған пациенттер көптеген дәрілік заттарды қолданған кезде ауыр тері реакцияларының дамуына неғұрлым бейім болады. Егер беткейлік зеңдік инфекциясы бар пациентте флуконазолды қолданумен байланыстыруға болатын бөртпелер пайда болса, препаратты әрі қарай қабылдауды тоқтату керек. Егер инвазиялық/жүйелі зеңдік инфекциялы пациентте терідегі бөртпелер пайда болса, оның жай-күйін мұқият бақылау керек, ал буллездік бөртпелер немесе мультиформалы эритема дамыған жағдайда флуконазолды қолдануды тоқтату қажет. Аса жоғары сезімталдық. Өте сирек жағдайларда анафилаксиялық реакциялардың дамығаны туралы хабарланған. Р450 цитохромы. Флуконазол СYР2С9 ферментінің күшті тежегіші және СYР3А4 ферментінің орташа тежегіші болып табылады. Сондай-ақ флуконазол СYР2С19 ферментінің де тежегішіне жатады. Флуконазолды және СYР2С9, СYР2С19 және СYР3А4 қатысуымен метаболизденетін емдік аясы тар препараттарды бір мезгілде қабылдайтын пациенттердің жай-күйін бақылау керек. Препарат құрамында лактоза бар. Қант диабеті бар пациенттерге сақтықпен тағайындалады. Препараттың құрамындағы күн батар түстес сары E110 аллергиялық реакциялар тудыруы мүмкін. Педиатрияда қолдану 18 жасқа дейінгі балаларға қолдануға болмайды. Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері Флуконазолдың көлік құралдарын басқару немесе басқа механизмдермен жұмыс істеу қабілетіне ықпалына зерттеу жүргізілмеген. Препаратты қолданған кезде бас айналудың немесе құрысулардың дамуы мүмкін екені жөнінде пациенттерге мәлімдеу керек. Мұндай симптомдар дамыған кезде көлік құралдарын басқару немесе басқа механизмдермен жұмыс істеу ұсынылмайды.

Емдеуді бастар алдында пациентті шарана үшін ықтимал қаупі туралы хабардар ету керек. Бір реттік дозаны қабылдағаннан кейін жүктілік басталғанға дейін 1 апта (5-6 жартылай шығарылу кезеңіне сәйкес) шайылу кезеңі ұсынылады. Ұзақ емдеу курстары кезеңінде бала туатын жастағы әйелдерде емдеудің бүкіл кезеңінде және соңғы дозаны қабылдағаннан кейін 1 апта ішінде контрацепцияны қолдану қажеттілігін қарастыру керек. Бақылау зерттеулері жүктіліктің бірінші және/немесе екінші триместрінде флуконазол қабылдаған әйелдерде флуконазолды немесе жергілікті азолдарды сол кезеңде қабылдамаған әйелдермен салыстырғанда өздігінен түсік тастау қаупінің жоғарылауын көрсетеді. Бірінші триместрде енгізілген флуконазолдың ≤ 150 мг жинақталған дозасын алған бірнеше мың жүкті әйелдердің деректері шарананың даму кемістіктерінің жалпы қаупінің артуын көрсетпейді. Бір когортты, ірі бақылау зерттеуінде бірінші триместрде пероральді флуконазолдың әсері тірек-қимыл аппаратының даму ақауларының даму қаупінің шамалы жоғары болуымен байланысты болды, бұл жергілікті азолдарды қабылдаған әйелдерге қарағанда ≤ 450 мг дозасымен жинақталған ем алған 1000 әйелге шамамен 1 қосымша жағдайға және 450 мг астам жинақталған доза алған 1000 әйелге шамамен 4 қосымша жағдайға сәйкес келеді. Түзетілген салыстырмалы қауіп 150 мг пероральді флуконазол үшін 1,29 (95% СА 1,05-1,58) және 450 мг астам