Цисплатин - Келун-Казфарм концентрат 20 мг/20 мл

1 мл препараттың құрамында белсенді зат - цисплатин 1.0 мг қосымша заттар: натрий хлориді 9.0 мг, инъекцияға арналған су 1.0 мл дейін Сыртқы түрінің, иісінің, дәмінің сипаттамасы Түссіз немесе бозғылт-сары түсті сұйықтық

Цисплатин монотерапия түрінде де, біріктірілген химиялық ем құрамында да қолданылады: Аталық бездердің метастазданатын ісіктері Тиісті хирургиялық және/немесе химиялық емнен өткізілген аталық бездердің метастазданатын ісіктері бар науқастарды емдеуде тиімді ісікке қарсы басқа препараттармен бірге белгіленген кешенді емде. Аналық бездердің метастазданатын ісіктері Тиісті хирургиялық және /немесе химиялық емнен өткізілген аналық бездердің метастазданатын ісіктері бар науқастарды емдеуде тиімді ісікке қарсы басқа препараттармен бірге белгіленген кешенді емде. Кешенді емде цисплатин циклофосфамидпен қолданылады. Монопрепарат ретінде қолданылатын цисплатин стандартты химиялық емге төзімді және бұрын цисплатин қабылдамаған аналық бездердің метастазданатын қатерлі ісіктері бар пациенттерге екіншілік емде тағайындалады. Қуықтың үдемелі ісіктері Цисплатин жергілікті хирургиялық емге берілмейтін қуықтың ауыспалы жасушалық ісігі бар пациенттерге монотерапия және химиялық ем түрінде тағайындалады.

ATХ коды L01XA01 Әсер ету механизмі Цисплатин құрамында ауыр металл платина болатын ісікке қарсы препарат түрінде болады. Цисплатин ДНҚ-да тізбекаралық және тізбекішілік кіріктірілген бифункционалдық алкилдеуші агенттер қасиеттеріне ұқсас қасиеттерге ие болады, сол арқылы оның функциясын бұзып, жасушалардың қырылуына әкеледі. Фармакодинамикалық әсерлері Препараттың циклді және фазалық спецификалық сипаты жоқ. Иммуносупрессиялық қасиеттері бар.

Цисплатинді асқынып кеткен немесе метастазданатын ісіктерде монотерапия ретінде де, химиялық емнің құрамдас бөлігі ретінде де қолдануға болады. Цисплатин инфузия үшін ерітінді дайындауға арналған концентратын пайдаланар алдында сұйылту қажет. Сұйылтылған ерітіндіні тек вена ішіне инфузия арқылы енгізу қажет. Енгізу кезінде құрамында алюминий бар цисплатинмен жанасатын кез келген затпен (вена ішіне инфузияға арналған жинақтар, инелер, катетерлер, шприцтер) жанасудан аулақ болу қажет. Дозалау режимі Балаларда және ересектерде Цисплатин монотерапия ретінде және басқа химиялық препараттармен біріктіріліп, әдетте, 3-4 апта сайын вена ішіне инфузия түрінде 50-120 мг/м² немесе 3- 4 апта сайын 5 күн бойы күнделікті тамшылатып вена ішіне 15-20 мг/м² дозада енгізіледі. Цисплатиннің дозасы бастапқы ауруға, күтілетін реакцияға және цисплатинді монотерапия немесе біріктірілген химиотерапияның компоненті ретінде пайдалануға байланысты. Біріктірілген химиотерапияда цисплатинді пайдаланған кезде оның дозасын төмендету қажет. Әдеттегі доза 3-4 апта сайын 20 мг/м2 немесе одан көп доза болып табылады. Бүйрек функциясы бұзылған немесе сүйек кемігі депрессиясы бар пациенттерге препараттың дозасын адекватты түрде төмендету қажет. Енгізу жолы және тәсілі Инфузия үшін ерітінді дайындау асептикалық жағдайларда атқарылуы тиіс. Концентратты ерітуге төмендегі ерітінділердің бірі пайдаланылуы тиіс: 0.9% натрий хлориді ерітіндісі; 0.9% натрий хлориді ерітіндісі мен 5% глюкоза ерітіндісінің қоспасы (1:1) (түпкілікті концентрациялары: 0.45% натрий хлориді ерітіндісі, 2.5% глюкоза). Егер цисплатинмен емдеу шарасының алдында пациент едәуір мөлшерде су ішпеген болса, концентратты 0.9% натрий хлориді ерітіндісі мен 5% маннитол ерітіндісінің қоспасымен (1:1) сұйылтуға болады (түпкілікті концентрациялары: 0.45% натрий хлориді ерітіндісі, 2.5% маннитол). Инфузияға арналған цисплатин ерітіндісін дайындау: 0.5 мг/мл/1 мг/мл цисплатин концентратының қажетті мөлшерін (доза) жоғарыда аталған ерітінділердің 1-2 литрінде сұйылту қажет. Препараттың сұйылтылған ерітінділері жарықтан қорғалған жерде 25°С-ден аспайтын температурада 6-8 сағат бойы тұрақты. Сұйылтылған ерітіндіні тек вена ішіне инфузия арқылы енгізу қажет. Көрінетін бөлшектерден бос мөлдір түссіз ерітінділерді ғана және тек бір рет пайдалануға болады. Цисплатин-КелунКазфарм 1 мг/мин аспайтын жылдамдықпен вена ішіне тамшылатып енгізіледі. Нұсқаулыққа сәйкес дайындалған инъекцияға арналған цисплатин ерітіндісі 6-8 сағат бойы вена ішіне инфузия арқылы енгізілуі тиіс. Сұйықтықты талапқа сай қабылдауды қабылдау