Экстранил раствор 7.5%

1000 мл ерітіндінің құрамында граммен: белсенді заттар: икодекстрин — 75.000 натрий хлориді — 5.400 натрий лактаты — 4.500 кальций хлориді дигидраты — 0.257 магний хлориді гексагидраты — 0.051 қосымша заттар: натрий гидроксиді немесе хлорсутек қышқылы — қажетті рН дейін жеткілікті саны инъекцияға арналған су — 1000 мл дейін Электролиттер мөлшері: ммоль/л — мЭкв/л Натрий — 133.00 — 133.0 Кальций — 1.75 — 3.5 Магний — 0.25 — 0.5 Хлорид — 96.00 — 96.0 Лактат — 40.00 — 40.0 Сыртқы түрінің, иісінің, дәмінің сипаттамасы Мөлдір ашық сары сұйықтық

- созылмалы бүйрек жеткіліксіздігінде (СБЖ), бүйректен сүзілу функциясының бұзылуы асқынған кезде тұрақты амбулаториялық перитонеальді диализ (ТАПД) немесе автоматтандырылған перитонеальді диализ (АПД) емшараларының бірінде декстроза ерітіндісін алмастыру үшін; - құрсақ қуысында ерітіндінің ұзақ уақыт кідіруі кезеңінде ультрафильтрацияны (4,25% декстрозамен салыстырғанда), сондай-ақ құрсақтың перитонеальді тепе-теңдік тест (peritoneal equilibration test - РЕТ) көмегімен анықталатын тасымалдау қасиеттері орташа-жоғары және жоғары болатын пациенттерде креатинин клиренсі мен мочевина азотын арттыру үшін.

Әсер ету механизмі Икодекстрин тұрақты амбулаториялық перитонеальді диализ емшараларын жүргізу кезінде интраперитонеальді енгізуде осмостық агент ретінде әрекет ететін крахмал туындысы, глюкоза полимері болып табылады. 7,5% ерітінді дерлік изосмолярлы қан сарысуы болып табылады, бірақ ТАПД жүргізу кезінде ұзақтығы 12 сағатқа дейін ультрафильтрацияны жүзеге асыруға мүмкіндік береді. Глюкозаның гиперосмолярлы ерітінділерімен салыстырғанда калория мөлшері төмен. Алынған ультрафильтраттың көлемін 3,86% глюкоза ерітіндісімен ТАПД жүргізу кезінде алынған көлеммен салыстыруға болады. Қандағы глюкоза деңгейі және инсулин деңгейі өзгеріссіз қалады. Ультрафильтрация перитонит эпизодтары кезінде сақталады. ТАПД немесе АПД жүргізу кезінде ұсынылатын дозалау режимі әрбір 24 сағат үшін бір алмасу сеансымен шектеледі.