флуконазол дозалары үшін 1,98 (95% СА 1,23-3,17) құрады. • Жүктілік кезінде флуконазолды қолданумен байланысты жүрек ақауларының қол жетімді эпидемиологиялық зерттеулері қарама-қайшы нәтиже береді. Алайда, бірінші триместрде флуконазолды қабылдаған бірнеше мың жүкті әйелдерді қамтитын 5 бақылаулық зерттеудің мета-талдауы флуконазолды және/немесе жергілікті азолдарды қолданбаумен салыстырғанда жүрек ақауларының даму қаупінің 1,8-2 есе артқанын анықтады. • Жағдайлар туралы есептерде кокцидиоидомикозды емдеу үшін 3 ай немесе одан да көп уақыт бойы жүктілік кезінде аналары флуконазолдың жоғары дозаларын (тәулігіне 400-ден 800 мг-ға дейін) қабылдаған кезде нәрестелердегі туа біткен ақаулардың көріністелуі сипатталды. Бұл нәрестелерде байқалатын туа біткен ақауларға брахицефалия, құлақ дисплазиясы, бастағы үлкен алдыңғы еңбек, ортан жіліктің бүгілісі және радиалды-иық сүйегінің синостозы жатады. Флуконазолды қолдану мен осы туа біткен ақаулар арасындағы себепті байланыс анық емес. • Флуконазолды стандартты дозаларда және қысқа мерзімді емдеу үшін, егер анық қажет болмаса, жүктілік кезінде қолдануға болмайды. • Флуконазолды жоғары дозалардағы және/немесе ұзақ мерзімді схемаларда өмірге қауіптілігі зор инфекцияларды қоспағанда, жүктілік кезінде қолдануға болмайды. • Флуконазол емшек сүтіне өтеді және қан плазмасындағыға қарағанда неғұрлым төмен концентрацияға жетеді. Флуконазолдың 200 мг немесе одан аз болатын әдеттегі дозасын бір рет қолданғаннан кейін емшек емізуді жалғастыруға болады. • Флуконазолды көп рет қолданған кезде немесе жоғары дозаларда қолданған кезде емшек емізу ұсынылмайды.

• Флуконазолды келесі дәрілік заттармен бір мезгілде қолдануға болмайды: • цизаприд – флуконазол қанда цизаприд концентрациясын арттырып, QT аралығын ұзартады, жүрек ырғағының бұзылуын, соның ішінде «пируэт» типті аритмияны дамытады; • терфенадин - флуконазол қанда терфенадин концентрациясын арттырып, жағымсыз әсерлердің, соның ішінде QT аралығының ұзару, жүрек ырғағының бұзылу, «пируэт» типті аритмияның даму қаупін арттырады; • астемизол – флуконазол астемизолдың клиренсін төмендетіп, оның қандағы концентрациясын арттырады, QT аралығын ұзартады, жүрек ырғағының бұзылуын, соның ішінде «пируэт» типті аритмияны дамытады; • пимозид – флуконазол пимозидтің метаболизмін тежейді, соның нәтижесінде пимозидтің қандағы концентрациясы жоғарылайды, бұл QT аралығының ұзаруына және «пируэт» типті аритмияның дамуына әкеледі; • хинидин – флуконазол хинидиннің метаболизмін тежейді, нәтижесінде қанда хинидиннің концентрациясы жоғарылайды, бұл QT аралығының ұзаруына және «пируэт» типті аритмияның дамуына әкеледі; • эритромицин – флуконазолмен бір мезгілде қолдану кардиоуытты әсерлердің (QT аралығының ұзаруы, «пируэт» типті аритмия) жүректің тоқтап қалуына дейін даму қаупін арттырады; • амиодарон - флуконазол амиодаронның метаболизмін тежейді, бұл QT аралығының ұзарып, амиодаронның кардиоуыттылық әсерлерінің жоғарылауына әкеледі. Келесі дәрілік заттарды флуконазолмен