алдында 2-ден 12 сағатқа дейін және цисплатин енгізілгеннен кейін кемінде 6 сағат бойы демеу қажет. Сұйықтық жоғалтудың орнын толтыру цисплатинмен емдеу кезінде және одан кейін жеткілікті диурезді қолдау үшін қажет. Ол келесі ерітінділердің бірін вена ішіне инфузия арқылы жүзеге асырылады: 0.9 натрий хлориді ерітіндісі%; 0.9% натрий хлориді ерітіндісі мен 5% глюкоза ерітіндісінің қоспасы (1:1). Цисплатинмен емделу алдында сұйықтықты толықтыру: 6-дан 12 сағат бойына 100-ден 200 мл/сағатқа дейінгі жылдамдықпен 1 л дейін венаішілік инфузия. Цисплатин енгізуді тоқтатудан кейін жоғалтқан сұйықтықты толықтыру: 6-12 сағат бойы 100-ден 200 мл/сағатқа дейінгі жылдамдықпен 2 литрге дейінгі венаішілік инфузия. Егер сұйықтық жоғалтудың орнын толтырғаннан кейін несеп секрециясы 10-200 мл/сағаттан аз болса, жедел диурез қажет. Жеделдетілген диурезді 10% ерітінді түріндегі 37,5 г маннитолды (375 мл маннитол ерітіндісі 10%) вена ішіне енгізу арқылы немесе, егер бүйректің жұмыс істеуі қалыпты болса, диуретик қабылдау арқылы жүргізуге болады. Маннитолды немесе диуретикті енгізу, енгізілген цисплатиннің дозасы дене беткейінің 60 мг/м2-ден асқан кезде де қажет. Цисплатин инфузиясынан кейін 24 сағат ішінде пациент несептің жеткілікті секрециясын қамтамасыз ету үшін көп мөлшерде сұйықтық ішуі қажет. Ескерту: Алюминий цисплатинмен әрекеттесіп, оның белсенділігін жоятындықтан, сондай-ақ қара шөгінділердің түзілуін туындататындықтан, цисплатинді дайындау және енгізу кезінде құрамында алюминий бар инелер мен басқа жабдықты пайдаланбау өте маңызды. Утилизациялау жөніндегі нұсқаулар Цисплатин-Келун-Казфарм препаратымен жұмыс істеу кезінде сақ болу қажет. Препаратты асептикалық жағдайда арнайы бөлінген бөлмеде сұйылту керек. Бұлармен дайындалған қызметкерлер айналысуы керек. Басқа да потенциалды уытты препараттар сияқты, цисплатин ерітіндісімен жұмыс істегенде сақтық таныту керек. Препарат кездейсоқ теріге тиген кезде тері реакцияларының пайда болу қаупі бар. Цисплатин-Келун-Казфарм препараты ерітіндісінің теріге және шырышты қабыққа тиюіне жол бермеу үшін барлық шараларды қабылдау қажет, атап айтқанда қорғағыш киімдер (халат, қалпақ, маска, көзілдірік және бір реттік қолғаптар) кию қажет. Инфузия үшін ерітінді дайындауға арналған Цисплатин-Келун-Қазфарм концентратының есептелген мөлшері стерильді жағдайларда 9 мг/мл инфузияға арналған 1 л натрий хлориді ерітіндісіне қосылады. Ерітіндідегі хлорид-иондар цисплатин молекуласын тұрақтандырады. Алюминий цисплатиннің инфузиялық қоспасымен байланыста платинаның тұндырылуын қамтамасыз етеді. Цисплатин-Келун-Казфарм дайындау және енгізу кезінде құрамында алюминий бар жабдықты пайдалануға болмайды. Пациентке бермес бұрын ерітінділердің мөлдір және қоспасыз екеніне көз жеткізіңіз. Егер инфузия экстравазальді түрде жүргізілсе, оны дереу тоқтату керек. Дереу салқындатып, инфузия орнын 6-12 сағатқа қимылсыз және салқын күйде қалдырыңыз. Инфузия орнын мұқият тексеріңіз. Егер некроз белгілері пайда болса, оны күйік ретінде қарап, пластикалық хирургпен кеңесу керек. Цисплатин теріге немесе шырышты қабыққа тиген кезде көп мөлшерде суық сумен шайыңыз, содан кейін сабынды сумен жақсылап шайыңыз. Тұрақты жайсыздық болған жағдайда дәрігерге қаралу керек. Егер цисплатин көзге түссе, оны көп мөлшерде суық сумен жақсылап шайыңыз. Дереу офтальмологқа барыңыз. Препараттың қалдықтары, цисплатин ерітіндісін дайындау үшін пайдаланылған барлық құралдар мен материалдар цитостатикалық заттардың қалдықтарын жоюдың стандартты ережесіне сәйкес жойылуы тиіс. Дәріні кәрізге немесе тұрмыстық қалдықтарға тастауға болмайды. Кез келген пайдаланылмаған препарат немесе зат қалдықтары жергілікті талаптарға сәйкес жойылуы тиіс. Дәрілік препаратты қолдану тәсілін түсіндіру үшін медицина қызметкерінің кеңесіне жүгіну бойынша нұсқаулар Егер осы препаратты қолдану туралы қосымша сұрақтар туындаса, өзіңіздің емдеуші дәрігеріңізбен кеңесіңіз.

• циспластинге немесе басқа платина қосылыстарына немесе препараттың кез келген басқа ингредиентіне жоғары сезімталдық • есту бұзылысы • сүйек кемігі қан түзілуінің бәсеңдеуі • бүйрек функциясының айқын бұзылуы • дегидратация • құрысу профилактикасы мақсатында фенитоинді бір мезгілде қолдану • сары қызбаға қарсы вакцинамен бір мезгілде қолдану • цисплатиннен туындаған нейропатия • жүктілік, лактация кезеңі.