Дозалау режимі Экстранил диализ емшаралары арасындағы ең ұзақ аралық кезінде, яғни түнгі уақытта ТАПД емшараларын жүргізу кезінде және АПД емшараларын жүргізу кезінде ұзақ күндік үзіліс кезінде қолдану үшін ұсынылған. Дәрігер емдеуді бастауға және емдеу режимі, сеанстардың жиілігі, бір алмасу сеансына арналған ерітіндінің көлемі, экспозицияның ұзақтығы (ерітіндінің құрсақ қуысында болуы) және диализ ұзақтығы сияқты оның аспектілерін бақылауға тиіс. Емдеуді дәрігердің бақылауымен бастау керек. Дәрілік препаратпен жұмыс істеу немесе оны енгізу алдында сақтық шараларын қабылдау қажет. Пациенттің жайлылық деңгейін арттыру үшін перитонеальді диализге арналған ерітінділерді сыртқы пакетте 37 °C дейін қыздыруға болады. Алайда, тек құрғақ жылуды қолданыңыз (мысалы, жылытқыш, жылыту плиткасы). Ерітінділерді суға салу арқылы немесе микротолқынды пеште қыздыруға болмайды, өйткені бұл пациентке зиян тигізуі немесе жайсыздық тудыруы мүмкін. Перитонеальді диализ емшарасын жүргізу кезінде асептика ережелерін сақтау қажет. Ерітіндіні оның түсі өзгерген, бұлыңғырланған, механикалық қосындылар болған немесе пакеттің ағып кету немесе герметикалығының бұзылу белгілері болған жағдайда қолданбаңыз. Дренаждалған сұйықтықты фибриннің немесе бұлыңғырлықтың бар-жоғына тексеру керек, бұл инфекцияның немесе асептикалық перитониттің бар-жоғын көрсетуі мүмкін. Тек бір рет қолдануға арналған. Ересек пациенттер ТАПД немесе АПД жүргізу кезінде препаратты енгізу препаратты интраперитонеальді енгізумен әрбір 24 сағат үшін бір алмасу сеансымен шектеледі. Қажетті көлемді пациент үшін қолайлы жылдамдықпен шамамен 10-20 минут ішінде енгізу керек. Дене мөлшері қалыпты ересек пациенттер үшін енгізілетін ерітіндінің көлемі 2,0 л-ден аспауы тиіс. Үлкен пациенттер үшін (дене салмағы 70-75 кг-нан асатын) көлемі 2,5 л-ге дейін ұлғайтылуы мүмкін. Егер ерітіндіні осы көлемде енгізу құрсақ қуысында созылу сезіміне байланысты жайсыздықты тудырса, енгізу көлемін азайту керек. Ұсынылатын экспозиция уақыты ТАПД кезінде 6-12 сағатты және АПД кезінде 14-16 сағатты құрайды. Сұйықтық дренажы ауырлық күшінің әсерінен пациентке ыңғайлы жылдамдықпен жүзеге асырылады. Пациенттердің ерекше топтары Балалар Экстранил препаратының қауіпсіздігі мен тиімділігі 18 жасқа дейінгі балаларда анықталмаған. Деректер жоқ. Егде жастағы пациенттер Дозалау режимінде өзгерістер қажет емес. «Ересек пациенттер» бөлімін қараңыз. Енгізу жолы және тәсілі Экстранил препараты ішперде ішіне енгізуге арналған. Вена ішіне енгізуге болмайды!

• әсер етуші заттарға немесе дәрілік препараттың құрамына кіретін қандай да бір қосымша заттарға аса жоғары сезімталдық • крахмал негізіндегі полимерлерге (мысалы, жүгері крахмалы) және/немесе икодекстринге белгілі аллергия • мальтозаны немесе изомальтозаны көтере алмау • гликоген жинақталу ауруы - анамнездегі ауыр лактоацидоз - жақында құрсақ қуысына оталық араласу, құрсақ қабырғасының тұтастығын бұзуға немесе ішек перфорациясына әкелуі мүмкін аурулар - тиімді перитонеальді диализге кедергі келтіретін немесе инфекцияның даму қаупін арттыратын механикалық ақаулары жойылмаған пациенттерге - перитонеальді функцияның жойылуы немесе перитонеальді функцияны нашарлататын ауқымды жабыспалары құжатпен расталған пациенттерге - жедел бүйрек жеткіліксіздігі - жүктілік, лактация кезеңі - балалар мен 18 жасқа дейінгі жасөспірімдер

