Ципрофлоксацин таблетки 250 мг

Бір таблетканың құрамында белсенді зат: ципрофлоксацин гидрохлориді (ципрофлоксацинге шаққанда) – 250 мг немесе 500 мг; қосымша заттар: микрокристалды целлюлоза, картоп крахмалы, жүгері крахмалы, гипромеллоза, тальк, натрий кроскармеллозасы, магний стеараты, сусыз коллоидты кремнийдің қостотығы, полиэтиленгликоль 6000 (макрогол 6000), титанның қостотығы (Е 171), полисорбат 80. Сыртқы түрінің, иісінің, дәмінің сипаттамасы Дөңгелек пішінді, екі беті дөңес, ақ немесе сарғыш реңді ақ түсті қабықпен қапталған таблеткалар. Сындыратын жерінде үлкейткіш шынымен қарағанда тегіс бір қабатпен қоршалған ядро көрінеді.

Сезімтал микроорганизмдер туғызған инфекциялық-қабыну аурулары: • грамтеріс микроорганизмдер туғызған төменгі тыныс алу жолдарының инфекциялары (өкпенің созылмалы обструкциялық ауруының өршуі, муковисцидоз немесе бронхоэктазалар кезіндегі бронх-өкпе инфекциялары, пневмония) • созылмалы іріңді ортаңғы отит • созылмалы синуситттің өршуі, әсіресе, оны грамтеріс бактериялар туғызған болса • несеп шығару жолдарының инфекциялары • жыныс мүшелерінің инфекциялары (Neisseria gonorrhoeae сезімтал штаммдары туғызған гонококкты уретрит және цервицит, орхоэпидидимит, кіші жамбас ағзаларының қабыну аурулары, Neisseria gonorrhoeae сезімтал штаммдары туғызған жағдайларды қоса) • құрсақ қуысының инфекциялары (асқазан-ішек жолының бактериялық инфекциялары) • интраабдоминальді инфекциялар • сүйек пен буындардың инфекциялары (остеомиелит, сепсистік артрит) • терінің және жұмсақ тіндердің инфекциялары • Neisseria meпiпgitidis туғызған инвазиялық инфекциялар профилактикасы • сібір ойық жарасының өкпелік түрінің профилактикасы және оны емдеу.

Әсер ету механизмі Ципрофлоксацин грам-теріс және грам-оң қоздырғыштардың кең ауқымына қатысты in vitro жоғары тиімділік танытады. Бактерияға қарсы әсер ету механизмі ципрофлоксациннің ДНҚ тіршілік циклының репликация, транскрипция, репарация және рекомбинация сияқты көптеген үдерістеріне қажет болатын II типті топоизомеразаны (ДНҚ-гиразаны және IV топоизомеразаны) бәсеңдету қабілетімен жүзеге асады. Төзімділік механизмі Ципрофлоксацинге in vitro төзімділік, әдетте, бактериялық топоизомеразаларда және ДНҚ-гиразада көп сатылы мутациялар арқылы пайда болатын нысана-сайт мутацияларымен байланысты. Дара мутациялар клиникалық төзімділіктің емес, сезімталдықтың төмендеуіне тез арада әкелуі мүмкін. Алайда, көптеген мутациялар әдетте ципрофлоксацинге клиникалық төзімділік пен хинолондарға айқаспалы төзімділікті туындатады. Бактериялардың сыртқы жақтауының өткізгіштігін төмендету (Pseudomonas aeruginosa тән) және препаратты жасушалардан белсенді шығару (эфлюкс) сияқты басқа антибиотиктерді белсенділігінен айыратын төзімділік механизмдері ципрофлоксацинге сезімталдыққа ықпал етуі мүмкін. Антибиотикке төзімділіктің qnr генімен кодталған плазмид арқылы төзімділіктің дамуы мәлімделді. Пенициллиндер, цефалоспориндер, аминогликозидтер, макролидтер және тетрациклиндерді белсенділігінен айыратын төзімділік механизмдері ципрофлоксациннің бактерияға қарсы белсенділігіне ықпал етпеуі мүмкін. Осы препараттарға төзімді организмдер ципрофлоксацинге сезімтал болуы мүмкін. Ең төмен бактерицидтік концентрация (ЕТБК), әдетте, ең төмен тежегіш концентрациядан (ЕТТК) 2 еседен көп асып кетпейді. Ципрофлоксацинге in vitro сезімталдық Бөлініп шыққан түрлердің жүре пайда болған төзімділігінің таралуы жергілікті мекенге және уақытына байланысты өзгеріп отыруы мүмкін, сондықтан, әсіресе, ауыр инфекцияларды емдегенде төзімділігі жөнінде жергілікті ақпарат қажет. Төзімділіктің жергілікті таралуы кейбір инфекция түрлеріне қатысты дәріні қолданудың пайдасы күмән тудыратын деңгейге жеткенде, қажет болса, кеңес алу үшін мамандарға жүгінген жөн. Ципрофлоксацинге, жалпы алғанда, бактериялардың келесі тектері мен түрлері in vitro сезімтал: аэробты грамоң микроорганизмдер (Bacillus anthracis, Staphylococcus aureus, Staphylococcus saprophyticus, Streptococcus spp.); аэробты грамтеріс микроорганизмдер (Aeromonas spp., Brucella spp., Citrobacter koseri, Francisella tularensis, Haemophilus ducreyi, Haemophilius influenzae, Legionella spp., Moraxella catarrhalis, Neisseria meningitidis, Pasteurella spp., Salmonella spp., Shigella spp., Vibrio spp., Yersinia pestis); анаэробты микроорганизмдер (Mobiluncus); басқа микроорганизмдер: (Chlamydia trachomatis, Chlamydia pneumoniae, Mycoplasma hominis, Mycoplasma pneumoniae). Ципрофлоксацинге әртүрлі сезімталдық анықталады: Acinetobacter baumann, Burkholderia cepacia, Campylobacter spp., Citrobacter freudii, Enterococcus faecalis, Enterobacter aerogenes, Enterobacter clocae, Escherichia coli, Klebsiella pneumoniae, Klebsiella oxytoca, Morganella morganii, Neisseria gonorrhoeae, Proteus mirabilis, Proteus vulgaris, Providencia spp., Pseudomonas aeruginosa, Pseudomonas fluorescens, Serratia marcescens, Streptococcus pneumoniae, Peptostreptococcus spp., Propionibacterium acnes. Келесі микроорганизмдер ципрофлоксацинге тұқым қуалайтын төзімділік танытады деп саналады: Staphylococcus aureus (метициллинге төзімді) және Stenotrophomonas maltophilia, Actinomyces, Enteroccus faecium, Listeria monocytogenes, Mycoplasma genitalium, Ureaplasma urealitycum, анаэробты микроорганизмдер (Mobiluncus, Peptostreptococus, Propionibacterium acnes қосылмағанда). Сібір ойық жарасының өкпелік түріне қатысты деректер Адамда қолдану жөніндегі нұсқаулар негізінен микроорганизмдердің in vitro сезімталдығына негізделеді. Адамда сібір ойық жарасы ауруына жол бермеу үшін ципрофлоксацинді екі ай бойы 500 мг дозада қолдану тиімді болып саналады. Дәрігер емдеуді сібір ойық жарасын емдеу жөніндегі ұлттық және/немесе халықаралық консенсуалдық құжаттарға сәйкес жүргізуі тиіс.