Өте жиі • тромбоцитопения, лейкопения, анемия, миелосупрессия. Цисплатинді жоғары дозада қолданғаннан кейін сүйек кемігі функциясының ауыр бәсеңдеуі мүмкін (агранулоцитоз және/немесе аплазиялық анемияны қоса) • гипонатриемия • нейроуыттылық • бүйрек функциясының бұзылуы • қызба Жиі • сепсис • гиперурикемия • отоуыттылық, құлақтың шыңылдауы • өзекшелік некроз • аритмия, брадикардия, тахикардия, терең веналар тромбозы, тромбоэмболия Жиі емес • жедел лейкоз (дозамен байланысты, бірақ жасына немесе жынысына байланысты емес) • анафилактоидты реакциялар (мысалы, терідегі бөртпе, есекжем, эритема, аллергиялық қышыну, беттің ісінуі, тыныс алу кезіндегі сырыл, бронх түйілуі, тахикардия, гипотензия) • гипертермия • вазопрессиннің гиперсекрециясы (SIADH/Шварц-Барттер синдромы) • гипомагниемия, гипокалемия, гипофосфатемия, гипокальциемия • нейроуытты синдромдар (тремор, бұлшықет әлсіздігі, вегетативті нейропатия, миелопатия, Лермитт симптомы, көру жүйкесінің невриті, құрысулар). • пайда болған дальтонизм, папилломатоз • таздану • сперматогенез және овуляция бұзылыстары, ауыр гинекомастия Сирек • гемолиздік анемия Кумбстың оң сынамасымен • тетания және / немесе ЭКГ өзгерістері • церебральді қан айналымының бұзылуы, сезінудің жоғалуы, дәм сезудің жоғалуы, церебральді артериит, энцефалопатия, ұйқы артериясының бітелуі, церебральді дисфункция (сананың шатасуы, анық сөйлемеу, есте сақтаудың төмендеуі, салдану), лейкоэнцефалопатия және қайтымды артқы лейкоцефалопатиялық синдром. • кортикальді соқырлық • миокард инфарктісі • стоматит, ауыз қуысының мукозиті • инъекция орнында жергілікті ісіну, ауырсыну және эритема, некроз және терінің жарасы және флебит Өте сирек • тромбоздық микроангиопатия (гемолиздік-уремиялық синдром) • көру өткірлігінің жоғалуымен бір жақты ретробульбарлы неврит • көрмей қалудың әртүрлі дәрежелері • жүректің тоқтауы • инъекция орнындағы экстравазациялар (целлюлит, фиброз және некрозды, ауырсынуды, ісінуді және эритеманы қоса, жергілікті жұмсақ тіндердің реакцияларына әкелетін) Жиілігі белгісіз - қолда бар деректер бойынша, пайда болу жиілігін анықтау мүмкін болмады. • инфекциялар (кейбір пациенттерде фатальді инфекциялық асқынулар) • нейтропения • қан амилазасы деңгейінің жоғарылауы, антидиуретикалық гормонның жеткіліксіз секреция синдромы • сусыздану • цереброваскулярлық инсульт, геморрагиялық инсульт, ишемиялық инсульт, агевзия, церебральді артериит • анық көрмеу, көру жүйкесінің ісінуі, торлы қабық пигментациясы • кереңдік, вестибулярлық уыттылық • тромболизистік микроангиопатия (гемолиздік-уремиялық синдром), церебральді артериит, Рейно синдромы, өкпе артериясының эмболиясы • өкпе эмболиясы • құсу, жүрек айнуы, анорексия, ықылық, диарея • бауыр ферменттері деңгейінің жоғарылауы, қандағы билирубин деңгейінің жоғарылауы • терідегі бөртпе • бұлшықет түйілуі, миалгия • жедел бүйрек жеткіліксіздігі, бүйрек жеткіліксіздігі (қандағы азот мочевинасы (АМК), креатинин, сарысудағы несеп қышқылы азотының көтерілуін және/немесе креатинин клиренсінің төмендеуін қоса), бүйрек шумақшалары тарапынан бұзылулар • азоспермия • астения, дімкәстік, инъекция орнындағы экстравазациялар (целлюлит, фиброз және некрозды, ауырсынуды, ісінуді және эритеманы қоса, жергілікті жұмсақ тіндердің реакцияларына әкелетін) Нефроуыттылық Дозаға тәуелді және жинақталған бүйрек жеткіліксіздігі, оған қоса жедел бүйрек жеткіліксіздігі цисплатиннің дозаны шектейтін бастапқы уыттылығы болып табылады және емдеу басталғаннан кейін 7-14 күннен соң пайда болады, бірақ қайтымды болуы мүмкін. Нефроуыттылық аминогликозидті антибиотиктермен күшеюі мүмкін. Мочевина, креатинин және несеп қышқылы деңгейінің жоғарылауынан, сондай-ақ креатинин клиренсінің төмендеуінен көрініс табатын нефроуыттылық препаратты қолдану үшін күрт шектеуші фактор болып табылады. Бұл нефроуыттылық қайта енгізгеннен кейін айқынырақ болуы мүмкін. Бүйрек функциясының көрсеткіштері қосымша дозаларды енгізер алдында қалыпқа келтірілуі керек. Адекватты гидратация бүйрек асқынуларының дәрежесі мен жиілігін төмендетеді. Клиникалық маңызды нефроуыттылық көбінесе 50 мг/м2-ден жоғары бір реттік дозаларды жылдам инфузиялау кезінде пайда болады. Бүйректің зақымдануы ауыр металдармен улануға, яғни түтікшелі дегенерациямен және интерстициялық ісінумен жүретін өзекшелік некрозға ұқсас. Цисплатинді венаішілік гидратациямен 6-8-сағаттық инфузия арқылы және маннитол енгізу нефроуыттылықты төмендету үшін қолданылады. Алайда, бұл процедуралар кезінде бүйректің уыттылығы сақталуы мүмкін. Бүйрек жеткіліксіздігі әдетте жеңіл және орташа дәрежеде өтеді және препараттың қалыпты дозасында қайтымды болады (қалпына келтіру әдетте 2-4 апта ішінде басталады). Цисплатиннің жоғары немесе