Келесі жағымсыз реакциялар клиникалық зерттеулер мен препаратты тіркеуден кейінгі қолдану тәжірибесінің деректері негізінде сипатталған және жүйелік-ағзалық жіктемеге және олардың туындау жиілігіне сәйкес кестеде келтірілген. (Жағымсыз құбылыстардың жиілігін айқындау мынадай критерийлерге сәйкес жүргізіледі: өте жиі (≥ 1/10), жиі (≥ 1/100-ден <1/10-ға дейін), жиі емес (≥ 1/1000-нан < 1/100-ге дейін), сирек (≥ 1/10000-нан < 1/1000-ға дейін), өте сирек (< 1/10000), деректер), белгісіз (қолда бар деректер негізінде бағалау мүмкін емес). Экстранил препаратын қолданумен байланысты тері реакциялары, бөртпе мен қышуды қоса, әдетте, жеңіл немесе орташа ауырлық дәрежесіне ие болды. Сирек жағдайларда мұндай бөртпе қатпарланумен қатар жүрді. Жағымсыз әсер пайда болған жағдайда және оның ауырлық дәрежесіне байланысты Экстранил препаратын қолдануды кемінде уақытша тоқтату керек. Жиі - дегидратация; гиповолемия - бас айналуы; бас ауыруы - құлақтың шыңылдауы - артериялық гипотензия; артериялық гипертензия - іштің ауыруы - бөртпе (макулезді, папулезді, эритематозды қоса); қышыну; терінің қабыршақтануы - шеткері ісіну; астения Жиі емес - тұмауға ұқсас синдром; фурункул - анемия; лейкоцитоз; эозинофилия - гипогликемия; гипонатриемия; гипергликемия; гиперволемия; анорексия; гипохлоремия; гипомагниемия; гипопротеинемия - патологиялық ойлау; үрей; күйгелектік - гиперкинез; парестезия; агевзия - жүрек-қантамыр бұзылысы; тахикардия - ортостаздық гипотензия - өкпе ісінуі; ентігу; жөтел; ықылық - ішектің бітелуі; перитонит; қанды перитонеальді экссудат; диарея; асқазан ойық жарасы; гастрит; құсу; іш қату; диспепсия; жүрек айнуы; ауыздың құрғауы; метеоризм - есекжем; буллезді дерматит; псориаз; терінің ойық жарасы; экзема; тырнақ аурулары; терінің құрғауы; тері түсінің өзгеруі - сүйек ауыруы; бұлшықет түйілуі; миалгия; мойын ауыруы - бүйрек маңының ауыруы - көкірек қуысының ауыруы; ісіну; ауырсыну; беттің ісінуі -аланинаминотрансфераза деңгейінің жоғарылауы; аспартатаминотрансфераза деңгейінің жоғарылауы; қандағы сілтілік фосфатаза деңгейінің жоғарылауы; бауыр функциясы көрсеткіштерінің нормадан ауытқуы; дене салмағының азаюы; дене салмағының артуы Белгісіз (қолда бар деректер негізінде бағалау мүмкін емес): - тромбоцитопения; лейкопения - васкулит; аса жоғары сезімталдық** - гипогликемиялық шок; сұйықтық теңгерімінің бұзылуы - гипогликемиялық кома; шымылдату сезімі - анық көрмеу - бронх түйілуі - асцит; шап жарығы; іштегі жайсыздық - уытты эпидермальді некролиз; полиморфты эритема; ангионевроздық ісіну; жайылған есекжем; уытты тері бөртпесі (токсикодермия); периорбитальді ісіну; дерматит (аллергиялық және жанасуды қоса); эритема; күлдіреуік - артралгия; арқаның ауыруы; сүйек және бұлшықеттегі ауырсыну - қызба; қалтырау; дімкәстік; катетер орнатылған жердегі эритема; катетер орнатылған жердегі қабыну; инфузиялық реакция (инфузия орнындағы