бір мезгілде қолдану ұсынылмайды: галофантрин - флуконазол галофантриннің метаболизмін тежеуі мүмкін, бұл соңғысының қандағы концентрациясының жоғарылауына және кардиоуыттылық әсерлердің (QT аралығының ұзаруы, «пируэт» типті аритмия) жүректің тоқтап қалуына дейін жоғарылауына әкеледі. Келесі дәрілік заттармен бір мезгілде тағайындағанда флуконазолмен емдеу дәрілік емнің дозасын түзетуді қажет етуі мүмкін: Дәрілік заттардың флуконазолға ықпалы: • рифампицин – флуконазолдың жартылай шығарылу кезеңін орта есеппен 20 %-ға және фармакокинетикалық қисық астындағы ауданын 25 %-ға азайтады; • гидрохлоротиазид – дені сау еріктілерде қан плазмасындағы флуконазолдың концентрациясын 40 %-ға арттырды. Флуконазолдың басқа дәрілік заттарға ықпалы: Флуконазол Р450 цитохромының CYP2C9 изоферментінің күшті тежегіші және CYP3A4 және CYP2C19 изоферменттерінің орташа тежегіші болып табылады, оған флуконазолмен бір мезгілде қабылдағанда қан плазмасында CYP2C9, CYP2C19 және CYP3A4 изоферменттерінің қатысуымен метаболизденетін басқа дәрілік заттар концентрацияларының жоғарылау қаупі себеп болады. Флуконазолдың тежегіш әсері, жартылай шығарылу кезеңінің ұзақ болуымен байланысты, препаратты тоқтатқаннан кейін 4-5 күн бойы сақталады. Алфентанил – флуконазолды 400 мг дозада пероральді түрде қабылдау және алфентанилді 20 мкг/кг дозада вена ішіне енгізу дені сау еріктілерде алфентанилдің фармакокинетикалық қисық астындағы ауданының 2 есе артуын және клиренсінің төмендеуін туындатты. • Амитриптилин және нортриптилин – флуконазолмен бір мезгілде қолданғанда аталған трициклді антидепрессанттардың қандағы концентрациясын арттырып, олардың уыттылық әсерлерін ұлғайтуы мүмкін. • Амфотерицин В - эксперименттік зерттеуде флуконазол мен амфотерицин В-ны бір мезгілде қолдану мынадай нәтижелерге әкелді: С. аlbiсаns жүйелі инфекциясы кезінде аздаған аддитивтік зеңге қарсы әсер, Сryрtососсus пеоfоrтаns бассүйекішілік инфекциясы кезінде өзара әрекеттесудің болмауы және A. fumigatus жүйелі инфекциясы кезінде екі препараттың антагонизмі. Бұл зерттеулердің барысында алынған нәтижелердің клиникалық мәні белгісіз. • Антикоагулянттар - флуконазол, триазолдың зеңге қарсы басқа да туындылары сияқты, кумаринді антикоагулянттардың тиімділігін (протромбин уақытын, мысалы, варфаринде 2 есе арттырады) және ішкі қан кетулердің даму қаупін арттырады. Кумаринді антикоагулянттарды қабылдап жүрген пациенттерде емдеу кезінде және бір мезгілде қолданудан кейін 8 күн бойы протромбин уақытын үнемі бақылап отыру қажет. • Әсері қысқа бензодиазепиндер (мидазолам, триазолам) – флуконазол мидазоламның және триазоламның қандағы концентрацияларын арттырып, олардың психомоторлы әсерлерін күшейтеді. 200 мг доза флуконазолды және 7,5 мг доза мидазоламды бір мезгілде қабылдау мидазоламның фармакокинетикалық қисық астындағы ауданын 3,7 есе және жартылай шығарылу кезеңін 2,2 есе арттырды. 