қайталанатын дозалары бүйрек функциясы бұзылуының ауырлығы мен ұзақтығын арттыруы және тұрақты бүйрек жеткіліксіздігіне әкелуі мүмкін (кейбір жағдайларда өліммен аяқталады). Препаратты құрсақ ішіне енгізгеннен кейін бүйрек жеткіліксіздігі туралы да хабарланды. Гиперурикемия Несеп қышқылының максималды жоғарылауы осы дозаны қабылдағаннан кейін 3-5 күннен соң пайда болады және 50 мг/м2-ден жоғары дозалардан кейін айқынырақ болады. Аллопуринолмен емдеу несеп қышқылының деңгейін төмендетуде тиімді. Гематоуыттылық Сүйек кемігінің максималды бәсеңдеуі енгізілгеннен кейін 18-23 күннен соң басталады. Гематологиялық көрсеткіштер пациенттердің көпшілігінде шамамен 39-шы күні қалыпқа келеді (62 күннің 13-і). Сүйек кемігі функциясының бәсеңдеуі цисплатин қабылдаған пациенттерді инфекция мен пирексияға сезімтал етуі мүмкін. Инфекциялық асқынулар кейбір пациенттерде өлімге әкелді. Лейкопения және тромбоцитопения жоғары дозаларда айқынырақ (>50 мг/м2). Нейтропения және фебрильді нейтропения пайда болуы мүмкін. Сүйек кемігінің/гематологиялық уыттылықтың инфекциялық асқынулары қызба мен сепсисті қамтуы мүмкін. Цисплатин қабылдаған пациенттерде, көбінесе потенциалды лейкемогенді заттармен бірге тағайындалған кезде жедел миелолейкоз және миелодисплазиялық синдромдардың пайда болуы сирек хабарланған. Анемия лейкопения мен тромбоцитопения сияқты бірдей жиілікте және аралықта пайда болады. Цисплатин қызыл қан түйіршіктерінің сезімталдығын жоғарылататыны көрсетілген, бұл Кумбс бойынша оң тікелей гемолиздік анемияға әкелуі мүмкін. Бұл әсердің жиілігі, ауырлығы және басқа гематологиялық уыттылыққа қатысты салыстырмалы маңыздылығы анықталмаған, бірақ цисплатин қабылдаған және гемоглобин деңгейінің түсініксіз төмендеуін бастан өткерген пациенттерде кез келген гемолиздік процесті ескеру қажет. Емдеуді тоқтатқаннан кейін гемолиздік процесс қайтымды болады. Қапталған эритроциттерді ауыстырып құюды қажет ететін ауыр анемияның жиі пайда болуы цисплатинді қамтитын біріктірілген химиотерапиямен емделген пациенттерде байқалды. Асқазан-ішек жолы Айқын жүрек айнуы және құсу цисплатин қабылдаған барлық дерлік пациенттерде кездеседі және кейде соншалықты күшті болады, сондықтан препаратты қабылдауды тоқтату керек. Жүрек айнуы мен құсу әдетте емдеуден кейін 1-4 сағат ішінде пайда болады және 24 сағатқа дейін созылады. Құсу, жүрек айнуы және/немесе анорексияның әртүрлі дәрежелері емдеуден кейін бірнеше күн бойы сақталуы мүмкін және белгілі бір дәрежеде профилактикалық құсуға қарсы терапиямен тоқтатылуы мүмкін. Отоуыттылық Отоуытты жағымсыз әсерлер цисплатиннің бір реттік >50 мг/м2 дозасын қабылдаған пациенттерде байқалды. Отоуыттылық балаларда айқынырақ болуы мүмкін. Есту қабілетінің бұзылуы бір жақты немесе екі жақты болуы және қайталанатын дозаларда жиірек және ауыр болуы мүмкін; дегенмен, сирек жағдайларда цисплатиннің бастапқы дозасынан кейін кереңдік туралы хабарланды. Цисплатинмен емдеуге дейін немесе одан кейін бассүйектің сәулеленуі отоуыттылықты күшейтуі мүмкін. Аудиограммадағы ауытқулардың жалпы жиілігі 24% құрайды, бірақ үлкен айырмашылықтар бар. Бұл ауытқулар әдетте емдеуден кейін 4 күн ішінде пайда болады және таза дыбыс шегінде кем дегенде 15 децибелді жоғалтудан тұрады. Аудиограммадан ауытқулар 4000-8000 Гц диапазонында жиі кездеседі. Қалыпты сұхбаттасу қабілетінің төмендеуі сирек жағдайларда орын алады. Отоуыттылық қайтымды ма, жоқ па белгісіз. Нейроуыттылық Нейроуытты симптомдар әдетте 4-7 айлық емдеуден кейін пайда болады; дегенмен, бір рет қабылдағаннан кейін неврологиялық симптомдар да хабарланды. Симптомдар мен белгілер әдетте емдеу кезінде дамығанымен, сирек жағдайларда олар цисплатиннің соңғы дозасын қабылдағаннан кейін пайда болуы мүмкін. Нейропатия емдеуді тоқтатқаннан кейін нашарлауы мүмкін. Нейроуыттылық симптомдары пайда болған жағдайда цисплатинмен емдеуді дереу тоқтату керек. Осы уақытқа дейін жинақталған тәжірибе кейбір пациенттерде шеткері нейропатия қайтымсыз болуы мүмкін екенін көрсетеді. Бұлшықеттің кенеттен және қысқа мерзімді құрысулары туралы хабарланды. Бұл әдетте цисплатиннің салыстырмалы түрде жоғары жинақталған дозасын алған және салыстырмалы түрде дамыған дәрежеде шеткері нейропатиясы бар пациенттерде байқалады. Қан сарысуындағы электролит теңгерімінің бұзылуы Қан сарысуындағы электролиттердің төмен деңгейі өзекшелердің зақымдалуымен байланысты болуы мүмкін. Гипокальциемияға және гипомагниемияға шалдыққан пациенттерде тетания жағдайлары туралы хабарланды. Қан сарысуындағы электролит деңгейі әдетте қосымша электролиттерді енгізу және цисплатинді тоқтату арқылы қалпына келеді. Көздегі уыттылық Сирек жағдайларда цисплатинді қамтитын біріктірілген ем кезінде көрмей қалудың әртүрлі