Дозалау режимі Дозасы көрсетілімдерге, инфекцияның ауырлығына және орналасуына, қоздырғыштың (қоздырғыштардың) ципрофлоксацинге сезімталдығына, пациенттің бүйрек функциясына, ал балаларда – дене салмағына сәйкес анықталады. Емедудің ұзақтығы аурудың ауырлығына, клиникалық көрінісінің ерекшеліктеріне және қоздырғыштың түріне байланысты болады. Белгілі бір бактериялардан (мысалы, Pseudomonas aeruginosa, Acinetobacter немесе Staphylococci) туындаған инфекцияларды емдеу ципрофлоксациннің жоғары дозаларын қолдануды және басқа да қажетті бактерияға қарсы препараттарды бір мезгілде тағайындауды қажет етуі мүмкін. Кейбір инфекцияларды (мысалы, кіші жамбас ағзаларының қабыну аурулары, құрсақішілік инфекциялар, нейтропения бар пациенттердегі инфекциялар, сүйектер мен буындардың инфекциялары) емдеу анықталған патогендердің түріне байланысты басқа да қажетті бактерияға қарсы препараттарды бір мезгілде тағайындауды қажет етуі мүмкін. Ересектер Көрсетілімдер — Тәуліктік доза, мг — Емдеудің жалпы ұзақтығы (ципрофлоксацинді бастапқы парентералдық қолдануды қамтуы мүмкін) Төменгі тыныс алу жолдарының инфекциялары — Күніне екі рет 500 мг- ден күніне екі рет 750 мг дейін — 7-ден 14 күнге дейін Жоғарғы тыныс алу жолдарының инфекциялары — Созылмалы синуситтің өршуі — Күніне екі рет 500 мг- ден күніне екі рет 750 мг дейін — 7-ден 14 күнге дейін Созылмалы іріңді ортаңғы отит — Күніне екі рет 500 мг-ден күніне екі рет 750 мг дейін — 7-ден 14 күнге дейін Ауыр ағымдағы сыртқы құлақ отиті — Күніне екі рет 750 мг — 28 күннен 3 айға дейін Несеп шығару жолдарының инфекциялары («Қолдану кезіндегі қажетті сақтандыру шаралары» бөлімін қараңыз) — Асқынбаған жедел цистит — Күніне екі рет 250 мг- ден күніне екі рет 500 мг дейін — 3 күн Менопауза алдындағы әйелдерде бір рет 500 мг қолдануға болады Асқынған цистит, асқынбаған пиелонефрит — Күніне екі рет 500 мг — 7 күн Асқынған пиелонефрит — Күніне екі рет 500 мг- ден күніне екі рет 750 мг дейін — Кемінде 10 күн, кейбір ерекше клиникалық жағдайларда (абсцесс сияқтылар) емдеу 21 күннен астамға жалғасуы мүмкін Бактериялық простатит — Күніне екі рет 500 мг- ден күніне екі рет 750 мг дейін — 2-ден 4 аптаға дейін (жедел), 4-тен 6 аптаға дейін (созылмалы) Жыныс ағзаларының инфекциялары — Neisseria gonorrhoeae-ден туындаған гонококктық уретрит және цервицит — Бір реттік 500 мг доза — 1 күн (бір реттік доза) Орхоэпидидимит және кіші жамбас ағзаларының қабыну аурулары, Neisseria gonorrhoeae-ден туындаған жағдайларды қоса — Күніне екі рет 500 мг- ден күніне екі рет 750 мг дейін — Кемінде 14 күн Асқазан-ішек жолының инфекциялары және интраабдоминальді инфекциялар — Патогенді бактериялардан туындаған диарея, атап айтқанда Shigella spp., Shigella dysenteriae-ден басқа, 1-типі, және саяхатшылардың ауыр диареясын эмпириялық емдеу — Күніне екі рет 500 мг — 1 күн Shigella dysenteriae 1-типінен туындаған диарея — Күніне екі рет 500 мг — 5 күн Vibrio cholerae-ден туындаған диарея — Күніне екі рет 500 мг — 3 күн Сүзектік қызба — Күніне екі рет 500 мг — 7 күн Грамтеріс бактериялардан туындаған интраабдоминальді инфекциялар — Күніне екі рет 500 мг- ден күніне екі рет 750 мг дейін — 5-тен 14 күнге дейін Грамтеріс бактериялардан туындаған тері және жұмсақ тіндер инфекциялары — Күніне екі рет 500 мг- ден күніне екі рет 750 мг дейін — 7-ден 14 күнге дейін Сүйектер мен буындардың инфекциялары — Күніне екі рет 500 мг- ден күніне екі рет 750 мг дейін — Ең көбі 3 ай Нейтропениядан зардап шегіп жүрген, болжамды түрде бактериялық инфекция туғызған қызбасы бар пациенттер. Ципрофлоксацинді ресми нұсқауларға сәйкес тиісті бактерияға қарсы дәрімен бірге тағайындау керек — Күніне екі рет 500 мг- ден күніне екі рет 750 мг дейін — Емді бүкіл нейтропения кезеңі бойына жалғастыру керек Neisseria meningitidis-ден туындаған инвазиялық инфекциялар профилактикасы — Бір реттік доза түрінде 500 мг — 1 күн(бір реттік доза) Пероральді түрде ем қабылдай алатын тұлғаларда сібір ойық жарасының өкпелік түрінің жанасудан кейінгі профилактикасы және егер клиникалық қажеттілігі болса, оны радикалдық емдеу. Жанасуға күдік туған немесе расталғаннан кейін емдеуді мүмкіндігінше тезірек бастау керек — Күніне екі рет 500 мг — Bacillus anthracis-пен жанасу расталған сәттен бастап 60 күн Пациенттердің ерекше топтары Балалар мен жасөспірімдер Көрсетілімдер — Тәуліктік доза, мг — Емдеудің жалпы ұзақтығы (ципрофлоксацинді бастапқы парентералдық қолдануды қамтуы мүмкін) Муковисцидоз — Ең жоғары 750 мг дозада 20 мг/кг дене салмағына тәулігіне 2 рет — 10-нан 14 күнге дейін Несеп шығару жолдарының асқынған инфекциялары және жедел пиелонефрит — Ең жоғары 750 мг дозада 10 мг/кг дене салмағына тәулігіне 2 реттен 20 мг/кг дене салмағына тәулігіне 2 ретке дейін — 10-нан 21 күнге дейін Пероральді түрде ем қабылдай алатын тұлғаларда сібір ойық жарасының өкпелік түрінің жанасудан кейінгі профилактикасы және егер клиникалық қажеттілігі болса, оны радикалдық емдеу. Жанасуға күдік туған немесе расталғаннан кейін емдеуді мүмкіндігінше тезірек бастау керек — Бір реттік ең жоғары 500 мг дозада 10 мг/кг дене салмағына тәулігіне 2 реттен 15 мг/кг дене салмағына тәулігіне 2 ретке дейін — Bacillus anthracis-пен жанасу расталған сәттен бастап 60 күн Басқа ауыр инфекциялар — Бір реттік ең жоғары 750 мг дозада 20 мг/кг дене салмағына тәулігіне 2 рет — Инфекция түріне сәйкес Егде жастағы пациенттер Егде жастағы пациенттер