ауыруды, енгізу орнындағы ауыруды қоса) - бұйыммен өзара әрекеттесу* * Икодекстрин кейбір құрылғылардың көмегімен қандағы глюкоза деңгейін өлшеу нәтижелерінің бұрмалануына әкеледі. ** Экстранил препаратын қолданғанда пациенттерде аса жоғары сезімталдық реакциялары, оның ішінде бронх түйілуі, гипотензия, бөртпе, қышыну және есекжем байқалды. Перитонеальді диализ емшарасымен байланысты басқа жағымсыз әсерлер: зеңдік перитонит, бактериялық перитонит, катетерді орнату орнындағы инфекция, катетермен байланысты инфекция және катетерді орнатумен байланысты асқыну. Күшейтілген ультрафильтрация, әсіресе егде пациенттерде, гипотензияның, бас айналуы және ықтимал неврологиялық симптомдардың кейіннен дамуымен сусыздануға әкелуі мүмкін. Қант диабеті бар пациенттердегі гипогликемия эпизодтары. Қан сарысуындағы сілтілік фосфатаза деңгейінің жоғарылауы және электролиттік бұзылулар (мысалы, гипокалиемия, гипокальциемия және гиперкальциемия). Құрамында бактериялар бар немесе жоқ дренаждағы бұлыңғыр бөліністі және іштің ауруын қоса ішперде тарапынан реакциялар, асептикалық перитонит. Өздігінен түскен хабарламаларда және әдебиетте емшаралармен байланысты жағымсыз әсер ретінде олар жиі қатты қажығыштықты сипаттайды. Жағымсыз дәрілік реакциялар туындаса медицина қызметкеріне, фармацевтика қызметкеріне немесе дәрілік препараттардың тиімсіздігі туралы хабарламаларды қоса, дәрілік препараттарға жағымсыз реакциялар (әсерлер) бойынша ақпараттық деректер базасына тікелей хабарласыңыз Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

Препараттың артық дозалануынан пайда болатын әсерлер туралы деректер жоқ. Экстранил препаратының бір пакетінен артық үздіксіз енгізу кезінде 24 сағат ішінде қан плазмасындағы көмірсулар алмасуы метаболиттері мен мальтоза деңгейінің жоғарылауы мүмкін. Мұндай жоғарылаудың әсері белгісіз, бірақ қан плазмасының осмолярлығының жоғарылауы мүмкін. Түзету икодекстринсіз немесе гемодиализсіз перитонеальді диализ жүргізу арқылы мүмкін болады.

Қант диабеті бар пациенттер перитонеальді диализ (ПД) жүргізу кезінде гликемияны бақылауды ұстап тұру үшін инсулинді қосымша енгізуді жиі қажет етеді. Глюкоза негізіндегі ПД арналған ерітіндіден Экстранилге ауысу инсулиннің әдеттегі дозасын түзетуді талап етуі мүмкін. Инсулинді интраперитонеальді енгізуге болады. Мальтозаның болуымен нәтиженің бұрмалану ықтималдығына жол бермеу үшін қандағы глюкоза деңгейін өлшеу глюкозаға тән әдісті қолдана отырып жүргізілуі керек. Пирролокинолинхинонға тәуелді глюкозодегидрогеназа (GDH-PQQ) немесе глюкоза-хромоген-оксидоредуктаза (GDO) негізіндегі әдістерді қолдануға болмайды. Одан өзге, талдау әдісі флавинадениндинуклеотид-глюкозодегидрогеназаға (GDH-FAD) негізделген кейбір глюкометрлер мен тест-жолақтарын қолданған кезде талданатын ерітіндіде мальтозаның болуына байланысты глюкоза концентрациясының мәндерін жалған жоғарылатуға болады. Икодекстриннің немесе мальтозаның болуы нәтиженің бұрмалануын немесе глюкоза концентрациясының мәндерінің жалған жоғарылауын туындататынын анықтау үшін глюкометр мен тест-жолақтардың өндірушіс(лер)імен байланысу қажет. GDH-PQQ, GDO немесе