дәрежесі туралы хабарланды. Көп жағдайда көру цисплатин қабылдауды тоқтатқаннан кейін бірден қалпына келді. Цисплатиннің жоғары дозалары және ұсынылғаннан жиірек қабылдау жиілігі бар схемаларды қолданғаннан кейін көру қабілетінің бұзылуы және түс ажыратудың өзгеруі туралы хабарланды. Стероидтер маннитолмен немесе онсыз қолданылған; алайда, тиімділігі құжатталмаған. Анафилаксия Кейде бұрын цисплатин алған пациенттерде цисплатинмен емдеуге қатысты салдарлы реакциялар туралы хабарланған. Ерекше қауіпке ұшыраған пациенттер - бұл бұрыннан немесе отбасылық анамнезінде атопиясы бар пациенттер. Беттің ісінуі, ентігу, тахикардия, гипотензия және есекжеммен жүретін спецификалық емес макулопапулезді типтегі тері бөртпесі енгізілгеннен кейін бірнеше минут ішінде пайда болуы мүмкін. Ауыр реакцияларды адреналинмен, кортикостероидтармен немесе антигистаминдермен бақылауға болатын сияқты. Өкпенің уыттылығы Цисплатинді блеомицинмен немесе 5-фторурацилмен біріктіріп қабылдаған пациенттерде өкпе уыттылығы туралы хабарланды. Жағымсыз дәрілік реакциялар туындаса медицина қызметкеріне, фармацевтика қызметкеріне немесе дәрілік препараттардың тиімсіздігі туралы хабарламаларды қоса, дәрілік препараттарға жағымсыз реакциялар (әсерлер) бойынша ақпараттық деректер базасына тікелей хабарласыңыз Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz немесе АКҰ «Ұлттық ғылыми фармакологиялық қадағалау орталығы» http://www.drugsafety.ru

Кездейсоқ дозаланудың алдын алу үшін сақтық таныту керек. Артық дозалану жағдайында (дене беткейінің ауданы > 200 мг/м2), гематоэнцефалдық бөгет арқылы өту салдарынан, өмірге қауіпті өкпені желдету және қышқыл-сілті теңгерімі бұзылуларының дамуымен тыныс орталығы зақымдануы мүмкін. Симптомдары: цисплатинмен жедел артық дозалану бүйрек, бауыр функциясының бұзылуларына, кереңдікке, көру мүшелері тарапынан уыттану құбылыстарына (торқабықтың ажырауын қоса), елеулі миелосупрессияға, емге берілмейтін жүрек айну мен құсуға және/немесе невритке әкелуі мүмкін. Артық дозалану өлімге әкелуі мүмкін. Емі: цисплатинмен артық дозаланған жағдайда қолданылатын белгілі бір антидот жоқ. Әсерге, кем дегенде, ішінара, егер ол дозаланғаннан кейінгі алғашқы үш сағат ішінде қолданылса, гемодиализ арқылы ғана қол жеткізіледі, өйткені платина плазма ақуыздарымен тез байланысады. Гемодиализ артық дозаланғаннан кейін 4 сағаттан соң басталса да, ол цисплатиннің организмнен шығарылуына аз ғана әсер етеді. Артық дозаланғанда емдеу жалпы демеу шараларынан тұрады. Егер бұл іс-шаралар артық дозаланғаннан кейін дереу жүргізілсе цисплатиннің уыттылығын төмендетуге тиімді гидратация және осмостық диурез ықпал етуі мүмкін.

Препаратты ісікке қарсы препараттарды қолдану тәжірибесіне ие дәрігердің мұқият бақылауымен енгізу қажет. Емге және оның асқынуларына қажетті мониторинг пен бақылау адекватты диагноз және емдеудің нақты жағдайлары болған кезде ғана мүмкін болады. Цисплатиннің біріккен нефроуыттылыққа, нейроуыттылыққа және отоуыттылыққа ие екендігі дәлелденді. Нефроуыттылық Цисплатин аминогликозидтер тобының антибиотиктерін қолданғанда күшейетін жинақталған нефроуыттылықты тудырады. 100 мл/сағ немесе одан да көп диурезде цисплатиннің нефроуыттылығын төмендету үрдісі бар. Бұған цисплатинмен емдеуден кейін (2500 мл/м2 /24 сағат ұсынылған) 2 литр тиісті венаішілік ерітінді енгізу және ұқсас сұйықтық енгізу арқылы қол жеткізуге болады. Егер сұйықтықты белсенді енгізу жеткілікті диурезді ұстап тұру үшін жеткіліксіз болса, осмостық диуретикті (мысалы, маннитол) енгізуге болады. Сусыздануы бар пациенттерде, сондай-ақ ықтимал нефроуытты болуы мүмкін немесе бүйрек жеткіліксіздігінде оңай жиналатын басқа цитоуытты агенттермен біріктірілген ем алатын пациенттерде сақтық таныту керек. Нейропатия Ұсынылған дозалармен салыстырғанда, цисплатиннің аса жоғары дозаларымен немесе жоғарырақ дозалау жиілігінде емдеу сызбасы пайдаланылған пациенттерде нейропатияның ауыр жағдайлары хабарланады. Ондай нейропатия қайтымсыз болып, "шұлық-қолғап" типі бойынша аяқ-қол парестезиясы, арефлексия мен проприоцепцияны және вибрациялау түйсіктерін жоғалту ретінде көрініс беруі мүмкін. Егде жастағы пациенттер шеткері нейропатияға аса сезімтал болуы мүмкін. Отоуыттылық Отоуыттылық цисплатиннің бір реттік дозасы 50 мг/м2 алған пациенттердің 31%-ында байқалды және жоғары жиілік диапазонында (4000-8000 Гц) құлақтың шыңылдауы және/немесе есту қабілетінің жоғалуымен көрініс тапты. Кейде сөйлеу дыбыстарын есту қабілеті төмендейді. Отоуытты әсер цисплатин қабылдаған балаларда айқын көрінуі мүмкін. Естімей қалу бір жақты немесе екі жақты болуы мүмкін және қайталанған дозаларда анағұрлым жиі дамиды; алайда цисплатинді бір рет қабылдағаннан кейін сирек дамитын кереңдік