инфекцияның ауырлығына және пациенттің креатинин клиренсіне сәйкес анықталған дозаны алуы тиіс. Бүйрек немесе бауыр функциясы бұзылған пациенттер Бүйрек функциясының бұзылуы бар пациенттер үшін ұсынылған бастапқы және демеуші дозалары: Креатинин клиренсі (мл/мин/1,73 м2) — Қан сарысуы креатинині (мкмоль/л) — Пероральді доза (мг) > 60 — < 124 — Әдеттегі дозалануын қараңыз 30-60 — 124-168 — Әр 12 сағат сайын 250-500 мг < 30 — > 169 — Әр 24 сағат сайын 250-500 мг Гемодиализдегі пациенттер — > 169 — Әр 24 сағат сайын 250-500 мг (диализден кейін) Перитонеалдық диализдегі пациенттер — > 169 — Әр 24 сағат сайын 250-500 мг Бауыр функциясының бұзылуы бар пациенттерде дозаны түзету қажет емес. Бүйрек және/немесе бауыр функциясының бұзылулары бар балаларда дозалануы зерттелмеді. Енгізу әдісі және жолы Таблеткаларды тұтастай, сұйықтықпен ішу арқылы жұту керек. Таблеткаларды тамақ ішуге байланыссыз қолдануға болады. Ашқарынға қабылдаған кезде әсер етуші зат жылдамырақ сіңеді. Ципрофлоксацин таблеткаларын құрамында сүт өнімдері немесе минералдармен байытылған сусындармен тамақ ішу кезінде қолдануға болады. Алайда, ципрофлоксацин таблеткаларын сүт өнімдерін (мысалы, сүт, йогурт) немесе минералдармен байытылған сусындарды (мысалы, кальциймен байытылған апельсин шырыны) қабылдаумен, егер бұл өнімдерді немесе сусындарды тамақтан бөлек, жеке өздерін қабылдаса, бір мезгілде қолдануға болмайды. Осылайша, ципрофлоксацин таблеткаларын сүт өнімдерін немесе минералдармен байытылған сусындарды қабылдаудан, егер бұл өнімдер немесе сусындар тамақтан бөлек, жеке өздері қабылданса, құрамында кальций бар дәрілік заттарға арналған ұсыныстарға сәйкес 1-2 сағат бұрын немесе кем дегенде 4 сағаттан кейін қабылдау керек («Басқа дәрілік препараттармен өзара әрекеттесуі» бөлімін, «Тағам, оның ішінде сүт өнімдері» тармағын қараңыз қараңыз). Ауыр жағдайларда немесе пациент таблеткаларды қабылдай алмайтын болса (соның ішінде энтералдық тамақтануда), пероральді қабылдауға көшу мүмкін болғанға дейін ципрофлоксацинді вена ішіне енгізу емін бастау ұсынылады. Ципрофлоксацин таблеткаларын ұсақтауға боламайды, сондықтан да олар таблеткаларды жұта алмайтын ересек пациенттерді немесе балаларды емдеуге жарамайды. Жұтуы қиындаған пациенттер үшін және балалар үшін баламалы дәрілік түрлерін (шәрбат түріндегі ципрофлоксацин) қолдануға болады. Қабылдау уақыты көрсетілген қолдану жиілігі Егер дозаны қабылдауды өткізіп алса, оны кез келген уақытта, бірақ келесі тұрақты дозаны қабылдауға дейін 6 сағаттан кешіктірмей қабылдау керек. Егер келесі дозаны қабылдауға 6 сағаттан аз уақыт қалған болса, өткізіп алған дозаны қабылдауға болмайды, мұндайда емдеуді келесі тұрақты дозаны тағайындалуына сәйкес қабылдаумен жалғастыру керек. Өткізіп алған дозаның орнын толтыру үшін екі есе дозаны қолдануға болмайды. Емдеу ұзақтығы «Дозалау режимі» бөлімін қараңыз. Дәрілік препараттың бір немесе бірнеше дозасын өткізіп алу кезіндегі қажетті шаралар Егер Сіз кезекті дозаны қабылдауды ұмытып кетсеңіз, оны мүмкіндігінше тезірек қабылдаңыз. Алайда, егер препараттың кезекті дозасын қабылдау уақыты келіп қалса, өткізіп алған дозаны қабылдап жіберіңіз және әдеттегіше қабылдауды жалғастырыңыз. Өткізіп алған дозаның орнын толтыру үшін қосарлы дозасын қабылдамаңыз! Тоқтату симптомдары қаупінің болуына көрсетілім Егер Сіздің дәрігеріңіз Сізге бұл жөнінде айтпаса, препарат қабылдауды тоқтатпаңыз. Өзіңізді жақсы сезінгеніңіз үшін ғана препарат қабылдауды тоқтатпаңыз. Егер Сіз қабылдауды тым ерте тоқтатып қойсаңыз, Сіздің жай-күйіңіз нашарлауы мүмкін. Препарат қабылдауды тағайындалған курс аяқталатын сәтке дейін жалғастырыңыз. Дәрілік препаратты қолдану тәсілін түсіндіру үшін медициналық қызметкер кеңесіне жүгіну жөніндегі нұсқаулар Осы препаратты қолдану бойынша қандай да бір қосымша сұрақтар туындаса, кеңес алу үшін емдеуші дәрігерге жүгініңіз.

• ципрофлоксацинге, басқа фторхинолондарға, препараттың қосымша компоненттеріне аса жоғары сезімталдық • тизанидинмен бір мезгілде қабылдау (артериялық қысымның айқын төмендеуі, ұйқышылдық қаупі) • балалар мен 18 жасқа дейінгі жасөспірімдер (қаңқаның қалыптасу үдерісінің аяқталуына дейін) • жүктілік және лактация кезеңі • глюкоза-6-фосфатдегидрогеназа тапшылығы • миокард инфарктісі.

Инфекциялар және инвазиялар: жиі емес – зеңдік асқын инфекциялар. Қан түзу және лимфа жүйесі тарапынан: жиі емес – эозинофилия; сирек – лейкопения, анемия, нейтропения, лейкоцитоз, тромбоцитопения, тромбоцитемия; өте сирек – гемолиздік анемия, агранулоцитоз, панцитопения (өмірге қауіпті), сүйек кемігі функциясының бәсеңдеуі (өмірге қауіпті). Иммундық жүйе тарапынан: сирек – аллергиялық реакциялар, аллергиялық/ангионевроздық ісіну; өте сирек – анафилаксиялық реакциялар, анафилаксиялық шок (өмірге қауіпті), сарысу құю ауруы тәрізді реакциялар. Эндокриндік жүйе тарапынан: жиілігі белгісіз – антидиурездік гормон секрециясының бұзылу синдромы (АДГСБС). Метаболизм және тамақтану тарапынан: жиі емес – тәбеттің төмендеуі; сирек – гипергликемия, гипогликемия; жиілігі белгісіз – гипогликемиялық кома. Психикалық бұзылыстар*: жиі емес – психомоторлық қозғыштық/ үрейлену; сирек – сананың шатасуы және бағдарсыздық, үрейлену, патологиялық түстер көру, депрессия (суицидтік идеялар/ойлар немесе өзін-өзі өлтіруге әрекеттену/өлтіру мүмкіндігімен), елестеулер; өте сирек – психоздық реакциялар (суицидтік идеялар/ойлар немесе өзін-өзі