GDH-FAD негізіндегі әдістерді пайдаланған кезде Экстранил препаратын қолдану глюкоза концентрациясының жалған жоғарылатылған мәндерін туындатуы мүмкін, бұл қажетті мөлшерден көп инсулин енгізуге әкелуі мүмкін. Қажет болғаннан көп мөлшерде инсулин енгізу гипогликемияның себебі болды, бұл сананың жоғалуына, комаға, жүйке жүйесінің зақымдалуына және өлімге әкелді. Одан өзге, мальтозаның болуына байланысты қандағы глюкоза концентрациясының жалған жоғарылауы шынайы гипогликемияны бүркемелеуі мүмкін, оған байланысты қажетті емдеу тағайындалмауы мүмкін, бұл ұқсас салдарға әкеледі. Қандағы глюкоза деңгейін өлшеу үшін GDH-PQQ, GDO немесе GDH-FAD негізіндегі глюкометрлер мен тест-жолақтарды пайдаланған кезде глюкоза концентрациясының жалған жоғары мәндері Экстранил препаратымен емдеуді тоқтатқаннан кейін екі апта ішінде байқалуы мүмкін. GDH-PQQ, GDO немесе GDH-FAD негізіндегі глюкометрлер стационар жағдайында қолданылуы мүмкін болғандықтан, пациенттерге Экстранил препаратын қолдана отырып перитонеальді диализ процедурасын жүргізетін дәрігерлер қандағы глюкоза деңгейін анықтау үшін тест-жүйелерді, тест-жолақтарды қоса, пайдалануға қатысты бөлігінде препарат туралы ақпаратпен мұқият танысуы және мекемеде пайдаланылатын тест-жүйе Экстранил препаратын қолдана отырып ем жүргізген жағдайда қолайлы болып табылатынын анықтай алуы маңызды. Инсулиннің дұрыс емес дозаларын енгізбеу үшін пациенттерді стационарға түскен сайын осы өзара әрекеттесу туралы медицина қызметкерлерін хабардар етуге үйрету қажет. Перитонеальді диализ процедурасын пациенттерде сақтықпен жүргізген жөн: 1) хирургиялық араласудың, туа біткен ауытқулардың немесе жарақаттың нәтижесінде перитонеальді жарғақша мен диафрагманың зақымдануын қоса, іштің патологиясы; құрсақ қуысының ісіктері; құрсақ қуысы қабырғасының инфекциясы; жарық; нәжіс жыланкөздері; колостома немесе илеостома; дивертикулиттің жиі эпизодтары; ішектің қабыну немесе ишемиялық аурулары; мөлшері ұлғайған бүйрек поликистозы; сондай-ақ ол кезде құрсақ қабырғасының, іш аумағындағы беткейлік тіндердің немесе құрсақ қуысының тұтастығы бұзылуы мүмкін басқа да жағдайлар; сондай-ақ мына пациенттерде: 2) аорта трансплантатын орнату бойынша жақында жүргізілген араласуды және өкпенің ауыр ауруын қоса, басқа да патологиялық жағдайлармен. Перитонеальді диализді қолданумен емдеудің белгілі сирек асқынуы инкапсуляциялық перитонеальді склероз (ИПС) болып табылады. ИПС перитонеалдық диализге арналған ерітінділерді пайдаланатын пациенттерде, оның ішінде ПД процедураларын жүргізе отырып, емдеу кезінде Экстранил препаратын пайдаланатын кейбір пациенттерде байқалды. Сирек жағдайларда Экстранил препаратын қолдану кезінде өліммен аяқталғаны туралы хабарланды. Лактатацидоздың даму қаупін арттыратын жағдайы бар [мысалы, ауыр гипотензиясы, сепсисі, жедел бүйрек жеткіліксіздігі, метаболизмнің туа біткен бұзылулары бар, метформин және кері транскриптаза нуклеозидті/нуклеотидті тежегіштері (КТНТ) сияқты дәрілік препараттармен ем алатын пациенттер ем басталғанға дейін лактатацидоздың бар-жоғы тұрғысынан тексеруден өтуі және лактат негізіндегі перитонеальді диализге