оқиғалары болды. Отоуыттылық алдыңғы бір мезгілде краниальді сәулеленумен күшеюі мүмкін және цисплатиннің плазмадағы ең жоғары концентрациясына қол жеткізумен байланысты болуы мүмкін. Цисплатиннен туындаған отоуыттылық қайтымды ма, жоқ па белгісіз. Емді бастар алдында және цисплатиннің кейінгі дозаларын енгізер алдында аудиометрия арқылы естуді мұқият мониторингілеу қажет. Есту мүшесінің зақымдану симптомдары пайда болған немесе клиникалық есту қабілетінің бұзылуы анықталған жағдайларда қайталанған аудиометрия тағайындалды. Клиникалық маңызды есту бұзылыстары кезінде дозаны түзету немесе терапияны тоқтату қажет болуы мүмкін. Вестибулярлық уыттылық та байқалды. Аллергиялық реакциялар Платинаға негізделген басқа препараттар сияқты перфузия кезінде көп жағдайда дамитын аса жоғары сезімталдық реакциялары (анафилаксиялық реакция) перфузияның үзілуіне және қажетті симптоматикалық ем жүргізуге әкелуі мүмкін. Кейде өліммен аяқталатын айқаспалы реакциялар платинаның барлық қосылыстарымен байқалды. Беттің ісінуі, бронх түйілуі, тахикардия және гипотензия түріндегі аллергиялық реакциялар дамыған кезде адреналин, кортикостероидтар және антигистаминдер қолданылуы керек. Мұндай асқынуларды емдеу үшін демеуші жабдықтар мен дәрі-дәрмектер болуы тиіс. Бауыр функциясы және гематологиялық көрсеткіштер Бауырдың гематологиялық құрамы мен функциясы үнемі бақылауда болуы тиіс. Цисплатинмен емдеу үдерісінде мерзімді қан талдауы, лейкоциттердің, тромбоциттердің, гемоглобиннің, бүйрек және бауыр функционалдық тестілерінің қанның формалық элементтерінің мөлшерін, сондай-ақ қан сарысуындағы электролиттердің деңгейін анықтау қажет. Қан сарысуындағы креатинин мөлшері 1,5 мг/100 мл дейін және одан кем және/немесе қандағы азот мочевинасының 25 мг/100 мл дейін және одан кем түскенге дейін; қандағы тромбоциттер құрамы 100000/мм3 лейкоциттер - кемінде 4000/мм3 түскенге дейін препаратты қайта тағайындауға болмайды. Гематологиялық уыттылық әдетте орташа және қайтымды болғанымен, ауыр тромбоцитопения және лейкопения байқалуы мүмкін. Инвазиялық емдеу кезінде тромбоцитопения дамитын пациенттер үшін сақтық шараларын орындау қажет. Сондай-ақ, қан кетуді тексеру және несепте және нәжісте қан болуына тексеру, аспирин немесе басқа ҚҚСП қабылдаудан аулақ болу өте маңызды. Лейкопения дамыған пациенттер инфекцияның белгілері/симптомдары үшін бақылауда болуы тиіс. Оларға антибиотиктермен емдеу немесе қан құю қажет болуы мүмкін. Карциногендік потенциал Адамдарда сирек жағдайларда жедел лейкоздың дамуы цисплатинді қолданумен сәйкес келді, бұл басқа лейкемогендік препараттармен байланысты болды. Цисплатин – бактериялық мутаген және жануарлардың жасушаларында бактериялық өсірінділердің хромосомалық аберрациясын тудырады. Карциногенділік болуы ықтимал, бірақ орын алмады. Енгізу орнындағы реакциялар Инъекция орнындағы реакциялар цисплатин қайта енгізу кезінде дамуы мүмкін. Экстравазация мүмкіндігін ескере отырып, препаратты енгізу кезінде ықтимал инфильтрация мәніне енгізу орнын мұқият бақылау ұсынылады. Қазіргі уақытта экстравазация реакцияларын емдеудің нақты әдістері белгісіз. Экстравазация жағдайында • цисплатин инфузиясын дереу тоқтатыңыз. • инені алып тастамаңыз, экстравазатты тіннен аспирациялаңыз және 0,9% натрий хлориді ерітіндісімен шайыңыз. Инфекциялар Жедел бактериялық немесе вирустық инфекциялармен ауыратын пациенттерге ерекше күтім жасау керек. Асқазан-ішек жолы Цисплатин қабылдаған барлық дерлік пациенттерде жүрек айнуы мен құсу пайда болады және препаратпен емдеуді тоқтатуды талап ететіндей ауыр болуы мүмкін. Жүрек айнуы мен құсу дозаны енгізгеннен кейін 1-ден 4 сағатқа дейін басталуы және 24 сағатқа дейін жалғасуы мүмкін. Жүрек айнуының, құсудың және/немесе анорексияның түрлі дәрежелері емдеуден кейін 1 апта бойы сақталуы мүмкін. Кешеуілдеген жүрек айнуы мен құсу (химиотерапиядан кейін 24 сағат немесе одан да көп уақыт өткен соң басталады немесе сақталады) цисплатин енгізілген күні құсуды толық бақылауға жеткен пациенттерде байқалады. Диарея туралы да хабарланды. Фертильділік Цисплатинмен емдеу қайтымсыз бедеулікті тудыруы мүмкін болғандықтан, болашақта балалы болғысы келетін еркектерге емдеуді бастар алдында сперманы криоконсервациялау ұсынылады. Назар аударыңыз Бұл цитостатикалық препарат антинеопластикалық химиотерапияға арналған препараттар тобындағы дәрілермен салыстырғанда анағұрлым айқын уыттылыққа ие. Бүйректің уыттылығы, ең көп жинақталатын, ауыр және препаратты енгізу кезінде ерекше сақтық шараларын талап етеді. Жүрек айнуы және құсу қарқынды болуы және адекватты емді қажет етуі мүмкін. Мұқият бақылау отоуытты әсерлерге, миелодепрессияға және анафилаксиялық реакцияларға қатысты да жүргізілуі тиіс. Цисплатиннің