Хантераза концентрат 2 мг/мл

Бір құтының ішінде: белсенді зат - 6,00 мг идурсульфаза бета, қосымша заттар: натрий дигидрофосфат моногидраты, натрий дигидрофосфат гептагидраты, натрий хлориді, полисорбат 20, инъекцияға арналған су. Сыртқы түрінің, иісінің, дәмінің сипаттамасы Мөлдір немесе сәл бозаңданатын түссіз ерітінді.

Ферментті алмастыратын ем ретінде Хантер синдромы (мукополисахаридоз II, МПС II) бар пациенттердің емінде.

ATX коды А16АВ16. Әсер ету механизмі Мукополисахаридоз II типі (МПС II) немесе Хантер синдромы – пациенттің организміндегі идуронат-2-сульфатаза лизосомалық ферментінің тапшылығынан туындайтын сирек кездесетін Х-ілініскен рецессивті тұқым қуалайтын аурудың көрінісі. Идуронат-2-сульфаза гепаран- және дерматансульфат - гликозаминогликандар (ГАГ) катаболизмінің бірінші сатысына қатысады. Идуронат-2-сульфатаза белсенділігінің жеткіліксіздігі нәтижесінде әртүрлі тіндер мен органдардың барлық дерлік жасуша түрлерінің лизосомаларында гепаран- және дерматансульфат - гликозаминогликандардың (ГАГ) жинақталуы туындайды, бұл жасушалардың шамадан тыс қанығуына, органомегалияға, тіндердің бұзылуына және органдар функциясының бұзылуына әкеледі. Фармакодинамикалық әсерлері Идурсульфаза бета идуронат-2-сульфатаза лизосомалық ферментінің тазартылған түрі - рекомбинантты адам идуронат-2-сульфатазасын (раИДС) білдіреді. раИДС қытай атжалманы анабезі жасушаларының линиясын (CHO) (жасуша - қожайын: CHO DG44 / экспрессия векторы: ID pJK dhfr Or2) пайдалану арқылы рекомбинантты ДНҚ технологиясы бойынша өндіріледі. Идурсальфаза бета - бұл молекулалық салмағы шамамен 78 КДа болатын 525 аминқышқылы бар гликопротеин, оның құрамында кешенді олигосахаридтік құрылымдары мен екі дисульфидтік байланыс орналасқан аспарагинмен байланысты гликозилденудің сегіз бөлімі бар. Идурсульфаза бета ферментативті белсенділігі спецификалық цистеиннің формилглициндегі посттрансляциялық модификациясына тәуелді. Хантер синдромы бар пациенттерге идурсульфаза бетаны вена ішіне енгізу жасушалық лизосомаларға экзогендік ферменттің жеткізілуін қамтамасыз етеді. Олигосахаридті тізбектердегі манноз-6-фосфат қалдықтары (М6Ф) ферменттің жасуша беткейіндегі М6Ф-рецепторларымен спецификалық байланысуына мүмкіндік береді, бұл жасушаішілік лизосомаларға бағытталған ферменттің ішкі орналасуына және жинақталатын ГАГ кейінгі катаболизміне әкеледі. Клиникалық тиімділігі мен қауіпсіздігі Хантеразаның тиімділігі мен қауіпсіздігі 38 айдан 35 жасқа дейінгі жастағы Хантер синдромы бар еркек жынысты пациенттерде 24-52 апта ішінде 2 клиникалық зерттеу және 24 айдан асқан және 35 жастан асқан ересектерде Хантер синдромы бар еркек жынысты пациенттерде 1 ашық проспектілі зерттеу барысында расталды. Емдеудің тиімділігі пациенттердің несебіндегі ГАГ-тың бастапқы деңгейінің пайыздық өзгерісі, науқастың 6 минут ішінде жүріп өтетін жолының арақашықтығы, өкпенің жеделдетілген өмірлік сыйымдылығының көрсеткіштері, бауыр көлемі, жүрек мөлшері мен функциясы, буындардың қозғалғыштығы, пациенттердің өсуі мен дамуы негізінде бағаланды. Хантераза препаратының ГАГ жинақталуына фармакодинамикалық әсері жануарлардағы зерттеулерде бағаланған. Хантеразаны қолдану жануарлардың несебі мен тіндеріндегі ГАГ деңгейінің нақты азаюына әкелді, сонысымен препараттың емдік тиімділігін көрсетті.