арналған ерітінділерді қолдана отырып емдеу кезінде байқалуы тиіс. Ерітіндіні тағайындаған кезде әрбір жеке пациентке диализ терапиясы мен басқа ауруларды емдеу үшін қолданылатын препараттар арасындағы ықтимал өзара әрекеттесуді ескеру қажет. Жүрек гликозидтерімен ем қабылдайтын пациенттерде қан сарысуындағы калий деңгейін мұқият бақылау керек. Экстранил препаратын қолданғанда құрамында бактериялар (асептикалық перитонит) бар немесе жоқ іштің ауырсынуын, дренаж бойынша бұлыңғыр бөліністі қоса, құрсақ тарапынан реакциялар байқалды. Құрсақ тарапынан реакциялар туындаған жағдайда пациент икодекстриннің пакетін серия нөмірімен бірге құрғатылған сұйықтықпен бірге сақтауы және пакеттен құрғатылған сұйықтыққа талдау жүргізу үшін дәрігермен байланысуы тиіс. Дренаждалған сұйықтықты фибриннің немесе бұлыңғырлықтың бар-жоғын тексеру керек, бұл инфекцияның немесе асептикалық перитониттің бар-жоғын көрсетуі мүмкін. Пациенттерге мұндай жағдайларда олардың өз дәрігерімен байланысуына нұсқау беру керек және тиісті микробиологиялық талдаулар жүргізу үшін үлгілерді алу қажет. Бактерияға қарсы емді бастау туралы шешім инфекцияның болуы немесе болмауы белгілері негізінде қабылдануы тиіс. Егер сұйықтық бұлыңғырлануының басқа да ықтимал себептері жоққа шығарылса, Экстранил препаратын енгізуді тоқтатып, нәтижелерін бағалау керек. Егер Экстранил препаратын қолдану тоқтатылса және осыдан кейін сұйықтық мөлдір болса, Экстранил препаратын қолдануды пациент мұқият медициналық бақылауда болған жағдайларды қоспағанда, қайта бастауға болмайды. Егер Экстранил препаратын қайта енгізген кезде сұйықтық қайтадан бұлыңғыр болып кетсе, Экстранилді бұл пациентте бұдан былай қолдануға болмайды. Перитонеальді диализ жүргізумен альтернативті терапияны бастау және пациенттің жағдайын мұқият бақылау керек. Перитонит дамыған жағдайда бактерияға қарсы препараттарды және олардың дозаларын таңдау кезінде мүмкіндігінше микроорганизмдердің нақты түрлерін және олардың бактерияға қарсы препараттарға сезімталдығын анықтауға арналған талдаулардың нәтижелерін басшылыққа алған жөн. Нақты қоздырғыштарды анықтағанға дейін, егер көрсетілім болса, кең спектрлі антибиотиктерді қолдануға болады. Сирек жағдайларда Экстранил препаратымен байланысты аса жоғары сезімталдықтың уытты эпидермальді некролиз, ангионевроздық ісіну, полиформалық эритема және васкулит сияқты күрделі реакцияларының туындағаны туралы хабарланды. Анафилаксиялық / анафилактоидты реакциялар байқалуы мүмкін. Күдікті аса жоғары сезімталдық реакциясының кез келген белгілері немесе симптомдары пайда болған кезде инфузияны дереу тоқтатып, ерітіндіні құрсақ қуысынан шығару қажет. Клиникалық көрсетілімдерге байланысты тиісті емдік іс-шараларды бастау қажет. Жедел бүйрек жеткіліксіздігі бар пациенттерде Экстранил препаратын қолдану ұсынылмайды. Перитонеальді диализ емшаралары кезінде организмнен ақуызды, амин қышқылдарын, суда еритін дәрумендерді және басқа дәрілік препараттарды шығару мүмкін болады, осыған байланысты оларды толықтыру қажет болуы мүмкін. Гипергидратация немесе сусыздануды болдырмау үшін мұқият мониторинг жүргізу