мутагендік қасиеттері бар екендігі дәлелденді. Пациенттердің ерекше топтары Педиатрияда қолдану Балаларда препаратты қолданудың қауіпсіздігі мен тиімділігі анықталмаған. Барлық балаларға емдеу курсын бастамас бұрын және әрбір келесі дозаға дейін және емдеу курсынан кейін бірнеше жыл бойы аудиометрия жүргізу керек. Тестілеу әдістеріндегі соңғы жетістіктер есту қабілетінің бұзылуы баланың танымдық және әлеуметтік дамуына ықтимал жағымсыз әсерін төмендететін қажетті шараларды қабылдау үшін естімей қалудың ерте диагноз қоюға мүмкіндік береді. Егде жастағы пациенттерге қолдану Бұл зерттеулерде жас мөлшері өміршеңдіктің болжамды факторы болған жоқ. Алайда, осы зерттеулердің бірін кейінгі қайталама талдауда егде жастағы пациенттер арасында жас пациенттерге қарағанда қысқа өміршеңдік кезеңі байқалды. Барлық зерттеулерде жас пациенттерге қарағанда егде жастағы пациенттерде ауыр нейтропения байқалды. Жасырақ пациенттерге қарағанда егде жастағы адамдарда ауыр тромбоцитопения мен лейкопенияның көптеген оқиғалары байқалды, дегенмен цисплатин бар препараттармен емдеудің барлық топтарында жоқ. Гематологиялық емес уыттылық пациенттердің жасына байланысты бағаланған зерттеуде егде жастағы пациенттерде жас пациенттерге қарағанда шеткері нейропатияның жоғары деңгейі байқалды. Егде пациенттер жас пациенттерге қарағанда миелосупрессияға, инфекциялық асқынуларға, нефроуыттылыққа сезімтал болуы мүмкін екендігі хабарланды. Бүйрек функциясы бұзылған пациенттерде қолдану Цисплатин, белгілі болғандай, негізінен бүйрекпен шығарылады және анамнезінде бүйрек функциясы бұзылған пациенттерге қарсы көрсетілген. Егде жастағы пациенттер бүйрек функциясының төмендеуіне анағұрлым бейім болғандықтан, дозаны сақтықпен таңдап, осы пациенттердің бүйрек функциясына бақылауды жүзеге асырған жөн. Үйлесімсіздік Алюминийге тигізбеңіз, өйткені алюминий цисплатинмен әрекеттесіп, оның белсенділігін жоятындықтан, сондай-ақ қара шөгінділердің түзілуін туындататындықтан, цисплатинді дайындау және енгізу кезінде құрамында алюминий бар инелер мен басқа жабдықты пайдаланбау өте маңызды. Цисплатин құрамында хлорид мөлшері аз ортада ерітінді ретінде ыдырайды; хлоридтің концентрациясы 0,45% натрий хлоридінен кем болмауы керек. Үйлесімділік бойынша зерттеулер болмаған жағдайда бұл препаратты басқа дәрілік заттармен араластыруға болмайды. Антиоксиданттар (мысалы, натрий метабисульфиті), бикарбонаттар (натрий бикарбонаты), сульфаттар, фторурацил және паклитаксел инфузиялық жүйелердегі цисплатиннің белсенділігін жоюы мүмкін. Цисплатинді тек енгізу әдісі мен жолы бөлімінде көрсетілген еріткіштермен бірге пайдалану керек. Арнайы ескертулер Цисплатин-Келун-Казфарм құрамында натрий бар Цисплатин-Келун-Казфарм (20 мл құты) Бұл препарат құрамында 20 мл құтыға 70,8 мг натрий бар, бұл ересек адам үшін ДДҰ ұсынған 2 г натрийдің максималды тәуліктік дозасының 3,6% құрайды. Цисплатин-Келун-Казфарм құрамында натрий бар ерітінділермен енгізу үшін қосымша дайындалуы мүмкін және бұл пациент алатын натрийдің жалпы мөлшерін қарастырған кезде ескерілуі керек. Жүктілік Цисплатинмен емдеу кезінде жүктіліктен аулақ болу керек. Цисплатинді жүкті әйелдерде қолдану туралы деректер жеткіліксіз, бірақ оның фармакологиялық қасиеттеріне сүйене отырып, цисплатин ауыр туа біткен ақауларды тудыруы мүмкін деп күтілуде. Жануарларға жасалған зерттеулер репродуктивтік уыттылықты және трансплаценталық канцерогенділікті көрсетті. Егер пациент емдеуді тоқтатқаннан кейін балалы болғысы келсе, генетикалық тексеру ұсынылады. Лактация кезеңі Цисплатин емшек сүтімен шығарылады. Цисплатинмен емдеу кезінде және цисплатиннің соңғы дозасын қабылдағаннан кейін 4 апта ішінде бала емізуді тоқтату керек. Фертильділік Белсенді жыныстық қатынасқа түсетін еркектер де, әйелдер де цисплатинмен емдеу кезінде және емдеуден кейін кем дегенде 6 ай ішінде қауіпсіз контрацепцияны қолдануы керек. Егер пациент емдеу аяқталғаннан кейін балалы болғысы келсе, генетикалық кеңес жүргізу қажет. Емдеу процесінде қайтымсыз бедеуліктің дамуы мүмкін болғандықтан, еркектер емдеуді бастар алдында сперманы банкте криосақтау мүмкіндігін қарастыруы керек. Препараттың көлік құралын басқару қабілетіне немесе қауіптілігі зор механизмдерге әсер ету ерекшеліктері Көлікті басқару және механизмдермен жұмыс істеу қабілетіне әсері туралы зерттеулер жүргізілмеген. Алайда, қолайсыз әсерлер (орталық жүйке жүйесі мен сезім ағзалары тарапынан) автокөлік құралдарын және қауіптілігі зор механизмдерді басқару қабілетіне аздаған немесе елеулі әсер етуге әкелуі мүмкін. Осы әсерлерден зардап шегетін пациенттер (мысалы, ұйқышылдық немесе құсу) көлік жүргізуден және механизмдермен жұмыс істеуден аулақ болу керек.

Нұсқаулықта көрсетілмеген.