өлтіруге әрекеттену/өлтіру мүмкіндігімен); жиілігі белгісіз – мания, гипомания. Жүйке жүйе тарапынан*: жиі емес – бас ауыруы, әлсіздік, бас айналуы, ұйқының бұзылуы, дәм сезудің бұзылуы; сирек – парестезиялар және дизестезиялар, гипестезиялар, тремор, құрысулар (эпилепсиялық статусты қоса), вертиго; өте сирек – бас сақинасы, қимыл үйлесімінің бұзылуы, жүрістің бұзылуы, иіс сезудің бұзылуы, бассүйекішілік гипертензия және мидың жалған ісіктері; жиілігі белгісіз – шеткері нейропатия және полинейропатия. Көру ағзалары тарапынан*: сирек – көру қабілетінің бұзылуы (мысалы, диплопия); өте сирек – түстерді қабылдаудың бұзылуы. Есту мүшесі және лабиринт тарапынан*: сирек – құлақтың шыңылдауы, естімей қалу/естудің бұзылуы. Жүрек тарапынан**: сирек – тахикардия; жиілігі белгісіз – қарыншалық аритмия, пируэтті тахикардия (көбінесе QT аралығы ұзаруының қауіп факторлары бар пациенттерде анықталған), QT аралығының ұзаруы. Тамырлар тарапынан**: сирек – вазодилатация, артериялық гипотензия, синкопа жағдайы; өте сирек – васкулит. Тыныс алу ағзалары тарапынан, торакальді және медиастинальді бұзылыстар: сирек – диспноэ (демікпе жағдайын қоса). Асқазан-ішек жолы тарапынан: жиі – жүрек айну, диарея; жиі емес – құсу, асқазан және ішек аймағының ауыруы, абдоминальді ауыру, диспепсиялық бұзылыстар, метеоризм; сирек – антибиотикпен астасқан диарея, жалған жарғақшалы колитті қоса (өте сирек – өліммен аяқталатын); өте сирек – панкреатит. Гепатобилиарлық жүйе тарапынан: жиі емес – қан плазмасында трансаминаза және билирубин деңгейлерінің жоғарылауы; сирек – бауыр функциясының бұзылуы, холестаздық сарғаю, гепатит; өте сирек – бауыр некрозы (өте сирек жағдайларда өмірге қауіп төндіретін бауыр жеткіліксіздігіне дейін үдейтін). Тері жабындары және тері асты шелмайы тарапынан: жиі емес – бөртпе, қышыну, есекжем; сирек – фотосенсибилизация реакциялары; өте сирек – петехиялар, мультиформалы эритема, түйінді эритема, Стивенс-Джонсон синдромы (өмірге қауіп төндіруі ықтимал), уытты эпидермалық некролиз (өмірге қауіп төндіруі ықтимал); жиілігі белгісіз – жедел жайылған экзематоздық пустулез (ЖЖЭП), эозинофилиямен және жүйелі көріністер арқылы дәрі-дәрмектік реакция (DRESS-синдром). Тірек-қимыл аппараты және дәнекер тіндер тарапынан *: жиі емес – қаңқа-бұлшықет ауыруы (мысалы, қол-аяқтың, бел бөлігінің, кеуде қуысының ауыруы), артралгиялар; сирек – миалгиялар, артрит, бұлшықет тонусының жоғарылауы және бұлшықеттердің құрысуы; өте сирек – бұлшықет әлсіздігі, тендинит, сіңірлердің үзілуі (көбінесе ахилл), миастения гравис симптомдарының өршуі. Бүйрек және несеп шығару жүйесі тарапынан: жиі емес – бүйрек функциясының бұзылуы; сирек – бүйрек жеткіліксіздігі, гематурия, кристаллурия. Жалпы жай-күйдің бұзылыстары және енгізген жердегі реакциялар*: жиі емес – астения, қызба; сирек – ісінулер, қатты тершеңдік (гипергидроз). Зертханалық көрсеткіштер: жиі емес – қандағы сілтілік фосфатаза белсенділігінің жоғарылауы; сирек – амилаза белсенділігінің жоғарылауы; жиілігі белгісіз – халықаралық қалыптастырылған қатынас (ХҚҚ) деңгейінің жоғарылауы (К дәрумені антагонистерімен ем қабылдайтын пациенттерде). * Өте сирек жағдайларда, хинолондар мен фторхинолондарды қабылдайтын пациенттерде қауіп факторларының болуына қарамастан, организмнің әртүрлі жүйелері мен сезім мүшелеріне әсер ететін ұзаққа созылған (бірнеше айлар немесе жылдар бойы), мүгедектікке әкелетін және қайтымсыз болуы ықтимал күрделі жағымсыз реакциялар (соның ішінде тендинит, сіңірдің үзілуі, артралгия, аяқ-қолдың ауыруы, жүрістің бұзылуы, парестезиямен байланысты невропатиялар, депрессия, шаршау, есте сақтаудың бұзылуы, ұйқының бұзылуы, есту, көру, дәм және иіс сезудің бұзылуы) байқалды («Қолдану кезіндегі қажетті сақтандыру шаралары» бөлімін қараңыз). ** Фторхинолондарды қабылдайтын пациенттерде аорта аневризмасы және аортаның қатпарлану, кейде үзілумен асқынған (өлім жағдайларын қоса) және жүрек клапандарының кез келгенінің регургитация/жеткіліксіздік жағдайлары байқалды. Балаларға қолдану Балаларда артропатия ересектерге қарағанда жиірек байқалады («Қолдану кезіндегі қажетті сақтандыру шаралары» бөлімін қараңыз). Жағымсыз дәрілік реакциялар туындағанда медициналық қызметкерге, фармацевтикалық қызметкерге немесе, дәрілік препараттардың тиімсіздігі туралы хабарламаларды қоса, дәрілік препараттарға жағымсыз реакциялар (әсерлер) жөніндегі ақпараттық деректер базасына тікелей хабарласу керек Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

Симптомдары: бас айналу, тремор, бас ауыру, шаршау, құрысулар, елестеулер, сананың шатасуы, абдоминальді жайсыздану, бүйрек және бауыр жеткіліксіздігі, кристаллурия және гематурия. Пероральді қабылдау кезіндегі артық дозалану жағдайында бірнеше жағдайда бүйрек паренхимасына қайтымды уытты әсер етуі болды. 12 г ципрофлоксацин қабылдау салдарынан артық дозаланудың орташа уыттылық симптомдарына әкелгені хабарланды. 16 г дозасында жедел артық дозалану жедел бүйрек жеткіліксіздігінің дамуына әкелді. Емі: асқазанды шаю, құстыратын заттарды қолдану, көп мөлшерде сұйықтық енгізу, кристаллурияны болдырмау мақсатында несептің қышқылды реакциясын қалыптастыру. Сондай-ақ бүйрек функциясын қадағалау және құрамында ципрофлоксацин сіңірілуін төмендететін магний немесе кальций бар антацидтер қабылдау ұсынылады. Гемодиализ немесе перитонеальді диализ көмегімен ципрофлоксациннің аздаған мөлшері (<10%) ғана шығарылады.