қажет. Гипергидратацияға немесе сусыздануға жол бермеу үшін пациенттер мұқият қадағалауда болуы тиіс. Күшейтілген ультрафильтрация, әсіресе егде пациенттерде, гипотензияның және ықтимал неврологиялық симптомдардың кейіннен дамуымен сусыздануға әкелуі мүмкін. Сұйықтықтың тепе-теңдігін дәл есепке алу және пациенттің дене салмағын бақылау қажет. Экстранил препаратының артық көлемін құрсақ қуысына енгізу іштің кебуімен, толу сезімімен және/немесе ентігумен қатар жүруі мүмкін. Экстранил препаратының артық көлемін енгізген жағдайда жағдайды түзету оны дренаж арқылы құрсақ қуысынан алып тастау болып табылады. Қалыпты тамақтануға кедергі келтіретін, тыныс алу функциясының бұзылуы немесе калий тапшылығы бар пациенттерде перитонеальді диализге арналған басқа сұйықтықтар сияқты икодекстринді сақтықпен және препараттың ықтимал қауіптері мен пайдалы әсерлерін жан-жақты бағалағаннан кейін қолданған жөн. Сұйықтық мөлшерін, клиникалық және биохимиялық қан талдауларының параметрлерін, сондай-ақ магний мен бикарбонаттарды қоса электролиттердің деңгейін мезгіл-мезгіл бақылап отыру керек. Қан сарысуындағы магний деңгейінің төмендеуі жағдайында құрамында магний бар қоспаларды тағайындауға немесе құрамында магнийдің жоғары концентрациясы бар перитонеальді диализге арналған ерітінділерді қолдануға болады. Кейбір пациенттерде қан сарысуындағы натрий мен хлоридтер деңгейінің төмендеуі байқалды. Осы параметрлердің төмендеуі клиникалық тұрғыдан елеусіз деп бағаланғанына қарамастан, қан сарысуындағы электролиттердің деңгейін үнемі бақылау ұсынылады. ПД емшараларын жүргізумен ұзақ уақыт ем қабылдап жүрген пациенттерде қан сарысуындағы амилаза деңгейінің төмендеуі жиі байқалды. Мұндай төмендеу ешқандай жағымсыз әсерлермен қатар жүрмеді. Алайда, амилаза деңгейінің мұндай төмендеуі әдетте жедел панкреатитте байқалатын сарысулық амилаза деңгейінің жоғарылауын бүркемелей ала ма, жоқ па белгісіз. Клиникалық зерттеулер барысында қан сарысуындағы сілтілік фосфатазаның шамамен 20 ХБ/л жоғарылауы байқалды. Сілтілік фосфатаза деңгейінің жоғарылауы аспартатаминотрансфераза (SGOT) деңгейінің жоғарылауымен қатар жүретін жекелеген жағдайлар тіркелді. Арнайы ескертулер Бала жасындағы пациенттер Балаларға Экстранил препаратын қолдану ұсынылмайды. Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері Перитонеальді диализ емшара жүргізу арқылы емделетін бүйрек жеткіліксіздігінің терминалдық сатысы бар пациенттерде көлік құралдарын басқару немесе күрделі механизмдермен жұмыс істеу қабілетіне әсер етуі мүмкін жағымсыз әсерлер болуы мүмкін.

Жүкті әйелдерде Экстранил препаратын қолдану туралы деректер жоқ немесе шектеулі. Экстранилді жүктілік кезінде және контрацепция құралдарын пайдаланбайтын бала тууға қабілетті әйелдерде қолдану ұсынылмайды. Экстранил немесе оның метаболиттері адам емшек сүтімен бөлінетіні анықталған жоқ. Жаңа туған нәресте/емшектегі бала үшін қауіптің болуын жоққа шығаруға болмайды. Емшек емізуді тоқтату немесе Экстранил препаратын қолданумен емді тоқтату/тоқтата тұру туралы шешімді бала үшін емшек емізудің пайдасын және әйел үшін терапияның пайдасын ескере отырып қабылдау керек.