Миелосупрессиялық препараттар Цисплатин әдетте әсер ету механизмі ұқсас басқа цитостатиктермен біріктіріледі. Мұндай жағдайларда аддитивті уыттылық пайда болуы мүмкін. Сүйек кемігін басатын препараттарды немесе сәулелік терапияны бір мезгілде қолдану сүйек кемігін басатын цисплатиннің әсерін күшейтеді. Нефроуытты заттар Нефроуытты (мысалы, цефалоспориндер, аминогликозидтер, амфотерицин немесе қарама-қарсы ортада) немесе отоуытты (мысалы, аминогликозидтер) дәрілік заттарды бірге енгізу цисплатиннің бүйрекке уытты әсерін күшейтеді. Цисплатинмен емдеу кезінде немесе одан кейін негізінен бүйрекпен шығарылатын препараттарды, мысалы, блеомицин және метотрексат сияқты цитостатиктерді олардың бүйрекпен шығарылуы ықтимал төмендеуінен тағайындағанда сақ болу керек. Ифосфамидтің бүйректегі уыттылығы цисплатинмен біріктіргенде немесе бұрын цисплатин қабылдаған пациенттерде күшеюі мүмкін. Қандағы литий концентрациясының төмендеуі блеомицинмен және этопозидпен біріктіріп цисплатинмен емделгеннен кейін бірнеше жағдайда байқалды. Осылайша, литий мәндеріне мониторинг ұсынылады. Отоуытты заттар Отоуытты (мысалы, аминогликозидтер, ілмектік диуретиктер) дәрілік заттарды қатар енгізу цисплатиннің есту функциясына уытты әсерін күшейтеді. 60 мг/м2 асатын, несеп шығаруы тәулігіне 1000 мл-ден кем цисплатин дозаларын алатын пациенттерді қоспағанда, бүйрек жолдарының ықтимал зақымдануына және отоуыттылығына байланысты ілмектік диуретиктермен үдемелі диурез тағайындалмауы тиіс. Отоуыттылық бассүйектің алдыңғы қатар сәулеленуі кезінде жоғарылауы мүмкін және қан плазмасындағы цисплатиннің ең жоғары концентрациясына байланысты болуы мүмкін. Ифосфамидті бір мезгілде қолдану протеинурияның жоғарылауын тудырады. Цисплатин тудыратын отоуыттылық ифосфамидті бір мезгілде қолданғанда күшейе түсті, ол жалғыз қолданғанда отоуытты емес. Ифосфамид цисплатиннен естімей қалуды күшейтуі мүмкін. Аттенуирленген тірі вакциналар Тірі вирустық вакциналарды қолдануды цисплатинмен емдеу аяқталғаннан кейінгі алғашқы 3 ай ішінде қолдануға болмайды. Сары қызбаға қарсы вакцина өлімге әкелетін жүйелі вакциналық аурудың даму қаупіне байланысты қатаң қарсы көрсетілген (4.3 бөл. қараңыз). Жайылған аурудың қаупін ескере отырып, егер бар болса, белсенді емес вакцинаны қолдану ұсынылады. Пероральді антикоагулянттар Пероральді антикоагулянттарды бір мезгілде қолданған жағдайда, ХҚҚ (халықаралық қалыптасқан қатынас) жүйелі түрде анықтау ұсынылады. Антигистаминдер, фенотиазидтер және басқалар Антигистаминдерді, буклизинді, циклизинді, локсапинді, меклозинді, фенотиазиндерді, тиоксантендерді немесе триметобензимидтерді бір мезгілде қолдану отоуыттылық симптомдары (бас айналуы және құлақтың шыңылдауы сияқты) бүркемелеуі мүмкін. Құрысуға қарсы препараттар Цисплатинмен емдеу қан сарысуындағы құрысуға қарсы препараттардың субтерапиялық концентрациясын тудыруы мүмкін. Құрысуға қарсы дәрілік заттардың сарысулық концентрациясы цисплатинмен емдеу кезінде емдік деңгейден төмен деңгейде қалуы мүмкін. Цисплатин фенитоин абсорбциясын төмендетуі немесе меоболизмін күшейтуі мүмкін және осылайша эпилепсияға қарсы терапияның тиімділігін төмендетеді. Цисплатинді қолдану кезеңінде фенитоинмен жаңа емдеуді бастауға болмайды. Пиридоксиннің альтретаминмен біріктірілуі Үдемелі аналық без обырын емдеуді рандомизацияланған зерттеу жүргізгенде пиридоксин альтретаминмен (гексаметилмеланин) және цисплатинмен бірге қолданылған кезде реакция уақыты жағымсыз өзгерістерге (ремиссия ұзақтығының қысқаруы) ұшырады. Паклитаксел және Доцетаксел Паклитаксел инфузиясы алдында цисплатинмен емдеу паклитаксел клиренсін 33% төмендетуі мүмкін, сондықтан нейроуыттылықты күшейтуі мүмкін. Клиникалық зерттеулерде метастаздық немесе кең таралған ісіктері бар пациенттерде осы препараттар бірдей дозаларда жеке қолданылған кезге қарағанда цисплатинмен біріктірілген доцетаксел нейроуытты әсердің айқын көріністерін (дозаға тәуелді әсер) тудыратыны көрсетілген. Аллопуринол және пробенецид Цисплатинмен бір мезгілде қолданғанда аллопуринол немесе пробенецид дозасын түзету керек, өйткені цисплатин қан сарысуындағы несеп қышқылының концентрациясын арттыруы мүмкін. Аллопуринол немесе пробенецид сияқты несептік артриттен емделген пациенттерде гиперурикемия мен аурудың көріністерін бақылау үшін дозаны түзету қажет болуы мүмкін. Блеомицин және винбластин Цисплатин блеомицинмен және винбластинмен бірге Рейно синдромын тудыруы мүмкін. Хелат түзуші заттар Пеницилламин сияқты хелат түзуші заттар цисплатиннің тиімділігін төмендетеді. Циклоспорин Цисплатинді циклоспоринмен бір мезгілде тағайындаған кезде лимфопролиферация қаупімен шамадан тыс иммуносупрессияны ескеру керек. Басқа цитостатиктермен біріктірілімде Препаратты басқа цитостатиктермен біріктірген кезде миокард ишемиясының симптомдары туралы хабарланды

Сақтау мерзімі 2 жыл Жарамдылық мерзімі өткеннен кейін қолдануға болмайды! Сақтау шарттары Жарықтан қорғалған жерде 15-25оС температурада сақтау керек. Балалардың қолы жетпейтін жерде сақтау керек! Мұздатып қатыруға болмайды!