Емі МПС II ауруы немесе зат алмасудың басқа тұқым қуалайтын бұзылулары бар пациенттерде ем жүргізу тәжірибесі бар дәрігердің немесе басқа медицина қызметкерінің бақылауымен жүргізілуі тиіс. Дозалау режимі 0,2 микрометр (мкм) сүзгісі бар инфузиялық жинақты пайдалану ұсынылады. Хантераза препаратын аптасына бір рет дене салмағына қарай 0,5 мг/кг дозада 1-ден 3 сағатқа дейінгі уақыт ішінде вена ішіне енгізу керек. Пациенттерге инфузия аясында жағымсыз реакцияларға байланысты инфузия уақытын ұзарту қажет болуы мүмкін, алайда инфузия ұзақтығы 8 сағаттан аспауы тиіс. Инфузияның бастапқы жылдамдығы алғашқы 15 минут ішінде 8 мл/сағ құрауы тиіс. Егер пациенттерде инфузия жағымдылығы қанағаттанарлық болса, онда препаратты енгізу жылдамдығын әр 15 минут сайын 8 мл/сағ - қа арттырып, препаратты енгізуді соңына дейін 40 мл/сағ-қа дейін жеткізуге болады. Инфузия жылдамдығы 100 мл/сағ аспауы тиіс. Егер инфузия аясында жағымсыз реакциялар туындаса, онда клиникалық білінулеріне сәйкес, инфузия жылдамдығы азайтылуы және/немесе уақытша тоқтата тұрылуы немесе тоқтатылуы мүмкін. Хантераза препаратын басқа препараттармен бір мезгілде инфузияға арналған жалпы катетер арқылы енгізуге болмайды. Пациенттердің ерекше топтары Егде жастағы пациенттер Қазіргі уақытта 65 жастан асқан пациенттерде клиникалық қолдану тәжірибесі жоқ. Бүйрек немесе бауыр жеткіліксіздігі бар пациенттер Қазіргі уақытта бүйрек немесе бауыр жеткіліксіздігі бар пациенттерде клиникалық қолдану тәжірибесі жоқ. Педиатрияда қолдану 18 жасқа дейінгі балалар мен жасөспірімдерге арналған доза түзетуді қажет етпейді. Препаратты аптасына бір рет дене салмағына қарай 0,5 мг/кг дозада енгізу керек. Енгізу әдісі және жолы Тек венаішілік инфузияға арналған. Инфузия үшін ерітінді дайындау жөніндегі нұсқаулық 2 мг/мл идурсульфаза бета бар құтыдағы Хантераза препаратының ішінде инфузия үшін ерітінді дайындауға арналған концентраты болады. Асептика ережелерін сақтай отырып, ерітінділерді дайындау кезінде стерильді жағдайларды қамтамасыз ету қажет. Хантераза препаратының құтыларында микробқа қарсы консерванттар немесе бактериостатикалық заттар болмайды, ол тек бір рет қолдануға арналған. Вена ішіне енгізер алдында құтының ішіндегісін асептика ережелерін сақтай отырып, инъекцияға арналған 0,9% натрий хлоридінің ерітіндісімен келесі түрде сұйылту қажет: 1. Хантераза препараты құтысының пациентке 1 енгізуге қажетті санын анықтау, оны пациенттің дене салмағын және ұсынылатын дозасын (дене салмағына қарай 0,5 мг/кг) ескере отырып, сұйылту қажет. Пациенттің салмағы (кг) × 0,5 мг/кг Хантераза ÷ 2 мг/мл = Хантераза препаратының жалпы мөлшері (мл). Хантераза препаратының жалпы мөлшері (мл) ÷ 3 мл/құты = Хантераза препараты құтыларының жалпы саны. Алынған Хантераза препараты құтыларының жалпы санын бүтін мәнге дейін дөңгелектеу қажет. 2. Ерітіндінің мөлдір немесе сәл бозаңданатын түссіз, көзге көрінетін бөлшектері жоқ екеніне көз жеткізу үшін әр құтыны көзбен қарап тексеру жүргізу. Егер құтыдағы ерітіндінің түсі өзгерсе немесе қатты бөлшектері болса, қолданбаңыз. Ішінде Хантераза бар құтыны сілкуге болмайды. 3. Хантеразаның жалпы есептелген көлемін натрий хлориді инъекциясына арналған 100 мл 0,9% ерітіндісінде сұйылтыңыз. Сұйылтқаннан кейін инфузиялық қапшықтағы ерітіндіні абайлап араластыру керек, бірақ шайқауға болмайды. Микробиологиялық қауіпсіздік мақсатында инфузияға арналған қолдануға дайын ерітіндіні сұйылтқаннан кейін дереу пайдалану керек. Жедел пайдалану мүмкін болмаған жағдайда инфузияға арналған сұйылтылған ерітіндіні тоңазытқышта 2-ден 8 оС–ге дейінгі температурада 48 сағаттан асырмай сақтауға жол беріледі, сұйылтылған ерітіндіні бөлме температурасында сақтаған жағдайда ол 8 сағат ішінде пайдаланылуы тиіс. 4. Хантераза тек бір рет пайдалануға арналған. Қалған Хантераза препараты және қалдықтары пайдаланылғаннан кейін дереу жергілікті талаптарға сәйкес жойылуы керек. Утилизациялауға қойылатын ерекше жағдайлар жоқ. Тоқтату симптомдары қаупінің болуына нұсқау Қатысты емес. Дәрілік препаратты қолдану тәсілін түсіндіру үшін медицина қызметкерінен кеңес алуға жүгіну бойынша ұсынымдар Дәрілік препаратты қолданар алдында дәрігерге жүгініңіз.