200 мг доза флуконазолды және 0,25 мг доза триазоламды бір мезгілде қабылдау триазоламның фармакокинетикалық қисық астындағы ауданын 4,4 есе және жартылай шығарылу кезеңін 2,3 есе арттырды. • Карбамазепин - флуконазол карбамазепиннің метаболизмін тежеп, оның қан плазмасындағы концентрациясын 30 %-ға дейін арттырды және жағымсыз әсерлерін күшейтті. • Кальций өзекшелерінің блокаторлары – флуконазол CYP3A4 изоферментінің қатысуымен метаболизденетін кальций өзекшелерінің бірқатар блокаторларының (нифедипин, исрадипин, амлодипин, верапамил, фелодипин) потенциальді тежегіші болып табылады, олардың қандағы концентрацияларын және емдік әсерін арттырады. • Целекоксиб – тәулігіне 200 мг доза флуконазолды және 200 мг доза целекоксибті бір мезгілде қолданғанда целекоксибтің қандағы ең жоғары концентрациясы және фармакокинетикалық қисық астындағы ауданы, сәйкесінше, 68 %-ға және 134 %-ға жоғарылады. Флуконазол мен целекоксибті бір мезгілде тағайындау қажет болғанда целекоксибтің дозасын 2 есе төмендету ұсынылады. • Циклофосфамид – флуконазолмен бір мезгілде қолданғанда қандағы билирубиннің және креатининнің концентрациясы жоғарылайды. • Фентанил – флуконазол фентанилдің элиминациясын бәсеңдетіп, оның жағымсыз әсерлерін тыныстың тоқтап қалуына дейін күшейтеді. • ГМГ-КоА-редуктаза тежегіштері – флуконазол қанда CYP3A4 изоферментінің (аторвастатин, симвастатин) және CYP2C9 қатысуымен (флувастатин) метаболизденетін ГМГ-КоА-редуктаза тежегіштерінің концентрациясын арттырып, олардың жағымсыз әсерлерін күшейтеді. Флуконазолды және ГМГ-КоА-редуктаза тежегіштерін бір мезгілде тағайындау қажет болғанда миопатия немесе рабдомиолиз симптомдарының пайда болуын, қандағы креатинкиназаның белсенділігін бақылаған жөн. Пациенттерге флуконазол мен лозартанды бір мезгілде тағайындағанда артериялық қысымға мониторинг жүргізу қажет. • Ибрутиниб - орташа CYP3A4 тежегіштері, мысалы, флуконазол, қан плазмасындағы ибрутиниб концентрациясын жоғарылатады және уыттылық қаупін арттыруы мүмкін. Егер препарттарды біріктіріп қолданудан аулақ болу мүмкін болмаса, тежегішті қолдану кезеңінде ибрутиниб дозасын тәулігіне бір рет (2 капсула) 280 мг-ға дейін азайту және мұқият клиникалық бақылауды қамтамасыз ету қажет. • Иммуносупрессорлар (мысалы, циклоспорин, эверолимус, сиролимус және такролимус). • Циклоспорин - флуконазол циклоспориннің концентрациясы мен АUС елеулі түрде жоғарылатады. Флуконазолды тәулігіне 200 мг дозада және циклоспоринді тәулігіне 2,7 мг/кг дозада бір мезгілде қолданған кезде циклоспориннің АUС 1,8 есе ұлғайғаны байқалған. Бұл препараттарды циклоспориннің дозасын оның концентрациясына байланысты азайтқан жағдайда ғана бір мезгілде қолдануға болады. • Эверолимус - in vitro және in vivo зерттеулері жүргізілмегенмен флуконазол қан плазмасындағы эверолимустың концентрациясын CYP3А4 бәсеңдетуге байланысты жоғарылатуы мүмкін. • Сиролимус - флуконазол сиролимус метаболизмін, сірә, СYР3А4 ферментімен және Р-гликопротеинмен бәсеңдету арқылы, қан плазмасындағы сиролимустың концентрациясын жоғарылатуы ықтимал. Бұл препараттарды сиролимустың дозасын концентрация