Ципрофлоксацин, әсіресе, егде жастағы адамдарда, бүйрек аурулары бар пациенттерде; жүйелі кортикостероидтармен ем алатын пациенттерде; ағзалар трансплантациясынан кейінгі пациенттерде ерекше сақтықпен пайдаланылу керек. Осы науқастарда фторхинолондық және хинолондық антибиотиктермен емдеу нәтижесінде туындауы мүмкін сіңірлердің зақымдану қаупі жоғары. Ципрофлоксацин препараты пайдаланылмайды: • ауыр емес және бактерияға қарсы ем жүргізусіз өтуі мүмкін инфекцияларды (мысалы, ауыз-жұтқыншақ инфекциялары) емдеуде; • бактериялық емес инфекцияларды, мысалы, бактериялық емес (созылмалы) простатитті емдеуде; • саяхатшы диареясын немесе төменгі несеп жолдарының қайталамалы инфекцияларын (қуық шегінен тыс таралмайтын инфекциялар) болдырмау үшін; • орташа бактериялық инфекцияларды емдеу үшін, егер әдетте ұсынылатын бактерияға қарсы басқа дәрілерді пайдалану мүмкін болмағанда. Ауыр инфекциялар және/немесе грамоң және анаэробты бактериялар туғызған инфекциялар Ауыр инфекцияларды, стафилококктар немесе анаэробты бактериялар туғызған инфекцияларды емдеу үшін ципрофлоксацин тиісті бактерияға қарсы дәрілермен біріктірілімде қолданылу керек. Стрептококк инфекциялары (Streptococcus pneumoniae қоса) Ципрофлоксацин, Streptococcus pneumoniae тобының бактерияларына қатысты тиімділігінің жеткіліксіздігіне орай, пневмококк инфекцияларын емдеу үшін ұсынылмайды. Несеп жолының инфекциялары Орхоэпидидимит және кіші жамбас ағзаларының қабыну ауруларын фторхинолонға төзімді Neisseria gonorrhoeae туғызуы мүмкін. Ципрофлоксацинге төзімді Neisseria gonorrhoeae штаммдары жоққа шығарылатын клиникалық жағдайларды қоспағанда, ципрофлоксацин бактерияға қарсы басқа тиісті препараттармен бір мезгілде тағайындалу керек. Егер 3 күн өткен соң клиникалық жақсару басталмаса, емді қайта қарау керек. Операциядан кейінгі интраабдоминальді инфекцияларды емдеу кезіндегі ципрофлоксацин тиімділігі туралы деректер шектеулі. Кардиальді бұзылулар Ципрофлоксацин электрокардиограммада QT аралығының ұзаруымен астасады. Егде жастағы пациенттер препараттың QT аралығына әсер етуіне аса сезімтал болуы мүмкін. Ципрофлоксацин QT аралығының ұзаруын туындата алатын қатарлас препараттармен (мысалы, аритмияға қарсы Ia немесе III класс препараттары, трициклды антидепрессанттар, макролидтер, антипсихотиктер) және атап көрсетілген жай-күйлердің қауіп факторлары бар науқастарға (мысалы, анамнезде QT ұзаруы, түзетілмеген гипокалиемия) сақтықпен қолданылу керек. Препаратқа жоғары сезімталдық Кейбір жағдайларда аса жоғары сезімталдық пен аллергиялық реакцияларды ципрофлоксацинді бірінші қолданудан кейін-ақ байқауға болады, бұл туралы дереу дәрігерге хабарлау керек. Бірлі-жарым жағдайларда анафилаксиялық/анафилактоидтық реакциялар пациенттің өміріне қатерлі шок күйіне дейін үдеуі мүмкін. Кейбір жағдайларда олар ципрофлоксацинді бірінші қабылдағаннан кейін байқалады. Бұл жағдайларда ципрофлоксацин қабылдауды тоқтата тұру және дереу дәрі-дәрмекпен ем (анафилаксиялық шокты емдеу) жүргізу қажет. Асқазан-ішек жолы Емдеу кезінде немесе одан кейін ауыр және орныққан диарея туындаған жағдайда ол жөнінде дәрігерге хабарлау керек, өйткені бұл симптом дереу емдеуді талап ететін ауыр асқазан-ішек ауруын бүркемелеуі мүмкін (мысалы, жалған жарғақшалы колит, бұл өмірге қатер төндіруі, өліммен аяқталуға ұласуы мүмкін). Осындай жағдайларда ципрофлоксацин қабылдауды тоқтату және тиісті ем қолдануды бастау қажет. Перистальтиканы бәсеңдететін дәрілік заттар қарсы көрсетілімді. Бактерияға қарсы препараттардың бәрін дерлік пайдалану кезінде, оның ішінде ципрофлоксацин пайдаланылғанда ауырлығы бойынша жеңіл диареядан өлімге ұшырататын колитке дейін өзгеріп отыруы мүмкін Clostridium Difficile туғызған антибиотикпен астасқан диарея жағдайлары белгілі. Бактерияға қарсы препараттармен емдеу жуан ішектің қалыпты флорасының өзгеруін туындатады, өз кезегінде, бұл шектен тыс Clostridium Difficile көбеюіне әкеледі. Clostridium Difficile антибиотикпен астасқан диарея дамуына ықпал ететін А және В токсиндерін өндіреді. Clostridium Difficile көп мөлшерде токсин өндіреді, қоздырғыштың микробқа қарсы емге төзімді болып кетуі мүмкіндігінен, ауруға көп шалдығуды және өлімге ұшырауды және колэктомия жасау қажеттілігін туындатады. Антибиотиктер қолданудан кейін диареясы болатын пациенттердің бәрінде Clostridium Difficile туғызған антибиотикпен астасқан диареяның туындау мүмкіндігін есте ұстау қажет. Бактерияға қарсы препараттарды енгізуден кейін екі ай ішінде Clostridium Difficile туғызған антибиотикпен астасқан диареяның дамуы мүмкіндігінен, мұқият дәрі-дәрмектік анамнез жинау қажет. Егер Clostridium Difficile туғызған антибиотикпен астасқан диарея диагнозы қарастырылса немесе расталса, Clostridium Difficile әсер етпейтін антибиотиктер пайдалануды тоқтату қажет болуы мүмкін. Клиникалық деректерге байланысты, су-электролит теңгеріміне түзету жүргізіп, ақуыз препараттарын қосымша енгізу, Clostridium Difficile сезімтал болатын бактерияға қарсы препараттарды қолдану қажеттілігін қарастыру қажет. Хирургиялық араласу қажеттілігі де туындауы мүмкін. Ципрофлоксацин қабылдау кезінде пациент өміріне қатер төндіретін бауыр некрозының және бауыр жеткіліксіздігінің даму жағдайлары хабарланды. Бауыр ауруының қандай да бір белгілері мен симптомдары білінген жағдайда (анорексия, сарғаю, күңгірт несеп, қышыну немесе алдыңғы құрсақ жақтауының ширығуы сияқты), емдеуді тоқтату керек. Сонымен қатар, трансаминазалар, сілтілі фосфатаза деңгейінің уақытша жоғарылауын, холестаздық сарғаюдың дамуын, әсіресе, осының алдында бауыр зақымдануы болған пациенттерде анықтауға болады. Қаңқа-бұлшықет жүйесі Жалпы, ципрофлоксацинді анамнезінде сіңір аурулары және хинолиндер қолданумен байланысты бұзылыстары бар пациенттерде қолдануға болмайды. Осыған қарамастан, сирек жағдайларда қоздырғыштың микробиологиялық зерттеуінен және пайда/қауіп арақатынасын бағалаудан кейін, атап айтқанда – микробиологиялық зерттеулер нәтижелері ципрофлоксациннің қолданылуын ақтап шыққанда, стандартты ем тиімсіз болған немесе бактериялық төзімділік жағдайында осы пациенттерде жекелеген ауыр инфекциялық үдерістерді емдеу үшін ципрофлоксацин тағайындауға болады. Ципрофлоксацин қолдану кезінде, емдеудің алғашқы 48 сағатында кейде екіжақты тендинит немесе сіңірлердің (әсіресе, ахилл сіңірінің) жарылуы туындауы