• тиісті ем жүргізген кезде симптомдарды жою мүмкін болмаған жағдайлардағы клиникалық айқын немесе әсер етуші затқа немесе қосымша заттардың кез келгеніне пациенттердің өміріне қауіп төндіретін жоғары сезімталдық.

Өте жиі • жоғарғы тыныс алу жолдарының инфекциялары, бронхит, синусит, ортаңғы құлақ отиті, фаринготонзилит; • есекжем, терінің қышынуы, дерматит, дененің зеңдік зақымдануы; • жөтел, ринорея, аллергиялық ринит; • диарея, гастроэнтерит, энтерит; • қызба; • бұлшықет түйілулері, миалгия; • конъюнктивит, құрғақ кератоконьюнктивит*; • инфузия аумағындағы ісіну. Жиі • көз инфекциялары (теріскен), пневмония*; • эритематоздық бөртпе, атопиялық дерматит, экзема, дақтар, табанның зеңдік зақымдануы; • ринит, бронх демікпесі, мұрыннан қан кету, қақырықты* жөтел, ұйқы кезіндегі тыныс алу қозғалысының тоқтауы; • жүрек айнуы, құсу, іш қатуы, артқы өтістің сызаты, аноректальді аймақтың зақымдалуы, диспепсия, стоматит, тістердің ауруы; • жалпы жай-күйдің нашарлауы; • баланопостит*. _______________________________________________________ *Хантераза препаратының дене салмағына 1,0 мг/кг алған пациенттер тобында клиникалық зерттеулерде тіркелген жағымсыз реакциялар. Балаларда байқалатын жағымсыз реакциялардың, сипаты және кездесу жиілігі бойынша, ересек пациенттердегі сәйкес реакциялардан айырмашылықтары болған жоқ. Жағымсыз дәрілік реакциялар туындағанда медициналық қызметкерге, фармацевтикалық қызметкерге немесе, дәрілік препараттардың тиімсіздігі туралы хабарламаларды қоса, дәрілік препараттарға болатын жағымсыз реакциялар (әсерлер) жөніндегі ақпараттық деректер базасына тікелей хабарласу керек Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

Хантераза препаратының артық дозалануы туралы ақпарат жоқ. Дәрілік препараттың бір немесе бірнеше дозаларын өткізіп алғанда қажет болатын шаралар Өткізіп алған дозасының орнын толтыру үшін екі есе дозасын қабылдамаңыз.