Экстранил препараты үшін өзара әрекеттесу бойынша зерттеулер жүргізілген жоқ. Диализ арқылы шығарылатын дәрілік препараттардың қандағы концентрациясы диализ емшарасы кезінде төмендеуі мүмкін. Қажет болса, түзету терапиялық шараларын жүргізу керек. Зертханалық талдау нәтижелеріне әсері Мальтозаның болуымен нәтиженің бұрмалану ықтималдығына жол бермеу үшін қандағы глюкоза деңгейін өлшеу глюкозаға тән әдісті қолдана отырып жүргізілуі керек. Пирролокинолинхинонға тәуелді глюкозодегидрогеназа (GDH-PQQ) немесе глюкоза-хромоген-оксидоредуктаза (GDO) негізіндегі әдістерді қолдануға болмайды. Одан өзге, талдау әдісі флавинадениндинуклеотид-глюкозодегидрогеназаға (GDH-FAD) негізделген кейбір глюкометрлер мен тест-жолақтарын қолданған кезде талданатын ерітіндіде мальтозаның болуына байланысты глюкоза концентрациясының мәндерін жалған жоғарылатуға болады. Экстранил препаратын қолданатын пациенттерде сарысудың амилаза белсенділігінің айтарлықтай төмендеуі байқалды. Үйлесімсіздік Дәрігермен кеңесу ұсынылады. Егер дәрігер қатарлас препараттарды енгізу орынды деп санаса, мұны асептика ережелеріне сәйкес жасау керек. Калийді қосу Калий Экстранил ерітінділерінен алынып тасталды, өйткені диализ гиперкалиемияны түзету үшін жасалуы мүмкін. Калийдің қалыпты сарысулық деңгейі немесе гипокалиемия байқалатын жағдайларда ауыр гипокалемияны болдырмау үшін калий хлоридінің қосылуы (4 мЭкв/л концентрациясына дейін) көрсетілуі мүмкін, калий хлоридін қосу туралы шешімді сарысудағы калийді дәл анықтағаннан кейін дәрігер қабылдауы тиіс. Инсулин қосу Экстранил препаратына инсулиннің қосылуы бүйрек жеткіліксіздігінің терминалдық сатысында ПАПД жүргізген инсулинге тәуелді диабеті бар 6 пациентте бағаланды. Экстранил препаратының құрсақ қуысынан инсулиннің абсорбциясына немесе инсулиннің қандағы глюкозаны бақылау қабілетіне әсері анықталған жоқ. Экстранил препаратын диабеті бар пациенттерде қолдана бастаған кезде қан глюкозасына тиісті мониторинг жүргізу және қажет болса инсулин дозасын түзету керек. Гепарин қосу Гепаринмен дәрілік өзара әрекеттесудің клиникалық зерттеулері жүргізілмеген. In vitro зерттеулер гепариннің Экстранил препаратымен үйлеспейтіндігін көрсетті. Антибиотиктерді қосу Дәрілік өзара әрекеттесудің ресми клиникалық зерттеулері жүргізілген жоқ. Экстранил препаратының және кейіннен антибиотиктерді қолданудың in vitro үйлесімділігін зерттеу ең төменгі тежегіш концентрацияға (MIC) әсерінің жоқтығын көрсетті: ванкомицин, цефазолин, ампициллин, ампициллин/флюкоксациллин, цефтазидим, гентамицин және амфотерицин. Аминогликозидтерді химиялық сәйкессіздікке байланысты пенициллиндермен араластыруға болмайды.

Сақтау мерзімі Сақтау мерзімі 2 жыл Жарамдылық мерзімі өткеннен кейін қолдануға болмайды! Сақтау шарттары 30 °С-ден аспайтын температурада сақтау керек. Мұздатып қатыруға болмайды! Балалардың қолы жетпейтін жерде сақтау керек!