мүмкін. Егде жастағы пациенттерде немесе кортикостероидтарды бір мезгілде қабылдайтын пациенттерде тендинопатия қаупі жоғары болуы мүмкін. Тендиниттің кез келген белгілері туындағанда (мысалы, ауырсынуы бар ісіну, қабыну) ципрофлоксацин қолдануды тоқтату керек. Зақымданған аяқ-қолдың тыныштығын қамтамасыз ету керек. Көрудің бұзылулары Егер көрудің бұлыңғырлануы немесе көз тарапынан басқа бұзылулар болса, офтальмолог кеңесіне жүгінген жөн. Жүйке жүйесі Эпилепсиямен науқастар және анамнезінде орталық жүйке жүйесі функциясының бұзылулары бар пациенттер (мысалы, құрысу шегінің төмендеуі, анамнездегі құрысулар, церебральді қан айналымы қарқынының азаюы, ми құрылымының өзгерістері немесе инсульт), егер күтілетін пайдасы болжамды қаупінен басым болса ғана, ципрофлоксацин қабылдауға болады, өйткені ондай науқастар орталық жүйке жүйесі тарапынан болуы мүмкін жағымсыз реакцияларға орай, қауіп тобына жатады. Кейбір жағдайларда орталық жүйке жүйесі тарапынан болатын жағымсыз реакциялар ципрофлоксацинді алғаш қабылдаудан кейін-ақ байқалады. Бірлі-жарым жағдайларда депрессия немесе психоз пациенттің өміріне қатер төндіретін жай-күйге дейін үдеуі мүмкін. Ондай жағдайларда ципрофлоксацин қабылдауды тоқтату және дереу дәрігерге хабарлау қажет. Ципрофлоксацин қабылдаған пациенттерде полинейропатия жағдайлары хабарланды (бөлек немесе біріктірілімде тіркелген ауыру, ашыту, сенсорлық бұзылыстар немесе бұлшықет әлсіздігі сияқты неврологиялық симптомдар негізінде). Нейропатия симптомдары, атап айтқанда, ауыру, ашыту, шымылдатуды сезіну, ұйып қалу және/немесе әлсіздік болатын пациенттер, қайтымсыз жай-күйлердің дамуынан сақтану мақсатында, ципрофлоксацин қолдануды тоқтату керек. Тері және тері асты шелі Ципрофлоксациннің фотосезімталдық реакцияларының туындауына түрткі болатыны дәлелденді, сондықтан ципрофлоксацин қабылдайтын пациенттер қатты түсетін күн сәулесінен немесе ультракүлгінді сәулеленуден сақтануы тиіс. Фотосезімталдық реакциялары туындағанда (сол сияқты күнге күйіп қалғанда) ципрофлоксацинмен емді тоқтату керек. Р450 цитохромы Ципрофлоксациннің Р450 цитохромы 1А2 ферменттерінің орташа әсер ететін тежегіші екені белгілі. Ципрофлоксацин мен осыған ұқсас ферменттік жолмен метаболизденетін препараттарды (теофиллин, метилксантин, кофеин, дулоксетин, клозапин сияқты) бір мезгілде қолданғанда сақ болу керек. Қан сарысуындағы осы препараттар концентрацияларының жоғарылауы олардың ципрофлоксацинмен метаболизмдік клиренсінің бәсеңдеуімен байланысты, бұл спецификалық жағымсыз әсерлер туғызуы мүмкін. Зертханалық талдаулар нәтижелеріне әсері Ципрофлоксацин микобактериялар өсіріндісінің өсуін бәсеңдету жолымен Mycobacterium spp. себу нәтижелеріне in vitro ықпал ете алады, бұл ципрофлоксацин қабылдайтын пациенттерден алынған себуді талдаудың жалған теріс нәтижелеріне әкелуі мүмкін. Ципрофлоксацин грамоң немесе анаэробты бактериялар туғызған ауыр инфекцияларды емдеу үшін монотерапия ретінде қолданылмайды. Саяхатшы диареясы Ципрофлоксацинді таңдау кезінде пациент сапарлап барған елдердегі ципрофлоксацинге қоздырғыштардың төзімділігі туралы ақпаратты есепке алу керек. Сүйек пен буын инфекциялары Микробиологиялық зерттеу нәтижелеріне қарай, ципрофлоксацинді микробқа қарсы басқа дәрілермен біріктірілімде қолдану керек. Сібір ойық жарасының өкпелік түрі Дәрігер сібір ойық жарасын емдеудің ұлттық және/немесе халықаралық хаттамаларына сәйкес әрекет етуі тиіс. Ципрофлоксацин гравис миастениясы бар пациенттерде абайлап қолданылады. Ципрофлоксацин мен метотрексатты бір мезгілде тағайындау ұсынылмайды. Несеп жолының асқынған инфекциялары және пиелонефрит Басқаша емдеу мүмкін болмағанда, ципрофлоксацин қолданумен несеп жолы инфекцияларын емдеу мүмкіндігін қарастыру керек. Емдеу микробиологиялық зерттеу нәтижелеріне негізделуі тиіс. Бүйрек және несеп шығару жүйесі Ципрофлоксацин қолдануға байланысты кристаллурия туралы хабарланды. Ципрофлоксацин қабылдап жүрген пациенттер жеткілікті мөлшерде сұйықтық ішуі тиіс. Несептің шектен тыс сілтіленуінен сақтану керек. Басқа спецификалық ауыр инфекциялар Басқаша емдеуді қолдануға болмағанда немесе жалпыға ортақ емдеу тиімсіз болып шыққанда, ресми ұсынымдарға сәйкес немесе пайда/қауіп арақатынасын мұқият бағалаудан кейін басқа ауыр инфекциялар кезінде микробиологиялық зерттеу нәтижелері бойынша ципрофлоксацин қолдануды ақтап алуға болады. Жоғарыда аталғандарынан басқа, спецификалық ауыр инфекциялар жағдайында ципрофлоксацин қолдану клиникалық зерттеулер барысында бағаланбады, ал клиникалық тәжірибе шектеулі. Сонымен, осындай инфекциялары бар пациенттерді емдеуде сақтық шарасын қадағалауға ұсынылады. Төзімділік Ципрофлоксацинмен емдеу курсы кезінде немесе одан кейін клиникалық анықталған асқын инфекциямен немесе онсыз төзімді бактериялар бөлінуі мүмкін. Ұзақ емдеу курстары кезінде және ауруханаішілік инфекцияларды және/немесе Staphylococcus және Pseudomonas түрлері туғызған инфекцияларды емдегенде ципрофлоксацинге төзімді бактериялардың белгілі бір бөліну қаупі болуы мүмкін. Аневризма және қолқаның қатпарлануы, регургитациясы/жүрек қақпақшаларының жеткіліксіздігі Фторхинолондар қолданудан кейін, әсіресе, егде жастағы пациенттерде аневризманың және қолқа қатпарлануының, сондай-ақ аорталық және митралдық қақпақша регургитациясының жоғары даму қаупі хабарланды. Фторхинолондарды қабылдау кезінде кейде пациенттерде аневризма және қолқа қатпарлануының ажырап асқынуы (оның ішінде өліммен аяқталуы бар), сондай-ақ жүрек қақпақшаларының кез келгенінің регургитациясының/жеткіліксіздігінің жағдайлары тіркелген. Демек, фторхинолондарды пайда мен қауіп арақатынасын мұқият бағалағаннан кейін және аневризмаға немесе жүрек қақпақшаларының туа біткен ақауына қатысты ауыр отбасылық анамнезі бар пациенттерде, аневризма және/немесе аорта қатпарлануы не анамнезінде жүрек қақпақшаларының жеткіліксіздігі бар пациенттерде, сондай-ақ басқа да қауіп факторлары немесе соған бейімдейтін жай-күйлері болған кезде басқа да емдік мүмкіндіктерді қарастырғаннан кейін ғана пайдалану керек: •екі жағдайда да аневризмада және аортаның қатпарлануында, сондай-ақ жүрек қақпақшаларының регургитациясында/жеткіліксіздігінде (мысалы, Марфан синдромы немесе Элерс-Данлос синдромы, Тернер синдромы, Бехчет ауруы, гипертензия, ревматоидты артрит сияқты дәнекер тіндер тарапынан бұзылулар), сондай-ақ •аневризмада және аортаның қатпарлануында (мысалы, Такаясу артерииті немесе алып жасушалы артериит немесе белгілі атеросклероз немесе Шегрен синдромы сияқты қан тамырлары аурулары), сондай-ақ •жүрек қақпақшасының регургитациясы/жеткіліксіздігі кезінде (мысалы, инфекциялық эндокардит). Жүйелі кортикостероидтармен бір мезгілде ем қабылдайтын пациенттерде аневризма және аортаның қатпарлануы, сондай-ақ жыртылу қаупі артуы мүмкін. Іштің, кеуденің немесе арқаның кенеттен ауыруы білінген жағдайда пациенттер шұғыл көмек бөлімшесіндегі дәрігерге дереу қаралу керек. Пациенттерге жедел ентігу, алғаш рет жүрек соғысы жиілеуі пайда болған, сондай-ақ құрсақ қуысының немесе аяқтың ісінуі дамыған жағдайда дереу медициналық көмекке жүгіну ұсынылады. Гипогликемия Барлық хинолондар жағдайындағы сияқты, әдетте, пероральді гипогликемиялық дәрімен (мысалы, глибенкламидпен) немесе инсулинмен қатарлас ем алып жүрген диабеті бар пациенттерде, гипогликемия мен гипергликемияны қоса, қандағы глюкоза деңгейінің бұзылулары хабарланды. Гипогликемиялық кома жағдайлары туралы ақпарат тіркелмеген. Диабеті бар науқастарда қандағы глюкоза деңгейіне мониторинг ұсынылады. Арнайы сақтандырулар Келесі жай-күйлерде сақтықпен қолдану керек: Ми тамырларының айқын атеросклерозы, ми қан айналымының бұзылуы, психикалық аурулар (депрессия, психоз), эпилепсия, мидың органикалық зақымданулары немесе инсульт, құрысу дайындығы шегінің төмендеуі (немесе анамнездегі құрысу ұстамалары), бүйректің және/немесе бауырдың айқын жеткіліксіздігі, егде жас, хинолондармен бұрын жүргізілген емдеу кезінде сіңірлердің зақымдануы, QT аралығының ұзару немесе «пируэт» типті аритмияның даму қаупінің артуы (мысалы, QT аралығының туа біткен ұзару синдромы, жүрек аурулары (жүрек жеткіліксіздігі, миокард инфарктісі, брадикардия), электролит теңгерімсіздігі (мысалы, гипокалиемия, гипомагниемия кезінде), QT аралығын ұзартатын дәрілік препараттарды (оның ішінде аритмияға қарсы IA және III класс, трициклды антидепрессанттар, макролидтер, нейролептиктер) бір мезгілде қолдану, CYP450 цитохромы 1A2 изоферменттерінің тежегіштерімен (оның ішінде теофиллин, метилксантин, кофеин, дулоксетин, клозапин, ропинирол, оланзапин) бір мезгілде қолдану, gravis миастениясы, глюкоза-6-фосфатдегидрогеназа тапшылығы. Педиатрияда қолдану Муковисцидоз бар балаларда (5-17 жас аралығындағы) Pseudomonas aeruginosa туғызған өкпе асқынуларын емдеуден, E. coli туғызған несеп шығару жолдарының асқынған инфекцияларын және пиелонефрит(1-17 жас аралығындағы) пен жанасудан кейінгі сібір ойық жарасын емдеуден тыс, басқа көрсетілімдер бойынша ципрофлоксацин қолдану зерттелмеді. Балаларға басқа көрсетілімдер бойынша ципрофлоксацин қолданудың клиникалық тәжірибесі шектеулі. Буындар және/немесе жуық орналасқан тіндер тарапынан жағымсыз әсерлердің даму ықтималдығына орай, «қауіп-пайда» арақатынасын мұқият бағалаудан кейін ғана ципрофлоксацинмен емдеуді тағайындауға болады. Балалар мен жасөспірімдерге ципрофлоксацин қолдануды ресми нұсқауларға сәйкес жүргізген жөн. Кистозды фиброзбен және/немесе ауыр инфекциялармен науқас балалар мен жасөспірімдерге ем жүргізу тәжірибесі бар дәрігер ғана ципрофлоксацин қолданумен емдеу жүргізуі тиіс. Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері Препарат тіпті қатаң түрде дәрігер нұсқаулары бойынша қабылданса да, ол автокөлікті немесе басқа механизмдерді басқаруға кедергі келтіруі мүмкін реакция шапшаңдығына әсер ете алады. Бұл, әсіресе, препаратты алкогольмен қатар қабылдау кезінде сипатты.

Ципрофлоксацинді пациенттердің осы санатында қолдану тәжірибесінің жоқ екенін ескеріп, оны жүкті және бала емізетін әйелдерге қолдануға болмайды. Сынақтар деректеріне сүйеніп, тератогенді әсерлерінің (мальформациялар) мүмкіндігі расталмаса да, жаңа туған нәрестелердегі буын шеміршектерінің зақымдану ықтималдығын толық жоққа шығаруға болмайды. Ципрофлоксацин емшек сүтіне өтеді. Жаңа туған нәрестелердің буын шеміршектерінің зақымдану ықтималдығының қаупіне байланысты ципрофлоксацинді бала емізу кезінде қолдануға болмайды.

Басқа дәрілердің ципрофлоксацинге әсері: QT аралығын ұзартатын дәрілік заттар Ципрофлоксацинді, басқа да фторхинолондар сияқты, QT аралығын ұзартатын препараттарды (мысалы, аритмияға қарсы IA және III кластағы дәрілер, трициклдық антидепрессанттар, макролидтер, антипсихотиктер) қабылдап жүрген пациенттерге сақтықпен тағайындау керек («Қолдану кезіндегі қажетті сақтандыру шаралары» бөлімін қараңыз). Хелатты кешен түзілуі Ципрофлоксацин (пероральді) мен құрамында көп валентті катиондар бар дәрілік заттарды, минералды қоспаларды (мысалы, кальций, магний, алюминий, темір), фосфат байланыстыратын полимерлерді (мысалы, севеламер, лантан карбонаты), сукральфаттар немесе антацидтерді, сондай-ақ құрамында магний, алюминий немесе кальций бар буферлік сыйымдылығы үлкен препараттармен (мысалы, диданозин таблеткалары) бір мезгілде қолданғанда ципрофлоксацин сіңірілуі төмендейді. Осыған орай, ципрофлоксацинді осы препараттарды қабылдауға дейін 1-2 сағат бұрын немесе қабылдаудан кейін 4 сағаттан соң қабылдау керек. Осы шектеу Н2-рецепторлар блокаторларының класына жататын антацидтерге қатысты емес. Тағам, оның ішінде сүт өнімдері Тамақ өнімдерінің құрамындағы кальций ципрофлоксациннің (пероральді) сіңірілуіне елеусіз әсер етеді. Сондықтан ципрофлоксацин таблеткаларын құрамында сүт өнімдері немесе минералдармен байытылған сусындар бар тамақ ішу кезінде қабылдауға болады. Алайда, ципрофлоксацин таблеткаларын сүт өнімдерімен немесе минералдармен байытылған сусындармен (мысалы, сүт, йогурт, кальциймен байытылған апельсин шырыны) бір мезгілде қолдану, егер бұл өнімдерді немесе сусындарды тамақтан бөлек, жеке өздерін қабылдаса, ципрофлоксациннің сіңуін төмендетуі мүмкін. Сондықтан тамақтан бөлек, жеке өздері қабылданатын сүт өнімдерін немесе минералдармен байытылған сусындарды ципрофлоксацин таблеткаларымен бір мезгілде қабылдаудан аулақ болу керек, ал ципрофлоксацин таблеткаларын сүт өнімдерін немесе минералдармен байытылған сусындарды қабылдаудан, егер бұл өнімдер немесе сусындар тамақтан бөлек, жеке өздері қабылданса, құрамында кальций бар препараттарға арналған ұсыныстарға сәйкес 1-2 сағат бұрын немесе кем дегенде 4 сағаттан кейін қабылдау керек («Дозалау режимі» бөлімін қараңыз). Сондай-ақ, жоғарыдағы «Хелатты кешеннің