Анафилактоидты/анафилаксиялық реакциялар Кейбір пациенттерде дәрілік препараттың инфузиясы кезінде өмірге қауіпті анафилаксиялық реакциялар, оның ішінде бастапқы реакциядан кейін 24 сағат өткен соң байқалған анафилактоидты/анафилаксиялық реакциялардың кейінге қалдырылған белгілері болуы мүмкін. Реакциялар ішінде респираторлық дистресс синдромы, гипоксия, қан қысымының төмендеуі, құрысулар және/немесе ангионевроздық ісіну болды. Хантераза препаратын инфузиялау кезінде елеулі жағымсыз реакциялар болуы мүмкін болғандықтан, қолда тиісті медициналық көмек көрсету мүмкіндігі болуы тиіс. Инфузия аясында анафилактоидты/анафилаксиялық реакция дамыған кезде шұғыл емнің ағымдағы медициналық стандарттарын ұстану керек: инфузияны дереу тоқтатып және тиісті емдеу мен бақылауды бастау керек. Жағымсыз реакцияларды антигистаминдік препараттардың және/немесе кортикостероидтардың көмегімен инфузияға дейін немесе инфузия кезінде, Хантераза препаратын неғұрлым баяу жылдамдықта енгізумен және/немесе ауыр симптомдар пайда болған кезде Хантераза препаратының инфузиясын ерте тоқтатумен бәсеңдеткен жөн. Бұндай пациенттерге ұзақ уақыт клиникалық бақылау қажет болуы мүмкін. Бұрын Хантераза препаратын енгізуге анафилактоидты/анафилаксиялық реакциялар байқалған пациенттерге қайтадан препаратты сақтықпен тағайындаған жөн, препаратты енгізу кезеңінде арнайы оқып үйренген медициналық қызметкердің қатысуы және реанимациялық емшараларды (эпинефрин енгізуді қоса) жүргізу үшін қажетті жабдықтардың болуы қажет. Пациенттің жағдайы бақылауға келмеген жағдайда, өмір үшін ауыр және қауіпті аса жоғары сезімталдық реакциялары препаратты қайталап қолдану үшін қарсы көрсетілім болып табылады. Препарат инфузиясына байланысты реакциялар Клиникалық сынақтар кезінде инфузиямен байланысты жиілігі көбірек реакциялар тері реакциялары (бөртпе, қышыну, есекжем), дене температурасының жоғарылауы, бас ауруы, қан қысымының жоғарылауы және қан кернеулері болды. Жағымсыз реакциялар препаратты енгізу жылдамдығын төмендету, инфузияны тоқтату немесе антигистаминді және ыстықты түсіретін дәрілерді, глюкокортикостероидтардың (преднизон және метилпреднизолон) төмен дозаларын енгізу немесе бета-агонистерді ингаляциялау арқылы тоқтатылды. Клиникалық зерттеулер кезінде пациенттердің ешқайсысына препараттың инфузиясымен байланысты жағымсыз реакцияның дамуына байланысты ем тоқтатылған жоқ. Хантераза препаратын сақтықпен енгізу керек: • Хантераза препаратын инфузиялық енгізуге байланысты қайталанатын күрделі реакциялары бар пациенттерге; • анамнезінде анафилаксиялық реакциялары, оның ішінде Хантераза препаратының құрамына кіретін қосымша заттарға анафилаксиялық шок болған пациенттерге. Тыныс алу жолдарының ауыр қатар жүретін аурулары бар пациенттерге препаратты енгізу кезінде ерекше сақтық шаралары қажет. Тыныс алу функциясы бұзылған немесе жедел респираторлық аурулары бар пациенттерде инфузиялық реакциялар нәтижесінде өмірге қауіпті асқынулардың даму қаупі жоғары болуы мүмкін. Препаратты инфузиялық енгізуді жүргізу және клиникалық жай-күйін бақылау үшін пациенттерді мамандандырылған бөлімшеге жатқызу талап етілуі мүмкін. Бұл пациенттерде антигистаминді препараттарды немесе басқа тыныштандыратын дәрілерді пайдалануды шектеу немесе мұқият бақылау керек. Кейбір жағдайларда тыныс алу жолдарында оң қысым ұстау қажет болуы мүмкін. Егер пациентте дене температурасының жоғарылауымен жедел респираторлық ауру дамыған болса, препаратты енгізуді кейінге қалдыру керек. Орын басушы оттегі емін пайдаланатын пациенттер үшін жағымсыз реакция дамыған жағдай үшін препаратты енгізу кезінде оттегі қоры болуы қажет. Гендер бірізділігі мүлде болмайтын (делециямен) немесе елеулі өзгерісі (қайта құрылуы) болатын балалар жасындағы пациенттер Гендер бірізділігі мүлде болмайтын (делециямен) немесе елеулі өзгерісі (қайта құрылуы) болатын балалар жасындағы пациенттерде идурсульфазаны енгізуге жауап ретінде идурсульфазаға антиденелер, оның ішінде бейтараптандыратын антиденелер өндірілу қаупі артады. Осындай генотипі бар пациенттерде препаратты инфузиялық енгізумен және гендердің мутациясы (миссенс-генотипі) бар пациенттермен салыстырғанда несеппен гликозаминогликандардың шығарылуын төмендету, бауыр мөлшері және көкбауыр көлемі бойынша бағаланатын емдеуге төмен клиникалық жауапты көрсету үрдісімен байланысты жағымсыз реакциялардың даму қаупі жоғары. Пациенттерге емді жеке тағайындау керек. («Жағымсыз реакциялар» бөлімін қараңыз) Иммуногенділік Хантераза препаратын енгізгеннен кейін барлық пациенттерде клиникалық зерттеулер барысында бақылау кезеңі ішінде антиденелер табылған жоқ. Арнайы сақтандырулар Натрий хлориді Бұл дәрілік препараттың бір құтысының ішінде 24,00 мг натрий хлориді бар. Мұны тұзсыз диетаны ұстанатын пациенттерге Хантераза тағайындау кезінде ескеру керек. Препаратты енгізуді есепке алу Биологиялық дәрілік препараттарды енгізу есебін жақсарту үшін медициналық қызметкеріне пациенттің медициналық құжаттамасына енгізілетін препараттың атауы мен серия нөмірін түсінікті жазумен жазып алуы керек. Препараттың көлік құралын немесе қауіптілігі зор мехнаизмдерді басқару қабілетіне әсер ету ерекшеліктері Хантераза көлік құралдарын басқару немесе механизмдермен жұмыс істеу қабілетіне әсер етпейді немесе елеусіз әсер етеді.

Жүкті әйелдерде идурсульфазаны қолдану туралы деректер жоқ. Сақтық шарасы ретінде Хантераза препаратын жүктілік кезінде қолданбаған жөн. Идурсульфазаның емшек сүтімен бөлінетіндігі белгісіз. Жаңа туған нәрестелер/сәбилер үшін қауіпті жоққа шығаруға болмайды. Бала емізуді тоқтату туралы немесе идурсульфазамен емдеуді тоқтату/бас тарта тұру туралы шешімді бала үшін емшекпен емізудің пайдасын және әйел үшін емнің пайдасын ескере отырып қабылдау қажет.

Хантераза препаратының басқа дәрілік заттармен дәрілік өзара әрекеттесуіне зерттеулер жүргізілген жоқ.

Сақтау мерзімі 3 жыл. Жарамдылық мерзімі өткеннен кейін қолдануға болмайды! Сақтау шарттары Жарықтан қорғалған жерде, 2 ºС-ден 8 ºС -ге дейінгі температурада. Мұздатып қатыруға болмайды. Балалардың қолы жетпейтін жерде сақтау керек!