деңгейіне және препараттың әсерлеріне байланысты түзеткен жағдайда ғана бір мезгілде қолдануға болады. • Такролимус - флуконазол такролимусты ішу арқылы қабылдаған кезде такролимустың метаболизмін СYР3А4 ферментімен ішекте бәсеңдету арқылы оның қан плазмасындағы концентрациясын 5 есе жоғарылатуы мүмкін. Такролимусты в/і қолданған кезде фармакокинетиканың мардымды өзгерістері байқалған жоқ. Такролимус деңгейлерінің жоғарылығы нефроуыттылықпен астасады. Ішуге арналған такролимус дозасын такролимустың концентрациясына байланысты төмендету керек. • Лозартан - флуконазол лозартанның метаболизмін оның белсенді метаболитіне дейін (Е-3174) бәсеңдетеді, бұл лозартанды қолданған кездегі ангиотензин II рецепторларына антагонизмнің үлкен бөлігінен туындайды. Пациенттердің АҚ ұдайы мониторинг жүргізу ұсынылады. • Метадон - флуконазол метадонның қан сарысуындағы концентрациясын жоғарылатуы мүмкін. • Қабынуға қарсы стероидты емес препараттар (ҚҚСП) • Флуконазолмен бір мезгілде қолданғанда флурбипрофеннің Cmax және AUC мәндері, тек флурбипрофенді ғана қолданған кездегі осындай көрсеткіштермен салыстырғанда, сәйкесінше, 23 %-ға және 81 %-ға жоғарылады. Осыған ұқсас, флуконазолды рацемиялық ибупрофенмен (400 мг) бір мезгілде қолданғанда фармакологиялық тұрғыдан белсенді изомердің S-(+)-ибупрофен Cmax және AUC мәндері, тек рацемиялық ибупрофенді ғана қолданған кездегі көрсеткіштермен салыстырғанда, сәйкесінше, 15 %-ға және 82 %-ға жоғарылады. • Флуконазол CYP2C9 метаболизденетін басқа ҚҚСП (мысалы, напроксен, лорноксикам, мелоксикам, диклофенак) жүйелі экспозициясын арттыруға потенциальді түрде қабілетті. ҚҚСП-пен байланысты жағымсыз реакцияларға және уыттылық көріністерге мезгіл-мезгіл мониторинг жасау ұсынылады. ҚҚСП дозасын түзету қажет етілуі мүмкін. • Фенитоин – флуконазол қанда фенитоинның концентрациясын арттырып, жағымсыз әсерлердің даму қаупін ұлғайтады. 200 мг доза флуконазолды және вена ішіне енгізілетін 250 мг доза фенитоинды бір мезгілде қабылдау қанда фенитоинның ең жоғары концентрациясының және фармакокинетикалық қисық астындағы ауданының, сәйкесінше, 128 %-ға және 75 %-ға артуына әкелді. • Преднизон - бауыр трансплантациясынан кейін преднизон қабылдаған пациентте флуконазолмен емдеуді аяқтағаннан кейін 3 айдан соң бүйрекүсті безі қыртысының жедел жеткіліксіздігінің дамығаны жөнінде мәлімдеме бар. Флуконазолмен және преднизонмен ұзақ емделіп жүрген пациенттерде флуконазолмен емдеуді аяқтағаннан кейін бүйрекүсті безі қыртысының функциясына мұқият мониторинг жүргізген жөн. • Рифабутин - флуконазол қанда рифабутиннің концентрациясын жоғарылатып, оның фармакокинетикалық қисық астындағы ауданын 80 %-ға арттырады және жағымсыз әсерлерінің даму қаупін ұлғайтады (бір мезгілде қолданғанда увеит жағдайларының болғаны сипатталған). • Саквинавир - флуконазол қанда саквинавирдің ең жоғары концентрациясын және фармакокинетикалық қисық астындағы ауданын, сәйкесінше, 50 %-ға және 55 %-ға арттырады. • Сульфонилмочевина туындылары – флуконазол