қалыптасуы» бөлімін қараңыз. Пробенецид Пробенецид ципрофлоксациннің бүйректік секрециясына ықпал етеді. Құрамында пробенецид және ципрофлоксацин бар дәрілік заттарды бір мезгілде қолдану қан сарысуында ципрофлоксацин концентрациясының жоғарылауына әкеледі. Метоклопрамид Метоклопрамид ципрофлоксациннің сіңуін жеделдетеді (пероральді қабылдау кезінде), соның нәтижесінде қан плазмасындағы ең жоғары концентрациясына жетуі жылдамырақ жүреді. Ципрофлоксациннің биожетімділігіне әсері байқалған жоқ. Омепразол Ципрофлоксацинді және құрамында омепразол бар препараттарды бір мезгілде қолдану ципрофлоксациннің Сmax және AUC болымсыз төмендеуіне әкеледі. Ципрофлоксациннің басқа дәрілік заттарға әсері: Тизанидин Тизанидинді ципрофлоксацинмен бір мезгілде тағайындауға болмайды («Қолдануға болмайтын жағдайлар» бөлімін қараңыз). Дені сау еріктілерде жүргізілген клиникалық зерттеуде ципрофлоксацинмен бірге қолданған кезде қан плазмасындағы тизанидин концентрациясының жоғарылауы байқалды (Cmax 7 есе жоғарылауы, диапазон – 4-21 есе; AUC көрсеткішінің 10 есе жоғарылауы, диапазон – 6-24 есе). Қан плазмасындағы тизанидин концентрациясының жоғарылауымен гипотензиялық және седативті жанама әсерлердің байланысы бар. Метотрексат Ципрофлоксацин бір мезгілде тағайындалғанда метотрексаттың тубулярлы тасымалы (бүйрек метаболизмі) баяулауы ықтимал, бұл қан плазмасындағы метотрексат концентрациясының жоғарылауына әкелуі мүмкін. Бұл ретте метотрексаттан туындаған жағымсыз уытты реакциялардың пайда болу ықтималдығы артуы мүмкін. Бір мезгілде тағайындау ұсынылмайды («Қолдану кезіндегі қажетті сақтандыру шаралары» бөлімін қараңыз). Теофuллин Ципрофлоксацин мен құрамында теофиллин бар дәрілік заттарды бір мезгілде қолдану қан плазмасында теофиллин концентрациясының қолайсыз жоғарылауына әкелуі мүмкін, бұл жағымсыз реакциялардың дамуын туындатуы мүмкін. Сирек жағдайларда жағымсыз реакциялар өмірге қатер төндіруі немесе өліммен аяқталуы мүмкін. Егер осы препараттарды бір мезгілде қолданбау мүмкіндігі болмаса, қан сарысуындағы теофиллин концентрациясын бақылап отыру және оның дозасын талапқа сай азайту керек («Қолдану кезіндегі қажетті сақтандыру шаралары» бөлімін қараңыз). Ксантиннің басқа туындылары Ципрофлоксацин мен құрамында кофеин немесе пентоксифиллин (окспентифиллин) бар дәрілерді бір мезгілде қолданудан кейін қан сарысуындағы осы ксантиндер концентрацияларының жоғарылауы хабарланды. Фенитоин Ципрофлоксацин мен фенитоинді бір мезгілде тағайындау фенитоиннің сарысулық концентрацияларының жоғарылауына немесе төмендеуіне әкелуі мүмкін, сондықтан препараттардың деңгейлеріне мониторинг жасау ұсынылады. Циклоспорин Ципрофлоксацин мен циклоспорин бір мезгілде қолданылғанда сарысулық креатинин концентрациясының транзиторлы жоғарылауы байқалды. Сондықтан, осындай пациенттерге сарысулық креатинин концентрациясы көрсеткішін жүйелі (аптасына екі рет) бақылау қажет. К дәруменінің антагонистері Ципрофлоксацин мен К дәруменінің антагонисін бір мезгілде қолданғанда соңғысының антикоагулянттық әсері күшеюі мүмкін. Қауіп дәрежесі инфекцияның негізгі түріне, науқастың жасына, жалпы жай-күйіне қарай өзгеріп отыруы мүмкін, сондықтан ципрофлоксациннің халықаралық қалыптасқан қатынас (ХҚҚ) мәндерінің артуына әсерін нақты бағалау қиын. Ципрофлоксацин мен К дәруменінің антагонисін (варфарин, аценокумарол, фенпрокумон немесе флуиндион) бір мезгілде енгізу кезінде және одан кейін бірден жүйелі ХҚҚ бақылауын жүргізген жөн. Дулоксетин Клиникалық зерттеулерде дулоксетинді флувоксамин сияқты CYP450 1A2 изоферментінің күшті тежегіштерімен бір мезгілде қолдану дулоксетиннің AUC ұлғаюына және Cmax жоғарылауына әкелуі мүмкін екені көрсетілді. Ципрофлоксацинмен ықтимал өзара әрекеттесулері туралы клиникалық деректердің болмауына қарамастан, аталған препараттарды бір мезгілде қолданғанда ұқсас әсерлерді күтуге болады («Қолдану кезіндегі қажетті сақтандыру шаралары» бөлімін қараңыз). Ропинирол Клиникалық зерттеуде ропиниролды CYP450 1A2 изоферментінің орташа тежегіші ципрофлоксацинмен бір мезгілде қолдану ропиниролдың сәйкесінше 60 % және 84 % AUC ұлғаюына және Cmax жоғарылауына әкелетіні көрсетілді. Ципрофлоксацинмен бірге енгізу кезінде және одан кейін бірден ропинирол жағымсыз әсерлеріне мониторинг жасау және дозасын тиісінше түзету ұсынылады («Қолдану кезіндегі қажетті сақтандыру шаралары» бөлімін қараңыз). Лидокаин Ципрофлоксацинді, CYP450 1A2 изоферментінің орташа тежегішін және құрамында лидокаин бар дәрілік заттарды бір мезгілде қолдану вена ішіне енгізілген лидокаин клиренсін 22 %-ға төмендететіні хабарланды. Лидокаин жағымдылығы жақсы болса да, оны ципрофлоксацинмен бір мезгілде қолданудан кейін жағымсыз реакциялармен қатар жүруі мүмкін белгілі бір өзара әрекеттесуін байқауға болады. Клозапин 250 мг ципрофлоксацинді клозапинмен бірге 7 күн бойы бір мезгілде қолданудан кейін клозапин мен N-десметилклозапиннің сарысулық концентрациялары сәйкесінше 29 %-ға және 31 %-ға жоғарылады. Клиникалық бақылауды және клозапиннің дозасын тиісінше түзетуді ципрофлоксацинмен бір мезгілде қолдану кезінде және одан кейін дереу жүзеге асыру ұсынылады («Қолдану кезіндегі қажетті сақтандыру шаралары» бөлімін қараңыз). Силденафил Дені сау еріктілерде 500 мг дозадағы ципрофлоксацин мен 50 мг дозадағы силденафилді бір мезгілде қолданғанда силденафилдің Сmax және AUС 2 есе артқаны байқалды. Сондықтан ципрофлоксацинді силденафилмен бір мезгілде тағайындағанда сақтық таныту және қауіп/пайда арақатынасын ескеру керек. Агомелатин Клиникалық зерттеулерде CYP450 1A2 изофензимінің күшті тежегіші флувоксамин агомелатиннің метаболизмін орташа бәсеңдететіні анықталды, бұл агомелатиннің әсерінің 60 есеге артуына әкеледі. CYP450 1A2 изоферментінің орташа тежегіші ципрофлоксацинмен ықтимал өзара әрекеттесулері туралы қолжетімді клиникалық деректер жоқ болса да, оны бір мезгілде қолданған кезде ұқсас әсерлерді күтуге болады («Қолдану кезіндегі қажетті сақтандыру шаралары» бөлімін қараңыз). Золпидем Ципрофлоксацин мен золпидемді бір мезгілде қолдану золпидемнің қандағы деңгейін жоғарылатуы мүмкін. Сондықтан бір мезгілде қолдану ұсынылмайды.

Сақтау мерзімі 3 жыл. Жарамдылық мерзімі өткеннен кейін қолдануға болмайды! Сақтау шарттары Түпнұсқалық қаптамасында, 25ºС-ден аспайтын температурада сақтау керек. Балалардың қолы жетпейтін жерде сақтау керек!