дені сау еріктілерде сульфонилмочевина туындыларының (хлорпропамид, глибенкламид, глипизид және толбутамид) жартылай шығарылу кезеңін ұзартады, бұл қандағы глюкоза концентрациясына мониторинг жүргізуді және қажет болғанда гипогликемиялық дәрілердің дозасын түзетуді қажет етеді. • Теофиллин – 14 күн бойы 200 мг доза қабылдаған кезде флуконазол теофиллиннің клиренсін 18 %-ға төмендетті, бұл теофиллиннің жағымсыз әсерлерінің күшею қаупін арттыруы мүмкін. • Қабіршөп алкалоидтары – флуконазолды қабылдау аясында қандағы винкристин және винбластин концентрациялары жоғарылауының потенциальді қаупі бар. • А дәрумені - трансретин қышқылы (А дәруменінің қышқылдық түрі) және флуконазолды бір мезгілде қолданған пациентте ОЖЖ тарапынан мидың жалған туморы түріндегі жағымсыз реакциялар байқалғаны хабарланған, ол флуконазолды тоқтатқаннан кейін жойылған. Бұл дәрілік заттарды бір мезгілде қолдануға болады, бірақ ОЖЖ тарапынан жағымсыз реакциялардың пайда болу қаупін есте ұстау керек. • Вориконазол (CYP2C9, CYP2C19, CYP3A4 изоферменттерінің тежегіші) - вориконазолды (1 күн 400 мг, кейінгі күндері әрбір 12 сағат сайын 200 мг 2,5 күн) және флуконазолды (1 күн 400 мг, содан кейін 4 күн бойы 200 мг) бір мезгілде пероральді түрде қабылдау дені сау еріктілерде қандағы вориконазолдың концентрациясын орта есеппен 57 %-ға арттырды. Бірге қолдану қажет болған кезде вориконазолды флуконазолдан кейін тағайындау ұсынылады. • Зидовудин - флуконазол қандағы зидовудиннің концентрациясын арттырып, жағымсыз әсерлердің даму қаупін ұлғайтады. Флуконазолды зидовудинмен бір мезгілде қабылдау зидовудиннің ең жоғары концентрациясын және фармакокинетикалық қисық астындағы ауданын, сәйкесінше, 84 %-ға және 74 %-ға арттырды, оның клиренсін 45 %-ға төмендетті, жартылай шығарылу кезеңін 128 %-ға ұзартты. • Азитромицин - азитромицин мен флуконазолдың бір-бірінің фармакокинетикасына ықпалына 18 дені сау еріктіде баға берген кезде оларды 1200 мг және 800 мг дозаларда бір мезгілде бір рет пероральді қолданғанда маңызды фармакокинетикалық әрекеттесулер анықталмады. • Ішуге арналған контрацептивтер - 200 мг-ге дейінгі дозадағы флуконазол пероральді түрде қолданылатын, ұрықтануға қарсы біріктірілген дәрілердің тиімділігіне елеулі ықпалын тигізген жоқ, ал 200 мг флуконазолды күн сайын қабылдағанда этинилэстрадиолдың және левоноргестрелдің фармакокинетикалық қисық астандағы ауданы, сәйкесінше, 40 %-ға және 24 %-ға артты. 300 мг флуконазолды аптасына 1 рет қабылдағанда этинилэстрадиолдың және норэтиндронның фармакокинетикалық қисық астандағы ауданы, сәйкесінше, 24 %-ға және 13 %-ға артты. • Ивакафтор – флуконазол қанда ивакафтордың CFTR-потенциаторының концентрациясын 3 есеге дейін, сондай-ақ оның метаболиті гидроксиметил-ивакафтордың концентрациясын арттырады.

Сақтау мерзімі 5 жыл. Жарамдылық мерзімі өткеннен кейін қолдануға болмайды! Сақтау шарттары Құрғақ, жарықтан қорғалған жерде, 25 °С-ден аспайтын температурада сақтау керек. Балалардың қолы жетпейтін жерде сақтау керек!